2164. පූජිතං{2} දෙවසඞ්ඝෙන නිසභාජානියං යථා, හට්ඨො හට්ඨෙන චිත්තෙන උපගච්ඡිං නරුත්තමං.
2165. සත්ත පුප්ඵානි පග්ගය්හ කොටුම්බරසමාකුලං, බුද්ධස්ස අභිරොපෙසිං සිඛිනො ලොකබන්ධුනො.
2166. එකතිංසෙ ඉතො කප්පෙ යං පුප්ඵමභිපූජයිං{3}, දුග්ගතිං නාභිජානාමි බුද්ධපූජායිදං ඵලං.
2167. ඉතො වීසතිකප්පම්හි මහානෙලසනාමකො, එකො ආසිං{4} මහාතෙජො චක්කවත්තී මහබ්බලො.
2168. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා කොටුම්බරියො ථෙරො ඉමා ගාථායො අභාසිත්ථාති.
කොටුම්බරියත්ථෙරස්ස අපදානං තතියං.
184. පඤ්චහත්ථියත්ථෙරාපදානං.
2169. තිස්සො නාමාසි භගවා ලොකජෙට්ඨො නරාසභො, පුරක්ඛතො සාවකෙහි රථියං පටිපජ්ජථ.
2170. පඤ්ච උප්පලහත්ථා ච චතුරො ඨපිතා මයා, ආහුතිං දාතුකාමොහං පග්ගණ්හිං වතසිද්ධියා{5}.
2171. සුවණ්ණවණ්ණං සම්බුද්ධං ගච්ඡන්තං අන්තරාපණෙ, බුද්ධරංස්යාභිඵුට්ඨොම්භි{6} පූජෙයිං දිපදුත්තමං.
2172. ද්වෙනවුතෙ ඉතො කප්පෙ යං පුප්ඵමභිරොපයිං, දුග්ගතිං නාභිජානාමි බුද්ධපූජායිදං ඵලං.
2173. ඉතො තෙරසකප්පම්භි පඤ්චාසූසභසම්මතා, සත්තරතනසම්පන්නා චක්කවත්තී මහබ්බලා.
2174. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා පඤ්චහත්ථියො ථෙරො ඉමා ගාථායො අභාසිත්ථාති.
පඤ්චහත්ථියත්ථෙරස්ස අපදානං චතුත්ථං.
185. ඉසිමුග්ගදායකත්ථෙරාපදානං.
2175. උදෙන්තං සතරංසිං’ව සිතරංසිං’ව{1} භානුමං, කකුධං විලසන්තං’ව පදුමුත්තරනායකං.
2176. ඉසිමුග්ගානි පිංසෙත්වා{2} මධුඛුද්දෙ අනීළකෙ, පාසාදෙ’ව ඨිතො සන්තො අදාසිං ලොකබන්ධුනො.
2177. අට්ඨසතසහස්සානි අහෙසුං බුද්ධසාවකා, සබ්බෙසං පත්තපූරං තං{3} තතො චාපි බහුත්තරං.
2178. තෙන චිත්තප්පසාදෙන සුක්කමූලෙන චොදිතො, කප්පානං සතසහස්සං දුග්ගතිං නූපපජ්ජහං.
2179. චත්තාරීසම්හි සහසෙස කප්පානං අට්ඨතිංස තෙ, ඉසිමුග්ගසනාමා තෙ{4} චක්කවත්තී මහබ්බලො.
2180. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා ඉසිමුග්ගදායකො ථෙරො ඉමා ගාථායො අභාසිත්ථාති.
ඉසිමුග්ගදායකත්ථෙරස්ස අපදානං පඤ්චමං.
186. බොධිඋපට්ඨාකත්ථෙරාපදානං.
2181. නගරෙ රම්මවතියා ආසිං මුරජවාදකො, නිච්චුපට්ඨානයුත්තො’ම්භි ගතොහං බොධිමුත්තමං.
2182. සායං පාතං උපට්ඨිත්වා සුක්කමූලෙන චොදිතො, අට්ඨාරසකප්පසතෙ දුග්ගතිං නූපපජ්ජහං.
2183. පඤ්චදසෙ{5} කප්පසතෙ ඉතො ආසිං ජනාධිපො, මුරජො{6} නාම නාමෙන චක්කවත්තී මහබ්බලො.
2184. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා බොධිඋපට්ඨාකො ථෙරො ඉමා ගාථායො අභාසිත්ථාති.
බොධිඋපට්ඨාකත්ථෙරස්ස අපදානං ඡට්ඨං.
187. එකචින්තිකත්ථෙරාපදානං.
2185. යදා දොවො දෙවකායා චවතෙ ආයුසඞ්ඛයා, තයො සද්දා නිච්ඡරන්ති දෙවානං අනුමොදතං.
