2802. තාය වාචාය මධුරාය සඞ්ගණ්හාති{1} මහාජනං, ඝොසො ච විපුලො ආසි ආසංසො{2} දෙවමානුසෙ.
2803. නිග්ඝොසසසද්දං සුත්වාන සිද්ධත්ථස්ස මහෙසිනො, සද්දෙ චිත්තං පසාදෙත්වා අවන්දිං ලොකනායකං.
2804. චතුනවුතෙ ඉතො කප්පෙ යං සඤ්ඤමලභිං තදා, දුග්ගතිං නාභිජානාමි බුද්ධසඤ්ඤායිදං ඵලං.
2805. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සද්දසඤ්ඤකො ථෙරො ඉමා ගාථායො අභාසිත්ථාති.
සද්දසඤ්ඤකත්ථෙරස්ස අපදානං සත්තමං.
318. තිරංසියත්ථෙරාපදානං.
2806. කෙසරිං අභිජාතංව අග්ගික්ඛන්ධංව පබ්බතෙ, ඔභාසෙන්තං දිසා සබ්බා{3} සිද්ධත්ථං පබ්බතන්තරෙ.
2807. සුරියස්ස ච ආලොකං චන්දාලොකං තථෙව ච, බුද්ධාලොකඤ්ච දිස්වාන විත්ති මෙ උදපජ්ජථ.{4}
2808. තයො ආලොකෙ දිස්වාන බුද්ධඤ්ච{5} සාවකුත්තමං, එකංසං අජිනං කත්වා සන්ථවිං ලොකනායකං.
2809. තයො හි ආලොකකරා ලොකෙ ලොකතමොනුදා, චන්දො ච සුරියො චාපි බුද්ධො ච ලොකනායකො.
2810. ඔපම්මමුපදස්සෙත්වා කිත්තිතො මෙ මහාමුනි, බුද්ධස්ස වණ්ණං කිත්තෙත්වා කප්පං සග්ගම්හි මොදහං.
2811. චතුනවුතෙ ඉතො කප්පෙ යං බුද්ධමභිකිත්තයිං, දුග්ගතිං නාභිජානාමි කිත්තනාය ඉදං ඵලං.
2812. එකසට්ඨිම්භිතො කප්පෙ එකො ඤාණධරො අහු, සත්තරතනසම්පන්නො චක්කවත්තී මහබ්බලො.
2813. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිරංසියො ථෙරො ඉමා ගාථායො අභාසිත්ථාති.
තිරංසියත්ථෙරස්ස අපදානං අට්ඨමං.
319. කන්දලිපුප්ඵියත්ථෙරාපදානං.
2814. සින්ධුයා නදියා තීරෙ අහොසිං කස්සකො තදා, පරකම්මායනෙ යුත්තො පරභත්තං අපස්සිතො.
2815. සින්ධුමනුචරන්තො’හං සිද්ධත්ථං ජිනමද්දසං, සමාධිනා නිසින්නංව සතපත්තංව පුප්ඵිතං.
2816. සත්ත කන්දලිපුප්ඵානි වණ්ටෙ ඡෙත්වානහං තදා, මත්ථකෙ අභිරොපෙසිං බුද්ධස්සාදිච්චබන්ධුනො.
2817. සුවණ්ණවණ්ණං සම්බුද්ධං අනුකූලෙ සමාහිතං, තිධා පභින්නමාතඞ්ගං කුඤ්ජරංව දුරාසදං.
2818. තමහං උපගන්ත්වාන නිපකං භාවිතින්ද්රියං, අඤ්ජලිං පග්ගහෙත්වාන අවන්දිං සත්ථුනො අහං.
2819. චතුනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2820. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කන්දලිපුප්ඵියො ථෙරො ඉමා ගාථායො අභාසිත්ථාති.
කන්දලිපුප්ඵියත්ථෙරස්ස අපදානං නවමං.
320. කුමුදමාලියත්ථෙරාපදානං.
2821. උසභං පවරං වීරං මහෙසිං විජිතාවිනං, විපස්සිනං මහාවීරං අභිජාතංව කෙසරිං.
2822. රථියං පටිජ්ජන්තං ආහුතීනං පටිග්ගහං, ගහෙත්වා කුමුදං මාලං බුද්ධසෙට්ඨං සමොකිරිං.
2823. එකනවුතෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2824. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කුමුදමාලියො ථෙරො ඉමා ගාථායො අභාසිත්ථාති.
කුමුදමාලියත්ථෙරස්ස අපදානං දසමං.
උද්දානං:
ආරක්ඛදො භොජනදො ගතසඤ්ඤී පදුමියො, පුප්ඵාසනි සන්ථවිකො සද්දසඤ්ඤී තිරංසිකො කන්දලිකො කුමුදී ච සත්තපඤ්ඤාස ගාථකා.
