3281. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3282. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3283. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අවණ්ටඵලදායකො ථෙරො ඉමා ගාථායො අභාසිත්ථාති.
අවණ්ටඵලදායකත්ථෙරස්ස අපදානං පඨමං.
382. ලබුජදායකත්ථෙරාපදානං.
3284. නගරෙ බන්ධුමතියා ආසිං ආරාමිකො තදා, අද්දසං විරජං බුද්ධං ගච්ඡන්තං අනිලඤ්ජසෙ.
3285. ලබුජස්ස ඵලං ගය්හ බුද්ධසෙට්ඨස්සදාසහං, ආකාසෙ ඨිතකො සන්තො පටිගණ්හි මහායසො.
3286. විත්තිසඤ්ජනනං මය්හං දිට්ඨධම්මසුඛාවහං, ඵලං බුද්ධස්ස දත්වාන විප්පසන්නෙන චෙතසා.
3287. අධිගච්ඡිං තදා පීතිං විපුලඤ්ච සුඛුත්තමං, උප්පජ්ජතෙව රතනං නිබ්බත්තස්ස තහිං තහිං.
3288. එකනවුතෙ ඉතො කප්පෙ යං ඵලමදදිං තදා, දුග්ගතිං නාභිජානාමි ඵලදානස්සිදං ඵලං.
3289. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3290. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3291. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ලබුජදායකො ථෙරො ඉමා ගාථායො අභාසිත්ථාති.
ලබුජදායකථෙරස්ස අපදානං දුතියං.
383. උදුම්බරඵලදායකත්ථෙරාපදානං
3292. වින්තානදියා තීරෙ විහාසි පුරිසුත්තමො, අද්දසං විරජං බුද්ධං එකග්ගං සුසමාහිතං.
3293. තස්මිං පසන්නමනසො කිලෙසමලධොවනෙ, උදුම්බරඵලං ගය්හ බුද්ධසෙට්ඨස්සදාසහං.
3294. එකනවුතෙ ඉතො කප්පෙ යං ඵලමදදිං තදා, දුග්ගතිං නාභිජානාමි ඵලදානස්සිදං ඵලං.
3295. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3296. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3297. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උදුම්බරඵලදායකො ථෙරො ඉමා ගාථායො අභාසිත්ථාති.
උදුම්බරඵලදායකත්ථෙරස්ස අපදානං තතියං.
384. පිලක්ඛඵලදායකත්ථෙරාපදානං
3298. වනන්තෙ බුද්ධං දිස්වාන අත්ථදස්සිං මහායසං, පසන්නචිත්තො සුමනො පිලක්ඛස්ස ඵලං අදං.{1}
3299. අට්ඨාරසෙ කප්පසතෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
3300. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3301. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3302. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පිලක්ඛඵලදායකො ථෙරො ඉමා ගාථායො අභාසිත්ථාති.
පිලක්ඛඵලදායකත්ථෙරස්ස අපදානං චතුත්ථං.
385. ඵාරුසඵලදායකත්ථෙරාපදානං{*}
3303. සුවණ්ණවණ්ණං සම්බුද්ධං ආහුතීනං පටිග්ගහං, රථියං පටිපජ්ජන්තං ඵාරුසඵලමදාසහං.
3304. එකනවුතෙ ඉතො කප්පෙ යං ඵලමදදිං අහං, දුග්ගතිං නාභිජානාමි ඵලදානස්සිදං ඵලං.
3305. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3306. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3307. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ඵාරුසඵලදායකො ථෙරො ඉමා ගාථායො අභාසිත්ථාති.
ඵාරුසඵලදායකත්ථෙරස්ස අපදානං පඤ්චමං.
386. වල්ලිඵලදායකත්ථෙරාපදානං.
3308. සබ්බෙ ජනා සමාගම්ම අගමිංසු වනං තදා, ඵලමන්වෙසමානා තෙ අලභිංසු ඵලං තදා.
3309. තත්ථද්දසාසිං සම්බුද්ධං සයම්භුං අපරාජිතං, පසන්නචිත්තො සුමනො වල්ලිඵලමදාසහං.
