උද්දානං:
මන්දාරවඤ්ච කක්කාරු භිස කෙසරපුප්ඵියො අඞ්කොලකො කදමබී ච උද්දාල එකචම්පකො තිමිරං සලලඤ්චෙව ගාථා තාළීස එව ච.
මන්දාරවපුප්ඵියවග්ගො සත්තතිංසතිමො.
38. බොධිවන්දකවග්ගො
371. බොධිවන්දකත්ථෙරාපදානං
3220. පාටලිං හරිතං දිස්වා පාදපං ධරණීරුහං, එකංසං අඤ්ජලිං කත්වා අවන්දිං පාටලිං අහං.
3221. අඤ්ජලිං පග්ගහෙත්වාන ගරුං කත්වාන මානසං, අන්තොසුද්ධං බහිසුද්ධං සුවිමුත්තමනාසවං.
3222. විපස්සිං ලොකමහිතං කරුණාඤාණසාගරං, සම්මුඛා විය සම්බුද්ධං අවන්දිං පාටලිං අහං.
3223. එකනවුතෙ ඉතො කප්පෙ යං බොධිමභිවන්ද’හං, දුග්ගතිං නාභිජානාමි වන්දනාය ඉදං ඵලං.
3224. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා බොධිවන්දකො ථෙරො ඉමා ගාථායො අභාසිත්ථාති.
බොධිවන්දකත්ථෙරස්ස අපදානං පඨමං.
372. පාටලිපුප්ඵියත්ථෙරාපදානං.
3225. විපස්සී නාම භගවා සයම්භූ අග්ගපුග්ගලො, පුරක්ඛතො සසිස්සෙහි බන්ධුමං පාවිසි ජිනො{1}.
3226. තීණි පාටලිපුප්ඵානි උච්ඡඞ්ගෙ ඨපිතානි මෙ, සීසං නහාතුකාමොව{2} නදීතිත්ථං අගච්ඡ’හං.
3227. නික්ඛම්ම බන්ධුමතියා අද්දසං ලොකනායකං, ඉන්දීවරංව ජලිතං ආදිත්තංව හුතාසනං.
3228. ව්යග්ඝූසභංව පවරං අභිජාතංව කෙසරිං, ගච්ඡන්තං සමණාන’ග්ගං භික්ඛුසඞ්ඝපුරක්ඛතං.
3229. තස්මිං පසන්නො සුගතෙ කිලෙසමලධොවනෙ, ගහෙත්වා තීණි පුප්ඵානි බුද්ධසෙට්ඨමපූජයිං.
3230. එකනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
3231. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පාටලිපුප්ඵියො ථෙරො ඉමා ගාථායො අභාසිත්ථාති.
පාටලිපුප්ඵියත්ථෙරස්ස අපදානං දුතියං.
373. තිඋප්පලමාලියත්ථෙරාපදානං.{1}
3232. චන්දභාගානදීතීරෙ අහොසිං වානරො තදා, අද්දසං විරජං බුද්ධං නිසින්නං පබ්බතන්තරෙ.
3233. ඔභාසෙන්තං දිසා සබ්බා සාලරාජංව ඵුල්ලිතං, ලක්ඛණබ්යඤ්ජනූපෙතං දිස්වා අත්තමනො{2} අහං.
3234. උදග්ගචිත්තො සුමනො පීතියා හට්ඨමානසො, තීණි උප්පලපුප්ඵානි මත්ථකෙ අභිරොපයිං.
3235. පූජයිත්වාන පුප්ඵානි ඵුස්සස්සාහං මහෙසිනො, සගාරවො භවිත්වාන පක්කාමිං උත්තරාමුඛො.
3236. ගච්ඡන්තො පටිකුටිකො විප්පසන්නෙන චෙතසා, සෙලන්තරෙ පතිත්වාන පාපුණිං ජීවිතක්ඛයං.
3237. තෙන කම්මෙන සුකතෙන චෙතනාපණිධීහි ච, ජහිත්වා පුරිමං ජාතිං තාවතිංසමගච්ඡහං.
3238. සතානං තීණික්ඛත්තුඤ්ච දෙවරජ්ජමකාරයිං, සතානං පඤ්චක්ඛත්තුඤ්ච චක්කවත්තී අහොස’හං.
3239. ද්වෙනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
3240. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිඋප්පලමාලියො ථෙරො ඉමා ගාථායො අභාසිත්ථාති.
තිඋප්පලමාලියත්ථෙරස්ස අපදානං තතියං.
374. පටටිපුප්ඵියත්ථෙරාපදානං.
3241. යදා නිබ්බාසි{3} සම්බුද්ධො මහෙසී පදුමුත්තරො, සමාගම්ම ජනා සබ්බෙ සරීරං නීහරන්ති තෙ.
3242. නීහරන්තෙ සරීරම්හි වජ්ජමානාසු භෙරිසු, පසන්නචිත්තො සුමනො පට්ටිපුප්ඵං අපූජයිං.{4}
3243. සතසහස්සෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි සරීරපූජිතෙ ඵලං.
3244. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3245. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3246. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පට්ටිපුප්ඵියො ථෙරො ඉමා ගාථායො අභාසිත්ථාති.
පට්ටිපුප්ඵියත්ථෙරස්ස අපදානං චතුත්ථං.
