571. අල්ලවත්ථා අල්ලසිරා සබ්බෙව පඤ්ජලී කතා, බුද්ධස්ස පාදෙ නිපතිත්වා ඉදං වචනමබ්රවුං:{7}
572. “ඛමස්සු ත්වං මහාවීර අභියාචති තං ජනො, පරිළාහං විනොදෙහි මා නො රට්ඨං විනාසය.
573. සදෙවමානුසා සබ්බෙ සදානවසරක්ඛසා, අයොමයෙන කූටෙන සිරං භින්දෙය්යු මෙ සදා.”
574. “උදකෙ{8} අග්ගි න සණ්ඨාති බීජං සෙලෙ න රූහති, අගදෙ කිමි න සණ්ඨාති කොපො බුද්ධෙ න ජායති.
575. යථාපි භූමි අචලා අප්පමෙය්යො ච සාගරො, අනන්තකො ච ආකාසො එවං බුද්ධා අඛොභියා.{9}
576. සදා ඛන්තා මහාවීරා ඛමිතා ච තපස්සිනො, ඛන්තානං ඛමිතානඤ්ච ගමනං තං{10} න විජ්ජති{11}”
577. ඉදං වත්වාන සම්බුද්ධො පරිළාහං විනොදයං{1}, මහාජනස්ස පුරතො නභං අබ්භුග්ගමී තදා.
578. තෙන කම්මෙන’හං ධීර භීනත්තං අජ්ඣුපාගතො, සමතික්කම්ම තං ජාතිං පාවිසිං අභයං පුරං.
579. තදාපි මං මහාවීර ඩය්හමානං සුසණ්ඨිතං{2}, පරිළාහං විනොදෙසි සයම්භුඤ්ච ඛමාපයි.
580. අජ්ජාපි මං මහාවීර ඩය්හමානං තිහ’ග්ගිහි, නිබ්බාපෙසි තයො අග්ගී සීතිභාවඤ්ච පාපියී.
581. යෙසං සොතාවධාන’ත්ථි{3} සුණාථ මම භාසතො, අත්ථං තුම්හං පවක්ඛාමි යථා දිට්ඨං පදං මම.
582. සයම්භුං තං විමානෙත්වා{4} සන්තචිත්තං සමාහිතං, තෙන කම්මෙන’හං අජ්ජ ජාතො’ම්හි නීචයොනියං.
583. මා වො ඛණං විරාධෙථ ඛණාතීතා හි සොචරෙ, සදත්ථෙ වායමෙය්යාථ ඛණො වො පටිපාදිතො.
584. එකච්චානඤ්ච වමනං එකච්චානං විරෙචනං, විසං හලාහලං එකෙ{5} එකච්චානං ව ඔසධං.
585. වමනං පටිපන්නානං ඵලට්ඨානං විරෙචනං, ඔසධං ඵලලාභීනං පුඤ්ඤක්ඛෙත්තං ගවෙසිතං.
586. සාසනෙන විරුද්ධානං විසං හලාහලං යථා, ආසීවිසො දිට්ඨවිසො එවං ඣාපෙති තං නරං.
587. සකිං පීතං{6} හලාහලං උපරුන්ධති ජීවිතං, සාසනෙන විරුජ්ඣිත්වා කප්පකොටිම්හි ඩය්හති.
588. ඛන්තියා අවිහිංසාය මෙත්තචිත්තවතාය ච, සදෙවකං සො තාරෙති{7} තස්මා වො අවිරොධියො{8}.
589. ලාභාලාභෙ න සජ්ජන්ති සම්මානන-විමානනෙ, පඨවීසදිසා බුද්ධා තස්මා තෙ න විරොධියා{9}.
590. දෙවදත්තෙ ච වධකෙ චොරෙ අඞ්ගුලිමාලකෙ, ධනපාලෙ රාහුලෙ ච සබ්බෙසං සමකො මුනි.
591. එතෙසං පටිඝො{1} නත්ථි රාගො’මෙසං න විජ්ජති, සබ්බෙසං සමකො බුද්ධො වධකස්සොරසස්ස ච.
592. පන්ථෙ දිස්වාන කාසාවං ඡඩ්ඩිතං මීළ්හමක්ඛිතං, සිරස්මිං{2} අඤ්ජලිං කත්වා වන්දිතබ්බං ඉසිද්ධජං{3}
593. අබ්භතීතා ච යෙ බුද්ධා වත්තමානා අනාගතා, ධජෙනානෙන සුජ්ඣන්ති තස්මා එතෙ නමස්සියා.
