3447. සට්ඨිතුරියසහස්සානි{5} භෙරියො සමලඞ්කතා, වජ්ජයිස්සන්ති’මං නිච්චං සබ්බදානස්සිදං ඵලං.
3448. ඡළාසීතිසහස්සානි නාරියො සමලඞ්කතා, විචිත්තවත්ථාභරණා ආවුත්තමණිකුණ්ඩලා{1}.
3449. අළාරපම්හා හසුලා සුසඤ්ඤා තනුමජ්ඣිමා, පරිවාරෙස්සන්ති’මං නිච්චං සබ්බදානස්සිදං ඵලං.
3450. තිංසකප්පසහස්සානි දෙවලොකෙ රමිස්සති, සහස්සක්ඛත්තුං දෙවින්දො දෙවරජ්ජං කරිස්සති.
3451. සහස්සක්ඛත්තුං රාජා ච චක්කවත්තී භවිස්සති, පදෙසරජ්ජං විපුලං ගණනාතො අසංඛියං.
3452. දෙවලොකෙ වසන්තස්ස පුඤ්ඤකම්මසමඞ්ගිනො, දෙවලොකපරියත්තං රතනඡත්තං ධරීයති{2}.
3453. ඉච්ඡිස්සති යදා ඡායං{3} ඡදනං දුස්සපුප්ඵජං, ඉමස්ස චිත්තමඤ්ඤාය නිබද්ධං ඡාදයිස්සති.
3454. දෙවලොකා චවිත්වාන සුක්කමූලෙන චොදිතො, පුඤ්ඤකම්මෙන සංයුත්තො බ්රහ්මබන්ධු භවිස්සති.
3455. කප්පසතසහස්සම්හි ඔක්කාකකුලසම්භවො, ගොතමො නාම නාමෙන{4} සත්ථා ලොකෙ භවිස්සති.
3456. සබ්බමෙතං අභිඤ්ඤාය ගොතමො සක්යපුඞ්ගවො, භික්ඛුසඞ්ඝෙ නිසීදිත්වා එතදග්ගෙ ඨපෙස්සති.
3457. පිළින්දිවච්ඡ{5} නාමෙන හෙස්සති සත්ථුසාවකො, දෙවානං අසුරානඤ්ච ගන්ධබ්බානං ච සක්කතො.
3458. භික්ඛූනං භික්ඛුනීනං ච ගිහීනං ච තථෙව සො, පියො හුත්වාන සබ්බෙසං විහරිස්සතනාසවො.”
3459. සතසහසෙස කතං කම්මං ඵලං දස්සෙසි මෙ ඉධ, සුමුත්තො සරවෙගොව කිලෙසෙ ඣාපයී මම{6}.
3460. අහො මෙ සුකතං කම්මං පුඤ්ඤක්ඛෙත්තෙ අනුත්තරෙ, යත්ථ කාරං කරිත්වාන පත්තොම්හි අචලං පදං.
3461. අනූනකං දානවරං අදාසි යො හි මාණවො, ආදි පුබ්බඞ්ගමො ආසි තස්ස දානස්සිදං ඵලං.
3462. ඡත්තෙ සුගතෙ දත්වාන{7} සඞ්ඝෙ ගණවරුත්තමෙ, අට්ඨානිසංසෙ අනුභොමි කම්මානුච්ඡවිකෙ මම.
3463. සීතං උණ්හං න ජානාමි රජොජල්ලං න ලිම්පති, අනුපද්දවො අනීතී ච හොමි අපචිතො සදා.
3464. සුඛුමච්ඡවිකො හොමි විසදං හොති මානසං, ඡත්තසතසහස්සානි භවෙ සංසරතො මම.
3465. සබ්බාලඞ්කාරයුත්තානි තස්ස කම්මස්ස වාහසා, ඉමං ජාතිං ඨපෙත්වාන මත්ථකෙ ධාරයන්ති මෙ.
3466. කස්මා{1} ඉමාය ජාතියා නත්ථි මෙ ඡත්තධාරණා, මම සබ්බං කතං කම්මං විමුත්තිඡත්තපත්තියා.
3467. දුස්සානි සුගතෙ දත්වා සඞ්ඝෙ ගණවරුත්තෙමෙ, අට්ඨානිසංසෙ අනුභොමි කම්මානුච්ඡවිකෙ මම.
