744. යෙනා’යං ජොතිතා සෙය්යා{3} ආදාසො ච සුසන්ථතො, තම’හං කිත්තයිස්සාමි සුණොථ මම භාසතො.
745. සොණ්ණමයා රූපිමයා{4} අථො වෙළුරියාමයා, නිබ්බත්තිස්සන්ති ආදාසා{5} යෙ කෙචි මනසො පියා.
746. චතුසට්ඨික්ඛත්තුං දෙවින්දො දෙවරජ්ජං කරිස්සති, සහස්සක්ඛත්තුං චක්කවත්තී භවිස්සති අනන්තරා.
747. එකවීසතිකප්පම්හි විමලො නාම ඛත්තියො, චාතුරන්තො විජිතාවී චක්කවත්තී භවිස්සති.
748. නගරං රෙණුවතී නාම ඉට්ඨකාහි සුමාපිතං, ආයාමතො තීණි සතං චතුරස්සසමායුතං{6}.
749. සුදස්සනො නාම පාසාදො විස්සකම්මෙන නිම්මිතො{7}, කුටාගාරවරූපෙතො සත්තරතනභූසිතො.
750. දස සද්දා අචිවිත්තං{8} විජ්ජාධරසමාකුලං, සුදස්සනංව නගරං දෙවතානං භවිස්සති.
751. පභා නිග්ගච්ඡතෙ තස්ස උග්ගච්ඡන්තෙව සූරියෙ{9}, විරොචෙස්සති{10} තං නිච්චං සමන්තා අට්ඨයොජනං.
752. කප්පසතසහස්සම්හි ඔක්කාකකුලසම්භවො, ගොතමො නාම නාමෙන සත්ථා ලොකෙ භවිස්සති.
753. තුසිතා සො චවිත්වාන සුක්කමූලෙන චොදිතො, ගොතමස්ස භගවතො අත්රජො සො භවිස්සති.
754. සචෙ වසෙය්යා’ගාරං චක්කවත්තී භවෙය්ය සො{11}, අට්ඨානමෙතං යං තාදී අගාරෙ රතිමජ්ඣගා.
755. නික්ඛමිත්වා අගාරම්හා පබ්බජිස්සති සුබ්බතො, රාහුලො නාම නාමෙන අරහා සො භවිස්සති.
756. කිකීව අණ්ඩං රක්ඛෙය්ය, චමරී විය වාලධිං, නිපකො සීලසම්පන්නො එවං රක්ඛිං{1} මහාමුනෙ.
757. තස්සා’හං ධම්මමඤ්ඤාය විහාසිං සාසනෙ රතො, සබ්බාසවෙ පරිඤ්ඤාය විහරාමි අනාසවො.
758. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා රාහුලො ථෙරො ඉමා ගාථායො අභාසිත්ථාති.
රාහුලත්ථෙරස්සාපදානං ඡට්ඨං.
17. උපසෙනත්ථෙරාපදානං.
759. පදුමුත්තරං භගවන්තං ලොකජෙට්ඨං නරාසභං, පබ්භාරම්හි නිසින්නං තං{2} උපගච්ඡිං නරුත්තමං.
760. කණිකාරං පුප්ඵිතං දිස්වා වණ්ටෙ{3} ඡෙත්වාන’හං තදා, අලඞ්කරිත්වා ඡත්තම්හි බුද්ධස්ස අභිරොපයිං.
761. පිණ්ඩපාතඤ්ච පාදාසිං{4} පරමන්නං සුභොජනං, බුද්ධෙන නවමෙ තත්ථ සමණෙ අට්ඨ භොජයිං.
762. අනුමොදි මහාවීරො සයම්භු අග්ගපුග්ගලො, ඉමිනා ඡත්තදානෙන පරමන්නප්පවෙච්ඡනා.
763. තෙන චිත්තප්පසාදෙන සම්පත්තිමනුභොස්සති, ඡත්තිංසක්ඛත්තුං දෙවින්දො දෙවරජ්ජං කරිස්සති.
764. එකවීසතික්ඛත්තුඤ්ච චක්කවත්තී භවිස්සති, පදෙසරජ්ජං විපුලං ගණනාතො අසඞ්ඛියං.