375. සත්තපණ්ණියත්ථෙරාපදානං.
3247. සුමනො නාම සම්බුද්ධො උප්පජ්ජි ලොකනායකො, පසන්නචිත්තො සුමනො සත්තපණ්ණිමපූජයිං.
3248. සතසහස්සෙ ඉතො කප්පෙ සත්තපණ්ණිමපූජයිං, දුග්ගතිං නාභිජානාමි සත්තපණ්ණිස්සිදං{1} ඵලං.
3249. {*}ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3250. {*}කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3251. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සත්තපණ්ණියො ථෙරො ඉමා ගාථායො අභාසිත්ථාති.
සත්තපණ්ණියත්ථෙරස්ස අපදානං පඤ්චමං.
376. ගන්ධමුට්ඨියත්ථෙරාපදානං.
3252. චිතකෙ කරීයමානෙ නානාගන්ධෙ සමාහටෙ, පසන්නචිත්තො සුමනො ගන්ධමුට්ඨිමපූජයිං.
3253. සතසහස්සෙ ඉතො කප්පෙ චිතකං යං අපූජයිං, දුග්ගතිං නාභිජානාමි චිතපූජායිදං ඵලං.
3254. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3255. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3256. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ගන්ධමුට්ඨියො ථෙරො ඉමා ගාථායො අභාසිත්ථාති.
ගන්ධමුට්ඨියත්ථෙරස්ස අපදානං ඡට්ඨං.
377. චිතකපූජකත්ථෙරාපදානං.
3257. පරිනිබ්බුතෙ භගවති ජලජුත්තම නාමකෙ, ආරොපිතම්භි චිතකෙ සාලපුප්ඵමපූජයිං.
3258. සතසහස්සෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි චිතපූජායිදං ඵලං.
3259. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3260. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3261. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා චිතකපූජකො ථෙරො ඉමා ගාථායො අභාසිත්ථාති.
චිතකපූජකත්ථෙරස්ස අපදානං සත්තමං.
378. සුමනතාලවණ්ටියත්ථෙරාපදානං.
3262. සිද්ධත්ථස්ස භගවතො තාලවණ්ටමදාසහං, සුමනෙහි පටිච්ඡන්නං ධාරයාමි මහාරහං.
3263. චතුනවුතෙ ඉතො කප්පෙ තාලවණ්ටමදාසහං, දුග්ගතිං නාභිජානාමි තාලවණ්ටස්සිදං ඵලං.
3264. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3265. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3266. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සුමනතාලවණ්ටියො ථෙරො ඉමා ගාථායො අභාසිත්ථාති.
සුමනතාලවණ්ටියත්ථෙරස්ස අපදානං අට්ඨමං.
379. සුමනදාමියත්ථෙරාපදානං.
3267. සිද්ධත්ථස්ස භගවතො න්හාතකස්ස තපස්සිනො, කත්වාන සුමනදාමං ධාරයිං පුරතො ඨිතො.
3268. චතුනවුතෙ ඉතො කප්පෙ යං දාමමභිධාරයිං,{1} දුග්ගතිං නාභිජානාමි සුමනාධාරණෙ{2} ඵලං.
3269. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3270. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3271. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සුමනදාමියො ථෙරො ඉමා ගාථායො අභාසිත්ථාති.
සුමනදාමියත්ථෙරස්ස අපදානං නවමං.
380. කාසුමාරිඵලදායකත්ථෙරාපදානං.
3272. කණිකාරංව ජොතන්තං නිසින්නං පබ්බතන්තරෙ, අද්දසං විරජං බුද්ධං ලොකජෙට්ඨං නරාසභං.
3273. පසන්නචිත්තො සුමනො සිරෙ කත්වාන අඤ්ජලිං, කාසුමාරිඵලං ගය්හ බුද්ධසෙට්ඨස්සදාසහං.
3274. එකතිංසෙ ඉතො කප්පෙ යං ඵලමදදිං තදා, දුග්ගතිං නාභිජානාමි ඵලදානස්සිදං ඵලං.
3275. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3276. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3277. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කාසුමාරිඵලදායකො ථෙරො ඉමා ගාථායො අභාසිත්ථාති.
කාසුමාරිඵලදායකත්ථෙරස්ස අපදානං දසමං.
උද්දානං:
බොධි පාටලි උප්පලී පට්ටි ච සත්තපණ්ණියො ගන්ධමුට්ඨී ච චිතකො තාලං සුමනදාමකො කාසුමාරිඵලී චෙව ගාථා එකූනසට්ඨිකා.
බොධිවන්දකවග්ගො අට්ඨතිංසතිමො.
39. අවණ්ටඵලවග්ගො
381. අවණ්ටඵලදායකත්ථෙරාපදානං.
3278. සතරංසී නාම භගවා සයම්භු අපරාජිතො, විවෙකකාමො සම්බුද්ධො ගොචරායා’භිනික්ඛමි.
3279. ඵලහත්ථො අහං දිස්වා උපගච්ඡිං නරාසභං, පසන්නචිත්තො සුමනො අවණ්ටං අදදිං ඵලං.
3280. චතුනවුතෙ ඉතො කප්පෙ යං ඵලමදදිං අහං, දුග්ගතිං නාභිජානාමි ඵලදානස්සිදං ඵලං.