3903. පත්ථරිත්වා, ජිනචම්මං නිසීදන මදාසහං, නිසීද නාථ සබ්බඤ්ඤූ උපට්ඨිස්සාමහං තුවං.
3904. නිසීදි භගවා තත්ථ අජිනම්හි සුවිත්ථතෙ, නිමන්තයිත්වා සම්බුද්ධං පබ්බතං අගමාසහං.
3905. ඛාරිභාරඤ්ච පූරෙත්වා තින්දුකඵලමාහරිං, මධුනා යොජයිත්වාන ඵලං බුද්ධස්ස’ දාසහං.
3906. මම නිජ්ඣායමානස්ස පරිභුඤ්ජි තදා ජිනො, තත්ථ චිත්තං පසාදෙසිං පෙක්ඛන්තො ලොකනායකං.
3907. පදුමුත්තරො ලොකවිදූ ආහුතීනං පටිග්ගහො, මම’ස්සමෙ නිසීදිත්වා ඉමා ගාථා අභාසථ:
3908. “යො මං ඵලෙන තප්පෙසි පසන්නො සෙහි පාණිහි, තමහං කිත්තයිස්සාමි සුණාථ මම භාසතො.
3909. පඤ්චවීසතික්ඛත්තුං සො දෙවරජ්ජං කරිස්සති, සහස්සක්ඛත්තුං රාජා ච චක්කවත්තී භවිස්සති.
3910. තස්ස සඞ්කප්පමඤ්ඤාය පුබ්බකම්මසමඞ්ගිනො, අන්නං පානඤ්ච වත්ථඤ්ච සයනඤ්ච මහාරහං.
3911. පුඤ්ඤකම්මෙන සංයුත්තා නිබ්බත්තිස්සන්ති තාවදෙ, සදා පමුදිතො චායං භවිස්සති අනාමයො.
3912. උපපජ්ජති යං යොනිං දෙවත්තං අථ මානුසං, සබ්බත්ථ සුඛිතො හුත්වා මනුස්සත්තං ගමිස්සති.
3913. අජ්ඣායකො මන්තධරො තිණ්ණං වෙදානපාරගු, සම්බුද්ධමුපගන්ත්වාන අරහා සො භවිස්සති.”
3914. යතො සරාමි අත්තානං යතො පත්තොස්මි විඤ්ඤුතං, භොගෙ මෙ ඌනතා නත්ථි ඵලදානස්සිදං ඵලං.
3915. වරධම්මමනුප්පත්තො රාගදොසෙ සමූහනිං, සබ්බාසවපරික්ඛීණො නත්ථිදානි පුනබ්භවො,
3916. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3917. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3918. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිස්සමෙත්තෙය්යො ථෙරො ඉමා ගාථායො අභාසිත්ථාති.
තිස්සමෙත්තෙය්යත්ථෙරස්ස අපදානං පඨම.
402. පුණ්ණකත්ථෙරාපදානං
3919. පබ්භාරකූටං නිස්සාය සයම්භු අපරාජිතො, ආබාධිකො ගරු බුද්ධො{1} වසතී පබ්බතන්තරෙ.
3920. මම අස්සමසාමන්තා පනාදො ආසි තාවදෙ, බුද්ධෙ නිබ්බායමානම්හි ආලොකො උපපජ්ජථ.{2}
3921. යාවතා වනසණ්ඩස්මිං අච්ඡකොකතරච්ඡකා, ව්යග්ඝා{3} ච කෙසරී සබ්බෙ අභිගජ්ජිංසු තාවදෙ.
3922. උප්පාතං තමහං දිස්වා පබ්බතං{4} අගමාසහං, තත්ථ’ද්දසාසිං සම්බුද්ධං නිබ්බුතං අපරාජිතං.
3923. සුඵුල්ලං සාලරාජංව සතරංසිංව උග්ගතං, වීතච්චිකංව අඞ්ගාරං නිබ්බුතං අපරාජිතං.
3924. තිණං කට්ඨඤ්ච පූරෙත්වා චිතකං තත්ථ’කාසහං, චිතකං සුකතං කත්වා සරීරං ඣාපයිං අහං.
3925. සරීරං ඣාපයිත්වාන ගන්ධතොයං සමොකිරිං, අන්තලික්ඛෙ ඨිතො යක්ඛො නාමමග්ගහි තාවදෙ.
