[සාවත්ථිනිදානං]
45. පඤ්චිමෙ භික්ඛවෙ ආදීනවා දුච්චරිතෙ කතමෙ පඤ්ච:
අත්තාපි අත්තානං උපවදති, අනුවිච්ච විඤ්ඤූ ගරහන්ති, පාපකො කිත්තිසද්දො අබ්භුග්ගච්ඡති, සද්ධම්මා වුට්ඨාති, අසද්ධම්මෙ පතිට්ඨාති.
ඉමෙ ඛො භික්ඛවෙ පඤ්ච ආදීනවා දුච්චරිතෙ.
පඤ්චිමෙ භික්ඛවෙ ආනිසංසා සුචරිතෙ. කතමෙ පඤ්ච:
අත්තාපි අත්තානං න උපවදති, අනුවිච්ච විඤ්ඤූ පසංසන්ති, කල්යාණො කිත්තිසද්දො අබ්භුග්ගච්ඡති, අසද්ධම්මා වුට්ඨාති, සද්ධම්මෙ පතිට්ඨාති.
ඉමෙ ඛො භික්ඛවෙ පඤ්ච ආනිසංසා සුචරිතෙ’ති.
5. 5. 5. 6.
[අපරකායදුච්චරිතසුත්තං]
[සාවත්ථිනිදානං]
46. පඤ්චිමෙ භික්ඛවෙ ආදීනවා කායදුච්චරිතෙ -පෙ- [අත්තාපි අත්තානං උපවදති -පෙ-]
පඤ්චිමෙ භික්ඛවෙ ආනිසංසා කායසුචරිතෙ, -පෙ- [අත්තාපි අත්තානං න උපවදති -පෙ-]
5. 5. 5. 7.
[අපරවචීදුච්චරිතසුත්තං]
[සාවත්ථිනිදානං]
47. පඤ්චිමෙ භික්ඛවෙ ආදීනවා වචීදුච්චරිතෙ -පෙ- [අත්තාපි අත්තානං උපවදති -පෙ-]
පඤ්චිමෙ භික්ඛවෙ ආනිසංසා වචීසුචරිතෙ -පෙ- [අත්තාපි අත්තානං න උපවදති -පෙ-]
5. 5. 5. 8.
[අපරමනොදුච්චරිතසුත්තං]
[සාවත්ථිනිදානං]
48. පඤ්චිමෙ භික්ඛවෙ ආදීනවා මනොදුච්චරිතෙ -පෙ- [අත්තාපි අත්තානං උපවදති -පෙ-]
පඤ්චිමෙ භික්ඛවෙ ආනිසංසා මනොසුචරිතෙ. කතමෙ පඤ්ච:
අත්තාපි අත්තානං න උපවදති, අනුවිච්ච විඤ්ඤූ පසංසන්ති, කල්යාණො කිත්තිසද්දො අබ්භුග්ගච්ඡති, අසද්ධම්මා වුට්ඨාති, සද්ධම්මෙ පතිට්ඨාති.
ඉමෙ ඛො භික්ඛවෙ පඤ්ච ආනිසංසා මනොසුචරිතෙ’ති.
5. 5. 5. 9.
[සීවථිකාසුත්තං]
[සාවත්ථිනිදානං]
49. පඤ්චිමෙ භික්ඛවෙ ආදීනවා සීවථිකාය. කතමෙ පඤ්ච:
අසුචි, දුග්ගන්ධා, සප්පටිභයා, වාළානං අමනුස්සානං ආවාසො, බහුනො ජනස්ස ආරොදනා.
ඉමෙ ඛො භික්ඛවෙ පඤ්ච ආදීනවා සීවථිකාය.
එවමෙව ඛො භික්ඛවෙ පඤ්චිමෙ ආදීනවා සීවථිකූපමෙ පුග්ගලෙ. කතමෙ පඤ්ච:
ඉධ භික්ඛවෙ එකච්චො පුග්ගලො අසුචිනා කායකම්මෙන සමන්නාගතො හොති, අසුචිනා වචීකම්මෙන සමන්නාගතො හොති, අසුචිනා මනොකම්මෙන සමන්නාගතො, හොති, ඉදමස්ස අසුචිතාය වදාමි. සෙය්යථාපි සා භික්ඛවෙ, සීවථිකා අසුචි, තථූපමාහං භික්ඛවෙ ඉමං පුග්ගලං වදාමි.
තස්ස අසුචිනා කායකම්මෙන සමන්නාගතස්ස අසුචිනා වචීකම්මෙන සමන්නාගතස්ස අසුචිනා මනොකම්මෙන සමන්නාගතස්ස පාපකො කිත්තිසද්දො අබ්භුග්ගච්ඡති, ඉදමස්ස දුග්ගන්ධතාය වදාමි. සෙය්යථාපි සා භික්ඛවෙ සීවථිකා දුග්ගන්ධා, තථූපමාහං භික්ඛවෙ ඉමං පුග්ගලං වදාමි.
