1440. ඛණ්ඩො නාමාසි නාමෙන විපස්සිස්ස’ග්ගසාවකො, එකා භික්ඛා මයා දින්නා ලොකාහුතිපටිග්ගහෙ.
1441. තෙන චිත්තප්පසාදෙන දිපදින්දෙ නරාසභෙ,{4} දුග්ගතිං නාභිජානාමි එකභික්ඛායිදං ඵලං.
1442. චත්තාළීසෙ ඉතො කප්පෙ වරුණො නාම ඛත්තියො, සත්තරතනසම්පන්නො චක්කවත්තී මහබ්බලො.
1443. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා එකසඤ්ඤකො ථෙරො ඉමා ගාථායො අභාසිත්ථාති.
එකසඤ්ඤකත්ථෙරස්ස අපදානං පඤ්චමං.
76. තිණසන්ථරදායකත්ථෙරාපදානං
1444. හිමවන්තස්ස අවිදූරෙ මහාජාතස්සරො අහු, සතපත්තෙහි සඤ්ඡන්නො නානාසකුණමාලයො.
1445. තම්හි නහාත්වා පීත්වා ච අවිදූරෙ වසාමහං, අද්දසං සමණානග්ගං ගච්ඡන්තං අනිලඤ්ජසෙ.
1446. මම සඞ්කප්පමඤ්ඤාය සත්ථා ලොකෙ අනුත්තරො, ව්යම්හතො ඔරුහිත්වාන භූමියට්ඨාසි තාවදෙ.
1447. විසාණෙන තිණං ගය්හ නිසීදනමදාසහං, නිසීදි භගවා තත්ථ තිස්සො ලොකග්ගනායකො{1}.
1448. සකං චිත්තං පසාදෙත්වා අවන්දිං ලොකනායකං, පතිකුටිකො{2} අපසක්කිං{3} නිජ්ඣායන්තො මහාමුනිං.
1449. තෙන චිත්තප්පසාදෙන නිම්මාණං උප්පජ්ජහං, දුග්ගතිං නාභිජානාමි සන්ථරස්ස ඉදං ඵලං.
1450. ඉතො දුතියකෙ කප්පෙ මිගසම්මතඛත්තියො, සත්තරතනසම්පන්නො චක්කවත්තී මහබ්බලො.
1451. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා තිණසන්ථරදායකො ථෙරො ඉමා ගාථායො අභාසිත්ථාති.
තිණසන්ථරදායකත්ථෙරස්ස අපදානං ඡට්ඨං.
77. සූචිදායකත්ථෙරාපදානං
1452. තිංසකප්පසහස්සම්හි සම්බුද්ධො ලොකනායකො, සුමෙධො නාම නාමෙන බත්තිංසවරලක්ඛණො.
1453. තස්ස කඤ්චනවණ්ණස්ස දිපදින්දස්ස තාදිනො, පඤ්ච සූචී මයා දින්නා සිබ්බනත්ථාය චීවරං.
1454. තෙනෙ’ව සූචිදානෙන නිපුණත්ථවිපස්සකං, තික්ඛං ලහුඤ්ච ඵාසුඤ්ච ඤාණං මෙ උදපජ්ජථ.
1455. දිපදාධිපතී නාම රාජානො චතුරො අහුං, සත්තරතනසම්පන්නා චක්කවත්තී මහබ්බලා.
1456. කිලෙසා ඣාපිතා මය්හං භවා සබ්බෙ සමූහතා, ධාරෙමි අන්තිමං දෙහං සම්මාසම්බුද්ධසාසනෙ.
1457. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සූචිදායකො ථෙරො ඉමා ගාථායො අභාසිත්ථාති.
සූචිදායකත්ථෙරස්ස අපදානං සත්තමං.
78. පාටලිපුප්ඵියත්ථෙරාපදානං
1458. සෙට්ඨිපුත්තො තදා ආසිං සුඛුමාලො සුඛෙධිතො උච්ඡඞ්ගෙ පාටලීපුප්ඵං කත්වා තං අභිසංහරිං.
1459. සුවණ්ණවණ්ණං සම්බුද්ධං ගච්ඡන්තං අන්තරාපණෙ, කඤ්චනග්ඝියසඞ්කාසං ද්වත්තිංස{1} වරලක්ඛණං.{*}
1460. හට්ඨො හට්ඨෙන චිත්තෙන පුප්ඵෙන{2} අභිපූජයිං, තිස්සං ලොකවිදුං නාථං නරදෙවං නමස්සහං.
1461. ද්වෙනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි පුප්ඵපූජායිදං ඵලං.
1462. ඉතො තෙසට්ඨිකප්පම්හි අභිසම්මතනාමකො, සත්තරතනසම්පන්නො චක්කවත්තී මහබ්බලො.
1463. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා පාටලිපුප්ඵියො ථෙරො ඉමා ගාථායො අභාසිත්ථාති.
පාටලිපුප්ඵියත්ථෙරස්ස අපදානං අට්ඨමං.
