1230. ධම්මරාජං උපාගම්ම{3} ආපුච්ඡිං පඤ්හමුත්තමං, කථයන්තො ච මෙ පඤ්හං ධම්මසොතං උපානයී.
1231. තස්සාහං ධම්මමඤ්ඤාය විහාසිං සාසනෙ රතො, සබ්බාසවෙ පරිඤ්ඤාය විහරාමි අනාසවො.
1232. සතසහස්සෙ ඉතො කප්පෙ ජලජුත්තරනායකො, නිබ්බායි අනුපාදානො දීපො’ව තෙලසඞ්ඛයා.
1233. සත්තයොජනිකං ආසි ථූපඤ්ච රතනාමයං, ධජං තත්ථ අපූජෙසිං සබ්බභද්දං මනොරමං.
1234. කස්සපස්ස ච බුද්ධස්ස තිස්සො නාමග්ගසාවකො, පුත්තො මෙ ඔරසො ආසි දායාදො ජිනසාසනෙ.
1235. තස්ස හීනෙන මනසා වාචං භාසිං අභද්දකං, තෙන කම්මවිපාකෙන පච්ඡිමෙ අද්දසං ජිනං{4}.
1236. උපවත්තනෙ සාලවනෙ පච්ඡිමෙ සයනෙ මුනි, පබ්බාජෙසි මහාවීරො හිතො කාරුණිකො ජිනො.
1237. අජ්ජෙව’දානි පබ්බජා අජ්ජෙව උපසම්පදා, අජ්ජෙව පරිනිබ්බාණං සම්මුඛා දිපදුත්තමෙ.
1238. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සුභද්දො ථෙරො ඉමා ගාථායො අභාසිත්ථාති.
සුභද්දත්ථෙරස්ස අපදානං නවමං.
50. චුන්දත්ථෙරාපදානං
1239. සිද්ධත්ථස්ස භගවතො ලොකජෙට්ඨස්ස තාදිනො, අග්ඝියං කාරයිත්වාන ජාතිපුප්ඵෙහි ඡාදයිං.
1240. නිට්ඨාපෙත්වාන තං පුප්ඵං බුද්ධස්ස උපනාමයිං, පුප්ඵාවසෙසං පග්ගය්හ බුද්ධස්ස අභිරොපයිං.
1241. කඤ්චනග්ඝියසඞ්කාසං බුද්ධං ලොකග්ගනායකං, පසන්නචිත්තො සුමනො පුප්ඵග්ඝියමුපානයිං.
1242. විතිණ්ණකඞ්ඛො සම්බුද්ධො තිණ්ණොඝෙහි පුරක්ඛතො, භික්ඛුසංඝෙ නිසීදිත්වා ඉමා ගාථා අභාසථ:
1243. “දිබ්බගන්ධං පවායන්තං යො මෙ පුප්ඵග්ඝියං අදා, තමහං කිත්තයිස්සාමි සුණාථ මම භාසතො.
1244. ඉතො චුතො අයං පොසො දෙවසංඝපුරක්ඛතො, ජාතිපුප්ඵෙහි පරිකිණ්ණො දෙවලොකං ගමිස්සති.
1245. උබ්බිද්ධං භවනං තස්ස සොවණ්ණඤ්ච මණිමයං, ව්යම්හං පාතුභවිස්සති පුඤ්ඤකම්මප්පභාවිතං.
1246. චතුසත්තතික්ඛත්තුං සො දෙවරජ්ජං කරිස්සති, අනුභොස්සති සම්පත්තිං අච්ඡරාහි පුරක්ඛතො.
1247. පථව්යා රජ්ජං තිසතං වසුධං ආවසිස්සති, පඤ්චසත්තතික්ඛත්තුඤ්ච චක්කවත්තී භවිස්සති.
1248. දුජ්ජයො නාම නාමෙන හෙස්සති මනුජාධිපො, අනුභොත්වාන තං පුඤ්ඤං සකකම්මං අපස්සිතො.
1249. විනිපාතං අගන්ත්වාන{1} මනුස්සත්තං ගමිස්සති, හිරඤ්ඤස්ස ච නිචිතං කොටිසතමනප්පකං.