594. සත්ථුකප්පං සුවිනයං ධාරෙමි හදයෙන’හං නමස්සමානො විනයං විහරිස්සාමි සබ්බදා.
595. විනයො ආසයො{4} මය්හං විනයො ඨානචඞ්කමං, කප්පෙමි විනයෙ වාසං විනයො මය්හ ගොචරො.
596. විනයෙ පාරමිප්පත්තො සමථෙ{5} චාපි කොවිදො, උපාලි තං මහාවීර පදෙ වන්දති සත්ථුනො.
597. සො අහං විචරිස්සාමි ගාමා ගාමං පුරා පුරං, නමස්සමානො සම්බුද්ධං ධම්මස්ස ච සුධම්මතං.
598. කිලෙසා ඣාපිතා මය්හං භවා සබ්බෙ සමූහතා, සබ්බාසවා පරික්ඛීණා{6} නත්ථි දානි පුනබ්භවො.
(599-600 ගාථා 372, 373 ගාථාහි සමා.)
ඉත්ථං සුදං ආයස්මා උපාලිත්ථෙරො ඉමා ගාථායො අභාසිත්ථාති.
උපාලිත්ථෙරාපදානං ඡට්ඨං.
7. අඤ්ඤාකොණ්ඩඤ්ඤත්ථෙරාපදානං
601. පදුමුත්තරසම්බුද්ධං ලොකජෙට්ඨං විනායකං, බුද්ධභූමිමනුප්පත්තං පඨමං අද්දසං අහං.
602. යාවතා බොධියා මූලෙ යක්ඛා සබ්බෙ සමාගතා, සම්බුද්ධං පරිවාරෙත්වා වන්දන්ති පඤ්ජලීකතා.
603. සබ්බෙ දෙවා තුට්ඨමනා ආකාසෙ සඤ්චරන්ති තෙ, “බුද්ධො අයං අනුප්පත්තො අන්ධකාරතමොනුදො.”
604. තෙසං හාසපරෙතානං මහානාදො පවත්තථ: “කිලෙසෙ ඣාපයිස්සාමි සම්මාසම්බුද්ධසාසනෙ.”
605. දෙවානං ගිරමඤ්ඤාය වාචාසභිමුදීරිතං, හට්ඨො හට්ඨෙන චිත්තෙන ආදිභික්ඛමදාස’හං.
606. මම සඞ්කප්පමඤ්ඤාය සත්ථා ලොකෙ අනුත්තරො, දෙවසඞ්ඝෙ නිසීදිත්වා ඉමා ගාථා අභාසථ:
607. “සත්තාහං අභිනික්ඛම්ම බොධිං අජ්ඣගමං අහං, ඉදං මෙ පඨමං භත්තං බ්රහ්මචරියස්ස{1} යාපනං.
608. තුසිතා හි ඉධා’ගන්ත්වා යො මෙ භික්ඛං උපානයී, තම’හං කිත්තයිස්සාමි සුණාථ මම භාසතො.
609. තිංසකප්පසහස්සානි{2} දෙවරජ්ජං කරිස්සති, සබ්බෙ දෙවෙ අභිභොත්වා තිදිවං ආවසිස්සති.
610. දෙවලොකා චවිත්වාන මනුස්සත්තං ගමිස්සති, සහස්සධා චක්කවත්තී තත්ථ රජ්ජං කරිස්සති.
611. කප්පසතසහස්සම්හි ඔක්කාකකුලසම්භවො, ගොතමො නාම ගොත්තෙන සත්ථා ලොකෙ භවිස්සති.
612. තිදසා සො චවිත්වාන මනුස්සත්තං ගමිස්සති, අගාරා පබ්බජිත්වාන ඡබ්බස්සානි වසිසස්ති.
613. තතො සත්තමකෙ වස්සෙ බුද්ධො සච්චං කථෙස්සති, කොණ්ඩඤ්ඤො නාම නාමෙන පඨමං සච්ඡිකාභිති.”
614. නික්ඛන්තෙනා’නුපබ්බජිං{3} පධානං සුකතං මයා, කිලෙසෙ ඣාපනත්ථාය පබ්බජිං අනගාරියං.
615. අභිගන්ත්වාන සබ්බඤ්ඤූ බුද්ධො ලොකෙ සදෙවකෙ, ඉසිනාමෙ{4} මිගාරඤ්ඤෙ අමතං භෙරිමාහනි.
616. සො’දානි පත්තො අමතං සන්තං පදමනුත්තරං, සබ්බාසවෙ පරිඤ්ඤාය විහරාමි අනාසවො.
617-619. කිලෙසා ඣාපිතා -පෙ- කතං බුද්ධස්ස සාසනං.