3926. යං පූරිතං{5} තයා කිච්චං සයම්භූස්ස මහෙසිනො, පුණ්ණකො නාම නාමෙන සදා හොහි{6} තුවං මුනෙ.{7}
3927. තම්හා කායා චවිත්වාන දෙවලොකං අගච්ඡහං, තත්ථ දිබ්බමයො ගන්ධො අන්තලික්ඛෙ පවායති{1}
3928. තත්රාපි නාමධෙය්යං මෙ පුණ්ණකො’ති අහූ තදා, දෙවභූතො මනුස්සො වා සඞ්කප්පං පූරයාමහං.
3929. ඉදං පච්ඡිමකං මය්හං චරිමො වත්තතී{2} භවො, ඉධාපි පුණ්ණකො නාම නාමධෙය්යං පකාසති.
3930. තොසයිත්වාන සම්බුද්ධං ගොතමං සක්යපුඞ්ගවං, සබ්බාසවෙ පරිඤ්ඤාය විහරාමි අනාසවො.
3931. එකනවුතෙ ඉතො කප්පෙ{3} යං කම්මමකරිං තදා, සබ්බාසවා නාභිජානාමි තනුකිච්චස්සිදං ඵලං.
3932. කිලෙසා ඣාපිතා මය්හං භවා සබ්බෙ සමූහතා, සබ්බාසවා පරික්ඛීණා විහරාමි අනාසවො.
3933. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3934. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පුණ්ණකො ථෙරො ඉමා ගාථායො අභාසිත්ථාති.
පුණ්ණකත්ථෙරස්ස අපදානං දුතියං.
403. මෙත්තගුත්ථෙරාපදානං
3935. හිමවන්තස්ස අවිදූරෙ{4} අසොකො නාම පබ්බතො, තත්ථා’සි අස්සමො මය්හං විස්සකම්මෙන{5} මාපිතො.
3936. සුමෙධො නාම සම්බුද්ධො අග්ගො කාරුණිකො මුනි, නිවාසයිත්වා පුබ්බන්හෙ පිණ්ඩාය මං උපාගමි.
3937. උපාගතං මහාවීරං සුමෙධං ලොකනායකං, පග්ගය්හ සුගතප්පත්තං{6} සප්පිතෙලෙන පූරයිං{7}.
3938. දත්වානහං බුද්ධසෙට්ඨෙ සුමෙධෙ ලොකනායකෙ, අඤ්ජලිම්පග්ගහෙත්වාන භීයො{8} හාසං ජනෙසහං.
3939. “ඉමිනා සප්පිදානෙන චෙතනාපණිධීහි ච, දෙවභූතො මනුස්සො වා ලභාමි විපුලං සුඛං.
3940. විනිපාතං විවජ්ජෙත්වා සංසරාමි භවාභවෙ, තත්ථ චිත්තං පණිධිත්වා ලභාමි අචලං පදං.”
3941. “ලාභා තුය්හං සුලද්ධං තෙ යං මං අද්දක්ඛි බ්රාහ්මණං,{1} මම දස්සනමාගම්ම අරහා ත්වං භවිස්සසි.
3942. විස්සත්ථො හොහි මා භායි අධිගන්ත්වා මහායසං, මමං හි සප්පිං දත්වාන පරිමොක්ඛසි ජාතියා
3943. ඉමිනා සප්පිදානෙන චෙතනාපණිධීහි ච, දෙවභූතො මනුස්සො වා ලභසෙ විපුලං සුඛං.
3944. ඉමිනා සප්පිදානෙන මෙත්තචිත්තවතාය ච, අට්ඨාරසෙ කප්පසතෙ දෙවලොකෙ රමිස්සසි
3945. අට්ඨතිංසතික්ඛත්තුඤ්ච දෙවරාජා භවිස්සසි, පදෙසරජ්ජං විපුලං ගණනාතො අසඞ්ඛියං.
3946. එකපඤ්ඤාසක්ඛත්තුඤ්ච චක්කවත්තී භවිස්සසි, චාතුරන්තො විජිතාවී ජම්බුසණ්ඩස්ස{2} ඉස්සරො.
