1983. සුමෙධො නාම නාමෙන සයම්භූ අපරාජිතො, විවෙකමනුබ්රූහන්තො අජ්ඣොගාහි මහාවනං.
1984. සලලං පුප්ඵිතං දිස්වා ගන්ථිත්වාන{1} වටංසකං, බුද්ධස්ස අභිරොපෙසිං සම්මුඛා ලොකනායකං.
1985. තිංසකප්පසහස්සම්හි යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
1986. ඌනවීසෙ කප්පසතෙ සොළසාසිංසු නිම්මිතා, සත්තරතනසම්පන්නා චක්කවත්තී මහබ්බලා.
1987. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා වටංසකියො ථෙරො ඉමා ගාථායො අභාසිත්ථාති.
වටංසකියත්ථෙරස්ස අපදානං නවමං.
150. පල්ලඞ්කදායකත්ථෙරාපදානං
1988. සුමෙධස්ස භගවතො ලොකජෙට්ඨස්ස තාදිනො, පල්ලඞ්කො හි මයා දින්නො සඋත්තර සපච්ඡදො.
1989. සත්තරතනසම්පන්නො පල්ලඞ්කො ආසි සො තදා, මම සඞ්කප්පමඤ්ඤාය නිබ්බත්තති සදා මම.
1990. තිංසකප්පසහස්සම්හි පල්ලඞ්කමදදිං තදා, දුග්ගතිං නාභිජානාමි පල්ලඞ්කස්ස ඉදං ඵලං.
1991. වීසකප්පසහස්සම්හි සුවණ්ණාභා තයො ජනා, සත්තරතනසම්පන්නා චක්කවත්තී මහබ්බලා.
1992. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා පල්ලඞ්කදායකො ථෙරො ඉමා ගාථායො අභාසිත්ථාති.
පල්ලඞ්කදායකත්ථෙරස්ස අපදානං දසමං.
උද්දානං:
ඡත්තං ථම්භො ච වෙදි ච පරිවාරුම්මපුප්ඵියො අනුලෙපො මග්ගදායී ඵලකදායී වටංසකො පල්ලඞ්කදායී ගාථායො ඡපඤ්ඤාස පකිත්තිතා.
ඡත්තවග්ගො පණ්ණරසමො.
16. බන්ධුජීවකවග්ගො
151. බන්ධුජීවකත්ථෙරාපදානං.
1993. චන්දංව විමලං සුද්ධං විප්පසන්නමනාවිලං, නන්දීභවපරික්ඛීණං තිණ්ණං ලොකෙ විසත්තිකං.
1994. නිබ්බාපයන්තං ජනතං තිණ්ණං තාරයතං වරං{1}, වනස්මිං ඣායමානං තං එකග්ගං සුසමාහිතං.
1995. බන්ධුජීවකපුප්ඵානි ලග්ගෙත්වා සුත්තකෙනහං{2}, බුද්ධස්ස අභිරොපෙසිං සිඛිනො ලොකබන්ධුනො.
1996. එකතිංසෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධපූජායිදං ඵලං.
1997. ඉතො සත්තමකෙ කප්පෙ මනුජින්දො බ්රහායසො, සමන්තචක්ඛු නාමාසිං චක්කවත්තී මහබ්බලො.
1998. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා බන්ධුජීවකො ථෙරො ඉමා ගාථායො අභාසිත්ථාති.
බන්ධුජීවකත්ථෙරස්ස අපදානං පඨමං.
152. තම්බපුප්ඵියත්ථෙරාපදානං.
1999. පරකම්මායනෙ යුත්තො අපරාධං අකාසහං, වනන්තං අතිධාවිස්සං භයභෙරවසමප්පිතො.
2000. පුප්ඵිතං පාදපං දිස්වා පිණ්ඩිබද්ධං සුනිම්මිතං, තම්බපුප්ඵං ගහෙත්වාන බොධියං ඔකිරිං අහං.
2001. සම්මජ්ජිත්වාන තං බොධිං පාටලීපාදපුත්තමං, පල්ලඞ්කං ආභුජිත්වාන බොධිමූලෙ උපාවිසිං.
2002. ගතමග්ගං ගවෙසන්තො ආගච්ඡුං මම සන්තිකං, තෙ ච දිස්වාන’හං තත්ථ ආචජ්ජං බොධිමුත්තමං.
