2868. ඉමාය අනුකම්පාය දෙවා දෙවං යදා විදුං, චවන්තං අනුමොදන්ති “එහි දෙවපුරං පුන”.
2869. සංවෙගො මෙ{1} තදා ආසි දෙවසඞ්ඝෙ සමාගතෙ, “කිං සු{2} නාම අහං යොනිං ගමිස්සාමි ඉතො චුතො”.
2870. මම සංවෙගමඤ්ඤාය සමණො භාවිතින්ද්රියො, මමුද්ධරිතුකාමො සො ආගච්ඡි මම සන්තිකෙ.
2871. සුමනො නාම නාමෙන පදුමුත්තරසාවකො, අත්ථධම්මානුසාසිත්වා සංවෙජෙසි මමං තදා.
[ද්වාදසමං භාණවාරං.]
2872. තස්සාහං වචනං සුත්වා බුද්ධෙ චිත්තං පසාදයිං, තං වීරමභිවාදෙත්වා{3} තත්ථ කාලකතො අහං.
2873. උපපජ්ජිසං{1} තත්ථෙව සුක්කමූලෙන චොදිතො, වසන්තො මාතුකුච්ඡිම්භි පුන ධාරිස{2} මාතුයා.
2874. තම්හා කායා චවිත්වාන තිදසෙ උපපජ්ජහං, එත්ථන්තරෙ න පස්සාමි දොමනස්සමහං තදා.
2875. තාවතිංසා චවිත්වාන මාතුකුච්ඡිං සමොක්කමිං, නික්ඛමිත්වාන කුච්ඡිම්හා කණ්හසුක්කමජානහං.
2876. ජාතියා සත්තවස්සොව{3} ආරාමං පාවිසිං අහං, ගොතමස්ස භගවතො සක්යපුත්තස්ස තාදිනො.
2877. විත්ථාරිතෙ{4} පාවචනෙ බාහුජඤ්ඤම්හි සාසනෙ, අද්දසං සාසනකරෙ භික්ඛවො තත්ථ සත්ථුනො.
2878. සාවත්ථි නාම නගරං රාජා තත්ථාසි කොසලො, රථෙන නාගයුත්තෙන උපෙසි බොධිමුත්තමං.
2879. තස්සාහං නාගං දිස්වාන පුබ්බකම්මමනුස්සරිං, අඤ්ජලිං පග්ගහෙත්වාන සමයං අගමාසහං.
2880. ජාතියා සත්තවස්සොව පබ්බජිං අනගාරියං, යො සො බුද්ධං උපට්ඨාසි ආනන්දො නාම සාවකො.
2881. ගතිමා ධිතිමා චෙව සතිමා ච බහුස්සුතො, රඤ්ඤො චිත්තං පසාදෙන්තො නිය්යාදෙසි මහාජුති.
2882. තස්සාහං ධම්මං සුත්වාන පුබ්බකම්මමනුස්සරිං, තත්ථෙව ඨිතකො සන්තො අරහත්තමපාපුණිං.
2883. එකංසං චීවරං කත්වා සිරෙ කත්වාන අඤ්ජලිං, සම්බුද්ධමභිවාදෙත්වා ඉමං වාචමුදීරයිං:
2884. පදුමුත්තරබුද්ධස්ස දිපදින්දස්ස{5} සත්ථුනො, නිග්ගුණ්ඩිපුප්ඵං පග්ගය්හ සීහාසනෙ ඨපෙසහං.
2885. තෙන කම්මෙන දිපදින්ද ලොකට්ඨෙ නරාසභ, පත්තොම්හි අචලං ඨානං හිත්වා ජයපරාජයං.
2886. පඤ්චවීසසහස්සම්හි කප්පානං මනුජාධිපා, අබ්බුදනිරබ්බුදානි අට්ඨ’ට්ඨා’සිංසු ඛත්තියා.
2887. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා නිග්ගුණ්ඩිපුප්ඵයො ථෙරො ඉමා ගාථායො අභාසිත්ථාති.
නිග්ගුණ්ඩිපුප්ඵියත්ථෙරස්ස අපදානං සත්තමං.
328. සුමනාවෙලියත්ථෙරාපදානං.