3947. මහාසමුද්දොව’ක්ඛොභො දුද්ධරො පඨවී යථා, එවමෙව ච තෙ භොගා අප්පමෙය්යා භවිස්සරෙ.”
3948. සට්ඨිකොටි හිරඤ්ඤස්ස චජිත්වා{3} පබ්බජිං අහං, කිං කුසලං ගවෙසන්තො බාවරිං උපසඞ්කමිං.
3949. තත්ථ මන්තෙ අධීයාමි ඡළඞ්ගං නාම ලක්ඛණං, තමන්ධකාරං විධමං උප්පජ්ජි ත්වං මහාමුනි.
3950. තව දස්සනකාමොහං ආගතොම්හි මහාමුනි, තව ධම්මං සුණිත්වාන පත්තො’ම්හි අචලං පදං.
3951. තිංසකප්පසහස්සම්හි සප්පිං බුද්ධස්ස’දාසහං, එත්ථන්තරෙ නාභිජානෙ සප්පි විඤ්ඤාපිතං මයා{4},
3952. මම සඞ්කප්පමඤ්ඤාය උප්පජ්ජති යදිච්ඡකං, චිත්තමඤ්ඤාය නිබ්බත්තං සබ්බෙ සන්තප්පයාමහං.
3953. අහො බුද්ධො අහො ධම්මො{5} අහො නො සත්ථුසම්පදා, ථොකං හි සප්පිං දත්වාන අප්පමෙය්යං ලභාමහං.
3954. මහාසමුද්දෙ උදකං යාවතා නෙරුපස්සතො, මම සප්පිං උපාදාය කලභාගං න ඵස්සති{6}.
3955. යාවතා චක්කවාළස්ස කරීයන්තස්ස{1} රාසිතො, මම නිබ්බත්තවත්ථානං ඔකාසො සො න සම්මති.
3956. පබ්බතරාජා හිමවා පවරොපි සිලුච්චයො, මමානුලිත්තගන්ධස්ස උපනිධිං{2} න හෙස්සති.
3957. වත්ථං ගන්ධඤ්ච සප්පිඤ්ච අඤ්ඤඤ්ච දිට්ඨධම්මිකං, අසඞ්ඛතඤ්ච නිබ්බානං සප්පිදානස්සිදං ඵලං.
3958. සතිපට්ඨානසයනො සමාධිඣානගොචරො, බොජ්ඣඞ්ගභොජනො අජ්ජ{3} සප්පිදානස්සිදං ඵලං.
3959. කිලෙසා ඣාපිතා මය්හං භවා සබ්බෙ සමූහතා, සබ්බාසවා පරික්ඛීණා විහරාමි අනාසවො.
3960. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3961. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මෙත්තගුත්ථෙරො ඉමා ගාථායො අභාසිත්ථාති.
මෙත්තගුත්ථෙරස්ස අපදානං තතියං.
404. ධොතකත්ථෙරාපදානං
3962. ගඞ්ගා භාගීරථී නාම හිමවන්තා පභාවිතා, හංසවතියා ද්වාරෙන අනුසන්දති තාවදෙ.
3963. සොභිතො නාම ආරාමො ගඞ්ගාකූලෙ සුමාපිතො, තත්ථ පදුමුත්තරො බුද්ධො වසතෙ ලොකනායකො.
3964. තිදසෙහි යථා ඉන්දො මනුජෙහි පුරක්ඛතො, නිසීදි තත්ථ භගවා අසම්භීතො’ව කෙසරී.
3965. නගරෙ හංසවතියා වසාමි{4} බ්රාහ්මණො අහං, ඡළඞ්ගො නාම නාමෙන එවන්නාමො මහාමුනි.
3966. අට්ඨාරසසිස්සසතා පරිවාරෙන්ති මං තදා, තෙහි සිස්සෙහි සමිතො ගඞ්ගාතීරං උපාගමිං.
3967. තත්ථද්දසාසිං සමණෙ නික්කුහෙ ධොතපාපකෙ, භාගීරථිං තරන්තෙ’හං{5} එවං චිත්තෙසි තාවදෙ.
3968. “සායං පාතං තරන්තා’මෙ බුද්ධපුත්තා මහායසා, විහෙසයන්ති අත්තානං තෙසං අත්තා විහඤ්ඤති.
