2515. කණිකාරංව ජොතන්තං නිසින්නං පබ්බතන්තරෙ, සත්තපාටලිපුප්ඵානි බුද්ධස්ස අභිරොපයිං.
2516. චතුනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2517. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සත්තපාටලියො ථෙරො ඉමා ගාථායො අභාසිත්ථාති.
සත්තපාටලියත්ථෙරස්ස අපදානං පඤ්චමං.
256. උපාහනදායකත්ථෙරාපදානං.
2518. අහොසි චන්දනො නාම සම්බුද්ධස්සත්රජො තදා, එකොපාහනො මයා දින්නො බොධිං සම්පජ්ජ මෙ තුවං.
2519. එකනවුතෙ ඉතො කප්පෙ යමුපාහනං දදිං තදා, දුග්ගතිං නාභිජානාමි උපාහනස්සිදං ඵලං.
2520. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උපාහනදායකො ථෙරො ඉමා ගාථායො අභාසිත්ථාති.
උපාහනදායකත්ථෙරස්ස අපදානං ඡට්ඨං.
257. මඤ්ජරිපූජකත්ථෙරාපදානං.
2521. මඤ්ජිරිකං කරිත්වාන රථියං පටිපජ්ජ’හං, අද්දසං සමණානග්ගං භික්ඛුසඞ්ඝපුරක්ඛතං.
2522. පසන්නචිත්තො සුමනො පරමාය ච පීතියා, උභො හත්ථෙහි පග්ගය්හ බුද්ධස්ස අභිරොපයිං.
2523. ද්වෙනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි පුප්ඵපූජායිදං ඵලං.
2524. ඉතො තෙසත්තතිකප්පෙ එකො ආසිං මහීපති, ජොතියො නාම නාමෙන චක්කවත්තී මහබ්බලො.
2525. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මඤ්ජරිපූජකො ථෙරො ඉමා ගාථායො අභාසිත්ථාති.
මඤ්ජරිපූජකත්ථෙරස්ස අපදානං සත්තමං.
258. පණ්ණදායකත්ථෙරාපදානං.
2526. පබ්බතෙ හිමවන්තම්හි වාකචීරධාරො අහං, අලොණපණ්ණභක්ඛොම්හි නීයමෙසු ච සංවුතො.
2527. පාතරාසෙ අනුප්පත්තෙ සිද්ධත්ථො උපගච්ඡි මං, තාහං බුද්ධස්ස පාදාසිං පසන්නො සෙහි පාණිහි.
2528. චතුනවුතෙ{1} ඉතො කප්පෙ යං පණ්ණමදිදං තදා, දුග්ගතිං නාභිජානාමි පණ්ණදානස්සිදං ඵලං.
2529. සත්තවීසතිකප්පම්හි රාජා ආසිං යදත්ථියො{2}, සත්තරතනසම්පන්නො චක්කවත්තී මහබ්බලො.
2530. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පණ්ණදායකො ථෙරො ඉමා ගාථායො අභාසිත්ථාති.
පණ්ණදායකත්ථෙරස්ස අපදානං අට්ඨමං.
259. කුටිදායකත්ථෙරාපදානං.
2531. විපිනචාරී සම්බුද්ධො රුක්ඛමූලෙ වසී තදා, පණ්ණසාලං කරිත්වාන අදාසිං අපරාජිතෙ.
2532. එකනවුතෙ ඉතො{1} කප්පෙ යං පණ්ණකුටිකං අදං, දුග්ගතිං නාභිජානාමි කුටිදානස්සිදං ඵලං.
2533. අට්ඨවීසෙ{2} ඉතො කප්පෙ සොළසාසිංසු රාජානො{3}, සබ්බත්ථඅහිවස්සීති වුච්චරෙ චක්කවත්තිනො.
2534. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කුටිදායකො ථෙරො ඉමා ගාථායො අභාසිත්ථාති.
කුටිදායකත්ථෙරස්ස අපදානං නවමං.
