1152. තත්රාපි ව්යම්හං පවරං විස්සකම්මෙන මාපිතං, දසසද්දාවිවිත්තං තං පුරමඣාවසිස්සති.
1153. අපරිමෙය්යෙ ඉතො කප්පෙ භූමිපාලො මහිද්ධිකො, ඔක්කාකො නාම නාමෙන රාජා රට්ඨෙ භවිස්සති.
1154. සොළසිත්ථිසහස්සානං සබ්බාසං පවරා ච සා{5}, අභිජාතා ඛත්තියානී නව පුත්තෙ ජනෙස්සති.
1155. තව පුත්තෙ ජනෙත්වාන ඛත්තියානී මරිස්සති, තරුණි ච පියා{6} අඤ්ඤා{*} මහෙසිත්තං කරිස්සති.
1156. ඔක්කාකං තොසයිත්වාන වරං කඤ්ඤා{7} ලභිස්සති, වරං ලද්ධානං{8} සා කඤ්ඤා පුත්තෙ පබ්බාජයිස්සති.
1157. පබ්බාජිතා ච තෙ සබ්බෙ ගමිස්සන්ති නගුත්තමං, ජාතිභෙදභයා සබ්බෙ භගිනීහි සංවසිස්සරෙ{9}.
1158. එකා ච කඤ්ඤා ව්යාධීහි භවිස්සති පරික්ඛතා{10}, ‘මා නො ජාති පභිජ්ජී’ ති නිඛණිස්සන්ති ඛත්තියා.
1159. ඛත්තියො නීහරිත්වාන තාය සද්ධිං වසිස්සති, භවිස්සති තදා භෙදො ඔක්කාකකුලසම්භවො.
1160. තෙසං පජා භවිස්සන්ති කොලියා නාම ජාතියා, තත්ථ මානුසකං භොගං අනුභොස්සන්තනප්පකං. .
1161. තම්හා කායා චවිත්වාන දෙවලොකං ගමිස්සති, තත්රාපි පවරං ව්යම්හං වින්දිස්සති{1} මනොරමං.
1162. දෙවලොකා චවිත්වාන සුක්කමූලෙන චොදිතො, ආගන්ත්වාන මනුස්සත්තං සොණො නාම භවිස්සති.
1163. ආරද්ධවිරියො පහිතත්තො පදහං සත්ථු සාසනෙ, සබ්බාසවෙ පරිඤ්ඤාය නිබ්බායිස්සතනාසවො.
1164. අනන්තදස්සී{2} භගවා ගොතමො සක්යපුඞ්ගවො, විසෙසඤ්ඤූ මහාවීරො අග්ගට්ඨානෙ ඨපෙස්සති.” {*}---
1165. උත්තමෙ දමථෙ{3} දන්තො චිත්තං මෙ සුප්පණීහිතං, භාරො මෙ ඔහිතො සබ්බො නිබ්බුතො’ම්හි අනාසවො.
1166. අංගීරසො මහානාගො අභිජාතොව කෙසරී, භික්ඛුසංඝෙ නිසීදිත්වා එතදග්ගෙ ඨපෙසි මං.
1167. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සොණො කොටිකණ්ණො ථෙරො ඉමා ගාථායො අභාසිත්ථාති.
සොණකොටිකණ්ණත්ථෙරස්ස අපදානං දුතියං.
43. කාළිගොධාපුත්තභද්දියත්ථෙරාපදානං{4}
1168. පදුමුත්තරසම්බුද්ධං මෙත්තචිත්තං මහාමුනිං, උපෙති ජනතා සබ්බා සබ්බලොකග්ගනායකං.
1169. වත්ථං සෙනාසනං චෙව{5} ආමිසං පානභොජනං, දදන්ති සත්ථුනො සබ්බෙ පුඤ්ඤක්ඛෙත්තෙ අනුත්තරෙ.
1170. අහම්පි දානං දස්සාමි දෙවදෙවස්ස තාදිනො, බුද්ධසෙට්ඨං නිමන්තෙත්වා සංඝම්පි ච අනුත්තරං.
