3643. ආසීවිසො යථා ඝොරො මිගරාජා’ව කෙසරී, මත්තො’ව කුඤ්ජරො දන්තී එවං බුද්ධා දුරාසදා.
3644. උක්කාසිතඤ්ච ඛිපිතං අජ්ඣුපෙක්ඛිය මාණවා, පදෙ පදං නික්ඛිපන්තා උපෙථ බුද්ධසන්තිකං.
3645. පටිසල්ලානගරුකා අප්පසද්දා දුරාසදා, දුරූපසඞ්කමා බුද්ධා ගරූ හොන්ති සදෙවකෙ.
3646. යදා’හං පඤ්හං පුච්ඡාමි ගටිසම්මොදයාමි වා, අප්පසද්දා තදා හොථ මුනිභූතා’ව තිට්ඨථ.
3647. යං සො දෙසෙති සද්ධම්මං{2} ඛෙමං නිබ්බාණපත්තියා, තමෙවත්ථං නිසාමෙථ සද්ධම්මසවණං සුඛං.”
3648. උපසඞ්කම්ම සම්බුද්ධං සම්මොදිං මුනිනා අහං, තං කථං වීතිසාරෙත්වා ලක්ඛණෙ උපධාරයිං.
3649. ලක්ඛණෙ ද්වෙව{3} කඞ්ඛාමි පස්සාමි තිංසලක්ඛණෙ, කොසොහිතවත්ථගුය්හං ඉද්ධියා දස්සයී මුනි.
3650. ජිව්හං නින්නාමයිත්වාන කණ්ණසොතෙ ච නාසිකෙ, පටිමසි නලාටන්තං කෙවලං ඡාදයී ජිනො.
3651. තස්සාහං ලක්ඛණෙ දිස්වා පරිපුණ්ණෙ සව්යඤ්ජනෙ, බුද්ධො’ති නිට්ඨං ගන්ත්වාන සහ සිස්සෙහි පබ්බජිං.
3652. සතෙහි තීහි සහිතො පබ්බජිං අනගාරියං, අද්ධමාසෙ අසම්පත්තෙ සබ්බෙ පත්තා’ම්භි නිබ්බුතිං.
3653. එකතො කම්මං කත්වාන පුඤ්ඤක්ඛෙත්තෙ අනුත්තරෙ, එකතො සංසරිත්වාන එකතො විනිවත්තයුං.
3654. ගොපානසියො දත්වාන පූගධම්මෙ වසී{1} අහං, තෙන කම්මෙන සුකතෙන අට්ඨහෙතු ලභාමහං.
3655. දිසාසු පූජිතො හොමි භොගා ච අමිතා මම, පතිට්ඨා හොමි සබ්බෙසං තාසො මම න විජ්ජති.
3656. ව්යාධයො මෙ න විජ්ජන්ති දීඝායුං පාලයාමි ච, සුඛුමච්ඡවිකො හොමි ආවාසෙ පත්ථිතෙ{2} වසෙ.
3657. අට්ඨ ගොපානසී දත්වා පූගධම්මෙ වසී අහං, පටිසම්භිදා’රහත්තඤ්ච එතං මෙ අපරට්ඨමං.
3658. සබ්බවොසිතවොසානො කතකිච්චො අනාසවො, අට්ඨගොපානසී නාම තව පුත්තො මහාමුනි.
3659. පඤ්චථම්භානි දත්වාන පූගධම්මෙ වසී අහං, තෙන කම්මෙන සුකතෙන පඤ්චහෙතූ ලභාමහං.
3660. අචලො හොමි මෙත්තාය අනූනඞ්ගො භවාමහං, ආදෙය්යවචනො හොමි න ධංසෙමි යථා අහං.
3661. අභන්තං හොති මෙ චිත්තං අචලො හොමි කස්සචි, තෙන කම්මෙන සුකතෙන විමලො හොමි සාසනෙ.
3662. සගාරවො සප්පතිස්සො කතකිච්චො අනාසවො, සාවකො තෙ මහාවීර භික්ඛු තං වන්දතෙ මුනි.
3663. කත්වා සුකතපල්ලඞ්කං සාලායං පඤ්ඤපෙසහං, තෙන කම්මෙන සුකතෙන පඤ්ච හෙතූ ලභාමහං.
3664. උච්චෙ කුලෙ පජායිත්වා මහාභොගො භවාමහං, සබ්බසම්පත්තිකො හොමි මච්ඡෙරං මෙ න විජ්ජති.