තමෙනං අසුචිනා කායකම්මෙන සමන්නාගතං අසුචිනා වචීකම්මෙන සමන්නාගතං අසුචිනා මනොකම්මෙන සමන්නාගතං පෙසලා සබ්රහ්මචාරී ආරකා පරිවජ්ජෙන්ති.{1} ඉදමස්ස සප්පටිභයස්මිං වදාමි. සෙය්යථාපි සා භික්ඛවෙ සීවථිකා සප්පටිභයා, තථූපමාහං භික්ඛවෙ ඉමං පුග්ගලං වදාමි.
සො අසුචිනා කායකම්මෙන සමන්නාගතො අසුචිනා වචීකම්මෙන සමන්නාගතො අසුචිනා මනොකම්මෙන සමන්නාගතො සභාගෙහි පුග්ගලෙහි සද්ධිං සංවසති. ඉදමස්ස වාළාවාසස්මිං වදාමි. සෙය්යථාපි සා භික්ඛවෙ සීවථිකා වාළානං අමනුස්සානං ආවාසො, තථූපමාහං භික්ඛවෙ ඉමං පුග්ගලං වදාමි.
තමෙනං අසුචිනා කායකම්මෙන සමන්නාගතං අසුචිනා වචීකම්මෙන සමන්නාගතං අසුචිනා මනොකම්මෙන සමන්නාගතං පෙසලා සබ්රහ්මචාරී දිස්වා ඛීයනධම්මං{2} ආපජ්ජන්ති. ‘අහො වත නො දුක්ඛං, යෙ මයං එවරූපෙහි පුග්ගලෙහි සද්ධිං සංවසාමා’ති, ඉදමස්ස ආරොදනාය වදාමි. සෙය්යථාපි සා භික්ඛවෙ සීවථිකා බහුනො ජනස්ස ආරොදනා, තථූපමාහං භික්ඛවෙ ඉමං පුග්ගලං වදාමි.
ඉමෙ ඛො භික්ඛවෙ පඤ්ච ආදීනවා සීවථිකූපමෙ පුග්ගලෙ’ති.
5. 5. 5. 10.
[පුග්ගලප්පසාදසුත්තං]
[සාවත්ථිනිදානං]
50. පඤ්චිමෙ භික්ඛවෙ ආදීනවා පුග්ගලප්පසාදෙ. කතමෙ පඤ්ච:
යස්මිං භික්ඛවෙ පුග්ගලෙ පුග්ගලො අභිප්පසන්නො හොති, සො තථාරූපං ආපත්තිං ආපන්නො හොති, යථාරූපාය ආපත්තියා සඞ්ඝො උක්ඛිපති. තස්ස එවං හොති: “යො ඛො ම්යායං පුග්ගලො පියො මනාපො, සො සඞ්ඝෙන උක්ඛිත්තො”ති භික්ඛූසු අප්පසාදබහුලො හොති. භික්ඛුසු අප්පසාදබහුලො සමානො අඤ්ඤෙ භික්ඛූ න භජති, අඤ්ඤෙ භික්ඛු න භජන්තො සද්ධම්මං න සුණාති, සද්ධම්මං අසුණන්තො සද්ධම්මා පරිහායති. අයං භික්ඛවෙ පඨමො ආදීනවො පුග්ගලප්පසාදෙ.
පුන චපරං භික්ඛවෙ යස්මිං පුග්ගලෙ පුග්ගලො අභිප්පසන්නො හොති, සො තථාරූපං ආපත්තිං ආපන්නො හොති, යථාරූපාය ආපත්තියා සඞ්ඝො අන්තෙ නිසීදාපෙති. තස්ස එවං හොති: “යො ඛො ම්යායං පුග්ගලො පියො මනාපො, සො සඞ්ඝෙන අන්තෙ නිසීදාපිතො”ති භික්ඛුසු අප්පසාද බහුලො හොති. භික්ඛුසු අප්පසාදබහුලො සමානො අඤ්ඤෙ භික්ඛූ න භජති, අඤ්ඤෙ භික්ඛූ න භජන්තො{1} සද්ධම්මං න සුණාති, සද්ධම්මං අසුණන්තො සද්ධම්මං පරිහායති. අයං භික්ඛවෙ දුතියො ආදීනවො පුග්ගලප්පසාදෙ.
පුන චපරං භික්ඛවෙ යස්මිං පුග්ගලෙ පුග්ගලො අභිප්පසන්නො හොති: සො දිසා පක්කන්තො හොති, තස්ස එවං හොති: “යො ඛො ම්යායං පුග්ගලො පියො මනාපො, සො දිසා පක්කන්තො’ති -පෙ- අඤ්ඤෙ භික්ඛූ න භජති -පෙ- අයං භික්ඛවෙ තතියො ආදීනවො පුග්ගලප්පසාදෙ.
