4178. අන්ධකා මුණ්ඩකා සබ්බෙ කොලකා සානුවින්දකා,{12} ආරාවචීනරට්ඨා ච ආගච්ඡන්ති මමං ඝරං.
4179. අලසන්දකා පල්ලවකා බබ්බරා භග්ගකාරුසා,{1} රොහිතා{2} චෙතපුත්තා ච ආගච්ඡන්ති මමං ඝරං.
4180. මාධුරකා කොසලකා කාසිකා{3} හත්ථිපොරිකා, ඉසිණ්ඩා මක්කලා චෙව ආගච්ඡන්ති මමං ඝරං.
4181. චෙලාවකා අරම්මා ච ඔක්කලා{4} මෙඝලා{5} බහූ, ඛුද්දකා සුද්දකා චෙව ආගච්ඡන්ති මමං ඝරං.
4182. රොහණා සින්ධවා චෙව චිතකා එකකණ්ණිකා, සුරට්ඨා අපරන්තා ච ආගච්ඡන්ති මමං ඝරං.
4183. සුප්පාරකා කිකුමාරා{6} මලයා{7} සොණ්ණභූමිකා, වජ්ජී තාරා{8} ච තෙ සබ්බෙ ආගච්ඡන්ති මමං ඝරං.
4184. නළකාරා පෙසකාරා චම්මකාරා ච තච්ඡකා, කම්මාරා කුම්භකාරා ච ආගච්ඡන්ති මමං ඝරං.
4185. මණිකාරා ලොහකාරා සොණ්ණකාරා ච දුස්සිකා, තිපුකාරා ච තෙ සබ්බෙ ආගච්ඡන්ති මමං ඝරං.
4186. උසුකාරා භමකාරා පෙසකාරා ච ගන්ධීකා, රජ කා තුන්නවායා ච ආගච්ඡන්ති මමං ඝරං.
4187. තෙලිකා කට්ඨහාරා ච උදහාරා ච පෙස්සිකා, සූපිකා සුපරක්ඛා ච ආගච්ඡන්ති මමං ඝරං.
4188. දොවාරිකා අනීකට්ඨා වන්දිකා{9} පුප්ඵඡඩ්ඩකා, හත්ථාරුහා හත්ථිපාලා ආගච්ඡන්ති මමං ඝරං.
4189. ආනන්දස්ස මහාරඤ්ඤො{10} පමත්තස්ස{11} අදාසහං, සත්තවණ්ණෙන රතනෙන ඌනත්තං{12} පූරයාමහං.
4190. යෙ මයා කිත්තිතා සබ්බෙ නානාවණ්ණා බහුජ්ජනා, තෙසා’හං චිත්තමඤ්ඤාය තප්පයිං රතනෙන’හං.
4191. වග්ගූසු භාසමානාසු වජ්ජමානාසු භෙරිසු, සංඛෙසු ධමයන්තෙසු සකගෙහෙ රමාමහං.
4192. භගවා තම්හි සමයෙ පදුමුත්තරනායකො, වසීසතසහස්සෙහි පරික්ඛීණාසවෙහි සො.
4193. භික්ඛූහි සහිතො වීථිං පටිපජ්ජිත්ථ චක්ඛුමා, ඔභාසෙන්තො දිසා සබ්බා දීපරුක්ඛො’ව ජොතති.
4194. වජ්ජන්ති භෙරියො සබ්බා ගච්ඡන්තෙ ලොකනායකෙ, පභා නිද්ධාවතෙ තස්ස සතරංසීව උග්ගතො.
4195. කවාටන්තරිකායාපි පවිට්ඨෙන ච රංසිනා,{1} අන්තොඝරෙ සුවිපුලො ආලොකො ආසි තාවදෙ.
4196. පභං දිස්වාන බුද්ධස්ස පාරිසජ්ජෙ අචොචහං, නිස්සංසයං බුද්ධසෙට්ඨො ඉමං වීථිමුපාගතො.
4197. ඛිප්පං ඔරුය්හ පාසාදා අගමිං අන්තරාපණං, සම්බුද්ධමභිවාදෙත්වා ඉදං වචනමබ්රවිං:
4198. අනුකම්පතු මෙ බුද්ධො ජලජුත්තමනායකො, වසීසතසහස්සෙහි අධිවාසෙසි සො මුනි.
4199. නිමන්තයිත්වා{2} සම්බුද්ධං අභිනෙසිං සකං ඝරං, තත්ථ අන්නෙන පානෙන සන්තප්පෙසිං මහාමුනිං.
