2685. පඤ්චවීසෙ ඉතො කප්පෙ සත්ත ආසුං ජනාධිපා, මහාරහ සනාමා තෙ චක්කවත්තී මහබ්බලා.
2686. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ඡත්තදායකො ථෙරො ඉමා ගාථායො අභාසිත්ථාති.
ඡත්තදායකත්ථෙරස්ස අපදානං තතියං.
294. සද්දසඤ්ඤකත්ථෙරාපදානං.
2687. අනුග්ගතම්භි ආදිච්චෙ පනාදො විපුලො අහු, බුද්ධසෙට්ඨස්ස ලොකම්හි පාතුභාවො මහෙසිනො.
2688. සද්දමස්සොසහං තත්ථ න ච පස්සාමි තං ජිනං, මරණෙ ච අනුප්පත්තෙ බුද්ධසඤ්ඤමනුස්සරිං.
2689. චතුනවුතෙ ඉතො කප්පෙ යං සඤ්ඤමලභිං තදා, දුග්ගතිං නාභිජානාමි බුද්ධසඤ්ඤායිදං ඵලං.
2690. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සද්දසඤ්ඤකො ථෙරො ඉමා ගාථායො අභාසිත්ථාති.
සද්දසඤ්ඤකත්ථෙරස්ස අපදානං චතුත්ථං.
295. ගොසීසනික්ඛෙපකත්ථෙරාපදානං.
2691. ආරාමද්වාරා නික්ඛම්ම ගොසීසං සන්ථතං මයා, අනුභොමි සකං කම්මං පුබ්බකම්මස්සිදං ඵලං.
2692. ආජානීයා වාතජවා සින්ධවා සීඝවාහනා, අනුභොමි සබ්බමෙතං ගොසීසස්ස ඉදං ඵලං.
2693. අහො කාරං පරමකාරං සුඛෙත්තෙ සුකතං මයා, සඞ්ඝෙ කතස්ස කාරස්ස න අඤ්ඤං කලමග්ඝති.
2694. චතුනවුතෙ ඉතො කප්පෙ යං සීසං සන්ථරිං අහං, දුග්ගතිං නාභිජානාමි සන්ථරස්ස ඉදං ඵලං.
2695. පඤ්චසත්තතිකප්පම්භි සුප්පතිට්ඨිත නාමකො, එකො ආසිං මහාතෙජො චක්කවත්තී මහබ්බලො.
2696. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ගොසීසනික්ඛෙපකො ථෙරො ඉමා ගාථායො අභාසිත්ථාති.
ගොසීසනික්ඛෙපකත්ථෙරස්ස අපදානං පඤ්චමං.
296. පාදපූජකත්ථෙරාපදානං.
2697. පබ්බතෙ හිමවන්තම්භි අහොසිං කින්නරො තදා, අද්දසං විරජං බුද්ධං පීතරංසිංව භානුමං.
2698. උපෙතං තමහං{1} බුද්ධං විපස්සිං ලොකනායකං, චන්දනං තගරඤ්චාපි පාදෙ ඔසිඤ්චහං තදා.
2699. චතුනවුතෙ ඉතො කප්පෙ යං පාදමභිපූජයිං, දුග්ගතිං නාභිජානාමි පාදපූජායිදං ඵලං.
2700. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පාදපූජකො ථෙරො ඉමා ගාථායො අභාසිත්ථාති.
පාදපූජකත්ථෙරස්ස අපදානං ඡට්ඨං.
297. දෙසකිත්තකත්ථෙරාපදානං
2701. උපසාළ්හක නාමො’හං අහොසිං බ්රාහ්මණො තදා, කානනං වනමොගාළ්හං ලොකජෙට්ඨං නරාසභං.
2702. දිස්වාන වන්දිං පාදෙසු ලොකාහුතිපටිග්ගහං, පසන්නචිත්තං මා ඤත්වා බුද්ධො අන්තරධායථ.
2703. කානනා අභිනික්ඛම්ම බුද්ධසෙට්ඨමනුස්සරිං, තං දෙසං කිත්තයිත්වාන කප්පං සග්ගම්හි මොදහං.
2704. ද්වෙනවුතෙ ඉතො කප්පෙ යං දෙසමභිකිත්තයිං, දුග්ගතිං නාභිජානාමි කිත්තනාය ඉදං ඵලං.
