3105. නළාගාරං කරිත්වාන තිණෙන ඡාදයිං අහං, චඞ්කමං සොධයිත්වාන සයම්භුස්ස අදාසහං.
3106. චතුද්දසසු කප්පෙසු දෙවලොකෙ රමිං අහං, චතුසත්තතික්ඛත්තුඤ්ච දෙවරජ්ජමකාරයිං.
3107. සත්තසත්තතික්ඛත්තුඤ්ච{1} චක්කවත්තී අහොසහං, පදෙසරජ්ජං විපුලං ගණනාතො අසඞ්ඛියං.
3108. උබ්බිද්ධං භවනං මය්හං ඉන්දලට්ඨීව උග්ගතං, සහස්සථම්භං අතුලං විමානං සපභසසරං.
3109. ද්වෙ සම්පත්ති අනුභොත්වා සුක්කමූලෙන චොදිතො, ගොතමස්ස භගවතො සාසනෙ පබ්බජිං අහං.
3110. පධානපහිතත්තොම්හි උපසන්තො නිරූපධි, නාගොව බන්ධනං ඡෙත්වා විහරාමි අනාසවො.
3111. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා නළාගාරිකො ථෙරො ඉමා ගාථායො අභාසිත්ථාති.
නාළාගාරිකත්ථෙරස්ස අපදානං පඤ්චමං.
346. චම්පකපුප්ඵියත්ථෙරාපදානං
3112. හිමවන්තස්ස අවිදූරෙ චාපලො{2} නාම පබ්බතො, බුද්ධො සුදස්සනො නාම විහාසි පබ්බතන්තරෙ.
3113. පුප්ඵං හෙමවතං{3} ගය්හ ගච්ඡං වෙහාසෙනහං, අද්දසං විරජං බුද්ධං ඔඝතිණ්ණමනාසවං.
3114. සත්ත චම්පකපුප්ඵානි සීසෙ කත්වානහං තදා, බුද්ධස්ස අභිරොපෙසිං සයම්භුස්ස මහෙසිනො.
3115. එකතිංසෙ ඉතො කප්පෙ යං පුප්ඵමභිපූජයිං,{4} දුග්ගතිං නාභිජානාමි බුද්ධපූජායිදං ඵලං.
3116. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා චම්පකපුප්ඵියො ථෙරො ඉමා ගාථායො අභාසිත්ථාති.
චම්පකපුප්ඵියත්ථෙරස්ස අපදානං ඡට්ඨං.
347. පදුමපූජකත්ථෙරාපදානං.
3117. හිමවන්තස්ස අවිදූරෙ රොමසො නාම පබ්බතො, බුද්ධොපි සම්භවො නාම අබ්භොකාසෙ වසී තදා.
3118. භවනා නික්ඛමිත්වාන පදුමං ධාරයිං අහං, එකාහං ධාරයිත්වාන පුන භවනමුපාගමිං.
3119. එකනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
3120. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පදුමපූජකො ථෙරො ඉමා ගාථායො අභාසිත්ථාති.
පදුමපූජකත්ථෙරස්ස අපදානං සත්තමං.
348. තිණමුට්ඨිදායකත්ථෙරාපදානං.
3121. හිමවන්තස්ස අවිදූරෙ ලම්බකො නාම පබ්බතො, උපතිස්සො නාම සම්බුද්ධො අබ්භොකාසම්භී චඞ්කමි.
3122. මිගලුද්දො තදා ආසිං අරඤ්ඤෙ කානනෙ අහං, දිස්වාන තං දෙවදෙවං සයම්භුං අපරාජිතං.
3123. විප්පසන්නෙන චිත්තෙන තදා තස්ස මහෙසිනො, නිසීදනත්ථං බුද්ධස්ස තිණමුට්ඨිමදාසහං.
3124. දත්වාන දෙවදෙවස්ස භිය්යො චිත්තං පසාදයිං, සම්බුද්ධමභිවාදෙත්වා සක්කාමිං උත්තරාමුඛො.
3125. අචිරං ගතමත්තං මං මිගරාජා අහෙඨයී,{1} සීහෙන පාතිතො{2} සන්තො තත්ථ කාලකතො අහං.