2186. ඉතො භො සුගතිං ගච්ඡ මනුස්සානං සහව්යතං, මනුස්සභූතො සද්ධම්මෙ ලභ සද්ධමනුත්තරං{7}.
2187. සා තෙ සද්ධානිවිට්ඨාස්ස{1} මූලජාතා පතිට්ඨිතා, යාවජීවං අසංහීරා සද්ධම්මෙ සුප්පවෙදිතෙ.
2188. කායෙන කුසලං කත්වා වාදාය කුසලං බහුං, මනසා කුසලං කත්වා අව්යාපජ්ඣං{2} නිරූපධිං.
2189. තතො ඔපධිකං පුඤ්ඤං කත්වා දානෙන තං බහුං, අඤ්ඤෙපි මච්චෙ සද්ධම්මෙ බ්රහ්මචරියෙ නිවෙසය.
2190. ඉමාය අනුකම්පාය දෙවා දෙවං යදා විදූ, චවන්තං අනුමොදන්ති එහි දෙවපුරං පුන{3}.
2191. සංවෙගො මෙ{4} තදා ආසි දෙවසඞ්ඝෙ සමාගතෙ, කං සු නාම අහං යොනිං ගමිස්සාමි ඉතො චුතො.
2192. මම සංවෙගමඤ්ඤාය සමණො භාවිතින්ද්රියො, මමුද්ධරිතුකාමො සො ආගච්ඡි මම සන්තිකං.
2193. සුමනො නාම නාමෙන පදුමුත්තරසාවකො, අත්ථධම්මානුසාසිත්වා සංවෙජෙසි මමං තදා.
2194. තස්සා හං වචනං සුත්වා බුද්ධෙ චිත්තං පසාදයිං, තං ධීරමභිවාදෙත්වා තත්ථ කාලකතො අහං.
2195. උපපජ්ජිං ස තත්ථෙව සුක්කමූලෙන චොදිතො, කප්පානං සතසහස්සං දුග්ගතිං නූපපජ්ජහං.
2196. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකචින්තිකො ථෙරො ඉමා ගාථායො අභාසිත්ථාති.
එකචින්තිකත්ථෙරස්ස අපදානං සත්තමං.
188. තිකණ්ණිපුප්ඵියත්ථෙරාපදානං
2197. දෙවභූතො අහං සන්තො අච්ඡරාහි පුරක්ඛතො, පුබ්බකම්මං සරිත්වාන බුද්ධසෙට්ඨමනුස්සරිං.
2198. තිකණ්ණිපුප්ඵං පග්ගය්හ සකං චිත්තං පසාදිය{5}, බුද්ධම්හි අභිරොපෙසිං විපස්සිම්හි නරාසභෙ.
2199. එකනවුතෙ ඉතො කප්පෙ යං පුප්ඵමභිරොපයිං{6}, දුග්ගතිං නාභිජානාමි බුද්ධපූජායිදං ඵලං.
2200. තෙසත්තතිම්භිතො කප්පෙ චතුරාසුං රමුත්තමා, සත්තරතනසම්පන්නො චක්කවත්තී මහබ්බලා.
2201. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිකණ්ණිපුප්ඵියො ථෙරො ඉමා ගාථායො අභාසිත්ථාති.
තිකණ්ණිපුප්ඵියත්ථෙරස්ස අපදානං අට්ඨමං.
189. එකචාරියත්ථෙරාපදානං.
2202. තාවතිංසෙසු දෙවෙසු මහාඝොසො තදා අහු, බුද්ධො ච ලොකෙ නිබ්බාති මයං චම්හ සරාගිනො.
2203. තෙසං සංවෙගජාතානං සොකසල්ලසමඞ්ගිනං, සබලෙන උපත්ථද්ධො අගමං බුද්ධසන්තිකං.
2204. මන්දාරවං ගහෙත්වාන සණ්හිතං{1} අභිනිම්මිතං, පරිනිබ්බාණකාලම්භි බුද්ධස්ස අභිරොපයිං.
2205. සබ්බෙ දෙවානුමොදිංසු අච්ඡරායො ච මෙ තදා, කප්පානං සතසහස්සං දුග්ගතිං නූපපජ්ජහං.
2206. සට්ඨිකප්පසහස්සම්හි ඉතො සොළස තෙ ජනා, මහාමල්ලජනා නාම චක්කවත්තී මහබ්බලා.
2207. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා එකචාරියො ථෙරො ඉමා ගාථායො අභාසිත්ථාති.
එකචාරියත්ථෙරස්ස අපදානං නවමං.
190. තිවණ්ටිපුප්ඵියත්ථෙරාපදානං.
2208. අභිභූතො පනිජ්ඣන්ති{2} සබ්බෙ සඞ්ගම්ම තෙ මමං{3}, තෙසං නිජ්ඣායමානානං පරිළාහො අජායථ.