3468. සුවණ්ණවණ්ණො විරජො සප්පභාසො පතාපවා, සිනිද්ධං හොති මෙ ගත්තං භවෙ සංසරතො මම.
3469. දුස්සසතසහස්සානි සෙතා පීතා ච ලොහිතා, ධාරෙන්ති මත්ථකෙ මය්හං දුස්සදානස්සිදං ඵලං.
3470. කොසෙය්යකම්බලීයානි ඛොමකප්පාසිකානි ච, සබ්බත්ථ පටිලභාමි තෙසං නිස්සන්දතො අහං.
3471. පත්තෙ සුගතෙ දත්වාන සඞ්ඝෙ ගණවරුත්තමෙ, දසානිසංසෙ අනුභොමි කම්මානුච්ඡවිකෙ මම.
3472. සුවණ්ණථාලෙ මණිථාලෙ රජතෙ පි ච ථාලකෙ, ලොහිතඞ්කමයෙ ථාලෙ පරිභුඤ්ජාමි සබ්බදා.
3473. අනුපද්දවො අනීතී ච හොමි අපචිතො සදා, ලාභී අන්නස්ස පානස්ස වත්ථස්ස සයනස්ස ච.
3474. න විනස්සන්ති මෙ භොගා ඨිතචිත්තො භවාමහං, ධම්මකාමො සදා හොමි අප්පක්ලෙසො අනාසවො.
3475. දෙවලොකෙ මනුස්සෙ වා අනුබන්ධා ඉමෙ ගුණා, ඡායා යථාපි රුක්ඛස්ස සබ්බත්ථ න ජහන්ති මං.
3476. චිත්තබන්ධනසම්බද්ධා සුකතා වාසියො බහූ, දත්වාන බුද්ධසෙට්ඨස්ස සඞ්ඝස්ස ච තථෙවහං, අට්ඨානිසංසෙ අනුභොමි කම්මානුච්ඡවිකෙ මම.
3477. සූරො හොම’විසාරී ච වෙසාරජ්ජෙසු පාරමී, ධිති විරියවා හොමි පග්ගහීතමනො සදා.
3478. කිලෙසච්ඡෙදනං ඤාණං සුඛුමං අතුලං සුචිං, සබ්බත්ථ පටිලභාමි තස්ස නිස්සන්දතො අහං.
3479. අකක්කසෙ අඵරුසෙ සුධොතෙ සත්ථකෙ බහූ, පසන්නචිත්තො දත්වාන බුද්ධෙ සඞ්ඝෙ තථෙව ච.
3480. පඤ්චානිසංසෙ අනුභොමි කම්මානුච්ඡවිකෙ මම, කල්යාණචිත්තං විරියං ඛන්තිඤ්ච මෙත්තසත්ථකං.
3481. තණ්හාසල්ලස්ස ඡින්නත්තා පඤ්ඤාසත්ථං අනුත්තරං, වජිරෙන සමං ඤාණං තෙසං නිස්සන්දතො ලභෙ.
3482. සූචියො සුගතෙ දත්වා සඞ්ඝෙ ගණවරුත්තමෙ, පඤ්චානිසංසෙ අනුභොමි කම්මානුච්ඡවිකෙ මම.
3483. න සංසයො කඞ්ඛච්ඡෙදො අභිරූපො ච භොගවා, තික්ඛපඤ්ඤො සදා හොමි සංසරන්තො භවාභවෙ.
3484. ගම්භීරං නිපුණං ඨානං අත්ථං ඤාණෙන පස්සයිං, වජිරග්ගසමං ඤාණං හොති මෙ තමඝාතනං.
3485. නඛච්ඡෙදනෙ සුගතෙ දත්වා සඞ්ඝෙ ගණුත්තමෙ, පඤ්චනිසසෙ අනුභොමි කම්මානුච්ඡවිකෙ මම.
3486. දාසිදාසෙ ගවස්සෙ ච භතකෙ ආරක්ඛකෙ බහූ{1}, න්හාපිතෙ භත්තකෙ සූදෙ සබ්බත්ථෙව ලභාමහං.
3487. විධූපනෙ සුගතෙ දත්වා තාලවණ්ටෙ ච සොභනෙ, අට්ඨානිසංසෙ අනුභොමි කම්මානුච්ඡවිකෙ මම.