260. අග්ගජපුප්ඵියත්ථෙරාපදානං.{*}
2535. සුවණ්ණවණ්ණං සම්බුද්ධං නිසින්නං පබ්බතන්තරෙ, ඔභාසයන්තං රංසියා{4} සිඛිතං සිඛිනං යථා.
2536. අග්ගජං පුප්ඵමාදාය උපගච්ඡිං නරුත්තමං, පසන්නචිත්තො සුමනො බුද්ධස්ස අභිරොපයිං.
2537. එකතිංසෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2538. පඤ්චවීසතිකප්පම්භි අහොසිං අමිතව්හයො{5}, සත්තරතනසම්පන්නො චක්කවත්තී මහබ්බලො.
2539. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අග්ගජපුප්ඵියො ථෙරො ඉමා ගාථායො අභාසිත්ථාති.
අග්ගජපුප්ඵියත්ථෙරස්ස අපදානං දසමං.
උද්දානං:
ථොමකෙකාසන චිතකං චම්පතො සත්තපාටපි පාහනො{6} මඤ්ජරී පණ්ණං කුටිදො අග්ගපුප්ඵියො ගාථායො ගණිතා{7} චෙත්ථ එකතාළීසමෙව ච.
ථොමකවග්ගො ඡබ්බීසතිමො.
27. ආකාසුක්ඛිපියවග්ගො
261. ආකාසුක්ඛිපියත්ථෙරාපදානං.
2540. සුවණ්ණවණ්ණං සිද්ධත්ථං ගච්ඡන්තං අන්තරාපණෙ, ජලජග්ගෙ දුවෙ ගය්හ උපගච්ඡිං නරාසභං.
2541. එකඤ්ච පුප්ඵං පාදෙසු බුද්ධසෙට්ඨස්ස නික්ඛිපිං, එකඤ්ච පුප්ඵං පග්ගය්හ ආකාසෙ උක්ඛිපිං අහං.
2542. චතුනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි පුප්ඵදානස්සිදං ඵලං.
2543. ඉතො බත්තිංසකප්පම්හි{1} එකො ආසිං මහීපති, අන්තලික්ඛචරො{2} නාම චක්කවත්තී මහබ්බලො.
2544. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ආකාසුක්ඛිපියො ථෙරො ඉමා ගාථායො අභාසිත්ථාති.
ආකාසුක්ඛිපයත්ථෙරස්ස අපදානං පඨමං.
262. තෙලමක්ඛියත්ථෙරාපදානං.
2545. සිද්ධත්ථම්හි භගවති නිබ්බුතම්භි නරාසභෙ, බොධියා වෙදිකායාහං තෙලං මක්ඛෙසිං තාවදෙ.
2546. චතුනවුතෙ ඉතො කප්පෙ යං තෙලං මක්ඛයිං තදා, දුග්ගතිං නාභිජානාමි මක්ඛනාය ඉදං ඵලං.
2547. චතුවීසෙ ඉතො කප්පෙ සුච්ඡවී නාම ඛත්තියො, සත්තරතනසම්පන්නො චක්කවත්තී මහබ්බලො.
2548. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තෙලමක්ඛියො ථෙරො ඉමා ගාථායො අභාසිත්ථාති.
තෙලමක්ඛියත්ථෙරස්ස අපදානං දුතියං.
263. අඩ්ඪචන්දියත්ථෙරාපදානං.
2549. තිස්සස්ස ඛො භගවතෙ බොධියා පාදපුත්තමෙ, අඩ්ඪචන්දං මයා දින්නං ධරණීරුහපාදපෙ.
2550. ද්වෙනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බොධිපූජායිදං ඵලං.
2551. පඤ්චවීසෙ ඉතො කප්පෙ දෙවලො නාම ඛත්තියො, සත්තරතනසම්පන්නො චක්කවත්තී මහබ්බලො.
2552. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අඩ්ඪචන්දියො ථෙරො ඉමා ගාථායො අභාසිත්ථාති.