ඉත්ථං සුදං ආයස්මා අඤ්ඤා{5}කොණ්ඩඤ්ඤො ථෙරො ඉමා ගාථායො අභාසිත්ථාති.
අඤ්ඤාකොණ්ඩඤ්ඤත්ථෙරස්ස අපදානං සත්තමං.
8. පිණ්ඩොලභාරද්වාජත්ථෙරාපදානං.
620. පදුමුත්තරො නාම ජිනො සයම්භූ අග්ගපුග්ගලො, පුරතො හිමවන්තස්ස චිත්තකූටෙ වසී තදා.
621. අභීතරූපො තත්ථා’සිං මිගරාජා චතුක්කමො, යස්ස සද්දං සුණිත්වාන වික්ඛම්භන්ති බහුජ්ජනා.
622. සුඵුල්ලං පදුමං ගය්හ උපගඤ්ඡිං නරාසභං, වුට්ඨිතස්ස සමාධිම්හා බුද්ධස්ස අභිරොපයිං.
623. චතුද්දිසා නමස්සිත්වා බුද්ධසෙට්ඨං නරුත්තමං, සකං චිත්තං පසාදෙත්වා සීහනාදං නදිං අහං.
624. පදුමුත්තරො ලොකවිදූ ආහුතීනං පටිග්ගහො, සකාසනෙ නිසීදිත්වා ඉමා ගාථා අභාසථ.
625. බුද්ධස්ස ගිරමඤ්ඤාය සබ්බෙ දෙවා සමාගතා, ආගතො වදතං සෙට්ඨො ධම්මං සොස්සාම තං මයං.
626. තෙසං හාසපරෙතානං පුරතො ලොකනායකො, මම සද්ධං පකිත්තෙසි දීඝදස්සී මහාමුනී.
627. “යෙනි’දං පදුමං දින්නං සීහනාදො ච නාදිතො, තමහං කිත්තයිස්සාමි සුණාථ මම භාසතො.
628. ඉතො අට්ඨමකෙ කප්පෙ චක්කවත්තී භවිස්සතී, සත්තරතනසම්පන්නො චතුදීපම්හි ඉස්සරො,
629. කාරයිස්සති ඉස්සරියං{1} මහියා චතුසට්ඨියා{2}, පදුමො නාම නාමෙන චක්කවත්තී මහබ්බලො.
630. කප්පසතසහස්සම්හි ඔක්කාකකුලසම්භවො, ගොතමොනාම ගොත්තෙන සත්ථා ලොකෙ භවිස්සති.
631. පකාසිතෙ පාවචනෙ බ්රහ්මබන්ධු භවිස්සති, බ්රහ්මඤ්ඤා අභිනික්ඛම්ම පබ්බජිස්සති තාවදෙ.
632. පධානපහිතත්තො සො උපසන්තො නිරූපධි, සබ්බාසවෙ පරිඤ්ඤාය නිබ්බායිස්සත’නාසවො.
633. විපිනෙ පන්තසෙය්යම්හි වාළමිගසමාකුලෙ, සබ්බාසවෙ පරිඤ්ඤාය නිබ්බායිස්සත’නාසවො.”
634-636. කිලෙසා ඣාපිතා -පෙ- කතං බුද්ධස්ස සාසනං.
ඉත්ථං සුදං ආයස්මා පිණ්ඩොලභාරද්වාජො ථෙරො ඉමා ගාථායො අභාසිත්ථාති.
පිණ්ඩොලභාරද්වාජත්ථෙරස්ස අපදානං අට්ඨමං.{*}
9. ඛදිරවනියරෙවතත්ථෙරාපදානං
637. ගඞ්ගා භාගීරථී{1} නාම හිමවන්තා පභාවිතා,{2} කුතිත්ථෙ{3} නාවිකො ආසිං ඔරිමෙ ච තරිං අහං.
638. පුබ්බෙ මය්හං සුතං ආසි පදුමුත්තරනායකො{4}, වසීසතසහස්සෙහි ගඞ්ගාසොතං තරිස්සති.{5}
639. බහූ නාවා සමානෙත්වා වඩ්ඪකීහි සුසඞ්ඛතං, නාවාය ඡදනං කත්වා පතිමානිං නරාසභං.
640. ආගන්ත්වාන ච සම්බුද්ධො ආරුහි තඤ්ච නාවුකං,{6} වාරිමජ්ඣෙ ඨිතො සත්ථා ඉමා ගාථා අභාසථ:
641. “යො සො තාරෙසි සම්බුද්ධං සඞ්ඝඤ්චාපි අනාසවං, තෙන චිත්තප්පසාදෙන දෙවලොකෙ රමිස්සති.
