824. ජිගුච්ඡිස්සන්ති තං විඤ්ඤූ අසුචිං නාගරිකො යථා, ආකඩ්ඪිත්වාන ඉසයො චොදයිස්සන්ති තං සදා.
825. තං විඤ්ඤූ පවදිස්සන්ති සමතික්කන්තසාසනං, සංවාසං අලභන්තො හි කථං ජීවිස්සසී{9} තුවං.
826. තිධා පභින්නමාතඞ්ගං කුඤ්ජරං සට්ඨිහායනං, බලී නාගො උපගන්ත්වා යූථා නීහරතෙ ගජං.
827. යූථා විනිස්සටො සන්තො සුඛං සාතං න වින්දති, දුක්ඛිතො විමනො{1} හොති පජ්ඣායන්තො{2} පවධෙති{3}.
828. තථෙව ජටිලා තම්පි නීහරිස්සන්ති දුම්මතිං,{4} තෙහි ත්වං නිස්සටො සන්තො සුඛං සාතං න ලච්ඡසි.
829. දිවා යා යදි වා රත්තිං සොකසල්ලසමප්පිතො, ඩය්හසි පරිළාහෙන ගජො යුථා’ව නිස්සටො{5}.
830. ජාතරූපං යථා කූටං නෙව ඣාපෙති{6} කත්ථචි, තථා සීලවිහීනො ත්වං න ඣාපෙස්සසි{7} කත්ථචි.
831. අගාරං වසමානොපි කථං ජීවිහිසී තුවං, මත්තිකං පෙත්තිකං චාපි නත්ථි තෙ නිහිතං{8} ධනං.
832. සයං{9} කම්මං කරිත්වාන ගත්තෙ සෙදං පමොචයං, එවං ජීවිහිසි ගෙහෙ සාධු තෙ තං{10} න රුච්චතී.”
833. එවාහං තත්ථ වාරෙමි{11} සඞ්කිලෙසගතං මනං, නානාධම්මකථං කත්වා පාපා චිත්තා නිවාරයිං.
834. එවං මෙ විහරන්තස්ස අප්පමාදවිහාරිනො, තිංස වස්සසහස්සානි විපිනෙ මෙ{12} අතික්කමුං.
835. අප්පමාදරතං දිස්වා උත්තමත්ථගවෙසකං, පදුමුත්තරසම්බුද්ධො ආගච්ඡි මම සන්තිකං.
836. තිම්බරූසකවණ්ණාභො{13} අප්පමෙය්යො අනූපමො, රූපෙන’සදිසො බුද්ධො ආකාසෙ චඞ්කමී තදා.
837. සුඵුල්ලො සාලරාජා’ව විජ්ජූ’ව’බ්භඝනන්තරෙ{14}, ඤාණෙනා’සදිසො බුද්ධො ආකාසෙ චඞ්කමී තදා.
838. සීහරාජාව’සම්භීතො ගජරාජාව දප්පිතො, ලසිතො{15} ව්යග්ඝරාජාව ආකාසෙ චඞ්කමී තදා.
839. සිංගීනික්ඛසුවණ්ණාභො ඛදිරඞ්ගාරසන්නිභො, මණි යථා ජොතිරසො ආකාසෙ චඞ්කමී තදා.
840. විසුද්ධකෙලාසනිභො පුණ්ණමායෙව{16} චන්දිමා, මජ්ඣන්තිකෙව{17} සුරියො ආකාසෙ චඞ්කමී තදා.
841. දිස්වා නභෙ{1} චඞ්කමන්තං එවං චින්තෙස’හං තදා, “දෙවො නු ඛො අයං සත්තො, උදාහු මනුජො අයං?
842. න මෙ සුතො වා දිට්ඨො වා මහියා එදිසො නරො, අපි මන්තපදං අත්ථි, අයං සත්ථා භවිස්සති.”
843. එවාහං චින්තයිත්වාන සකං චිත්තං පසාදයිං, නානාපුප්පඤ්ච ගන්ධඤ්ච සන්තිපාතෙත්ව’හං{2} තදා.
844. පුප්ඵාසනං පඤ්ඤපෙත්වා සාධුචිත්තං මනොරමං, නරසාරථිනං අග්ගං ඉදං වචනමබ්රවිං.
845. “ඉදං මෙ ආසනං වීර පඤ්ඤත්තං තව’නුච්ඡවිං{3}, හාසයන්තො මමං චිත්තං නිසීද කුසුමාසනෙ.”
846. නිසීදි තත්ථ භගවා අසම්භීතොව කෙසරී, සත්තරත්තින්දිවං බුද්ධො පවරෙ කුසුමාසනෙ.
847. නමස්සමානො අට්ඨාසිං සත්තරත්තින්දිවං අහං, වුට්ඨහිත්වා සමාධිම්හා සත්ථා ලොකෙ අනුත්තරො.
