1634. සුදස්සනොති නාමෙන මාලාකාරො අහං තදා, අද්දසං විරජං බුද්ධං ලොකජෙට්ඨං නරාසභං.
1635. ජාතිපුප්ඵං ගහෙවොන පූජයිං පදුමුත්තරං, විසුද්ධචක්ඛු සුමනො දිබ්බචක්ඛුං සමජ්ඣගං.
1636. එතිස්සා පුප්ඵපූජාය චිත්තස්ස පණිධීහි ච, කප්පානං සතසහස්සං දුග්ගතිං නූපපජ්ජහං.
1637. සොළසාසිංසු රාජානො දෙවුත්තරසනාමකා, ඡත්තිංසම්හි ඉතො කප්පෙ චක්කවත්තී මහබ්බලා.
1638. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා මුට්ඨිපුප්ඵියො ථෙරො ඉමා ගාථායො අභාසිත්ථාති.
මුට්ඨිපුප්ඵියත්ථෙරස්ස අපදානං පඤ්චමං.
106. උදකපූජකත්ථෙරාපදානං.
1639. සුවණ්ණවණ්ණං සම්බුද්ධං ගච්ඡන්තං අනිලඤ්ජසෙ, ඝතාසනං’ව ජලිතං ආදිත්තං’ව හුතාසනං.
1640. පාණිනා උදකං ගය්හ ආකාසෙ උක්ඛිපිං අහං, සම්පටිච්ඡි මහාවීරො බුද්ධො කාරුණිකො ඉසි{1}.
1641. අන්තලික්ඛෙ ඨිතො සත්ථා පදුමුත්තරනාමකො, මම සඞ්කප්පමඤ්ඤාය ඉමං ගාථං අභාසථ:
1642. “ඉමිනොදකදානෙන පීතිඋප්පාදනෙන ච, කප්පසතසහස්සම්හි{2} දුග්ගතිං නූපපජ්ජති”{3}.
1643. තෙන කම්මෙන දිපදින්දෙ ලොකජෙට්ඨෙ නරාසභෙ, පත්තොම්හි අචලං ඨානං හිත්වා ජයපරාජයං.
1644. සහස්සරාජනාමෙන තයො තෙ චක්කවත්තිනො, පඤ්චසට්ඨිකප්පසතෙ චාතුරන්තා ජනාධිපා.
1645. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා උදකපූජකො ථෙරො ඉමා ගාථායො අභාසිත්ථාති.
උදකපූජකත්ථෙරාපදානං චතුත්ථං.
107. නළමාලියත්ථෙරාපදානං.
1646. පදුමුත්තරබුද්ධස්ස ලොකජෙට්ඨස්ස තාදිනො, තිණත්ථරෙ{4} නිසින්නස්ස උපසන්තස්ස තාදිනො.
1647. නළමාලං ගහෙත්වාන බන්ධිත්වා වීජනිං අහං, බුද්ධස්ස උපනාමෙසිං දිපදින්දස්ස තාදිනො.
1648. පටිග්ගහෙත්වා සබ්බඤ්ඤූ වීජනිං ලොකනායකො, මම සඞ්කප්පමඤ්ඤාය ඉමං ගාථං අභාසථ:
1649. “යථා මෙ කායො නිබ්බාති පරිළාහො න විජ්ජති, තථෙව තිවිධග්ගීහි චිත්තං තව විමුච්චතු.”
1650. සබ්බෙ දෙවා සමාගච්ඡුං යෙ කෙචි වනනිස්සිතා{5} ‘සොස්සාම බුද්ධවචනං හාසයන්තං ච දායකං’.
1651. නිසින්නො භගවා තත්ථ දෙවසංඝපුරක්ඛතො, දායකං සම්පහංසෙන්තො ඉමා ගාථා අභාසථ:
1652. “ඉමිනා වීජනිදානෙන චිත්තස්ස පණිධීහි ච, සුබ්බතො නාම නාමෙන චක්කවත්තී භවිස්සති.
1653. තෙන කම්මාවසෙසෙන සුක්කමූලෙන චොදිතො, මාලුතො නාම නාමෙන චක්කවත්තී භවිස්සති.
1654. ඉමිනා වීජනිදානෙන සම්මානවිපුලෙන ච, කප්පසතසහස්සම්හි දුග්ගතිං නූපපජ්ජති.”
1655. තිංසකප්පසහස්සම්හි සුබ්බතා අට්ඨතිංස තෙ, එකූනතිංසසහස්සෙ අට්ඨ මාලුතනාමකා.
1656. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා නළමාලියො ථෙරො ඉමා ගාථායො අභාසිත්ථාති.
නළමාලියත්ථෙරස්ස අපදානං{1} සත්තමං.
සත්තමභාණවාරං නිට්ඨිතං.
108. ආසනූපට්ඨාපකත්ථෙරාපදානං.
1657. කානනං වනමොගය්හ අප්පසද්දං නිරාකුලං, සීහාසනං මයා දින්නං අත්ථදස්සිස්ස තාදිනො.
