43. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො භගවා පුබ්බන්හසමයං නිවාසෙත්වා පත්ත චීවරමාදාය සාවත්ථියං පිණ්ඩාය පාවිසි. සාවත්ථියං පිණ්ඩාය චරිත්වා පච්ඡාභත්තං පිණ්ඩපාත පටික්කන්තො ආයස්මන්තං ආනන්දං ආමන්තෙසි:
“ආයාමානන්ද, යෙන පුබ්බාරාමො මිගාරමාතුපාසාදො තෙනුපසඞ්කමිස්සාම දිවාවිහාරායා”ති.
“එවං භන්තෙ”ති ඛො ආයස්මා ආනන්දො භගවතො පච්චස්සොසි.
අථ ඛො භගවා ආයස්මතා ආනන්දෙන සද්ධිං යෙන පුබ්බාරාමො මිගාරමාතුපාසාදො තෙනුපසඞ්කමි.
අථ ඛො භගවා සායන්හසමයං පතිසල්ලානා වුට්ඨිතො ආයස්මන්තං ආනන්දං ආමන්තෙසි:
“ආයාමානන්ද, යෙන පුබ්බකොට්ඨකො තෙනුපසඞ්කමිස්සාම ගත්තානි පරිසිඤ්චිතුං”ති.
“එවං භන්තෙ’ති ඛො ආයස්මා ආනන්දො භගවතො පච්චස්සොසි”.
අථ ඛො භගවා ආයස්මතා ආනන්දෙන සද්ධිං යෙන පුබ්බකොට්ඨකො තෙනුපසඞ්කමි ගත්තානි පරිසිඤ්චිතුං. පුබ්බකොට්ඨකෙ ගත්තානි පරිසිඤ්චිත්වා පච්චුත්තරිත්වා එකචීවරො අට්ඨාසි ගත්තතානි පුබ්බාපයමානො.
තෙන ඛො පන සමයෙන රඤ්ඤො පසෙනදිස්ස කොසලස්ස ‘සෙතො’ නාම නාගො මහාතුරියතාලිතවාදිතෙන පුබ්බකොට්ඨකා පච්චුත්තරති. අපිස්සු තං ජනො දිස්වා එවමාහ:
“අභිරූපො වත භො{1} රඤ්ඤො නාගො, දස්සනීයො වත භො රඤ්ඤො නාගො, පාසාදිකො වත භො රඤ්ඤො නාගො, කායූපපන්නො වත භො රඤ්ඤො නාගො”ති.
එවං වුත්තෙ ආයස්මා උදායි භගවන්තං එතදවොච: “හත්ථිමෙව නු ඛො භන්තෙ මහන්තං බ්රූහන්තං කායූපපන්නං ජනො දිස්වා එවමාහ: නාගො වත භො නාගොති: උදාහු අඤ්ඤම්පි කඤ්චි මහන්තං බ්රූහන්තං කායූපපන්නං ජනො දිස්වා එවමාහ: නාගො වත භො නාගොති?”
හත්ථිම්පි ඛො උදායි, මහන්තං බ්රූහන්තං කායූපපන්නං ජනො දිස්වා එවමාහ:” නාගො වත භො නාගො”ති. අස්සම්පි ඛො උදායි -පෙ- ගොණම්පි ඛො උදායි -පෙ- උරගම්පි ඛො උදායි -පෙ- රුක්ඛම්පි ඛො උදායි, -පෙ- මනුස්සම්පි ඛො උදායි, මහන්තං බ්රූහන්තං{1} කායූපපන්නං ජනො දිස්වා එවමාහ: “නාගො වත භො නාගො”ති. අපි ච උදායි යො සදෙවකෙ ලොකෙ සමාරකෙ සබ්රහ්මකෙ, සස්සමණබ්රාහ්මණියා පජාය සදෙවමනුස්සාය “ආගුං න කරොති කායෙන වාචාය මනසා, තමහං නාගො”ති බ්රූමීති.
අච්ඡරියං භන්තෙ, අබ්භුතං භන්තෙ, යාව සුභාසිතමිදං භන්තෙ, භගවතා{2} “අපි ච උදායි, යො සදෙවකෙ ලොකෙ සමාරකෙ සබ්රහ්මකෙ, සස්සමණබ්රාහ්මණියා පජාය සදෙවමනුස්සාය, ආගුං න කරොති කායෙන වාචාය මනසා, තමහං නාගොති බ්රූමී”ති.
