සෙරය්යෙකත්ථෙරස්ස අපදානං පඨමං.
122. පුප්ඵථූපියත්ථෙරාපදානං.
1776. හිමවන්තස්සාවිදූරෙ කුක්කුටො{2} නාම පබ්බතො, වෙමජ්ඣෙ තස්ස වසති බ්රාහ්මණො මන්තපාරගූ.
1777. පඤ්ච සිස්සසහස්සානි පරිවාරෙන්ති මං සදා, පුබ්බුට්ඨායී ච තෙ ආසුං මන්තෙසු ච විසාරදා.
1778. බුද්ධො ලොකෙ සමුප්පන්නො තං විජානාථ නො භවං, අසීති ව්යඤ්ජනානස්ස බත්තිංස වරලක්ඛණා, බ්යාමප්පභො ජිනවරො ආදිච්චොව විරොචති.
1779. සිස්සානං වචනං සුත්වා බ්රාහ්මණො මන්තපාරගූ, අස්සමා අභිනික්ඛම්ම දිසං පුච්ඡති සිස්සකෙ.{3} යම්හි දෙසෙ මහාවීරො වසතී ලොකනායකො.
1780. තාහං දිසං නමස්සිස්සං{4} ජිනං අප්පටිපුග්ගලං, උදග්ගචිත්තො සුමනො පූජෙසිං{5} තං තථාගතං.
1781. එථ සිස්සා ගමිස්සාම දක්ඛිස්සාම තථාගතං, වන්දිත්වා සත්ථුනො පාදෙ සොස්සාම ජිනසාසනං.
1782. එකාහං අභිනික්ඛම්ම ව්යාධිං පටිලභිං අහං, ව්යාධිනා පීළිතො සන්තො සාලං වෙසයිතුං{6} ගමිං.
1783. සබ්බෙ සිස්සෙ සමානෙත්වා අපුච්ඡිං තෙ තථාගතං{7}, කීදිසං ලොකනාථස්ස ගුණං පරමබුද්ධිනො.
1784. තෙ මෙ පුට්ඨා ව්යාකරිංසු යථා දස්සාවිනො තථා, සක්කච්චං{1} බුද්ධසෙට්ඨං තං දස්සෙසුං මම සම්මුඛා.
1785. තෙසාහං වචනං සුත්වා සකං චිත්තං පසාදයිං, පුප්ඵෙහි ථූපං කත්වාන තත්ථ කාලකතො අහං.
1786. තෙ මෙ සරීරං ඣාපෙත්වා අගමුං{2} බුද්ධසන්තිකෙ, අඤ්ජලිං පග්ගහෙත්වාන සත්ථාරං අභිවාදයුං.
1787. පුප්ඵෙහි ථූපං කත්වාන සුගතස්ස මහෙසිනො, කප්පානං සතසහස්සං දුග්ගතිං නූපපජ්ජහං.
1788. චත්තාරීසසහස්සම්භි කප්පෙ සොළස ඛත්තියා, නාමෙන’ග්ගිසමා නාම චක්කවත්තී මහබ්බලා.
1789. වීසෙ කප්පසහස්සම්හි රාජානො චක්කවත්තිනො, ඝතාසනසනාමා ච අට්ඨතිංස මහීපති.
1790. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පුප්ඵථූපියො ථෙරො ඉමා ගාථායො අභාසිත්ථාති.
පුප්ඵථූපියත්ථෙරස්ස අපදානං දුතියං.
123. පායාසදායක{*}ත්ථෙරාපදානං.
1791. සුවණ්ණවණ්ණං සම්බුද්ධං{3} බත්තිංසවරලක්ඛණං,{4} පවනා අභිනික්ඛන්තං භික්ඛුසංඝපුරක්ඛතං.
1792. මහච්චා{5} කංසපාතියා වඩ්ඪෙත්වා පායාසං අහං, ආහුතිං යිට්ඨුකාමො සො උපනෙසිං{6} බලිං අහං.
1793. භගවා තම්හි සමයෙ ලොකජෙට්ඨො නරාසභො, චඞ්කමං සුසමාරූළ්හො අම්බරෙ අනිලායනෙ.
