664. ආතාපී නිපකො චාපි{5} බාහුසච්චෙසු කොවිදො, නිවාතවුත්තී අත්ථද්ධො සබ්බපාඨි භවිස්සති.
665. පධානපහිතත්තො සො උපසන්තො නිරූපධි, සබ්බාසවෙ පරිඤ්ඤාය නිබ්බායිස්සත’නාසවො”.
666. සන්ති ආරඤ්ඤකා නාගා කුඤ්ජරා සට්ඨිහායනා, තිධා පභින්නමාතඞ්ගා ඊසාදන්තා උරූළ්හවා.
667. අනෙකසතසහස්සා පණ්ඩිතාපි මහිද්ධිකා, සබ්බෙ තෙ බුද්ධනාගස්ස න හොන්තු’පනිධිම්හි තෙ{6}.
668. ආදියාමෙ නමස්සාමි මජ්ඣිමෙ අථ පච්ඡිමෙ, පසන්නචිත්තො සුමනො බුද්ධසෙට්ඨං උපට්ඨහිං.
669. ආතාපී නිපකො චාපි සම්පජානො පතිස්සතො, සොතාපත්තිඵලම්පත්තො සෙක්ඛභූමීසු කොවිදො.
670. කප්පෙ’තො සතසහස්සෙ යං කම්මමභිනීහරිං, තා’හං භූමිමනුප්පත්තො ඨිතො සද්ධම්මමාචලො{1}.
671-673. කිලෙසා ඣාපිතා -පෙ- කතං බුද්ධස්ස සාසනං.
ඉත්ථං සුදං ආයස්මා ආනන්දො ථෙරො ඉමා ගාථායො අභාසිත්ථාති.
ආනන්දත්ථෙරාපදානං දසමං.
බුද්ධවග්ගො පඨමො
උද්දානං:
බුද්ධො පච්චෙකබුද්ධො ච{2} සාරිපුත්තො ච කොලිතො, කස්සපො අනුරුද්ධො ච පුණ්ණත්ථෙරො උපාලි ච. අඤ්ඤාසිකොණ්ඩඤ්ඤා පිණ්ඩොලො රෙවතා’නන්දපණ්ඩිතො. ඡසතානි ච පඤ්ඤාස ගාථායො සබ්බපිණ්ඩිතා.
2. සිහාසනදායකවග්ගො
11. සීහාසනදායකත්ථෙරාපදානං
674. නිබ්බුතෙ ලොකනාථම්හි සිද්ධත්ථෙ දිපදුත්තමෙ, විත්ථාරිතෙ පාවචනෙ බාහුජඤ්ඤම්හි සාසනෙ.
675. පසන්නචිත්තො සුමනො සීහාසනමකාස’හං, සීහාසනං කරිත්වාන පාදපිඨමකාස’හං.
676. සීහාසනෙ ච වස්සන්තෙ ඝරං තත්ථ අකාස’හං, තෙන චිත්තප්පසාදෙන තුසිතං උපපජ්ජ’හං.
677. ආයාමෙන චතුබ්බීසයොජනං ආසි තාවදෙ, විමානං සුකතං මය්හං විත්ථාරෙන චතුද්දස{1}.
678. සතං{2} කඤ්ඤාසහස්සානි පරිවාරෙන්ති මං සදා, සොණ්ණමයඤ්ච පල්ලඞ්කං ව්යම්හෙ ආසි සුනිම්මිතං.
679. හත්ථියානං අස්සයානං දිබ්බයානං උපට්ඨිතං, පාසාදා සිවිකා චෙව උප්පජ්ජන්ති{3} යදිච්ඡකං.
680. මණිමයා ච පල්ලඞ්කා අඤ්ඤෙ සාරමයා බහූ. නිබ්බත්තන්ති මමං සබ්බෙ සීහාසනස්සි’දං ඵලං.
681. සොණ්ණමයා රූපිමයා ඵළිකා වෙළුරියාමයා, පාදුකා අභීරූහාමි පාදපීඨස්සි’දං ඵලං.
682. චතුනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි පුඤ්ඤකම්මස්සි’දං ඵලං.
683. තෙසත්තතිම්හිතො කප්පෙ ඉන්දනාමා තයො ජනා, ද්වෙසත්තතිම්හිතො කප්පෙ තයො සුමනනාමකා.
