ඉත්ථං සුදං ආයස්මා ඛණ්ඩඵුල්ලියො ථෙරො ඉමා ගාථායො අභාසිත්ථාති.
ඛණ්ඩඵුල්ලියත්ථෙරස්ස අපදානං තතියං.
194. අසොකපූජකත්ථෙරාපදානං
2230. තීවරායං{2} පුරෙ රම්මෙ රාජුය්යානමහූ තදා, උය්යානපාලො තත්ථාසිං රඤ්ඤො බද්ධචරො අහං.
2231. පදුමො නාම නාමෙන සයම්භූ සප්පභො අහු, නිසින්නං පුණ්ඩරීකම්භි ඡායා න ජහි තං මුනිං.
2232. අසොකං පුප්ඵි තං දිස්වා පිණ්ඩිභාරං සුදස්සනං, බුද්ධස්ස අභිරොපෙසිං ජලජුත්තමනාමිනො.
2233. චතුනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
2234. සත්තතිංසම්හිතො කප්පෙ සොළස අරුණඤ්ජහා{3}, සත්තරතනසම්පන්නො චක්කවත්තී මහබ්බලා.
2235. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අසොකපූජකො ථෙරො ඉමා ගාථායො අභාසිත්ථාති.
අසොකපූජකත්ථෙරස්ස අපදානං චතුත්ථං.
195. අඞ්කොලකත්ථෙරාපදානං.
2236. අඞ්කොලං පුප්ඵිතං දිස්වා මාලාවරං සකොසකං{1}, ඔචිනිත්වාන තං පුප්ඵං අගමං බුද්ධසන්තිකං.
2237. සිද්ධත්ථො තම්හි සමයෙ පටිලීනො{2} මහාමුනි, මුහුත්තං පතිමානෙත්වා ගුහායං පුප්ඵමොකිරිං.
2238. චතුනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං{3} ඵලං.
2239. ඡත්තිංසම්භි ඉතො කප්පෙ ආසෙකො දෙවගජ්ජිතො, සත්තරතනසම්පන්නො චක්කවත්තී මහබ්බලො.
2240. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා අඞ්කොලකො ථෙරො ඉමා ගාථායො අභාසිත්ථාති.
අඞ්කොලකත්ථෙරස්ස අපදානං පඤ්චමං.
196. කිසලයපූජකත්ථෙරාපදානං.
2241. නගරෙ ද්වාරවතියා මාලාවච්ඡො මමං අහු, උදපානො ච තත්ථෙව පාදපානං විරොහනො.
2242. සබලෙන උපත්ථද්ධො සිද්ධත්ථො අපරාජිතො, මමානුකම්පමානො සො ගච්ඡතෙ අනිලඤ්ජසෙ.
2243. අඤ්ඤං කිඤ්චි න පස්සාමි පූජායොග්ගං මහෙසිනො, අසොකපල්ලවං දිස්වා ආකාසෙ උක්ඛිපිං අහං.
2244. බුද්ධස්ස තෙ කිසලයා ගච්ඡතො යන්ති පච්ඡතො, සොහං දිස්වාන තං ඉද්ධිං{4} අහො බුද්ධස්සුළාරතා.
2245. චතුනවුතෙ ඉතො කප්පෙ පල්ලවං අභිරොපයිං, දුග්ගතිං නාභිජානාමි බුද්ධපූජායිදං ඵලං.
2246. සත්තවීසෙ{5} ඉතො කප්පෙ එකො එකස්සරො{6} අහු, සත්තරතනසම්පන්නො චක්කවත්ති මහබ්බලො.
2247. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කිසලයපූජකො ථෙරො ඉමා ගාථායො අභාසිත්ථාති.
කිසලයපූජකත්ථෙරස්ස අපදානං ඡට්ඨං.
197. තින්දුකදායකත්ථෙරාපදානං.
2248. ගිරිදුග්ගචරො ආසිං මක්කටො ථාමවෙගිකො, ඵලිනං තින්දුකං දිස්වා බුද්ධසෙට්ඨං අනුස්සරිං.
2249. නික්ඛමිත්වා කතිපාහං විචිනිං ලොකනායකං, පසන්නචිත්තො සුමනො සිද්ධත්ථං තිභවන්තගුං.
2250. මම සඞ්කප්පමඤ්ඤාය සත්ථා ලොකෙ අනුත්තරො, ඛීණාසවසහස්සෙහි ආගච්ඡි මම සන්තිකං.