ඉදඤ්ච පනාහං භන්තෙ, භගවතො සුභාසිතං ඉමාහි ගාථාහි අනුමොදාමි:
18. මනුස්සභූතං සම්බුද්ධං අත්තදන්තං සමාහිතං ඉරීයමානං බ්රහ්මපථෙ චිත්තස්සුපසමෙ රතං.
19. යං මනුස්සා නමස්සන්ති සබ්බධම්මාන පාරගුං, දෙවාපි නං{3} නමස්සන්ති ඉති මෙ අරහතො සුතං.
20. සබ්බසඤ්ඤොජනාතීතං වනා නිබ්බානමාගතං කාමෙහි නෙක්ඛම්මරතං මුත්තං සෙලාව කඤ්චනං.
21. සබ්බෙ අච්චරුචී නාගො හිමවා චඤ්ඤෙ{4} සිලුච්චයෙ සබ්බෙසං නාගනාමානං සච්චනාමො අනුත්තරො.
22. නාගං වො කිත්තයිස්සාමි නහි ආගුං කරොති සො සොරච්චං අවිහිංසා ච පාදා නාගස්ස තෙ දුවෙ.
23. තපො ච බ්රහ්මචරියං චරණා නාගස්ස ත්යාපරෙ සද්ධාහත්ථො මහානාගො උපෙක්ඛාසෙතදන්තවා.
24. සති ගීවා සිරො පඤ්ඤා වීමංසා ධම්මචිත්තනා ධම්මකූච්ඡිසමාවාපො{5} විවෙකො තස්ස වාලධි.
25. සො ඣායී අස්සාසරතො අජ්ඣත්තං සුසමාහිතො ගච්ඡං සමාහිතො නාගො ඨිතො නාගො සමාහිතො.
26. සෙය්යං සමාහිතො නාගො නිසින්නොපි සමාහිතො සබ්බත්ථ සංවුතො නාගො එසා නාගස්ස සම්පදා
27. භුඤ්ජති අනවජ්ජානි සාවජ්ජානි න භුඤ්ජති ඝාසං අච්ඡාදනං{1} ලද්ධා සන්නිධිං පරිවජ්ජයෙ{2}.
28. සඤ්ඤොජනං අණුං ථූලං සබ්බං ඡෙත්වාන බන්ධනං යෙන යෙනෙව ගච්ඡති අනපෙක්ඛො’ව ගච්ඡති.
29. යථාපි උදකෙ ජාතං පුණ්ඩරීකං පවඩ්ඪති නූපලිප්පති{3} තොයෙන සුචිගන්ධං මනොරමං.
30. තථෙව ලොකෙ සුජාතො බුද්ධො ලොකෙ විරජ්ජති{4} නූපලිප්පති{3} ලොකෙන තොයෙන පදුමං යථා.
31. මහග්ගිනී පජ්ජලිතො{5} අනාහාරූපසම්මති සඞ්ඛාරෙසූපසන්තෙසු නිබ්බුතොති පවුච්චති.
32. අත්ථස්සායං විඤ්ඤාපනී උපමා විඤ්ඤූහි දෙසිතා විඤ්ඤස්සන්ති මහානාගා නාගං නාගෙන දෙසිතං.
33. වීතරාගො වීතදොසො වීතමොහො අනාසවො සරීරං විජහං නාගො පරිනිබ්බිස්සති අනාසවොති.
6. 1. 5. 2.
[මිගසාලාසුත්තං]
[සාවත්ථිනිදානං]
44. අථ ඛො ආයස්මා ආනන්දො පුබ්බන්හසමයං නිවාසෙත්වා පත්තචීවරමාදාය යෙන මිගසාලාය උපාසිකාය නිවෙසනං තෙනුපසඞ්කමි. උපසඞ්කමිත්වා පඤ්ඤත්තෙ ආසනෙ නිසීදි. අථ ඛො මිගසාලා උපාසිකා යෙනායස්මා ආනන්දො, තෙනුපසඞ්කමි. උපසඞ්කමිත්වා ආයස්මන්තං ආනන්දං අභිවාදෙත්වා එකමන්තං නිසීදි. එකමන්තං නිසින්නා ඛො මිගසාලා උපාසිකා ආයස්මන්තං ආනන්දං එතදවොච:
කථං කථං නාමායං භන්තෙ ආනන්ද, භගවතා ධම්මො දෙසිතො අඤ්ඤෙය්යො, යත්ර හි නාම බ්රහ්මචාරී ච{6} අබ්රහ්මචාරී ච උභො සමසමගතිකා භවිස්සන්ති අභිසම්පරායං?
