4085. “අඤ්ඤෙ{2} පීඨෙ ච පල්ලඞ්කෙ ආසන්දීසු නිසීදරෙ, තුවම්පි සබ්බදස්සාවී නිසීදි රතනාසනෙ”
4086. සබ්බරතනමයං පීඨං නිම්මිනිත්වාන තාවදෙ, පියදස්සිස්ස මුනිනො අදාසිං ඉද්ධිනිම්මිතං.
4087. රතනෙ ච නිසින්නස්ස පීඨකෙ ඉද්ධිනිම්මිතෙ, කුම්භමත්තං ජම්බුඵලං අදාසිං තාවදෙ අහං.
4088. මම හාසං ජනෙත්වාන පරිභුඤ්ජි මහාමුනි, තදා චිත්තං පසාදෙත්වා සත්ථාරම්හිවාදයිං.
4089. පියදස්සී තු භගවා ලොකජෙට්ඨො නරාසභො, රතනාසනමාසීනො ඉමා ගාථා අභාසථ:
4090. “යො මෙ රතනමයං පීඨං අමතං ච ඵලං අදා, තමහං කිත්තයිස්සාමි සුණාථ මම භාසතො.
4091. සත්තසත්තති කප්පානි දෙවලොකෙ රමිස්සති, පඤ්චසත්තතික්ඛත්තුඤ්ච චක්කවත්තී භවිස්සති.
4092. ද්වත්තිංසක්ඛත්තුං දෙවින්දො දෙවරජ්ජං කරිස්සති, පදෙසරජ්ජං විපුලං ගණනාතො අසංඛියං.
4093. සොණ්ණමයං රූපිමයං පල්ලඞ්කං සුකතං බහුං, ලොහිතඞ්කමයං{3} චෙව ලච්ඡති රතනාමයං.
4094. චඞ්කමන්තම්පි මනුජං පුඤ්ඤකම්මසමඞ්ගිනං, පල්ලඞ්කානි අනෙකානි පරිවාරිස්සරෙ තදා.
4095. කූටාගාරා ච පාසාදා සයනඤ්ච මහාරහං, ඉමස්ස චිත්තමඤ්ඤාය නිබ්බත්තිස්සන්ති තාවදෙ.
4096. සට්ඨිනාගසහස්සානි සබ්බාලඞ්කාරභූසිතා, සුවණ්ණකච්ඡා මාතඞ්ගා හෙමකප්පනවාසසා{1}.
4097. ආරූළ්හා ගාමණීයෙහි තොමරඞ්කුසපාණිහි{2}, ඉමං පරිචරිස්සන්ති රතනපීඨස්සි’දං ඵලං{3}.
4098. සට්ඨිඅස්සසහස්සානි සබ්බාලඞ්කාරභූසිතා, ආජානීයාව ජාතියා සින්ධවා සීඝවාහිනො.
4099. ආරූළ්හා ගාමණීයෙහි ඉල්ලියාචාපධාරිහි{4}, තෙපි’මං පරිචරිස්සන්ති රතනපීඨස්සි’දං ඵලං.
4100. සට්ඨිරථසහස්සානි සබ්බාලඞ්කාරභූසිතා, දීපා අථොපි වෙය්යග්ඝා සන්නද්ධා උස්සිතද්ධජා.
4101. ආරූළ්හා ගාමණීයෙහි චාපහත්ථෙහි වම්මිහි, පරිවාරෙස්සන්ති’මං නිච්චං රතනපීඨස්සිදං ඵලං.
4102. සට්ඨිධෙනුසහස්සානි දොහඤ්ඤා පුඞ්ගවූසභෙ, වච්ඡකෙ ජනයිස්සන්ති රතනපීඨස්සි’දං ඵලං.
4103. සොළසිත්ථිසහස්සානි සබ්බාලඞ්කාරභූසිතා, විචිත්තවත්ථාභරණා ආමුත්තමණිකුණ්ඩලා.
4104. අළාරපම්හා හසුලා සුසඤ්ඤා තනුමජ්ඣිමා, පරිවාරෙස්සන්ති මං නිච්චං රතනපීඨස්සිදං ඵලං.
4105. අට්ඨාරසෙ කප්පසතෙ ගොතමො නාම චක්ඛුමා, තමන්ධකාරං විධමෙත්වා{5} බුද්ධො ලොකෙ භවිස්සති.
4106. තස්ස දස්සනමාගම්ම පබ්බජිස්සතකිඤ්චනො{6}, තොසයිත්වාන සත්ථාරං සාසනෙ’භිරමිස්සති.
4107. තස්ස ධම්මං සුණිත්වාන කිලෙසෙ ඝාතයිස්සති, සබ්බාසවෙ පරිඤ්ඤාය නිබ්බායිස්සතනාසවො.