2251. පාමොජ්ජං ජනයිත්වාන ඵලහත්ථො උපාගමිං, පටිග්ගහෙසි භගවා සබ්බඤ්ඤූ වදතං වරො.
2252. චතුනවුතෙ ඉතො කප්පෙ යං ඵලං අදදිං තදා, දුග්ගතිං නාභිජානාමි ඵලදානයස්සිදං ඵලං.
2253. සත්තපඤ්ඤාසකප්පම්හි උපනන්ද සනාමකො, සත්තරතනසම්පන්නො චක්කවත්තී මහබ්බලො.
2254. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තින්දුකදායකො ථෙරො ඉමා ගාථායො අභාසිත්ථාති.
තින්දුකදායකත්ථෙරස්ස අපදානං සත්තමං.
198. මුට්ඨිපූජකත්ථෙරාපදානං.
2255. සුමෙධො නාම භගවා ලොකජෙට්ඨො නරාසභො, පච්ඡිමෙ අනුකම්පාය පධානං පදහී ජිනො.
2256. තස්ස චඞ්කමමානස්ස දිපදින්දස්ස තාදිනො, ගිරිනෙලස්ස පුප්ඵානං මුට්ඨිං බුද්ධස්ස රොපයිං.
2257. තෙන චිත්තප්පසාදෙන සුක්කමූලෙන චොදිතො, තිංසකප්පසහස්සානි දුග්ගතිං නූපපජ්ජහං.
2258. තෙවීසතිකප්පසතෙ සුනෙලො නාම ඛත්තියො, සත්තරතනසම්පන්නො එකො ආසිං මහබ්බලො.
2259. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මුට්ඨිපූජකො ථෙරො ඉමා ගාථායො අභාසිත්ථාති.
මුට්ඨිපූජකත්ථෙරස්ස අපදානං අට්ඨමං.
199. කිඞ්කණිපුප්ඵියත්ථෙරාපදානං{1}
2260. සුමඞ්ගලොති නාමෙන සයම්භු අපරාජිතො, පවනා නික්ඛමිත්වාන නගරං පාවිසී ජිනො.
2261. පිණ්ඩචාරං චරිත්වාන නික්ඛම්ම නගරා මුනි, කතකිච්චොව සම්බුද්ධො සො වසී වනමන්තරෙ.
2262. කිඞ්කණිපුප්ඵං පග්ගය්හ බුද්ධස්ස අභිරොපයිං, පසන්නචිත්තො සුමනො සයම්භුස්ස මහෙසිනො.
2263. චතුනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
2264. ඡළාසීතිම්භිතො කප්පෙ අපිලාපිය{2} නාමකො, සත්තරතනසම්පන්නො චක්කවත්තී මහබ්බලො.
2265. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කිඞ්කණිපුප්ඵියො ථෙරො ඉමා ගාථායො අභාසිත්ථාති.
කිඞ්කණිපුප්ඵියත්ථෙරස්ස අපදානං නවමං.
200. යූථිකාපුප්ඵියත්ථෙරාපදානං{3}
2266. පදුමුත්තරො නාම ජිනො ආහුතීනං පටිග්ගහො, පවනා කික්ඛමිත්වාන විහාරං යාති චක්ඛුමා.
2267. උභො හත්ථෙහි පග්ගය්හ යූථිකං පුප්ඵමුත්තමං, බුද්ධස්ස අභිරොපෙසිං මෙත්තචිත්තස්ස තාදිනො.
2268. තෙන චිත්තප්පසාදෙන අභිභොත්වාන සම්පදා, කප්පානං සතසහස්සං දුග්ගතිං නූපපජ්ජහං.
2269. ඉතො පඤ්ඤාසකප්පෙසු එකො ආසිං ජනාධිපො, සමිත්තනන්දනො නාම චක්කවත්තී මහබ්බලො.
2270. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා යූථිකාපුප්ඵියො ථෙරො ඉමා ගාථායො අභාසිත්ථාති.
යූථිකාපුප්ඵියත්ථෙරස්ස අපදානං දසමං.
උද්දානං:
තමාලී තිණසන්ථාරො ඛණ්ඩඵුල්ලී අසොකියො අඞ්කොලකී කිසලයො තින්දුකො නෙලපුප්ඵියො කිඞ්කණිකො යූථිකො ච ගාථා පඤ්ඤාස අට්ඨ ච.