2705. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා දෙසකිත්තකො ථෙරො ඉමා ගාථායො අභාසිත්ථාති.
දෙසකිත්තකත්ථෙරස්ස අපදානං සත්තමං.
298. සරණගමනියථෙරාපදානං.
2706. පබ්බතෙ හිමවන්තම්භි අහොසිං ලුද්දකො අහං, විපස්සිං අද්දසං බුද්ධං ලොකජෙට්ඨං නරාසභං.
2707. උපාසිත්වාන සම්බුද්ධං වෙය්යාවච්චමකාසහං, සරණඤ්ච උපාගච්ඡිං දිපදින්දස්ස තාදිනො.
2708. එකනවුතෙ ඉතො කප්පෙ සරණං යමගච්ඡහං, දුග්ගතිං නාභිජානාමි සරණගමනප්ඵලං.
2709. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සරණගමනියො ථෙරො ඉමා ගාථායො අභාසිත්ථාති.
සරණගමනියත්ථෙරස්ස අපදානං අට්ඨමං.
299. අම්බපිණ්ඩියත්ථෙරාපදානං.
2710. රොමසො නාම නාමෙන දානවො ඉති විස්සුතො, අම්බපිණ්ඩී මයා දින්නා{1} විපස්සිස්ස මහෙසිනො,
2711. එකනවුතෙ ඉතො කප්පෙ යමම්බමදදිං තදා, දුග්ගතිං නාභිජානාමි අම්බදානස්සිදං ඵලං.
2712. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අම්බපිණ්ඩියො ථෙරො ඉමා ගාථායො අභාසිත්ථාති.
අම්බපිණ්ඩියත්ථෙරස්ස අපදානං නවමං.
300. අනුසංසාවකත්ථෙරාපදානං.
2713. පිණ්ඩාය චරමානාහං විපස්සිං අද්දසං ජානං, උළුඞ්කභික්ඛං පාදාසිං දිපදින්දස්ස තාදිනො.
2714. පසන්නචිත්තො සුමනො අභිවාදෙසහං තදා, අනුසංසාවයිං බුද්ධං උත්තමත්ථස්ස පත්තියා.
2715. චතුනවුතෙ ඉතො කප්පෙ අනුසංසාවයිං අහං, දුග්ගතිං නාභිජානාමි අනුසංසාවනාඵලං.
2716. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං
ඉත්ථං සුදං ආයස්මා අනුසංසාවකො ථෙරො ඉමා ගාථායො අභාසිත්ථාති.
අනුසංසාවකත්ථෙරස්ස අපදානං දසමං.
උද්දානං:
චිතකං පාරිඡත්තො ච සද්ද ගොසීසසන්ථරං පදං පදෙසං සරණං අම්බො සංසාවකො පි ච සත්තතාළිස ගාථායො ගණිතායො විභාවිහි.
චිතකපූජකවග්ගො තිංසතිමො.
අථ වග්ගුද්දානං:
කණිකාරො හත්ථිදදො ආලම්බණුදකාසනං තුවරං ථොමකො වෙච උක්ඛෙපං සීසුපධානං පණ්ණදො චිතපූජී ච ගාථායො චෙව සබ්බසො චත්තාරි ච සතානීහ එකපඤ්ඤාසමෙව ච. පඤ්චවීසසතා සබ්බා ද්වාසත්තති තදුත්තරි, තිසතං අපදානානං ගණිතා අත්ථදස්සිහි.
තතියං සතකං{1} සමත්තං.
31. පදුමකෙසරියවග්ගො
301. පදුමකෙසරියත්ථෙරාපදානං.
2717. ඉසිසඞ්ඝෙ අහං පුබ්බෙ ආසිං මාතඞ්ගවාරණො, මහෙසීනං පසාදෙන පදමකෙසරමොකිරිං
2718. පච්චෙකජිනසෙට්ඨෙසු ධුතරාගෙසු තාදිසු, තෙසු චිත්තං පසාදෙත්වා කප්පං සග්ගම්හි මොදහං.
2719. එකනවුතෙ ඉතො කප්පෙ කෙසරං ඔකිරිං තදා, දුග්ගතිං නාභිජානාමි බුද්ධපූජායිදං ඵලං.
