තස්සුද්දානං:
අක්කොසභණ්ඩනසීලං බහුභාණී ද්වෙ අක්ඛන්තියො අපාසාදිකා ද්වෙ වුත්තා අග්ගිස්මිං මධුරාය{2} චා’ති.
3. දීඝචාරික වග්ගො.
5. 5. 3. 1.
[පඨමදීඝචාරික සුත්තං]
[සාවත්ථිනිදානං]
21. පඤ්චිමෙ භික්ඛවෙ ආදීනවා දීඝචාරිකං අනවත්ථ චාරිකං{1} අනුයුත්තස්ස විහරතො. කතමෙ පඤ්ච:
අස්සුතං න සුණාති, සුතං න පරියොදපෙති, සුතෙනෙකච්චෙන අවිසාරදො හොති, බාළ්හං රොගාතඞ්කං ඵුසති, න ච මිත්තවා හොති.
ඉමෙ ඛො භික්ඛවෙ පඤ්ච ආදීනවා දීඝචාරිකං අනවත්ථ චාරිකං{1} අනුයුත්තස්ස විහරතො.
පඤ්චිමෙ භික්ඛවෙ ආනිසංසා සමවත්ථචාරෙ. කතමෙ පඤ්ච:
අස්සුතං සුණාති, සුතං පරියොදපෙති, සුතෙනෙකච්චෙන විසාරදො හොති, න බාළ්හං{2} රොගාතඞ්කං ඵුසති, මිත්තවා ච හොති.
ඉමෙ ඛො භික්ඛවෙ පඤ්ච ආනිසංසා සමවත්ථචාරෙති.
5. 5. 3. 2.
[දුතියදීඝචාරික සුත්තං]
[සාවත්ථිනිදානං]
22. පඤ්චිමෙ භික්ඛවෙ ආදීනවා දීඝචාරිකං අනවත්ථ චාරිකං{1} අනුයුත්තස්ස විහරතො. කතමෙ පඤ්ච:
අනධිගතං නාධිගච්ඡති අධිගතං පරිහායති, අධිගතෙනෙකච්චෙන අවිසාරදො හොති බාළ්හං{2} රොගාතඞ්කං ඵුසති, න ච මිත්තවා හොති.
ඉමෙ ඛො භික්ඛවෙ පඤ්ච ආදීනවා දීඝචාරිකං අනවත්ථ චාරිකං{1} අනුයුත්තස්ස විහරතො.
පඤ්චිමෙ භික්ඛවෙ ආනිසංසා සමවත්ථචාරෙ. කතමෙ පඤ්ච:
අනධිගතං අධිගච්ඡති, අධිගතං න පරිහායති, අධිගතෙනෙකච්චෙන විසාරදො හොති, න බාළ්හං{2} රොගාතඞ්කං ඵුසති, මිත්තවා ච හොති.
ඉමෙ ඛො භික්ඛවෙ පඤ්ච ආනිසංසා සමවත්ථචාරෙති.
5. 5. 3. 3.
[පඨමඅතිනිවාස සුත්තං]
[සාවත්ථිනිදානං]
23. පඤ්චිමෙ භික්ඛවෙ ආදීනවා අතිනිවාසෙ{1} කතමෙ පඤ්ච:
බහුභණ්ඩො හොති බහුභණ්ඩසන්නිචයො, බහුභෙසජ්ජො හොති බහුභෙසජ්ජසන්නිචයො, බහුකිච්චො හොති බහුකරණීයො ව්යත්තො කිඞ්කරණීයෙසු, සංසට්ඨො විහරති ගහට්ඨපබ්බජිතෙහි අනනුලොමිකෙන ගිහීසංසග්ගෙන, තම්හා ච ආවාසා පක්කමන්තො සාපෙක්ඛො පක්කමති.
ඉමෙ ඛො භික්ඛවෙ, පඤ්ච ආදීනවා අතිනිවාසෙ.
