306. සම්පසාදකත්ථෙරාපදානං.
2740. නමො තෙ බුද්ධවීරත්ථු විප්පමුත්තොසි සබ්බධි, ව්යසනං හි{1} අනුප්පත්තො තස්ස මෙ සරණං භව.
2741. සිද්ධත්ථො තස්ස ව්යාකාසි ලොකෙ අප්පටිපුග්ගලො, මහොදධිසමො සඞ්ඝො අප්පමෙය්යො අනුත්තරො.
2742. තත්ථ ත්වං විරජෙ ඛෙත්තෙ අනන්තඵලදායකෙ, සඞ්ඝො චිත්තං පසාදෙහි{2} සුබීජං වාපි{3} රොපය.
2743. ඉදං වත්වාන සබ්බඤ්ඤූ ලොකජෙට්ඨො නරාසභො, මමෙවං{4} අනුසාසිත්වා වෙහාසං නභමුග්ගමි.
2744. අචිරං ගතමත්තම්හි සබ්බඤ්ඤුම්හි නරාසභෙ, මරණං සමනුප්පත්තො තුසිතං උපපජ්ජහං.
2745. තදාහං විරජෙ ඛෙත්තෙ අනන්තඵලදායකෙ, සඞ්ඝෙ චිත්තං පසාදෙත්වා කප්පං සග්ගම්හි මොදහං.
2746. චතුනවුතෙ ඉතො{5} කප්පෙ පසාදමලභිං තදා, දුග්ගතිං නාභිජානාමි පසාදස්ස ඉදං ඵලං.
2747. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සම්පසාදාකො ථෙරො ඉමා ගාථායො අභාසිත්ථාති.
සම්පසාදකත්ථෙරස්ස අපදානං ඡට්ඨං.
307. ආරාමදාකත්ථෙරාපදානං.
2748. සිද්ධත්ථස්ස භගවතො ආරාමො රොපිතො මයා, සන්දච්ඡායෙසු රුක්ඛෙසු උපසන්තෙසු පක්ඛිසු.
2749. අද්දසං විරජං බුද්ධං ආහුතීනං පටිග්ගහං, ආරාමං අතිනාමෙසිං ලොකජෙට්ඨං නරාසභං.
2750. හට්ඨො හට්ඨෙන චිත්තෙන ඵලං පුප්ඵඤ්චදාසහං{1}, තතො ජාතප්පසාදො ච{2} තං වනං පරිණාමයිං.
2751. බුද්ධස්ස යමිදං දාසිං විප්පසන්නෙන චෙතසා, භවෙ නිබ්බත්තමානම්හි නිබ්බත්තති ඵලං මම.
2752. චතුනවුතෙ ඉතො කප්පෙ යමාරාමං දදිං{3} තදා, දුග්ගතිං නාභිජානාමි ආරාමස්ස ඉදං ඵලං.
2753. සත්තතිංසෙ ඉතො කප්පෙ සත්තාසුං මුදුසීතලා, සත්තරතනසම්පන්නා චක්කවත්තී මහබ්බලා.
2754. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ආරාමදායකො ථෙරො ඉමා ගාථායො අභාසිත්ථාති.
ආරාමදායකත්ථෙරස්ස අපදානං සත්තමං.
308. අනුලෙපදායකත්ථෙරාපදානං.
2755. අත්ථදස්සිස්ස මුනිනො අද්දසං සාවකං අහං, කවකම්මං කරොන්තස්ස සීමාය උපගච්ඡහං.
2756. නිට්ඨිතෙ නවකම්මෙ ච අනුලෙපමදාසහං, පසන්නචිත්තො සුමනො පුඤ්ඤක්ඛෙත්තෙ අනුත්තරෙ.
2757. අට්ඨාරසෙ කප්පසතෙ යං කම්මමකරිං තදා, දුග්ගතිං නාභිජානාමි අනුලෙපස්සිදං ඵලං.
2758. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අනුලෙපදායකො ථෙරො ඉමා ගාථායො අභාසිත්ථාති.
අනුලෙපදායකත්ථෙරස්ස අපදානං අට්ඨමං.
309. බුද්ධසඤ්ඤකත්ථෙරාපදානං.
2759. උදෙන්තං සතරංසිං’ව පීතරංසිං’ව භානුමං, වනන්තරගතං සන්තං ලොකජෙට්ඨං නරාසභං.
2760. අද්දසං සුපිනන්තෙන සිද්ධත්ථං ලොකනායකං, තත්ථ චිත්තං පසාදෙත්වා සුගතිං උපපජ්ජහං.