3310. එකතිංසෙ ඉතො කප්පෙ යං ඵලමදදිං තදා, දුග්ගතිං නාභිජානාමි ඵලදානස්සිදං ඵලං.
3311. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3312. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3313. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා වල්ලිඵලදායකො ථෙරො ඉමා ගාථායො අභාසිත්ථාති.
වල්ලිඵලදායකත්ථෙරස්ස අපදානං ඡට්ඨං.
387. කදලිඵලදායකත්ථෙරාපදානං
3314. කණිකාරංව ජලිතං පුණ්ණමාසෙව{1} චන්දිමං, ජලන්තං දීපරුක්ඛංව අද්දසං ලොකනායකං.
3315. කදලිඵලං පග්ගය්හ අදාසිං සත්ථුනො අහං, පසන්නචිත්තො සුමනො වන්දිවත්වාන අපක්කමිං.
3316. එකතිංසෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානස්සිදං ඵලං.
3317. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3318. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3319. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කදලිඵලදායකො ථෙරො ඉමා ගාථායො අභාසිත්ථාති.
කදලිඵලදායකත්ථෙරස්ස අපදානං සත්තමං.
388. පනසඵලදායකත්ථෙරාපදානං.
3320. අජ්ජුනො නාම සම්බුද්ධො හිමවන්තෙ වසී තදා, චරණෙන ච සම්පන්නො සමාධිකුසලො මුනි.
3321. කුම්භමත්තං ගහෙත්වාන පනසං ජීවජීවකං, ඡත්තපණ්ණෙ ඨපෙත්වාන අදාසිං සත්ථුනො අහං.
3322. එකනවුතෙ ඉතො කප්පෙ යං ඵලමදදිං තදා, දුග්ගතිං නාභිජානාමි ඵලදානස්සිදං ඵලං.
3323. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3324. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3325. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පනසඵලදාකො ථෙරො ඉමා ගාථායො අභාසිත්ථාති.
පනසඵලදායකත්ථෙරස්ස අපදානං අට්ඨමං.
389. සොණකොටිවීසත්ථෙරාපදානං.
3326. විපස්සිනො පාවචනෙ එකං ලෙණං මයා කතං, චාතුද්දිසස්ස සඞ්ඝස්ස බන්ධුමාරාජධානියා.
3327. දුස්සෙහි භූමිං ලෙණස්ස සන්ථරිත්වා පරිච්චජිං, උදග්ගචිත්තො සුමනො අකාසිං පණිධිං තදා.
3328. ආරාධයෙය්යං සම්බුද්ධං පබ්බජ්ජඤ්ච ලභෙය්යහං, අනුත්තරඤ්ච නිබ්බානං ඵුසෙය්යං සන්තිමුත්තමං.
3329. තෙනෙව සුක්කමූලෙන කප්පං{1} නවුති සංසරිං, දෙවභූතො මනුස්සො වා කතපුඤ්ඤො විරොචහං.
3330. තතො කම්මාවසෙසෙන ඉධ පච්ඡිමකෙ භවෙ, චම්පායං අග්ගසෙට්ඨිස්ස ජාතොම්හි එකපුත්තකො.
3331. ජාතමත්තස්ස මෙ සුත්වා පිතු ඡන්දො අයං අහු, දදාමහං කුමාරස්ස වීසකොටි අනූනකා.
3332. චතුරඞ්ගුලා ච මෙ ලොමා ජාතා පාදතලෙ උභො, සුඛුමා මුදුසම්ඵස්සා තූලපිචුසමා සුභා.
3333. අතීතා නවුතී කප්පා අයමෙකොව{2} උත්තරි, නාභිජානාමි නික්ඛිත්තෙ පාදෙ භූම්යා අසන්ථතෙ.
3334. ආරාධිතො මෙ සම්බුද්ධො පබ්බජිං අනගාරියං, අරහත්තඤ්ච මෙ පත්තං සීතිභූතොම්භි නිබ්බුතො.
