2625. චතුනවුතෙ ඉතො{3} කප්පෙ යං පණ්ණමදදිං තදා, දුග්ගතිං නාභිජානාමි පණ්ණදානස්සිදං ඵලං.
2626. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පණ්ණදායකො ථෙරො ඉමා ගාථායො අභාසිත්ථාති.
පණ්ණදායකත්ථෙරස්ස අපදානං පඨමං.
282. ඵලදායකත්ථෙරාපදානං.
2627. සිනෙරුසමසන්තොසො ධරණීධරසාදිසො, වුට්ඨිහිත්වා සමාදිම්භා භික්ඛාය මමුපට්ඨිතො.
2628. හරීතකං ආමලකං අම්බ ජම්බු විභීටකං, කොලං භල්ලාතකං බිල්ලං ඵාරුසකඵලානි ච.
2829. සිද්ධත්ථස්ස මහෙසිස්ස සබ්බලොකානුකම්පිනො, තඤ්ච සබ්බං මයා දින්නං විප්පසන්නෙන චෙතසා.
2630. චතුනවුතෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
2631. සත්තපඤ්ඤාසිතො කප්පෙ එකජ්ඣො නාම ඛත්තියො, සත්තරතනසම්පන්නො චක්කවත්තී මහබ්බලො.
2632. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ඵලදායකො ථෙරො ඉමා ගාථායො අභාසිත්ථාති.
ඵලදායකත්ථෙරස්ස අපදානං දුතියං.
283. පච්චුග්ගමනියත්ථෙරාපදානං.
2633. සීහං යථා වනචරං නිසභාජානියං යථා, කකුධං විලසන්තංව ආගච්ඡන්තං නරාසභං.
2634. සිද්ධත්ථං ලොකපජ්ජොතං සබ්බලොකතිකිච්ඡකං, අකාසිං පච්චුග්ගමනං විප්පසන්නෙන චෙතසා.
2635. එකනවුතෙ ඉතො කප්පෙ පච්චුග්ගච්ඡිං නරාසභං, දුග්ගතිං නාභිජානාමි පච්චුග්ගමනෙ ඉදං ඵලං.
2636. සත්තවීසෙ ඉතො කප්පෙ එකො ආසිං ජනාධිපො, සපරිවාරොති නාමෙන චක්කවත්තී මහබ්බලො.
2637. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පච්චුග්ගමනියො ථෙරො ඉමා ගාථායො අභාසිත්ථාති.
පච්චුග්ගමනියත්ථෙරස්ස අපදානං තතියං.
284. එකපුප්ඵියත්ථෙරාපදානං.
2638. දක්ඛිණම්භි දුවාරම්හි පිසාචො ආසහං තදා, අද්දසං විරජං බුද්ධං පීතරංසිං’ව භානුමං.
2639. විපස්සිස්ස නරග්ගස්ස සබ්බලොකහිතෙසිනො, එකපුප්ඵං මයා දින්නං දිපදින්දස්ස තාදිනො.
2640. එකනවුතෙ ඉතො කප්පෙ යං පුප්ඵමදදිං තදා, දුග්ගතිං නාභිජානාමි බුද්ධපූජායිදං ඵලං.
2641. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකපුප්ඵියො ථෙරො ඉමා ගාථායො අභාසිත්ථාති.
එකපුප්ඵියත්ථෙරස්ස අපදානං චතුත්ථං.
285. මඝවපුප්ඵියත්ථෙරාපදානං.
2642. නම්මදානදියා තීරෙ සයම්භු අපරාජිතො, සමාධිං සො සමාපන්නො විප්පසන්නො අනාවිලො.
2643. දිස්වා පසන්නො සුමනො සම්බුද්ධං අපරාජිතං, තාහං මඝවපුප්ඵෙන සයම්භුං පූජයිං තදා.
2644. එකනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2645. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මඝවපුප්ඵියො ථෙරො ඉමා ගාථායො අභාසිත්ථාති.
මඝවපුප්ඵියත්ථෙරස්ස අපදානං පඤ්චමං.
286. උපට්ඨාකදායකත්ථෙරාපදානං.
2646. රථියං පටිපජ්ජන්තං ආහුතීනං පටිග්ගහං, දිපදින්දං මහානාගං ලොකජෙට්ඨං නරාසභං.
