1077. අන්තලික්ඛෙ ඨිතො සත්ථා අත්ථදස්සී නරාසභො මම චිත්තං පසාදෙන්තො ඉමා ගාථා අභාසථ.
1078. “යෙනි’දං ථවිතං ඤාණං බුද්ධසෙට්ඨො ච ථොමිතො, තෙන චිත්තප්පසාදෙන දුග්ගතිං සො න ගච්ඡති.
1079. චතුද්දසක්ඛත්තුං සො දෙවජ්ජං කරිස්සති, පථව්යා රජ්ජං{6} අට්ඨසතං{7} වසුධං ආවසිස්සති.
1080. අථ පඤ්චසතක්ඛත්තුං{1} චක්කවත්තී භවිස්සති, පදෙසරජ්ජමසඞ්ඛෙය්යං මහියා කාරයිස්සති.
1081. අජ්ඣායකො මන්තධරො තිණ්ණං වෙදානපාරගූ, ගොතමස්ස භගවතො සාසනෙ පබ්බජිස්සති.
1082. ගම්භීරං නිපුණං අත්ථං ඤාණෙන විචිනිස්සති, මොඝරාජාති නාමෙන හෙස්සති සත්ථු සාවකො.
1083. තීහි විජ්ජාහි සම්පන්නං කතකිච්චං අනාසවං{2}, ගොතමො සත්ථවාහග්ගො එතදග්ගෙ ඨපෙස්සති.”
1084. හිත්වා මානුසකං යොගං ඡෙත්වාන භවබන්ධනං, සබ්බාසවෙ පරිඤ්ඤාය විහරාමි අනාසවො.
1085. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා මොඝරාජා ථෙරො ඉමා ගාථායො අභාසිත්ථාති.
මොඝරාජත්ථෙරස්සාපදානං පඤ්චමං.
36. අධිමුත්තත්ථෙරාපදානං.{*}
1086. නිබ්බුතෙ ලොකනාථම්හි අත්ථදස්සිනරුත්තමෙ, උපට්ඨහිං{3} භික්ඛුසංඝං විප්පසන්නෙන චෙතසා.
1087. නිමන්තෙත්වා සඞ්ඝරතනං උජුභූතං සමාහිතං, උච්ඡුනා මණ්ඩපං කත්වා භොජෙසිං සංඝමුත්තමං.
1088. යං යං යො’නුපපජ්ජාමි දෙවත්තං අථ මානුසං, සබ්බෙ සතෙ අභිභොමි පුඤ්ඤකම්මස්සි’දං ඵලං
1089. අට්ඨාරසෙ කප්පසතෙ යං දානමදදිං තදා, දුග්ගතිං නාභිජානාමි උච්ඡුදානස්සි’දං ඵලං.
1090. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා අධිමුත්තො ථෙරො ඉමා ගාථායො අභාසිත්ථාති.
අධිමුත්තත්ථෙරස්සාපදානං ඡට්ඨං.
37. ලසුණදායකත්ථෙරාපදානං.
1091. හිමවන්තස්ස අවිදූරෙ තාපසො ආස’හං තදා, ලසුණං උපජීවාමි ලසුණං මය්හ භොජනං.
1092. ඛාරියො පූරයිත්වාන සංඝාරාමමගච්ඡ’හං, හට්ඨො හට්ඨෙන චිත්තෙන සංඝස්ස ලසුණං අදං.
1093. විපස්සිස්ස නරග්ගස්ස සාසනෙ නිරතස්ස’හං, සංඝස්ස ලසුණං දත්වා කප්පං සග්ගම්හි මොද’හං
1094. එකනවුතෙ ඉතො කප්පෙ ලසුණං යම’දං තදා, දුග්ගතිං නාභිජානාමි ලසුණානං{1} ඉදං ඵලං.
1095. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා ලසුණදායකො ථෙරො ඉමා ගාථායො අභාසිත්ථාති.
ලසුණදායකත්ථෙරස්සාපදානං සත්තමං.