3665. ගමනෙ පත්ථිතෙ මය්හං පල්ලඞ්කො උපතිට්ඨති, සහ පල්ලඞ්කසෙට්ඨෙන ගච්ඡාමි මම පත්ථිතං.
3666. තෙන පල්ලඞ්කදානෙන තමං සබ්බං විනොදයිං, සබ්බාභිඤ්ඤාබලප්පත්තො ථෙරො වන්දති තං මුනි.
3667. පරකිච්චත්තකිච්චානි සබ්බකිච්චානි සාධයිං, තෙන කම්මෙන සුකතෙන පාවිසිං අභයං පුරං.
3668. පරිනිට්ඨිතසාලං හි පරිභොගමදාසහං, තෙන කම්මෙන සුකතෙන සෙට්ඨත්තං අජ්ඣුපාගතො.
3669. යෙ කෙචි දමකා ලොකෙ හත්ථි අස්සෙ දමෙන්ති යෙ, කරිත්වා කාරණා නානා දාරුණෙන දාමෙන්ති තෙ.
3670. නහෙවං ත්වං මහාවීර දමෙසි නරනාරියො, අදණ්ඩෙන අසත්ථෙන දමෙසි උත්තමෙ දමෙ.
3671. දානස්ස වණ්ණෙ කිත්තෙන්තො දෙසනාකුසලො මුනි, එකං පඤ්හං{1} කථෙන්තොව බොධෙසි තිසතෙ මුනී.
3672. දන්තා මයං සාරථිනා සුවිමුත්තා අනාසවා, සබ්බාභිඤ්ඤාබලප්පත්තා නිබ්බුතා උපධික්ඛයෙ.
3673. සතසහස්සෙ ඉතො කප්පෙ යං දානමදදිං තදා, අතික්කන්තා භයා සබ්බෙ සාලාදානස්සි’දං ඵලං.
3674. ස්වාගතං වත මෙ ආසි මම බුද්ධස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3675. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3676. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සෙලො ථෙරො ඉමා ගාථායො අභාසිත්ථාති.
සෙලත්ථෙරස්සපදානං දුතියං.
393. සබ්බකිත්තිකත්ථෙරාපදානං
3677. කණිකාරංව ජොතන්තං{1} දීපරුක්ඛංව උජ්ජලං{2}, ඔසධිංව විරොචන්තං විජ්ජුතං ගගනෙ යථා.
3678. අසම්භීතං අනුත්රාසිං{3} මිගරාජංව කෙසරිං, ඤාණාලොකං පකාසෙන්තං මද්දන්තං තිත්ථියෙ ගණො.
3679. උද්ධරන්තං ඉමං ලොකං ඡින්දන්තං සබ්බසංසයං, ගජ්ජන්තං{4} මිගරාජංව අද්දසං ලොකනායකං.
3680. ජටාජිනධරො ආසිං රහා උජු පතාපවා, වාකචීරං ගහෙත්වාන පාදමූලෙ අවත්ථරිං.
3681. කාළානුසාරියං ගය්හ අනුලිම්පිං තථාගතං, සම්බුද්ධමනුලිම්පෙත්වා සන්ථවිං ලොකනායකං.
3682. සමුද්ධරසි’මං ලොකං ඔඝතිණ්ණ{5}, මහාමුනි, ඤාණාලොකෙන ජොතෙසි නාවටං{6} ඤාණමුත්තමං.
3683. ධම්මචක්කං පවත්තෙසි මද්දසෙ පරතිත්ථීයෙ, උසභො ජිතසඞ්ගාමො සම්පකම්පෙසි මෙදිනිං.
3684. මහාසමුද්දො ඌමියො වෙලන්තම්භි පභිජ්ජරෙ, තථෙව තව ඤාණම්හි සබ්බදිට්ඨි පභිජ්ජරෙ.
3685. සුඛුමච්ඡිකජාලෙන සරම්භි සම්පතානිතෙ, අන්තොජාලගතා පාණා පීළිතා හොන්ති තාවදෙ.
3686. තථෙව තිත්ථියා ලොකෙ පුථුපාසණ්ඩනිස්සිතා, අන්තොඤාණවරෙ තුය්හං පරිවත්තන්ති මාරිස.
3687. පතිට්ඨා වුය්හතං ඔඝෙ ත්වං හි නාථො අබන්ධුනං, භයට්ටිතානං සරණං මුත්තත්ථිනං{7} පරායණං.
3688. එකවීරො අසදිසො කරුණාමෙත්තසඤ්චයො{8}, සුසීලො අසමො{9} සන්තො වසී තාදි ජිතඤ්ජසො.
