1305. සංවුතො පාතිමොක්ඛස්මිං ඉන්ද්රියෙසු ච පඤ්චසු, පවිවෙකමනුයුත්තො විහරාමි අනාසවො.
1306 පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සපරිවාරාසනො ථෙරො ඉමා ගාථායො අභාසිත්ථාති.
සපරිවාරාසනත්ථෙරස්ස අපදානං ඡට්ඨං.
57. පඤ්චදීපකත්ථෙරාපදානං
1307. පදුමුත්තරබුද්ධස්ස සබ්බභූතානුකම්පිනො, සුසණ්ඨහිත්වා{1} සද්ධම්මෙ උජුදිට්ඨි අහොසහං.
1308. පදීපදානං පාදාසිං පරිවාරෙත්වාන බොධියං, සද්දහන්තො පදීපානි අකරිං තාවදෙ අහං.
1309. යං යං යොනුපපජ්ජාමි දෙවත්තං අථ මානුසං, ආකාසෙ උක්කං ධාරෙන්ති දීපදානස්සිදං ඵලං.
1310. තිරොකුඩ්ඩං තිරොසෙලං සමතිග්ගය්හ පබ්බතං, සමන්තා යොජනසතං දස්සනං අනුභොමහං.
1311. චතුත්තිංසෙ කප්පසතෙ සතචක්ඛුසනාමකා, රාජා’හෙසුං මහාතෙජා චක්කවත්තී මහබ්බලා.
1312. තෙන කම්මාවසෙසෙන පත්තො’ම්භි ආසවක්ඛයං, ධාරෙමි අන්තිමං දෙහං දිපදින්දස්ස සාසනෙ.
1313 පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා පඤ්චදීපකො ථෙරො ඉමා ගාථායො අභාසිත්ථාතී.
පඤ්චදීපක{*}ත්ථෙරස්ස අපදානං සත්තමං.
58. ධජදායකත්ථෙරාපදානං
1314. පදුමුත්තරබුද්ධස්ස බොධිම්හි පාදපුත්තමෙ, හට්ඨො හට්ඨෙන චිත්තෙන ධජමාරොපයිං අහං.
1315. පතිත{2}පත්තානි ගණ්හිත්වා බහිද්ධා ඡඩ්ඩයිං අහං, අන්තොසුද්ධං බහිසුද්ධං අධිමුත්තමනාසවං, සම්මුඛා විය සම්බුද්ධං අවන්දිං බොධිමුත්තමං.
1316. පදුමුත්තරො ලොකවිදූ ආහුතීනං පටිග්ගහො, භික්ඛුසංඝෙ ඨිතො සත්ථා ඉමා ගාථා අභාසථ:
1317. “ඉමිනා ධජදානෙන උපට්ඨානෙන චූභයං, කප්පානං සතසහස්සං දුග්ගතිං සො න ගච්ඡති.
1318. දෙවෙසු දෙවසොභග්ගං{1} අනුභොස්සතනප්පකං, අනෙකසතක්ඛත්තුඤ්ච රාජා රට්ඨෙ භවිස්සති, උග්ගතො නාම නාමෙන චක්කවත්තී භවිස්සති.
1319. සම්පත්තිං අනුභොත්වාන සුක්කමූලෙන චොදිතො, ගොතමස්ස භගවතො සාසනෙ’භිරමිස්සති”.
1320. පධානපහිතත්තො’ම්හි උපසන්තො නිරූපධි, ධාරෙමි අන්තිමං දෙහං සම්මාසම්බුද්ධසාසනෙ.
1321. එකපඤ්ඤාසසහස්සෙ කප්පෙ උග්ගතසව්හයො, පඤ්ඤාසතිසහස්සෙ{2} ඛත්තියො මෙඝසව්හයො.
1322. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා ධජදායකො ථෙරො ඉමා ගාථායො අභාසිත්ථාති.
ධජදායකත්ථෙරස්ස අපදානං අට්ඨමං.
59. පදුමත්ථෙරාපදානං
1323. චතුසච්චං පකාසෙන්තො වරධම්මප්පවත්තකො{3}, වස්සතෙ අමතං වුට්ඨිං නිබ්බාපෙන්තො මහාජනං.
1324. සදණ්ඩං{4} පදුමං ගය්හ අඩ්ඪකොසෙ ඨිතො අහං, පදුමුත්තරමුනිස්ස හට්ඨො උක්ඛිපිමම්බරෙ.
1325. ආගච්ඡන්තෙ ච පදුමෙ අබ්භුතො ආසි තාවදො, මම සඞ්කප්පමඤ්ඤාය පග්ගණ්හි වදතං වරො.
1326. කරසෙට්ඨෙන පග්ගය්හ ජලජං පුප්ඵමුත්තමං, භික්ඛුසංඝෙ ඨිතො සත්ථා ඉමා ගාථා අභාසථ:
1327. “යෙනිදං පදුමං ඛිත්තං සබ්බඤ්ඤූම්හි විනායකෙ{5}, තමහං කිත්තයිස්සාමි සුණාථ මම භාසතො.