38. ආයාගදායකත්ථෙරාපදානං
1096. නිබ්බුතෙ ලොකනාථම්භි සිඛිම්හි වදතං වරෙ, හට්ඨො හට්ඨෙන චිත්තෙන අවන්දිං ථූපමුත්තමං.
1097. වඩ්ඪකීහි කථාපෙත්වා මූලං දත්වාන’හං තදා, හට්ඨො හට්ඨෙන චිත්තෙන ආයාගං කාරපෙස’හං.
1098. අට්ඨ කප්පානි දෙවෙසු අබ්බොච්ඡින්නං වසිං අහං, අවසෙසෙසු කප්පෙසු වොකිණ්ණං සංසරිං අහං.
1099. කායෙ විසං න කමති සත්ථානි න ච හන්ති මෙ, උදකෙ’හං න මිය්යාමි ආයාගස්ස ඉදං ඵලං.
1100. යදිච්ඡාමි අහං වස්සං මහාමෙඝො පවස්සති, දෙවාපි මෙ වසං එන්ති පුඤ්ඤකම්මස්සි’දං ඵලං.
1101. සත්තරතනසම්පන්නො තිංසක්ඛත්තුං අහොස’හං, න මං කෙච’වජානන්ති පුඤ්ඤකම්මස්සි’දං ඵලං.
1102. එකතිංසෙ ඉතො කප්පෙ ආයාගං යමකාරයිං, දුග්ගතිං නාභිජානාමි ආයාගස්ස ඉදං ඵලං.
1103. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා ආයාගදායකො ථෙරො ඉමා ගාථායො අභාසිත්ථාති.
ආයාගදායකත්ථෙරස්සාපදානං අට්ඨමං.
39. ධම්මචක්කිකත්ථෙරාපදානං.
1104. සිද්ධත්ථස්ස භගවතො සීහාසනස්ස සම්මුඛා, ධම්මචක්කං මයා ඨපිතං සුකතං විඤ්ඤුවණ්ණිතං.
1105. චාරුවණ්ණොව සොභාමි සයොග්ගබලවාහනො, පරිවාරෙන්ති මං නිච්චං අනුයුත්තා බහුජ්ජනා.
1106. සට්ඨිතුරියසහස්සෙහි පරිචාරෙම’හං{1} සදා, පරිවාරෙන සොභාමි පුඤ්ඤකම්මස්සි’දං ඵලං.
1107. චතුනවුතෙ ඉතො කප්පෙ යං චක්කං ඨපයිං අහං, දුග්ගතිං නාභිජානාමි ධම්මචක්කස්සි’දං ඵලං.
1108. ඉතො එකාදසෙ කප්පෙ අට්ඨා’සිංසු{*} ජනාධිපා, සහස්සරාජනාමෙන චක්කවත්තී මහබ්බලා.
1109. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා ධම්මචක්කිකො ථෙරො ඉමා ගාථායො අභාසිත්ථාති.
ධම්මචක්කිකත්ථෙරස්සාපදානං නවමං.
40. කප්පරුක්ඛියත්ථෙරාපදානං.
1110. සිද්ධත්ථස්ස භගවතො ථූපසෙට්ඨස්ස සම්මුඛා, විචිත්තදුස්සෙ ලග්ගෙත්වා{2} කප්පරුක්ඛං ඨපෙස’හං.
1111. යං යං යො’නුපපජ්ජාමි දෙවත්තං අථ මානුසං, සොභයන්තො මම ද්වාරං කප්පරුක්ඛො’පතිට්ඨති{3}.
1112. අහඤ්ච පරිසා චෙව යෙ කෙචි මම නිස්සිතා,{4} තම්හා දුස්සං ගහෙත්වාන නිවාසෙම මයං සදා.
1113. චතුනවුතෙ ඉතො කප්පෙ යං රුක්ඛං ඨපයිං{5} තදා, දුග්ගතිං නාභිජානාමි කප්පරුක්ඛස්සි’දං ඵලං.
1114. ඉතො ච සත්තමො කප්පෙ සුචෙළා අට්ඨ ඛත්තියා, සත්තරතනසම්පන්නා චක්කවත්තී මහබ්බලා.