3969. සදෙවකස්ස ලොකස්ස බුද්ධො අග්ගො පවුච්චති. නත්ථි මෙ දක්ඛිණෙ කාරං ගතිමග්ගවිසොධනං.
3970. යන්නූන බුද්ධසෙට්ඨස්ස සෙතුං ගඞ්ගාය කාරයෙ, කාරාපෙත්වා ඉමං කම්මං සන්තරාමි ඉමං භවං.”
3971. සතසහස්සං දත්වාන සෙතුං කාරාපයිං අහං, සද්දහන්තො “කතං කාරං විපුලං මෙ භවිස්සති.”
3972. කාරාපෙත්වාන තං සෙතුං උපෙසිං ලොකනායකං, සිරසි අඤ්ජලිං කත්වා ඉදං වචනමබ්රවිං.
3973. “සතසහස්සස්ස වයං කත්වා{1} කාරාපිතො මයා, තවත්ථාය මහාසෙතු පටිගණ්හ මහාමුනි.”
3974. පදුමුත්තරො ලොකවිදූ ආහුතීනං පටිග්ගහො, භික්ඛුසඞ්ඝෙ නිසීදිත්වා ඉමා ගාථා අභාසථ:
3975. “යො මෙ සෙතුං අකාරෙසි පසන්නො සෙහි පාණිහි, තමහං කිත්තයිස්සාමි සුණාථ මම භාසතො.
3976. දරිතො පබ්බතාතො{2} වා රුක්ඛාතො{3} පතිතොප’යං, චුතොපි ලච්ඡතී ඨානං සෙතුදානස්සිදං ඵලං.
3977. විරූළ්හමූලසන්තානං නිග්රොධමිව මාලුතො, අමිත්තා නප්පසහන්ති සෙතුදානස්සිදං ඵලං.
3978. නාස්ස චොරා පසහන්ති නාතිමඤ්ඤන්ති ඛත්තියා, සබ්බෙ තරිස්සතාමිත්තෙ සෙතුදානස්සිදං ඵලං.
3979. අබ්භොකාසගතං සන්තං කඨිනාතපතාපිතං, පුඤ්ඤකම්මෙන සංයුත්තං න භවිස්සන්ති වෙදනා.
3980. දෙවලොකෙ මනුස්සෙ වා හත්ථියානං සුනිම්මිතං, තස්ස සඞ්කප්පමඤ්ඤාය නිබ්බත්තිස්සති තාවදෙ.
3981. සහස්සස්සා වාතජවා සින්ධවා සීඝවාහනා, සායං පාතං උපෙස්සන්ති සෙතුදානස්සිදං ඵලං.
3982. ආගන්ත්වාන මනුස්සත්තං සුඛිතො’යං භවිස්සති, ඉහාපි{4} මනුජස්සෙව හත්ථියානං භවිස්සති.
3983. කප්පසතසහස්සම්හි ඔක්කාකකුලසම්භවො, ගොතමො නාම නාමෙන{1} සත්ථා ලොකෙ භවිස්සති.
3984. තස්ස ධම්මෙසු දායාදො ඔරසො ධම්මනිම්මිතො, සබ්බාසවෙ පරිඤ්ඤාය නිබ්බායිස්සත’නාසවො.”
3985. අහො මෙ සුකතං කම්මං ජලජුත්තමනාමකෙ, තත්ථ කාරං කරිත්වාන පත්තො’හං ආසවක්ඛයං.
3986. පධානපහිතත්තොම්හි උපසන්තො නිරූපධි, නාගොව බන්ධනං ඡෙත්වා විහරාමි අනාසවො.
3987. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3988. කිලෙසා ඣාපිතා මය්හං භවා සබ්බෙ සමූහතා, සබ්බාසවා පරික්ඛීණා නත්ථිදානි පුනබ්භවො.
3989. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ධොතකො ථෙරො ඉමා ගාථායො අභාසිත්ථාති.
ධොතකත්ථෙරස්ස අපදානං චතුත්ථං.
405. උපසිවත්ථෙරාපදානං
3990. හිමවන්තස්ස අවිදූරෙ අනොමො නාම පබ්බතො, අස්සමො සුකතො මය්හං පණ්ණසාලා සුමාපිතා.