3488. සීතං උණ්හං න ජානාමි පරිළාහො න විජ්ජති, දරථං නාභිජානාමි චිත්තසන්තාපනං මම.
3489. රාගග්ගි දොසමොහග්ගි මානග්ගි දිට්ටිඅග්ගි ච, සබ්බග්ගී නිබ්බුතා මය්හං තස්ස නිස්සන්දතො මම.
3490. මොරහත්ථෙ චාමරියො දත්වා සඞ්ඝෙ ගණුත්තමෙ, උපසන්තකිලෙසො’හං විහරාමි අනඞ්ගණො.
3491. පරිස්සාවනෙ සුගතෙ දත්වා ධම්මකරුත්තමෙ{2}, පඤ්චානිසංසෙ අනුභොමි කම්මානුච්ඡවිකෙ මම.
3492. සබ්බෙසං සමතික්කම්ම දිබ්බං ආයුං ලභාමහං, අප්පසය්හො සදා හොමි චොරපච්චත්ථිකෙහි වා.
3493. සත්ථෙන වා විසෙන වා විහෙසම්පි න කුබ්බතෙ, අන්තරා මරණං නත්ථි තෙසං නිස්සන්දතො මම.
3494. තෙලධරෙ{1} සුගතෙ දත්වා සඞ්ඝෙ ගණවරුත්තමෙ, පඤ්චානිසංසෙ අනුභොමි කම්මානුච්ඡවිකෙ මම.
3495. සුචාරුරූපො සුගදො{2} සුසමුග්ගතමානසො, අවික්ඛිත්තමනො හොමි සබ්බාරක්ඛෙහි රක්ඛිතො.
3496. සූචිඝරෙ සුගතෙ දත්වා සඞ්ඝෙ ගණවරුත්තමෙ, තීණානිසංසෙ අනුභොමි කම්මානුච්ඡවිකෙ මම.
3497. චෙතොසුඛං කායසුඛං ඉරියාපථජං සුඛං, ඉමෙ ගුණෙ පටිලභාමි{3} තස්ස නිස්සන්දතො අහං.
3498. අංසඛන්ධෙ{4} ජිනෙ දත්වා සඞ්ඝෙ ගණවරුත්තමෙ, තීණානිසංසෙ අනුභොමි කම්මානුච්ඡවිකෙ මම.
3499. චෙතොඤාණඤ්ච වින්දාමි සරාමි දුතියං භවං, සබ්බත්ථ සුච්ඡවී හොමි තස්ස නිස්සන්දතො අහං.
3500. කායබන්ධෙ ජිනෙ දත්වා සඞ්ඝෙ ගණවරුත්තමෙ, ඡානිසංසෙ අනුභොමි කම්මානුච්ඡවිකෙ මම.
3501. සමාධීසු න කම්පාමි වසී හොමි සමාධිසු, අභෙජ්ජපරිසො හොමි ආදෙය්යවචනො සදා.
3502. උපට්ඨිතසතී හොමි තාසො මය්හං න විජ්ජති, දෙවලොකෙ මනුස්සෙ වා අනුබන්ධා ඉමෙ ගුණා.
3503. ආධාරකෙ ජිනෙ දත්වා සඞ්ඝෙ ගණවරුත්තමෙ, පඤ්චවණ්ණෙහි දායාදො{5} අචලො හොමි කෙනචි.
3504. යෙ කෙචි මෙ සුතා ධම්මා සතිඤාණප්පබොධනා, ධතා මෙ න විනස්සන්ති භවන්ති සුචිනිච්ඡිතා.
3505. භාජනෙ පරිභොගෙ ච දත්වා බුද්ධෙ ගණුත්තමෙ, තීණානිසංසෙ අනුභොමි කම්මානුච්ඡවිකෙ මම.
3506. සොණ්ණමයෙ මණිමයෙ අථො පි ඵලිකාමයෙ, ලොහිතඞ්කමයෙ චෙව ලභාමි භාජනෙ අහං.
3507. භරියා දාසදාසී ච හත්ථස්සරථපත්තිකා, ඉත්ථි පතිබ්බතා චෙව පරිභොගානි සබ්බදා.
3508. විජ්ජා මන්තපදෙ චෙව විවිධෙ ආගමෙ බහූ, සබ්බං සිප්පං නිසාමෙමි පරිභොගානි සබ්බදා.