පුන චපරං භික්ඛවෙ යස්මිං පුග්ගලෙ පුග්ගලො -පෙ- සො විබ්භන්තො හොති, තස්ස එවං හොති -පෙ- සො විබ්භන්තො’ති -පෙ- අඤ්ඤෙ භික්ඛූ -පෙ- අයං භික්ඛවෙ චතුත්ථො ආදීනවො පුග්ගලප්පසාදෙ.
පුන චපරං භික්ඛවෙ -පෙ- සො කාලංකතො හොති. තස්ස එවං හොති. ‘යො ඛො ම්යායං පුග්ගලො පියො මනාපො, සො කාලකතො’ති, -පෙ- අඤ්ඤෙ භික්ඛූ න භජති, අඤ්ඤෙ භික්ඛූ න භජන්තො සද්ධම්මං න සුණාති, සද්ධම්මං අසුණන්තො සද්ධම්මා පරිහායති. අයං භික්ඛවෙ පඤ්චමො ආදීනවො පුග්ගලප්පසාදෙ.
ඉමෙ ඛො භික්ඛවෙ පඤ්ච ආදීනවා පුග්ගලප්පසාදෙ’ති.
දුච්චරිතවග්ගො පඤ්චමො
තස්සුද්දානං:
දුච්චරිතං කායදුච්චරිතං වචීදුච්චරිතං මනොදුච්චරිතං චතූහි පරෙ ද්වෙ සීවථිකා පුග්ගලප්පසාදෙන චාති
පඤ්චමං පණ්ණාසකං.
6. ඡට්ඨපණ්ණාසකං.
1. උපසම්පදාවග්ගො
5. 6. 1. 1.
[උපසම්පාදෙතබ්බසුත්තං]
[සාවත්ථිනිදානං]
1. පඤ්චහි භික්ඛවෙ ධම්මෙහි සමන්නාගතෙන භික්ඛුනා උපසම්පාදෙතබ්බං. කතමෙහි පඤ්චහි:
ඉධ භික්ඛවෙ භික්ඛු අසෙඛෙන සීලක්ඛන්ධෙන සමන්නාගතො හොති, අසෙඛෙන සමාධික්ඛන්ධෙන සමන්නාගතො හොති, අසෙඛෙන පඤ්ඤාක්ඛන්ධෙන සමන්නාගතො හොති, අසෙඛෙන විමුත්තික්ඛන්ධෙන සමන්නාගතො හොති, අසෙඛෙන විමුත්තිඤාණදස්සනක්ඛන්ධෙන සමන්නාගතො හොති.
ඉමෙහි ඛො භික්ඛවෙ පඤ්චහි ධම්මෙහි සමන්නාගතෙන භික්ඛුනා උපසම්පාදෙතබ්බන්ති.
5. 6. 1. 2.
[නිස්සයසුත්තං]
[සාවත්ථිනිදානං]
2. පඤ්චහි භික්ඛවෙ ධම්මෙහි සමන්නාගතෙන භික්ඛුනා නිස්සයො දාතබ්බො. කතමෙහි පඤ්චහි:
ඉධ භික්ඛවෙ භික්ඛු අසෙඛෙන සීලක්ඛන්ධෙන සමන්නාගතො හොති, අසෙඛෙන සමාධික්ඛන්ධෙන සමන්නාගතො හොති, අසෙඛෙන පඤ්ඤාක්ඛන්ධෙන සමන්නාගතො හොති, අසෙඛෙන විමුත්තික්ඛන්ධෙන සමන්නාගතො හොති, අසෙඛෙන විමුත්තිඤාණදස්සනක්ඛන්ධෙන සමන්නාගතො හොති.
ඉමෙහි ඛො භික්ඛවෙ පඤ්චහි ධම්මෙහි සමන්නාගතෙන භික්ඛුනා නිස්සයො දාතබ්බොති.
5. 6. 1. 3.
[සාමණෙරසුත්තං]
[සාවත්ථිනිදානං]
3. පඤ්චහි භික්ඛවෙ, අඞ්ගෙහි සමන්නාගතෙන භික්ඛුනා සාමණෙරො උපට්ඨාපෙතබ්බො. කතමෙහි පඤ්චහි:
ඉධ භික්ඛවෙ භික්ඛු අසෙඛෙන සීලක්ඛන්ධෙන සමන්නාගතො හොති, අසෙඛෙන සමාධික්ඛන්ධෙන සමන්නාගතො හොති, අසෙඛෙන පඤ්ඤාක්ඛන්ධෙන සමන්නාගතො හොති, අසෙඛෙන විමුත්තික්ඛන්ධෙන සමන්නාගතො හොති, අසෙඛෙන විමුත්තිඤාණදස්සනක්ඛන්ධෙන සමන්නාගතො හොති.
