282. සො මෙ පුට්ඨො වියාකාසි අසම්භීතොව{10} කෙසරී, බුද්ධො ලොකෙ සමුප්පන්නො තස්ස සිස්සො’ම්හි ආවුසො.
283. කීදිසං තෙ මහාවීර අනුජාත මහායස,{11} බුද්ධස්ස සාසනං ධම්මං? සාධු මෙ කථයස්සු භො.
284. සො මෙ පුට්ඨො කථි{1} සබ්බං ගම්භීරං නිපුණං පදං, තණ්හාසල්ලස්ස භන්තාරං සබ්බදුක්ඛාපනූදනං.{2}
285. “යෙ ධම්මා හෙතුප්පභවා තෙසං හෙතුං තථාගතො ආහ, තෙසඤ්ච යො නිරොධො, එවංවාදී මහාසමණො”
286. සො’හං විස්සජ්ජිතෙ පඤ්හෙ පඨමං ඵලමජ්ඣගං, විරජො විමලො ආසිං සුත්වාන ජිනසාසනං.
287. සුත්වාන මුනිනො වාක්යං පස්සිත්වා ධම්මමුත්තමං, පරියොගාළ්හසද්ධම්මො ඉමං ගාථං අභාස’හං.
288. “එසො’ව ධම්මො යදි තාවදෙව පච්චබ්යථා පදමසොකං, අදිට්ඨං අබ්භතීතං බහුකෙහි{3} කප්පනහුතෙහි.
289. ස්වාහං ධම්මං ගවෙසන්තො කුතිත්ථෙ සඤ්චරිං අහං, සො මෙ අත්ථො අනුප්පත්තො කාලො මෙ නප්පමජ්ජිතුං”.
290. තොසිතො’හං අස්සජිනා පත්වාන අචලං පදං, සහායකං ගවෙසන්තො අස්සමං අගමා’සහං.
291. දූරතොව මමං දිස්වා සහායො මෙ සුසික්ඛිතො, ඉරියාපථසම්පන්නො{4} ඉදං වචනමබ්රවී.
292. පසන්නමුඛනෙත්තො’සි මුනිභාවොව දිස්සති අමතාධිගතො කච්චි නිබ්බානං අච්චුතං පදං?
293. සුභානුරූපො ආයාසි ආනෙඤ්ජකාරිතො විය, දන්තොව දන්තදමථෙ{5} උපසන්තොසි බ්රාහ්මණ.
294. අමතං මයා අධිගතං සොකසල්ලපනූදනං,{6} ත්වම්පි තං අධිගච්ඡාහි{7} ගච්ඡාම බුද්ධසන්තිකං.
295. ‘සාධූ’ති සො පටිස්සුත්වා{8} සහායො මෙ සුසික්ඛිතො, හත්ථෙන හත්ථං ගණ්හිත්වා උපාගමි{9} තව’න්තිකං.{10}
296. උභොපි පබ්බජිස්සාම සක්යපුත්ත තව’න්තිකෙ{1}, තව සාසනමාගම්ම විහරාම අනාසවා.
297. කොලිතො ඉද්ධියා සෙට්ඨො අහං පඤ්ඤාය පාරගො, උභොව එකතො හුත්වා සාසනං සොභයාමසෙ.
298. අපරියොසිතසඞ්කප්පො කුතිත්ථෙ සඤ්චරිං අහං, තව දස්සනමාගම්ම සඞ්කප්පො පූරිතො මම.
299. පඨවියං පතිට්ඨාය පුප්ඵන්ති සමයෙ දුමා, දිබ්බගන්ධා සම්පවන්ති තොසෙන්ති සබ්බපාණිනං{2}.
300. තථෙවා’හං මහාවීර සක්යපුත්ත මහායස, සාසනෙ තෙ පතිට්ඨාය සමයෙ’සාමි පුප්ඵිතුං.