පිතා මෙ භන්තෙ පුරාණො බ්රහ්මචාරී අහොසි ආරාචාරී විරතො මෙථුනා ගාමධම්මා. සො කාලකතො.{7} භගවතා ව්යාකතො. “සකදාගාමී සත්තො{8} තුසිතං කායං උපපන්නොති.” පෙත්තෙය්යොපි{9} මෙ භන්තෙ ඉසිදත්තො අබ්රහ්මචාරී අහොසි සදාරසන්තුට්ඨො. සොපි කාලකතො.{7} භගවතා ව්යාකතො: “සකදාගාමි සත්තො{8} තුසිතං කායං උපපන්නො”ති.
කථං කථං නාමායං භන්තෙ ආනන්ද, භගවතා ධම්මො දෙසිතො අඤ්ඤෙය්යො, යත්ර හි නාම බ්රහ්මචාරී ච අබ්රහ්මචාරී ච උභො සමසමගතිකා භවිස්සන්ති අභිසම්පරායන්ති?
එවං ඛො පනෙතං භගිනි භගවතා ව්යාකතන්ති.
අථ ඛො ආයස්මා ආනන්දො මිගසාලාය උපාසිකාය නිවෙසනෙ පිණ්ඩපාතං ගහෙත්වා උට්ඨායාසනා පක්කාමි. අථ ඛො ආයස්මා ආනන්දො පච්ඡාභත්තං පිණ්ඩපාතපටික්කන්තො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා ආනන්දො භගවන්තං එතදවොච:
ඉධාහං භන්තෙ පුබ්බන්හසමයං නිවාසෙත්වා පත්තචීවරමාදාය යෙන මිගසාලාය උපාසිකාය නිවෙසනං, තෙනුපසඞ්කමිං. උපසඞ්කමිත්වා පඤ්ඤත්තෙ ආසනෙ නිසීදිං. අථ ඛො භන්තෙ මිගසාලා උපාසිකා යෙනාහං තෙනුපසඞ්කමි. උපසඞ්කමිත්වා මං අභිවාදෙත්වා එකමන්තං නිසීදි. එකමන්තං නිසින්නා ඛො භන්තෙ මිගසාලා උපාසිකා මං එතදවොච:
කථං කථං නාමාය භන්තෙ ආනන්ද, භගවතා ධම්මො දෙසිතො අඤ්ඤෙය්යො, යත්ර හි නාම බ්රහ්මචාරී ච අබ්රහ්මචාරී ච උභො සමසමගතිකා භවිස්සන්ති අභිසම්පරායං. පිතා මෙ භන්තෙ පුරාණො බ්රහ්මචාරී අහොසි ආරාචාරී විරතො මෙථුනා ගාමධම්මා. සො කාලකතො{1}. භගවතා ව්යාකතො: සකදාගාමී සත්තො{2} තුසිතං කායං උපපන්නොති. පෙත්තෙය්යොපි{3} මෙ භන්තෙ ඉසිදත්තො අබ්රහ්මචාරී අහොසි සදාරසන්තුට්ඨො. සොපි කාලකතො. භගවතා ව්යාකතො: සකදාගාමී සත්තො{2} තුසිතං කායං උපපන්නොති. කථං කථං නාමායං භන්තෙ ආනන්ද භගවතා ධම්මො දෙසිතො අඤ්ඤෙය්යො, යත්ර හි නාම බ්රහ්මචාරීච අබ්රහ්මචාරී ච උභො සමසමගතිකා භවිස්සන්ති අභිසම්පරායන්ති?
එවං වුත්තෙ අහං භන්තෙ මිගසාලං උපාසිකං එතදවොචං: එවං ඛො පනෙතං භගිනි භගවතා බ්යාකතන්ති.
කා චානන්ද මිගසාලා උපාසිකා බාලා අබ්යත්තා අම්බකා අම්බකපඤ්ඤා?{4} කෙ ච පුරිසපුග්ගලපරොපරියඤාණෙ?
ඡයිමෙ ආනන්ද පුග්ගලා සන්තො සංවිජ්ජමානා ලොකස්මිං කතමෙ ඡ?