684. සමසත්තනිම්හිතො කප්පෙ තයො වරුණනාමකා, සත්තරතනසම්පන්නා චතුදීපම්හි ඉස්සරා.
685. පටිසම්භිදා චතස්සො ච -පෙ- කතං බුද්ධස්ස සාසනං.
ඉත්ථං සුදං ආයස්මා සීහාසනදායකො ථෙරො ඉමා ගාථායො අභාසිත්ථාති.
සීහාසනදායකත්ථෙරාපදානං පඨමං.
12. එකත්ථම්භිකත්ථෙරාපදානං.
686. සිද්ධත්ථස්ස භගවතො මහාපූග්ගණො අහු, සරණඞ්ගතා ච තෙ බුද්ධං සද්දහන්ති තථාගතං.
687. සබ්බෙ සඞ්ගම්ම මන්තෙත්වා මාළං{4} කුබ්බන්ති සත්ථුනො, එකත්ථම්භං අලභන්තා විචිනන්ති බ්රහාවනෙ.
688. තෙ’හං අරඤ්ඤෙ දිස්වාන උපගම්ම ගණං තදා, අඤ්ජලිම්පග්ගහෙත්වාන පටිපුච්ඡිං ගණං අහං.
689. තෙ මෙ පුට්ඨා වියාකංසු සීලවන්තො උපාසකා, මාළං{1} මයං කත්තුකාමා එකත්ථම්භො න ලබ්භති.
690. “එකත්ථම්භං මමං දෙථ අහං දස්සාමි සත්ථුනො, ආහරිස්සාම’හං ථම්භං අප්පොස්සුක්කා භවන්තු වො.
691. තෙ මෙ ථම්භං පවෙච්ඡිංසු පසන්නා තුට්ඨමානසා, තතො පටිනිවත්තිත්වා අගමිංසු සකං ඝරං.
692. අචිරං ගතෙ පූග්ගණෙ ථම්භං අදාස’හං{2} තදා, හට්ඨො හට්ඨෙන චිත්තෙන පඨමං උස්සපෙස’හං
693. තෙන චිත්තප්පසාදෙන විමානං උපපජ්ජ’හං උබ්බිද්ධං භවනං මය්හං සතභූමං{3} සමුග්ගතං.
694. වජ්ජමානාසු භෙරීසු පරිචාරෙම’හං තදා, පඤ්චපඤ්ඤාසකප්පම්භි රාජා ආසිං යසොධරො.
695. තත්ථාපි භවනං මය්හං සතභූමං සමුග්ගතං, කූටාගාරවරූපෙතං එකත්ථම්භං මනොරමං.
696. එකවීසතිකප්පම්හි උදෙනො නාම ඛත්තියො, තත්රා’පි භවනං මය්හං සතභූමං සමුග්ගතං.
697. යං යං යොනු’පපජ්ජාමි දෙවත්තං අථ මානුසං, අනුභොමි සුඛං සබ්බං{4} එකත්ථම්භස්සි’දං ඵලං.
698. චතුනවුතෙ ඉතො කප්පෙ යං ථම්භමද්දිං තදා, දුග්ගතිං නාභිජානාමි එකත්ථම්භස්සි’දං ඵලං.
699. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා එකත්ථම්භිකො ථෙරො ඉමා ගාථායො අභාසිත්ථාති.
එකත්ථම්භිකත්ථෙරාපදානං දුතියං.
13. නන්දත්ථෙරාපදානං.{*}
700. පදුමුත්තරස්ස භගවතො ලොකජෙට්ඨස්ස තාදිනො, වත්ථං ඛොමං{5} මයා දින්නං සයම්භුස්ස මහෙසිනො.
701. තං මෙ බුද්ධො වියාකාසි ජලජුත්තරනාමකො,{6} ඉමිනා වත්ථදානෙන හෙමවණ්ණො භවිස්සසි.
702. ද්වෙ සම්පත්ති අනුභොත්වා කුසලමූලෙහි චොදිතො, ගොතමස්ස භගවතො කනිට්ඨො ත්වං භවිස්සසි.
703. රාගරත්තො සුඛසීලො කාමෙසු ගෙධමායුතො, බුද්ධෙන චොදිතො සන්තො තදා{1} ත්වං පබ්බජිස්සසි.