1115. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා කප්පරුක්ඛියො ථෙරො ඉමා ගාථායො අභාසිත්ථාති.
කප්පරුක්ඛියත්ථෙරස්සාපදානං දසමං.
උද්දානං:
කුණ්ඩ - සාගත - කච්චානා උදායී මොඝරාජකො, අධිමුත්තො ලසුණදො ආයාගී{6} ධම්මචක්කිකො, කප්පරුක්ඛී ච දසමො ගාථායො ද්වාදස සතන්ති.
කුණ්ඩධානවග්ගො චතුත්ථො.
5. උපාලිවග්ගො
41. භාගිනෙය්යඋපාලිත්ථෙරාපදානං.
1116. ඛීණාසවසහස්සෙහි පරිවුතො ලොකනායකො, විවෙකමනුයුත්තො සො ගච්ඡතෙ පටිසල්ලිතුං.
1117. අජිනෙන නිවත්ථො’හං තිදණ්ඩපරිධාරකො{1}, භික්ඛුසංඝපරිබ්බූළ්හං අද්දසං ලොකනායකං.
1118. එකංසං අජිනං කත්වා සිරෙ කත්වාන අඤ්ජලිං, සම්බුද්ධං අභිවාදෙත්වා සන්ථවිං ලොකනායකං:
1119. “යථාණ්ඩජා ච සංසෙදා ඔපපාතී ජලාබුජා, කාකාදිපක්ඛිනො සබ්බෙ අන්තළික්ඛවරා සදා{2}.
1120. යෙ කෙචි පාණභූතත්ථි සඤ්ඤිනො වා අසඤ්ඤිනො, සබ්බෙ තෙ තව ඤාණම්හි අන්තො හොන්ති සමොගධා.
1121. ගන්ධා ච පබ්බතෙය්යා යෙ භිමවන්තනගුත්තමෙ, සබ්බෙ තෙ තව සීලම්හි කලාය{3}පි න යුජ්ජරෙ.
1122. මොහන්ධකාරපක්ඛන්නො අයං ලොකො සදෙවකො, තව ඤාණම්හි ජොතන්තෙ අන්ධකාරා විධංසිතා.
1123. යථා අත්ථඞ්ගතෙ සුරියෙ හොන්ති සත්තා තමොගතා, එවං බුද්ධො අනුප්පන්නෙ හොති ලොකො තමොගතො.{4}
1124. යථොදයන්තො ආදිච්චො විනොදෙති තමං සදා, තථෙව ත්වං බුද්ධසෙට්ඨ විද්ධංසෙසි තමං සදා.
1125. පධාපහිතත්තො’සි බුද්ධො ලොකෙ සදෙවකෙ, තව කම්මාභිරද්ධෙන තොසෙසි ජනතං බහුං.”
1126. තං සබ්බං අනුමොදිත්වා පදුමුත්තරො මහාමුනි, නභං අබ්භුග්ගමී ධීරො හංසරාජා’ව අම්බරෙ.
1127. අබ්භුග්ගන්ත්වාන සම්බුද්ධො මහෙසී පදුමුත්තරො, අන්තළික්ඛෙ ඨිතො සත්ථා ඉමා ගාථා අභාසථ:
1128. “යෙනි’දං ථවිතං ඤාණං ඔපම්මෙහි සමායුතං, තමහං කිත්තයිස්සාමි සුණාථ මම භාසතො.
1129. අට්ඨාරසක්ඛත්තුං සො දෙවරාජා භවිස්සති, පථව්යා රජ්ජං තිසතං වසුධං ආවසිස්සති.
1130. පඤ්චවීසතික්ඛත්තුඤ්ච චක්කවත්තී භවිස්සති, පදෙසරජ්ජං විපුලං ගණනාතො අසංඛියං.
1131. කප්පසතසහස්සම්හි ඔක්කාකකුලසම්භවො, ගොතමො නාම නාමෙන සත්ථා ලොකෙ භවිස්සති.