2003. වන්දිත්වා ච අහං බොධිං විප්පසන්නෙන චෙතසා, අනෙකතාලෙ පපතිං ගිරිදුග්ගෙ භයානකෙ.
2004. එකනවුතෙ ඉතො කප්පෙ යං පුප්ඵමභිරොපයි, දුග්ගතිං නාභිජානාමි බොධිපූජායිදං ඵලං.
2005. ඉතො ච තතියෙ කප්පෙ රාජා සුසඤ්ඤතො{1} අහං, සත්තරතනසම්පන්නො චක්කවත්තී මහබ්බලො.
2006. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තම්බපුප්ඵියො ථෙරො ඉමා ගාථායො අභාසිත්ථාති.
තම්බපුප්ඵියත්ථෙරස්ස අපදානං දුතියං.
153. විථිසම්මජ්ජකත්ථෙරාපාදනං.
2007. උදෙන්තං සතරංසිංව පීතරංසිංව{2} භානුමං, පණ්ණරසෙ යථා චන්දං නිය්යන්තං ලොකනායකං.
2008. අට්ඨසට්ඨිසහස්සානි සබ්බෙ ඛීණාසවා අහූ, පරිවාරිංසු සම්බුද්ධං දිපදින්දං නරාසභං.
2009. සම්මජ්ජිත්වාන තං වීථිං නීයන්තෙ ලොකනායකෙ, උස්සාපෙසිං ධජං තථෙ විප්පසන්නෙන චෙතසා.
2010. එකනවුතෙ ඉතො කප්පෙ යං ධජං අභිරොපයිං, දුග්ගතිං නාභිජානාමි ධජදානස්සිදං ඵලං.
2011. ඉතො චතුත්ථකෙ කප්පෙ රාජා’හොසිං මහබ්බලො, සබ්බාකාරෙන සම්පන්නො සුධජො ඉති විස්සුතො.
2012. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා විථිසම්මජ්ජකො ථෙරො ඉමා ගාථායො අභාසිත්ථාති.
වීථිසම්මජ්ජකත්ථෙරස්ස අපදානං තතියං.
154. කක්කාරුපූජකත්ථෙරාපදානං.
2013. දෙවපුත්තො අහං සන්තො පූජයිං සිඛිනායකං, කක්කාරුපුප්ඵං පග්ගය්හ බුද්ධස්ස අභිරොපයිං.
2014. එකතිංසෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
2015. ඉතො ච නවමෙ කප්පෙ රාජා සත්තුත්තමො අහුං, සත්තරතනසම්පන්නො චක්කවත්තී මහබ්බලො.
2016. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කක්කාරුපූජකො ථෙරො ඉමා ගාථායො අභාසිත්ථාති.
කක්කාරුපූජකත්ථෙරස්ස අපදානං චතුත්ථං.
155. මන්දාරවපූජකත්ථෙරාපදානං.
2017. දෙවපුත්තො අහං සන්තො පූජෙසිං සිඛිනායකං, මන්දාරවෙන පුප්ඵෙන බුද්ධස්ස අභිරොපයිං.
2018. සත්තාහං ඡදනං ආසි දිබ්බං මාල්යං තථාගතෙ, සබ්බෙ ජනා සමාගන්ත්වා නමස්සිංසු තථාගතං.
2019. එකතිංසෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2020. ඉතො ච දසමෙ කප්පෙ රාජා’හොසිං ජුතින්ධරො, සත්තරතනසම්පන්නො චක්කවත්තී මහබ්බලො.
2021. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මන්දාරවපූජකො ථෙරො ඉමා ගාථායො අභාසිත්ථාති.
මන්දාරවපූජකත්ථෙරස්ස අපදානං පඤ්චමං.
156. කදම්බපුප්ඵියත්ථෙරාපදානං.
2022. හිමවන්තස්ස අවිදූරෙ කුක්කුටො නාම පබ්බතො, තම්හි පබ්බතපාදම්හි සත්තබුද්ධා වසන්ති තෙ.
2023. කදම්බං පුප්ඵිතං දිස්වා දීපරාජං’ව උග්ගතං, උභොහත්ථෙහි පග්ගය්හ සත්තබුද්ධෙ සමොකිරිං.
2024. චතුනවුතෙ ඉතො කප්පෙ යං පුප්ඵමභිරොපයිං{1}, දුග්ගතිං නාභිජානාමි බුද්ධපූජායිදං ඵලං.
