උපවානත්ථෙරස්සාපදානං දුතියං.
23. සරණගමනියත්ථෙරාපදානං{*}
920. නගරෙ චන්දවතියා{1} මාතුපට්ඨායකො අහුං, අන්ධා මාතා පිතා මය්හං තෙ පොසෙමි අහං තදා.
921. රහොගතො නිසීදිත්වා එවං චින්තෙස’හං තදා, පොසෙන්තො මාතාපිතරෙ පබ්බජ්ජං න ලභාම’හං
922. තමන්ධකාරපිහිතා{2} තිවිධග්ගීහි ඩය්හරෙ, එතාදිසෙ භයෙ{3} ජාතෙ නත්ථි කොචි විනායකො.
923. බුද්ධො ලොකෙ සමුප්පන්නො දිප්පති ජිනසාසනං, සක්කා උද්ධරිතුං{4} අත්තා පුඤ්ඤකම්මෙන{5} ජන්තුනා.
924. උග්ගය්හ තීණි සරණෙ පරිපුණ්ණානි ගොපයිං, තෙන කම්මෙන සුකතෙන පටිමොක්ඛාමි{6} දුග්ගතිං.
925. නිසභො නාම සමණො බුද්ධස්ස අග්ගසාවකො, තමහං උපගන්ත්වාන සරණාගමනං ගහිං.
926. වස්සසතසහස්සානි ආයු විජ්ජති තාවදෙ, තාවතා සරණාගමනං පරිපුණ්ණං අගොපයිං.
927. චරිමෙ වත්තමානම්හි සරණං තං අනුස්සරිං, තෙන කම්මෙන සුකතෙන තාවතිංසං අගච්ඡ’හං.
928. දෙවලොකගතො සන්තො පුඤ්ඤකම්මසමාහිතො, යං දෙසං උපගච්ඡාමි{7} අට්ඨ හෙතූ ලභාමහං.
929. දිසාසු පූජිතො හොමි තික්ඛපඤ්ඤො භවාම’හං, සබ්බෙ දෙවා’නුවත්තන්ති අමිතභොගං ලභාම’හං.
930. සුවණ්ණවණ්ණො සබ්බත්ථ පටිකන්තො භවාම’හං, මිත්තානං අචලො හොමි යසො අච්චුග්ගතො{8} මම.
931. අසීතික්ඛත්තුං දෙවින්දො දෙවරජ්ජමකාරයිං, දිබ්බං සුඛං අනුභවිං අච්ඡරාහි පුරක්ඛතො.
932. පඤ්චසත්තතික්ඛත්තුඤ්ච චක්කවත්තී අහොස’හං, පදෙසරජ්ජං විපුලං ගණනාතො අසඞ්ඛියං.
933. පච්ඡිමභවෙ සම්පත්තෙ පුඤ්ඤකම්මසමාහිතො, පුරෙ සාවත්ථියං ජාතො මහාසාලෙ සු අඩ්ඪකෙ
934. නගරා නික්ඛමිත්වාන දාරකෙහි පුරක්ඛතො, හාසඛිඩ්ඪාසමංගීහං{9} සඞ්ඝාරාමං උපාගමි.
935. තත්ථ’ද්දසාසිං සමණං විප්පමුත්තං නිරූපධිං, සො මෙ ධම්මමදෙසෙසි සරණඤ්ච අදාසි මෙ.
936. සො’හං සුත්වාන සරණං සරණං මෙ අනුස්සරිං, එකාසනෙ නිසීදිත්වා අරහත්තමපාපුණිං.
937. ජාතියා සත්තවස්සෙන අරහත්තං අපාපුණිං, උපසම්පාදෙසි{1} සම්බුද්ධො ගුණමඤ්ඤාය චක්ඛුමා.
938. අපරිමෙය්යෙ ඉතො කප්පෙ සරණානි අගච්ඡි’හං, තතො මෙ සුකතං කම්මං ඵලං දස්සෙසි මෙ ඉධ.
939. සුගොපිතං මෙ සරණං මානසං සුප්පණිහිතං, අනුභොත්වා යසං සබ්බං පතෙතාම්භි අචලං පදං.
