ඉත්ථං සුදං ආයස්මා පරප්පසාදකො ථෙරො ඉමා ගාථායො අභාසිත්ථාති.
පරප්පසාදකත්ථෙරස්ස අපදානං චතුත්ථං.
65. භිසදායකත්ථෙරාපදානං
1377. වෙස්සභූ නාම නාමෙන ඉසීනං තතියො අහු, කානනං වනමොගය්හ විහාසි පුරිසුත්තමො.
1378. භිසං මුලාලං ගණ්හිත්වා අගමං{8} බුද්ධසන්තිකං, තං ච බුද්ධස්ස පාදාසිං පසන්නො සෙහි පාණිහි.
1379. කරෙන ච පරාමට්ඨො වෙස්සභූවරබුද්ධිනා, සුඛාහං නාභිජානාමි සමං තෙන තතුත්තරිං.
1380. චරිමො වත්තතෙ මය්හං භවා සබ්බෙ සමූහතා, හත්ථිනාගෙන සන්තෙන කුසලං රොපිතං මයා.
1381. එකතිංසෙ ඉතො කප්පෙ යං කම්මමකරිං තදා, දුග්ගතිං නාභිජානාමි භිසදානස්සිදං ඵලං.
1382. සමොධානා ච රාජානො සොළස මනුජාධිපා, කප්පම්හි තෙරසෙ ආසුං චක්කවත්තී මහබ්බලා.
1383 පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා භිසදායකො ථෙරො ඉමා ගාථායො අභාසිත්ථාති.
භිසදායකත්ථෙරස්ස අපදානං පඤ්චමං.
66. සුචින්තිතත්ථෙරාපදානං
1384. ගිරිදුග්ගචරො ආසිං අභිජාතොව කෙසරී, මිගසංඝං වධිත්වාන ජීවාමි පබ්බතන්තරෙ.
1385. අත්ථදස්සී තු භගවා සබ්බඤ්ඤූ වදතං වරො, මමුද්ධරිතුකාමො සො ආගච්ඡි පබ්බතුත්තමං.
1386. පසදඤ්ච මිගං හන්ත්වා භක්ඛිතුං සමුපාගමිං, භගවා තම්හි සමයෙ භික්ඛමානො{1} උපාගමි.
1387. වරමංසානි පග්ගය්හ අදාසිං තස්ස සත්ථුනො, අනුමොදි මහාවීරො නිබ්බාපෙන්තො මමං තදා.
1388. තෙන චිත්තප්පසාදෙන ගිරිදුග්ගං පවීසහං, පීතිං උප්පාදයිත්වාන තත්ථ කාලකතො අහං.
1389. එතෙන මංසදානෙන චිත්තස්ස පණිධීහි ච, පණ්ණරසෙ කප්පසතෙ දෙවලොකෙ රමිං අහං.
1390. අවසෙසෙසු කප්පෙසු කුසලං නිචිතං{2} මයා, තෙනෙව මංසදානෙන බුද්ධානුස්සරණෙන ච.
1391. අට්ඨතිංසම්හි කප්පම්හි අට්ඨ දීඝායුනාමකා, සට්ඨිම්හි’තො කප්පසතෙ දුවෙ වරුණනාමකා.
1392 පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සුචින්තිතො ථෙරො ඉමා ගාථායො අභාසිත්ථාති.
සුචින්තිතත්ථෙරස්ස අපදානං ඡට්ඨං.
67. වත්ථදායකත්ථෙරාපදානං
1393. පක්ඛිජාතො තදා ආසිං සුවණ්ණො ගරුළාධිපො, අද්දසං විරජං බුද්ධං ගච්ඡන්තං ගන්ධමාදනං.
1394. ජහිත්වා ගරුළං{1} වණ්ණං මාණවකං අධාරයිං, එකං වත්ථං මයා දින්නං දිපදින්දස්ස තාදිනො.
1395. තඤ්ච දුස්සං පටිග්ගය්හ බුද්ධො ලොකග්ගනායකො, අන්තළික්ඛෙ ඨිතො සත්ථා ඉමං ගාථං අභාසථ:
1396. “ඉමිනා වත්ථදානෙන චිත්තස්ස පණිධීහි ච, පහාය ගරුළං යොනිං දෙවලොකෙ රමිස්සති.”
1397. අත්ථදස්සී තු භගවා ලොකජෙට්ඨො නරාසභො, වත්ථදානං පසංසිත්වා පක්කාමි උත්තරාමුඛො.