1171. උය්යොජිතා මයා චෙතෙ නිමන්තෙසුං තථාගතං, කෙවලං භික්ඛුසඞ්ඝඤ්ච පුඤ්ඤක්ඛෙත්තං අනුත්තරං.
1172. සතසහස්ස{1}පල්ලඞ්කං සොවණ්ණං ගොණකත්ථතං, තූලිකා පටලිකාය{2} ඛොමකප්පාසිකෙහි{3} ච, මහාරහං පඤ්ඤපෙසිං ආසනං බුද්ධයුත්තකං.
1173. පදුමුත්තරො ලොකවිදූ දෙවදෙවො නරාසභො, භික්ඛුසංඝපරිබ්බූළ්හො මම ද්වාරං උපාගමි.
1174. පච්චුග්ගන්ත්වාන සම්බුද්ධං ලොකනාථං යසස්සිනං, පසන්නචිත්තො සුමානො අතිනාමයිං සකං{4} ඝරං.
1175. භික්ඛූනං සතසහස්සං බුද්ධඤ්ච ලොකනායකං, පසන්නචිත්තො සුමනො පරමන්නෙන තප්පයිං.
1176. පදුමුත්තරො ලොකවිදූ ආහුතීනං පටිග්ගහො, භික්ඛුසංඝෙ නිසීදිත්වා ඉමා ගාථා අභාසථ:
1177. “යෙනිදං ආසනං දින්නං සොවණ්ණං ගොණකත්ථතං, තමහං කිත්තයිස්සාමි සුණාථ මම භාසතො.
1178. චතුසත්තතික්ඛත්තුං සො දෙවරජ්ජං කරිස්සති, අනුභොස්සති සම්පත්තිං අච්ඡරාහි පුරක්ඛතො.
1179. පදෙසරජ්ජං සහස්සං වසුධං ආවසිස්සති, එකපඤ්ඤාසක්ඛත්තුඤ්ච චක්කවත්තී භවිස්සති.
1180. සබ්බාසු භවයොනීසු උච්චාකුලී{5} භවිස්සති, සො ච පච්ඡා පබ්බජිත්වා සුක්කමූලෙන චොදිතො, භද්දියො නාම නාමෙන හෙස්සති සත්ථුසාවකො.”
1181. විවෙකමනුයුත්තො’ම්හි පන්තසෙනනිවාසහං, ඵලඤ්චාධිගතං සබ්බං චත්ත{6}ක්ලෙසො’ම්හි අජ්ජ’හං.
1182. මම සබ්බං අභිඤ්ඤාය සබ්බඤ්ඤූ ලොකනායකො, භික්ඛුසංඝෙ නිසීදිත්වා එතදග්ගෙ ඨපෙසි මං.
1183. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා භද්දියො කාළිගොධාය පුත්තො ථෙරො ඉමා ගාථායො අභාසිත්ථාති.
කාළිගොධාපුත්තස්ස භද්දියත්ථෙරස්ස අපදානං තතියං.
44. සන්නිට්ඨාපකත්ථෙරාපදානං
1184. අරඤ්ඤෙ කුටිකං කත්වා වසාමි පබ්බතන්තරෙ, ලාභාලාභෙන සන්තුට්ඨො යසෙන අයසෙන ච.
1185. පදුමුත්තරො ලොකවිදූ ආහුතීනං පටිග්ගහො, වසීසතසහස්සෙහි ආගච්ඡි මම සන්තිකං.
1186. උපාගතං මහාවීරං ජලජුත්තරනාමකං, තිණසන්ථරං පඤ්ඤපෙත්වා අදාසිං සත්ථුනො අහං.
1187. පසන්නචිත්තො සුමනො ආමණ්ඩං පානියඤ්ච’හං, අදාසිං උජුභූතස්ස විප්පසන්නෙන චෙතසා.
1188. සතසහස්සෙ ඉතො කප්පෙ{1} යං දානමදදිං තදා, දුග්ගතිං නාභිජානාමි ආමණ්ඩස්ස ඉදං ඵලං.
1189. එකතාළීසකප්පම්හි එකො ආසිං අරින්දමො, සත්තරතනසම්පන්නො චක්කවත්තී මහබ්බලො.