3335. අග්ගො ආරද්ධවිරියානං{3} නිද්දිට්ඨො සබ්බදස්සිනා, ඛීණාසවො ච{4} අරහා ඡළභිඤ්ඤො මහිද්ධිකො.
3336. එකනවුතෙ ඉතො කප්පෙ යං දානමදදිං තදා, දුග්ගතිං නාභිජානාමි ලෙනදානස්සිදං ඵලං.
3337. ස්වාගතං වත මෙ ආසි බුද්ධසෙට්ඨස්ස සන්තිකෙ, තිස්සො විජ්ජා අනුප්පත්තා කතං බුද්ධස්ස සාසනං.
3338. කිලෙසා ඣාපිතා මය්හං භවා සබ්බෙ සමූහතා, නාගොව බන්ධනං ඡෙත්වා විහරාමි අනාසවො.
3339. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
3340. ථෙරො කොටිවිසො{5} සොණො භික්ඛුසඞ්ඝස්ස අග්ගතො, පඤ්චහං පුට්ඨො වියාකාසි අනොතත්තෙ මහාසරෙති.
ඉත්ථං සුදං ආයස්මා සොණො කොටිවීසො ථෙරො ඉමා ගාථායො අභාසිත්ථාති.
සොණකොටිවීසත්ථෙරස්ස අපදානං නවමං.
390. පුබ්බකම්මපිලොතිකාපදානං
3341. අනොතත්තසරාසන්තෙ රමණීයෙ සිලාතලෙ, නානාරතනපජ්ජොතෙ නානාගන්ධවනන්තරෙ.
3342. මහතා භික්ඛුසඞ්ඝෙන පරෙතො ලොකනායකො, ආසීනො ව්යාකරී තත්ථ පුබ්බකම්මානි අත්තනො.
3343. සුණාථ භික්ඛවො මය්හං යං කම්මං පකතං මයා, පිලොතිකස්ස කම්මස්ස බුද්ධත්තෙපි විපච්චති{*}.
3344. මුනාළී නාමහං ධුත්තො පුබ්බෙ අඤ්ඤාසු ජාතිසු, පච්චෙකබුද්ධං සරභුං{1} අබ්භාචික්ඛිං අදූසකං.
3345. තෙන කම්මවිපාකෙන නිරයෙ සංසරිං චිරං, බහුවස්සසහස්සානි දුක්ඛං වෙදෙසිං වෙදනං.
3346. තෙන කම්මාවසෙසෙන ඉධ පච්ඡිමකෙ භවෙ, අබ්භක්ඛානං මයා ලද්ධං සුන්දරිකාය කාරණා.
3347. සබ්බාභිභුස්ස බුද්ධස්ස නන්දො නාමාසි සාවකො, තං අබ්භක්ඛාය නිරයෙ චිරං සංසරිතං{2} මයා.
3348. දසවස්සසහස්සානි නිරයෙ සංසරිං චිරං, මනුස්සභාවං ලද්ධාහං අබ්භක්ඛානං බහුං ලභිං.
3349. තෙන කම්මාවසෙසෙන චිඤ්චමානවිකා මමං, අබ්භක්ඛාසි{3} අභූතෙන ජනකායස්ස අග්ගතො.
3350. බ්රාහ්මණො සුතවා ආසිං අහං සක්කතපූජිතො, මහාවනෙ පඤ්චසතෙ මන්තෙ වාචෙමි මාණවෙ.
3351. තත්ථාගතො ඉසි භීමො පඤ්චාභිඤ්ඤො මහිද්ධිකො, තඤ්චාහමාගතං දිස්වා අබ්භාචික්ඛිමදූසකං.
3352. තතොහං අවචං සිස්සෙ කාමභොගී අයං ඉසි, මය්හම්පි භාසමානස්ස අනුමොදිංසු මාණවා.
3353. තතො මාණවකා සබ්බෙ භික්ඛමානා{4} කුලෙ කුලෙ, මහාජනස්ස ආහංසු කාමභොගී අයං ඉසි.