1398. භවෙ තිබ්බත්තමානම්හි හොන්ති මෙ වත්ථසම්පදා, ආකාසෙ ඡදනං හොති වත්ථදානස්සිදං ඵලං.
1399. අරුණකා{2} සත්ත ජනා චක්කවත්තී මහබ්බලා, ඡත්තිංසතිම්හි කප්පම්හි ආසිංසු මනුජාධිපා.
1400 පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා වත්ථදායකො ථෙරො ඉමා ගාථායො අභාසිත්ථාති.
වත්ථදායකත්ථෙරස්ස අපදානං සත්තමං.
68. අම්බදායකත්ථෙරාපදානං
1401. අනොමදස්සී භගවා නිසින්නො පබ්බතන්තරෙ, මෙත්තාය අඵරී ලොකං අප්පමාණං නිරූපධි.
1402. කපි අහං තදා ආසිං හිමවන්තෙ නගුත්තමෙ, දිස්වා අනොමං අමිතං බුද්ධෙ චිත්තං පසාදයිං.
1403. හිමවතන්තස්ස අවිදූරෙ{3} අම්බාසුං ඵලිනො තදා, තතො පක්කං ගහෙත්වාන අම්බං සමධුකං අදං.
1404. තම්මෙ බුද්ධො වියාකාසි අනොමදස්සී මහාමුනි, “ඉමිනා මධුදානෙන අම්බදානෙන චූභයං.
1405. සත්තපඤ්ඤාස කප්පානි දෙවලොකෙ රමිස්සති, අවසෙසෙසු කප්පෙසු වොකිණ්ණං සංසරිස්සති.
1406. ඛෙපෙත්වා පාපකං කම්මං පරිපක්කාය බුද්ධියා, විනිපාතමගන්ත්වාන{4} කිලෙසෙ ඣාපයිස්සති.”
1407. දමෙන උත්තමෙනාහං දමිතො’මබි මහෙසිනා, පත්තො’ම්භි අචලං{5} ඨානං හිත්වා ජයපරාජයං.
1408. සත්තසත්තතිකප්පසතෙ අම්බට්ඨජ සනාමකා, චතුද්දසා තෙ රාජානො චක්කවත්තී මහබ්බලා.
1409. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා අම්බදායකො ථෙරො ඉමා ගාථායො අභාසිත්ථාති.
අම්බදායකත්ථෙරස්ස අපදානං අට්ඨමං.
69. සුමනත්ථෙරාපදානං
1410. සුමනො නාම නාමෙන මාලාකාරො අහං තදා අද්දසං විරජං බුද්ධං ලොකාහුතිපටිග්ගහං{1}
1411. උභො හත්ථෙහි පග්ගය්හ සුමනං පුප්ඵමුත්තමං, බුද්ධස්ස අභිරොපෙසිං සිඛිනො ලොකබන්ධුනො.
1412. ඉමාය පුප්ඵපූජාය චෙතනාපණිධීහි ච, දුග්ගතිං නාභිජානාමි පුප්ඵපූජායිදං ඵලං.
1413. එකතිංසෙ ඉතො කප්පෙ යං පුප්ඵම්භිරොපයිං. දුග්ගතිං නාභිජානාමි පුප්ඵපූජායිදං ඵලං.
1414. ඡබ්බීසතිම්හි කප්පම්හි චත්තාරොසුං{2} මහායසා, සත්තරතනසම්පන්නා රාජානො චක්කවත්තිනො.
1415. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සුමනො ථෙරො ඉමා ගාථායො අභාසිත්ථාති.
සුමනත්ථෙරස්ස අපදානං නවමං.
70. පුප්ඵචඞ්ගොටියත්ථෙරාපදානං
1416. අභීතරූපං සීහංව අභිජාතංව කෙසරිං, ව්යග්ඝූසභංව පවරං ගරුළග්ගංව පක්ඛිනං.{*}
1417. සිඛිං තිලොකසරණං අනෙජං අපරාජිතං, නිසින්නං සමණානග්ගං භික්ඛුසංඝපුරක්ඛතං.
1418. වඞ්ගොටකෙ ඨපෙත්වාන අනොජං පුප්ඵමුත්තමං, සහ චඞ්ගොටකොනෙව බුද්ධසෙට්ඨං සමොකිරිං.
1419. තෙන චිත්තප්පසාදෙන දිපදින්දෙ නරාසභෙ{3} පත්තො’ම්භි අචලං ඨානං හිත්වා ජයපරාජයං.
1420. එකතිංසෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධපූජායිදං ඵලං.
