1575. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සූචිදායකො ථෙරො ඉමා ගාථායො අභාසිත්ථාති.
සූචිදායකත්ථෙරස්ස අපදානං චතුත්ථං.
95. ගන්ධමාලියත්ථෙරාපදානං
1576. සිද්ධත්ථස්ස භගවතො ගන්ධථූපං අකාසහං, සුමනෙහි පටිච්ඡන්නං බුද්ධානුච්ඡවිකං කතං{3}.
1577. කඤ්චකනග්ඝියසඞ්කාසං බුද්ධං ලොකග්ගනායකං, ඉන්දීවරං’ව ජලිතං ආදිත්තං’ව හුතාසනං.
1578. ව්යග්ඝූසභං’ව පවරං අභිජාතං’ව කෙසරිං, නිසින්නං සමණානග්ගං භික්ඛුසංඝපුරක්ඛතං, වන්දිත්වා සත්ථුනො පාදෙ පක්කාමිං උත්තරාමුඛො.
1579. චතුනවුතෙ ඉතො කප්පෙ ගන්ධමාලං යතො අදං, බුද්ධෙ කතස්ස කාරස්ස ඵලෙනාහං විසෙසතො, දුග්ගතිං නාභිජානාමි බුද්ධපූජායිදං ඵලං.
1580. චත්තාරීසම්භි එකූනෙ කප්පෙ ආසිංසු සොළස, දෙවගන්ධසනාමා තෙ රාජානො චක්කවත්තිනො.
1581. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා ගන්ධමාලියො ථෙරො ඉමා ගාථායො අභාසිත්ථාති.
ගන්ධමාලියත්ථෙරස්ස අපදානං පඤ්චමං.
96. තිපුප්ඵියත්ථෙරාපදානං.
1582. මිගලුද්දො පුරෙ ආසිං අරඤ්ඤෙ කානනෙ අහං, පාටලිං හරිතං දිස්වා තීණි පුප්ඵානි ඔකිරිං.
1583. සන්න{1} පත්තානි ගණ්හිත්වා බහි ඡඩ්ඪෙසහං තදා, අන්තොසුද්ධං බහිසුද්ධං සුවිමුත්තං අනාසවං.
1584. සම්මුඛා විය සම්බුද්ධං විපස්සිං ලොකනායකං, පාටලිං අභිවාදෙත්වා තත්ථ කාලකතො අහං.
1585. එකනවුතෙ ඉතො කප්පෙ යං බොධිමභිපූජයිං, දුග්ගතිං නාභිජානාමි බොධිපූජායිදං ඵලං.
1586. සමන්තපාසාදිකා නාම තෙරසා’සිංසු රාජිනො, ඉතො තෙත්තිංසකප්පම්හි චක්කවත්තී මහබ්බලා.
1587. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා තිපුප්ඵියො ථෙරො ඉමා ගාථායො අභාසිත්ථාති.
තිපුප්ඵියත්ථෙරස්ස අපදානං ඡට්ඨං.
97. මධුපිණ්ඩිකත්ථෙරාපදානං.
1588. විපිනෙ{2} කානනෙ දිස්වා අප්පසද්දෙ නිරාකුලෙ, සිද්ධත්ථං ඉසිනං සෙට්ඨං ආහුතීනං පටිග්ගහං.
1589. නිබ්බුතත්තං{3} මහානාගං නිසභාජානියං යථා, ඔසධිං’ව විරොචන්තං දෙවසඞ්ඝනමස්සිතං, විත්ති මෙ පහුතා ආසි{4} ඤාණං උප්පජ්ජි තාවදෙ.
1590. වුට්ඨිතස්ස සමාධිම්හා මධුං දත්වාන සත්ථුනො, වන්දිත්වා සත්ථුනො පාදෙ පක්කාමිං පාචිනාමුඛො.
1591. චතුත්තිංසම්හි කප්පම්හි රාජා ආසිං සුදස්සනො, මධු භිසෙහි සවති භොජනම්හි ච තාවදෙ, මධුවස්සං පවස්සිත්ථ පුබ්බකම්මස්සිදං ඵලං.
1592. චතුනවුතෙ ඉතො කප්පෙ යං මධුං අදදිං තදා, දුග්ගතිං නාභිජානාමි මධුදානස්සිදං ඵලං.
1593. චතුත්තිංසෙ ඉතො කප්පෙ චත්තාරො තෙ සුදස්සනා, සත්තරතනම්පන්නා චක්කවත්තී මහබ්බලා.
1594. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා මධුපිණ්ඩිකො ථෙරො ඉමා ගාථායො අභාසිත්ථාති.
