රාගස්ස පහානාය අසුභා භාවෙතබ්බා. දොසස්ස පහානාය මෙත්තා භාවෙතබ්බා. මොහස්ස පහානාය පඤ්ඤා භාවෙතබ්බා.
ඉමෙසං ඛො භික්ඛවෙ තිණ්ණං ධම්මානං පහානාය ඉමෙ තයො ධම්මා භාවෙතබ්බාති.
6. 1. 2.
[දුච්චරිත සුත්තං]
[සාවත්ථිනිදානං]
2. තයො මෙ භික්ඛවෙ ධම්මා. කතමෙ තයො:
කායදුච්චරිතං, වචීදුච්චරිතං, මනොදුච්චරිතං. ඉමෙ ඛො භික්ඛවෙ තයො ධම්මා.
ඉමෙසං ඛො භික්ඛවෙ තිණ්ණං ධම්මානං පහානාය තයො ධම්මා භාවෙතබ්බා. කතමෙ තයො:
කායදුච්චරිතස්ස පහානාය කායසුචරිතං භාවෙතබ්බං. වචීදුච්චරිතස්ස පහානාය වචීසුචරිතං භාවෙතබ්බං. මනොදුච්චරිතස්ස පහානාය මනො සුචරිතං භාවෙතබ්බං.
ඉමෙසං ඛො භික්ඛවෙ තිණ්ණං ධම්මානං පහානාය ඉමෙ තයො ධම්මා භාවෙතබ්බාති.
6. 1. 3.
[විතක්ක සුත්තං]
[සාවත්ථිනිදානං]
3. තයො මෙ භික්ඛවෙ ධම්මා. කතමෙ තයො:
කාමවිතක්කො, ව්යාපාදවිතක්කො, විහිංසාවිතක්කො. ඉමෙ ඛො භික්ඛවෙ තයො ධම්මා.
ඉමෙසං ඛො භික්ඛවෙ තිණ්ණං ධම්මානං පහානාය තයො ධම්මා භාවෙතබ්බා. කතමෙ තයො:
කාමවිතක්කස්ස පහානාය නෙක්ඛම්මවිතක්කො භාවෙතබ්බො. ව්යාපාදවිතක්කස්ස පහානාය අව්යාපාදවිතක්කො භාවෙතබ්බො විහිංසාවිතක්කස්ස පහානාය අවිහිංසාවිතක්කො භාවෙතබ්බො.
ඉමෙසං ඛො භික්ඛවෙ තිණ්ණං ධම්මානං පහානාය ඉමෙ තයො ධම්මා භාවෙතබ්බාති.
6. 1. 4.
[සඤ්ඤා සුත්තං]
[සාවත්ථිනිදානං]
4. තයො මෙ භික්ඛවෙ ධම්මා. කතමෙ තයො:
කාමසඤ්ඤා, ව්යාපාදසඤ්ඤා, විහිංසාසඤ්ඤා ඉමෙ ඛො භික්ඛවෙ තයො ධම්මා.
ඉමෙසං ඛො භික්ඛවෙ තිණ්ණං ධම්මානං පහානාය තයො ධම්මා භාවෙතබ්බා. කතමෙ තයො:
කාමසඤ්ඤාය පහානාය නෙක්ඛම්මසඤ්ඤා භාවෙතබ්බා ව්යාපාදසඤ්ඤාය පහානාය අව්යාපාදසඤ්ඤා භාවෙතබ්බා විහිංසාසඤ්ඤාය පහානාය අවිහිංසාසඤ්ඤා භාවෙතබ්බා.
ඉමෙසං ඛො භික්ඛවෙ තිණ්ණං ධම්මානං පහානාය ඉමෙ තයො ධම්මා භාවෙතබ්බාති.
6. 1. 5.
[ධාතු සුත්තං]
[සාවත්ථිනිදානං]
5. තයො මෙ භික්ඛවෙ ධම්මා. කතමෙ තයො:
කාමධාතු, ව්යාපාදධාතු, විහිංසා ධාතු. ඉමෙ ඛො භික්ඛවෙ තයො ධම්මා.
ඉමෙසං ඛො භික්ඛවෙ තිණ්ණං ධම්මානං පහානාය තයො ධම්මා භාවෙතබ්බා. කතමෙ තයො:
කාමධාතුයා පහානාය නෙක්ඛම්මධාතු භාවෙතබ්බා. ව්යාපාදධාතුයා පහානාය අව්යාපාදධාතු භාවෙතබ්බා. විහිංසාධාතුයා පහානාය අවිහිංසා ධාතු භාවෙතබ්බා
ඉමෙසං ඛො භික්ඛවෙ තිණ්ණං ධම්මානං පහානාය ඉමෙ තයො ධම්මා භාවෙතබ්බාති.