3126. ආසන්නෙ මෙ කතං කම්මං බුද්ධසෙට්ඨෙ අනාසවෙ, සුමුත්තො සරවෙගොව දෙවලොකමගච්ඡහං.
3127. යූපො තත්ථ සුභො ආසි පුඤ්ඤකම්මාභිනිම්මිතො, සහස්සකණ්ඩො සතභෙණ්ඩු ධජාලූ හරිතාමයො.
3128. පභා නිද්ධාවතෙ තස්ස සතරංසීව උග්ගතො, ආකිණ්ණො දෙවකඤ්ඤාහි ආමොදිං කාමකාමහං.
3129. දෙවලොකා චවිත්වාන සුක්කමූලෙන චොදිතො, ආගන්ත්වාන මනුස්සත්තං පත්තොම්හි ආසවක්ඛයං.
3130. චතුනවුතෙ ඉතො කප්පෙ නිසීදනමදාසහං, දුග්ගතිං නාභිජානාමි තිණමුට්ඨිස්සිදං ඵලං.
3131. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිණමුට්ඨිදායකො ථෙරො ඉමා ගාථායො අභාසිත්ථාති.
තිණමුට්ඨිදායකත්ථෙරස්ස අපදානං අට්ඨමං.
349. තින්දුකඵලදායකත්ථෙරාපදානං
3132. කණිකාරංව ජොතන්තං නිසින්නං පබ්බතන්තරෙ, අද්දසං විරජං බුද්ධං ඔඝතිණ්ණමනාසවං.
3133. තින්දුකං සඵලං දිස්වා භින්දිත්වාන සකොටකං,{1} පසන්නචිත්තො සුමනො වෙස්සභුස්ස අදාසහං.
3134. එකනවුතෙ ඉතො කප්පෙ යං ඵලමදදිං තදා, දුග්ගතිං නාභිජානාමි ඵලදානස්සිදං ඵලං.
3135. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තින්දුකඵලදායකො ථෙරො ඉමා ගාථායො අභාසිත්ථාති.
තින්දුකඵලදායකත්ථෙරස්ස අපදානං නවමං.
350. එකඤ්ජලියත්ථෙරාපදානං
3136. රෙවතො{2} නාම සම්බුද්ධො නදීකූලෙ වසී තදා, අද්දසං විරජං බුද්ධං පීතරංසිංව භානුමං.
3137. උක්කාමුඛපහට්ඨංව ඛදිරඞ්ගාරසන්නිභං, ඔසධිංව විරොචන්තං එකඤ්ජලිමකාසභං.
3138. චතුනවුතෙ ඉතො කප්පෙ යමඤ්ජලිමකාසහං, දුග්ගතිං නාභිජානාමි අඤ්ජලියා ඉදං ඵලං.
3139. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකඤ්ජලියො ථෙරො ඉමා ගාථායො අභාසිත්ථාති.
එකඤ්ජලියත්ථෙරස්ස අපදානං දසමං.
උද්දානං:
පදුමී උප්පලමාලී ධජො කිඞ්කිණිකො නළො චම්පකො පදුමො මුට්ඨි තින්දුකෙකඤ්ජලී තථා ඡ ච සට්ඨි ච ගාථායො ගණිතායො විභාවිහි.
එකපදුමියවග්ගො පඤ්චතිංසතිමො.
36. සද්දසඤ්ඤකවග්ගො
351. සද්දසඤ්ඤකත්ථෙරාපදානං.
3140. මිගලුද්දො පුරෙ ආසිං අරඤ්ඤෙ කානනෙ අහං, තත්ථද්දසාසිං සම්බුද්ධං දෙවසඞ්ඝපුරක්ඛතං.
3141. චතුසච්චං පකාසෙන්තං උද්ධරන්තං මහාජනං, අස්සොසිං මධුරං වාචං කරවීකරුතොපමං.{*}
3142. බ්රහ්මස්සරස්ස මුනිනො සිඛිනො ලොකබන්ධුනො, ඝොසෙ චිත්තං පසාදෙත්වා පත්තොම්හි ආසවක්ඛයං.
3143. එකතිංසෙ ඉතො කප්පෙ යං කම්මමකරිං තදා, දුග්ගතිං නාභිජානාමි පසාදස්ස ඉදං ඵලං.
3144. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සද්දසඤ්ඤකො ථෙරො ඉමා ගාථායො අභාසිත්ථාති.