2761. චතුනවුතෙ ඉතො කප්පෙ යං සඤ්ඤමලභිං තදා, දුග්ගතිං නාභිජානාමි බුද්ධසඤ්ඤායිදං ඵලං.
2762. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා බුද්ධසඤ්ඤකො ථෙරො ඉමා ගාථායො අභාසිත්ථාති.
බුද්ධසඤ්ඤකත්ථෙරස්ස අපදානං නවමං.
310. පබභාරදායකත්ථෙරාපදානං.
2763. පියදස්සිනො භගවතො පබ්භාරො සොධිතො මයා, ඝටකඤ්ච උපට්ඨාසිං පරිභොගාය තාදිනො.
2764. තං මෙ බුද්ධො වියාකාසි පියදස්සී මහාමුනි, සහස්සකණ්ඩො සතභෙණ්ඩු ධජාලූ හරිතාමයො.
2765. නිබ්බත්තිස්සති සො යූපො රතනඤ්ච අනප්පකං, පබ්භාරදානං දත්වාන කප්පං සග්ගම්හි මොදහං.
2766. ඉතො බත්තිංසකප්පම්භි සුසුද්ධො නාම ඛත්තියො, සත්තරතනසම්පන්නො චක්කවත්තී මහබ්බලො.
2767. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පබ්භාරදායකො ථෙරො ඉමා ගාථායො අභාසිත්ථාති.
පබ්භාරදායකත්ථෙරස්ස අපදානං දසමං.
උද්දානං:
කෙසරං ගන්ධ මන්නඤ්ච ධම්මසඤ්ඤී ඵලෙන ච, පසාදාරාමදායී ච ලෙපකො බුද්ධසඤ්ඤකො, පබ්භාරදො ච ගාථායො එකපඤ්ඤාස කිත්තිතා.
පදුමකෙසරියවග්ගො{1} එකතිංසතිමො.
32. ආරක්ඛදායකවග්ගො
311. ආරක්ඛදායකත්ථෙරාපදානං.
2768. ධම්මදස්සිස්ස මුනිනො වති කාරාපිතා මයා, ආරක්ඛො ච මයා දින්නො දිපදින්දස්ස{1} තාදිනො.
2769. අට්ඨාරසෙ කප්පසතෙ යං කම්මමකරිං තදා, තෙන කම්මවිසෙසෙන පත්තො මෙ ආසවක්ඛයො.
2770. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ආරක්ඛදායකො ථෙරො ඉමා ගාථායො අභාසිත්ථාති.
ආරක්ඛදායකත්ථෙරස්ස අපදානං පඨමං.
312. භොජනදායකත්ථෙරාපදානං.
2771. සුජාතො සාලලට්ඨීව සොභඤ්ජනමිවුග්ගතො, ඉන්දලට්ඨිරිවාකාසෙ විරොචති සදා ජිනො.
2772. තස්ස දෙවාතිදෙවස්ස වෙස්සභුස්ස මහෙසිනො, අදාසිං භොජනමහං විප්පසන්නෙන චෙතසා.
2773. තං මෙ බුද්ධො අනුමොදි සයම්භූ අපරාජිතො, ‘භවෙ නිබ්බත්තමානම්හි ඵලං නිබ්බත්තතූ තව.’
2774. එකතිංසෙ{2} ඉතො කප්පෙ යං දානමදදිං තදා, දුග්ගතිං නාභිජානාමි භොජනස්ස ඉදං ඵලං.
2775. පඤ්චවීසෙ ඉතො කප්පෙ එකො ආසිං අමිත්තභො{3}, සත්තරතනසම්පන්නො චක්කවත්තී මහබ්බලො.
2776. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා භොජනදායකො ථෙරො ඉමා ගාථායො අභාසිත්ථාති.
භොජනදායකත්ථෙරස්ස අපදානං දුතියං.
313. ගතසඤ්ඤකත්ථෙරාපදානං.
2777. ආකාසෙ ච{4} පදං නත්ථි අම්බරෙ අනිලඤ්ජසෙ, සිද්ධත්ථං ජිනමදදක්ඛිං ගච්ඡන්තං තිදිවඞ්ගණෙ{5}.
2778. අනිලෙනෙරිතං දිස්වා සම්මාසම්බුද්ධචීවරං, විත්ති මෙ තාවදෙ ජාතා{6} දිස්වාන ගමනං මුනෙ{7}.
2779. චතුනවුතෙ ඉතො කප්පෙ යං සඤ්ඤමලභිං තදා, දුග්ගතිං නාභිජානාමි බුද්ධසඤ්ඤායිදං ඵලං.
2780. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ගතසඤ්ඤක ථෙරො ඉමා ගාථායො අභාසිත්ථාති.