6. 1. 6.
[අස්සාද සුත්තං]
[සාවත්ථිනිදානං]
6. තයො මෙ භික්ඛවෙ ධම්මා. කතමෙ තයො:
අස්සාදදිට්ඨි, අත්තානුදිට්ඨි, මිච්ඡාදිට්ඨි, ඉමෙ ඛො භික්ඛවෙ තයො ධම්මා.
ඉමෙසං ඛො භික්ඛවෙ තිණ්ණං ධම්මානං පහානාය තයො ධම්මා භාවෙ තබ්බා. කතමෙ තයො:
අස්සාදදිට්ඨියා පහානාය අනිච්චසඤ්ඤා භාවෙතබ්බා. අත්තානුදිට්ඨියා පහානාය අනත්තසඤ්ඤා භාවෙතබ්බා. මිච්ඡාදිට්ඨියා පහානාය සම්මාදිට්ඨි භාවෙතබ්බා.
ඉමෙසං ඛො භික්ඛවෙ තිණ්ණං ධම්මානං පහානාය ඉමෙ තයො ධම්මා භාවෙතබ්බාති.
6. 1. 7.
[අරති සුත්තං]
[සාවත්ථිනිදානං]
7. තයො මෙ භික්ඛවෙ ධම්මා. කතමෙ තයො:
අරති, විහිංසා, අධම්මචරියා, ඉමෙ ඛො භික්ඛවෙ තයො ධම්මා.
ඉමෙසං ඛො භික්ඛවෙ තිණ්ණං ධම්මානං පහානාය තයො ධම්මා භාවෙතබ්බා. කතමෙ තයො:
අරතියා පහානාය මුදිතා භාවෙතබ්බා, විහිංසාය{1} පහානාය අවිහිංසා භාවෙතබ්බා. අධම්මචරියාය පහානාය ධම්මචරියා භාවෙතබ්බා.
ඉමෙසං ඛො භික්ඛවෙ තිණ්ණං ධම්මානං පහානාය ඉමෙ තයො ධම්මා භාවෙතබ්බාති.
6. 1. 8.
[අසන්තුට්ඨි සුත්තං]{2}
[සාවත්ථිනිදානං]
8. තයො මෙ භික්ඛවෙ ධම්මා. කතමෙ තයො:
අසන්තුට්ඨිතා, අසම්පජඤ්ඤං, මහිච්ඡතා, ඉමෙ ඛො භික්ඛවෙ තයො ධම්මා.
ඉමෙසං ඛො භික්ඛවෙ තිණ්ණං ධම්මානං පහානාය තයො ධම්මා භාවෙතබ්බා. කතමෙ තයො:
අසන්තුට්ඨිතාය පහානාය සන්තුට්ඨිතා භාවෙතබ්බා. අසම්පජඤ්ඤස්ස පහානාය සම්පජඤ්ඤං භාවෙතබ්බං. මහිච්ඡතාය පහානාය අප්පිච්ඡතා භාවෙතබ්බා.
ඉමෙසං ඛො භික්ඛවෙ තිණ්ණං ධම්මානං පහානාය ඉමෙ තයො ධම්මා භාවෙතබ්බාති.
6. 1. 9.
[දොවචස්සතා සුත්තං]
[සාවත්ථිනිදානං]
9. තයො මෙ භික්ඛවෙ ධම්මා. කතමෙ තයො:
දොවචස්සතා, පාපමිත්තතා, චෙතසො වික්ඛෙපො, ඉමෙ ඛො භික්ඛවෙ තයො ධම්මා.
ඉමෙසං ඛො භික්ඛවෙ තිණ්ණං ධම්මානං පහානාය තයො ධම්මා භාවෙතබ්බා. කතමෙ තයො:
දොවචස්සතාය පහානාය සොවචස්සතා භාවෙතබ්බා පාපමිත්තතාය පහානාය කල්යාණමිත්තතා භාවෙතබ්බා. චෙතසො වික්ඛෙපස්ස පහානාය ආනාපානසති භාවෙතබ්බා.
ඉමෙසං ඛො භික්ඛවෙ තිණ්ණං ධම්මානං පහානාය ඉමෙ තයො ධම්මා භාවෙතබ්බාති.
6. 1. 10.
[උද්ධච්ච සුත්තං]
[සාවත්ථිනිදානං]
10. තයො මෙ භික්ඛවෙ ධම්මා. කතමෙ තයො:
උද්ධච්චං, අසංවරො, පමාදො, ඉමෙ ඛො භික්ඛවෙ තයො ධම්මා.