අඩ්ඪචන්දියත්ථෙරස්ස අපදානං තතියං.
264. පදීපියත්ථෙරාපදානං{*}
2553. දෙවභූතො අහං සන්තො ඔරුය්හ පඨවිං තදා, පදීපෙ පඤ්ච පාදාසිං පසන්නො සෙහි පාණිහි.
2554. චතුනවුතෙ ඉතො කප්පෙ යං පදීපමදං තදා, දුග්ගතිං නාභිජානාමි දීපදානස්සිදං ඵලං.
2555. පඤ්චපඤ්ඤාසකෙ කප්පෙ එකො ආසිං මහීපති, සමන්තචක්ඛු නාමෙන චක්කවත්තී මහබ්බලො.
2556. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පදීපියො ථෙරො ඉමා ගාථායො අභාසිත්ථාති.
පදීපියත්ථෙරස්ස අපදානං චතුත්ථං.
265. බිළාලිදායකත්ථෙරාපදානං.
2557. හිමවන්තස්ස අවිදූරෙ රොමසො නාම පබ්බතො, තම්හි පබ්බතපාදම්හි සමණො භාවිතින්ද්රියො.
2558. බිළාලිකෙ{1} ගහෙත්වාන සමණස්ස අදාසහං, අනුමොදි මහාවීරො සයම්භූ අපරාජිතො.
2559. බිළාලී තෙ මමං{2} දින්නා විප්පසන්නෙන චෙතසා, භවෙ නිබ්බත්තමානම්හි ඵලං නිබ්බත්තතං තව.
2560. චතුනවුතෙ ඉතො කප්පෙ යං බිළාලිමදාසහං, දුග්ගතිං නාභිජානාමි බිළාලියා ඉදං ඵලං.
2561. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා බිළාලිදායකො ථෙරො ඉමා ගාථායො අභාසිත්ථාති.
බිළාලිදායකත්ථෙරස්ස අපදානං පඤ්චමං.
266. මච්ඡදායකත්ථෙරාපදානං.
2562. චන්දභාගානදීතීරෙ උක්කුසො ආසහං තදා, මහන්තං මච්ඡං පග්ගය්හ සිද්ධත්ථමුනිතො අදං.
2563. චතුනවුතෙ ඉතො කප්පෙ යං මච්ඡමදදිං තදා, දුග්ගතිං නාභිජානාමි මච්ඡදානස්සිදං ඵලං.
2564. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මච්ඡදායකො ථෙරො ඉමා ගාථායො අභාසිත්ථාති.
මච්ඡදායකත්ථෙරස්ස අපදානං ඡට්ඨං.
267. ජවහංසකත්ථෙරාපදානං.
2565. වන්දභාගානදීතීරෙ ආසිං වනචරො තදා, සිද්ධත්ථමද්දසං බුද්ධං ගච්ඡන්තමනිලඤ්ජසෙ.
2566. අඤ්ජලිම්පග්ගහෙත්වාන උල්ලොකෙන්තො මහාමුනිං, සකං චිත්තං පසාදෙත්වා අවන්දිං නායකං අහං.
2567. චතුනවුතෙ ඉතො කප්පෙ යමවන්දිං නරාසභං, දුග්ගතිං නාභිජානාමි වන්දනාය ඉදං ඵලං.
2568. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ජවහංසකො ථෙරො ඉමා ගාථායො අභාසිත්ථාති.
ජවහංසකත්ථෙරස්ස අපදානං සත්තමං.
268. සලලපුප්ඵියත්ථෙරාපදානං.
2569. චන්දභාගානදීතීරෙ අහොසිං කින්නරො තදා, විපස්සිමද්දසං බුද්ධං රංසිජාලසමාකුලං.
2570. පසන්නචිත්තො සුමනො පරමාය ච පිතායා, පග්ගය්හ සලලං පුප්ඵං විපස්සිං ඔකිරිං අහං.
2571. චතුනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.