2647. පක්කොසාපිය තස්සාහං සබ්බලොකහිතෙසිනො, උපට්ඨාකො මයා දින්නො සිද්ධත්ථස්ස මහෙසිනො.
2648. පටිග්ගහෙත්වා සම්බුද්ධො නිය්යාතෙසි මහාමුනි, උට්ඨාය ආසනා තම්හා පක්කාමි පාචිනාමුඛො.
2649. චතුනවුතෙ ඉතො කප්පෙ උපට්ඨාකමදං තදා, දුග්ගතිං නාභිජානාමි උපට්ඨානස්සිදං ඵලං.
2650. සත්තපඤ්ඤාසීතො කප්පෙ බලසෙන සනාමකො, සත්තරතනසම්පන්නො චක්කවත්තී මහබ්බලො.
2651. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උපට්ඨාකදායකො ථෙරො ඉමා ගාථායො අභාසිත්ථාති.
උපට්ඨාකදායකත්ථෙරස්ස අපදානං ඡට්ඨමං.
287. අපදානියත්ථෙරාපදානං.
2652. අපදානං සුගතානං කිත්තයිං’හං මහෙසිනො, පාදෙ ච සිරසා වන්දිං පසන්නො සෙහි පාණිහි.
2653. ද්වෙනවුතෙ ඉතො කප්පෙ අපදානං පකිත්තයිං, දුග්ගතිං නාභිජානාමි කිත්තනාය ඉදං ඵලං.
2654. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අපදානියො ථෙරො ඉමා ගාථායො අභාසිත්ථාති.
අපදානියත්ථෙරස්ස අපදානං සත්තමං.
288. සත්තාහපබ්බජිතත්ථෙරාපදානං.
2655. විපස්සිස්ස භගවතො සඞ්ඝො සක්කතමානිතො, ව්යසනං මෙ අනුප්පත්තං ඤාතිභෙදො පුරෙ අහු.
2656. පබ්බජ්ජ මුපගන්ත්වාන ව්යසනූපසමාය’හං, සත්තාහාභිරතො තත්ථ සත්ථුසාසනකම්යතා.
2657. එකනවුතෙ ඉතො කප්පෙ යමහං පබ්බජිං තදා, දුග්ගතිං නාභිජානාමි පබ්බජ්ජාය ඉදං ඵලං.
2658. සත්තසට්ඨිම්හිතො කප්පෙ සත්ත ආසුං මහීපතී, සුනික්ඛමාති ඤායන්ති චක්කවත්තී මහබ්බලා.
2659. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සත්තාහපබ්බජිතො ථෙරො ඉමා ගාථායො අභාසිත්ථාති.
සත්තාහපබ්බජිතත්ථෙරස්ස අපදානං අට්ඨමං.
289. බුද්ධුපට්ඨාකත්ථෙරාපදානං
2660. වෙටම්බරීති{1} මෙ නාමං පිතුසන්තං මමං තදා, මම හත්ථං ගහෙත්වාන උපානයි මහාමුනිං.
2661. ඉමෙ මං උද්දිසිස්සන්ති බුද්ධා ලොකග්ගනායකා, තෙ’හං උපට්ඨිං සක්කච්චං පසන්නො සෙහි පාණිහි.
2662. එකතිංසෙ ඉතො කප්පෙ බුද්ධෙ පරිචරිං තදා, දුග්ගතිං නාභිජානාමි උපට්ඨානස්සිදං ඵලං.
2663. තෙවීසම්හි ඉතො කප්පෙ චතුරො ආසු ඛත්තියා, සමණුපට්ඨාකා{1} නාම චක්කවත්තී මහබ්බලා.
2664. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා බුද්ධුපට්ඨාකො ථෙරො ඉමා ගාථායො අභාසිත්ථාති.
බුද්ධුපට්ඨාකත්ථෙරස්ස අපදානං නවමං.
290. පුබ්බඞ්ගමියත්ථෙරාපදානං.
2665. චුල්ලාසීතිසහස්සානි පබ්බජිම්හ අකිඤ්චනා, තෙසං පුබ්බඞ්ගමො ආසිං උත්තමත්ථස්ස පත්තියා.