ඉමෙසං ඛො භික්ඛවෙ තිණ්ණං ධම්මානං පහානාය තයො ධම්මා භාවෙතබ්බා. කතමෙ තයො:
උද්ධච්චස්ස පහානාය සමථො භාවෙතබ්බො. අසංවරස්ස පහානාය සංවරො භාවෙතබ්බො. පමාදස්ස පහානාය අප්පමාදො භාවෙතබ්බො
ඉමෙසං ඛො භික්ඛවෙ තිණ්ණං ධම්මානං පහානාය ඉමෙ තයො ධම්මා භාවෙතබ්බාති.
තික වග්ගො.
තස්සුද්දානං:
රාගදුච්චරිත විතක්කසඤ්ඤා ධාතූති වුච්චති, අස්සාද අරතිතුට්ඨි දොව ච උද්ධච්චෙන වග්ගො’ති{1}
2. සාමඤ්ඤවග්ගො.
6. 2. 1.
[කායානුපස්සී සුත්තං]
[සාවත්ථිනිදානං]
1. ඡ භික්ඛවෙ ධම්මෙ අප්පහාය අභබ්බො කායෙ කායානුපස්සී විහරිතුං. කතමෙ ඡ:
කම්මාරාමතං, භස්සාරාමතං, නිද්දාරාමතං, සඞ්ගණිකාරාමතං, ඉන්ද්රියෙසු අගුත්තද්වාරතං, භොජනෙ අමත්තඤ්ඤූතං.
ඉමෙ ඛො භික්ඛවෙ ඡ ධම්මෙ අප්පහාය අභබ්බො කායෙ කායානුපස්සී විහරිතුං.
ඡ භික්ඛවෙ ධම්මෙ පහාය භබ්බො කායෙ කායානුපස්සී විහරිතුං. කතමෙ ඡ:
කම්මාරාමතං, භස්සාරාමතං, නිද්දාරාමතං, සඞ්ගණිකාරාමතං, ඉන්ද්රියෙසු අගුත්තද්වාරතං, භොජනෙ අමත්තඤ්ඤුතං.
ඉමෙ ඛො භික්ඛවෙ ඡ ධම්මෙ පහාය භබ්බො කායෙ කායානුපස්සී විහරිතුන්ති.
6. 2. 2-15.
[අජ්ඣත්තකායානුපස්සි ආදි පඤ්චදස සුත්තානි]
[සාවත්ථිනිදානං]
2-15. ඡ භික්ඛවෙ ධම්මෙ අප්පහාය අජ්ඣත්තං කායෙ (කායානුපස්සී විහරිතුං) -පෙ- බහිද්ධා කායෙ -පෙ- අජ්ඣත්තබහිද්ධා කායෙ -පෙ- වෙදනාසු -පෙ- අජ්ඣත්තං වෙදනාසු -පෙ- බහිද්ධා වෙදනාසු -පෙ- අජ්ඣත්තබහිද්ධා වෙදනාසු -පෙ- චිත්තෙ -පෙ- අජ්ඣත්තං චිත්තෙ -පෙ- බහිද්ධා චිත්තෙ -පෙ- අජ්ඣත්තබහිද්ධා චිත්තෙ -පෙ- ධම්මෙසු -පෙ- අජ්ඣත්තං ධම්මෙසු -පෙ- බහිද්ධා ධම්මෙසු -පෙ- අජ්ඣත්තබහිද්ධා ධම්මෙසු ධම්මානුපස්සී විහරිතුං. කතමෙ ඡ:
කම්මාරාමතං, භස්සාරාමතං, නිද්දාරාමතං, සඞ්ගණිකාරාමතං, ඉන්ද්රියෙසු අගුත්තද්වාරතං, භොජනෙ අමත්තඤ්ඤුතං.
ඉමෙ ඛො භික්ඛවෙ ඡ ධම්මෙ පහාය භබ්බො අජ්ඣත්තබහිද්ධා ධම්මෙසු ධම්මානුපස්සී විහරිතුන්ති.
6. 2. 16.
[තපුස්ස සුත්තං]
[සාවත්ථිනිදානං]
16. ඡහි භික්ඛවෙ ධම්මෙහි සමන්නාගතො තපුස්සො,{1} ගහපති තථාගතෙ නිට්ඨංගතො අමතද්දසො අමතං සච්ඡිකත්වා ඉරීයති. කතමෙහි ඡහි:
බුද්ධෙ අවෙච්චප්පසාදෙන, ධම්මෙ අවෙච්චප්පසාදෙන, සඞ්ඝෙ අවෙච්චප්පසාදෙන, අරියෙන සීලෙන, අරියෙන ඤාණෙන, අරියාය විමුත්තියා.
ඉමෙහි ඛො භික්ඛවෙ ඡහි ධම්මෙහි සමන්නාගතො තපුස්සො ගහපති තථාගතෙ නිට්ඨං ගතො අමතද්දසො අමතං සච්ඡිකත්වා ඉරීයතීති.
6. 2. 17-36.