ඉමෙහි ඛො භික්ඛවෙ, පඤ්චහි ධම්මෙහි සමන්නාගතෙන භික්ඛුනා සාමණෙරො උපට්ඨාපෙතබ්බොති.
5. 6. 1. 4.
[මච්ඡරියසුත්තං]
[සාවත්ථිනිදානං]
4. පඤ්චිමානි භික්ඛවෙ මච්ඡරියානි. කතමානි පඤ්ච:
ආවාසමච්ඡරියං කුලමච්ඡරියං ලාභමච්ඡරියං වණ්ණමච්ඡරියං ධම්මමච්ඡරියං.
ඉමානි ඛො භික්ඛවෙ, පඤ්ච මච්ඡරියානි.
ඉමෙසං ඛො භික්ඛවෙ පඤ්චන්නං මච්ඡරියානං එතං පතිකිට්ඨං{1} යදිදං ධම්මමච්ඡරියන්ති.
5. 6. 1. 5.
[මච්ඡරියපහානසුත්තං]
[සාවත්ථිනිදානං]
5. පඤ්චන්නං භික්ඛවෙ මච්ඡරියානං පහානාය සමුච්ඡෙදාය බ්රහ්මචරියං වුස්සති. කතමෙසං පඤ්චන්නං:
ආවාසමච්ඡරියස්ස පහානාය සමුච්ඡෙදාය බ්රහ්මචරියං වුස්සති. කුලමච්ඡරියස්ස -පෙ- ලාභමච්ඡරියස්ස -පෙ- වණ්ණමච්ඡරියස්ස -පෙ- ධම්මමච්ඡරියස්ස පහානාය සමුච්ඡෙදාය බ්රහ්මචරියං වුස්සති.
ඉමෙසං ඛො භික්ඛවෙ, පඤ්චන්නං මච්ඡරියානං පහානාය සමුච්ඡෙදාය බ්රහ්මචරියං වුස්සතීති.
5. 6. 1. 6.
[පඨමජ්ඣානසුත්තං]
[සාවත්ථිනිදානං]
6. පඤ්චිමෙ භික්ඛවෙ ධම්මෙ අප්පහාය අභබ්බො පඨමං ඣානං උපසම්පජ්ජ විහරිතුං. කතමෙ පඤ්ච:
ආවාසමච්ඡරියං කුලමච්ඡරියං, ලාභමච්ඡරියං, වණ්ණමච්ඡරියං, ධම්මමච්ඡරියං.
ඉමෙ ඛො භික්ඛවෙ පඤ්ච ධම්මෙ අප්පහාය අභබ්බො පඨමං ඣානං උපසම්පජ්ජ විහරිතුං.
පඤ්චිමෙ භික්ඛවෙ, ධම්මෙ පහාය භබ්බො පඨමං ඣානං උපසම්පජ්ජ විහරිතුං. කතමෙ පඤ්ච:
ආවාසමච්ඡරියං, කුලමච්ඡරියං, ලාභමච්ඡරියං, වණ්ණමච්ඡරියං, ධම්මමච්ඡරියං.
ඉමෙ ඛො භික්ඛවෙ පඤ්ච ධම්මෙ පහාය භබ්බො පඨමං ඣානං උපසම්පජ්ජ විහරිතුන්ති.
5. 6. 1. 7-10.
[දුතියජ්ඣානාදිසුත්තානි]{*}
[සාවත්ථිනිදානං]
7-9. පඤ්චිමෙ{1} භික්ඛවෙ, ධම්මෙ අප්පහාය අභබ්බො දුතියං ඣානං -පෙ- තතියං ඣානං -පෙ- චතුත්ථං ඣානං උපසම්පජ්ජ විහරිතුං. කතමෙ පඤ්ච.
ආවාසමච්ඡරියං, කුලමච්ඡරියං, ලාභමච්ඡරියං, වණ්ණමච්ඡරියං, ධම්මමච්ඡරියං,
ඉමෙ ඛො භික්ඛවෙ පඤ්ච ධම්මෙ අප්පහාය අභබ්බො දුතියං ඣානං -පෙ- තතියං ඣානං -පෙ- චතුත්ථං ඣානං උපසම්පජ්ජ විහරිතුං.
පඤ්චිමෙ භික්ඛවෙ, ධම්මෙ පහාය භබ්බො දුතියං ඣානං -පෙ- තතියං ඣානං -පෙ- චතුත්ථං ඣානං උපම්පජ්ජ විහරිතුං. කතමෙ පඤ්ච.