අත්ථසන්දස්සකත්ථෙරස්ස අපදානං සත්තමං.
138. එකපසාදනියත්ථෙරාපදානං.
1923. නාරදො ඉති මෙ නාමං කෙසවො ඉති මං විදූ, කුසලාකුසලං එසං අගමං බුද්ධසන්තිකං.
1924. මෙත්තචිත්තො කාරුණිකො අත්ථදස්සී මහාමුනි, අස්සාසයන්තො සත්තෙ සො ධම්මං දෙසෙති චක්ඛුමා.
1925. සකං චිත්තං පසාදෙත්වා සිරෙ කත්වාන අඤ්ජලිං, සත්ථාරං අභිවාදෙත්වා පක්කාමිං පාචිනාමුඛො.
1926. සත්තරසෙ කප්පසතෙ රාජා ආසිං මහීපති, අමිත්තතාපනො නාම චක්කවත්තී මහබ්බලො.
1927. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා එකපසාදනියො ථෙරො ඉමා ගාථායො අභාසිත්ථාති.
එකපසාදනියත්ථෙරස්ස අපදානං අට්ඨමං.
139. සාලපුප්ඵදායකත්ථෙරාපදානං
1928. මිගරාජා තදා ආසිං අභිජාතො සුකෙසරී, ගිරිදුග්ගං ගවෙසන්තො අද්දසං ලොකනායකං.
1929. අයං නුඛො මහාවීරො නිබ්බාපෙති මහාජනං, යන්නූනාහං උපාසෙය්යං දෙවදෙවං නරාසභං.
1930. සාඛං සාලස්ස භඤ්ජිත්වා සකොසං{1} පුප්ඵමාහරිං, උපාගන්ත්වාන සම්බුද්ධං අදාසිං පුප්ඵමුත්තමං.
1931. එකනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි පුප්ඵදානස්සිදං ඵලං.
1932. ඉතො ච නවමෙ කප්පෙ විරොචන සනාමකා, තයො ආසිංසු රාජානො චක්කවත්තී මහබ්බලො.
1933. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සාලපුප්ඵදායකො ථෙරො ඉමා ගාථායො අභාසිත්ථාති.
සාලපුප්ඵදායකත්ථෙරස්ස අපදානං නවමං.
140. පියාලඵලදායකත්ථෙරාපදානං.
1934. පාරාධකො{2} තදා ආසිං පරපාණුපරොධකො{3}, පබ්භාරෙ සෙය්යං කප්පෙමි අවිදූරෙ සිඛිසත්ථුනො.
1935. සායං පාතඤ්ච පස්සාමි බුද්ධං ලොකග්ගනායකං, දෙය්යධම්මො ච මෙ නත්ථි දිපදින්දස්ස තාදිනො.
1936. පියාලඵලමාදාය අගමං බුද්ධසන්තිකං, පටිග්ගහෙසි භගවා ලොකජෙට්ඨො නරාසභො.
1937. තතො පරං උපාදාය පරිවාරං{4} විනායකං, තෙන චිත්තප්පසාදෙන තත්ථ කාලකතො අහං.
1938. එකතිංසෙ ඉතො කප්පෙ යං ඵලං අදදිං අහං, දුග්ගතිං නාභිජානාමි ඵලදානස්සිදං ඵලං.
1939. ඉතො පණ්ණරසෙ කප්පෙ තයො ආසුං පියාලිනො, සත්තරතනසම්පන්නා චක්කවත්තී මහබ්බලා.
1940. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා පියාලඵලදායකො ථෙරො ඉමා ගාථායො අභාසිත්ථාති.
පියාලඵලදායකත්ථෙරස්ස අපදානං දසමං.
සොභිතවග්ගො චුද්දසමො.
උද්දානං:
සොභිතො සුදස්සනො ච චන්දනො පුප්ඵඡදනො රහො චම්පකපුප්ඵී ච අත්ථසන්දස්සකෙන ච එකපසාදී{1} සාලදදො දසමො ඵලදායකො ගාථායො සත්තති ද්වෙ ච ගණිතායො විභාවිහි.
සොභිතවග්ගො චුද්දසමො.
15. ඡත්තවග්ගො
141. අතිඡත්තියත්ථෙරාපදානං
1941. පරිනිබ්බුතෙ භගවති අත්ථදස්සිනරුත්තමෙ, ඡත්තාතිඡත්තං{2} කාරෙත්වා ථූපම්භි අභිරොපයිං.
