241. තුවරදායකත්ථෙරාපදානං
2462. මිගලුද්දො පුරෙ ආසිං අරඤ්ඤෙ කානනෙ අහං, භරිත්වා{3} තුවරමාදාය සඞ්ඝස්ස අදදිං අහං.
2463. එකනවුතෙ ඉතො කප්පෙ යං දානමදදිං තදා, දුග්ගතිං නාභිජානාමි තුවරස්ස ඉදං ඵලං.
2464. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තුවරදායකො ථෙරො ඉමා ගාථායො අභාසිත්ථාති.
තුවරදායකත්ථෙරස්ස අපදානං පඨමං.
242. නාගකෙසරියත්ථෙරාපදානං.
2465. ධනුං අද්වෙජ්ඣං කත්වාන වනමජ්ඣොගහිං අහං, කෙසරං ඔසටං{1} දිස්වා සතපත්තං සමුට්ඨිතං.
2466. උභො හත්ථෙහි පග්ගය්හ සිරෙ කත්වාන අඤ්ජලිං, බුද්ධස්ස අභිරොපෙසිං තිස්සස්ස ලොකබන්ධුනො.
2467. ද්වෙනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2468. තෙසත්තතිම්හි කප්පම්හි සත්ත කෙසරනාමකා, සත්තරතනසම්පන්නා චක්කවත්තී මහබ්බලා.
2469. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා නාගකෙසරියො ථෙරො ඉමා ගාථායො අභාසිත්ථාති.
නාගකෙසරියත්ථෙරස්ස අපදානං දුතියං.
243. නළිනකෙසරියත්ථෙරාපදානං
2470. ජාතස්සරස්ස වෙමජ්ඣෙ වසාමි ජලකුක්කුටො, අථද්දසං{2} දෙවදෙවං ගච්ඡන්තමනිලඤ්ජසෙ.
2471. තුණ්ඩෙන කෙසරිං{3} ගය්හ විප්පසන්නෙන චෙතසා, බුද්ධස්ස අභිරොපෙසිං තිස්සස්ස ලොකබන්ධුනො.
2472. ද්වෙනවුතෙ ඉතො කප්පෙ යං පුප්ඵමභිපූජයිදං, දුග්ගතිං නාභිජානාමි බුද්ධපූජායිදං ඵලං.
2473. තෙසත්තතිම්භි කප්පම්හි සතපත්තසනාමකො{4}, සත්තරතනසම්පන්නො චක්කවත්තී මහබ්බලො.
2474. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා නළිනකෙසරියො ථෙරො ඉමා ගාථායො අභාසිත්ථාති.
නළිනකෙසරියත්ථෙරස්ස අපදානං තතියං.
244. විරවිපුප්ඵියත්ථෙරාපදානං{5}
2475. ඛීණාසවසහස්සෙහි නිය්යාති ලොකනායකො, විරවිපුප්ඵං පග්ගය්හ{6} බුද්ධස්ස අභිරොපයිං.
2476. එකනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2477. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා විරවිපුප්ඵියො ථෙරො ඉමා ගාථායො අභාසිත්ථාති.
විරවිපුප්ඵියත්ථෙරස්ස අපදානං චතුත්ථං.
245. කුටිධූපකත්ථෙරාපදානං.
2478. සිද්ධත්ථස්ස භගවතො අහොසිං කුටිගොපකො, කාලෙන කාලං ධූපෙසිං පසන්නො සෙහි පාණිහි.
2479. චතුනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධපූජායිදං{1} ඵලං.
2480. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කුටිධූපකො ථෙරො ඉමා ගාථායො අභාසිත්ථාති.
කුටිධූපකත්ථෙරස්ස අපදානං පඤ්චමං.
246. පත්තදායකත්ථෙරාපදානං
2481. පරමෙන දමථෙන සිද්ධත්ථස්ස මහෙසිනො, පත්තදානං මයා දින්නං උජුභූතස්ස තාදිනො.
2482. චතුනවුතෙ ඉතො කප්පෙ යං දානමදදිං තදා, දුග්ගතිං නාභිජානාමි පත්තදානස්සිදං ඵලං.
2483. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පත්තදායකො ථෙරො ඉමා ගාථායො අභාසිත්ථාති.
පත්තදායකත්ථෙරස්ස අපදානං ඡට්ඨං.
247. ධාතුපූජකත්ථෙරාපදානං.
2484. නිබ්බුතෙ ලොකනාථම්හි සිද්ධත්ථම්හි නරුත්තමෙ, එකා ධාතු මයා ලද්ධා දිපදින්දස්ස{2} තාදිනො.
2485. තාහං ධාතුං ගහෙත්වාන බුද්ධස්සාදිච්චබන්ධුනො, පඤ්චවස්සෙ පරිචරිං තිට්ඨන්තං ච නරුත්තමං.
2486. චතුනවුතෙ ඉතො කප්පෙ යං ධාතුං පූජයිං තදා, දුග්ගතිං නාභිජානාමි ධාතුපට්ඨහනෙ ඵලං.
2487. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ධාතුපූජකො ථෙරො ඉමා ගාථායො අභාසිත්ථාති.
ධාතුපූජකත්ථෙරස්ස අපදානං සත්තමං.
248. සත්තලිපුප්ඵපූජකත්ථෙරාපදානං{1}
2488. සත්ත සත්තලිපුප්ඵානි සීසෙ කත්වානහං තදා, බුද්ධස්ස අභිරොපෙසිං වෙස්සභූම්භි නරුත්තමෙ.