1658. මාලහත්ථං ගහෙත්වාන කත්වා ච නං පදක්ඛිණං, සත්ථාරං පයිරුපාසිත්වා පක්කාමිං උත්තරාමුඛො.
1659. තෙන කම්මෙන දිපදින්දෙ ලොකජෙට්ඨෙ නරාසභෙ, සන්නිබ්බාපෙමි අත්තානං{2} භවා සබ්බෙ සමූහතා.
1660. අට්ඨාරසෙ{3} කප්පසතෙ යං දානමදදිං තදා, දුග්ගතිං නාභිජානාමි සීහාසනස්සිදං ඵලං.
1661. ඉතො සත්තකප්පසතෙ සන්නිබ්බාපක ඛත්තියො, සත්තරතනසම්පන්නො චක්කවත්තී මහබ්බලො.
1662. පටිසම්භිදා චතස්සො විමොක්ඛා’පි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ආසනූපට්ඨාපක{4}ත්ථෙරො ඉමා ගාථායො අභාසිත්ථාති.
ආසනූපට්ඨාපකත්ථෙරස්ස අපදානං අට්ඨමං.
109. බිළාලිදායකත්ථෙරාපදානං.
1663. හිමවන්තස්ස අවිදූරෙ වසාමි පණ්ණසන්ථරෙ, ඝාසෙසු ගෙධමාපන්නො සෙය්යසීලො චහං තදා.
1664. ඛණන්තාලු කලම්බානි බිළාලී තක්කලානි ච, කොලං භල්ලාතකං බිල්ලං ආහිත්වා{1} පටියාදිතං.
1665. පදුමුත්තරො ලොකවිදූ ආහුතීනං පටිග්ගහො, මම සඞ්කප්පමඤ්ඤාය ආගච්ඡි මම සන්තිකං.
1666. උපාගතං මහානාගං දෙවදෙවං නරාසභං, බිළාලිං පග්ගහෙත්වාන පත්තම්හි ඔකිරිං අහං.
1667. පරිභුඤ්ජි මහාවීරො තොසයනෙතතා මමං තදා, පරිභුඤ්ජිත්වාන සබ්බඤ්ඤූ ඉමං ගාථං අභාසථ.
1668. “සකං චිත්තං පසාදෙත්වා බිළාලිං මෙ අදා තුවං, කප්පානං සතසහස්සං දුග්ගතිං නූපගච්ඡසි.”{2}
1669. චතුපඤ්ඤාසිතො කප්පෙ සුමෙඛලිය සව්හයො, සත්තරතනසම්පන්නො චක්කවත්තී මහබ්බලො.{*}
1670. චරිමං වත්තතෙ මය්හං භවා සබ්බෙ සමූහතා, ධාරෙමි අන්තිමං දෙහං සම්මාසම්බුද්ධසාසනෙ.
1671. පටිසම්භිදා චතස්සො ච විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා බිළාලිදායකො ථෙරො ඉමා ගාථායො අභාසිත්ථාති.
බිළාලිදායකත්ථෙරස්ස අපදානං නවමං.
110. රෙණුපූජකත්ථෙරාපදානං.
1672. සුවණ්ණවණ්ණං සම්බුද්ධං සතරංසිං’ව භානුමං, ඔභාසෙන්තං දිසා සබ්බා උළුරාජං’ව පූරිතං.
1673. පුරක්ඛතං සාවකෙහි සාගරෙහෙ’ව{3} මෙදිනිං, නාගං පග්ගය්හ රෙණූහි විපස්සිස්සාභිරොපයිං.
1674. එකනවුතෙ ඉතො කප්පෙ යං රෙණුමභිරොපයිං, දුග්ගතිං නාභිජානාමි බුද්ධපූජායිදං ඵලං.
1675. පණ්ණතාළීසිතො කප්පෙ රෙණු නාමාසි ඛත්තියො, සත්තරතනසම්පන්නො චක්කවත්තී මහබ්බලො.
1676. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා රෙණුපූජකො ථෙරො ඉමා ගාථායො අභාසිත්ථාති.
රෙණුපූජකත්ථෙරස්ස අපදානං දසමං.
උද්දානං:
භික්ඛාදායී ඤාණසඤ්ඤී හත්ථියො පදපූජකො, මුට්ඨිපුප්ඵි උදකදො නළමාලී උපට්ඨකො{1} බිළාලිදායී රෙණු ච ගාථායො ඡ ච සට්ඨි ච.
භික්ඛාදායීවග්ගො එකාදසමො.
12. මහාපරිවාරවග්ගො
111. මහාපරිවාරත්ථෙරාපදානං.{*}
1677. විපස්සී නාම භගවා ලොකජෙට්ඨො නරාසභො, අට්ඨසට්ඨිසහස්සෙහි පාවිසී බන්ධුමං තදා.
1678. නගරා අභිනික්ඛම්ම අගමං දීපචෙතියං, අද්දසං විරජං බුද්ධං ආහුතීනං පටිග්ගහං.
1679. චුල්ලාසීතිසහස්සානි යක්ඛා මය්හං උපන්තිකෙ, උපට්ඨහන්ති සක්කච්චං ඉන්දං’ව තිදසා ගණා.