704. පබ්බජිත්වාන ත්වං තත්ථ කුසලමූලෙන චොදිතො, සබ්බාසවෙ පරිඤ්ඤාය නිබ්බායිස්සස’නාසවො.
705. සතකප්පසහස්සම්හි{2} චතුරො චෙලනාමකා, සට්ඨිකප්පසහස්සම්හි උපචෙලා චතුජ්ජනා.
706. පඤ්චකප්පසහස්සම්හි චෙලාව චතුරො ජනා, සත්තරතනසම්පන්නා චතුදීපම්හි ඉස්සරා.
707. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා නන්දො ථෙරො ඉමා ගාථායො අභාසිත්ථාති.
නන්දත්ථෙරස්සාපදානං තතියං.
14. චුල්ලපන්ථකත්ථෙරාපදානං.
708. පදුමුත්තරො නාම ජිනො ආහුතීනං පටිග්ගහො, ගණම්හා වූපකට්ඨො සො හිමවන්තෙ වසී තදා.
709. අහම්පි හිමවන්තම්භි වසාමි අස්සමෙ තදා, අචිරාගතං මහාවීරං උපෙසිං ලොකනායකං.
710. පුප්ඵච්ඡත්තං ගහෙත්වාන උපගච්ඡිං නරාසභං, සමාධිං සමාපජ්ජන්තං අන්තරායමකාස’හං{3}.
711. උභොහත්ථෙහි පග්ගය්හ පුප්ඵඡත්තං අදාස’හං, පටිග්ගහෙසි භගවා පදුමුත්තරො මහාමුනි.
712. සබ්බෙ දෙවා අත්තමනා හිමවන්තං උපෙන්ති{4} තෙ, සාධුකාරං පවත්තෙසුං{5} අනුමොදිස්සති චක්ඛුමා.
713. ඉදං වත්වාන තෙ දෙවා උපගච්ඡුං නරුත්තමං, ආකාසෙ ධාරයන්තං මෙ{1} පදුමච්ඡත්තමුත්තමං{2}.
714. සතපත්තඡත්තං{3} පග්ගය්හ{4} අදාසි තාපසො මමං, තම’හං කිත්තයිස්සාමි; සුණොථ මම භාසතො:
715. පඤ්චවීසති කප්පානි දෙවරජ්ජං කරිස්සති, චතුත්තිංසතික්ඛත්තුඤ්ච චක්කවත්තී භවිස්සති.
716. යං යං යොනිං සංසරති දෙවත්තං අථ මානුසං, අබ්භොකාසෙ පතිට්ඨන්තං පදුමං ධාරයිස්සති.
717. කප්පසතසහස්සම්හි ඔක්කාකකුලසම්භවො, ගොතමො නාම නාමෙන සත්ථා ලෙකෙ භවිස්සති.
718. පකාසිතෙ පාවචනෙ මනුස්සත්තං ලභිස්සති, මනොමයම්හි කායම්හි උත්තමො සො භවිස්සති.
719. ද්වෙ භාතරො භවිස්සන්ති උභොපි පත්ථකව්හයා, අනුභොත්වා උත්තමත්ථං ජොතයිස්සන්ති සාසනං.
720. සො’හං අට්ඨාරසවස්සො{5} පබ්බජිං අනගාරියං, විසෙසා’හං න වින්දාමි සක්යපුත්තස්ස සාසනෙ.
721. දන්ධා මය්හං ගතී ආසි පරිභූතො පුරෙ අහුං{6}, භාතා ච මං පනාමෙසි: ගච්ඡ දානි සකං ඝරං.
722. සො’හං පනාමිතො සන්තො සංඝාරාමස්ස කොට්ඨකෙ, දුම්මනො තත්ථ අට්ඨාසිං සාමඤ්ඤස්මිං{7} අපෙක්ඛවා.
723. භගවා තත්ථ{8} ආගඤ්ඡි සීසං මය්හං පරාමසි, බාහාය මං ගහෙත්වාන සංඝාරාමං පවෙසයී.