765. සතසහස්සෙ ඉතො කප්පෙ ඔක්කාක කුලසම්භවො, ගොතමො නාම ගොත්තෙන සත්ථා ලොකෙ භවිස්සති{*}.
766. සාසනෙ දිප්පමානම්භි මනුස්සත්තං ගමිස්සති, තස්ස ධම්මෙසු දායාදො ඔරසො ධම්මනිම්මිතො උපසෙනොති නාමෙන හෙස්සති සත්ථුසාවකො{†}.
767. චරිමා වත්තතෙ මය්හං භවා සබ්බෙ සමූහතා; ධාරෙමි අන්තිමං දෙහං ඡෙත්වා මාරං සවාහනං.
768. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා උපසෙනො වඞ්ගන්තපුත්තො ථෙරො ඉමා ගාථායො අභාසිත්ථාති.
උපසෙනවඞ්ගන්තපුත්තත්ථෙරස්සාපදානං සත්තමං.
(තතියභාණවාරං.)
18. රට්ඨපාලත්ථෙරාපදානං
769. පදුමුත්තරස්ස භගවතො ලොකජෙට්ඨස්ස තාදිනො, වරනාගො මයා දින්නො ඊසාදන්තො උරූළ්හවා{1}.
770. සෙතච්ඡත්තොපසොභිතො{2} සකප්පනො{3} සහත්ථිපො, අග්ඝාපෙත්වාන තං සබ්බං සංඝාරාමං අකාරයිං.
771. චතුපඤ්ඤාස සහස්සානි පාසාදෙ කාරයිං අහං, මහාභත්තං{4} කරිත්වාන නිය්යාදෙසිං මහෙසිනො.
772. අනුමොදි මහාවීරො සයම්භූ අග්ගපුග්ගලො, සබ්බෙ ජනෙ හාසයන්තො දෙසෙසි අමතං පදං.
773. තං මෙ බුද්ධො වියාකාසි ජලජුත්තරනාමකො{5}, භික්ඛුසංඝෙ නිසීදිත්වා ඉමා ගාථා අභාසථ.
774. චතුපඤ්ඤාස සහස්සානි පාසාදෙ කාරයී අයං, කථයිස්සාමි විපාකං සුණොථ මම භාසතො.
775. අට්ඨාරස සහස්සානි කූටාගාරා භවිස්සරෙ, ව්යමහුත්තමම්හි නිබ්බත්තා සබ්බසොණ්ණමයා ච තෙ.
776. පඤ්ඤාසක්ඛත්තුං දෙවින්දො දෙවරජ්ජං කරිස්සති. අට්ඨපඤ්ඤාසක්ඛත්තුඤ්ච චක්කවත්තී භවිස්සති.
777. කප්පසතසහස්සම්හි ඔක්කාකකුලසම්භවො, ගොතමො නාම නාමෙන සත්ථා ලොකෙ භවිස්සති.
778. දෙවලොකා චවිත්වාන සුක්කමූලෙන චොදිතො, අඩ්ඪෙ කුලෙ මහාභොගෙ නිබ්බත්තිස්සති තාවදෙ.
779. සො පච්ඡා පබ්බජිත්වාන සුක්කමූලෙන චොදිතො, රට්ඨපාලො’ති නාමෙන හෙස්සති සත්ථුසාවකො.
780. පධානපහිතත්තො සො උපසන්තො නිරූපධි, සබ්බාසවෙ පරිඤ්ඤාය නිබ්බායිස්සත’නාසවො.
781. උට්ඨාය අභිනික්ඛම්ම ජහිතා{6} භොගසම්පදා, ඛෙළපිණ්ඩෙව භොගම්භි පෙමං මය්හං න විජ්ජති.
782. විරියං මෙ ධුරධොරය්හං යොගක්ඛෙමාධිවාහනං, ධාරෙමි අන්තිමං දෙහං සම්මාසම්බුද්ධසාසනෙ.
783. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා රට්ඨපාලො ථෙරො ඉමා ගාථායො අභාසිත්ථාති.
රට්ඨපාලත්ථෙරස්ස අපදානං අට්ඨමං.