ඉධානන්ද එකච්චො පුග්ගලො සොරතො හොති සුඛසංවාසො. අභිනන්දන්ති සබ්රහ්මචාරී එකත්තවාසෙන. තස්ස සවණෙනපි අකතං හොති, බාහුසච්චෙනපි අකතං හොති, දිට්ඨියාපි අප්පටිවිද්ධං හොති, සාමයිකම්පි{5} විමුත්තිං න ලභති. සො කායස්ස භෙදා පරං මරණා හානාය පරෙති නො විසෙසාය, හානගාමීයෙව{6} හොති නො විසෙසගාමී. (1)
ඉධානන්ද එකච්චො පුග්ගලො සොරතො හොති සුඛසංවාසො. අභිනන්දන්ති සබ්රහ්මචාරී එකත්තවාසෙන. තස්ස සවණෙනපි කතං හොති. බාහුසච්චෙනපි කතං හොති. දිට්ඨියාපි සුප්පටිවිද්ධං{1}. හොති. සාමයිකම්පි විමුත්තිං ලභති. සො කායස්ස භෙදා පරං මරණා විසෙසාය පරෙති නො හානාය. විසෙසගාමීයෙව{2} හොති නො හානගාමී. (2)
තත්රානන්ද පමාණකා{3} පමිණන්ති: ඉමස්සපි තෙව ධම්මා, අපරස්සපි තෙව ධම්මා. කස්මා තෙසං එකො හීනො, එකො පණීතොති. තං හි තෙසං ආනන්ද හොති දීඝරත්තං අහිතාය දුක්ඛාය.
තත්රානන්ද ය්වායං පුග්ගලො සොරතො{4}. හොති සුඛසංවාසො. අභිනන්දන්ති සබ්රහ්මචාරී එකත්තවාසෙන. තස්ස සවණෙනපි කතං හොති. බාහුසච්චෙනපි කතං හොති. දිට්ඨියාපි සුප්පටිවිද්ධං{1} හොති. සාමයිකම්පි විමුත්තිං ලභති. අයම්පි ආනන්ද පුග්ගලො අමුනා පුරිමෙන පුග්ගලෙන අභික්කන්තතරො ච පණීතතරො ච. තං කිස්ස හෙතු? ඉමං හානන්ද පුග්ගලං ධම්මසොතො නිබ්බහති. තදන්තරං කො ජානෙය්ය අඤ්ඤත්ර තථාගතෙන?
තස්මාතිහ ආනන්ද මා පුග්ගලෙසු පමාණකා{3} අහුවත්ථ. මා පුග්ගලෙසු පමාණං ගණ්හිත්ථ. ඛඤ්ඤති හානන්ද පුග්ගලෙසු පමාණං ගණ්හන්තො.
අහං වා ආනන්ද පුග්ගලෙසු පමාණං ගණ්හෙය්යං යො වා පනස්ස මාදිසො.
ඉධ පනානන්ද එකච්චස්ස පුග්ගලස්ස කොධමානො අධිගතො හොති සමයෙන සමයඤ්චස්ස ලොභධම්මා උප්පජ්ජන්ති. තස්ස සවණෙනපි අකතං හොති. බාහුසච්චෙනපි අකතං හොති. දිට්ඨියාපි අප්පටිවිද්ධං හොති. සාමයිකම්පි විමුත්තිං න ලභති. සො කායස්ස භෙදා පරම්මරණා හානාය පරෙති, නො විසෙසාය, හානගාමීයෙව හොති, නො විසෙසගාමී. (3)
ඉධ පනානන්ද එකච්චස්ස පුග්ගලස්ස කොධමානො අධිගතො හොති. සමයෙන සමයඤ්චස්ස ලොභධම්මා උප්පජ්ජන්ති. තස්ස සවණෙනපි කතං හොති -පෙ- නො හානගාමී. (4)
තත්රානන්ද පමාණකා පමිණන්ති -පෙ- යො වා පනස්ස මාදිසො.
