2572. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සලලපුප්ඵියො ථෙරො ඉමා ගාථායො අභාසිත්ථාති.
සලලපුප්ඵියත්ථෙරස්ස අපදානං අට්ඨමං.
269. උපාගතාසයත්ථෙරාපදානං.
2573. හිමවන්තස්ස වෙමජ්ඣෙ සරො ආසි සුනිම්මිතො, තත්ථාහං රක්ඛසො ආසිං හෙඨසීලො භයානකො.
2574. අනුකම්පකො කාරුණිකො විපස්සී ලොකනායකො, මමුද්ධරිතුකාමො සො ආගච්ඡි මම සන්තිකෙ{1}.
2575. උපාගතං මහාවීරං දෙවදෙවං නරාසභං, ආසයා අභිනික්ඛම්ම අවන්දිං සත්ථුනො අහං.
2576. එකනවුතෙ ඉතො කප්පෙ යං වන්දිං පුරිසුත්තමං, දුග්ගතිං නාභිජානාමි වන්දනාය ඉදං ඵලං.
2577. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උපාගතාසයො ථෙරො ඉමා ගාථායො අභාසිත්ථාති.
උපාගතාසයත්ථෙරස්ස අපදානං නවමං.
270. තරණියත්ථෙරාපදානං.
2578. සුවණ්ණවණ්ණො සම්බුද්ධො විපස්සී දක්ඛිණාරහො, නදීතීරෙ ඨිතො සත්ථා භික්ඛුසඞ්ඝපුරක්ඛතො.
2579. නාවා න විජ්ජතෙ තත්ථ සන්තාරණී මහණ්ණවෙ, නදියා අභිනික්ඛම්ම තාරෙසිං ලොකනායකං.
2580. එකනවුතෙ ඉතො කප්පෙ යං තාරෙසිං නරුත්තමං, දුග්ගතිං නාභිජානාමි තරණාය ඉදං ඵලං.
2581. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තරණියො ථෙරො ඉමා ගාථායො අභාසිත්ථාති.
තරණියත්ථෙරස්ස අපදානං දසමං.
උද්දානං:
උක්ඛෙපී තෙල චන්දි ච දීපදො ච බිළාලිදො මච්ඡො ජවො සලලදො රක්ඛසො තරණො දස ගාථායො චෙත්ථ සඞ්ඛාතා තාළීසං චෙකමෙව ච.
ආකාසුක්ඛිපියවග්ගො සත්තවීසතිමො.
28. සුවණ්ණබිම්බොහනවග්ගො
271. සුවණ්ණබිම්බොහනියත්ථෙරාපදානං
2582. එකාසනං අහමදං පසන්නො සෙහි පාණිහි, බිම්බොහනඤ්ච පාදාසිං උත්තමත්ථස්ස පත්තියා.
2583. එකනවුතෙ ඉතො කප්පෙ බිම්බොහනමදාසහං, දුග්ගතිං නාභිජානාමි බිම්බොහනස්සිදං ඵලං.
2584. ඉතො තෙසට්ඨිමෙ කප්පෙ අසමො නාම ඛත්තියො, සත්තරතනසම්පන්නො චක්කවත්තී මහබ්බලො.
2585. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සුවණ්ණබිම්බොහනියො ථෙරො ඉමා ගාථායො අභාසිත්ථාති.
සුවණ්ණබිම්බොහනියත්ථෙරස්ස අපදානං පඨමං.
272. තිලමුට්ඨිදායකත්ථෙරාපදානං
2586. මම සඞ්කප්පමඤ්ඤාය සත්ථා ලොකග්ගනායකො, මනොමයෙන කායෙන ඉද්ධියා උපසඞ්කමි.
2587. සත්ථාරමුපසඞ්කන්තං වන්දිත්වා පුරිසුත්තමං, පසන්නචිත්තො සුමනො තිලමුට්ඨිමදාසහං.
2588. එකනවුතෙ ඉතො කප්පෙ යං දානමදදිං තදා, දුග්ගතිං නාභිජානාමි තිලමුට්ඨ්යා{1} ඉදං ඵලං.