848. මම කම්මං පකිත්තෙන්තො ඉදං වචනමබ්රවිං, “භාවෙහි බුද්ධානුස්සතිං භාවනානමනුත්තරං.
849. ඉමං සතිං භාවයිත්වා පූරයිස්සසි මානසං,{4} තිංස කප්පසහස්සානි දෙවලොකෙ රමිස්සසි.
850. අසීතික්ඛත්තුං දෙවින්දො දෙවරජ්ජං කරිස්සසි, සහස්සක්ඛත්තුං චක්කවත්තී රාජා රට්ඨෙ භවිස්සසි.
851. පදෙසරජ්ජං විපුලං ගණනාතො අසඞ්ඛියං, අනුභොස්සසි තං සබ්බං බුද්ධානුස්සතියා ඵලං.
852. භවාභවෙ සංසරන්තො මහාභොගං ලභිස්සසි, භොගෙ තෙ ඌනතා නත්ථි බුද්ධානුස්සතියා ඵලං.
853. කප්පසතසහස්සම්හි ඔක්කාකකුලසම්භවො, ගොතමො නාම ගොත්තෙන සත්ථා ලොකෙ භවිස්සති.
854. අසීතිකොටිං ඡඩ්ඩෙත්වා දාසෙ{5} කම්මකරෙ බහූ, ගොතමස්ස භගවතො සාසනෙ පබ්බජිස්සසි.
855. ආරාධයිත්වා සම්බුද්ධං ගොතමං සක්යපුඞ්ගවං, සුභූති නාම නාමෙන හෙස්සති සත්ථු සාවකො.
856. භික්ඛුසඞ්ඝෙ නිසීදිත්වා දක්ඛිණෙය්යගුණම්භි තං{1}, තථා’රණවිහාරෙ ච{2} ද්වීසු අග්ගෙ ඨපෙස්සති{3}.
857. ඉදං වත්වාන සම්බුද්ධො ජලජුත්තරනාමකො{4}, නභං අබ්භුග්ගමී ධීරො හංසරාජාව අම්බරෙ.
858. සාසිතො ලොකනාථෙන නමස්සිත්වා තථාගතං, සදා භාවෙමි{5} මුදිතො බුද්ධානුස්සතිමුත්තමං.
859. තෙන කම්මෙන සුකතෙන චෙතනා පණිධීහි ච, ජහිත්වා මානුසං දෙහං තාවතිංසමගච්ඡ’හං.
860. අසීතික්ඛත්තුං දෙවින්දො දෙවරජ්ජමකාරයිං, සහස්සක්ඛත්තුං රාජා ච චක්කවත්තී අහොස’හං.
861. පදෙසරජ්ජං විපුලං ගණනාතො අසඞ්ඛියං, අනුභොමි සුසම්පත්තිං බුද්ධානුස්සතියා ඵලං.
862. භාවාභවෙ සංසරන්තො මහාභොගං ලභාම’හං, භොගෙ මෙ ඌනතා නත්ථි බුද්ධානුස්සතියා ඵලං.
863. සතසහස්සෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධානුස්සතියා ඵලං.
864. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සුභූතිථෙරො ඉමා ගාථායො අභාසිත්ථාති.
සුභූතිත්ථෙරස්සාපදානං පඨමං.
22. උපවානත්ථෙරාපදානං.
865. පදුමුත්තරො නාම ජිනො සබ්බධම්මාන පාරගූ, ජලිත්වා අග්ගික්ඛන්ධො ව සම්බුද්ධො පරිනිබ්බුතො.
866. මහාජනා සමාගම්ම පූජයිත්වා තථාගතං, චිතං{6} කත්වාන සුකතං සරීරං අභිරොපයුං.
867. සරීරකිච්චං කත්වාන ධාතුං{7} තත්ථ සමානයුං, සදෙවමානුසා සබ්බෙ බුද්ධථූපං අකංසු තෙ.
868. පඨමා කඤ්චනමයා දුතියා’සි මණිමයා, තතියා රූපියමයා චතුත්ථා{8} ඵළිකාමයා.
869. තථා පඤ්චමියා නෙමී{9} ලොහිතඞ්කමයා අහු, ඡට්ඨා මසාරගල්ලස්ස සබ්බරතනමයූපරි.
870. ජඞ්ඝා මණිමයා ආසි වෙදිකා රතනාමයා, සබ්බසොවණ්ණයො ථූපො උද්ධං යොජනමුග්ගතො.
871. දෙවා තත්ථ සමාගන්ත්වා එකතො මන්තයුං තදා, “මයම්පි ථූපං කස්සාම ලොකනාථස්ස තාදිනො.