ගතසඤ්ඤකත්ථෙරස්ස අපදානං තතියං.
314. සත්තපදුමියත්ථෙරාපදානං.
2781. නදීකූලෙ මසාමහං නෙසාදො නාම බ්රාහ්මණො, සතපත්තෙහි පුප්ඵෙහි සම්මජ්ජිත්වාන අස්සමං.
2782. සුවණ්ණවණ්ණං සම්බුද්ධං සිද්ධත්ථං ලොකනායකං, දිස්වා වනෙන{1} ගච්ඡන්තං හාසො මෙ උපපජ්ජථ.
2783. පච්චුග්ගන්ත්වාන සම්බුද්ධං ලොකජෙට්ඨං නරාසභං, අස්සමං අතිනාමෙත්වා ජලජග්ගෙහි ඔකිරිං.
2784. චතුනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
2785. ඉතො තෙසත්තමෙ කප්පෙ චතුරො පාදපාවරා, සත්තරතනසම්පන්නා චක්කවත්තී මහබ්බලා.
2786. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා සත්තපදුමියො ථෙරො ඉමා ගාථායො අභාසිත්ථාති.
සත්තපදුමියත්ථෙරස්ස අපදානං චතුත්ථං.
315. පුප්ඵාසනදායකත්ථෙරාපදානං.
2787. සුවණ්ණවණ්ණං සම්බුද්ධං සතරංසිං’ව{2} භානුමං, අවිදූරෙන ගච්ඡන්තං සිද්ධත්ථං අපරාජිතං.
2788. තස්ස පච්චුග්ගමිත්වාන පවෙසෙත්වාන අස්සමං, පුප්ඵාසනං මයා දින්නං විප්පසන්නෙන චෙතසා.
2789. අඤ්ජලිම්පග්ගහෙත්වාන වෙදජාතො තදා අහං, බුද්ධෙ චිත්තං පසාදෙත්වා තං කම්මං පරිණාමයිං.
2790. යං මෙ අත්ථි කතං පුඤ්ඤං සයම්භූම්හපරාජිතෙ, සබ්බෙ තෙන කුසලෙන විමලො හොමි සාසනෙ.
2791. චතුනවුතෙ ඉතො කප්පෙ පුප්ඵාසනමදං තදා, දුග්ගතිං නාභිජානාමි පුප්ඵාසනස්සිදං ඵලං.
2792. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පුප්ඵාසනදායකො ථෙරො ඉමා ගාථායො අභාසිත්ථාති.
පුප්ඵාසනදායකත්ථෙරස්ස අපදානං පඤ්චමං.
316. ආසනත්ථවිකත්ථෙරාපදානං.
2793. චෙතියං උත්තමං නාම සිඛිනො ලොකබන්ධුනො, අරඤ්ඤෙ ඉරිනෙ{1} වනෙ අන්ධාහිණ්ඩාමහං තදා.
2794. පවනා නික්ඛමිත්වාන දිට්ඨං සීහාසනං මයා, එකංසං අඤ්ජලිං කත්වා ථවිස්සං{2} ලොකනායකං.
2795. දිවසභාගං ථවිත්වාන බුද්ධං ලොකග්ගනායකං, හට්ඨො හට්ඨෙන චිත්තෙන ඉමං වාචමුදීරයිං.
2796. “නමො තෙ පුරිසාජඤ්ඤ නමො තෙ පුරිසුත්තම, සබ්බඤ්ඤූසි මහාවීර ලොකජෙට්ඨ නරාසභ”.
2797. අභිත්ථවිත්ථා සිඛිනං නිමිත්තකරණෙනහං, ආසනං අභිවාදෙත්වා පක්කාමි උත්තරාමුඛො.
2798. එකතිංසෙ ඉතො කප්පෙ සන්ථවිං{3} වදතං වරං, දුග්ගතිං නාභිජානාමි ථොමනාය ඉදං ඵලං.
2799. සත්තවීසෙ ඉතො කප්පෙ අතුල්යා{4} සත්ත අස්සු තෙ, සත්තරතනසම්පන්නා චක්කවත්තී මහබ්බලා.
2800. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ආසනත්ථවිකො ථෙරො ඉමා ගාථායො අභාසිත්ථාති.
ආසනත්ථවිකත්ථෙරස්ස අපදානං ඡට්ඨං.
317. සද්දසඤ්ඤකත්ථෙරාපදානං.
2801. සුදස්සනො මහාවීරො දෙසෙන්තො අමතං පදං, පරිවුතො සාවකෙහි වසතී ඝරමුත්තමෙ.