19. සොපාකත්ථෙරාපදානං
784. පබ්භාරං සෙවයන්තස්ස{1} විපිනෙ{2} පබ්බතුත්තමෙ, සිද්ධත්ථො නාම භගවා ආගච්ඡි මම සන්තිකං.
785. බුද්ධං උපාගතං දිස්වා ලොකජෙට්ඨස්ස තාදිනො, සන්ථරං සන්ථරිත්වාන{3} පුප්ඵාසනමාදාස’හං.
786. පුප්ඵාසනෙ නිසීදිත්වා සිද්ධත්ථො ලොකනායකො, මමඤ්ච ගතිමඤ්ඤාය අනිච්චතමුදාහරි:
787. “අනිච්චා වත සඞ්ඛාරා උප්පාදවයධම්මිනො, උප්පජ්ජිත්වා නිරුජ්ඣන්ති තෙසං වූපසමො සුඛො.”
788. ඉදං වත්වාන සබ්බඤ්ඤූ ලොකජෙට්ඨො නරාසභො, නභං අබ්භූග්ගමි ධීරො හංසරාජාව අම්බරෙ.
789. සකං දිට්ඨං ජහිත්වාන භාවයා’නිච්චසඤ්ඤ’හං, එකාහං භාවයිත්වාන තත්ථ කාලකතො අහං.
790. ද්වෙ සම්පත්තී අනුභොත්වා සුක්කමූලෙන චොදිතො, පච්ඡිම්භවෙ සම්පත්තෙ සපාකයොනු’පාගමිං{4}.
791. අගාරා අභිනික්ඛම්ම පබ්බජිං අනගාරියං. ජාතියා සත්තවස්සො’හං අරහත්තමපාපුණිං.
792. ආරද්ධවිරියො පහිතත්තො සීලෙසු සුසමාහිතො, තොසෙත්වාන මහානාගං අලත්ථං උපසම්පදං.
793. චතුනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි පුප්ඵදානස්සි’දං ඵලං.
794. චතුනවුතෙ ඉතො කප්පෙ යං සඤ්ඤං භාවයිං තදා, තං සඤ්ඤං භාවයන්තස්ස පත්තො මෙ ආසවක්ඛයො.
795. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා සොපාකො ථෙරො ඉමා ගාථායො අභාසිත්ථාති.
සොපාකත්ථෙරස්සාපදානං නවමං.
20. සුමඞ්ගලත්ථෙරාපදානං.{*}
796. ආහුතිං යිට්ඨුකාමො’හං පටියාදෙත්වාන භොජනං, බ්රාහ්මණෙ පතිමානෙන්තො විසාලෙ මාළකෙ ඨිතො.
797. අථ’ද්දසාසිං සම්බුද්ධං පියදස්සිං මහායසං, සබ්බලොකවිනෙතාරං සයම්භූං අග්ගපුග්ගලං.
798. භගවන්තං ජුතිමන්තං සාවකෙහි පුරක්ඛතං, ආදිච්චමිව රොචන්තං රථියං පටිපන්නකං{5}.
799. අඤ්ජලිම්පග්ගහෙත්වාන සකං චිත්තං පසාදයිං, මනසා ‘ව නිමන්තෙසිං ආගච්ඡතු මහාමුනීති.
800. මම සඞ්කප්පමඤ්ඤාය සත්ථා ලොකෙ අනුත්තරො, ඛීණාසවසහස්සෙහි මම ද්වාරං උපාගමි.
801. “නමො තෙ පුරිසාජඤ්ඤ නමො තෙ පුරිසුත්තම, පාසාදං අභිරූහිත්වා සීහාසනෙ නිසීද ත්වං”.
802. දන්තො දන්තපරිවාරො තිණ්ණො තාරයතං වරො, පාසාදං අභිරූහිත්වා නිසීදි පවරාසනෙ.
803. යං මෙ අත්ථි සකෙ ගෙහෙ ආමිසං පච්චුපට්ඨිතං, තා’හං බුද්ධස්ස පාදාසිං පසන්නො සෙහි පාණිහි.
804. පසන්නචිත්තො සුමනො වෙදජාතො කතඤ්ජලී, බුද්ධසෙට්ඨං නමස්සාමි අහො බුද්ධස්සුළාරතා.!