2666. සරාගා සභවා{2} චෙතෙ විප්පස්නනමනාවිලා,{3} උපට්ඨහිංසු සක්කච්චං පසන්නා සෙහි පාණිහි.
2667. ඛීණාසවා වන්තදොසා කතකිච්චා අනාසවා, ඵරිංසු{4} මෙත්තචිත්තෙන සයම්භූ අපරාජිතා.
2668. තෙසං උපට්ඨහිත්වාන සම්බුද්ධානං පතිස්සතො, මරණඤ්ච අනුප්පත්තො දෙවත්තඤ්ච අගම්හසෙ.
2669. චතුනවුතෙ ඉතො කප්පෙ යා සීලමනුපාලයිං, දුග්ගතිං නාභිජානාමි සඤ්ඤමස්ස ඉදං ඵලං.
2670. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පුබ්බඞ්ගමියො ථෙරො ඉමා ගාථායො අභාසිත්ථාති.
පුබ්බඞ්ගමියත්ථෙරස්ස අපදානං දසමං.
උද්දානං:
පණ්ණං ඵලං පච්චුග්ගමං{5} එකපුප්ඵී ච මඝවා උපට්ඨාකාපදානඤ්ච පබ්බජ්ජා බුද්ධුපට්ඨාකො පුබ්බඞ්ගමො ච ගාථායො අට්ඨතාළීස කිත්තිතාති.
පණ්ණාදායකවග්ගො එකූනතිංසතිමො.
30. චිතකපූජකවග්ගො
291. චිතකපූජකත්ථෙරාපදානං.
2671. අජිතො නාම නාමෙන අහොසිං බ්රාහ්මණො තදා, ආහුතිං යිට්ඨුකාමො’හං නානාපුප්ඵං සමානයිං.
2672. ජලන්තං චිතකං දිස්වා සිඛිනො ලොකබන්ධුනො, තං ච පුප්ඵං සමානෙත්වා චිතකෙ ඔකිරිං අහං.
2673. එකතිංසෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2674. සත්තවීසෙ ඉතො කප්පෙ සත්තාසුං මනුජාධිපා, සුපජ්ජලිතනාමා තෙ චක්කවත්තී මහබ්බලා.
2675. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා චිතකපූජකො ථෙරො ඉමා ගාථායො අභාසිත්ථාති.
චිතකපූජකත්ථෙරස්ස අපදානං පඨමං.
292. පුප්ඵධාරකත්ථෙරාපදානං
2676. වාකචීරධරො ආසිං අජිනුත්තරවාසනො, අභිඤ්ඤාපඤ්චනිබ්බත්තා චන්දස්ස පරිමජ්ජකො.
2677. විපස්සිං ලොකපජ්ජොතං දිස්වා අභිගතං මම, පාරිච්ඡත්තකපුප්ඵානි ධාරෙසිං සත්ථුනො අහං.
2678. එකනවුතෙ ඉතො කප්පෙ යං පුප්ඵමභිධාරයිං, දුග්ගතිං නාභිජානාමි ධාරණාය ඉදං ඵලං.
2679. සත්තාසීතිම්භිතො කප්පෙ එකො ආසිං මහීපති, සමන්තධාරණො නාම චක්කවත්තී මහබ්බලො.
2680. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පුප්ඵධාරකො ථෙරො ඉමා ගාථායො අභාසිත්ථාති.
පුප්ඵධාරකත්ථෙරස්ස අපදානං දුතියං.
293. ඡත්තදායකත්ථෙරාපදානං.
2681. පුත්තො මම පබ්බජිතො කාසායවසනො තදා, සො ච බුද්ධත්තං සම්පත්තො නිබ්බුතො ලොකපූජිතො.
2682. විචිනන්තො සකං පුත්තං අගමං පච්ඡතො අහං, නිබ්බුතස්ස මහන්තස්ස චිතකං අගමාසහං.
2683. පග්ගය්හ අඤ්ජලිං තත්ථ වන්දිත්වා චිතකං අහං, සෙතච්ඡත්තඤ්ච පග්ගය්හ ආරොපෙසිං අහං තදා.
2684. චතුනවුතෙ ඉතො කප්පෙ යං ඡත්තමභිරොපයිං, දුග්ගතිං නාභිජානාමි ඡත්තදානස්සිදං ඵලං.