ඉධ පනානන්ද එකච්චස්ස පුග්ගලස්ස කොධමානො අධිගතො හොති. සමයෙන සමයඤ්චස්ස වචීසංසාරා{5} උප්පජ්ජන්ති. තස්ස සවණෙනපි අකතං හොති. බාහුසච්චෙනපි අකතං හොති. දිට්ඨියාපි අප්පටිවිද්ධං හොති. සාමයිකම්පි විමුත්තිං න ලභති. සො කායස්ස භෙදා පරම්මරණා හානාය පරෙති නො විසෙසාය, හානගාමීයෙව හොති නො විසෙසගාමී. (5)
ඉධ පනානන්ද එකච්චස්ස පුග්ගලස්ස කොධමානො අධිගතො හොති. සමයෙන සමයඤ්චස්ස වචීසංසාරා{1} උප්පජ්ජන්ති. තස්ස සවණෙනපි කතං හොති බාහුසච්චෙනපි කතං හොති. දිට්ඨියාපි පටිවිද්ධං හොති. සාමයිකම්පි විමුත්තිං ලභති. සො කායස්ස භෙදා පරම්මරණා විසෙසාය පරෙති නො හානාය. විසෙසගාමීයෙව හොති, නො හානගාමී. (6)
තත්රානන්ද පමාණකා පමිණනන්ති: ඉමස්සපි තෙව ධම්මා, අපරස්සපි තෙව ධම්මා. කස්මා තෙසං එකො හීනො, එකො පණීතොති? තං හි තෙසං ආනන්ද හොති දීඝරත්තං අහිතාය දුක්ඛාය.
තත්රානන්ද යස්ස පුග්ගලස්ස කොධමානො අධිගතො හොති. සමයෙන සමයඤ්චස්ස වචීසංසාරා උප්පජ්ජන්තී. තස්ස සවණෙනපි කතං හොති බාහුසච්චෙනපි කතං හොති. දිට්ඨියාපි සුප්පටිවිද්ධං හොති. සාමයිකම්පි විමුත්තිං ලභති. අයං ආනන්ද පුග්ගලො අමුනා පුරිමෙන පුග්ගලෙන අභික්කන්තතරො ච පණීතතරො ච. තං කිස්ස හෙතු: ඉමං හානන්ද පුග්ගලං ධම්මසොතො නිබ්බහති. තදන්තරං කො ජානෙය්ය අඤ්ඤත්ර තථාගතෙන?
තස්මාතිහ ආනන්ද මා පුග්ගලෙසු පමාණකා අහුවත්ථ, මා පුග්ගලෙසු පමාණං ගණ්හිත්ථ. ඛඤ්ඤති හානන්ද පුග්ගලෙසු පමාණං ගණ්හන්තො.
අහං වා ආනන්ද පුග්ගලෙසු පමාණං ගණ්හෙය්යං, යො වා පනස්ස මාදිසො.
කා චානන්ද මිගසාලා උපාසිකා බාලා අව්යත්තා අම්බකා අම්බකපඤ්ඤා? කෙ ච පුරිසපුග්ගලපරොපරියඤාණෙ?
ඉමෙ ඛො ආනන්ද ඡ පුග්ගලා සන්තො සංවිජ්ජමානො ලොකස්මිං.
යථාරූපෙන ආනන්ද සීලෙන පුරාණො සමන්නාගතො අහොසි, තථාරූපෙන සීලෙන ඉසිදත්තො සමන්නාගතො අභවිස්ස, නයිධ පුරාණො ඉසිදත්තස්ස ගතිම්පි අඤ්ඤස්ස. යථාරූපාය ච ආනන්ද පඤ්ඤාය ඉසිදත්තො සමන්නාගතො අහොසි. තථාරූපාය පඤ්ඤාය පුරාණො සමන්නාගතො අභවිස්ස, නයිධ ඉසිදත්තො පුරාණස්ස ගතිම්පි අඤ්ඤස්ස. ඉති ඛො ආනන්ද ඉමෙ පුග්ගලා උභො එකඞ්ගහීනාති.
6. 1. 5. 3.
[ඉණ සුත්තං]
[සාවත්ථිනිදානං]
45. (1) දාළිද්දියං භික්ඛවෙ දුක්ඛං ලොකස්මිං කාමභොගිනොති?
එවං භන්තෙ.
(2) යම්පි භික්ඛවෙ දළිද්දො අස්සකො අනාළ්හියො{1} ඉණං ආදියති. ඉණාදානම්පි භික්ඛවෙ දුක්ඛං ලොකස්මිං කාමභොගිනොති?
එවං භන්තෙ.