මධුපිණ්ඩිකත්ථෙරස්ස අපදානං සත්තමං.
98. සෙනාසනදායකත්ථෙරාපදං.
1595. සිද්ධත්ථස්ස භගවතො අදාසිං පණ්ණසන්ථරං, සමන්තා උපහාරං{1} ච කුසුමං ඔකිරිං අහං.
1596. පාසාදෙ’වං ගුණං{2} රම්මං{3} අනුභොමි මහාරහං{4}, මහග්ඝානි ච පුප්ඵානි සයනෙ‘භිසවන්ති{5} මෙ.
1597. සයනෙ’හං තුවට්ටාමි විචිත්තෙ පුප්ඵසන්ථතෙ, පුප්ඵවුට්ඨි ච සයනෙ අභිවස්සති තාවදෙ.
1598. චතුනවුතෙ ඉතො කප්පෙ අදාසිං පණ්ණසන්ථරං, දුග්ගතිං නාභිජානාමි සන්ථරස්ස ඉදං ඵලං.
1599. තිණසන්ථරකා නාම සත්තෙ‘තෙ චකක්වත්තිනො, ඉතො තෙ පඤ්චමෙ කප්පෙ උප්පජ්ජිංසු ජනාධිපා.
1600. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සෙනාසනදායකො ථෙරො ඉමා ගාථායො අභාසිත්ථාති.
සෙනාසනදායකත්ථෙරස්ස අපදානං අට්ඨමං.
99. වෙය්යාවච්චකත්ථෙරාපදානං.
1601. විපස්සිස්ස භගවතො මහාභූරිගණො{6} අහු, වෙය්යාවච්චකරො ආසිං සබ්බකිච්චෙසු ව්යාවටො.
1602. දෙය්යධම්මො ච මෙ නත්ථි සුගතස්ස මහෙසිනො, අවන්දිං සත්ථුනො පාදෙ විප්පසන්නෙන චෙතසා.
1603. එකනවුතෙ ඉතො කප්පෙ වෙය්යාවච්චං අකාසහං, දුග්ගතිං නාභිජානාමි වෙය්යාවච්චස්සිදං ඵලං.
1604. ඉතො ච අට්ඨමෙ කප්පෙ රාජා ආසිං සුචින්තිතො, සත්තරතනසම්පන්නො චක්කවත්තී මහබ්බලො.
1605. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා වෙය්යාවච්චකො ථෙරො ඉමා ගාථායො අභාසිත්ථාති.
වෙය්යාවච්චකත්ථෙරස්ස{*} අපදානං නවමං.
100. බුද්ධුපට්ඨාකත්ථෙරාපදානං.
1606. විපස්සිනො භගවතො අහොසිං සංඛධම්මකො, නිච්චූපට්ඨානයුත්තොම්හි සුගතස්ස මහෙසිනො.
1607. උපට්ඨානඵලං පස්ස ලොකනාථස්ස තාදිනො, සට්ඨි තුරියසහස්සානි පරිවාරෙන්ති මං සදා.
1608. එකනවුතෙ ඉතො කප්පෙ උපට්ඨහිං මහාඉසිං, දුග්ගතිං නාභිජානාමි උපට්ඨානස්සිදං ඵලං.
1609. චතුවීසෙ{1} ඉතො කප්පෙ මහානිග්ඝොසනාමකා, සොළසාසිංසු රාජානො චක්කවත්තී මහබ්බලා.
1610. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා බුද්ධුපට්ඨාකො ථෙරො ඉමා ගාථායො අභාසිත්ථාති.
බුද්ධපට්ඨාකත්ථෙරස්ස අපදානං දසමං.
උද්දානං:
සුධාසුචින්ති චෙලඤ්ච සූචි ච ගන්ධමාලියො, තිපුප්ඵියො මධූ සෙනා - වෙය්යාවච්චො චුපට්ඨකො{2}, සමසට්ඨි ච ගාථායො අස්මිං වග්ගෙ පකිත්තිතා.
සුධාපිණ්ඩියවග්ගො දසමො.
අථ වග්ගුද්දානං:
බුද්ධවග්ගො හි පඨමො සීහාසන සුභූති ච, කුණ්ඩධානො උපාලි ච වීජනී සකචින්ති ච, නාගසමාලො තිමිරො සුධාවග්ගෙන තෙ දස, චතුද්දසසතං ගාථා පඤ්චපඤ්ඤාසමෙව ච.
බුද්ධවග්ගදසකං.
පඨමසතකං සමත්තං
11. භික්ඛාදායීවග්ගො
101. භික්ඛාදායකත්ථෙරාපදානං.