805. අට්ඨන්නං පයිරූපාසතං{1} භුඤ්ජං{2} ඛීණාසවා බහු, තුය්හෙවෙසො ආනුභාවො සරණං තං උපෙමහං.
806. පියදස්සී ච භගවා ලොකජෙට්ඨො නරාසභො, භික්ඛුසංඝෙ නිසීදිත්වා ඉමා ගාථා අභාසථ:
807. “යො සො සංඝං අභොජෙසි උජුභූතං සමාහිතං, තථාගතඤ්ච සම්බුද්ධං සුණාථ මම භාසතො.
808. සත්තවීසතික්ඛත්තුං සො දෙවරජ්ජං කරිස්සති, සකකම්මාභිරද්ධො සො දෙවලොකෙ රමිස්සති.
809. දසඤ්ච’ට්ඨක්ඛත්තුං සො චක්කත්තී භවිස්සති, පථව්යා රජ්ජං පඤ්චසතං වසුධං ආවසිස්සති.”
810. අරඤ්ඤං වනමොගය්හ කානනං ව්යග්ඝසෙවිතං, පධානං පදහිත්වාන කිසො ඣාපිතා මයා.
811. අට්ඨාරසෙ කප්පසතෙ යං දානමදදිං තදා, දුග්ගතිං නාභිජානාමි භත්තදානස්සි’දං ඵලං
812. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සුමඞ්ගලො ථෙරො ඉමා ගාථායො අභාසිත්ථාති.
සුමඞ්ගලත්ථෙරස්සාපදානං දසමං.
උද්දානං:
සීහාසනී එකථම්භී නන්දො ච චුල්ලපන්ථකො, පිළින්දො{3} රාහුලො චෙව වඞ්ගන්තො රට්ඨපාලකො සොපාකො මඞ්ගලො චෙව දසෙව දුතියෙ වග්ගෙ. සතඤ්ච අට්ඨතිංසා ච ගාථා එත්ථ පකාසිතා.
සිහාසනදායකවග්ගො දුතියො
3. සුභූතිවග්ගො
21. සුභූතිත්ථෙරාපදානං.
813. හිමවන්තස්ස අවිදූරෙ නිසභො නාම පබ්බතො, අස්සමො සුකතො මය්හං පණ්ණසාලා සුමාපිතා.
814. කොසියො නාම නාමෙන ජටිලො උග්ගතාපනො, එකාකියො අදුතියො වසාමි නිසභෙ තදා.
815. ඵලං මූලඤ්ච පණ්ණඤ්ච න භුඤ්ජාමි අහං තදා, පවත්තපණ්ඩුපත්තානි{1} උපජීවාමි තාවදෙ.
816. නා’හං කොපෙමි ආජීවං චජමානොපි ජීවිතං, ආරාධෙමි සකං චිත්තං විවජ්ජෙමි අනෙසනං.
817. රාගූපසංහිතං චිත්තං යදා උප්පජ්ජතෙ මම, සයංව පච්චවෙක්ඛාමි එකග්ගො තං දම්මෙ’හං.
818. “රජ්ජසි රජනීයෙ ච දොසනීයෙ ච දුස්සසි{2}, මුය්හසෙ මොහනීයෙ ච නික්ඛමස්සු වනා තුවං.
819. විසුද්ධානං අයං වාසො නිම්මලානං තපස්සිනං, මා ඛො විසුද්ධං දූසෙසි නික්ඛමස්සු වනා තුවං.
820. අගාරිකො භවිත්වාන සදා යුත්තං{3} ලභිස්සසි, උභොපි මා විරාධෙසි නික්ඛමස්සු වනා තුවං.
821. ඡවාලාතං යථා කට්ඨං න ක්වචි කිච්චකාරකං,{4} නෙව ගාමෙ අරඤ්ඤෙ වා න හි තං කට්ඨසම්මතං.
822. ඡවාලාතූපමො ත්වංසි න ගිහී නාපි සඤ්ඤතො{5}, උභතො මුත්තකො අජ්ජ නික්ඛමස්සු වනා තුවං.
823. සියා නු ඛො තව{6} එතං කො පජානාති තෙ{7} ඉදං, සද්ධාධුරං ජහසි{8} තෙ{*} කොසජ්ජබහුලාය ච.