2888. වෙස්සභුස්ස භගවතො ලොකජෙට්ඨස්ස තාදිනො, සබ්බෙ ජනා සමාගම්ම මහාපූජං කරොන්ති තෙ.
2889. සුධාය පිණ්ඩං කත්වාන ආවෙලං සුමනායහං, සීහාසනස්ස පුරතො අභිරොපෙසහං තදා.
2890. සබ්බෙ ජනා සමාගම්ම පෙක්ඛන්ති පුප්ඵමුත්තමං, කෙනි’දං පූජිතං පුප්ඵං බුද්ධසෙට්ඨස්ස තාදිනො.
2891. තෙන චිත්තප්පසාදෙන නිම්මාණං උපපජ්ජහං, අනුභොසිං{1} සකං කම්මං පුබ්බෙ සුකතමත්තනො.
2892. යං යං යොනුපපජ්ජාමි දෙවත්තං අථ මානුසං, සබ්බෙසානං පියො හොමි පුප්ඵපූජායි’දං ඵලං.
2893. නාභිජානාමි කායෙන වාචාය උද චෙතසා, සංයතානං තපස්සීනං කතං අක්කොසිතං මයා.{2}
2894. තෙන සුචරිතෙනාහං චිත්තස්ස පණිධීහි ච, සබ්බෙසං පූජිතො හොමි අනක්කොසස්සි’දං ඵලං.
2895. එකතිංසෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායි’ඉදං ඵලං.{2}
2896. ඉතො එකාදසෙ කප්පෙ සහස්සාරො’සි ඛත්තියො, සත්තරතනසම්පන්නො චක්කවත්තී මහබ්බලො.
2897. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සුමනාවෙලියො ථෙරො ඉමා ගාථායො අභාසිත්ථාති.
සුමනාවෙලියත්ථෙරස්ස අපදානං අට්ඨමං.
329. පුප්ඵඡත්තියත්ථෙරාපදානං.
2898. සිද්ධත්ථස්ස භගවතො ලොකජෙට්ඨස්ස තාදිනො, සච්චං පකාසයන්තස්ස නිබ්බාපෙන්තස්ස පාණිනො.
2899. ජලජං ආහරිත්වාන සතපත්තං මනොරමං, පුප්ඵස්ස ඡත්තං කත්වාන බුද්ධස්ස අභිරොපයිං.
2900. සිද්ධත්ථො ච ලොකවිදූ ආහුතීනං පටිග්ගහො, භික්ඛුසඞ්ඝෙ ඨිතො සත්ථා ඉමං ගාථං{1} අභාසථ:
2901. “යො මෙ චිත්තං පසාදෙත්වා පුප්ඵඡත්තං අධාරයි{2} තෙන චිත්තප්පසාදෙන දුග්ගතිං සො න ගච්ඡති.”
2902. ඉදං වත්වාන සම්බුද්ධො සිද්ධත්ථො ලොකනායකො, උය්යොජෙත්වාන පරිසං වෙහාසං නභමුග්ගමි.
2903. වුට්ඨිතෙ නරදෙවම්භි සෙතච්ඡත්තම්පි වුට්ඨහි, පුරතො බුද්ධසෙට්ඨස්ස ගච්ඡති ඡත්තමුත්තමං.
2904. චතුනවුතෙ ඉතො කප්පෙ යං ඡත්තමභිරොපයිං, දුග්ගතිං නාභිජානාමි පුප්ඵඡත්තස්සි’දං ඵලං.
2905. චතුසත්තතිකප්පම්හි අට්ඨ ජලසිඛා අහූ, සත්තරතනසම්පන්නා චක්කවත්තී මහබ්බලා.
2906. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පුප්ඵඡත්තියො ථෙරො ඉමා ගාථායො අභාසිත්ථාති.
පුප්ඵඡත්තියත්ථෙරස්ස අපදානං නවමං.
330. සපරිවාරඡත්තදායකත්ථෙරාපදානං.
2907. පදුමුත්තරො ලොකවිදූ ආහුතීනං පටිග්ගහො, අකාසෙ ජලවුට්ඨී’ව වස්සති ධම්මවුට්ඨියා.