301. විමුත්තිපුප්ඵං එසන්තො භවසංසාරමොචනං, විමුත්තිපුප්ඵලාභෙන තොසෙමි සබ්බපාණිනං.
302. යාවතා බුද්ධඛෙත්තම්හි ඨපෙත්වාන මහාමුනිං, පඤ්ඤාය සදිසො නත්ථි තව පුත්තස්ස චක්ඛුම.
303. සුවිනීතා ච තෙ සිස්සා පරිසා ච සුසික්ඛිතා, උත්තමෙ දමථෙ දන්තා පරිවාරෙන්ති තං සදා.
304. ඣායී ඣානරතා ධීරා සන්තචිත්තා සමාහිතා, මුනී මොනෙය්යසම්පන්නා පරිවාරෙන්ති තං සදා.
305. අප්පිච්ඡා නිපකා ධීරා අප්පාහාරා ආලොලුපා, ලාභාලාභෙන සන්තුට්ඨා පරිවාරෙන්ති තං සදා.
306. ආරඤ්ඤකා ධුතධරා ඣායිනො ලූඛචීවරා, විවෙකාභිරාතා ධීරා පරිවාරෙන්ති තං සදා.
307. පටිපන්නා ඵලට්ඨා ච සෙඛා ඵලසමඞ්ගිනො, ආසිංසකා{3} උත්තමත්ථං පරිවාරෙන්ති තං සදා.
308. සොතාපන්නා ච විමලා සකදාගාමිනො ච යෙ, අනාගාමී ච අරහා පරිවාරෙන්ති තං සදා.
309. සතිපට්ඨානකුසලා බොජ්ඣඞ්ගභාවනාරතා, සාවකා තෙ බහූ සබ්බෙ පරිවාරෙන්ති තං සදා.
310. ඉද්ධිපාදෙසු{1} කුසලා සමාධිභාවනාරතා, සම්මප්පධානමනුයුත්තා පරිවාරෙන්ති තං සදා.
311. තෙවිජ්ජා ඡළභිඤ්ඤා ච ඉද්ධියා පාරමිං ගතා, පඤ්ඤාය පාරමිං පත්තා පරිවාරෙන්ති තං සදා.
312. එදිසා තෙ මහාවීර තව සිස්සා සුසික්ඛිතා, දුරාසදා උග්ගතෙජා පරිවාරෙන්ති තං සදා.
313. තෙහි සිස්සෙහි පරිවුතො සඤ්ඤතෙහි තපස්සිහි, මිගරාජාව’සම්භිතො{2} උළුරාජාව සොභසි.
314. පඨවියං පතිට්ඨාය රුහන්ති ධරණීරුහා, වෙපුල්ලතං පාපුණන්ති ඵලඤ්ච දස්සයන්ති තෙ.
315. පඨවීසදිසො ත්වං’සි සක්යපුත්ත මහායස, සාසනෙ තෙ පතිට්ඨාය ලභන්ති අමතං ඵලං.
316. සින්ධු සරස්සතී චෙව නදියො චන්දභාගිකා{3}, ගඞ්ගා ච යමුනා චෙව සරභූ ච අථො මහී.
317. එතාසං සන්දමානානං සාගරො සම්පටිච්ඡති, ජහන්ති පුරිමං නාමං සාගරොත්වෙ’ව ඤායති.
318. තථෙ’විමෙ චතුබ්බණ්ණා{4} පබ්බජිත්වා තව’න්තිකෙ, ජහන්ති පුරිමං නාම බුද්ධපුත්තානි ඤායරෙ.
319. යථාපි චන්දො විමලො ගච්ඡං ආකාසධාතුයා, සබ්බෙ තාරාගණෙ ලොකෙ ආභාය අතිරොචති.
320. තථෙ ත්වං මහාවීර පරිවුතො දෙවමානුසෙ, එතෙ සබ්බෙ අතික්කම්ම ජලසී සබ්බදා තුවං.