1942. කාලෙන කාලං ආගන්ත්වා නමස්සිං සත්ථු චෙතියං{3}, පුප්ඵච්ඡදනං කත්වාන ඡත්තම්හි අභිරොපයිං.
1943. සත්තරසෙ කප්පසතෙ දෙවරජ්ජං අකාරයිං, මනුස්සත්තං න ගච්ඡාමි ථූපපූජායි දං ඵලං.
1944. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා අතිඡත්තියො{4} ථෙරො ඉමා ගාථායො අභාසිත්ථාති.
අතිඡත්තියත්ථෙරස්ස අපදානං පඨමං.
142. ථම්භාරොපකත්ථෙරාපදානං.
1945. නිබ්බුතෙ ලොකනාථම්හි ධම්මදස්සිනරාසභෙ, ආරොපෙසිං ධජත්ථම්හං බුද්ධසෙට්ඨස්ස චෙතියෙ.
1946. නිස්සෙණිං මාපයිත්වාන ථූපසෙට්ඨං සමාරුහිං, ජාතිපුප්ඵං ගහෙත්වාන ථූපමහි අභිරොපයිං.
1947. අහො බුද්ධො ධම්මො අහො නො සත්ථූසම්පදා, දුග්ගතිං නාභිජානාමි ථූපපූජායි දං ඵලං.
1948. චතුනවුතෙ ඉතො කප්පෙ ථූපසිඛරනාමකා, සොළසාසිංසු රාජානො චක්කවත්තී මහබ්බලො.
1949. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා ථම්භාරොපකො ථෙරො ඉමා ගාථායො අභාසිත්ථාති.
ථම්භාරොපකත්ථෙරස්ස අපදානං දුතියං.
143. වෙදිකාරකත්ථෙරාපදානං
1950. නිබ්බුතෙ ලොකනාථම්හි පියදස්සී නරුත්තමෙ, පසන්නචිත්තො සුමනො මුත්තාවෙදිමකාසහං.
1951. මණීහි පරිවාරෙත්වා අකාසිං වෙදිමුත්තමං, වෙදිකාය මහං කත්වා තත්ථ කාලකතො අහං.
1952. යං යං යොනුපපජ්ජාමි දෙවත්තං අථ මානුසං, මණී ධාරෙන්ති ආකාසෙ පුඤ්ඤකම්මස්සිදං ඵලං.
1953. සොළසෙ ‘තො කප්පසතෙ මණිප්පභාසනාමකා, බත්තිංසාසිංසු රාජානො චක්කවත්තී මහබ්බලා.
1954. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා වෙදිකාරකො ථෙරො ඉමා ගාථායො අභාසිත්ථාති.
වෙදිකාරකත්ථෙරස්ස අපදානං තතියං.
144. සපරිවාරියත්ථෙරාපදානං.
1955. පදුමුත්තරො නාම ජිනො ලොකජෙට්ඨො නරාසභො, ජලිත්වා අග්ගික්ඛන්ධො’ව සම්බුද්ධො පරිනිබ්බුතො.
1956. නිබ්බුතෙ ච මහාවීරෙ ථූපො විත්ථාරිකො අහු, අහොරත්තං{1} උපට්ඨෙන්ති ධාතුගෙහෙ වරුත්තමෙ.
1957. පසන්නචිත්තො සුමනො අකං චන්දනවෙදිකං, දීයති ධූමක්ඛන්ධො ච{2} ථූපානුච්ඡවිකො තදා.
1958. භවෙ නිබ්බත්තමානම්හි දෙවත්තෙ අථ මානුසෙ, ඔමත්තං මෙ න පස්සාමි පුබ්බකම්මස්සිදං ඵලං
1959. පඤ්චදසෙ කප්පසතෙ ඉතො අට්ඨජනා අහු, සබ්බෙ සමත්තනාමා තෙ චක්කවත්තී මහබ්බලා.
1960. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සපරිවාරියො ථෙරො ඉමා ගාථායො අභාසිත්ථාති.
සපරිවාරියත්ථෙරස්ස අපදානං චතුත්ථං.
145. උම්මාපුප්ඵියථෙරාපදානං.
