ඉත්ථං සුදං ආයස්මා සොවණ්ණවටංසකියො ථෙරො ඉමා ගාථායො අභාසිත්ථාති.
සොවණ්ණවටංසකියත්ථෙරස්ස අපදානං සත්තමං.
228. මිඤ්ජවටංසකියත්ථෙරාපදානං.
2411. නිබ්බුතෙ ලොකනාථම්හි සිඛිම්හි වදතං වරෙ, වටංසකෙහි ආකිණ්ණං බොධිපූජමකාසහං.
2412. එකතිංසෙ ඉතො කප්පෙ යං පූජමකරිං තදා, දුග්ගතිං නාභිජානාමි බොධිපූජායිදං ඵලං.
2413. ඉතො ඡබ්බීසතිකප්පෙ අහුං මෙඝබ්භ නාමකො, සත්තරතනසම්පන්නො චක්කවත්තී මහබ්බලො.
2414. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මිඤ්ජවටංසකියො ථෙරො ඉමා ගාථායො අභාසිත්ථාති.
මිඤ්ජවටංසකියත්ථෙරස්ස අපදානං අට්ඨමං.
229. සුකතාවෙලියත්ථෙරාපදානං.
2415. අසිතො නාම නාමෙන මාලාකාරො අහුං{4} තදා, ආවෙලං පග්ගහෙවොන රඤ්ඤො දාතුං වජාමහං.
2416. අසම්පත්තම්හි රාජානං අද්දසං සිඛිනායකං. හට්ඨො හට්ඨෙන චිත්තෙන බුද්ධස්ස අභිරොපයිං.
2417. එකතිංසෙ{5} ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2418. පඤ්චවීසෙ ඉතො කප්පෙ රාජාහොසිං මහබ්බලො, වෙභාරො නාම නාමෙන චක්කවත්තී මහබ්බලො.
2419. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සුකතාවෙලියො ථෙරො ඉමා ගාථායො අභාසිත්ථාති.
සුකතාවෙලියත්ථෙරස්ස අපදානං නවමං.
230. එකවන්දියත්ථෙරාපදානං.
2420. උසභං පවරං වීරං වෙස්සභුං විජිතාවිනං, පසන්නචිත්තො සුමනො බුද්ධසෙට්ඨං අවන්දිහං{1}.
2421. එකතිංසෙ ඉතො කප්පෙ යං කම්මමකරිං තදා, දුග්ගතිං නාභිජානාමි වන්දනාය ඉදං ඵලං.
2422. චතුවීසතිකප්පම්හි විගතානන්දනාමකො, සත්තරතනසම්පන්නො චක්කවත්තී මහබ්බලො.
2423. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකවන්දියො ථෙරො ඉමා ගාථායො අභාසිත්ථාති.
එකවන්දියත්ථෙරස්ස අපදානං දසමං.
උද්දානං:
ආලම්බනඤ්ච අජිනං මංසදා රක්ඛදායකො අව්යාධි අඞ්කොලං{2} සොණ්ණං මිඤ්ජං ආවෙල වන්දනං පඤ්චපඤ්ඤාස ගාථායො ගණිතා අත්ථදස්සිහි.
ආලම්බනදායකවග්ගො තෙවීසතිමො.
24. උදකාසනවග්ගො
231. උදකාසනදායකත්ථෙරාපදානං
2424. ආරාමද්වාරා නික්ඛම්ම ඵලකං සන්ථරිං අහං, උදකඤ්ච උපට්ඨාසිං උත්තමත්ථස්ස පත්තියා.
2425. එකතිංසෙ ඉතො කප්පෙ යං කම්මමකරිං තදා, දුග්ගතිං නාභිජානාමි ආසනෙ චොදකෙ ඵලං.
2426. ඉතො පණ්ණරසෙ කප්පෙ අභිසාමසමව්හයො, සත්තරතනසම්පන්නො චක්කවත්තී මහබ්බලො.
2427. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උදකාසනදායකො ථෙරො ඉමා ගාථායො අභාසිත්ථාති.
උදකාසනදායකත්ථෙරස්ස අපදානං පඨමං.
232. භාජනදායකත්ථෙරාපදානං{1}
2428. නගරෙ බන්ධුමතියා කුම්භකාරො අහං තදා, භාජනං අනුපාලෙසිං භික්ඛුසඞ්ඝස්ස තාවදෙ.
2429. එකනවුතෙ ඉතො කප්පෙ භාජනං අනුපාලයිං, දුග්ගතිං නාභිජානාමි භාජනස්ස ඉදං ඵලං.
2430. තෙපඤ්ඤාසෙ ඉතො කප්පෙ අනන්තජාලි නාමකො, සත්තරතනසම්පන්නො චක්කවත්තී මහබ්බලො.
2431. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා භාජනදායකො ථෙරො ඉමා ගාථායො අභාසිත්ථාති.
භාජනදායකත්ථෙරස්ස අපදානං දුතියං.
233. සාලපූපියත්ථෙරාපදානං{*}
2432. අරුණවතියා නගරෙ අහොසිං පූපිකො අහං, මම ද්වාරෙන ගච්ඡන්තං සිඛිනං අද්දසං ජිනං.
2433. බුද්ධස්ස පත්තං පග්ගය්හ සාලපූපං{2} අදාසහං, සම්මග්ගතස්ස බුද්ධස්ස විප්පසන්නෙන චෙතසා.
2434. එකතිංසෙ ඉතො කප්පෙ යං ඛජ්ජකමදාසහං.{3} දුග්ගතිං නාභිජානාමි සාලපූපස්සිදං ඵලං.
2435. ඉතො චුද්දසකප්පම්හි අසොසිං අමිතඤ්ජලො, සත්තරතනසම්පන්නො චක්කවත්තී මහබ්බලො.