තමාලපුප්ඵියවග්ගො වීසතිමො.
අථ වග්ගුද්දානං:
භික්ඛාදායී පරිවාරො සෙරෙය්යො සොභිතො තථා ඡත්තො ච බන්ධුජීවො ච{1} සුපාරිචරියොපි ච කුමුදො කුටජො චෙව තමාලී දසමො කතො. ඡසතානි ච ගාථානං ඡසට්ඨි ච තතුත්තරිං.
භික්ඛාවග්ගදසකං.
දුතියං සතකං සමත්තං.
21. කණිකාරපුප්ඵියවග්ගො
201. කණිකාරපුප්ඵියත්ථෙරාපදානං
2271. කණිකාරං පුප්ඵිතං දිස්වා ඔචිනිත්වානහං තදා, තිස්සස්ස අභිරොපෙසිං ඔඝතිණ්ණස්ස තාදිනො.
2272. ද්වෙනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
2273. පඤ්චතිංසෙ ඉතො කප්පෙ අරුණපාණීති විස්සුතො, සත්තරතනසම්පන්නො චක්කවත්තී මහබ්බලො.
2274. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කණිකාරපුප්ඵියො ථෙරො ඉමා ගාථායො අභාසිත්ථාති.
කණිකාරපුප්ඵියත්ථෙරස්ස අපදානං පඨමං.
202. මිනෙලපුප්ඵියත්ථෙරාපදානං.
2275. සුවණ්ණවණ්ණො භගවා සතරංසී පතාපවා. චඞ්කමනං සමාරූළ්හො මෙත්තචිත්තො සිඛීසභො.
2276. පසන්නචිත්තො සුමනො වන්දිත්වා{2} ඤාණමුත්තමං, මිනෙලපුප්ඵං පග්ගය්හ බුද්ධස්ස අභිරොපයිං.
2277. එකතිංසෙ ඉතො කප්පෙ යං පුප්ඵමභිපූජයිං, දුග්ගතිං නාභිජානාමි බුද්ධපූජායිදං ඵලං.
2278. එකූනතිංසෙ කප්පම්හි සුමෙධයස{1} නාමකො, සත්තරතනසම්පන්නො චක්කවත්තී මහබ්බලො.
2279. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා මිනෙලපුප්ඵියො ථෙරො ඉමා ගාථායො අභාසිත්ථාති.
මිනෙලපුප්ඵියත්ථෙරස්ස අපදානං දුතියං.
203. කිඞ්කිණිකපුප්ඵියත්ථෙරාපදානං{*}
2280. කඤ්චනග්ඝියසඞ්කාසො සබ්බඤ්ඤූ ලොකනායකො, ඔදකං දහමොගය්හ සිනායි ලොකනායකො.
2281. පග්ගය්හ කිඞ්කිණිං{2} පුප්ඵං විපස්සිස්සාභිරොපයිං, උදග්ගචිත්තො සුමනො දිපදින්දස්ස තාදිනො.
2282. එකනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
2283. සත්තවීසතිකප්පම්හි රාජා භීමරථො අහු, සත්තරතනසම්පන්නො චක්කවත්තී මහබ්බලො.
2284. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කිඞ්කිණිකපුප්ඵියො ථෙරො ඉමා ගාථායො අභාසිත්ථාති.
කිඞ්කිණිකපුප්ඵියත්ථෙරස්ස අපදානං තතියං.
204. තරණියත්ථෙරාපදානං
2285. අත්ථදස්සීතු භගවා දිපදින්දො නරාසභො, පුරක්ඛතො සාවකෙහි ගඞ්ගාතීරමුපාගමි.
2286. සමතිත්තිකා කාකපෙය්යා ගඞ්ගා ආසි දුරුත්තරා, උත්තාරයිං භික්ඛුසඞ්ඝං බුද්ධං ච දිපදුත්තමං.
2287. අට්ඨාරසෙ කප්පසතෙ යං කම්මමකරිං තදා, දුග්ගතිං නාභිජානාමි තරණාය ඉදං ඵලං.
2288. තෙරසෙතො කප්පසතෙ පඤ්ච සබ්භොගවා{3} අහුං, සත්තරතනසම්පන්නා චක්කවත්තී මහබ්බලා.