3509. ථාලකෙ සුගතෙ දත්වා සඞ්ඝෙ ගණවරුත්තමෙ, තීණානිසංසෙ අනුභොමි කම්මානුච්ඡවිකෙ මම.
3510. සොණ්ණමයෙ මණිමයෙ අථොපි ඵලිකාමයෙ, ලොහිතඞ්කමයෙ චෙව ලභාමි ථාලකෙ අහං.
3511. අස්සත්ථකෙ{1} ඵලමයෙ අථො පොක්ඛරපත්තකෙ, මධුපානකසංඛෙ ච ලභාමි ථාලකෙ අහං.
3512. වත්තෙ ගුණෙ පටිපත්ති ආචාරකිරියාසු ච, ඉමෙ ගුණෙ පටිලභෙ තස්ස නිස්සන්දතො අහං.
3513. භෙසජ්ජං සුගතෙ දත්වා සඞ්ඝෙ ගණවරුත්තමෙ, දසානිසංසෙ අනුභොමි කම්මානුච්ඡවිකෙ මම.
3514. ආයුවා බලවා වීරො වණ්ණවා යසවා සුඛී, අනුපද්දවො අනීති ච හොමි චාපචිතො{2} සදා, න මෙ පියචියොගත්ථි තස්ස නිස්සන්දතො මම.
3515. උපාහනෙ ජිනෙ දත්වා සඞ්ඝෙ ගණවරුත්තමෙ, තීණානිසංසෙ අනුභොමි කම්මානුච්ඡවිකෙ මම.
3516. හත්ථියානං අස්සයානං සිවිකා සන්දමානිකා, සට්ඨිසතසහස්සානි පරිවාරෙන්ති මං සදා.
3517. මණිමයා කම්බලිකා{3} සොණ්ණරජතපාදුකා, නිම්බතතන්ති පදුද්ධාරෙ භවෙ සංසරතො මම.
3518. නියාමං පතිධාවන්ති ආගුආචාරසොධනං,{4} ඉමෙ ගුණෙ පටිලභෙ තස්ස නිස්සන්දතො අහං.
3519. පාදුකෙ සුගතෙ දත්වා සඞ්ඝෙ ගණවරුත්තමෙ, ඉද්ධාපාදුකමාරුය්හ විහරාමි යදිච්ඡකං.
3520. උදපුඤ්ඡනකෙ චොළෙ{5} දත්වා බුද්ධෙ ගණුත්තමෙ, පඤ්චානිසංසෙ අනුභොමි කම්මානුච්ඡවිකෙ මම.
3521. සුවණ්ණවණ්ණො විරජො සප්පභාසො පතාපවා, සිනිද්ධං හොති මෙ ගත්තං රජොජල්ලං න ලිම්පති, ඉමෙ ගුණෙ පටිලභෙ තස්ස නිස්සන්දතො අහං.
3522. කත්තරදණ්ඩෙ සුගතෙ දත්වා සඞ්ඝෙ ගණුත්තමෙ, ඡානිසංසෙ අනුභොමි කම්මානුච්ඡවිකෙ මම.
3523. පුත්තා මය්හං බහූ හොන්ති තාසො මය්හං න විජ්ජති, අප්පසය්හො සදා හොමි සබ්බාරක්ඛෙහි රක්ඛිතො, ඛලිතම්පි{1} න ජානාමි අභන්තං මානසං මම.
3524. ඔසධං අඤ්ජනං දත්වා බුද්ධෙ සඞ්ඝෙ ගණුත්තමෙ, අට්ඨානිසංසෙ අනුභොමි කම්මානුච්ඡවිකෙ මම.
3525. විසාලනයනො හොමි සෙතපීතො ච ලොහිතො,{2} අනාවිලපසන්නක්ඛො සබ්බරොගවිවජ්ජිතො.
3526. ලභාමි දිබ්බනයනං පඤ්ඤාචක්ඛුං අනුත්තරං, ඉමෙ ගුණෙ පටිලභෙ තස්ස නිස්සන්දතො අහං.
3527. කුඤ්චිකෙ සුගතෙ දත්වා සඞ්ඝෙ ගණවරුත්තමෙ, ධම්මද්වාරවිවරණං ලභාමි ඤාණකුඤ්චිකං.