4200. භුත්තාවිං කාලමඤ්ඤාය බුද්ධසෙට්ඨස්ස තාදිනො, සතඞ්ගිකෙන තුරියෙන බුද්ධසෙට්ඨං උපට්ඨහිං.
4201. පදුමුත්තරො ලොකවිදූ ආහුතීනං පටිග්ගහො, අන්තොඝරෙ නිසීදිත්වා ඉමා ගාථා අභාසථ:
4202. “යො මං තුරියෙහුපට්ඨාසී අන්නපානඤ්ච’ දාසි මෙ, තමහං කිත්තයිස්සාමි සුණාථ මම භාසතො.
4203. පහූතභක්ඛො හුත්වාන සහිරඤ්ඤො සභොජනො, චතුදීපෙ එකරජ්ජං කාරයිස්සත’ යං නරො.
4204. පඤ්චසීලෙ සමාදාය දසකම්මපථෙ තතො, සමාදාය පවත්තෙන්තො පරිසං සික්ඛපෙස්සති{3}.
4205. තුරියසතසහස්සානි නාරියො{4} සමලඞ්කතා, වජ්ජයිස්සන්ති’මං නිච්චං උපට්ඨානස්සසිදං ඵලං.
4206. තිංසකප්පසහස්සානි දෙවලොකෙ රමිස්සති, චතුසට්ඨික්ඛත්තුං දෙවින්දො දෙවරජ්ජං කරිස්සති.
4207. චතුසට්ඨික්ඛත්තුං රාජා ච චක්කවත්තී භවිස්සති, පදෙසරජ්ජං විපුලං ගණනාතො අසංඛියං.
4208. කප්පසතසහස්සම්හි ඔක්කාකකුලසම්භවො, ගොතමො නාම නාමෙන සත්ථා ලොකෙ භවිස්සති.
4209. උපපජ්ජති යං යොනිං දෙවත්තං අථ මානුසං,{1} අනූනභොගො හුත්වාන මනුස්සත්තං ගමිස්සති.
4210. අජ්ඣායකො භවිත්වාන තිණ්ණං වෙදානපාරගූ, උත්තමත්ථං ගවෙසන්තො චරිස්සති මහිං ඉමං.
4211. සො පච්ඡා පබ්බජිත්වාන සුක්කමූලෙන චොදිතො, ගොතමස්ස භගවතො සාසනෙ’භිරමිස්සති.
4212. ආරාධයිත්වා{2} සම්බුද්ධං ගොතමං සක්යපුඞ්ගවං, කිලෙසෙ ඣාපයිත්වාන අරහා’යං භවිස්සති.
4213. විපිනෙ ව්යග්ඝරාජාව මිගරාජාව කෙසරී, අභීතො විහරාම’ජ්ජ සක්යපුත්තස්ස සාසනෙ.
4214. දෙවලොකෙ මනුස්සෙ වා දළිද්දෙ දුග්ගතිම්හි වා, නිබ්බත්තිං මෙ න පස්සාමි උපට්ඨානස්සිදං ඵලං.
4215. විවෙකමනුයුත්තොම්හි උපසන්තො නිරූපධි, නාගොව බන්ධනං ඡෙත්වා විහරාමි අනාසවො.
4216. කිලෙසා ඣාපිතා මය්හං භවා සබ්බෙ සමූහතා, නාගො’ව බන්ධනං ඡෙත්වා විහරාමි අනාසවො.
4217. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4218. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ජතුකණ්ණිථෙරො ඉමා ගාථායො අභාසිත්ථාති.
ජතුකණ්ණිත්ථෙරස්ස අපදානං නවමං.
410. උදෙනත්ථෙරාපදානං
4219. හිමවන්තස්ස අවිදූරෙ පදුමො නාම පබ්බතො, අස්සමො සුකතො මය්හං පණ්ණසාලා සුමාපිතා.
4220. නදියො සන්දරෙ සුපතිත්ථා මනොරමා, අච්ඡොදකා සීතජලා සුන්දරා{1} නදියො සදා.
4221. පාඨීනා පාවුසා මච්ඡා වලජා මුඤ්ජරොහිතා, සොභෙන්තා නදියො එතෙ වසන්ති නදියා සදා.
4222. අම්බජම්බූහි සඤ්ඡන්නා කරෙරිතිලකා තථා, උද්දාලකා පාටලියො සොභෙන්ති මම අස්සමං.
4223. අඞ්කොලකා බිම්බිජාලා මායාකාරී ච පුප්ඵිතා, ගන්ධෙන උපවායන්තා සොභෙන්ති මම අස්සමං.