1250. නිබ්බත්තිස්සති යොනිම්හි{2} බ්රාහ්මණෙ{3} සො භවිස්සති, වඞ්ගත්තස්ස සුතො ධීමා සාරියා ඔරසො පියො.
1251. සො ච පච්ඡා පබ්බජිත්වා අඞ්ගීරසස්ස සාසනෙ, චූලවුන්දො’ති නාමෙන හෙස්සති සත්ථු සාවකො.
1252. සාමණෙරො’ව සො සන්තො ඛීණාසවො භවිස්සති, සබ්බාසවෙ පරිඤ්ඤාය නිබ්බායිස්සතනාසවො”.
1253. උපට්ඨහිං මහාවීරං අඤ්ඤෙ ච පෙසලෙ බහූ, භාතරං චෙ චුපට්ඨාසිං උත්තමත්ථස්ස පත්තියා.
1254. භාතරං මෙ උපට්ඨිත්වා ධාතූ පත්තම්හි ඔපිය, සම්බුද්ධං උපනාමෙසිං ලොකජෙට්ඨං නරාසභං.
1255. උභො හත්ථෙහි පග්ගය්හ බුද්ධො ලොකෙ සදෙවකෙ, සංදස්සයන්තො තං ධාතුං කිත්තයී අග්ගසාවකං.
1256. චිත්තං ච සුවිමුත්තං මෙ සද්ධා මය්හං පතිට්ඨිතා, සබ්බාසවෙ පරිඤ්ඤාය විහරාමි අනාසවො.
1257 පටිසම්භිදා අනුප්පත්තා විමොක්ඛාපි ච ඵස්සිතා, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා චුන්දො ථෙරො ඉමා ගාථායො අභාසිත්ථාති.
චුන්දත්ථෙරස්ස අපදානං දසමං.
උද්දානං:
උපාලි සොණො භද්දියො සන්තිට්ඨාපක{1}හත්ථියො, ඡදනං සෙය්යචඞ්කමං සුභද්දො චුන්දසව්හයො, ගාථා සතං ච තාළීසං චතස්සො ච තදුත්තරි.
උපාලිවග්ගො පඤ්චමො.
6. වීජනීවග්ගො
51. විධූපනදායකත්ථෙරාපදානං
1258. පදුමුත්තරබුද්ධස්ස ලොකජෙට්ඨස්ස තාදිනො, වීජනිකා{2} මයා දින්නා දිපදින්දස්ස තාදිනො.
1259. සකං චිත්තං පසාදෙත්වා පග්ගහෙත්වාන අඤ්ජලිං, සම්බුද්ධං අභිවාදෙත්වා පක්කාමිං උත්තරාමුඛො.
1260. වීජනිං පග්ගහෙත්වාන සත්ථා ලොකෙ අනුත්තරො,{3} භික්ඛුසංඝෙ ඨිතො සන්තො ඉමං ගාථං අභාසථ:
1261. “ඉමිනා වීජනිදානෙන චිත්තස්ස පණිධීහි ච, කප්පානං සතසහස්සං විනිපාතං න ගච්ඡති”.
1262. ආරද්ධවිරියො පහිතත්තො චෙතොගුණසමාහිතො, ජාතියා සත්තවස්සො’හං අරහත්තමපාපුණිං.
1263. සට්ඨිකප්පසහස්සම්හි වීජමානසනාමකා{4}, සොළසා’සිංසු රාජානො චක්කවත්තී මහබ්බලා.
1264. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා විධූපනදායකො ථෙරො ඉමා ගාථායො අභාසිත්ථාති.
විධුපනදායකත්ථෙරස්ස අපදානං පඨමං.
52. සතරංසිකත්ථෙරාපදානං
1265. උච්චියං{1} සෙලමාරුය්හ නිසීදි පුරිසුත්තමො, පබ්බතස්සාවිදූරම්හි බ්රාහ්මණො මන්තපාරගූ.