සද්දසඤ්ඤකත්ථෙරස්ස අපදානං පඨමං.
352. යවකලාපියත්ථෙරාපදානං.
3145. නගරෙ අරුණවතියා ආසිං යාවසිකො{1} තදා, පන්ථෙ දිස්වාන සම්බුද්ධං යවකලාපමවත්ථරිං.
3146. අනුකම්පකො කාරුණිකො සිඛී ලොකග්ගනායකො, මම සඞ්කප්පමඤ්ඤාය නිසීදි යවසන්ථරෙ.
3147. දිස්වා නිසින්නං විමලං මහාඣායිං විනායකං, පාමුජ්ජං{2} ජනයිත්වාන තත්ථ කාලකතො අහං.
3148. එකතිංසෙ ඉතො කප්පෙ යං කම්මමකරිං තදා, දුග්ගතිං නාභිජානාමි යවත්ථාරෙ ඉදං ඵලං.
3149. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා යවකලාපියො ථෙරො ඉමා ගාථායො අභාසිත්ථාති.
යවකලාපියත්ථෙරස්ස අපදානං දුතියං.
353. කිංසුකපූජකත්ථෙරාපදානං.
3150. කිංසුකං පුප්ඵිතං දිස්වා පග්ගහෙත්වාන අඤ්ජලිං, බුද්ධං සරිත්වා සිද්ධත්ථං ආකාසෙ අභිපූජයිං.
3151. චතුනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
3152. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කිංසුකපූජකො ථෙරො ඉමා ගාථායො අභාසිත්ථාති.
කිංසකපූජකත්ථෙරස්ස අපදානං තතියං.
354. සකොටකකොරණ්ඩදායකත්ථෙරාපදානං.
3153. අක්කන්තඤ්ච පදං දිස්වා සිඛිනො ලොකබන්ධුනො, එකංසං අජිනං කත්වා පදසෙට්ඨං අවන්දහං.
3154. කොරණ්ඩං පුප්ඵිතං දිස්වා පාදපං ධරණීරුහං, සකොටකං ගහෙත්වාන පදෙ චක්කමපූජයිං.{1}
3155. එකතිංසෙ ඉතො කප්පෙ යං කම්මමකරිං තදා, දුග්ගතිං නාභිජානාමි පදපූජායිදං ඵලං.
3156. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සකොටකකොරණ්ඩදායකො{2} ථෙරො ඉමා ගාථායො අභාසිත්ථාති.
සකොටකකොරණ්ඩදායකත්ථෙරස්ස අපදානං චතුත්ථං.
355. දණ්ඩදායකත්ථෙරාපදානං
3157. කානනං වනමොගය්හ වෙළුං ඡෙත්වානහං තදා, ආලම්බනං ගහෙත්වාන{3} සඞ්ඝස්ස අදදං අහං.
3158. තෙන චිත්තප්පසාදෙන සුබ්බතෙ අභිවාදිය, ආලම්බනම්පි දත්වාන පක්කමිං උත්තරාමුඛො.
3159. චතුනවුතෙ ඉතො කප්පෙ යං දණ්ඩමදදිං තදා, දුග්ගතිං නාභිජානාමි දණ්ඩදානස්සිදං ඵලං.
3160. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා දණ්ඩදායකො ථෙරො ඉමා ගාථායො අභාසිත්ථාති.
දණ්ඩදායකත්ථෙරස්ස අපදානං පඤ්චමං.
356. අම්බයාගුදායකත්ථෙරාපදානං
3161. සතරංසී නාම සම්බුද්ධො සයම්භූ අපරාජිතො, වුට්ඨහිත්වා සමාධිම්හා භික්ඛාය මං උපාගමි.
3162. පච්චෙකබුද්ධං දිස්වාන අම්බයාගුං අදාසහං, විප්පසන්නමනං තස්ස විප්පසන්නෙන චෙතසා.
3163. චතුනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි අම්බයාගුයිදං ඵලං.
3164. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අම්බයාගුදායකො ථෙරො ඉමා ගාථායො අභාසිත්ථාති.
අම්බයාගුදායකත්ථෙරස්ස අපදානං ඡට්ඨං.
357. සුපුටකපූජකත්ථෙරාපදානං