2589. ඉතො සොළසකප්පම්භි නන්දියො{2} නාම ඛත්තියො, සත්තරතනසම්පන්නො චක්කවත්තී මහබ්බලො.
2590. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිලමුට්ඨිදායකො ථෙරො ඉමා ගාථායො අභාසිත්ථාති.
තිලමුට්ඨිදායකත්ථෙරස්ස අපදානං දුතියං.
273. චඞ්ගොටකියත්ථෙරාපදානං{*}
2591. මහාසමුද්දං නිස්සාය වසතෙ පබ්බතන්තරෙ, පච්චුග්ගන්ත්වාන කත්වාන චඞ්ගොටකමදාසහං.
2592. සිද්ධත්ථස්ස මහෙසිනො සබ්බසත්තානුකම්පිනො, පුප්ඵචඞ්ගොටකං දත්වා කප්පං සග්ගම්හි මොදහං.
2593. චතුනවුතෙ ඉතො කප්පෙ චඞ්ගොටකමදං තදා, දුග්ගතිං නාභිජානාමි චඞ්ගොටකස්සිදං ඵලං.
2594. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා චඞ්ගොටකියො ථෙරො ඉමා ගාථායො අභාසිත්ථාති.
චඞ්ගොටකියත්ථෙරස්ස අපදානං තතියං.
274. අබ්හඤ්ජනදායකත්ථෙරාපදානං.
2595. කොණ්ඩඤ්ඤස්ස භගවතො වීතරාගස්ස තාදිනො, ආකාසසමචිත්තස්ස{1} නිප්පපඤ්චස්ස ඣායිනො.
2596. සබ්බමොහාතිවත්තස්ස සබ්බලොකහිතෙසිනො, අබ්භඤ්ජනං මයා දින්නං දිපදින්දස්ස සත්ථුනො.
2597. අපරිමෙය්යෙ ඉතො කප්පෙ අබ්භඤ්ජනමදං තදා, දුග්ගතිං නාභිජානාමි අබ්භඤ්ජනස්සිදං ඵලං.
2598. ඉතො පණ්ණරසෙ කප්පෙ චිරප්පො නාම ඛත්තියො, සත්තරතනසම්පන්නො චක්කවත්තී මහබ්බලො.
2599. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අබ්භඤ්ජනදායකො ථෙරො ඉමා ගාථායො අභාසිත්ථාති.
අබ්භඤ්ජනදායකත්ථෙරස්ස අපදානං චතුත්ථං.
275. එකඤ්ජලියත්ථෙරාපදානං.
2600. උදුම්බරෙ වසන්තස්ස නියතෙ පණ්ණසන්ථරෙ, වුත්ථෙකාසො මයා දින්නො සමණස්ස මහෙසිනො.
2601. තිස්සස්ස දිපදින්දස්ස ලොකනාථස්ස තාදිනො, අඤ්ජලිං පග්ගහෙත්වාන සන්ථරිං පුප්ඵසන්ථරිං.
2602. ද්වෙනවුතෙ ඉතො කප්පෙ යං කරිං පුප්ඵසන්ථරං, දුග්ගතිං නාභිජානාමි සන්ථරිස්ස ඉදං ඵලං.
2603. ඉතො චුද්දසකප්පම්හි අහොසිං මනුජාධිපො, එකඤ්ජලිකො නාම චක්කවත්තී මහබ්බලො.
2604. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකඤ්ජලියො ථෙරො ඉමා ගාථායො අභාසිත්ථාති.
එකඤ්ජලියත්ථෙරස්ස අපදානං පඤ්චමං.
276. පොත්ථදායකත්ථෙරාපදානං.
2605. සත්ථාරං ධම්මමාරබ්භ සඞ්ඝඤ්චාපි මහෙසිනං{1}, පොත්ථදානං මයා දින්නං දක්ඛිණෙය්යෙ අනුත්තරෙ.
2606. එකනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි පොත්ථදානස්සිදං ඵලං.
2607. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පොත්ථදායකො ථෙරො ඉමා ගාථායො අභාසිත්ථාති.
පොත්ථදායකත්ථෙරස්ස අපදානං ඡට්ඨං.