3528. කුඤ්චිකානං ඝරෙ දත්වා බුද්ධෙ සඞ්ඝෙ ගණුත්තමෙ, ද්වානිසංසෙ අනුභොමි කම්මානුච්ඡවිකෙ මම, අප්පකොධො අනායසො සංසරන්තො භවෙ අහං.
3529. ආයොගෙ සුගතෙ දත්වා සඞ්ඝෙ ගණවරුත්තමෙ, පඤ්චානිසංසෙ අනුභොමි කම්මානුච්ඡවිකෙ මම.
3530. සමාධීසු න කම්පාමි වසී හොමි සමාධිසු, අභෙජ්ජපරිසො හොමි ආදෙය්යවචනො සදා, ජායති භොගසම්පත්ති භාවෙ සංසරතො මම.
3531. ධූමනෙත්තෙ ජිනෙ දත්වා සඞ්ඝෙ ගණවරුත්තමෙ, තීණානිසංසෙ අනුභොමි කම්මානුච්ඡවිකෙ මම.
3532. සති මෙ උජුකා හොති සුසම්බන්ධා නහාරවො,{3} ලභාමි දිබ්බනයනං{4} තස්ස නිස්සන්දතො අහං.
3533. දීපට්ඨානෙ{5} ජිනෙ දත්වා සඞ්ඝෙ ගණවරුත්තමෙ, තීණානිසංසෙ අනුභොමි කම්මානුච්ඡවිකෙ මම.
3534. ජාතිමා අඞ්ගසම්පන්නො පඤ්ඤවා බුද්ධිසම්මතො,{6} ඉමෙ ගුණෙ පටිලභෙ තස්ස නිස්සන්දතො අහං.
3535. තුම්බකෙ ච කරණ්ඩෙ ච දත්වා බුද්ධෙ ගණුත්තමෙ, දසානිසංසෙ අනුභොමි කම්මානුච්ඡවිකෙ මම.
3536. සදා ගුත්තො{7} සුඛසමඞ්ගී මහායසවා තථා ගතී, විපත්තිවිගතො{8} සුඛුමාලො සබ්බීතිපරිවජ්ජිතො.
3537. විපුලෙ ච ගුණෙ ලාභී සමාවචරණා{1} මම, සුචිවජ්ජිතඋබ්බෙගො තුම්බකෙ ච කරණ්ඩකෙ.
3538. ලභාමි චතුරො වණ්ණෙ හත්ථස්සරතනානි ච,{2} තානි මෙ න විනස්සන්ති තුම්බදානෙ ඉදං ඵලං
3539. අඤ්ජන්නාළියො{3} දත්වා බුද්ධෙ සඞ්ඝෙ ගණුත්තමෙ, පඤ්චානිසංසෙ අනුභොමි කම්මානුච්ඡවිකෙ මම.
3540. සබ්බලක්ඛණසම්පන්නො ආයුපඤ්ඤාසමාහිතො, සබ්බායාසවිනිම්මුත්තො කායො මෙ හොති සබ්බදා.
3541. තනුධාරෙ සුනිසිතෙ සඞ්ඝෙ දත්වාන පිප්ඵලෙ, කිලෙසකන්තනං ඤාණං ලභාමි අතුලං සුචිං.
3542. සණ්ඩාසෙ සුගතෙ දත්වා සඞ්ඝෙ ගණවරුත්තමෙ, කිලෙසලුඤ්චනං{4} ඤාණං ලභාමි අතුලං සුචිං.
3543. නත්ථුකෙ සුගතෙ දත්වා සඞ්ඝෙ ගණවරුත්තමෙ, අට්ඨානිසංසෙ අනුභොමි කම්මානුච්ඡවිකෙ මම.
3544. සද්ධං සීලං හිරිඤ්චාපි අථො ඔත්තප්පියං ගුණං, සුතං චාගඤ්ච ඛත්තී ච පඤ්ඤං මෙ අට්ඨමං ගුණං.
3545. පීඨකෙ සුගතෙ දත්වා සඞ්ඝෙ ගණවරුත්තමෙ, පඤ්චානිසංසෙ අනුභොමි කම්මානුච්ඡවිකෙ මම.
3546. උච්චෙ කුලෙ පජායාමි මහාභොගො භවාමහං, සබ්බෙ මං අපචායන්ති කිත්ති අබ්භුග්ගතා මම.