1421. සම්පුණ්ණෙ තිංසකප්පම්භි දෙවභූතිසනාමකා, සත්තරතනසම්පන්නො පඤ්චාසුං චක්කවත්තිනො.
1422. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා පුප්ඵචඞ්ගොටියො ථෙරො ඉමා ගාථායො අභාසිත්ථාති.
පුප්ඵචඞ්ගොටියත්ථෙරස්ස අපදානං දසමං.
උද්දානං:
සකවින්තී අවොපුප්ඵි පච්චාභිගමනෙන ච පරප්පසාදී භිසදො සුචින්තී වත්ථදායකො අම්බදායී ච සුමනො පුප්ඵචඞ්ගොටියො’පි ච ගාථෙකසත්තතී වුත්තා ගණිතා අත්ථදස්සිහි.
සකවිත්තනියවග්ගො සත්තමො.
8. නාගසමාලවග්ගො
71. නාගසමාලගත්ථෙරාපදානං
1423. ආපාටලිං{1} අහං පුප්ඵං උච්චිතස්මිං මහාපථෙ,{2} ඵූපම්භි අභිරොපෙසිං සිඛිනො ලොකබන්ධුනො.
1424. එකතිංසෙ ඉතො කප්පෙ යං කම්මමකරිං තදා, දුග්ගතිං නාභිජානාමි ථූපපූජායිදං ඵලං.
1425. ඉතො පණ්ණරසෙ කප්පෙ භූමියො නාම ඛත්තියො, සත්තරතනසම්පන්නො චක්කවත්තී මහබ්බලො.
1426 පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා නාගසමාලො ථෙරො ඉමා ගාථායො අභාසිත්ථාති.
නාගසමාලත්ථෙරස්ස අපදානං පඨමං.{*}
72. පදසඤ්ඤකත්ථෙරාපදානං
1427. අක්කන්තං ච පදං දිස්වා තිස්සස්සාදිච්චබන්ධුනො. හට්ඨො හට්ඨෙන චිත්තෙන පාදෙ චිත්තං පසාදයිං.
1428. දෙවනවුතෙ ඉතො කප්පෙ යං සඤ්ඤමලභිං තදා, දුග්ගතිං නාභිජානාමි පදසඤ්ඤායිදං ඵලං.
1429. ඉතො සත්තමකෙ කප්පෙ සුමෙධො නාම ඛත්තියො, සත්තරතනසම්පන්නො චක්කවත්තී මහබ්බලො.
1430 පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා පදසඤ්ඤකො ථෙරො ඉමා ගාථායො අභාසිත්ථාති.
පදසඤ්ඤකත්ථෙරස්ස අපදානං දුතියං.
73. බුද්ධසඤ්ඤකත්ථෙරාපදානං{1}
1431. දුමග්ගෙ පංසුකූලිකං ලග්ගං දිස්වාන සත්ථුනො, තතො තමඤ්ජලිං කත්වා පංසුකූලං අවන්දහං.
1432. ද්වෙ නවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධසඤ්ඤායිදං ඵලං.
1433. ඉතො චතුත්ථකෙ කප්පෙ දුමසාරො’සි ඛත්තියො{2} චාතුරන්තො විජිතාවී චක්කවත්තී මහබ්බලො.
1434. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා බුද්ධසඤ්ඤකො ථෙරො ඉමා ගාථායො අභාසිත්ථාති.
බුද්ධසඤ්ඤකත්ථෙරස්ස අපදානං තතියං.
74. භිසාලුවදායකත්ථෙරාපදානං
1435. කානනං වනමොගය්හ වසාමි විපිනෙ{3} අහං, විපස්සිං අද්දසං බුද්ධං ආහුතීනං පටිග්ගහං.
1436. භිසාලුවඤ්ච පාදාසිං උදකං හත්ථධොවනං, වන්දිත්වා සිරසා පාදෙ පක්කාමිං උත්තරාමුඛො.
1437. එකනවුතෙ ඉතො කප්පෙ භිසාලුවමදං තදා, දුග්ගතිං නාභිජානාමි පුඤ්ඤාකම්මස්සිදං ඵලං.
1438. ඉතො තතියකෙ කප්පෙ භිසසම්මතඛත්තියො, සත්තරතනසම්පන්නො චක්කවත්තී මහබ්බලො.
1439. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා භිසාලුවදායකො ථෙරො ඉමා ගාථායො අභාසිත්ථාති.
භිසාලුවදායකත්ථෙරස්ස අපදානං චතුත්ථං.
75. එකසඤ්ඤකත්ථෙරාපදානං