2720. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පදුමකෙසරියො ථෙරො ඉමා ගාථායො අභාසිත්ථාති.
පදුමකෙසරියත්ථෙරස්ස අපදානං පඨමං.
302. සබ්බගන්ධියත්ථෙරාපදානං.
2721. ගන්ධමාලං මයා දින්නං විපස්සිස්ස මහෙසිනො, අදාසිං උජුභූතස්ස කොසෙය්යං වත්ථමුත්තමං.
2722. එකනවුතෙ ඉතො කප්පෙ යං ගන්ධමදදිං{1} පුරෙ, දුග්ගතිං නාභිජානාමි ගන්ධදානස්සිදං ඵලං.
2723. ඉතො පණ්ණරසෙ කප්පෙ සුචෙලො නාම ඛත්තියො, සත්තරතනසම්පන්නො චක්කවත්තී මහබ්බලො.
2724. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සබ්බගන්ධියො ථෙරො ඉමා ගාථායො අභාසිත්ථාති.
සබ්බගන්ධියත්ථෙරස්ස අපදානං දුතියං.
303. පරමන්නදායකත්ථෙරාපදානං.
2725. ණිකාරං’ව ජොතන්තං උදයන්තං’ව භානුමං, විපස්සිමද්දසං බුද්ධං ලොකෙජෙට්ඨං නරාසභං.
2726. අඤ්ජලිම්පග්ගහෙත්වාන අභිනෙසිං{2} සකං ඝරං, අභිනෙත්වාන{3} සම්බුද්ධං පරමන්නං අදාසහං.
2727. එකනවුතෙ ඉතො කප්පෙ පරමන්නං දදිං තදා, දුග්ගතිං නාභිජානාමි පරමන්නස්සිදං ඵලං.
2728. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පරමන්නදායකො ථෙරො ඉමා ගාථායො අභාසිත්ථාති.
පරමන්නදායකත්ථෙරස්ස අපදානං තතියං.
304. ධම්මසඤ්ඤකත්ථෙරාපදානං.
2729. විපස්සිනො භගවතො මහාබොධිමහො අහු, රුක්ඛට්ඨෙ යෙව{1} සම්බුද්ධෙ ලොකජෙට්ඨෙ නරාසභෙ.
2730. භගවා තම්හි සමයෙ භික්ඛුසඞ්ඝපුරක්ඛතො, චතුසච්චං පකාසෙති වාචාසභිමුදීරයං.
2731. සඞ්ඛිත්තෙන ච දෙසෙන්තො විත්ථාරෙන ච දෙසයං{2}, විවට්ටච්ඡදො සම්බුද්ධො නිබ්බාපෙසි මහාජනං.
2732. තස්සාහං ධම්මං සුත්වාන ලොකජෙට්ඨස්ස තාදිනො, වන්දිත්වා සත්ථුනො පාදෙ පක්කාමි උත්තරාමුඛො.
2733. එකනවුතෙ ඉතො කප්පෙ යං ධම්මමසුණිං තදා, දුග්ගතිං නාභිජානාමි ධම්මසඤ්ඤායිදං ඵලං.{3}
2734. තෙත්තිංසම්හි ඉතො කප්පෙ එකො ආසිං මහීපති, සුතවා නාම නාමෙන චක්කවත්තී මහබ්බලො.
2735. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ධම්මසඤ්ඤකො ථෙරො ඉමා ගාථායො අභාසිත්ථාති.
ධම්මසඤ්ඤකත්ථෙරස්ස අපදානං චතුත්ථං.
305. ඵලදායකත්ථෙරාපදානං.
2736. භාගීරථීනදීතීරෙ අහොසි අස්සමො තදා, තමහං අස්සමං ගච්ඡිං ඵලහත්ථො අපෙක්ඛවා{4}.
2737. විපස්සිං තත්ථ අද්දක්ඛිං පීතරංසිං’ව භානුමං, යං මෙ අත්ථි ඵලං සබ්බං අදාසිං සත්ථුනො අහං.
2738. එකනවුතෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
2739. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ඵලදායකො ථෙරො ඉමා ගාථායො අභාසිත්ථාති.
ඵලදායකත්ථෙරස්ස අපදානං පඤ්චමං.