1328. තිංස කප්පානි දෙවින්දො දෙවරජ්ජං කරිස්සති, පථව්යා රජ්ජං සත්තසතං වසුධං ආවසිස්සති.
1329. තත්ථ පත්තං ගණෙත්වාන{6} චක්කවත්තී භවිස්සති, ආකාසතො පුප්ඵවුට්ඨි අභිවස්සිස්සති තදා.
1330. කප්පසතසහස්සම්හි ඔක්කාකකුලසම්භවො, ගොතමො නාම නාමෙන සත්ථා ලොකෙ භවිස්සති.
1331. තස්ස ධම්මෙසු දායාදො ඔරසො ධම්මනිම්මිතො, සබ්බාසවෙ පරිඤ්ඤාය නිබ්බායිස්සතනාසවො.”
1332. නික්ඛමිත්වාන කුච්ඡිම්හා සම්පජානො පතිස්සතො, ජාතියා පඤ්චවස්සො’හං අරහත්තමපාපුණිං.
1333 පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා පදුමො ථෙරො ඉමා ගාථායො අභාසිත්ථාති.
පදුමත්ථෙරස්ස අපදානං නවමං.
60. අසනබොධියත්ථෙරාපදානං
1334. ජාතියා සත්තවස්සො’හං අද්දසං ලොකනායකං, පසන්නචිත්තො සුමනො උපගච්ඡිං නරුත්තමං.
1335. තිස්සස්සාහං භගවතො ලොකජෙට්ඨස්ස තාදිනො, හට්ඨො හට්ඨෙන චිත්තෙන රොපයිං බොධිමුත්තං.
1336. අසනො නාමධෙය්යෙන ධරණීරුහපාදපො, පඤ්ච වස්සෙ පරිචරිං අසනං බොධිමුත්තමං.
1337. පුප්ඵිතං පාදපං දිස්වා අබ්භුතං ලොමහංසනං, සකං කම්මං පකිත්තෙන්තො බුද්ධසෙට්ඨං උපාගමිං.
1338. තිස්සො තදා සො සම්බුද්ධො සයම්භූ අග්ගපුග්ගලො, භික්ඛුසංඝෙ නිසීදිත්වා ඉමා ගාථා අභාසථ:
1339. “යෙනායං රොපිතා බොධි බුද්ධපූජා ච සක්කතා, තමහං කිත්තයිස්සාමි සුණාථ මම භාසතො.
1340. තිංස කප්පානි දෙවෙසු දෙවරජ්ජං කරිස්සති, චතුසට්ඨික්ඛත්තුං සො චක්කවත්තී භවිස්සති.
1341. තුසිතා හි චවිත්වාන සුක්කමූලෙන චොදිතො, ද්වෙ සම්පත්ති අනුභොත්වා මනුස්සත්තෙ රමිස්සති.
1342. පධානපහිතත්තො සො උපසන්තො නිරූපධි, සබ්බාසවෙ පරිඤ්ඤාය නිබ්බායිස්සතනාසවො.”
1343. විවෙකමනුයුත්තො’හං උපසන්තො නිරූපධි, නාගොව බන්ධනං ඡෙත්වා විහරාමි අනාසවො.
1344. ද්වෙනවුතෙ ඉතො කප්පෙ බොධිං රොපෙසහං තදා දුග්ගතිං නාභිජානාමි බොධිරොපස්සිදං ඵලං.
1345. චතුසත්තති’තො කප්පෙ දණ්ඩසෙනොති විස්සුතො, සත්තරතනසම්පන්නො චක්කවත්තී තදා අහුං.
1346. තෙසත්තතිම්හි’තො කප්පෙ සත්තාහෙසුං මහීපතී, සමත්තනෙමි නාමෙන රාජානො චක්කවත්තිනො.
1347. පණ්ණවීසති’තො කප්පෙ පුණ්ණකො නාම ඛත්තියො, සත්තරතනසම්පන්නො චක්කවත්තී මහබ්බලො.
1348 පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා අසනබොධියො ථෙරො ඉමා ගාථායො අභාසිත්ථාති.
අසනබොධියත්ථෙරස්ස අපදානං දසමං.
උද්දානං:
වීජනී සතරංසී ච සයනො’දකි වාහියො පරිවාරො පදීපඤ්ච ධජො පදුමපූජකො බොධී ච දසමො වුත්තො ගාථා ද්වෙ නවුතී තථා.
වීජනීවග්ගො ඡට්ඨො.
7. සකවිත්තනියවග්ගො
61. සකචින්තනිය{1}ත්ථෙරාපදානං
1349. පවනං කානනං දිස්වා අප්පසදදමනාවිලං, ඉසීනං අනුචිණ්ණංව ආහුතීනං පටිග්ගහං.
1350. ථූපං කත්වාන පුලිනං{2} නානාපුප්ඵං සමොකිරිං. සම්මුඛා විය සම්බුද්ධං නිම්මිතං අභිවන්දහං.
1351. සත්තරතනසම්පන්නො රාජා රට්ඨම්හි{3} ඉස්සරො, සකකම්මාභිරද්ධො’හං ථූපපූජායිදං ඵලං.