724. අනුකම්පාය මෙ සත්ථා අදාසි පාදපුඤ්ඡනිං, එවං සුද්ධං අධිට්ඨෙහි එකමන්තං ස්වධිට්ඨිතං.{9}
725. හත්ථෙහි තමහං ගය්හ සරිං කොකනදං අහං; තත්ථ චිත්තං විමුච්චි මෙ අරහත්තං අපාපුණිං.
726. මනොමයෙසු කායෙසු සබ්බත්ථ පාරමිඞ්ගතො, සබ්බාසවෙ පරිඤ්ඤාය විහරාමි අනාසවො.
727. පටිසම්භිදා -පෙ- කතං බුද්ධස්ස සාසනං
ඉත්ථං සුදං ආයස්මා චුල්ලපන්ථකො ථෙරො ඉමා ගාථායො අභාසිත්ථාති.
චුල්ලපන්ථකත්ථෙරස්සා’පදානං චතුත්ථං.
15. පිළින්දිවච්ඡත්ථෙරාපදානං
728. නිබ්බුතෙ ලොකනාථම්හි සුමෙධෙ අග්ගපුග්ගලෙ, පසන්නචිත්තො සුමනො ථූපපූජමකාස’හං
729. යෙ ච ඛීණාසවා තත්ථ ඡළභිඤ්ඤා මහිද්ධිකා, තෙ’හං තත්ථ සමානෙත්වා සංඝභත්තං අකාස’හං
730. සුමෙධස්ස භගවතො උපට්ඨාකො තදා අහු, සුමෙධො නාම නාමෙන අනුමොදිත්ථ සො තදා.
731. තෙන චිත්තප්පසාදෙන විමානං උපපජ්ජහං, ඡාළාසීතිසහස්සානි අච්ඡරායො රමිංසු මෙ.
732. මමෙව අනුවත්තන්ති සබ්බකාමෙහි තා සදා, අඤ්ඤෙ දෙවෙ අතිභොමි{1} පුඤ්ඤකම්මස්සි’දං ඵලං.
733. පඤ්චවීසතිකප්පම්හි වරුණො නාම ඛත්තියො, සුසුද්ධභොජනො{2} ආසිං චක්කවත්තී අහං තදා.
734. න තෙ බීජං පවපන්ති න පි නීයන්ති නඞ්ගලා, අකට්ඨපාකිමං සාලිං පරිභුඤ්ජන්ති මානුසා.
735. තත්ථ රජ්ජං කරිත්වාන දෙවත්තං පුන ගච්ඡ’හං, තදාපි එදිසා මය්හං නිබ්බත්තා භොගසම්පදා.
736. න මං මිත්තා අමිත්තා වා හිංසන්ති සබ්බපාණිනො, සබ්බෙසම්පි පියො හොමි පුඤ්ඤකම්මස්සි’දං ඵලං.
737. තිංසකප්පසහස්සම්භි යං දානමදදිං තදා, දුග්ගතිං නාභිජානාමි ගන්ධාලෙපස්සි’දං ඵලං.
738. ඉමස්මිං භද්දකෙ කප්පෙ එකො ආසිං{3} ජනාධිපො, මහානුභාවො රාජා’හං{4} චක්කවත්තී මහබ්බලො.
739. සො’හං පඤ්චසු සීලෙසු ඨපෙත්වා ජනතං බහුං, පාපෙත්වා සුගතිංයෙව දෙවතානං පියො අහුං.
740. පටිසම්භිදා -පෙ- කතං බුද්ධස්ස සාසනං,
ඉත්ථං සුදං ආයස්මා පිළින්දිවච්ඡො ථෙරො ඉමා ගාථායො අභාසිත්ථාති.
පිළින්දිවච්ඡත්ථෙරස්සාපදානං පඤ්චමං.
16. රාහුලත්ථෙරාපදානං
741. පදුමුත්තරස්ස භගවතො ලොකජෙට්ඨස්ස තාදිනො, සත්තභූම්මහි පාසාදෙ ආදාසං සන්ථරිං{1} අහං.
742. ඛීණාසවසහස්සෙහි පරිකිණ්ණො මහාමුනි, උපාගමී ගන්ධකුටිං දිපදින්දො නරාසභො.
743. විරොචෙන්තො{2} ගන්ධකුටිං දෙවදෙවො නරාසභො, භික්ඛුසංඝෙ ඨිතො සත්ථා ඉමා ගාථා අභාසථ.