2436. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සාලපූපියො ථෙරො ඉමා ගාථායො අභාසිත්ථාති.
සාලපූපියත්ථෙරස්ස අපදානං තතියං.
234. කිලඤ්ජදායකත්ථොරාපදානං.
2437. තිවරායං පුරෙ රම්මෙ නළකාරො අහං තදා, සිද්ධත්ථෙ ලොකපජ්ජොතෙ පසන්නා ජනතා තහිං.
2438. පූජත්ථං ලොකනාථස්ස කිලඤ්ජං පරියෙසති, බුද්ධපූජං කරොන්තානං කිලඤ්ජං අදදිං අහං.
2439. චතුනවුතෙ ඉතො{1} කප්පෙ යං කම්මමකරිං තදා, දුග්ගතිං නාභිජානාමි කිලඤ්ජස්ස ඉදං ඵලං.
2440. සත්තසත්තතිකප්පම්භි රාජා ආසිං ජුතින්ධරො,{2} සත්තරතනසම්පන්නො චක්කවත්තී මහබ්බලො.
2441. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කිලඤ්ජදායකො ථෙරො ඉමා ගාථායො අභාසිත්ථාති.
කිලඤ්ජදායකත්ථෙරස්ස අපදානං චතුත්ථං.
235. වෙදිකාරකත්ථෙරාපදානං.
2442. විපස්සිනො භගවතො බොධියා පාදපුත්තමෙ, පසන්නචිත්තො සුමනො කාරෙසිං වෙදිකං අහං.
2443. එකනවුතෙ ඉතො කප්පෙ කරොසිං වෙදිකං අහං, දුග්ගතිං නාභිජානාමි වෙදිකාය ඉදං ඵලං.
2444. ඉතො එකාදසෙ කප්පෙ අසොසිං සුරියස්සමො, සත්තරතනසම්පන්නො චක්කවත්තී මහබ්බලො.
2445. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා වෙදිකාරකො ථෙරො ඉමා ගාථායො අභාසිත්ථාති.
වෙදිකාරකත්ථෙරස්ස අපදානං පඤ්චමං.
236. වණ්ණකාරත්ථොරාපදානං
2446. නගරෙ අරුණවතියා වණ්ණකාරො අහං තදා, චෙතියෙ දුස්සභණ්ඩානි නානාවණ්ණං රජෙසහං{3}.
2447. එකතිංසෙ ඉතො කප්පෙ යං වණ්ණං රජයිං තදා, දුග්ගතිං නාභිජානාමි වණ්ණදානස්සිදං ඵලං.
2448. ඉතො තෙවීසතිකප්පෙ චන්දූපමසමානකො{1}, සත්තරතනසම්පන්නො චක්කවත්තී මහබ්බලො.
2449. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා වණ්ණකාරො ථෙරො ඉමා ගාථායො අභාසිත්ථාති.
වණ්ණකාරත්ථෙරස්ස අපදානං ඡට්ඨං.
237. පියාලපුප්ඵියත්ථෙරාපදානං.
2450. මිගලුද්දො පුරෙ ආසිං අරඤ්ඤෙ කානනෙ අහං, පියාලං පුප්ඵිතං දිස්වා ගතමග්ගෙ ඛිපිං අහං.
2451. එකනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2452. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පියාලපුප්ඵියො ථෙරො ඉමා ගාථායො අභාසිත්ථාති.
පියාලපුප්ඵියත්ථෙරස්ස අපදානං සත්තමං.
238. අම්බයාගදායකත්ථොරාපදානං.
2453. සකෙ සිප්පෙ අපත්ථද්ධො අගමං කානනං අහං, සම්බුද්ධං යන්තං දිස්වාන අම්බයාගං අදාසහං.
2454. එකනවුතෙ ඉතො කප්පෙ යං දානමදදිං තදා, දුග්ගතිං නාභිජානාමි අම්බයාගස්සිදං ඵලං.
2455. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අම්බයාගදායකො ථෙරො ඉමා ගාථායො අභාසිත්ථාති.
අම්බයාගදායකත්ථෙරස්ස අපදානං අට්ඨමං.
239. ජගතිකාරකත්ථෙරාපදානං.
2456. නිබ්බුතෙ ලොකනාථම්භි අත්ථදස්සි නරුත්තමෙ, ජගතී කාරිතා මය්හං බුද්ධස්ස ථූපමුත්තමෙ.
2457. අට්ඨාරසෙ කප්පසතෙ යං කම්මමකරිං තදා, දුග්ගතිං නාභිජානාමි ජගතියා ඉදං ඵලං.
2458. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ජගතිකාරකො ථෙරො ඉමා ගාථායො අභාසිත්ථාති.
ජගතිකාරකත්ථෙරස්ස අපදානං නවමං.
240. වාසිදායකත්ථෙරාපදානං.
2459. කම්මාරොහං පුරෙ ආසිං තීවරායං පුරුත්තමෙ, එකා වාසි මයා දින්නා සයම්භූං අපරාජිතං.
2460. චතුනවුතෙ{1} ඉතො කප්පෙ යං වාසිමදදිං තදා, දුග්ගතිං නාභිජානාමි වාසිදානස්සිදං ඵලං.
2461. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා වාසිදායකො ථෙරො ඉමා ගාථායො අභාසිත්ථාති.
වාසිදායකත්ථෙරස්ස අපදානං දසමං.
උද්දානං:
උදකාසන භාජනං සාලපූපී{2} කිලඤ්ජකො වෙදිකා වණ්ණකාරො ච පියාල අම්බයාගදො ජගතී වාසිදාතා ච ගාථා තිංස ච අට්ඨ ච.
උදකාසනවග්ගො චතුවීසතිමො.
25. තුවරදායකවග්ගො