1352. එකනවුතෙ ඉතො කප්පෙ යං පුප්ඵම්භිරොපයිං, දුග්ගතිං නාභිජානාමි ථූපපූජායිදං ඵලං.
1353. අසීතිකප්පෙ’නන්තයසො චක්කවත්තී අහොසහං, සත්තරතනසම්පන්නො චතුදීපම්හි ඉස්සරො.
1354 පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සකවිත්තනියො ථෙරො ඉමා ගාථායො අභාසිත්ථාති.
සකවිත්තනියත්ථෙරස්ස අපදානං පඨමං.
62. අවොපුප්ඵියත්ථෙරාපදානං.
1355. විහාරා අභිනික්ඛම්ම අබ්භුට්ඨහිය{1} චඞ්කමෙ, චතුසච්චං පකාසෙන්තො දෙසෙති{2} අමතං පදං.
1356. සිඛිස්ස ගිරමඤ්ඤාය බුද්ධසෙට්ඨස්ස තාදිනො, නානාපුප්ඵං ගහෙත්වාන ආකාසම්හි සමොකිරිං.
1357. තෙන කම්මෙන දිපදින්දෙ ලොකජෙට්ඨෙ නරාසභෙ{3} පත්තො’ම්භි අචලං ඨානං හිත්වා ජයපරාජයං.
1358. එකතිංසෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි පුප්ඵපූජායිදං ඵලං.
1359. ඉතො වීසතිකප්පම්හි සුමෙධො නාම ඛත්තියො, සත්තරතනසම්පන්නො චක්කවත්තී මහබ්බලො.
1360 පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා අවො{4}පුප්ඵියො ථෙරො ඉමා ගාථායො අභාසිත්ථාති.
අවොපුප්ඵියත්ථෙරස්ස අපදානං දුතියං.
63. පච්චාගමනියත්ථෙරාපදානං
1361. සින්ධුයා නදියා තීරෙ චක්කවාකො අහං තදා, සුද්ධසෙවාලභක්ඛො’හං පාපෙසු ච සුසඤ්ඤතො.
1362. අද්දසං විරජං බුද්ධං ගච්ඡන්තං අනිලඤ්ජසෙ, තුණ්ඩෙන සාලං{5} පග්ගය්හ විපස්සිස්සාභිරොපයිං.
1363. “යස්ස සද්ධා තථාගතෙ අචලා සුප්පතිට්ඨිතා, තෙන චිත්තප්පසාදෙන දුග්ගතිං සො න ගච්ඡති.”
1364. ස්වාගතං වත මෙ ආසි බුද්ධසෙට්ඨස්ස සන්තිකෙ, විහඞ්ගමෙන සන්තෙන සුබීජං රොපිතං මයා.
1365. එකනවුතෙ ඉතො කප්පෙ යං පුප්ඵම්භිරොපයිං, දුග්ගතිං නාභිජානාමි පුප්ඵපූජායිදං ඵලං
1366. සුචාරුදස්සනා නාම අට්ඨෙත එකනාමකා, කප්පෙ සත්තරසෙ ආසු චක්කවත්තී මහබ්බලා.
1367 පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා පච්චාගමනියො{6} ථෙරො ඉමා ගාථායො අභාසිත්ථාති.
පච්චාගමනියත්ථෙරස්ස අපදානං තතියං.
64. පරප්පසාදකත්ථෙරාපදානං
1368. උසභං පවරං වීරං මහෙසිං විජිතාවිනං, සුවණ්ණවණ්ණං සම්බුද්ධං කො දිස්වා නප්පසීදති.
1369. හිමවා ‘වාපරිමෙය්යො සාගරො’ව දුරුත්තරො, තථෙව ඣානං බුද්ධස්ස{1} කො දිස්වා නප්පසීදති.
1370. වසුධා යථා අප්පමෙය්යා චිත්තා වනවටංසකා, තථෙව සීලං බුද්ධස්ස කො දිස්වා නප්පසීදති.
1371. අනිලජො’ව අසඞ්ඛොභො{2} යථාකාසො අසඞ්ඛියො, තථෙව ඤාණං බුද්ධස්ස කො දිස්වා නප්පසීදති.
1372. ඉමාහි චතුගාථාහි{3} බ්රාහ්මණො සෙනසව්හයො, බුද්ධසෙට්ඨං ථවිත්වාන සිද්ධත්ථං අපරාජිතං.
1373. චතුනවුතිකප්පානි දුග්ගතිං නුපපජ්ජථ,{4} සුගතීසු සුසම්පත්තිං{5} අනුභොසි{6} අනප්පකං.
1374. චතුනවුතෙ ඉතො කප්පෙ ථවිත්වා ලොකනායකං, දුග්ගතිං නාභිජානාමි ථොමනාය ඉදං ඵලං.
1375. චතුද්දසම්භි කප්පම්හි චතුරො ආසුමුග්ගතා{7} සත්තරතනසම්පන්නා චක්කවත්තී මහබ්බලා.
1376. පටිසම්භිදා -පෙ- කතං බුද්ධස්ස සාසනං.