277. චිතකපූජකත්ථෙරාපදානං.
2608. චන්දභාගානදීතීරෙ අනුසොතං වජාමහං, සත්ත මාලුවපුප්ඵානි චිතමාරොපයිං{2} අහං.
2609. චතුනවුතෙ ඉතො කප්පෙ චිතකං යං අපූජයිං, දුග්ගතිං නාභිජානාමි චිතපූජායිදං{3} ඵලං.
2610. සත්තසට්ඨිම්භිතො කප්පෙ පටිජග්ගසනාමකා, සත්තරතනසම්පන්නා සත්තාසුං චක්කවත්තිනො.
2611. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා චිතකපූජකො ථෙරො ඉමා ගාථායො අභාසිත්ථාති.
චිතකපූජකත්ථෙරස්ස අපදානං සත්තමං.
278. ආලුවදායකත්ථෙරාපදානං
2612. පබ්බතෙ හිමවන්තම්හි මහාසින්ධු සුදස්සනා, තත්ථද්දසං වීතරාගං සප්පභාසං සුදස්සනං.
2613. පරාමොපසමෙ යුත්තං දිස්වා විම්හිතමානසො, ආලුවං තස්ස පාදාසිං පසන්නො සෙහි පාණිහි.
2614. එකංතිසෙ ඉතො කප්පෙ යමාලුවමදං{1} තදා, දුග්ගතිං නාභිජානාමි ආලුවස්ස ඉදං ඵලං.
2615. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ආලුවදායකො ථෙරො ඉමා ගාථායො අභාසිත්ථාති.
ආලුවදායකත්ථෙරස්ස අපදානං අට්ඨමං.
279. එකපුණ්ඩරීකත්ථෙරාපදානං.
2616. රොමසො නාම නාමෙන සයම්භූ සුබ්බතො{2} තදා, පුණ්ඩරීකං මයා දින්නං විප්පසන්නෙන චෙතසා.
2617. චතුනවුතෙ ඉතො කප්පෙ යං පුණ්ඩරීකමදං තදා, දුග්ගතිං නාභිජානාමි පුණ්ඩරීකස්සිදං ඵලං.
2618. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකපුණ්ඩරීකො ථෙරො ඉමා ගාථායො අභාසිත්ථාති.
එකපුණ්ඩරීකත්ථෙරස්ස අපදානං නවමං.
280. තරණියත්ථෙරාපදානං
2619. මහාපථම්භි විසමෙ සෙතු කාරාපිතො මයා, තරණත්ථාය ලොකස්ස පසන්නො සෙහි පාණිහි.
2620. එකනවුතෙ ඉතො කප්පෙ සෙතු කාරාපිතො මයා, දුග්ගතිං නාභිජානාමි සෙතුදානස්සිදං ඵලං.
2621. පඤ්චපඤ්ඤාසිතො කප්පෙ එකො ආසිං සමොගධො, සත්තරතනසම්පන්නො චක්කවත්තී මහබ්බලො.
2622. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තරණියො ථෙරො ඉමා ගාථායො අභාසිත්ථාති.
තරණියත්ථෙරස්ස අපදානං දසමං.
උද්දානං:
සුවණ්ණං තිලමුට්ඨී ච චඞ්ගොටබ්භඤ්ජ අඤ්ජලි පොත්ථකො චිත මාලුවො එකපුණ්ඩරි සෙතුනා ද්වෙචත්තාළීසගාථායො ගණිතායො විභාවිහි.
සුවණ්ණබිම්බොහනවග්ගො අට්ඨවීසතිමො.{*}
29. පණ්ණාදායකවග්ගො
281. පණ්ණදායකත්ථෙරාපදානං.
2623. පණ්ණසාලෙ නිසින්නොම්භි පණ්ණභොජනභොජනො, උපවිට්ඨඤ්ච මං සන්තං උපාගච්ඡි මහාමුනි{1}.
2624. සිද්ධත්ථො ලොකපජ්ජොතො සබ්බලොකතිකිච්ඡකො, තස්ස පණ්ණං මයා දින්නං නිසින්නං{2} පණ්ණසන්ථරෙ.