940. යෙසං සොතාවධානත්ථි සුණාථ මම භාසතො, අහං{2} වො කථයිස්සාමි සාමං දිට්ඨං පදං{3} මම.
941. “බුද්ධො ලොකෙ සමුප්පන්නො වත්තතෙ ජිනසාසනං, අමතා වාදිතා භෙරී සොකසල්ලවිනොදනා.
942. යථා සකෙන ථාමෙන පුඤ්ඤක්ඛෙත්තෙ අනුත්තරෙ, අධිකාරං කරෙය්යාථ ඵස්සයිස්සථ{4} නිබ්බුතිං.
943. පග්ගය්හ තීණි සරණෙ පඤ්ච සීලානි ගොපිය{5}, බුද්ධෙ චිත්තං පසාදෙත්වා දුක්ඛස්සන්තං කරිස්සථ.
944. මමොපමං කරිත්වාන{6} සීලානි පරිගොපිය, අචිරං අරහත්තං වො සබ්බෙපි පාපුණිස්සථ”.
945. තෙවිජ්ජො ඉද්ධිපත්තො’ම්හි චෙතොපරියකොවිදො, සාවකො තෙ මහාවීර චරණෙ{7} වන්දති සත්ථුනො.
946. අපරිමෙය්යෙ ඉතො කප්පෙ සරණං බුද්ධස්ස ගච්ඡහං, දුග්ගතිං නාභිජානාමි සරණාගමනෙ ඵලං.
947. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා තිසරණගමනියො ථෙරො ඉමා ගාථායො අභාසිත්ථාති.
තිසරණගමනියත්ථෙරස්සාපදානං{8} තතියං.
24. පඤ්චසීලසමාදානියත්ථෙරාපදානං
948. නගරෙ චන්දවතියා භතකො ආස’හං තදා, පරකම්මායනෙ යුත්තෙ පබ්බජ්ජං න ලභාම’හං.
949. තමන්ධකාරපිහිතා{9} තිවිධග්ගීහි{10} ඩය්හරෙ, කෙන නු ඛො උපායෙන විසංයුත්තො භවෙ අහං.
950. දෙය්යධම්මො ච මෙ නත්ථි වරාකො භතකො{11} අහං, යන්නූනා’හං පඤ්චසීලං රක්ඛෙය්යං පරිපූරයං.
951. අනොමදස්සී{1} මුනිනො නිසභො නාම සාවකො, තම’හං උපසඞ්කම්ම පඤ්චසික්ඛාපද’ග්ගහිං.
952. වස්සසතසහස්සානි ආයු විජ්ජති තාවදෙ, තාවතා පඤ්ච සීලානි පරිපුණ්ණානි ගොපයිං.
953. මච්චුකාලම්භි{2} සම්පත්තෙ දෙවා අස්සාසයන්ති මං, රථො සහස්සස්සයුත්තො මාරිසා’යං{3} උපට්ඨිතො.
954. වත්තන්තෙ{4} චරිමෙ චිත්තෙ මම සීලං අනුස්සරිං, තෙන කම්මෙන සුකතෙන තාවතිංසං අගච්ඡ’හං.
955. තිංසක්ඛත්තුඤ්ච දෙවින්දො දෙවරජ්ජං අකාරයිං, දිබ්බං සුඛං අනුභවිං අච්ඡරාහි පුරක්ඛතො.
956. පඤ්චසත්තතික්ඛත්තුඤ්ච චක්කවත්තී අහොස’හං, පදෙසරජ්ජං විපුලං ගණනාතො අසංඛියං.
957. දෙවලොකා චවිත්වාන සුක්කමූලෙන චොදිතො, පුරෙ වෙසාලියං ජාතො මහාසාලෙ සුඅඩ්ඪකෙ.
958. වස්සූපනායිකෙ කාලෙ දිප්පන්තෙ ජිනසාසනෙ, මාතා ච මෙ පිතා චෙව පඤ්චසික්ඛාපද’ග්ගහුං.
959. සහ සුතෙන’හං සීඝං මම සීලං අනුස්සරිං, එකාසනෙ නිසීදිත්වා අරහත්තමපාපුණිං.