2908. තමද්දසාසිං සම්බුද්ධං දෙසෙන්තං අමතං පදං, සකං චිත්තං පසාදෙත්වා අගමාසිං සකං ඝරං.
2909. ඡත්තං අලඞ්කතං ගය්හ උපගච්ඡිං නරුත්තමං, හට්ඨො හට්ඨෙන චිත්තෙන ආකාසෙ උක්ඛිපිං අහං.
2910. සුසඞ්ගහිතයානංව දන්තොව සාවකුත්තමො, උපගන්ත්වාන සම්බුද්ධං මත්ථකෙ සම්පතිට්ඨහි.
2911. අනුකම්පකො කාරුණිකො බුද්ධො ලොකග්ගනායකො, භික්ඛුසඞ්ඝෙ නිසීදිත්වා ඉමා ගාථා අභාසථ:
2912. “යෙන ඡත්තමිදං දින්නං අලඞ්කතං මනොරමං, තෙන චිත්තප්පසාදෙන දුග්ගතිං සො න ගච්ඡති.
2913. සත්තක්ඛත්තුඤ්ච දෙවෙසු දෙවරජ්ජං කරිස්සති, බත්තිංසක්ඛත්තුං රාජා ච{1} චක්කවත්තී භවිස්සති.
2914. කප්පසතසහස්සම්හි ඔක්කාකකුලසම්භවො, ගොතමො නාම නාමෙන සත්ථා ලොකෙ භවිස්සති.
2915. තස්ස ධම්මෙසු දායාදො ඔරසො ධම්මනිම්මිතො, සබ්බාසවෙ පරිඤ්ඤාය නිබ්බායිස්සතනාසවො.”
2916. බුද්ධස්ස ගිරමඤ්ඤාය වාචාසභිමුදීරිතං, පසන්නචිත්තො සුමනො භිය්යො හාසං ජනෙසහං.
2917. ජහිත්වා මානුසිං යොනිං දෙවයොනිං{2} සමජ්ඣගං, විමානමුත්තමං මය්හං අබ්භුග්ගතං මනොරමං.
2918. විමානා නික්ඛමන්තස්ස සෙතච්ඡත්තං ධරීයති, තදා සඤ්ඤං පටිලභිං පුබ්බකම්මස්සි’දං ඵලං.
2919. දෙවලොකා චවිත්වාන මනුස්සතත්තඤ්ච ආගමිං, ඡත්තිංසක්ඛත්තුං චක්කවත්තී සත්තකප්පසතම්භි’ තො.
2920. තම්හා කායා චවිත්වාන ආගඤ්ඡිං තිදසං පුරං, සංසරිත්වා’ නුපුබ්බෙන මානුස්සං පුනරාගමිං.
2921. ඔක්කන්තං මාතුකුච්ඡිං මං සෙතච්ඡත්තමධාරයුං, ජාතියා සත්තවස්සො’හං පබ්බජිං අනගාරියං.
2922. සුනන්දො නාම නාමෙන බ්රාහ්මණො මන්තපාරගූ, ඵලිකං ඡත්තමාදාය සාවකග්ගස්ස සො අදා.{3}
2923. අනුමොදි මහාවීරො සාරිපුත්තො මහාකථී, සුත්වා’නුමොදනං තස්ස පුබ්බකම්මමනුස්සරිං.
2924. අඤ්ජලිම්පග්ගහෙත්වාන සකං චිත්තං පසාදයිං, සරිත්වා පුරිමං කම්මං අරහත්තමපාපුණිං.
2925. උට්ඨාය ආසනා තම්හා සිරෙ කත්වාන අඤ්ජලිං, සම්බුද්ධමභිවාදෙත්වා ඉමං වාචමුදීරයිං:
2926. සතසහස්සෙ ඉතො කප්පෙ බුද්ධො ලොකෙ අනුත්තරො, පදුමුත්තරො ලොකවිදූ ආහුතීනං පටිග්ගහො.
2927. තස්ස ඡත්තං මයා දින්නං විචිත්තං සමලඞ්කතං, උභො හත්ථෙහි පග්ගණ්හි සයම්භූ අග්ගපුග්ගලො.