2025. ද්වෙ නවුතෙ ඉතො කප්පෙ සත්තාසුං පුප්ඵනාමකා{2}, සත්තරතනසම්පන්නා චක්කවත්තී මහබ්බලා.
2026. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කදම්බපුප්ඵියො ථෙරො ඉමා ගාථායො අභාසිත්ථාති.
කදම්බපුප්ඵියත්ථෙරස්ස අපදානං ඡට්ඨං.
157. තිණසූලකත්ථෙරාපදානං.
2027. හිමවන්තස්ස අවිදූරෙ භුතගණො නාම පබ්බතො, වසතෙ’කො ජිනො තත්ථ සයම්භූ ලොකනිස්සටො.
2028. තිණසූලෙ ගහෙත්වාන බුද්ධස්ස අභිරොපයිං, එකූනසතසහස්සං කප්පං{1} න විනිපාතිකො.
2029. ඉතො එකාදසෙ කප්පෙ එකො’සිං ධරණීරුහො සත්තරතනසම්පන්නො චක්කවත්තී මහබ්බලො.
2030. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිණසූලකො ථෙරො ඉමා ගාථායො අභාසිත්ථාති.
තිණසූලකත්ථෙරස්ස අපදානං සත්තමං.
158. නාගපුප්ඵියත්ථෙරාපදානං.
2031. සවච්ඡො නාම නාමෙන බ්රාහ්මණො මන්තපාරගූ, පුරක්ඛතො සසිස්සෙහි වසතී පබ්බතන්තරෙ.
2032. පදුමුත්තරො නාම ජිනො ආහුතීනං පටිග්ගහො, මමුද්ධරිතුකාමො සො ආගච්ඡි මම සන්තිකං.
2033. වෙහාසම්භි චඞ්කමති ධූපෙති{2} ජලතෙ තථා, හාසං මම විදිත්වාන{3} පක්කාමි පාචිනාමුඛො.
2034. තඤ්ච අච්ඡරියං දිස්වා අබ්භුතං ලොමහංසනං, නාගපුප්ඵං ගහෙත්වාන ගතමග්ගම්හි ඔකිරිං.
2035. සතසහස්සෙ ඉතො කප්පෙ යං පුප්ඵං ඔකිරිං අහං{4}, තෙන චිත්තප්පසාදෙන දුග්ගතිං නූපපජ්ජහං.
2036. එකතිංසෙ කප්පසතෙ{5} රාජා ආසිං මහාරථො, සත්තරතනසම්පන්නො චක්කවත්තී මහබ්බලො.
2037. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා නාගපුප්ඵියො ථෙරො ඉමා ගාථායො අභාසිත්ථාති.
නාගපුප්ඵියත්ථෙරස්ස අපදානං අට්ඨමං.
159. පුන්නාගපුප්ඵියත්ථොරාපදානං.
2038. කානනං වනමොගය්හ වසාමි ලුද්දකො අහං, පුන්නාගං පුප්ඵිතං දිස්වා බුද්ධසෙට්ඨං අනුස්සරිං.
2039. තං පුප්ඵං විචිනිත්වාන සුගන්ධං ගන්ධිතං සුභං, ථූපං කරිත්වා පුලිනෙ බුද්ධස්ස අභිරොපයිං.
2040. ද්වෙ නවුතෙ අතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2041. එකම්හි නවුතෙ කප්පෙ එකො ආසිං තමොනුදො, සත්තරතනසම්පන්නො චක්කවත්තී මහබ්බලො.
2042. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පුන්නාගපුප්ඵියො ථෙරො ඉමා ගාථායො අභාසිත්ථාති.
පුන්නාගපුප්ඵියත්ථෙරස්ස අපදානං නවමං.
160. කුමුදදායකත්ථෙරාපදානං
2043. හිමවන්තස්ස අවිදූරෙ මහාජාතස්සරො අහු, පදුමුප්පලසඤ්ඡන්නො පුණ්ඩරීකසමොත්ථටො{1}.
2044. කුකුත්ථො{2} නාම නාමෙන තත්ථාසිං සකුණො තදා, සීලවා බුද්ධිසම්පන්නො පුඤ්ඤාපුඤ්ඤෙසු කොවිදො.
2045. පදුමුත්තරො ලොකවිදූ ආහුතීනං පටිග්ගහො, ජාතස්සරස්සාවිදූරෙ සඤ්චරිත්ථ මහාමුනි.