79. ඨිතඤ්ජලියත්ථෙරාපදානං
1464. මිගලුද්දො පුරෙ ආසිං අරඤ්ඤෙ කානනෙ අහං, තත්ථද්දසාසිං සම්බුද්ධං තිස්සං පවරලක්ඛණං.
1465. තස්සාහං{3} අඤ්ජලිං කත්වා පක්කාමිං පාචිනාමුඛො, අවිදූරෙ නිසින්නස්ස නියකෙ පණ්ණසන්ථරෙ.
1466. තතො මෙ අසනීපාතො මත්ථකෙ නිපතී තදා, සො’හං මරණකාලම්හි අකාසිං පුනරඤ්ජලිං.
1467. ද්වෙනවුතෙ ඉතො කප්පෙ අඤ්ජලිං අකරිං තදා, දුග්ගතිං නාභිජානාමි අඤ්ජලිස්ස ඉදං ඵලං.
1468. චතුපඤ්ඤාසකප්පම්හි මිගකෙතු සනාමකො, සත්තරතනසම්පන්නො චක්කවත්තී මහබ්බලො.
1469. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා ඨිතඤ්ජලියො ථෙරො ඉමා ගාථායො අභාසිත්ථාති.
ඨිතඤ්ජලියත්ථෙරස්ස අපදානං නවමං.
80. තිපදුමියත්ථෙරාපදානං
1470. පදුමුත්තරො නාම ජිනො සබ්බධම්මානපාරගූ, දන්තො දන්තපරිවුතො නගරා නික්ඛමී ජිනො.
1471. නගරෙ හංසවතියා අහොසිං මාලිකො තදා, යං තත්ථ උත්තමං පුප්ඵං තීණි පුප්ඵානි{1} අග්ගහිං.
1472. අද්දසං විරජං බුද්ධං පටිමග්ගන්තරාපණෙ, සො’හං{2} දිස්වාන සම්බුද්ධං එවං චින්තෙසහං තදා:
1473. “කිම්මෙ ඉමෙහි පුප්ඵෙහි රඤ්ඤො උපනතෙහි{3} මෙ, ගාමං වා ගාමක්ඛෙත්තං වා සහස්සං වා ලභෙය්යහං.
1474. අදන්තදමකං ධීරං සබ්බසත්තසුඛාවහං, ලොකනාථං පූජයිත්වා ලච්ඡාමි අමතං ධනං.”
1475. එවාහං චින්තයිත්වාන සකං චිත්තං පසාදයිං, තීණි ලොහිතකෙ ගය්හ ආකාසෙ උක්ඛිපිං{4} තදා.
1476. මයා උක්ඛිත්තමත්තම්හි ආකාසෙ පත්ථරිංසු{5} තෙ, ධාරිංසු මත්ථකෙ තත්ථ උද්ධංවණ්ටා අධොමුඛා.
1477. යෙ කෙචි මනුජා දිස්වා උක්කුට්ඨිං සම්පවත්තයුං, දෙවතා අන්තලික්ඛම්හි සාධුකාරං පවත්තයුං:
1478. “අච්ඡෙරං ලොකෙ උප්පන්නං බුද්ධසෙට්ඨස්ස වාහසා, සබ්බෙ ධම්මං සුණිස්සාම පුප්ඵානං වාහසා මයං.”
1479. පදුමුත්තරො ලොකවිදූ ආහුතීනං පටිග්ගහො, වීථියං හි ඨිතො සත්ථා{1} ඉමා ගාථා අභාසථ:
1480. “යො සො බුද්ධං අපූජෙසි රත්තපද්මෙහි{2} මාණවො, තමහං කිත්තයිස්සාමි සුණොථ මම භාසතො.
1481. තිංස කප්පසහස්සානි දෙවලොකෙ රමිස්සති, තිංස කප්පානි දෙවින්දො දෙවරජ්ජං කරිස්සති.
1482. මහාවිත්ථාරිකං නාමං ව්යම්හං හෙස්සති තාවදෙ, තියොජනසතුබ්බෙධං දියඩ්ඪසතවිත්ථතං.
1483. චත්තාරි සතසහස්සානි නිය්යුහා ච සුමාපිතා, කූටාගාරවරූපෙතා මහාසයනවොසිතා.
1484. කොටිසතසහස්සායො පරිවාරෙස්සන්ති අච්ඡරා, කුසලා නච්චගීතස්ස වාදිතෙපි පදක්ඛිණා
1485. එතාදිසෙ ව්යම්හවරෙ නාරීගණසමාකුලෙ, වස්සිස්සති පුප්ඵවස්සො දිබ්බො ලොහිතකො සදා.
1486. භිත්තිඛීලෙ නාගදන්තෙ ද්වාරබාහාය{3} තොරණෙ, චක්කමත්තා ලොහිතකා ඔලම්බිස්සන්ති තාවදෙ.
1487. පතෙතන පත්තසඤ්ඡන්නෙ{4} අන්තොව්යම්හවරෙ ඉධ, අත්ථරිත්වා පාරුපිත්වා තුවට්ටිස්සන්ති තාවදෙ.