(3) යම්පි භික්ඛවෙ දළිද්දො අස්සකො අනාළ්හියො ඉණං ආදියිත්වා වඩ්ඪිං පටිසුණාති.{2} වඩ්ඪිපි භික්ඛවෙ දුක්ඛා ලොකස්මිං සාමභොගිනොති?
එවං භන්තෙ.
(4) යම්පි භික්ඛවෙ දළිද්දො අස්සකො අනාළ්හියො වඩ්ඪිං පටිසුණිත්වා කාලාභතං වඩ්ඪිං න දෙති. චොදෙන්තිපි නං චොදනාපි භික්ඛවෙ දුක්ඛා ලොකස්මිං කාමභොගිනොති?
එවං භන්තෙ.
(5) යම්පි භික්ඛවෙ දළිද්දො අස්සකො අනාළ්හියො චොදියමානො න දෙති. අනුචරන්තිපි නං. අනුචරියාපි භික්ඛවෙ දුක්ඛා ලොකස්මිං කාමභොගිනොති?
එවං භන්තෙ.
(6) යම්පි භික්ඛවෙ දළිද්දො අස්සකො අනාළ්හියො අනුචරියමානො න දෙති. බන්ධන්තිපි නං. බන්ධනම්පි භික්ඛවෙ දුක්ඛං ලොකස්මිං කාමභොගිනොති?
එවං භන්තෙ.
ඉති ඛො භික්ඛවෙ දාළිද්දියම්පි දුක්ඛං ලොකස්මිං කාමභොගිනො. ඉණාදානම්පි දුක්ඛං ලොකස්මිං කාමභොගිනො. වඩ්ඪීපි දුක්ඛා ලොකස්මිං කාමභොගිනො, චොදනාපි දුක්ඛා ලොකස්මිං කාමභොගිනො. අනුචරියාපි දුක්ඛා ලොකස්මිං කාමභොගිනො. බන්ධනම්පි දුක්ඛං ලොකස්මිං කාමභොගිනො.
එවමෙව ඛො භික්ඛවෙ යස්ස කස්සචි සද්ධා නත්ථි කුසලෙසු ධම්මෙසු, හිරි නත්ථි කුසලෙසු ධම්මෙසු, ඔත්තප්පං නත්ථි කුසලෙසු ධම්මෙසු, විරියං නත්ථි කුසලෙසු ධම්මෙසු, පඤ්ඤා නත්ථි කුසලෙසු ධම්මෙසු,{3} අයං වුච්චති භික්ඛවෙ අරියස්ස විනයෙ දළිද්දො අස්සකො අනාළ්හියො. ස ඛො සො භික්ඛවෙ දළිද්දො අස්සකො අනාළ්හියො, සද්ධාය අසති කුසලෙසු ධම්මෙසු, හිරියා අසති කුසලෙසු ධම්මෙසු, ඔත්තප්පෙ අසති කුසලෙසු ධම්මෙසු, විරියෙ අසති කුසලෙසු ධම්මෙසු, පඤ්ඤාය අසති කුසලෙසු ධම්මෙසු, කායෙන දුච්චරිතං චරති. වාචාය දුච්චරිතං චරති. මනසා දුච්චරිතං චරති. ඉදමස්ස ඉණාදානස්මිං වදාමි.
සො තස්ස කායදුච්චරිතස්ස පටිච්ඡාදනහෙතු පාපිකං ඉච්ඡං පණිදහති: මා මං ජඤ්ඤාති ඉච්ඡති, මා මං ජඤ්ඤාති සඞ්කප්පෙති, මා මං ජඤ්ඤාති වාචං භාසති, මා මං ජඤ්ඤාති කායෙන පරක්කමති. සො තස්ස වචීදුච්චරිතස්ස පටිච්ඡාදනහෙතු -පෙ- සො තස්ස මනොදුච්චරිතස්ස පටිච්ඡාදනහෙතු පාපිකං ඉච්ඡං පණිදහති: මා මං ජඤ්ඤාති ඉච්ඡති, මා මං ජඤ්ඤාති සඞ්කප්පෙති, මා මං ජඤ්ඤාති වාචං භාසති. මා මං ජඤ්ඤාති කායෙන පරක්කමති. ඉදමස්ස වඩ්ඪියා වදාමි.
තමෙනං පෙසලා සබ්රහ්මචාරී එවමාහංසු: “අයඤ්ච සො ආයස්මා එවංකාරී එවං සමාචාරො”ති. ඉදමස්ස චොදනාය වදාමි.
