3165. දිවාවිහාරා නික්ඛන්තො විපස්සී ලොකනායකො, භික්ඛාය විචරන්තො සො මම සන්තිකමුපාගමි.
3166. කතො පතීතො සුමනො බුද්ධසෙට්ඨස්ස තාදිනො, ලොණසුපුටකං දත්වා කප්පං සග්ගම්හි මොදහං.
3167. එකනවුතෙ ඉතො කප්පෙ යං සුපුටකමදාසහං, දුග්ගතිං නාභිජානාමි පුටකස්ස ඉදං ඵලං.
3168. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සුපුටකපූජකො ථෙරො ඉමා ගාථායො අභාසිත්ථාති.
සුපුටකපූජකත්ථෙරස්ස අපදානං සත්තමං.
358. මඤ්චදායකත්ථෙරාපදානං
3169. විපස්සිනො භගවතො ලොකජෙට්ඨස්ස තාදිනො, එකං මඤ්චං මයා දින්නං පසන්නෙන සපාණිනා.
3170. හත්ථියානං අස්සයානං දිබ්බයානං සමජ්ඣගං, තෙන මඤ්චකදානෙන පත්තොම්හි ආසවක්ඛයං.
3171. එකනවුතෙ ඉතො කප්පෙ යං මඤ්චමදදිං තදා, දුග්ගතිං නාභිජානාමි මඤ්චදානස්සිදං ඵලං.
3172. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මඤ්චදායකො ථෙරො ඉමා ගාථායො අභාසිත්ථාති.
මඤ්චදායකත්ථෙරස්ස අපදානං අට්ඨමං.
359. සරණගමනියත්ථෙරාපදානං.
3173. ආරුභිම්හ තදා නාමං භික්ඛු චාජීවකො චහං, නාවාය භිජ්ජමානාය භික්ඛු මෙ සරණං අදා.
3174. එකතිංසෙ ඉතො කප්පෙ යං ච මෙ සරණං අදා, දුග්ගතිං නාභිජානාමි සරණගමනෙ ඵලං.
3175. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සරණගමනියො ථෙරො ඉමා ගාථායො අභාසිත්ථාති.
සරණගමනියත්ථෙරස්ස අපදානං නවමං.
360. පිණ්ඩපාතිකත්ථෙරාපදානං.
3176. තිස්සො නාමාසි සම්බුද්ධො විහාසි විපිනෙ තදා, තුසිතා හි ඉධාගන්ත්වා පිණ්ඩපාතමදාසහං.
3177. සම්බුද්ධමභිවාදෙත්වා තිස්සං නාම මහායසං, සකං චිත්තං පසාදෙත්වා තුසිතං අගමාසහං.
3178. ද්වෙනවුතෙ ඉතො කප්පෙ යං දානමදදිං තදා, දුග්ගතිං නාභිජානාමි පිණ්ඩපාතස්සිදං ඵලං.
3179. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පිණ්ඩපාතිකො ථෙරො ඉමා ගාථායො අභාසිත්ථාති.
පිණ්ඩපාතිකත්ථෙරස්ස අපදානං දසමං.
උද්දානං:
සද්දසඤ්ඤී යවසිකො කිංසු කොරණ්ඩපුප්ඵියො ආලම්බනො අම්බයාගු සුපටී මඤ්චදායකො සරණ පිණ්ඩපාතො ද ගාථා තාළීසමෙව ච.
සද්දසඤ්ඤකවග්ගො ඡත්තිංසතිමො.
37. මන්දාරවපුප්ඵියවග්ගො
361. මන්දාරවපුප්ඵියත්ථෙරාපදානං.
3180. තාවතිංසා ඉධාගන්ත්වා මඞ්ගලො නාම මාණවො, මන්දාරවං ගහෙත්වාන විපස්සිස්ස මහෙසිනො.
3181. සමාධිනා නිසින්නස්ස මත්ථකෙ ධාරයිං අහං, සත්තාහං ධාරයිත්වාන දෙවලොකං පුනාගමිං.
3182. එකනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
3183. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මන්දාරවපුප්ඵියො ථෙරො ඉමා ගාථායො අභාසිත්ථාති.
මන්දාරවපුප්ඵියත්ථෙරස්ස අපදානං පඨමං.
362. කක්කාරුපුප්ඵියත්ථෙරාපදානං.
3184. යාමා දෙවා ඉධාගන්ත්වා ගොතමං සිරිවච්ඡසං, කක්කාරුපුප්ඵං{1} පග්ගය්හ බුද්ධස්ස අභිරොපයිං.
3185. ද්වෙනවුතෙ ඉතො කප්පෙ යං බුද්ධමභිපූජයිං, දුග්ගතිං නාභිජානාමි බුද්ධපූජායිදං ඵලං.
3186. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කක්කාරුපුප්ඵියො ථෙරො ඉමා ගාථායො අභාසිත්ථාති.
කක්කාරුපුප්ඵියත්ථෙරස්ස අපදානං දුතියං.
363. භිසමුළාලදායකත්ථෙරාපදානං
3187. ඵුස්සො නාමාසි සම්බුද්ධො සබ්බධම්මානපාරගූ, විවෙකකාමො සප්පඤ්ඤො ආගච්ඡි මම සන්තිකෙ.
3188. තස්මිං චිත්තං පසාදෙත්වා මහාකාරුණිකෙ ජිනෙ, භිසං මුළාලං පග්ගය්හ බුද්ධසෙට්ඨස්සදාසහං.