1794. තං ච අච්ඡරියං දිස්වා අබ්භුතං ලොමහංසනං, ඨපයිත්වා කංසපාතිං විපස්සිං අභිවාදයිං.
1795. තුවං දෙවො’සි සබ්බඤ්ඤූ සදෙවෙ සහමානුසෙ, අනුකම්පං උපාදාය පටිගණ්හ මහාමුනි.
1796. පටිග්ගහෙසි භගවා සබ්බඤ්ඤූ ලොකනායකො, මම සඞ්කප්පමඤ්ඤාය සත්ථා ලොකෙ මහාමුනි.
1797. එකනවුතෙ ඉතො කප්පෙ යං දානමදදිං තදා, දුග්ගතිං නාභිජානාමි පායාසස්ස ඉදං ඵලං.
1798. එකතාළීසිතො කප්පෙ බුද්ධො නාමාසි ඛත්තියො, සත්තරතනසම්පන්නො චක්කවත්තී මහබ්බලො.
1799. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පායාසදායකො ථෙරො ඉමා ගාථායො අභාසිත්ථාති.
පායාසදායකත්ථෙරස්ස අපදානං තතියං.
124. ගන්ධොදකියත්ථෙරාපදානං.
1800. නිසජ්ජ පාසාදවරෙ විපස්සිං අද්දසං ජිනං, කකුධං විලසන්තංව සබ්බඤ්ඤුං තමනාසකං{1}.
1801. පාසාදස්සාවිදූරෙ ච ගච්ඡති ලොකනායකො, පභා නිද්ධාවතෙ තස්ස යථා ච සතරංසිනො{2}.
1802. ගන්ධොදකඤ්ච පග්ගය්හ බුද්ධසෙට්ඨං සමොකිරිං, තෙන චිත්තප්පසාදෙන තත්ථ කාලකතො අහං.
1803. එකනවුතෙ ඉතො කප්පෙ යං ගන්ධොදකමාකිරිං{3}, දුග්ගතිං නාභිජානාමි බුද්ධපූජායිදං ඵලං.
1804. එකතිංසෙ ඉතො කප්පෙ සුගන්ධො නාම ඛත්තියො, සත්තරතනසම්පන්නො චක්කවත්තී මහබ්බලො.
1805. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ගන්ධොදකියො{*} ථෙරො ඉමා ගාථායො අභාසිත්ථාති.
ගන්ධොදකියත්ථෙරස්ස අපදානං චතුත්ථං.
125. සම්මුඛාත්ථවිකත්ථෙරාපදානං.
1806. ජායමානෙ විපස්සිම්හි නිමිත්තං ව්යාකරිං අහං, නිබ්බාපයඤ්ච ජනතං බුද්ධො ලොකෙ භවිස්සති.
1807. යස්මිඤ්ච ජායමානස්මිං දසසහස්සී පකම්පති, සො’දානි භගවා සත්ථා ධම්මං දෙසෙති චක්ඛුමා.
1808. යස්මිඤ්ච ජායමානස්මිං ආලොකො විපුලො අහූ, සො’දානි භගවා සත්ථා ධම්මං දෙසෙති චක්ඛුමා.
1809. යස්මිං ච ජායමානස්මිං සරිතායො න සන්දිසුං, සො’දානි භගවා සත්ථා ධම්මං දෙසෙති චක්ඛුමා.
1810. යස්මිං ච ජායමානස්මිං අවීචග්ගි න පජ්ජලි, සො’දානි භගවා සත්ථා ධම්මං දෙසෙති චක්ඛුමා.
1811. යස්මිං ච ජායමානස්මිං පක්ඛිසංඝො න සඤ්චරි, සො’දානි භගවා සත්ථා ධම්මං දෙසෙති චක්ඛුමා.
1812. යස්මිං ච ජායමානස්මිං වාතක්ඛන්ධො න වායති, සො’දානි භගවා සත්ථා ධම්මං දෙසෙති චක්ඛුමා.
1813. යස්මිං ච ජායමානස්මිං සබ්බරතනානි ජොතිසුං, සො’දානි භගවා සත්ථා ධම්මං දෙසෙති චක්ඛුමා.
1814. යස්මිං ච ජායමානස්මිං සත්තා’සුං{1} පදවික්කමා, සො’දානි භගවා සත්ථා ධම්මං දෙසෙති චක්ඛුමා.