ආරක්ඛදායකවග්ගො බත්තිංසතිමො.
33. උම්මාපුප්ඵියවග්ගො
321. උම්මාපුප්ඵියත්ථෙරාපදානං{*}
2825. සමාහිතං සමාපන්නං සිද්ධත්ථමපරාජිතං, සමාධිනා උපවිට්ඨං අද්දසාහං නරුත්තමං.
2826. උම්මාපුප්ඵං ගහෙත්වාන බුද්ධස්ස අභිරොපයිං, සබ්බෙ පුප්ඵා එකසීසා උද්ධවණ්ටා{1} අධොමුඛා.
2827. සුචිත්තා විය තිට්ඨන්තෙ ආකාසෙ පුප්ඵසන්ථරෙ{2}, තෙන චිත්තප්පසාදෙන තුසිතං උපපජ්ජහං.
2828. චතුනවුතෙ ඉතො{3} කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2829. පඤ්චපඤ්ඤාසිතො කප්පෙ එකො ආසිං මහීපති, සමන්තච්ඡදනො නාම චක්කවත්තී මහබ්බලො.
2830. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා උම්මාපුප්ඵියො ථෙරො ඉමා ගාථායො අභාසිත්ථාති.
උම්මාපුප්ඵියත්ථෙරස්ස අපදානං පඨමං.
322. පුලිනපුජකත්ථෙරාපදානං.
2831. කකුධං විපසන්තංව නිසභාජානියං යථා, ඔසධිංව විරොචන්තං ඔභාසන්තං නාරාසභං.
2832. අඤ්ජලිං පග්ගහෙත්වාන අවන්දිං සත්ථුනො අහං, සත්ථාරං පරිවණ්ණෙසිං සකකම්මෙන තොසිතො.{4}
2833. සුසුද්ධං පුලිනං ගය්හ ගතමග්ගෙ සමොකිරිං, උච්ඡඞ්ගෙන ගහෙත්වාන විපස්සිස්ස මහෙසිනො.
2834. තතො උපඩ්ඪපුලිනං විප්පසන්නෙන චෙතසා, දිවාවිහාරෙ ඔසිඤ්චිං දිපදින්දස්ස තාදිනො.
2835. එකනවුතෙ ඉතො කප්පෙ පුලිනං යමසිඤ්චහං, දුග්ගතිං නාභිජානාමි පුලිනස්ස ඉදං ඵලං.
2836. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පුලිනපූජකො ථෙරො ඉමා ගාථායො අභාසිත්ථාති.
පුලිනපූජකත්ථෙරස්ස අපදානං දුතියං.
323. හාසජනකත්ථෙරාපදානං.
2837. දුමග්ගෙ පංසුකූලකං{1} ලග්ගං දිස්වාන සත්ථුනො, අඤ්ජලිම්පග්ගහෙත්වාන භිය්යො උච්චරිතං මයා.
2838. දූරතො පතිදිස්වාන{2} හාසො මෙ උදපජ්ජථ,{3} අඤ්ජලිම්පග්ගහෙත්වාන භිය්යො චිත්තං පසාදයිං.
2839. එකනවුතෙ ඉතො කප්පෙ යං සඤ්ඤමලභිං තදා, දුග්ගතිං නාභිජානාමි බුද්ධසඤ්ඤායිදං ඵලං.
2840. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා හාසජනකො ථෙරො ඉමා ගාථායො අභාසිත්ථාති.
හාසජනකත්ථෙරස්ස අපදානං තතියං.
324. යඤ්ඤසාමිකත්ථෙරාපදානං.
2841. ජාතියා සත්තවස්සොහං අහොසිං මන්තපාරගූ, කුලවංසං{4} අධාරෙසිං යඤ්ඤො උස්සාහිතො මයා.
2842. චුල්ලාසීතිසහස්සානි පසූ හඤ්ඤන්ති මෙ තදා, සාරථම්භුපනීතානි{5} යඤ්ඤත්ථාය උපට්ඨිතා.
2843. උක්කාමුඛපහට්ඨොව ඛදිරඞ්ගාරසන්නිභො, උදයන්තොව සුරියො පුණ්ණමාසෙව චන්දිමා.
2844. සිද්ධත්ථො සබ්බසිද්ධත්ථො තිලොකමභිතො හිතො, උපගන්ත්වාන සම්බුද්ධො ඉදං වචනමබ්රවි-
2845. “අහිංසා සබ්බපාණානං කුමාර මම රුච්චති, ථෙය්යා ච අතිචාරා ච මජ්ජපානා ච ආරති.
2846. රති ච සමචරියාය බාහුසච්චං කතඤ්ඤුතා, දිට්ඨෙ ධම්මෙ පරත්ථ ච එතෙ ධම්මා පසංසියා.