3189. ද්වෙනවුතෙ ඉතො කප්පෙ යං භිසමදදිං තදා, දුග්ගතිං නාභිජානාමි භිසදානස්සිදං ඵලං.
3190. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා භිසමුළාලදායකො ථෙරො ඉමා ගාථායො අභාසිත්ථාති.
භිසමුළාලදායකත්ථෙරස්ස අපදානං තතියං.
364. කෙසරපුප්ඵියත්ථෙරාපදානං{*}
3191. විජ්ජාධරො තදා අසිං හිමවන්තම්භි පබ්බතෙ, අද්දසං විරජං බුද්ධං චඞ්කමන්තං මහායසං.
3192. තීණි කෙසරිපුප්ඵානි{1} සීසෙ කත්වානහං තදා, උපසඞ්කම්ම සම්බුද්ධං වෙස්සභුං අභිපූජයිං.
3193. එකතිංසෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධපූජායිදං ඵලං.
3194. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කෙසරපුප්ඵියො{2} ථෙරො ඉමා ගාථායො අභාසිත්ථාති.
කෙසරපුප්ඵියත්ථෙරස්ස අපදානං චතුත්ථං.
365. අඞ්කොලපුප්ඵියත්ථෙරාපදානං
3195. පදුමො නාම සම්බුද්ධො චිත්තකූටෙ වසී තදා, දිස්වාන තමහං බුද්ධං සයම්භුං අපරාජිතං.{3}
3196. අඞ්කොලං පුප්ඵිතං දිස්වා ඔචිනිත්වානහං තදා, උපගන්ත්වාන සම්බුද්ධං පූජෙසිං පදුමං ජිනං.
3197. එකතිංසෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
3198. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අඞ්කොලපුප්ඵියො ථෙරො ඉමා ගාථායො අභාසිත්ථාති.
අඞ්කොලපුප්ඵියත්ථෙරස්ස අපදානං පඤ්චමං.
366. කදම්බපුප්ඵියත්ථෙරාපදානං.
3199. සුවණ්ණවණ්ණං සම්බුද්ධං ගච්ඡන්තං අන්තරාපණෙ, කඤ්චනග්ඝියසඞ්කාසං බත්තිංසවරලක්ඛණං.
3200. නිසජ්ජ පාසාදවරෙ අද්දසං ලොකනායකං, කදම්බපුප්ඵං පග්ගය්හ විපස්සිං අභිපූජයිං.
3201. එකනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
3202. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කදම්බපුප්ඵියො ථෙරො ඉමා ගාථායො අභාසිත්ථාති.
කදම්බපුප්ඵියත්ථෙරස්ස අපදානං ඡට්ඨං.
367. උද්දාලපුප්ඵියත්ථෙරාපදානං.
3203. අනොමො{1} නාම සම්බුද්ධො ගඞ්ගාකූලෙ වසී තදා, උද්දාලකං ගහෙත්වාන පූජයිං අපරාජිතං.
3204. එකතිංසෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
3205. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උද්දාලපුප්ඵියො ථෙරො ඉමා ගාථායො අභාසිත්ථාති.
උද්දාලපුප්ඵියත්ථෙරස්ස අපදානං සත්තමං.
368. එකචම්පකපුප්ඵියත්ථෙරාපදානං
3206. උපසන්තො ච සම්බුද්ධො වසතී පබ්බතන්තරෙ, එකං චම්පකමාදාය{2} උපගච්ඡිං නරුත්තමං.
3207. පසන්නචිත්තො සුමනො පච්චෙකමුනිමුත්තමං, උභොහත්ථෙහි පග්ගය්හ පූජයිං අපරාජිතං.
3208. එකතිංසෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
3209. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකචම්පකපුප්ඵියො ථෙරො ඉමා ගාථායො අභාසිත්ථාති.
එකචම්පකපුප්ඵියත්ථෙරස්ස අපදානං අට්ඨමං.
369. තිමිරපුප්ඵියත්ථෙරාපදානං.
3210. චන්දභාගානදීතීරෙ අනුසොතං වජාමහං, අද්දසං විරජං බුද්ධං සාලරාජංව ඵුල්ලිතං.
3211. පසන්නචිත්තො සුමනො පච්චෙකමුනිමුත්තමං, ගහෙත්වා තිමිරං පුප්ඵං මත්ථකෙ ඔකිරිං අහං.
3212. එකනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
3213. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිමිරපුප්ඵියො ථෙරො ඉමා ගාථායො අභාසිත්ථාති.
තිමිරපුප්ඵියත්ථෙරස්ස අපදානං නවමං.
370. සලලපුප්ඵියත්ථෙරාපදානං.
3214. චන්දභාගානදීතීරෙ අහොසිං කින්නරො තදා, තත්ථද්දසං දෙවදෙවං චඞ්කමන්තං නරාසභං.
3215. ඔචිනිත්වාන සලලං පුප්ඵං බුද්ධස්ස’දාසහං, උපසිඞ්ඝි මහාවීරො සලලං දෙවගන්ධිකං.
3216. පටිග්ගහෙත්වා සම්බුද්ධො විපස්සී ලොකනායකො, උපසිඞ්ඝි මහාවීරො පෙක්ඛමානස්ස මෙ සතො.
3217. පසන්නචිත්තො සුමනො වන්දිත්වා දිපදුත්තමං, අඤ්ජලිම්පග්ගහෙත්වාන පුන පබ්බතමාරුහිං.
3218. එකනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
3219. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සලලපුප්ඵියො ථෙරො ඉමා ගාථායො අභාසිත්ථාති.
සලලපුප්ඵියත්ථෙරස්ස අපදානං දසමං.