321. ගම්භීරෙ උට්ඨිතා ඌමි න වෙලං අතිවත්තරෙ,{5} සබ්බාව වෙලං{6} ඵුසන්ති, සංචුණ්ණා විකිරන්ති තා.
322. තථෙව තිත්ථියා ලොකෙ නානාදිට්ඨි බහුජ්ජනා, ධම්මං වදිතුකාමා{7} තෙ නාතිවත්තන්ති තං මුනිං.
323. සචෙ ච තං පාපුණන්ති පටිවාදෙහි{8} චක්ඛුම, තවන්තිකං උපාගන්ත්වා සඤ්චුණ්ණාව භවන්ති තෙ.
324. යථාපි උදකෙ ජාතා කුමුදා මන්දාලකා{9} බහු, උපලිම්පන්ති තොයෙන කදදම{10} කලලෙන ච.
325. තථෙව බහුකා සත්තා ලොකෙ ජාතා විරූහරෙ, අට්ටිතා රාගදොසෙන කද්දමෙ කුමුදං යථා.
326. යථාපි පදුමං ජලජං ජලමජ්ඣෙ විරූහති, න සො{11} ලිම්පති තොයෙන පරිසුද්ධො{12} හි කෙසරී.
327. තථෙව ත්වං මහාවීර ලොකෙ ජාතො මහාමුනි, නො පලිම්පසි{1} ලොකෙන තොයෙන පදුමං යථා.
328. යථාපි රමමකෙ මාසෙ බහූ පුප්ඵන්ති වාරිජා, නාතික්කමන්ති තං මාසං සමයො පුප්ඵනාය සො.
329. තථෙව ත්වං සක්යපුත්ත පුප්ඵිතො තෙ විමුත්තියා, සාසනං නාතිවත්තන්ති{2} පදුමං වාරිජං යථා.
330. සුපුප්ඵිතො සාලරාජා දිබ්බං ගන්ධං පවායති, අඤ්ඤසාලෙහි පරිවුතො සාලරාජාව සොභති.
331. තථෙව ත්වං මහාවීර බුද්ධඤාණෙන පුප්ඵිතො, භික්ඛුසඞ්ඝපරිවුතො සාලරාජාව සොභසි.
332. යථාපි සෙලො හිමවා ඔසධො සබ්බපාණිනං, නාගානං අසුරානඤ්ච දෙවතානඤ්ච ආලයො.
333. තථෙව ත්වං මහාවීර ඔසධො විය පාණිනං, තෙවිජ්ජා ඡළභිඤ්ඤා ච ඉද්ධියා පාරමිං ගතා.
334. අනුසිට්ඨා මහාවීර තයා කාරුණිකෙන තෙ, රමන්ති ධම්මරතියා වසන්ති තව සාසනෙ.
335. විගරාජා යථා සීහො අභිනික්ඛම්ම ආසයා, චතුද්දිසා විලොකෙත්වා{3} තික්ඛත්තුං අභිනාදති{4}.
336. සබ්බෙ මිගා උත්තසන්ති මිගරාජස්ස ගජ්ජතො, තථා හි ජාතිමා එසො පසූ{5} තාසෙති සබ්බදා.
337. ගජ්ජතො තෙ මහාවීර වසුධා සම්පකම්පති,{6} බොධනෙය්යං’වබුජ්ඣන්ති තසන්ති මාරකායිකා.
338. තසන්ති තිත්ථියා සබ්බෙ නදතො තෙ මහාමුනෙ{7}, කාකසෙනාව විබ්භන්තා{8} මිගරඤ්ඤා යථා මිගා.
339. යෙ කෙචි ගණිනො ලොකෙ සත්ථාරොති පවුච්චරෙ, පරම්පරාගතං ධම්මං දෙසෙන්ති පරිසාය තෙ.