1611. සුවණ්ණවණ්ණං සම්බුද්ධං ආහුතීනං පටිග්ගහං, පවනා අභිනික්ඛන්තං වනා නිබ්බනමාගතං.
1612. කටච්ඡුභික්ඛං පාදාසිං සිද්ධත්ථස්ස මහෙසිනො, පඤ්ඤස්ස{3} උපසන්තස්ස මහ වීරස්ස තාදිනො.
1613. පදෙනානුපදං යන්තං{4} නිබ්බාපෙන්තෙ{5} මහාජනං, උළාරා විත්ති මෙ ජාතා බුද්ධෙ ආදිච්චබන්ධුනි{6}.
1614. චතුනවුතෙ ඉතො කප්පෙ යං දානමදදිං තදා, දුග්ගතිං නාභිජානාමි භික්ඛාදානස්සිදං ඵලං.
1615. සත්තාසීතිම්හි’තො කප්පෙ මහාරෙණුසනාමකා, සත්තරතනසම්පන්නා සත්තෙ’ව චක්කවත්තිනො.
1616. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා භික්ඛාදායකො ථෙරො ඉමා ගාථායො අභාසිත්ථාති.
භික්ඛාදායකත්ථෙරස්ස අපදානං පඨමං.
102. ඤාණසඤ්ඤකත්ථෙරාපදානං.
1617. සුවණ්ණවණ්ණං සම්බුද්ධං නිසභාජානියං යථා, තිධා පභින්නමාතඞ්ගං කුඤ්ජරං’ව මහෙසිනං.
1618. ඔභාසන්තං දිසා සබ්බා උළුරාජං’ව පූරිතං, රථියං පටිපජ්ජන්තං ලොකජෙට්ඨං අපස්සිසං.{1}
1619. ඤාණෙ චිත්තං පසාදෙත්වා පග්ගහෙත්වාන අඤ්ජලිං, පසන්නචිත්තො සුමනො සිද්ධත්ථං අභිවාදයිං.
1620. චතුනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි ඤාණසඤ්ඤායිදං ඵලං.
1621. තෙසත්තතිම්හි’තො කප්පෙ සොළසා’සුං නරුත්තමා, සත්තරතනසම්පන්නා චක්කවත්තී මහබ්බලා.
1622. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා ඤාණසඤ්ඤකො ථෙරො ඉමා ගාථායො අභාසිත්ථාති.
ඤාණසඤ්ඤකත්ථෙරස්ස අපදානං දුතියං.
103. උප්පලහත්ථියත්ථෙරාපදානං
1623. තිවරායං නිවාසී’හං අහොසිං මාලිකො තදා, අද්දසං විරජං බුද්ධං සිද්ධත්ථං ලොකනායකං.
1624. පසන්නචිත්තො සුමනො පුප්ඵහත්ථමදාසහං, යත්ථ යත්ථුපපජ්ජාමි තස්ස කම්මස්ස වාහසා.
1625. අනුභොමි ඵලං ඉට්ඨං පුබ්බෙ සුකතමත්තනො, පරික්ඛිත්තො සුමල්ලෙහි පුප්ඵදානස්සිදං{2} ඵලං.
1626. චතුනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
1627. චතුනවුතුපාදාය ඨපෙත්වා වත්තමානකං, පඤ්චරාජසතා තත්ථ නජ්ජූපම{3} සනාමකා.
1628. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා උප්පලහත්ථියො ථෙරො ඉමා ගාථායො අභාසිත්ථාති.
උප්පලහත්ථියත්ථෙරස්ස අපදානං තතියං.
104. පදපූජකත්ථෙරාපදානං
1629. සිද්ධත්ථස්ස භගවතො ජාතිපුප්ඵමදාසහං, පාදෙසු සත්තපුප්ඵානි හාසෙනොකිරිතානි{1} මෙ.
1630. තෙන කම්මෙන’හං අජ්ජ අතිභොමි නරාමරෙ, ධාරෙමි අන්තිමං දෙහං සම්මාසම්බුද්ධසාසනෙ.
1631. චතුනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි පුප්ඵපූජායිදං ඵලං.
1632. සමන්තගන්ධනාමාසුං තෙරස චක්කවත්තිනො, ඉතො පඤ්චමකෙ කප්පෙ චාතුරන්තා ජනාධිපා.{2}
1633. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා පදපූජකො ථෙරො ඉමා ගාථායො අභාසිත්ථාති.
පදපූජකත්ථෙරස්ස අපදානං චතුත්ථං.
105. මුට්ඨිපුප්ඵියත්ථෙරාපදානං.