2489. එකතිංසෙ ඉතො කප්පෙ යං පුප්ඵමභිරොපයිං{2}, දුග්ගතිං නාභිජානාමි පුප්ඵපූජායිදං{3} ඵලං.
2490. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සත්තලිපුප්ඵපූජකො ථෙරො ඉමා ගාථායො අභාසිත්ථාති.
සත්තලිපුප්ඵපූජකත්ථෙරස්ස අපදානං අට්ඨමං.
249. බිම්බිජාලියත්ථෙරාපදානං.
2491. පදුමුත්තරො නාම ජිනො සයම්භූ අග්ගපුග්ගලො, චතුසච්චං පකාසෙති දීපෙති අමතං පදං.
2492. බිම්බිජාලිකපුප්ඵානි{4} පුඵු කත්වානහං තදා, බුද්ධස්ස අභිරොපෙසිං දිපදින්දස්ස තාදිනො.
2493. අට්ඨසට්ඨිම්හිතො කප්පෙ චතුරො කිඤ්ජකෙසරා, සත්තරතනසම්පන්නා චක්කවත්තී මහබ්බලා.
2494. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා බිම්බිජාලියො ථෙරො ඉමා ගාථායො අභාසිත්ථාති.
බිම්බිජාලියත්ථෙරස්ස අපදානං නවමං.
250. උද්දාලදායකත්ථෙරාපදානං{1}
2495. කකුසන්ධො නාම නාමෙන සයම්භූ අපරාජිතො, පවනා නික්ඛමිත්වාන අනුප්පත්තො මහානදිං.
2496. උද්දාලකං ගහෙත්වාන සයම්භූස්ස අදාසහං, සංයතස්සුජුභූතස්ස පසන්නමානසො තදා{2}.
2497. එකතිංසෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි පුප්ඵදානස්සිද ඵලං.
2498. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උද්දාලදායකො ථෙරො ඉමා ගාථායො අභාසිත්ථාති.
උද්දාලදායකත්ථෙරස්ස අපදානං දසමං.
උද්දානං:
තුවර නාග නළිනා විරවී කුටිධූපකො පත්තො ධාතු සත්තලියො බිම්බී උද්දාලකෙන ච සත්තතිංසති ගාථායො ගණිතායො විභාවිහි.
තුවරදායකවග්ගො පඤ්චවීසතිමො.
26. ථොමකවග්ගො
251. ථොමකෙත්ථෙරාපදානං.
2499. දෙවලොකෙ ඨිතො සන්තො විපස්සිස්ස මහෙසිනො, ධම්මං සුණිත්වා මුදිතො ඉමං වාචමභාසහං{3}.
2500. නමො තෙ පුරිසාජඤ්ඤ නමො තෙ පුරිසුත්තම, බහුං ජනං{4} තාරයසි දෙසෙන්තො අමතං පදං.
2501. එකනවුතෙ ඉතො කප්පෙ යං වාචමභණිං තදා, දුග්ගතිං නාභිජානාමි ථොමනාය ඉදං ඵලං.
2502. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ථොමකො ථෙරො ඉමා ගාථායො අභාසිත්ථාති.
ථොමකත්ථෙරස්ස අපදානං පඨමං.
252. එකාසනදායකත්ථෙරාපදානං.
2503. විජහිත්වා දෙවවණ්ණං සභරියො ඉධාගමිං, අධිකාරං කත්තුකාමො බුද්ධසෙට්ඨස්ස සාසනෙ.
2504. දෙවලො නාම නාමෙන පදුමුත්තරසාවකො, තස්ස භික්ඛා මයා දින්නා විප්පසන්නෙන චෙතසා.
2505. සතසහස්සෙ ඉතො{1} කප්පෙ යං කම්මමකරිං තදා, දුග්ගතිං නාභිජානාමි පිණ්ඩපාතස්සිදං ඵලං.
2506. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකාසනදායකො ථෙරො ඉමා ගාථායො අභාසිත්ථාති.
එකාසනදායකත්ථෙරස්ස අපදානං දුතියං.
253. චිතකපූජකත්ථෙරාපදානං
2507. ආනන්දො නාම සම්බුද්ධො සයම්භු අපරාජිතො, අරඤ්ඤෙ පරිනිබ්බායි අමනුස්සම්හි කානනෙ.
2508. දෙවලොකා ඉධාගන්ත්වා චිතං කත්වානහං තදා, සරීරං තත්ථ ඣාපෙසිං සක්කාරඤ්ච අකාසහං.
2509. එකනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධපූජායිදං ඵලං.
2510. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා චිතකපූජකො ථෙරො ඉමා ගාථායො අභාසිත්ථාති.
චිතකපූජකත්ථෙරස්ස අපදානං චතුත්ථං.
254. තිචම්පකපුප්ඵියත්ථෙරාපදානං.
2511. හිමවන්තස්ස අවිදූරෙ{2} විකතො{3} නාම පබ්බතො, තස්ස වෙමජ්ඣෙ වසති සමණො භාවිතින්ද්රියො.
2512. දිස්වාන තස්සොපසමං විප්පසන්නෙන චෙතසා, තීණි චම්පකපුප්ඵානි ගහෙත්වාන සමොකිරිං.
2513. එකනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2514. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිචම්පකපුප්ඵියො ථෙරො ඉමා ගාථායො අභාසිත්ථාති.
තිචම්පකපුප්ඵියත්ථෙරස්ස අපදානං චතුත්ථං.
255. සත්තපාටලියත්ථෙරාපදානං.