1815. ජාතමත්තො ච සම්බුද්ධො දිසා සබ්බා විලොකයි, වාචාසභිමුදීරෙසි එසා බුද්ධාන ධම්මතා.
1816. සංවෙජයිත්වා ජනතං ථවිත්වා ලොකනායකං, සම්බුද්ධං අභිවාදෙත්වා පක්කාමිං පාචිනාමුඛො.
1817. එකනවුතෙ ඉතො{2} කප්පෙ යං බුද්ධමභිථොමයිං, දුග්ගතිං නාභිජානාමි ථොමනාය ඉදං ඵලං.
1818. ඉතො නවුතිකප්පම්භි සම්මුඛාථවිකව්හයො, සත්තරතනසම්පන්නො චක්කවත්තී මහබ්බලො.
1819. පඨවිදුන්දුභී{3} නාම එකූනනවුතිම්භි’තො, සත්තරතනසම්පන්නො චක්කවත්තී මහබ්බලො.
1820. අට්ඨාසීතිම්හි’තො කප්පෙ ඔභාසො නාම ඛත්තියො, සත්තරතනසම්පන්නො චක්කවත්තී මහබ්බලො.
1821. සත්තාසීතිම්හි’තො කප්පෙ සරිතච්ඡෙදනව්හයො, සත්තරතනසම්පන්නො චක්කවත්තී මහබ්බලො.
1822. අග්ගිනිබ්බාපනො නාම කප්පානං ඡළසීතියා, සත්තරතනසම්පන්නො චක්කවත්තී මහබ්බලො.
1823. ගතිපච්ඡෙදනො නාම කප්පානං පඤ්චසීතියා, සත්තරතනසම්පන්නො චක්කවත්තී මහබ්බලො.
1824. රාජා වාතසමො නාම කප්පානං චුල්ලසීතියා, සත්තරතනසම්පන්නො චක්කවත්තී මහබ්බලො.
1825. රතනපජ්ජලො නාම කප්පානං තෙඅසීතියා, සත්තරතනසම්පන්නො චක්කවත්තී මහබ්බලො.
1826. පදවික්කමනො නාම කප්පානං ද්වෙඅසීතියා, සත්තරතනසම්පන්නො චක්කවත්තී මහබ්බලො.
1827. රාජා විලොකනො නාම කප්පානං එකසීතියා, සත්තරතනසම්පන්නො චක්කවත්තී මහබ්බලො.
1828. ගිරිසාරො’ති නාමෙන කප්පෙ’සිතිම්භි ඛත්තියො, සත්තරතනසම්පන්නො චක්කවත්තී මහබ්බලො.
1829. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සම්මුඛාථවිකො ථෙරො ඉමා ගාථායො අභාසිත්ථාති.
සම්මුඛාථවිකත්ථෙරස්ස අපදානං පඤ්චමං.
126. කුසුමාසනියත්ථෙරාපදානං.
1830. නගරෙ ධඤ්ඤවතියා අහොසිං බ්රාහ්මණො තදා, ලක්ඛණෙ ඉතිහාසෙ ච සනිඝණ්ඩු සකෙටුභෙ.
1831. පදකො වෙය්යාකරණො{1} නිමිත්තෙ කොවිදො අහං, මන්නෙත ච සිස්සෙ වාචෙසිං තිණ්ණං වෙදාන පාරගූ.
1832. පඤ්ච උප්පලහත්ථානි පීඨියං{2} ඨපිතානි මෙ, ආහුතිං යිට්ඨුකාමො’හං පිතුමාතුසමාගමෙ.
1833. තදා විපස්සීභගවා භික්ඛුසඞ්ඝපුරක්ඛතො, ඔභාසෙන්තා දිසා සබ්බා ආගච්ඡති නරාසභො.
1834. ආසනං පඤ්ඤපෙත්වාන නිමන්තෙත්වා මහාමුනිං, සන්ථරිත්වාන තං පුප්ඵං අභිනෙසිං{3} සකං ඝරං.
1835. යං මෙ අත්ථි සකෙ ගෙහෙ ආමිසං පච්චුපට්ඨිතං, තාහං බුද්ධස්ස පාදාසිං පසන්නො සෙහි පාණිහි.