960. ජාතියා පඤ්චවස්සො’හං අරහත්තමපාපුණිං, උපසම්පාදයී බුද්ධො ගුණමඤ්ඤාය චක්ඛුමා.
961. පරිපුණ්ණානි ගොපෙත්වා පඤ්ච සික්ඛාපදාන’හං, අපරිමෙය්යෙ ඉතො කප්පෙ විනිපාතං න ගච්ඡ’හං.
962. ස්වාහං යසමනුභවිං තෙසං සීලානවාහසා, කප්පකොටිම්පි කිත්තෙන්තො කිත්තෙය්ය එකදෙසකං.
963. පඤ්ච සීලානි ගොපෙත්වා තයො හෙතු ලභාමහං, දීඝායුකො මහාභොගො තික්ඛපඤ්ඤො භවාම’හං.
964. පකිත්තෙන්තො{5} ව සබ්බෙසං අධිමත්තඤ්ච පොරිසං, භවාභවෙ සංසරිත්වා එතෙ ඨානෙ ලභාමහං.
965. අපරිමෙය්යසීලෙසු වත්තන්තො ජිනසාවකො{6}, භවෙසු යදි රජ්ජෙය්ය{7} විපාකො කීදිසො භවෙ.
966. සුචිණ්ණං මෙ පඤ්චසීලං භතකෙන විපස්සිනා, තෙන සීලෙන’හං අජ්ජ මොචයිං{1} සබ්බබන්ධනං.
967. අපරිමෙය්යෙ ඉතො කප්පෙ පඤ්ච සීලානි ගොපයිං, දුග්ගතිං නාභිජානාමි පඤ්චසීලානි’දං ඵලං.
968. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා පඤ්චසීලසමාදානියො ථෙරො. ඉමා ගාථායො අභාසිත්ථාති.
පඤ්චසීලසමාදානියත්ථෙරස්සාපදානං චතුත්ථං.
25. අන්නසංසාවකත්ථෙරාපදානං
969. සුවණ්ණවණ්ණං සම්බුද්ධං ගච්ඡන්තං අන්තරාපණෙ, කඤ්චනග්ඝියසඞ්කාසං ද්වත්තිංසවරලක්ඛණං.
970. සිද්ධත්ථං ලොකපජ්ජොතං අප්පමෙය්යං අනොපමං, අලත්ථං පරමං පීතිං දිස්වා දන්තං ජුතින්ධරං.
971. සම්බුද්ධං අභිමන්තෙත්වා{2} භොජයිං තං මහාමුනිං, මහාකාරුණිකො{3} නාථො{4} අනුමොදි මමං තදා.
972. තස්මිං මහාකාරුණිකෙ පරමස්සාසකාරකෙ, බුද්ධෙ චිත්තං පසාදෙත්වා කප්පං සග්ගම්හි මොද’හං.
973. චතුනවුතෙ ඉතො කප්පෙ යං දානමදදිං තදා, දුග්ගතිං නාභිජානාමි භික්ඛාදානස්සි’දං ඵලං.
974. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා අන්නසංසාවකො ථෙරො ඉමා ගාථායො අභාසිත්ථාති.
අන්නසංසාවකත්ථෙරස්සාපදානං පඤ්චමං.
26. ධූපදායකත්ථෙරාපදානං
975. සිද්ධත්ථස්ස භගවතො ලොකජෙට්ඨස්ස තාදිනො, කුටිධූපං{5} මයා දින්නං විප්පසන්නෙන චෙතසා.
976. යං යං යොනුපපජ්ජාමි දෙවත්තං අථ මානුසං, සබ්බෙසම්පි පියො හොමි ධූපදානස්සි’දං ඵලං.
977. චතුනවුතෙ ඉතො කප්පෙ යං ධූපං අදදිං තදා{1}, දුග්ගතිං නාභිජානාමි ධූපදානස්සි’දං ඵලං.
978. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා ධූපදායකො ථෙරො ඉමා ගාථායො අභාසිත්ථාති.
ධූපදායකත්ථෙරස්සාපදානං ඡට්ඨං.