1266. උපවිට්ඨං මහාවීරං දෙවදෙවං නරාසභං, අඤ්ජලිම්පග්ගහෙත්වාන සන්ථවිං ලොකනායකං:
1267. “එස බුද්ධො මහාවීරො වරධම්මප්පකාසකො, ජලතී අග්ගිඛන්ධො’ව භික්ඛුසංඝපුරක්ඛතො.
1268. මහාසමුද්දො ‘වක්ඛොභො අණ්ණවො ‘ව දුරුත්තරො, මිගරාජා’වසම්භීතො ධම්මං දෙසෙති චක්ඛුමා”.
1269. මම සඞ්කප්පමඤ්ඤාය පදුමුත්තරනායකො, භික්ඛුසංඝෙ ඨිතො සත්ථා ඉමා ගාථා අභාසථ:
1270. “යෙනායං අඤ්ජලි දින්නො බුද්ධාසෙට්ඨො ච ථොමිතො, තිංසකප්පසහස්සානි දෙවරජ්ජං කරිස්සති.
1271. කප්පසතසහස්සම්හි අංගීරසසනාමකො, විවත්තච්ඡද්දො{2} සම්බුද්ධො උප්පජ්ජිස්සති තාවදෙ.
1272. තස්ස ධම්මෙසු දායාදො ඔරසො ධම්මනිම්මිතො, . සතරංසීති නාමෙන අරහා සො භවිස්සති.”
1273. ජාතියා සත්තවස්සො’හං පබ්බජිං අනගාරියං, සතරංසී’ම්හි නාමෙන පභා නිද්ධාවතෙ මම.
1274. මණ්ඩපෙ රුක්ඛමූලෙ වා ඣායී ඣානරතො අහං, ධාරෙමි අන්තිමං දෙහං සම්මාසම්බුද්ධසාසනෙ.
1275. සට්ඨිකප්පසහස්සම්හි චතුරො රාම{3}නාමකා, සත්තරතනසම්පන්නා වක්කවත්තී මහබ්බලා.
1276. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සතරංසියො{4} ථෙරො ඉමා ගාථායො අභාසිත්ථාති.
සතරංසිකත්ථෙරස්ස අපදානං දුතියං.
53. සයනදායකත්ථෙරාපදානං
1277. පදුමුත්තරබුද්ධස්ස සබ්බලොකානුකම්පිනො, සයනං තස්ස පාදාසිං විප්පසන්නෙන චෙතසා.
1278. තෙන සයනදානෙන සුඛෙත්තෙ බීජසම්පදා, භොගා නිබ්බත්තරෙ{5} තස්ස සයනස්ස ඉදං ඵලං.
1279. ආකාසෙ සෙය්යං කප්පෙමි ධාරෙමි පඨවිං ඉමං, පාණෙසු මෙ ඉස්සරියං සයනස්ස ඉදං ඵලං.
1280. පඤ්චකප්පසහස්සම්හි අට්ඨ ආසුං මහාවරා,{1} චතුත්තිංසෙ කප්පසතෙ චතුරො ච මහබ්බලා.
1281 පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා සයනදායකො ථෙරො ඉමා ගාථායො අභාසිත්ථාති.
සයනදායකත්ථෙරස්ස අපදානං තතියං.
54. ගන්ධොදකියත්ථෙරාපදානං
1282. පදුමුත්තරබුද්ධස්ස මහාබොධිමහො අහු, විචිත්තං ඝටමාදාය ගන්ධොදකමදාසහං.
1283. නහාපනකාලෙ බොධියා{2} මහාමෙඝො පවස්සථ, නින්නාදො ච මහා ආසි{3} අසනියා ඵලන්තියා.
1284. තෙනෙවාසනිවෙගෙන තථෙ කාලකතො අහුං,{4} දෙවලොකෙ ඨිතො සන්තො ඉමං ගාථං අභාසහං.
1285. “අහො බුද්ධො! අහො ධම්මො! අහො නො සත්ථූසම්පදා! කලෙබරං මෙ පතිතං දෙවලොකෙ රමාමහං.”