1836. භුත්තාවිං කාලමඤ්ඤාය පුප්ඵහත්ථං{4} අදාසහං, අනුමොදිත්වාන සබ්බඤ්ඤූ පක්කාමි උත්තරාමුඛො.
1837. එකනවුතෙ ඉතො{5} කප්පෙ යං පුප්ඵමදදිං තදා, දුග්ගතිං නාභිජානාමි පුප්ඵදානස්සි’දං ඵලං.
1838. අනන්තරා ඉතො කප්පෙ රාජා’හුං වරදස්සනො, සත්තරතනසම්පන්නො චක්කවත්තී මහබ්බලො.
1839. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා කුසුමාසනියො ථෙරො ඉමා ගාථායො අභාසිත්ථාති.
කුසුමාසනියත්ථෙරස්ස අපදානං ඡට්ඨං.
127. ඵලදායකත්ථෙරාපදානං.
1840. අජ්ඣායකො මන්තධරො තිණ්ණං වෙදාන පාරගූ, හිමවන්තස්සාවිදූරෙ වසාමි අස්සමෙ අහං.
1841. අග්ගිහුත්තඤ්ච මෙ අත්ථි පුණ්ඩරීකඵලානි ච, පුටකෙ නික්ඛිපිත්වාන දුමග්ගෙ ලග්ගිතං මයා.
1842. පදුමුත්තරො ලොකවිදූ ආහුතීනං පටිග්ගහො, මමුද්ධරිතුකාමො සො භික්ඛන්තො මං උපාගමි.
1843. පසන්නචිත්තො සුමනො ඵලං බුද්ධස්ස’දාසහං, විත්තිසඤ්ජනනො මය්හං දිට්ඨධම්මසුඛාවහො.
1844. සුවණ්ණවණ්ණො සම්බුද්ධො ආහුතීනං පටිග්ගහො, අන්තලික්ඛෙ ඨිතො සත්ථා ඉමං ගාථං අභාසථ:
1845. “ඉමිනා ඵලදානෙන චෙතනා පණිධීහි ච, කප්පානං සතසහස්සං දුග්ගති නූපගච්ඡති”{1}.
1846. තෙනෙව සුක්කමූලෙන අනුභොත්වාන සම්පදා, පත්තො’ම්භි අචලං ඨානං හිත්වා ජයපරාජයං.
1847. ඉතො සත්තසතෙ කප්පෙ{2} රාජා ආසිං සුමඞ්ගලො, සත්තරතනසම්පන්නො චක්කවත්තී මහබ්බලො.
1848. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා ඵලදායකො ථෙරො ඉමා ගාථායො අභාසිත්ථාති.
ඵලදායකත්ථෙරස්ස අපදානං සත්තමං.
128. ඤාණසඤ්ඤකත්ථෙරාපදානං.{*}
1849. පබ්බතෙ හිමවන්තම්හි වසාමි පබ්බතන්තරෙ, පුලිනං සොභනං දිස්වා බුද්ධසෙට්ඨං අනුස්සරිං.
1850. “ඤාණෙ උපනිධා{3} නත්ථි සඞ්ගාමං{4} නත්ථි සත්ථුනො, සබ්බං ධම්මං අභිඤ්ඤාය ඤාණෙන අධිමුච්චති.
1851. නමො තෙ පුරිසාජඤ්ඤ නමො තෙ පුරිසුත්තම, ඤාණෙන තෙ සමො නත්ථි යාවතා ඤාණමුත්තමං”{5}.
1852. ඤාණෙ චිත්තං පසාදෙත්වා කප්පං සග්ගම්හි මොදහං, අවසෙසෙසු කප්පෙසු කුසලං කරිතං{6} මයා.
1853. එකනවුතෙ ඉතො{7} කප්පෙ යං සඤ්ඤමලභිං තදා, දුග්ගතිං නාභිජානාමි ඤාණසඤ්ඤායිදං ඵලං.
1854. ඉතො තෙසත්තතිකප්පෙ{1} එකො පුලිනපුප්ඵියො, සත්තරතනසම්පන්නො චක්කවත්තී මහබ්බලො.
1855. පටිසම්භිදා -පෙ- කතං බුද්ධස්ස සාසනං.