2847. එතෙ ධම්මෙ භාවයිත්වා සබ්බසත්තහිතෙ රතො, බුද්ධෙ චිත්තං පසාදෙත්වා භාවෙහි මග්ගමුත්තමං”.
2848. ඉදං වත්වාන සබ්බඤ්ඤූ ලොකජෙට්ඨො නරාසභො, මමෙවමනුසාසිත්වා වෙහාසමුග්ගතො ගතො.
2849. පුබ්බෙ චිත්තං විසොධෙත්වා පච්ඡා චිත්තං පසාදයිං, තෙන චිත්තප්පසාදෙන තුසිතං උපපජ්ජහං.
2850. චතුනවුතෙ ඉතො කප්පෙ යදා චිත්තං පසාදයිං, දුග්ගතිං නාභිජානාමි බුද්ධසඤ්ඤායිදං ඵලං.
2851. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා යඤ්ඤසාමිකො ථෙරො ඉමා ගාථායො අභාසිත්ථාති.
යඤ්ඤසාමිකත්ථෙරස්ස අපදානං චතුත්ථං.
325. නිමිත්තසඤ්ඤකත්ථෙරාපදානං.
2852. වන්දහාගානදීතීරෙ වසාමි අස්සමෙ අහං, සුවණ්ණමිග මද්දක්ඛිං චරන්තං විපිනෙ අහං.
2853. මිගෙ චිත්තං පසාදෙත්වා ලොකජෙට්ඨමනුස්සරිං, තෙන චිත්තප්පසාදෙන අඤ්ඤෙ බුද්ධෙ අනුස්සරිං.
2854. අබ්භතීතා ච යෙ බුද්ධා වත්තමානා අනාගතා, එවමෙව විරොචන්ති මිගරාජාව තෙ තයො.
2855. චතුනවුතෙ ඉතො කප්පෙ යං සඤ්ඤමලභිං තදා, දුග්ගතිං නාභිජානාමි බුද්ධසඤ්ඤායිදං ඵලං.
2856. සත්තවීසෙ ඉතො කප්පෙ එකො ආසිං මහීපති, අරඤ්ඤසත්තො නාමෙන චක්කවත්තී මහබ්බලො.
2857. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා නිමිත්තසඤ්ඤකො ථෙරො ඉමා ගාථායො අභාසිත්ථාති.
නිමිත්තසඤ්ඤකත්ථෙරස්ස අපදානං පඤ්චමං.
326. අන්නසංසාවකත්ථෙරාපදානං.
2858. සුවණ්ණවණ්ණං සම්බුද්ධං ගච්ඡන්තං අන්තරාපණෙ, කඤ්චනග්ඝියසඞ්කාසං බත්තිංසවරලක්ඛණං.
2859. සිද්ධත්ථං සබ්බසිද්ධත්ථං අනෙජමපරාජිතං, සම්බුද්ධං අතිනාමෙත්වා භොජයිං තං මහාමුනි.
2860. මුනි කාරුණිකො ලොකෙ ඔභාසයි මමං තදා, බුද්ධෙ චිත්තං පසාදෙත්වා කප්පං සග්ගම්හි මොදහං.
2861. චතුනවුතෙ ඉතො කප්පෙ යං දානමදදිං තදා, දුග්ගතිං නාභිජානාමි භික්ඛාදානස්සිදං ඵලං.
2862. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අන්නසංසාවකො ථෙරො ඉමා ගාථායො අභාසිත්ථාති.
අන්නසංසාවකත්ථෙරස්ස අපදානං ඡට්ඨං.
327. නිග්ගුණ්ඩිපුප්ඵියත්ථෙරාපදානං
2863. යදා දෙවො දෙවකායා චවති ආයුසඞ්ඛයා, තයො සද්දා නිච්ඡරන්ති දෙවානං අනුමොදතං.
2864. “ඉතො භො සුගතිං ගච්ඡ මනුස්සානං සහව්යතං, මනුස්සභූතො සද්ධම්මෙ ලභ සද්ධමනුත්තරං.
2865. සා තෙ සද්ධා නිවිට්ඨස්ස මූලජාතා පතිට්ඨිතා, යාවජීවං අසංහීරා සද්ධම්මෙ සුප්පවෙදිතෙ.
2866. කායෙන කුසලං කත්වා වාචාය කුසලං බහුං, මනසා කුසලං කත්වා අබ්යාපජ්ජං නිරූපධිං.
2867. තතො ඔපධිකං පුඤ්ඤං කත්වා දානෙන තං බහුං, අඤ්ඤෙපි මච්චෙ සද්ධම්මෙ බ්රහ්මචරියෙ නිවෙසය”.