340. න හෙ’වං{9} ත්වං මහාවීර ධම්මං දෙසෙසි පාණිනං, සාමං සච්චානි බුජ්ඣිත්වා කෙවලං බොධිපක්ඛියං.
341. ආසයානුසයං ඤත්වා ඉන්ද්රියානං බලාබලං, භබ්බාභබ්බෙ විදිත්වාන මහාමෙඝොව ගජ්ජසි.
342. චක්කවාළපරියන්තං{1} නිසින්නා පරිසා භවෙ, නානාදිට්ඨි විචින්තෙන්තා{2} විමතිච්ඡෙදනාය තං.
343. සබ්බෙසං චිත්තමඤ්ඤාය ඔපම්මකුසලො මුනි, එකං පඤ්හං කථෙන්තොව විමතිං ඡින්දසි{3} පාණිනං.
344. උපතිස්සසදිසෙහෙව{4} වසුධා පූරිතා භවෙ, සබ්බෙව තෙ පඤ්ජලිකා කිත්තයුං ලොකනායකං.
345. කප්පං වා තෙ කිත්තයන්තා නානාවණ්ණෙහි කිත්තයුං, පරිමෙතුං න සක්කෙය්යුං{5} අප්පමෙය්යා තථාගතා.
346. යථා සකෙන ථාමෙන කිත්තිතො හි මයා{6} ජිනො, කප්පකොටිම්පි කිත්තෙන්තා එවමෙව පකිත්තයුං.
347. සචෙ හි කොචි දෙවො වා මනුස්සො වා සුසික්ඛිතො, පමෙතුං පරිකප්පෙය්ය{7} විඝාතං ‘ව ලභෙය්ය සො.
348. සාසනෙ තෙ පතිට්ඨාය සක්යපුත්ත මහායස, පඤ්ඤාය පාරමිං ගන්ත්වා විහරාමි අනාසවො.
349. තිත්ථියෙ සම්පමද්දාමි වත්තෙමි ජිනසාසනං, ධම්මසෙනාපතී අජ්ජ සක්යපුතස්ස සාසනෙ.
350. අපරිමෙය්යෙ කතං කම්මං ඵලං දස්සෙසි මෙ ඉධ, සුඛිත්තො සරවෙගොව කිලෙසෙ ඣාපයිං අහං{8}.
351. යො කොචි මනුජො භාරං ධාරෙය්ය මත්ථකෙ සදා, භාරෙන දුක්ඛිතො අස්ස භාරෙහි භරිතො තථා.
352. ඩය්හමානො තීහග්ගීහි භවෙසු සංසරිං අහං, භරිතො භවභාරෙන නෙරුං උච්චාරිතො{9} යථා.
353. ඔරොපිතො ච මෙ භාරො භවා උග්ඝාටිතා මයා, කරණීයං කතං සබ්බං සක්යපුත්තස්ස සාසනෙ.
354. යාවතා බුද්ධඛෙත්තම්හි ඨපෙත්වා සක්යපුඞ්ගවං, අයං අග්ගොම්හි පඤ්ඤාය සදිසො මෙ න විජ්ජති.
355. සමාධිම්හි සුකුසලො ඉද්ධියා පාරමිං ගතො, ඉච්ඡාමානො ච’හං අජ්ජ සහස්සං අභිනිම්මිනෙ.
356. අනුපුබ්බවිහාරස්ස වසීභූතො මහාමුනි, කථෙසි සාසනං මය්හං නිරොධො සයනං මම.
357. දිබ්බචක්ඛු විසුද්ධං මෙ සමාධිකුසලො අහං, සම්මප්පධානානුයුත්තො බොජ්ඣඞ්ගභාවනාරතො.
358. සාවකෙන හි පත්තබ්බං සබ්බමෙව කතං මයා,{1} ලොකනාථං ඨපෙත්වාන සදිසො මෙ න විජ්ජති.