27. පුලිනපූජකත්ථෙරාපදානං
979. විපස්සිස්ස භගවතො බොධියා පාදපුත්තමෙ, පුරාණපුලිනං ඡඩ්ඩෙත්වා සුද්ධං පුලිනමාකිරිං.
980. එකනවුතෙ ඉතො කප්පෙ යං පුලිනමදාස’හං, දුග්ගතිං නාභිජානාමි පුලිනදානස්සි’දං ඵලං.
981. තිපඤ්ඤාසෙ{2} ඉතො කප්පෙ රාජා ආසිං ජනාධිභූ, මහාපුලිනනාමෙන{3} චක්කවත්තී මහබ්බලො.
982. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා පුලිනපූජකො ථෙරො ඉමා ගාථායො අභාසිත්ථාති.
පුලිනපූජකත්ථෙරස්සාපදානං සත්තමං.
28. උත්තරියත්ථෙරාපදානං
983. චන්දභාගානදීතීරෙ සුංසුමාරො අහං තදා, සගොචරප්පසුතො’හං{4} නදීතිත්ථං අගඤ්ඡ’හං.
984. සිද්ධත්ථො තම්හි සමයෙ සයම්භූ අග්ගපුග්ගලො, නදිං තරිතුකාමො සො නදීතිත්ථං උපාගමි.
985. උපාගතෙ ච{5} සම්බුද්ධෙ අහම්පි තත්ථු’පාගමිං, උපගන්ත්වාන සම්බුද්ධං ඉමං වාචං උදීරයිං.
986. අභිරූහ මහාවීර තාරෙස්සාමි අහං තුවං, පෙත්තිකං විසයං මය්හං අනුකම්ප මහාමුනෙ.
987. මම උග්ගජ්ජනං සුත්වා අභිරූහි මහාමුනි, හට්ඨො හට්ඨෙන චිත්තෙන තාරෙසිං ලොකනායකං.
988. නදියා පාරිමෙ තීරෙ සිද්ධත්ථො ලොකනායකො, අස්සාසෙසි මමං තත්ථ අමතං පාපුණිස්සසි.
989. තම්හා කායා චවිත්වාන දෙවලොකං අගච්ඡහං, දිබ්බං සුඛං අනුභවිං අච්ඡරාභි පුරක්ඛතො.
990. සත්තක්ඛත්තුඤ්ච දෙවින්දො දෙවරජ්ජං අකාස’හං, තීණික්ඛත්තුං චක්කවත්තී මහියා ඉස්සරො අහුං.
991. විවෙකමනුයුත්තො’හං නිපකො ච සුසංවුතො, ධාරෙමි අන්තිමං දෙහං සම්මාසම්බුද්ධසාසනෙ.
992. චතුනවුතෙ ඉතො කප්පෙ තාරෙසිං යං නරාසභං, දුග්ගතිං නාභිජානාමි තාරණාය{1} ඉදං ඵලං.
993. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා උත්තරියො{2} ථෙරො ඉමා ගාථායො අභාසිත්ථාති.
උත්තරියත්ථෙරස්සාපදානං{3} අට්ඨමං.
29. එකඤ්ජලිකත්ථෙරාපදානං
994. සුවණ්ණවණ්ණං සම්බුද්ධං ගච්ඡන්තං අන්තරාපණෙ, විපස්සිං සත්ථවාහග්ගං නරවීරං විනායකං.
995. අදන්තදමකං{4} තාදිං මහාවාදිං මහාමතිං{5}, දිස්වා පසන්නො සුමනො එකඤ්ජලිමකාස’හං.
996. එකනවුතෙ ඉතො කප්පෙ යමඤ්ජලිං කරිං{6} තදා, දුග්ගතිං නාභිජානාමි අඤ්ජලිස්ස ඉදං ඵලං.
997. පටිසම්භිදා -පෙ- බුද්ධස්ස සාසනං.
ඉත්ථං සුදං ආයස්මා එකඤ්ජලිකො ථෙරො ඉමා ගාථායො අභාසිත්ථාති.
එකඤ්ජලිකත්ථෙරස්සාපදානං නවමං.