4224. අතිමුත්තා සත්තලිකා නාගා සාලා ච පුප්ඵිතා, දිබ්බගන්ධං{2} සම්පවන්තා සොභෙන්ති මම අස්සමං.
4225. කොසම්බා සලලා නීපා අට්ඨඞ්ගා ච සුපුප්ඵිතා, දිබ්බගන්ධං සම්පවන්තා සොභෙන්ති මම අස්සමං.
4226. හරීතකා ආමලකා අම්බජම්බු විභීටකා, කොලා භල්ලාතකා බිල්ලා ඵලානි බහු අස්සමෙ.
4227. කලම්බා කන්දලී තත්ථ පුප්ඵන්ති මම අස්සමෙ, දිබ්බගන්ධං සම්පවන්තා සොභෙන්ති මම අස්සමං.
4228. අසොකපිණ්ඩී චවරී{3} නිම්බරුක්ඛා ච පුප්ඵිතා, දිබ්බගන්ධං සම්පවන්තා සොභෙන්ති මම අස්සමං.
4229. පුන්නාගා ගිරිපුන්නාගා තිමිරා තත්ථ පුප්ඵිතා, දිබ්බගන්ධං සම්පවන්තා සොභෙන්ති මම අස්සමං.
4230. නිග්ගුණ්ඩී සිරිනිග්ගුණ්ඩී චම්පරුක්ඛෙත්ථ පුප්ඵිතා, දිබ්බගන්ධං සම්පවන්තා සොභෙන්ති මම අස්සමං.
4231. අවිදූරෙ පොක්ඛරණී චක්කවාකූපකූජිතා, මන්දාලකෙහි සඤ්ඡන්නා පදුමුප්පලකෙහි ච.
4232. අච්ඡොදකා සීතජලා සුපතිත්ථා මනොරමා, අච්ඡා ඵලිකසමානා සොභෙන්ති මම අස්සමං.
4233. පදුමා පුප්ඵරෙ තත්ථ පුණ්ඩරීකා ච උප්පලා, මන්දාලකෙහි සඤ්ඡන්නා සොභෙන්ති මම අස්සමං.
4234. පාඨීනා පාවුසා මච්ඡා වලජා මුඤ්ජරොහිතා, විචරන්තා ච තෙ තත්ථ සොභෙන්ති මම අස්සමං.
4235. කුම්භීලා සුංසුමාරා ච කච්ඡපා ච ගහා බහූ, ඔගුහා{1} අජගරා ච සොභෙන්ති මම අස්සමං.
4236. පාරෙවතා රවිහංසා චක්කවාකා නදීචරා, දින්දිභා සාලිකා චෙත්ථ සොභෙන්ති මම අස්සමං.
4237. නයිතා අම්බගන්ධී ච කෙතකා තත්ථ පුප්ඵිතා, දිබ්බගන්ධං සම්පවන්තා සොභෙන්ති මම අස්සමං.
4238. සීහා ව්යග්ඝා ච දීපී ච අච්ඡකොකතරච්ඡකා, අනුසඤ්චරන්තා පවනෙ සොභෙන්ති මම අස්සමං.
4239. ජටාභාරෙන භරිතා අජිනුත්තරවාසනා, අනුසඤ්චරන්තා පවනෙ සොභෙන්ති මම අස්සමං.
4240. අජිනානි ධරා එතෙ නිපකා සන්තවුත්තිනො, අප්පාහාරා ච තෙ සබ්බෙ සොභෙන්ති මම අස්සමං.
4241. ඛාරිභාරං ගහෙත්වාන අජ්ඣොගය්හ වනං තදා, මූලඵලානි භුඤ්ජන්තා වසන්ති අස්සමෙ සදා.
4242. න තෙ දාරුං ආහරන්ති උදකං පාදධොවනං, සබ්බෙසං ආනුභාවෙන සයමෙවාහරීයති.
4243. චුල්ලාසීති සහස්සානි ඉසයෙත්ථ සමාගතා, සබ්බෙව ඣායිනො එතෙ උත්තමත්ථගවෙසකා.
4244. තපස්සිනො බ්රහ්මචාරී චොදෙන්තා අප්පණාවතෙ, අම්බරාවචරා සබ්බෙ වසන්ති අස්සමෙ තදා.
4245. පඤ්චාහං සන්නිපතන්ති එකග්ගා සන්තවුත්තිනො, අඤ්ඤොඤ්ඤං අභිවාදෙත්වා පක්කමන්ති දිසාමුඛා.