3689. ධීරො විගතසම්මොහො අනෙජො අකථඞ්කථී, වුසිතො{10} වන්තදොසො’සි නිම්මලො පයතො{11} සුචී.
3690. සඞ්ගාතිගො හතමාදො{1} තෙවිජ්ජො තිභවන්තගො, සීමාතිගො ධම්මගරු කතත්ථො හිතවප්පථො{2}.
3691. තාරකො ත්වං යථා නාවා නිධීවස්සාසකාරකො, අසම්භීතො යථා සීහො ගජරාජාව දප්පිතො.
3692. ථොමෙත්වා දසගාථාහි පදුමුත්තරං මිහායසං, වන්දිත්වා සත්ථුනො පාදෙ තුණ්හී අට්ඨාසහං තදා.
3693. පදුමුත්තරො ලොකවිදූ ආහුතීනං පටිග්ගහො, භික්ඛුසඞ්ඝෙ ඨිතො සත්ථා ඉමා ගාථා අභාසථ.
3694. “යො මෙ සීලඤ්ච ඤාණඤ්ච ධම්මඤ්චාපි පකිත්තයි{3}, තමහං කිත්තයිස්සාමි සුණාථ මම භාසතො.
3695. සට්ඨිකප්පසහස්සානි දෙවලොකෙ රමිස්සති, අඤ්ඤෙ දෙවෙ අභිහොත්වා{4} ඉස්සරං කාරයිස්සති.
3696. සො පච්ඡා පබ්බජිත්වාන සුක්කමූලෙන චොදිතො, ගොතමස්ස භගවතො සාසනෙ පබ්බජිස්සති.
3697. පබ්බජිත්වාන කායෙන පාපකම්මං විවජ්ජිය, සබ්බාසවෙ පරිඤ්ඤාය නිබ්බායිස්සතනාසවො{5}.
3698. යථාපි මෙඝො ථනයං තප්පෙති මෙදිනිං ඉමං, තථෙව ත්වං මහාවීර ධම්මෙන තප්පයී මමං.
3699. සීලං පඤ්ඤච ධම්මඤ්ච ථවිත්ථා ලොකනායකං, පතොම්භි පරමං සන්තිං නිබ්බානං පදමච්චුතං.
3700. අහො නූන ස භගවා චිරං තිට්ඨෙය්ය චක්ඛුමා, අඤ්ඤාතඤ්ච විජානෙය්යුං ඵුසෙය්යුං අමතං පදං.
3701. අයං මෙ පච්ඡිමා ජාති භවා සබ්බෙ සමූහතා, සබ්බාසවෙ පරිඤ්ඤාය විහරාමි අනාසවො.
3702. සතසහස්සෙ ඉතො කප්පෙ යං බුද්ධමභිථොමයිං, දුග්ගතිං නාභිජානාමි කිත්තනාය ඉදං ඵලං.
3703. කිලෙසා ඣාපිතා මය්හං භවා සබ්බෙ සමූහතා, සබ්බාසවා පරික්ඛීණා නත්ථිදානි පුනබ්භවො.
3704. ස්වාගතං වත මෙ ආසි මම බුද්ධස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3705. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සබ්බකිත්තිකො ථෙරො ඉමා ගාථායො අභාසිත්ථාති.
සබ්බකිත්තිකත්ථෙරස්ස අපදානං තතියං.
394. මධුදායකත්ථෙරාපදානං.
3706. සින්ධුයා නදියා තීරෙ සුකතො අස්සමො මම, තත්ථ වාචෙමහං සිස්සෙ ඉතිහාසං සලක්ඛණං.
3707. ධම්මකාමා විනීතා තෙ සොතුකාමා සුසාසනං, ඡළඞ්ගෙ පාරමිප්පත්තා සින්ධුකූලෙ වසන්ති තෙ.
3708. උප්පාතගමනෙ චෙව ලක්ඛණෙසු ච කොවිදා, උත්තමත්ථං ගවෙසන්තා වසන්ති පවනෙ{1} තදා.
3709. සුමෙධො නාම සම්බුද්ධො ලොකෙ උප්පජ්ජි තාවදො, අම්හාකං අනුකම්පන්තො උපගච්ඡි විනායකො.
3710. උපාගතං මහාවීරං සුමෙධං ලොකනායකං, තිණසන්ථාරකං කත්වා ලොකජෙට්ඨස්ස’දාසහං.