872. ධාතු ආවෙණිකා නත්ථි සරීරං එකපිණ්ඩිතං, ඉමම්හි බුද්ධථූපම්හි කස්සාම කඤ්චුකං මයං.”
873. දෙවා සත්තරතනෙහි{1} අඤ්ඤං වඩ්ඪෙසු යොජනං, ථූපො ද්වියොජනුබ්බෙධො තිමිරං ව්යපහන්ති සො.
874. නාගා තත්ථ සමාගන්ත්වා එකතො මන්තයුං තදා, “මනුස්සා චෙව දෙවා ච බුද්ධථූපං අකංසු තෙ.
875. මා නො පමත්තා අස්සුම්හා අප්පමත්තා සදෙවකා, මයම්පි ථූපං කස්සාම ලොකනාථස්ස තාදිනො.”
876. ඉන්දනීලං මහානීලං අථො ජොතිරසං මණිං, එකතො සන්නිපාතෙත්වා බුද්ධථූපං අඡාදයුං.
877. සබ්බං මණිමයං ආසි තාවතා බුද්ධචෙතියං, තිංසයොජනමුබ්බෙධං{2} ආලොකකරණං තදා.
878. ගරුළා{3} ච සමාගන්ත්වා එකතො මන්තයුං තදා, “මානුසා දෙවා නාගා ච බුද්ධථූපං අකංසු තෙ.
879. මා නො පමත්තා අස්සුම්හා අප්පමත්තා සදෙවකා, මයම්පි ථූපං කස්සාම ලොකනාථස්ස තාදිනො.
880. සබ්බමණිමයං ථූපෙ{4} අකරු’ත්තරකඤ්චුකං{5}, යොජනං තෙපි වඩ්ඪෙසුං ආයතං බුද්ධචෙතියං.
881. චතුයොජනමුබ්බිද්ධො{6} බුද්ධථූපො විරොචතී, ඔභාසෙති දිසා සබ්බා සතරංසීව උග්ගතො.{*}
882. කුම්භණ්ඩා ච සමාගන්ත්වා එකතො මන්තයුං තදා, “මනුස්සා චෙව දෙවා ච නාගා ච ගරුළා{7} තථා.
883. පච්චෙකං බුද්ධසෙට්ඨස්ස අකංසු ථූපමුත්තමං, මා නො පමත්තා අස්සුම්හා අප්පමත්තා සදෙවකා.
884. මයම්පි ථූපං කස්සාම ලොකනාථස්ස තාදිනො, රතනෙහි ඡාදයිස්සාම ආයතං බුද්ධචෙතියං.
885. යොජනං තෙපි වඩ්ඪෙසුං ආයතං බුද්ධචෙතියං, පඤ්චයොජනමුබ්බිද්ධො ථූපො ඔභාසතෙ තදා.
886. යක්ඛා තත්ථ සමාගන්ත්වා එකතො මන්තයුං තදා, “මනුස්සා දෙවනාගා ච ගරුළා කුම්භඅණ්ඩකා.
887. පච්චෙකං බුද්ධසෙට්ඨස්ස අකංසු ථූපමුත්තමං, මා නො පමත්තා අස්සුම්හා අප්පමත්තා සදෙවකා.
888. මයම්පි ථූපං කස්සාම ලොකනාථස්ස තාදිනො, එළිකාහි{1} ඡාදයිස්සාම ආයතං බුද්ධචෙතියං.
889. යොජනං තෙපි වඩ්ඪෙසුං ආයතං බුද්ධචෙතියං, ඡ යොජනානි උබ්බීද්ධො ථූපො ඔභාසතෙ තදා.
890. ගන්ධබ්බා ච සමාගන්ත්වා එකතො මන්තයුං තදා, “මනුජා දෙවතා නාගා කුම්භණ්ඩා ගුරුළා තථා{2}.
891. සබ්බෙ’කංසුං{3} බුද්ධථූපං මයමෙත්ථ අකාරකා, මයම්පි ථූපං කස්සාම ලොකනාථස්ස තාදිනො.
892. වෙදියො සත්ත කත්වාන ඡත්තමාරොපයිංසු තෙ{4}, සබ්බසොණ්ණමයං{5} ථූපං ගන්ධබ්බා කාරයුං තදා{*}.
893. සත්තයොජනමුබ්බිද්ධො ථූපො ඔභාසතෙ තදා, රත්තින්දිවා න ඤායන්ති ආලොකො හොති{6} සබ්බදා.
894. අභිභොන්ති න තස්සා’භා චන්දසූරා සතාරකා, සමන්තා යොජනසතෙ පදීපොපි න පජ්ජලි.
895. තෙන කාලෙන යෙ කෙචි ථූපං පූජෙන්ති මානුසා, න තෙ ථූපමාරුහන්ති අම්බරෙ උක්ඛිපන්ති තෙ.