4246. පදුමුත්තරො නාම ජිනො සබ්බධම්මානපාරගූ, තමන්ධකාරං{1} විධමං උප්පජ්ජි තාවදෙ ජිනො.
4247. මම අස්සමසාමන්තා යක්ඛො ආසි මහිද්ධිකො, සො මෙ සංසිත්ථ සම්බුද්ධං ජලජුත්තමනායකං.
4248. එස බුද්ධො සමුප්පන්නො පදුමුත්තරො මහාමුනි, ඛිප්පං ගන්ත්වාන සම්බුද්ධං පයිරුපාසය{2} මාරිස.
4249. යක්ඛස්ස වචනං සුත්වා විප්පසන්නෙන චෙතසා, අස්සමං සංසාමෙත්වාන නික්ඛමිං විපිනා තදා.
4250. වෙළෙව ඩය්හමානම්හි නික්ඛමිත්වාන අස්සමා, එකරත්තිං නිවසිත්වා{3} උපගච්ඡිං විනායකං.
4251. පදුමුත්තරො ලොකවිදූ ආහුතීනං පටිග්ගහො, චතුසච්චං පකාසෙන්තො දෙසෙසි අමතං පදං.
4252. සුඵුල්ලං පදුමං ගය්හ උපගන්ත්වා මහෙසිනො, පසන්නචිත්තො සුමනො බුද්ධස්ස අභිරොපයිං.
4253. පූජයිත්වාන සම්බුද්ධං ජලජුත්තමනායකං, එකංසං අජිනං කත්වා සන්ථවිං ලොකනායකං.
4254. යෙන ඤාණෙන සම්බුද්ධො වසතීහ අනාසවො, තං ඤාණං කිත්තයිස්සාමි සුණොථ මම භාසතො.
4255. සංසාරසොතං ඡින්දිත්වා තාරෙසි සබ්බපාණිනො, තව ධම්මං සුණිත්වාන තණ්හාසොතං තරන්ති තෙ.
4256. තුවං සත්ථා ච කෙතු ච ධජො යූපො ච පාණිනං, පරායණො පතිට්ඨා ච දීපො ච දිපදුත්තම.{4}
4257. යාවතා ගණිනො ලොකෙ සත්ථවාහා පවුච්චරෙ, තුවං අග්ගොසි සබ්බඤ්ඤූ තව අන්තොගධාව තෙ.
4258. තව ඤාණෙන සබ්බඤ්ඤූ තාරෙසි ජනතං බහුං, තව දස්සනමාගම්ම දුක්ඛස්සන්තං කරිස්සරෙ.
4259. යෙ කෙචි මෙ ගන්ධජාතා ලොකෙ වායන්ති චක්ඛුම, තව ගන්ධසමො නත්ථි පුඤ්ඤක්ඛෙත්තෙ මහාමුනෙ.
4260. තිරච්ඡානයොනිං නිරයං පරිමොචෙසි{1} චක්ඛුම, අසංඛතං පදං සන්තං දෙසෙසි{2} ත්වං මහාමුනෙ.
4261. පදුමුත්තරො ලොකවිදූ ආහුතීනං පටිග්ගහො, භික්ඛුසඞ්ඝෙ නිසීදිත්වා ඉමා ගාථා අභාසථ:
4262. “යො මෙ ඤාණං අපූජෙසි පසන්නො සෙහි පාණිහි, තමහං කිත්තයිස්සාමි සුණාථ මම භාසතො.
4263. තිංසකප්පසහස්සානි දෙවලොකෙ රමිස්සති, සහස්සක්ඛත්තුං රාජා ච චක්කවත්තී භවිස්සති.”
4264. සුලද්ධලාභං ලද්ධොම්හි තොසයිත්වාන සුබ්බතං, සබ්බාසවෙ පරිඤ්ඤාය විහරාමි අනාසවො.
4265. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4266. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4267. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උදෙනො ථෙරො ඉමා ගාථායො අභාසිත්ථාති.
උදෙනත්ථෙරස්ස අපදානං දසමං.
උද්දානං:
මෙත්තෙය්යො පුණ්ණකො ථෙරො මෙත්තගූ ධොතකො’පි ච, උපසීවො ච නන්දො ච හෙමකො සත්තමො තහිං තොදෙය්යො ජතුකණ්ණී ච උදෙනො ච මහායසො, තීණි ගාථාසතානෙත්ථ අසීති තීණි චුත්තරිං.
මෙත්තෙය්යවග්ගො එකචත්තාළීසතිමො.{3}
42. භද්දාලිවග්ගො
411. භද්දාලිත්ථෙරාපදානං