642. නිබ්බත්තිස්සති තෙ ව්යම්භං සුකතං නාවසණ්ඨිතං, ආකාසෙ පුප්ඵඡදනං ධාරයිස්සති සබ්බදා.
643. අට්ඨපඤ්ඤාසකප්පම්හි තාරකො{7} නාම ඛත්තියො, චාතුරන්තො විජිතාවී චක්කවත්තී භවිස්සති.
644. සත්තපඤ්ඤාසකප්පම්හි චම්පකො නාම ඛත්තියො, උග්ගච්ඡන්තොව සුරියො ජොතිස්සති මහබ්බලො.
645. කප්පසතසහස්සම්හි ඔක්කාකකුලසම්භවො, ගොතමො නාම ගොත්තෙන සත්ථා ලොකෙ භවිස්සති.
646. තිදසා සො චවිත්වාන මනුස්සත්තං ගමිස්සති, රෙවතො නාම නාමෙන බ්රහ්මබන්ධු භවිස්සති.
647. අගාරා නික්ඛමිත්වාන සුක්කමූලෙන චොදිතො, ගොතමස්ස භගවතො සාසනෙ පබ්බජිස්සති.
648. සො පච්ඡා පබ්බජිත්වාන යුත්තයොගො විපස්සකො{8}, සබ්බාසවෙ පරිඤ්ඤාය නිබ්බායිස්සත’නාසවො.”
649. විරියං මෙ ධුරධොරය්හං යොගක්ඛෙමාධිවාහනං, ධාරෙමි අන්තිමං දෙහං සම්මාසම්බුද්ධසාසනෙ.
650. සතසහස්සෙ කතං කම්මං ඵලං දස්සෙසි මෙ ඉධ, සුමුත්තො සරවෙගො’ව කිලෙසෙ ඣාපයී මම.{*}
651. තතො මං වන නිරතං{9} දිස්වා ලොකන්තගූ මුනි, වනවාසීභික්ඛූනග්ගං{10} පඤ්ඤපෙසි මහාමති.{*}
652. පටිසම්භිදා චතස්සො ච විමොක්ඛා’පි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ඛදිරවනියො රෙවතො ථෙරො ඉමා ගාථායො අභාසිත්ථාති.
ඛදිරවනියරෙවතත්ථෙරස්ස අපදානං නවමං.
10. ආනන්දත්ථරාපදානං
653. ආරාමද්වාරා නික්ඛම්ම පදුමුත්තරො මහාමුනි, වස්සෙන්තො{1} අමතං වුට්ඨිං නිබ්බාපෙසි මහාජනං.
654. සතසහස්සා තෙ වීරා{2} ඡළභිඤ්ඤා මහිද්ධිකා, පරිවාරෙන්ති සම්බුද්ධං ඡායාව අනපායිනී{3}.
655. හත්ථික්ඛන්ධගතො ආසිං සෙතච්ඡත්තං වරුත්තමං, සුචාරුරූපං දිස්වාන විත්ති මෙ උපපජ්ජථ.
656. ඔරුය්හ හත්ථික්ඛන්ධම්හා උපගච්ඡිං නරාසභං, රතනාමයඡත්තං මෙ බුද්ධසෙට්ඨස්ස ධාරයිං.
657. මම සඞ්කප්පමඤ්ඤාය පදුමුත්තරො මහාඉසි, තං කථං ඨපයිත්වාන ඉමා ගාථා අභාසථ:
658. “යො සො ඡත්තං අධාරෙසි සොණ්ණාලඞ්කාරභූසිතං, තමහං කිත්තයිස්සාමි සුණාථ මම භාසතො.
659. ඉතො ගන්ත්වා අයං පොසො තුසිතං ආවසිස්සති, අනුභොස්සති සම්පත්තිං අච්ඡරාහි පුරක්ඛතො.
660. චතුත්තිංසතික්ඛත්තුඤ්ච දෙවරජ්ජං කරිස්සති, බලාධිපො අට්ඨසතං වසුධං ආවසිස්සති.
661. අට්ඨපඤ්ඤාසක්ඛත්තුඤ්ච චක්කවත්තී භවිස්සති, පදෙසරජ්ජං විපුලං මහියා කාරයිස්සති.
662. කප්පසතසහස්සම්හි ඔක්කාකකුලසම්භවො, ගොතමො නාම ගොත්තෙන{4} සත්ථා ලෙකෙ භවිස්සති.
663. සක්යානං කුලකෙතුස්ස ඤාතිබන්ධු භවිස්සති, ආනන්දො නාම නාමෙන උපට්ඨාකො මහෙසිනො.