1132. තුසිතා හි චවිත්වාන සුක්කමූලෙන චොදිතො, භිනො’ව ජාතියා සන්තො උපාලි නාම හෙස්සති.
1133. සො ච පච්ඡා පබ්බජිත්වා විරාජෙත්වාන පාපකං, සබ්බාසවෙ පරිඤ්ඤාය නිබ්බායිස්සතනාසවො.
1134. තුට්ඨො ච ගොතමො බුද්ධො සක්යපුත්තො මහායසො, විනයාධිගතං තං ස එතදග්ගෙ ඨපෙස්සති.”
1135. සද්ධායාහං පබ්බජිතො කතකිච්චො අනාසවො, සබ්බාසවෙ පරිඤ්ඤාය විහරාමි අනාසවො.
1136. භගවා චානුකම්පි මං විනයෙ’හං විසාරදො, සකකම්මාභිරද්ධො ච විහාරාමි අනාසවො.
1137. සංවුතො පාතිමොක්ඛම්හි ඉන්ද්රියෙසු ච පඤ්චසු, ධාරෙමි විනයං සබ්බං කෙවලං රතනාකරං.
1138. මමඤ්ච ගුණමඤ්ඤාය සත්ථා ලොකෙ අනුත්තරො, භික්ඛුසංඝෙ නිසීදිත්වා එතදග්ගෙ ඨපෙසි මං.
1139. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා උපාලිථෙරො ඉමා ගාථායො අභාසිත්ථාති.
භාගිනෙය්යඋපාලිත්ථෙරස්ස{1} අපදානං පඨමං.
42. සොණකොටිකණ්ණ{2}ත්ථෙරාපදානං
1140. {*}අනොමදස්සිමුනිනො ලොකජෙට්ඨස්ස තාදිනො, සුධාය ලෙපනං කත්වා චඞ්කමං කාරයිං අහං.
1141. නානාවණ්ණෙහි පුප්ඵෙහි චඞ්කමං සන්ථරිං අහං, ආකාසෙ විතානං කත්වා භොජසිං බුද්ධමුත්තමං.
1142. අඤ්ජලිම්පග්ගහෙත්වාන අභිවාදෙත්වාන සුබ්බතං, දීඝසාලං භගවතො නිය්යාදෙසිමහං තදා.
1143. මම සඞ්කප්පමඤ්ඤාය සත්ථා ලොකෙ අනුත්තරො, පටිග්ගහෙසි භගවා අනුකම්පාය චක්ඛුමා.
1144. පටිග්ගහෙත්වා සම්බුද්ධො දක්ඛිණෙය්යො සදෙවකෙ, භික්ඛුසංඝෙ නිසීදිත්වා ඉමා ගාථා අභාසථ:
1145. “යො සො හට්ඨෙන චිත්තෙන දීඝසාලං අකාසි{1} මෙ, තමහං කිත්තයිස්සාමි සුණාථ මම භාසතො.
1146. ඉමස්ස මච්චුකාලම්හි පුඤ්ඤකම්මසමඞ්ගිනො, සහස්සයුත්ත’ස්සරථො උපට්ඨිස්සති තාවදෙ.
1147. තෙන යානෙන’යං පොසො දෙවලොකං ගමිස්සති, අනුමොදිස්සරෙ දෙවා සම්පත්තෙ කුසලෙ භවෙ.
1148. මහාරහං ව්යම්හසෙට්ඨං රතනමත්තිකලෙපනං{2}, කූටාගාරවරූපෙතං ව්යම්හං අජ්ඣාවසිස්සති.
1149. තිංස කප්පසහස්සානි දෙවලොකෙ රමිස්සති, පඤ්චවීසති කප්පානි දෙවරාජා භවිස්සති.
1150. සත්තසත්තතික්ඛත්තුඤ්ච චක්කවත්තී භවිස්සති. යසොධර සනාමා{3} තෙ සබ්බෙපි එකනාමකා.
1151. ද්වෙ සම්පත්තී අනුභොත්වා චිනිත්වා{4} පුඤ්ඤසඤ්චයං, අට්ඨවීසතිකප්පම්භි චක්කවත්තී භවිස්සති.