1961. නිබ්බුතෙ ලොකනාථම්භි{*} අහුතීනං පටිග්ගහෙ, සිද්ධත්ථම්හි භගවති මහාථූපමහො අහු.
1962. මහෙ පවත්තමානම්භි සිද්ධත්ථස්ස මහෙසිනො, උම්මාපුප්ඵං ගහෙත්වාන ථූපම්හි අභිරොපයිං.
1963. චතුනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි ථූපපූජායිදං ඵලං.
1964. ඉතො ච නවමෙ කප්පෙ සොමදෙවසනාමකා, පඤ්චාසීති ‘සු රාජානො චක්කවත්තී මහබ්බලා.
1965. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා උම්මාපුප්ඵියො ථෙරො ඉමා ගාථායො අභාසිත්ථාති.
උම්මාපුප්ඵියත්ථෙරස්ස අපදානං පඤ්චමං.
146. අනුලෙපදායකත්ථෙරාපදානං.
1966. අනොමදස්සීමුනිනො බොධිවෙදිමකාස’හං, සුධාය පිණ්ඩං දත්වාන පාතිකම්මමකාය හං{1}.
1967. දිස්වා තං සුකතං කම්මං අනොමදස්සී නරුත්තමො, භික්ඛුසංඝෙ ඨිතො සත්ථා ඉමා ගාථා අභාසථ:
1968. “ඉමිනා සුධාකම්මෙන චෙතනාපණිධීහි ච, සම්පත්තිං අනුභොත්වාන දුක්ඛස්සන්තං කරිස්සති.”
1969. පසන්න මුඛවණ්ණොම්හි එකග්ගො සුසමාහිතො, ධාරෙමි අන්තිමං දෙහං සම්මාසම්බුද්ධසාසනෙ.
1970. ඉතො කප්පසතෙ ආසිං පරිපුණ්ණෙ අනූනකෙ, රාජා සබ්බඝනො නාම චක්කවත්තී මහබ්බලො.
1971. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා අනුලෙපදායකො ථෙරො ඉමා ගාථායො අභාසිත්ථාති.
අනුලෙපදායකත්ථෙරස්ස අපදානං ඡට්ඨං.
147. මග්ගදායකත්ථෙරාපදානං
1972. උත්තරිත්වාන නදිකං වනං ගච්ඡති චක්ඛුමා, තමද්දසාසිං සම්බුද්ධං සිද්ධත්ථං වරලක්ඛණං.
1973. කුද්දාලපිටකමාදාය සමං කත්වාන තං පථං, සත්ථාරං අභිවාදෙත්වා සකං චිත්තං පසාදයිං.
1974. චතුනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි මග්ගදානස්සිදං ඵලං.
1975. සත්තපඤ්ඤාසකප්පම්හි එකො ආසිං ජනාධිපො, නාමෙන සුප්පබුද්ධොති නායකො සො නරිස්සරො.
1976. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා මග්ගදායකො ථෙරො ඉමා ගාථායො අභාසිත්ථාති.
මග්ගදායකත්ථෙරස්ස අපදානං සත්තමං.
148. ඵලකදායකත්ථෙරාපදානං.
1977. යානකාරො පුරෙ ආසිං දාරුකම්මෙ සුසික්ඛිතො, චන්දනං ඵලකං කත්වා අදාසිං ලොකබන්ධුනො.
1978. පභාසති ඉදං ව්යම්හං සුවණ්ණස්ස සුනිම්මිතං, හත්ථියානං අස්සයානං දිබ්බයානං උපට්ඨිතං.
1979. පාසාදා සිවිකා චෙව නිබ්බත්තන්ති යදිච්ඡකං, අක්ඛොභං රතනං මය්හං ඵලකස්ස ඉදං ඵලං.
1980. එකනවුතෙ ඉතො කප්පෙ ඵලකං යමහං දදිං, දුග්ගතිං නාභිජානාමි ඵලකස්ස ඉදං ඵලං.
1981. සත්තපඤ්ඤාසකප්පම්හි චතුරො නිම්මිතව්හයා, සත්තරතනසම්පන්නා චක්කවත්තී මහබ්බලා.
1982. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා ඵලකදායකො ථෙරො ඉමා ගාථායො අභාසිත්ථාති.
ඵලකදායකත්ථෙරස්ස අපදානං අට්ඨමං.
149. වටංසකියත්ථෙරාපදානං