2209. සුනන්දො නාම නාමෙන බුද්ධස්ස සාවකො තදා, ධම්මදස්සිස්ස මුනිනො ආගච්ඡි මම සන්තිකෙ.
2210. යෙ මෙ බද්ධචරා ආසුං තෙ මෙ පුප්ඵං අදුං තදා, තාහං පුප්ඵං ගහෙත්වාන සාවකෙ අභිරොපයිං.
2211. සොහං කාලකතො තත්ථ පුනාපි උපපජ්ජහං, අට්ඨාරසෙ කප්පසතෙ විනිපාතං න ගච්ඡහං.
2212. තෙරසෙතො කප්පසතෙ අට්ඨාසුං ධූමකෙතුනො, සත්තරතනසම්පන්නා චක්කවත්තී මහබ්බලා.
2213. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිවණ්ටිපුප්ඵියො ථෙරො ඉමා ගාථායො අභාසිත්ථාති.
තිවණ්ටිපුප්ඵියත්ථෙරස්ස අපදානං දසමං.
උද්දානං:
කුටජො බන්ධුජීවී ච කොටුම්බරිකහත්ථියො ඉසිමුග්ගො ච බොධී ච එකචින්තී තිකණ්ණිකො එකචාරී තිවණ්ටී ච ගාථා ද්වාසට්ඨි කිත්තිතා.
කුටජපුප්ඵියවග්ගො එකූනවීසතිමො.
20. තමාලපුප්ඵියවග්ගො
191. තමාලපුප්ඵියත්ථෙරාපදානං.
2214. චුල්ලාසීතිසහස්සානි ථම්භා සොවණ්ණමයා අහු, දෙවලට්ඨිපටිභාගං විමානං මෙ සුනිම්මිතං.
2215. තමාලපුප්ඵං පග්ගය්හ විප්පසන්නෙන චෙතසා, බුද්ධස්ස අභිරොපෙසිං සිඛිනො ලොකබන්ධුනො.
2216. එකතිංසෙ ඉතො කප්පෙ යං කම්මමකරිං තදා, දුග්ගතිං නාභිජානාමි බුද්ධපූජායිදං ඵලං.
2217. ඉතො වීසතිමෙ කප්පෙ චන්දතිත්තොති එකකො, සත්තරතනසම්පන්නො චක්කවත්තී මහබ්බලො.
2218. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තමාලපුප්ඵියො ථෙරො ඉමා ගාථායො අභාසිත්ථාති.
තමාලපුප්ඵියත්ථෙරස්ස අපදානං පඨමං.
192. තිණසන්ථරදායකත්ථෙරාපදානං{*}
2219. යං දායවාසිකො{1} ඉසි තිණං ලායති සත්ථුනො, සබ්බෙ පදක්ඛිණාවත්තා{2} පුථව්යා{3} නිපතිංසු තෙ.
2220. තමහං තිණමාදාය සන්ථරිං ධරණුත්තමෙ, තීණෙව තාලපත්තානි ආහරිත්වානහං තදා.
2221. තිණෙන ඡදනං කත්වා සිද්ධත්ථස්ස අදාසහං, සත්තාහං ධාරයුං තස්ස සත්ථුනො දෙවමානුසා.
2222. චතුනවුතෙ ඉතො කප්පෙ යං තිණං අදදිං තදා, දුග්ගතිං නාභිජානාමි තිණදානස්සිදං ඵලං.
2223. පඤ්චසට්ඨිම්හිතො කප්පෙ චත්තාරොසුං මහද්ධනා, සත්තරතනසම්පන්නා චක්කවත්තී මහබ්බලා.
2224. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.
ඉත්ථං සුදං ආයස්මා තිණසන්ථරදායකො ථෙරො ඉමා ගාථායො අභාසිත්ථාති.
තිණසන්ථරදායකත්ථෙරස්ස අපදානං දුතියං.
193. ඛණ්ඩඵුල්ලියත්ථෙරාපදානං.
2225. ඵුස්සස්ස ඛො භගවතො ථූපො ආසි මහාවනෙ, කුඤ්ජරෙහි තදා භින්නො පරූළ්හපාදපො{1} තහිං.
2226. විසමඤ්ඤ සමං කත්වා සුධාපිණ්ඩං අදාසහං, තිලොකගරුනො තස්සගුණ්හි පරිතොසිතො.
2227. ද්වෙනවුතෙ ඉතො කප්පෙ යං කම්මමකරිං තදා, දුග්ගතිං නාභිජානාමි සුධාපිණ්ඩස්සිදං ඵලං.
2228. සත්තසත්තතිකප්පම්භි ජිතසෙනාසුං සොළස, සත්තරතනසම්පන්නා චක්කවත්තී මහබ්බලා.
2229. පටිසම්භිදා චතස්සො විමොක්ඛාපි ච අට්ඨිමෙ, ඡළභිඤ්ඤා සච්ඡිකතා කතං බුද්ධස්ස සාසනං.