තමෙනං අරඤ්ඤගතං වා රුක්ඛමූලගතං වා සුඤ්ඤාගාරගතං වා විප්පටිසාරසහගතා පාපකා අකුසලවිතක්කා සමුදාචරන්ති. ඉදමස්ස අනුචරියාය වදාමි.
ස ඛො සො භික්ඛවෙ දළිද්දො අස්සකො අනාළ්හියො කායෙන දුච්චරිතං චරිත්වා වාචාය දුච්චරිතං චරිත්වා මනසා දුච්චරිතං චරිත්වා කායස්ස භෙදා පරම්මරණා නිරයබන්ධනෙ වා බජ්ඣති, තිරච්ඡානයොනිබන්ධනෙ වා.{*}
නාහං භික්ඛවෙ අඤ්ඤං එකධම්මම්පි සමනුපස්සාමි එවංදාරුණං එවං කටුකං එවං අන්තරායකරං අනුත්තරස්ස යොගක්ඛෙමස්ස අධිගමාය යථයිදං භික්ඛවෙ නිරයබන්ධනං වා තිරච්ඡානයොනිබන්ධනං වා’ති.
34. දාළිද්දියං දුක්ඛං ලොකෙ ඉණාදානං ච වුච්චති, දළිද්දො ඉණමාදාය භුඤ්ජමානො විහඤ්ඤති.
35. තතො අනුචරන්තී නං බන්ධනම්පි නිගච්ඡති. එතං හි බන්ධනං දුක්ඛං කාමලාභාභිජප්පිනං.
36. තථෙව අරියවිනයෙ සද්ධා යස්ස න විජ්ජති, අහිරිකො අනොත්තප්පී පාපකම්මාවිනිච්ඡයො.{1}
37. කායදුච්චරිතං කත්වා වචීදුච්චරිතානි ච, මනොදුච්චතං කත්වා මා මං ජඤ්ඤාති{2} ඉච්ඡති.
38. සො සංසප්පති කායෙන වාචාය උදචෙතසා, පාපකම්මා පවඩ්ඪෙන්තො තත්ථ තත්ථ පුනප්පුනං.
39. සො පාපකම්මො දුම්මෙධො ජානං දුක්කටමත්තනො, දළිද්දො ඉණමාදාය භුඤ්ජමානො විහඤ්ඤති,
40. තතො අනුචරන්තී නං සඞ්කප්පා මානසා දුඛා, ගාමෙ වා යදි වා රඤ්ඤෙ යස්ස විප්පටිසාරජා.
41. සො පාපකම්මො දුම්මෙධො ජානං දුක්කටමත්තනො, යොනිමඤ්ඤතරං ගන්ත්වා නිරයෙ චාපි බජ්ඣති. එතං හි බන්ධනං දුක්ඛං යම්හා ධීරො පමුච්චති.
42. ධම්මලද්ධෙහි භොගෙහි දදං චිත්තං පසාදයං උභයත්ථ කටග්ගාහො සද්ධස්ස ඝරමෙසිනො.
43. දිට්ඨධම්මහිතත්ථාය සම්පරාය සුඛාය ච එවමෙතං ගහට්ඨානං චාගො පුඤ්ඤං පවඩ්ඪති.
44. තථෙව අරියවිනයෙ සද්ධා යස්ස පතිට්ඨිතා හිරිමනො ච ඔත්තප්පී පඤ්ඤවා සීලසංවුතො.
45. එසො ඛො අරියවිනයෙ සුඛංජීවීති{1} වුච්චති නිරාමිසං සුඛං ලද්ධා උපෙඛං අධිතිට්ඨති.
46. පඤ්චනීවරණෙ හිත්වා නිච්චං ආරද්ධවිරියො ඣානානි උපසම්පජ්ජ එකොදි නිපකො සතො.
47. එවං ඤත්වා යථාභූතං සබ්බසඤ්ඤොජනක්ඛයෙ සබ්බසො අනුපාදාය සම්මාචිත්තං විමුච්චති.
48. තස්ස සම්මා විමුත්තස්ස ඤාණං ච හොති තාදිනො අකුප්පා මෙ විමුත්තීති භවසඤ්ඤොජනක්ඛයෙ.
49. එතං ඛො පරමං ඤාණං එතං සුඛමනුත්තරං අසොකං විරජං ඛෙමං එතමානණ්යමුත්තමන්ති.