4108. විරියං මෙ ධුරධොරය්හං යොගක්ඛෙමාධිවාහනං, උත්තමත්ථං පත්ථයන්තො සාසනෙ විහරාමහං.
4109. ඉදං පච්ඡිමකං මය්හං චරිමො වත්තතෙ භවො, සබ්බාසවපරික්ඛීණො නත්ථි දානි පුනබ්භවො.
4110. කිලෙසා ඣාපිතා මය්හං භවා සබ්බෙ සමූහතා, නාගො’ච බන්ධනං ඡෙත්වා විහරාමි අනාසවො.
4111. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4112. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා හෙමකො ථෙරො ඉමා ගාථායො අභාසිත්ථාති.
හෙමකත්ථෙරස්ස අපදානං සත්තමං.
සත්තරසමං භාණවාරං.
408. තොදෙය්යත්ථෙරාපදානං
4113. රාජාසි විජයො{1} නාම කෙතුමතිපුරුත්තමෙ, සූරො වික්කමසම්පන්නො පුරමජ්ඣාවසී තදා.
4114. තස්ස රඤ්ඤො පමත්තස්ස අටවියො සමුට්ඨහුං, ඔතාරා{2} තුණ්ඩිකා චෙව රට්ඨං විද්ධංසයුං තදා.
4115. පච්චන්තෙ කුපිතෙ ඛිප්පං සන්නිපාතෙස’රින්දමො, භටෙ චෙව බලත්ථෙ ච අරිං නිග්ගාහයී තදා.
4116. හත්ථාරොහා අනීකට්ඨා සූරා ච චම්මයොධිනො, ධනුග්ගහා ච උග්ගා ච සබ්බෙ සන්නිපතුං තදා
4117. ආළාරිකා කප්පකා ච නහාපකා{3} මාලකාරකා, සූරා විජිතසඞ්ගාමා සබ්බෙ සන්නිපතුං තදා.
4118. ඛග්ගහත්ථා ච පුරිසා චාපහත්ථා ච වම්මිනො, ලුද්දා විජිතසඞ්ගාමා සබ්බෙ සන්නිපතුං තදා.
4119. තිධා පභින්නා මාතඞ්ගා කුඤ්ජරා සට්ඨිහායනා, සුවණ්ණකච්ඡාලඞ්කාරා සබ්බෙ සන්නිපතුං තදා.
4120. ඛමා සීතස්ස උණ්හස්ස උක්කාරහරණස්ස{4} ච, යොධාජීවා කතකම්මා සබ්බෙ සන්නිපතුං තදා.
4121. සංඛසද්දං භෙරිසද්දං අථො උද්ධම{1}සද්දකං, එතෙහි තෙ හාසයන්තො සබ්බෙ සන්නිපතුං තදා.
4122. තිසූලකොන්තමන්තෙහි කවචෙහි{2} තොමරෙහි{3} ච, කොට්ටයන්තා{4} නිපාතෙන්තා සබ්බෙ සන්නිපතුං තදා.
4123. කිමෙවාත’නිසාමෙත්වා{5} ස රාජා අජිනං ජිනො,{6} සට්ඨිපාණසහස්සානි සූලෙ උත්තාසයී තදා.
4124. සද්දං මානුසකා’කංසු අහො රාජා අධම්මිකො, නිරයෙ පච්චමානස්ස කදා අන්තො භවිස්සති.
4125. සයනෙ’හං තුවට්ටෙන්තො සයාමි නිරයෙ තදා, න සුපාමි දිවාරත්තිං සූලෙන තජ්ජයන්ති මං.
4126. කිං පමාදෙන රජ්ජෙන වාහනෙන බලෙන ච, න තෙ පහොන්ති ධාරෙතුං තාසයන්ති{7} මමං සදා.
4127. කිං මෙ පුත්තෙහි දාරෙහි රජ්ජෙන සකලෙන ච, යන්නූන පබ්බජෙය්යාහං ගතිමග්ගං විසොධයෙ.
4128. සට්ඨිනාගසහස්සානි සබ්බාලඞ්කාරභූසිතෙ, සුවණ්ණකච්ඡෙ මාතඞ්ගෙ හෙමකප්පනවාසසෙ{8}.
4129. ආරූළ්හෙ ගාමණීයෙහි තොමරඞ්කුසපාණිහි, සඞ්ගාමාවචරෙ ධානෙ{9} අනපෙක්ඛො විහාය’හං, සකකම්මෙන සන්තත්තො නික්ඛමිං අනගාරියං.
4130. සට්ඨිඅස්සසහස්සානි සබ්බාලඞ්කාරභූසිතෙ, ආජානීයෙ ච ජාතියා සින්ධවෙ සීඝවාහනෙ.