1680. භවනා අභිනික්ඛම්ම දුස්සං පග්ගය්හ’හං තදා, සිරසා අභිවාදෙසිං තං වාදාසිං මහෙසිනො.
1681. “අහො බුද්ධො අහො ධම්මො{2} අහො නො සත්ථුසම්පදා බුද්ධස්ස ආනුභාවෙන වසුධා’යං පකම්පථ.
1682. තං ච අච්ඡරියං දිස්වා අබ්භුතං ලොමහංසනං, බුද්ධෙ චිත්තං පසාදෙසිං දිපදින්දම්හි තාදිනෙ.
1683. සොහං චිත්තං පසාදෙත්වා දුස්සං දත්වාන සත්ථුනො, සරණඤ්ච උපාගඤ්ඡිං සාමච්චො සපරිජ්ජනො.
1684. එකනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධපූජායිදං ඵලං.
1685. ඉතො පණ්ණරසෙ කප්පෙ සොළසා’සුං සුවාහනා, සත්තරතනසම්පන්නා චක්කවත්තී මහබ්බලා.
1686. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා මහාපරිවාරො ථෙරො ඉමා ගාථායො අභාසිත්ථාති.
මහාපරිවාරත්ථෙරස්ස අපදානං පඨමං.
112. සුමඞ්ගලත්ථෙරාපදානං.
1687. අත්ථදස්සී ජිනවරො ලොකජෙට්ඨො නරාසභො, විහාරා අභිනික්ඛම්ම තළාකං උපසඞ්කමි.
1688. නහාත්වා පීත්වා ච සම්බුද්ධො උත්තරිත්වෙකචීවරො, අට්ඨාසි භගවා තත්ථ විලොකෙන්තො දිසොදිසං.
1689. භවනෙ උපවිට්ඨොහං අද්දසං ලොකනායකං. හට්ඨො හට්ඨෙන චිත්තෙන අප්පොඨෙසිං අහං තදා.
1690. සතරංසිං’ව ජොතන්තං පභාසන්තං’ව කඤ්චනං, නච්චෙ ගීතෙ ච යුත්තො’හං{1} පඤ්චඞ්ගතුරියම්හි ච{2}.
1691. යං යං යොනුපපජ්ජාමි දෙවත්තං අථ මානුසං, සබ්බෙ සත්තෙ අතිභොමි විපුලො හොති මෙ යසො.
1692. “නමො තෙ පුරිසාජඤ්ඤ නමො තෙ පුරිසුත්තම, අත්තානං තොසයිත්වාන පරෙ තොසෙසි ත්වං මුනෙ.”
1693. පරිග්ගය්හ{3} නිසීදිත්වා හාසං කත්වාන සුබ්බතෙ{4}, උපට්ඨහිත්වා සම්බුද්ධං තුසිතං උපපජ්ජ හං.
1694. සොළසෙතො කප්පසතෙ දවි- නව එකචින්තිතා, සත්තරතනසම්පන්නා චක්කවත්තී මහබ්බලො.
1695. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සුමඞ්ගලො ථෙරො ඉමා ගාථායො අභාසිත්ථාති.
සුමඞ්ගලත්ථෙරස්ස අපදානං දුතියං.
113. සරණගමනීයත්ථෙරාපදානං
1696. උභින්නං දෙවරාජූනං සඞ්ගාමො පච්චුපට්ඨිතො{5} අහොසි සමුපබ්බූළ්හො මහාඝොසො පවත්තථ.
1697. පදුමුත්තරො ලොකවිදූ ආහුතීනං පටිග්ගහො, අන්තළික්ඛෙ ඨිතො සත්ථා සංවෙජෙසි මහාජනං.
1698. සබ්බෙ දෙවා අත්තමනා නික්ඛිත්තකවචාවුධා, සම්බුද්ධම්භිවාදෙත්වා එකග්ගා’සිංසු තාවදෙ.
1699. අම්හං සඞ්කප්පමඤ්ඤාය වාචාසභිමුදීරයී, අනුකම්පකො ලොකවිදූ නිබ්බාපෙසි මහාජනං.
1700. “පදුට්ඨචිත්තො මනුජො එකපාණං{1} විහෙඨයං, තෙන චිත්තප්පදොසෙන අපායං උපපජ්ජති.
1701. සඞ්ගාමසීසෙ නාගො’ව බහූ පාණෙ විහෙඨයං, නිබ්බාපෙථ සකං චිත්තං මා හඤ්ඤිත්ථො පුනප්පුනං”
1702. ද්වින්නම්පි යක්ඛරාජූනං සෙනායො විම්හිතා අහූ, සරණඤ්ච උපාගච්ඡුං ලොකජෙට්ඨං සුතාදිනං.
1703. සඤ්ඤාපෙත්වාන ජනතං උද්ධරී පන{2} චක්ඛුමා, පෙක්ඛමානොව දෙවෙහි පක්කාමි උත්තරාමුඛො.
1704. පඨමං සරණං ගඤ්ඡිං{3} දිපදින්දස්ස තාදිනො, කප්පානං සතසහස්සං දුග්ගතිං නූපපජ්ජ ‘හං.