3711. පවනාතො{2} මධුං ගය්හ බුද්ධසෙට්ඨස්ස’දාසහං, සම්බුද්ධො පරිභුඤ්ජිත්වා ඉදං වචනමබ්රවි:
3712. “යො තං අදාසි මධුං මෙ පසන්නො සෙහි පාණිහි, තමහං කිත්තසිස්සාමි සුණාථ මම භාසතො.
3713. ඉමිනා මධුදානෙන තිණසන්ථාරකෙන ච, තිංසකප්පසහස්සානි දෙවලොකෙ රමිස්සති.
3714. තිංසකප්පසහස්සම්හි ඔක්කාකකුලසම්භවො, ගොතමො නාම නාමෙන{3} සත්ථා ලොකෙ භවිස්සති.
3715. තස්ස ධම්මෙසු දායාදො ඔරසො ධම්මනිම්මිතො, සබ්බාසවෙ පරිඤ්ඤාය නිබ්බායිස්සත’නාසවො.
3716. දෙවලොකා ඉධාගන්ත්වා මාතුකුච්ඡිං උපාගතෙ, මධුවස්සං පවස්සිත්ථ ඡාදයං මධුනා මහිං{1}.
3717. මයි නික්ඛන්තමත්තම්හි කුච්ඡියා ච සුදුත්තරං, තත්රාපි මධුවස්සං මෙ වස්සතෙ නිච්චකාලිකං.
3718. අගාරා අභිනික්ඛම්ම පබ්බජිං අනගාරියං, ලාභී අන්නස්ස පානස්ස මධුදානස්සි’දං ඵලං.
3719. සබ්බකාමසමිද්ධො’හං භවිත්වා දෙවමානුසෙ, තෙනෙව මධුදානෙන පත්තොම්හි ආසවක්ඛයං.
3720. වුට්ඨම්හි දෙවෙ චතුරඞ්ගුලෙ තිණෙ සම්පුප්ඵිතෙ{1} ධරණිරුහෙ සඤ්ඡන්නෙ{2}, සුඤ්ඤෙ ඝරෙ මණ්ඩපරුක්ඛමූලෙ{3}, වසාමි නිච්චං සුඛිතො අනාසවො.
3721. මජ්ඣෙ මහන්තෙ හීනෙ ච{4} භවෙ සබ්බෙ අතික්කමිං,{5} අජ්ජ මෙ ආසවා ඛීණා නත්ථිදානි පුනබ්භවො.
3722. තිංසකප්පසහස්සම්හි යං දානමදදිං තදා, දුග්ගතිං නාභිජානාමි මධුදාන’ස්සිදං ඵලං.
3723. කිලෙසා ඣාපිතා මය්හං භවා සබ්බෙ සමූහතා, සබ්බාසවා පරික්ඛීණා නත්ථිදානි පුනබ්භවො.
3724. ස්වාගතං වත මෙ ආසි මම බුද්ධස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3725. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මධුදායකො ථෙරො ඉමා ගාථායො අභාසිත්ථාති.
මධුදායකත්ථෙරස්ස අපදානං චතුත්ථං.
395. පදුමකූටාගාරියත්ථෙරාපදානං.
3726. පියදස්සී නාම භගවා සයම්භු ලොකනායකො, විවෙකකාමො සම්බුද්ධො සමාධිකුසලො මුනි.
3727. වනසණ්ඩං සමොගය්හ පියදස්සී මහාමුනි, පංසුකූලං පත්ථරිත්වා නිසීදි පුරිසුත්තමො.
3728. මිගලුද්දො පුරෙ ආසිං විපිනෙ{1} කානනෙ අහං, පසදං මිගමෙසන්තො ආහිණ්ඩාමි අහං තදා
3729. තත්ථ’ද්දසාසිං සම්බුද්ධං ඔඝතිණ්ණමනාසවං, පුප්ඵි තං සාලරාජාංව සතරංසිංව උග්ගතං.
3730. දිස්වාන’හං දෙවදෙවං පියදස්සිං මහායසං, ජාතස්සරං සමොගය්හ පදුමං ආහරිං තදා.
3731. ආහරිත්වාන පදුමං සතපත්තං මනොරමං, කූටාගාරං කරිත්වාන ඡාදයිං පදුමෙන’හං.
3732. අනුකම්පකො කාරුණිකො පියදස්සී මහාමුනි, සත්තරත්තින්දිවං බුද්ධො කූටාගාරෙ වසී ජිනො.
3733. පුරාණං ඡඩ්ඩයිත්වාන නවෙන ඡාදයිං අහං, අඤ්ජලිං පග්ගහෙත්වාන අට්ඨාසිං තාවදෙ අහං.