359. සමාපත්තිනයකුසලො{2} ඣානවිමොක්ඛානං ඛිප්පලාභී{3}, බොජ්ඣඞ්ගභාවනාරතො සාවකගුණපාරමිං ගතො’ස්මි.{4}
360. සාවකගුණෙනාපි ඵුස්සෙන{5} බුද්ධියා පුරිසුත්තමගාරවා{6}, සද්ධාය සඞ්ගහිතං{7} චිත්තං සදා සබ්රහ්මචාරිසු.
361. උද්ධටවිසො’ව{8} සප්පො ඡින්නවසාණො’ව උසභො, නික්ඛිත්තමානදප්පො{9} උපෙමි ගරුගාරවෙන ගණං.
362. යදි රූපිනී භවෙය්ය පඤ්ඤා මෙ වසුමතී න සමෙය්ය, අනොමදස්සිස්ස භගවතො ඵලමෙතං ඤාණථවනාය.{10}
363. පවත්තිතං ධම්මචක්කං සක්යපුත්තෙන තාදිනා, අනුවත්තෙමහං සම්මා{11} ඤාණථවනායිදං ඵලං.
364. මා මෙ කදාචි පාපිච්ඡො කුසීතො හීනවීරියො, අප්පස්සුතො අනාචාරො සමෙතො අහු කත්ථචි.
365. බහුස්සුතො ච මෙධාවී සීලෙසු සුසමාහිතො, චෙතොසමථානුයුතෙතා අපි මුද්ධනි තිට්ඨතු.
366. තං වො වදාමි භද්දන්තෙ යාවන්තෙත්ථ සමාගතා, අප්පිච්ඡා හොථ සන්තුට්ඨා ඣායී ඣානරතා සදා.
367. යමහං පඨමං දිස්වා විරජො විමලො අහුං, සො මෙ ආචරියො ධීරො අස්සජි නාම සාවකො.
368. තස්සාහං වාහසා අජ්ජ ධම්මසෙනාපතී අහුං, සබ්බත්ථ පාරමිං පත්වා{12} විහරාමි අනාසවො.
369. යො මෙ ආචරියො ආසි අස්සජි නාම සාවකො, යස්සං දිසායං වසති උස්සීසම්හි කරොමහං.
370. මම කම්මං සරිත්වාන ගොතමො සක්යපුඞ්ගවො, . භික්ඛුසඞ්ඝෙ නිසීදිත්වා අග්ගට්ඨානෙ ඨපෙසි මං.
371. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
372. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.{*}
373. පටිසම්භිදා චතස්සො ච විමොක්ඛා’පි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.{*}
ඉත්ථං සුදං ආයස්මා සාරිපුත්තො ථෙරො ඉමා ගාථායො අභාසිත්ථාති.
සාරිපුත්තත්ථෙරස්ස අපදානං පඨමං.
2. මහාමොග්ගල්ලානත්ථෙරාපදානං.
374. අනොමදස්සී භගවා ලොකජෙට්ඨො නරාසභො, විහාසි හිමවන්තම්හි දෙවසඞ්ඝපුරක්ඛතො.
375. වරුණො නාම නාමෙන නාගරාජා අහං තදා, කාමරූපී විකුබ්බාමි{1} මහොදධිනිවාසහං.{2}
376. සඞ්ගණියං{3} ගණං හිත්වා තුරියං පට්ඨපෙසහං, සම්බුද්ධං පරිවාරෙත්වා වාදෙසුං අච්ඡරා තදා.
377. වජ්ජමානෙසු තුරියෙසු{4} දෙවා තුරියානි{5} වජ්ජයුං,{6} උභින්නං සද්දං සුත්වාන බුද්ධො’පි{7} සම්පබුජ්ඣථ.
378. නිමන්තයිත්වා සම්බුද්ධං සකං භවනමුපාගමිං, ආසනං පඤ්ඤපෙත්වාන කාලමාරොචයිං අහං.