2928. අහො බුද්ධො අහො ධම්මො අහො නො සත්ථු සම්පදා, එකච්ඡත්තස්ස දානනෙ දුග්ගතිං නූපපජ්ජ’හං.
2929. කිලෙසා ඣාපිතා මය්හං භවා සබ්බෙ සමූහතා, සබ්බාසවෙ පරිඤ්ඤාය විහරාමි අනාසවො.
2930. පටිසම්භිදා චතස්සො විමොක්ඛා පි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සපරිවාරජත්තදායකො ථෙරො ඉමා ගාථායො අභාසිත්ථාති.
සපරිවාරජත්තදායකත්ථෙරස්ස අපදානං දසමං.
උද්දානං:
උම්මාපුප්ඵඤ්ච පුලිනං හාසො යඤ්ඤො නිමිත්තකො, සංසාවකො නිග්ගුණ්ඩී ච සුමනං පුප්ඵඡත්තකො, සපරිවාරඡත්තො ච ගාථා සත්තසතුත්තරා.
උම්මාපුප්ඵියවග්ගො තෙත්තිංසතිමො.
34. ගන්ධධූපියවග්ගො
331. ගන්ධධූපියත්ථෙරාපදානං.
2931. සිද්ධත්ථස්ස භගවතො ගන්ධධූපමදාසහං, සුමනෙහි පටිච්ඡන්නං බුද්ධානුච්ඡවිකඤ්ච තං.
2932. කඤ්චනග්ඝියසඞ්කාසං සම්බුද්ධං ලොකනායකං,{1} ඉන්දීවරංව ජලිතං ආදිත්තංව හුතාසනං.
2933. ව්යග්ඝූසභංව පවරං අභිජාතංව කෙසරිං, නිසින්නං සමණානග්ගභික්ඛුසඞ්ඝපුරක්ඛතං.
2934. දිස්වා චිත්තං පසාදෙත්වා පග්ගහෙත්වාන අඤ්ජලිං, වන්දිත්වා සත්ථුනො පාදෙ පක්කාමිං උත්තරාමුඛො.
2935. චතුනවුතෙ ඉතො කප්පෙ යං ගන්ධමදදිං තදා, දුග්ගතිං නාභිජානාමි ගන්ධපූජායිදං ඵලං.
2936. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ගන්ධධූපියො ථෙරො ඉමා ගාථායො අභාසිත්ථාති.
ගන්ධධූපියත්ථෙරස්ස අපදානං පඨමං.
332. උදකපූජකත්ථෙරාපදානං.
2937. සුවණ්ණවණ්ණං සම්බුද්ධං ගච්ඡන්තං අනිලඤ්ජසෙ, ඝතාසනංව ජලිතං ආදිත්තංව හුතාසනං.
2938. පාණිනා උදකං ගය්හ ආකාසෙ උක්ඛිපිං අහං, සම්පටිච්ඡි මහාවීරො බුද්ධො කාරුණිකො ඉසි.
2939. අන්තලික්ඛෙ ඨිතො සත්ථා පදුමුත්තරනාමකො, මම සඞ්කප්පමඤ්ඤාය ඉමං ගාථමභාසථ:
2940. “ඉමිනා දකදානෙන පීතිඋප්පාදනෙන ච, කප්පසතසහස්සම්පි දුග්ගතිං නූපපජ්ජසි.”
2941. තෙන කම්මෙන දිපදින්ද ලොකජෙට්ඨ නරාසභ, පත්තොම්හි අචලං ඨානං හිත්වා ජයපරාජයං.
2942. සහස්සරාජනාමෙන තයො ච චක්කවත්තිනො, පඤ්චසට්ඨිකප්පසතෙ චාතුරන්තා ජනාධිපා.
2943. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උදකපූජකො ථෙරො ඉමා ගාථායො අභාසිත්ථාති.
උදකපූජකත්ථෙරස්ස අපදානං දුතියං.
333. පුන්නාගපුප්ඵියත්ථෙරාපදානං
2944. කානනං වනමොගය්හ වසාමි ලුද්දකො අහං, පුන්නාගං පුප්ඵිතං දිස්වා බුද්ධසෙට්ඨං අනුස්සරිං.