896. දෙවෙහි ඨපිතො යක්ඛො අභිසම්මතනාමකො, ධජං වා පුප්ඵදාමං වා අභිරොපෙති උත්තරි.
897. න තෙ පස්සන්ති තං යක්ඛං දාමං පස්සන්ති ගච්ඡතො, එවං පස්සිත්වා ගච්ඡන්තා{7} සබ්බෙ ගච්ඡන්ති සුග්ගතිං.
898. විසද්ධා{8} යෙ පාවචනෙ පසන්නා යෙ ච සාසනෙ, පාටිහීරං දට්ඨටුකාමා ථූපං පූජෙන්ති මානුසා.
899. නගරෙ හංසවතියා අහොසිං භතකො{9} තදා, ආමොදිතං ජනං දිස්වා එවං චින්තෙස’හං තදා.
900. “උළාරො භගවා හෙ’සො{10} යස්ස ධාතුඝරෙ’දිසං, ඉමා ච ජනතා තුට්ඨාකාරං කුබ්බන්තනප්පකං{11}.
901. අහම්පි කාරං කස්සාමි ලොකනාථස්ස තාදිනො, තස්ස ධම්මෙසු දායාදො භවිස්සාමි අනාගතෙ.
902. සුධොතං රජකෙනා’හං උත්තරෙය්යපටං මම, වෙළග්ගෙ ආලගෙත්වාන ධජං උක්ඛිපිමම්බරෙ.
903. අභිසම්මතකො ගය්හ අම්බරෙ’හාසි මෙ ධජං, වාතෙරිතං ධජං දිස්වා භීයො හාසං ජනෙස’හං.
904. තත්ථ චිත්තං පසාදෙත්වා සමණං උපසඞ්කමිං, තං භික්ඛුං අභිවාදෙත්වා විපාකං පුච්ඡ’හං ධජෙ.
905. සො මෙ කථෙසි ආනන්දපීතිසඤ්ජනනං මම, “තස්ස ධජස්ස විපාකං අනුභොස්සසි සබ්බදා.
906. හත්ථි අස්සා රථා පත්තී සෙනා ච චතුරඞ්ගිනී, පරිවාරෙස්සන්ති{1} තං නිච්චං ධජදානස්සි’දං ඵලං.
907. සට්ඨි තුරියසහස්සානි භෙරියො සමලඞ්කතා, පරිවාරෙස්සන්ති තං නිච්චං ධජදානස්සි’දං ඵලං
908. ඡළාසීතිසහස්සානි නාරියො සමලඞ්කතා, විචිත්තවත්ථාභරණා ආමුත්තමණිකුණ්ඩලා.
909. අළාරපම්හා හසුලා සුසණ්හා{2} තනුමජ්ඣිමා, පරිවාරෙස්සන්ති තං නිච්චං ධජදානස්සි’දං ඵලං.
910. තිංස කප්පසහස්සානි දෙවලොකෙ රමිස්සසි, අසීතික්ඛත්තුං දෙවින්දො දෙවරජ්ජං කරිස්සසි.
911. සහස්සක්ඛත්තුං රාජා ච චක්කවත්තී භවිස්සසි, පදෙසරජ්ජං විපුලං ගණනාතො අසඞ්ඛියං.
912. කප්පසතසහස්සම්හි ඔක්කාක කුලසම්භවො, ගොතමො නාම ගොත්තෙන සත්ථා ලොකෙ භවිස්සති.
913. දෙවලොකා චවිත්වාන සුක්කමූලෙන චොදිතො, පුඤ්ඤකම්මෙන සංයුත්තො බ්රහ්මබන්ධු භවිස්සසි.
914. අසීතිකොටිං ඡඩ්ඩෙත්වා දාසෙ කම්මකරෙ බහූ, ගොතමස්ස භගවතො සාසනෙ පබ්බජිස්සසි.
915. ආරාධයිත්වා සම්බුද්ධං ගොතමං සක්යපුඞ්ගවං, උපවානොති නාමෙන හෙස්සසි සත්ථු සාවකො”ති.
916. සතසහස්සෙ කතං කම්මං ඵලං දස්සෙසි මෙ ඉධ, සුමුත්ත සරවෙගොව කිලෙසෙ ඣාපයී{3} මම.
917. චක්කවත්තිස්ස සන්තස්ස චතුදීපිස්සරස්ස මෙ, තියොජනානි සාමන්තා{4} උස්සීයන්ති ධජා සදා.
918. සතසහස්සෙ ඉතො කප්පෙ යං කම්මමකරිං තදා, දුග්ගතිං නාභිජානාමි ධජදානස්සි’දං ඵලං.
919. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා උපවානො ථෙරො ඉමා ගාථායො අභාසිත්ථාති.