1286. උබ්බිද්ධං භවනං මය්හං සතභූමං සමුග්ගතං, කඤ්ඤාසතසස්සානි පරිවාරෙන්ති මං සදා.
1287. ආබාධා මෙ න විජ්ජන්ති සොකො මය්හං න විජ්ජති, පරිළාහං න පස්සාමි පුඤ්ඤකම්මස්සිදං ඵලං.
1288. අට්ඨවීසෙ කප්පසතෙ රාජා සංවසිතො අහුං, සත්තරතනසම්පන්නො චක්කවත්තී මහබ්බලො.
1289 පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා ගන්ධොදකියො ථෙරො ඉමා ගාථායො අභාසිත්ථාති.
ගන්ධොදකියත්ථෙරස්ස අපදානං චතුත්ථං.
55. ඔපවය්හ{5} ත්ථෙරාපදානං
1290. පදුමුත්තරබුද්ධස්ස ආජානීයමදාසහං, නිය්යාදෙත්වාන සම්බුද්ධෙ{6} අගමාසිං සකං ඝරං.
1291. දෙවලො නාම නාමෙන සත්ථුනො අග්ගසාවකො, වරධම්මස්ස දායාදො ආගච්ඡි මම සන්තිකං.
1292. “සපත්තභාරො භගවා ආජානෙය්යො න කප්පති, තව සඞ්කප්පමඤ්ඤාය අධිවාසෙසි චක්ඛුමා.”
1293. අග්ඝාපෙත්වා වාතජවං සින්ධවං සීඝවාහනං, පදුමුත්තරබුද්ධස්ස ඛමනීයමදාසහං.
1294. යං යං යොනුපපජ්ජාමි දෙවත්තං අථ මානුසං,{1} ඛමනීයා වාතජවා{2} චිත්තා{3} නිබ්බත්තරෙ{4} මම.
1295. ලාභා තෙසං සුලද්ධං’ව යෙ ලභන්තුපසම්පදං, පුනපි පයිරුපාසෙය්යං බුද්ධො ලොකෙ සචෙ භවෙ.
1296. අට්ඨවීසතික්ඛත්තුං’හං රාජා ආසිං මහබ්බලො, චාතුරන්තො විජිතාවී ජම්බුසණ්ඩස්ස{5} ඉස්සරො.
1297. ඉදං පච්ඡිමකං මය්හං චරිමො වත්තතෙ භවො, පත්තො’ස්මි අචලං ඨානං හිත්වා ජයපරාජයං.
1298. චතුත්තිංසසහස්සම්හි මහාතෙජො’සි ඛත්තියො, සත්තරතනසම්පන්නො චක්කවත්තී මහබ්බලො.
1299. පටිසම්භිදා -පෙ- කතං බුද්ධස්ස සාසනං.
ඉත්ථං සුදං ආයස්මා ඔපවය්හො ථෙරො ඉමා ගාථායො අභාසිත්ථාති.
ඔපවය්හත්ථෙරස්ස අපදානං පඤ්චමං.
56. සපරිවාරාසනත්ථෙරාපදානං
1300. පදුමුත්තරබුද්ධස්ස පිණ්ඩපාතං අදාසහං, ගන්ත්වා තං භොජනට්ඨානං{6} මල්ලිකාහි පරික්ඛිපිං{7}.
1301. තම්හාසනම්භි ආසීනො බුද්ධො ලොකග්ගනායකො, අකිත්තයී පිණ්ඩපාතං උජුභූතො සමාහිතො:
1302. “යථාපි භද්දකෙ ඛෙත්තෙ බීජං අප්පම්පි රොපිතං, සම්මා ධාරං පවෙච්ඡන්තෙ ඵලං තොසෙති කස්සකං.
1303. තථෙවායං පිණ්ඩපාතො සුඛෙත්තෙ රොපිතො තයා, භවෙ නිබ්බත්තමානං හි{8} ඵලතො තොසයිස්සති”{9}
1304. ඉදං වත්වාන සම්බුද්ධො ජලජුත්තරනාමකො, පිණ්ඩපාතං ථවිත්වාන{10} පක්කාමි උත්තරාමුඛො.