4131. ආරූළ්හෙ ගාමණීයෙහි චාපහත්ථෙහි වම්මිහි, පහායිත්වාන{10} තෙ සබ්බෙ නික්ඛමිං අනගාරියං.
4132. සට්ඨිරථසහස්සානි සබ්බාලඞ්කාරභූසිතෙ, දීපෙ අථොපි වෙය්යග්ඝෙ සන්නද්ධෙ උස්සිතද්ධජෙ, තෙ සබ්බෙ පරිහාරෙත්වා{11} පබ්බජිං අනගාරියං.
4133. සට්ඨිධෙනුසහස්සානි සබ්බා කංසූපධාරණා, තායොපි{12} ඡඩ්ඩයිත්වාන පබ්බජිං අනගාරියං,
4134. සට්ඨිඉත්ථිසහස්සානි සබ්බාලඞ්කාරභූසිතා, විචිත්තවත්ථාභරණා ආමුත්තමණිකුණ්ඩලා.
4135. අළාරපම්හා හසුලා සුසඤ්ඤා තනුමජ්ඣිමා, තා හිත්වා කන්දමානායො පබ්බජිං අනගාරියං.
4136. සට්ඨිගාමසහස්සානි පරිපුණ්ණානි සබ්බසො, ඡඩ්ඩයිත්වාන තං රජ්ජං පබ්බජිං අනගාරියං.
4137. නගරා නික්ඛමිත්වාන හිමවන්තමුපාගමිං, භාගීරථීනදීතීරෙ අස්සමං මාපයිං අහං.
4138. පණ්ණසාලං කරිත්වාන අග්ග්යගාරං අකාසහං, ආරද්ධවිරියො පහිතත්තො වසාමි අස්සමෙ අහං.
4139. මණ්ඩපෙ රුක්ඛමූලෙ වා සුඤ්ඤාගාරෙ ච ඣායතො, න තු විජ්ජති තාසො මෙ න පස්සෙ භයභෙරවං.
4140. සුමෙධො නාම සම්බුද්ධො අග්ගො කාරුණිකො මුනි, ඤාණාලොකෙන ජොතන්තො ලොකෙ උප්පජ්ජි තාවදෙ.
4141. මම අස්සමසාමන්තා යක්ඛො ආසි මහිද්ධිකො, බුද්ධසෙට්ඨම්හි උප්පන්නෙ ආරොචෙසි මමං තදා.
4142. “බුද්ධො ලොකෙ සමුප්පන්නො සුමෙධො නාම චක්ඛුමා, තාරෙති ජනතං සබ්බං තම්පි සො තාරයිස්සති.
4143. යක්ඛස්ස වචනං සුත්වා සංවිග්ගො ආසි තාවදෙ, බුද්ධො බුද්ධොති චින්තෙන්තො අස්සමං පටිසාමයිං.
4144. අග්ගිදාරුඤ්ච ඡඩ්ඩෙත්වා සංසාමෙත්වාන සන්ථතං, අස්සමං අභිවන්දිත්වා නික්ඛමිං විපිනා අහං.
4145. තතො වන්දනමාදාය ගාමා ගාමං පුරා පුර, දෙවදෙවං ගවෙසන්තො උපගච්ඡිං විනායකං.
4146. භගවා තම්හි සමයෙ සුමෙධො ලොකනායකො, චතුසච්චං පකාසෙන්තො බොධෙති ජනතං බහුං.
4147. අඤ්ජලිම්පග්ගහෙත්වාන සීසෙ කත්වාන චන්දනං, සම්බුද්ධං අභිවාදෙත්වා ඉමා ගාථා අභාසහං:
4148. “වස්සිකෙ පුප්ඵමානම්හි සන්තිකෙ උපවායති, ත්වං වීර ගුණගන්ධෙන දිසා සබ්බා පවායසි.
4149. චම්පකෙ නාගවනිකෙ අතිමුත්තකකෙතකෙ, සාලෙසු පුප්ඵමානෙසු අනුවාතං පවායති.
4150. තව ගන්ධං සුණිත්වාන හිමවන්තා ඉධාගමිං, පූජෙමි තං මහාවීර ලොකජෙට්ඨ මහායස.
4151. වරචන්දන්නො’නුලිම්පිං සුමෙධං ලොකනායකං, සකං චිත්තං පසාදෙත්වා තුණ්හී අට්ඨාසි තාවදෙ
4152. සුමෙධො නාම භගවා ලොකජෙට්ඨො නරාසභො, භික්ඛුසඞ්ඝෙ නිසීදිත්වා ඉමා ගාථා අභාසථ:
4153. “යො මෙගුණෙ පකිත්තෙසි වන්දනඤ්ච අපූජයී, තමහං කිත්තයිස්සාමි සුණාථ මම භාසතො.