1488. භවනං පරිවාරෙත්වා සමන්තා සතයොජනං, තෙ විසුද්ධා ලොහිතකා දිබ්බගන්ධං පවායරෙ.
1489. පඤ්චසත්තතික්ඛත්තුඤ්ච චක්කවත්තී භවිස්සති, පදෙසරජ්ජං විපුලං ගණනාතො අසංඛියං.
1490. සම්පත්තියො දුවෙ භුත්වා අනීති අනුපද්දවො, සම්පත්තෙ පරියොසානෙ නිබ්බානං ඵස්සයිස්සති.”
1491. සුදිට්ඨො වත මෙ බුද්ධො වාණිජ්ජං සුප්පයොජිතං, පද්මානි{5} තීණි පූජෙත්වා අනුභොසිං තිසම්පදං.
1492. අජ්ජ මෙ ධම්මප්පත්තස්ස විප්පමුත්තස්ස සබ්බසො, සුපුප්ඵිතං ලොහිතකං ධාරයිස්සති මත්ථකෙ.
1493. මම කම්මං{1} කථෙන්තස්ස පදුමුත්තරසත්ථුනො, සත්තපාණසහස්සානං ධම්මාභිසමයො අහු.
1494. සතසහස්සෙ ඉතො කප්පෙ යං බුද්ධමභිපූජයිං, දුග්ගතිං නාභිජානාමි තිණ්ණං පදුමානිදං{2} ඵලං.
1495. කිලෙසා ඣාපිතා මය්හං භවා සබ්බෙ සමූහතා, සබ්බාසවා පරික්ඛීණා නත්ථි’දානි පුනබ්භවො.
1496. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා තිපදුමියො ථෙරො ඉමා ගාථායො අභාසිත්ථාති.
තිපදුමියත්ථෙරස්ස අපදානං දසමං.
උද්දානං:
නාගසමාලො පදසඤ්ඤී සසඤ්ඤොලුවදායකො එකසඤ්ඤි තිණදදො සූචි පාටලිපුප්ඵියො ඨිතඤ්ජලී තිපදුමී ගාථායො පඤ්චසත්තති.
නාගසමාලවග්ගො අට්ඨමො.
9. තිමිරපුප්ඵියවග්ගො
81. තිමිරපුප්ඵියත්ථෙරාපදානං.
1497. චන්දභාගානදීතීරෙ අනුසොතං වජාමහං, නිසින්නං සමණං දිස්වා විප්පසන්නමනාවිලං.
1498. තත්ථ{3} චිත්තං පසාදෙත්වා එවං චින්තෙසහං තදා, “තාරයිස්සති තිණ්ණො’යං දන්තො’යං දමයිස්සති.
1499. අස්සාසෙස්සති අස්සත්ථො සන්තො ච සමයිස්සති, මොචයිස්සති මුත්තො ච නිබ්බාපෙස්සති නිබ්බුතො”.
1500. එවං සං{4} චින්තයිත්වාන සිද්ධත්ථස්ස මහෙසිනො, ගහෙත්වා තිමිරං පුප්ඵං මත්ථකෙ ඔකිරිං අහං.
1501. අඤ්ජලිං පග්ගහෙත්වාන කත්වාන ච පදක්ඛිණං, වන්දිත්වා සත්ථුනො පාදෙ පක්කාමිං අපරං දිසං.
1502. අචිරං ගතමත්තං මං මිගරාජා විහෙඨයී{1}, පපාතමනුගච්ඡන්තො තත්ථෙව පපතිං අහං.
1503. චතුනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
1504. ඡපඤ්ඤාසම්හි කප්පම්හි සත්තෙවාසුං මහායසා, සත්තරතනසම්පන්නා චක්කවත්තී මහබ්බලා.
1505. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා තිමිරපුප්ඵියො ථෙරො ඉමා ගාථායො අභාසිත්ථාති.
තිමිරපුප්ඵියත්ථෙරස්ස අපදානං පඨමං.
82. ගතසඤ්ඤකත්ථෙරාපදානං.
1506. ජාතියා සත්තවස්සො’හං පබ්බජිං අනගාරියං, අවන්දිං සත්ථුනො පාදෙ විප්පසන්නෙන චෙතසා.
1507. සත්ත නඞ්ගලිකීපුප්ඵෙ ආකාසෙ උක්ඛිපිං අහං, තිස්සං බුද්ධං සමුද්දිස්ස අනන්තගුණසාගරං.
1508. සුගතානුගතං{2} මග්ගං පූජෙත්වා හට්ඨමානසො අඤජලිඤ්ච තදා’කාසිං පසන්නො සෙහි පාණිහි.
1509. ද්වෙනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධපූජායිදං ඵලං.
1510. ඉතො අට්ඨමකෙ කප්පෙ තයො අග්ගිසිබා අහුං, සත්තරතනසම්පන්නා චක්කවත්තී මහබ්බලා.
1511. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා ගතසඤ්ඤකො ථෙරො ඉමා ගාථායො අභාසිත්ථාති.
ගතසඤ්ඤකත්ථෙරස්ස අපදානං දුතියං.
83. නිපන්නඤ්ජලියත්ථෙරාපදානං