1190. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සන්නිට්ඨාපකො{2} ථෙරො ඉමා ගාථායො අභාසිත්ථාති.
සන්නිට්ඨාපකත්ථෙරස්ස අපදානං චතුත්ථං.
45. පඤ්චහත්ථියත්ථෙරාපදානං
1191. සුමෙධො නාම සම්බුද්ධො ගච්ඡතෙ අන්තරාපණෙ, ඔක්ඛිත්තචක්ඛු{3} මිතභාණී සතිමා සංවුතින්ද්රියො.
1192. පඤ්ච උප්පලහත්ථානි ආවෙලත්ථං අහංසු{4} මෙ, තෙන බුද්ධං අපූජෙසිං පසන්නො සෙහි පාණිහි.
1193. ආරොපිතා ච තෙ පුප්ඵා ඡදනං ආසු{5} සත්ථුනො, සංසාවිංසු{6} මහානාගං සිස්සා ආචරියං යථා.
1194. තිංසකප්පසහස්සම්හි යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
1195. ඉතො වීසකප්පසතෙ අහෙසුං පඤ්ච ඛත්තියා, හත්ථියා නාම නාමෙන චක්කවත්තී මහබ්බලා.
1196. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා පඤ්චහත්ථියො ථෙරො ඉමා ගාථායො අභාසිත්ථාති.
පඤ්චහත්තියත්ථෙරස්ස අපදානං පඤ්චමං.
46. පදුමච්ඡදනියත්ථෙරාපදානං
1197. නිබ්බුතෙ ලොකනාථම්භි විපස්සිම්හග්ගපුග්ගලො, සුඵුල්ලං පදුමං ගය්හ චිතකමාරොපයිං අහං.{1}
1198. ආරොපිතෙ ච චිතකෙ වෙහාසං නභමුග්ගමී, ආකාසච්ඡදනං කත්වා චිතකම්භි අධාරයිං.{2}
1199. එකනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
1200. සත්තතාළීසිතො කප්පෙ පදුමිස්සරනාමකො, චාතුරන්තො විජිතාවී චක්කවත්තී මහබ්බලො.
1201. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා පදුමච්ඡදනියො ථෙරො ඉමා ගාථායො අභාසිත්ථාති.
පදුමච්ඡදනියත්ථෙරස්ස අපදානං ඡට්ඨං.
47. සයනදායකත්ථෙරාපදානං
1202. සිද්ධත්ථස්ස භගවතො මෙත්තචිත්තස්ස තාදිනො, සයනග්ගං මයා දින්නං දුස්සභණ්ඩෙහි අත්ථතං.
1203. පටිග්ගහෙසි භගවා කප්පියං සයනාසනං, උට්ඨාය ආසනා තම්හා වෙහාසං උග්ගමී ජිනො.
1204. චතුනවුතෙ ඉතො කප්පෙ යං සයනමදාසහං, දුග්ගතිං නාභිජානාමි සයනදානස්සිදං{3} ඵලං.
1205. එකපඤ්ඤාසිතො කප්පෙ වරුණො{4} දෙවසව්හයො, සත්තරතනසම්පන්නො චක්කවත්තී මහබ්බලො.
1206. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සයනදායකො ථෙරො ඉමා ගාථායො අභාසිත්ථාති.
සයනදායකත්ථෙරස්ස අපදානං සත්තමං.
48. චඞ්කමදායකත්ථෙරාපදානං
1207. අත්ථදස්සිස්ස මුනිනො ලොකජෙට්ඨස්ස තාදිනො, ඉට්ඨකාහි චිනිත්වාන චඞ්කමං කාරයිං අහං.
1208. උච්චතො පඤ්චරතනං චඞ්කමං සාධු මාපිතං, ආයාමතො හත්ථසතං භාවනීයං{5} මනොරමං.
1209. පටිග්ගහෙසි භගවා අත්ථදස්සී නරුත්තමො, හත්ථෙන පුලිනං ගය්හ ඉමා ගාථා අභාසථ:
1210. “ඉමිනා පුලිනදානෙන චඞ්කමං සුකතෙන ච, සත්තරතනසම්පන්නං පුලිනං අනුභොස්සති.