4154. ආදෙය්යවාක්යවචනො බ්රහ්මා උජු පතාපවා, පඤ්චවීසතිකප්පානි සප්පභාසො භවිස්සති.
4155. ඡබ්බීසතිකප්පසතෙ දෙවලොකෙ රමිස්සති, සහස්සක්ඛත්තුං රාජා ච චක්කවත්තී භවිස්සති.
4156. තෙත්තිංසක්ඛත්තුං දෙවින්දො දෙවරජ්ජං කරිස්සති, පදෙසරජ්ජං විපුලං ගණනාතො අසංඛියං.
4157. තතො චුතො’යං මනුජො මනුස්සත්තං ගමිස්සති, පුඤ්ඤකම්මෙන සංයුත්තො බ්රහ්මබන්ධු භවිස්සති.
4158. අජ්ඣායකො මන්තධරො තිණ්ණං වෙදාන පාරගූ, තිලක්ඛණෙන සම්පන්නො බාවරී නාම බ්රාහ්මණො.
4159. තස්ස සිස්සො භවිත්වාන හෙස්සති මන්තපාරගූ, උපගන්ත්වාන සම්බුද්ධං ගොතමං සක්යපුඞ්ගවං.
4160. පුච්ඡිත්වා නිපුණෙ පඤ්හෙ භාවයිත්වාන අඤ්ජසං{1}. සබ්බාසවෙ පරිඤ්ඤාය නිබ්බායිස්සත’නාසවො.”
4161. තිවිධග්ගී නිබ්බුතා මය්හං භවා සබ්බෙ සමූහතා, සබ්බාසවෙ පරිඤ්ඤාය විහරාමි අනාසවො.
4162. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
4163. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
4164. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්සස සාසනං.
ඉත්ථං සුදං ආයස්මා තොදෙය්යො ථෙරො ඉමා ගාථායො අභාසිත්ථාති.
තොදෙය්යෙත්ථෙරස්ස අපදානං අට්ඨමං.
409 ජතුකණ්ණිත්ථෙරාපදානං.
4165. නගරෙ හංසවතියා සෙට්ඨිපුත්තො අහොසහං, සමප්පිතො කාමගුණෙ පරිවාරෙමහං තදා.
4166. තයො{1} පාසාදමාරුය්හ උබ්බිද්ධා ගෙහලඤ්ඡකා{2} තත්ථ නච්චෙහි ගීතෙහි පරිවාරෙමහං තදා.
4167. තුරියා ආහතා මය්හං සම්මතාලසමාහිතා, නච්චන්තා{3} ඉත්ථියො සබ්බා හරන්ති යෙව මෙ මනො.
4168. වෙලාපිකා ලාමණිකා කුඤ්ජවාසී තිමජ්ඣිකා{4} ලඞ්ඝිකා සොකජ්ඣායී{5}ච පරිවාරෙන්ති මං සදා.
4169. වෙතාලිනො කුම්භථූනී නටා ච නච්චකා බහූ, නටකා නාටකා චෙව පරිවාරෙන්ති මං සදා.
4170. කප්පකා නහාපකා සූදා මාලාකාරා සුමාපකා,{6} ජල්ලා මල්ලාති සබ්බෙව{7} පරිවාරෙන්ති මං සදා.
4171. එතෙසු කීළමානෙසු සික්ඛිතෙ කතුපාසනෙ, රත්තින්දිවං න ජානාමි ඉන්දොව තිදසඞ්ගණෙ.
4172. අද්ධිකා පථිකා සබ්බෙ යාචකා චරකා බහූ, උපගච්ඡන්ති තෙ නිච්චං භික්ඛයන්තා මමං ඝරං.
4173. සමණා බ්රාහ්මණා චෙව පුඤ්ඤක්ඛෙත්තා අනුත්තරා, වඩ්ඪයන්තා මමං පුඤ්ඤං ආගච්ඡන්ති මමං ඝරං.
4174. පටකා ලටකා{8} සබ්බෙ නිගණ්ඨා පුප්ඵසාටකා, තෙදණ්ඩිකා එකසිඛා ආගච්ඡන්ති මමං ඝරං.
4175. ආජීවකා විලුත්තාවී ගොධම්මා දෙවධම්මිකා, රජොජල්ලධරා එතෙ ආගච්ඡන්ති මමං ඝරං.
4176. පරිවත්තකා සිද්ධිපත්තා{9} කොණ්ඩපුග්ගණිකා{10} බහූ, තපස්සී වනචාරී ච ආගච්ඡන්ති මමං ඝරං.
4177. ඔඩ්ඩකා දමිළා චෙව සාකුලා මලයාලකා, සබරා{11} යොනකා චෙව ආගච්ඡන්ති මමං ඝරං.