1211. තීණි කප්පානි දෙවෙසු දෙවරජ්ජං කරිස්සති, අනුභොස්සති සම්පත්තිං අච්ඡරාහි පුරක්ඛතො.
1212. මනුස්සලොකං ආගන්ත්වා රාජා රට්ඨෙ භවිස්සති, තික්ඛත්තුං චක්කවත්තී ච මහියා සො භවිස්සති.”
1213. අට්ඨාරසෙ කප්පසතෙ යං කම්මමකරිං තදා. දුග්ගතිං නාභිජානාමි චඞ්කමස්ස ඉදං ඵලං.
1214. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා චඞ්කම{1}දායකො ථෙරො ඉමා ගාථායො අභාසිත්ථාති.
චඞ්කමදායකත්ථෙරස්ස{*} අපදානං අට්ඨමං.
49. සුභද්දත්ථෙරාපදානං
1215. පදුමුත්තරො ලොකවිදූ ආහුතීනං පටිග්ගහො, ජනතං උද්ධරිත්වාන නිබ්බායති මහායසො.
1216. නිබ්බායන්තෙ ච සම්බුද්ධෙ දසසහස්සී පකම්පථ,{2} ජනකායො මහා ආසි දෙවා සන්නිපතුං තදා.
1217. වන්දනං පූජයිත්වාන{3} තගර{4}මල්ලිකාහි ච, හට්ඨො හට්ඨෙන චිත්තෙන ආලෙපෙසිං{5} නරුත්තමං.
1218. මම සඞ්කප්පමඤ්ඤාය සත්ථා ලොකෙ අනුත්තරො, නිපන්නකොව සම්බුද්ධො ඉමා ගාථා අභාසථ:
1219. “යො මෙ පච්ඡිමකෙ කාලෙ ගන්ධමාල්යෙන{6} ඡාදයී, තමහං කිත්තයිස්සාමි සුණාථ මම භාසතො.
1220. ඉතො චුතො අයං පොසො තුසිතකායං ගමිස්සති, තත්ථ රජ්ජං කරිත්වාන නිම්මානං සො ගමිස්සති.
1221. එතෙනෙව උපායෙන දත්වා මල්යං{7} වරුත්තමං, සකකම්මාභිරද්ධො සො සම්පත්තිං අනුභොස්සති.
1222. පුනාපි තුසිතෙ කායෙ නිබ්බත්තිස්සතයං නරො, තම්හා කායා චවිත්වාන මනුස්සත්තං ගමිස්සති.
1223. සක්යපුත්තො මහානාගො අග්ගො ලොකෙ සදෙවකෙ, බොධයිත්වා බහූ සත්තෙ නිබ්බායිස්සති චක්ඛුමා.
1224. පබ්බජ්ජූපගතො{1} සන්තො සුක්කමූලෙන චොදිතො, උපසඞ්කම්ම සම්බුද්ධං පඤ්හං පුච්ඡිස්සතී තදා.
1225. හාසයිත්වාන{2} සම්බුද්ධො සබ්බඤ්ඤූ ලොකනායකො, පුඤ්ඤකම්මං පරිඤ්ඤාය සච්චානි විවරිස්සති.
1226. ආරද්ධො ච අයං පඤ්හෙ තුට්ඨො එකග්ගමානසො, සත්ථාරං අභිවාදෙත්වා පබ්බජ්ජං යාචයිස්සති.
1227. පසන්නමානසං දිස්වා සක්කම්මෙන තොසිතං, පබ්බාජෙස්සති සො බුද්ධො අග්ගධම්මස්ස කොවිදො.
1228. වායමිත්වාන’යං පොසො සම්මාසම්බුද්ධසාසනෙ, සබ්බාසවෙ පරිඤ්ඤාය නිබ්බායිස්සතනාසවො”.
(පඤ්චමහාණවාරං.)
1229. පුබ්බකම්මෙන සංයුත්තො එකග්ගො සුසමාහිතො, බුද්ධස්ස ඔරසො පුත්තො ධම්මජො’ම්හි සුනිම්මිතො.