පඤ්චිමෙ භික්ඛවෙ, ආනිසංසා සමවත්ථවාසෙ. කතමෙ පඤ්ච:
න බහුභණ්ඩො හොති න බහුභණ්ඩසන්නිචයො, න බහුභෙසජ්ජො හොති න බහුභෙසජ්ජසන්නිචයො, න බහුකිච්චො හොති න බහුකරණීයො න ව්යත්තො කිඞ්කරණීයෙසු, අසංසට්ඨො විහරති ගහට්ඨපබ්බජිතෙහි අනනුලොමිකෙන ගිහීසංසග්ගෙන, තම්හා ච ආවාසා පක්කමන්තො අනපෙක්ඛො පක්කමති.
ඉමෙ ඛො භික්ඛවෙ, පඤ්ච ආනිසංසා සමවත්ථවාසෙති.
5. 5. 3. 4.
[දුතිය අතිනිවාස සුත්තං]
[සාවත්ථිනිදානං]
24. පඤ්චිමෙ භික්ඛවෙ ආදීනවා අතිනිවාසෙ{1} කතමෙ පඤ්ච:
ආවාසමච්ඡරී හොති, කුලමච්ඡරී හොති, ලාභමච්ඡරී හොති, වණ්ණමච්ඡරී හොති, ධම්මමච්ඡරී හොති.
ඉමෙ ඛො භික්ඛවෙ, පඤ්ච ආදීනවා අතිනිවාසෙ.
පඤ්චිමෙ භික්ඛවෙ, ආනිසංසා සමවත්ථවාසෙ. කතමෙ පඤ්ච:
න ආවාසමච්ඡරී හොති, න ධම්මමච්ඡරී හොති, න ලාභමච්ඡරී හොති. න වණ්ණමච්ඡරී හොති, න ධම්මමච්ඡරී හොති.
ඉමෙ ඛො භික්ඛවෙ, පඤ්ච ආනිසංසා සමවත්ථවාසෙති.
5. 5. 3. 5.
[පඨමකුලූපග සුත්තං]
[සාවත්ථිනිදානං]
25. පඤ්චිමෙ භික්ඛවෙ ආදීනවා කුලූපගෙ. කතමෙ පඤ්ච:
අනාමන්තචාරෙ ආපජ්ජති, රහො නිසජ්ජාය ආපජ්ජති, පටිච්ඡන්නෙ ආසනෙ ආපජ්ජති, මාතුගාමස්ස උත්තරිං ඡප්පඤ්ච වාචාහි ධම්මං දෙසෙන්තො ආපජ්ජති, කාමසඞ්කප්පබහුලො විහරති.
ඉමෙ ඛො භික්ඛවෙ පඤ්ච ආදීනවා කුලූපගෙ’ති.
5. 5. 3. 6.
[දුතියකුලූපග සුත්තං]
[සාවත්ථිනිදානං]
26. පඤ්චිමෙ භික්ඛවෙ ආදීනවා කුලූපගස්ස භික්ඛුනො අතිවෙලං කුලෙසු සංසට්ඨස්ස විහරතො. කතමෙ පඤ්ච:
මාතුගාමස්ස අභිණ්හදස්සනං, දස්සනෙ සති සංසග්ගො, සංසග්ගෙ සති විස්සාසො, විස්සාසෙ සති ඔතාරො, ඔතිණ්ණචිත්තස්සෙතං පාටිකඞ්ඛං: අනභිරතො වා බ්රහ්මචරියං චරිස්සති, අඤ්ඤතරං වා සඞ්කිලිට්ඨං ආපත්තිං ආපජ්ජිස්සති, සික්ඛං වා පච්චක්ඛාය හීනයාවත්තිස්සති.
ඉමෙ ඛො භික්ඛවෙ පඤ්ච ආදීනවා කුලූපගස්ස භික්ඛුනො අතිවෙලං කුලෙසු සංසට්ඨස්ස විහරතොති.
5. 5. 3. 7.
[භොගසුත්තං]
[සාවත්ථිනිදානං]
27. පඤ්චිමෙ භික්ඛවෙ ආදීනවා භොගෙසු. කතමෙ පඤ්ච:
අග්ගිසාධාරණා භොගා, උදකසාධාරණා භොගා, රාජසාධාරණා භොගා, චොරසාධාරණා භොගා, අප්පියෙහි දායාදෙහි සාධාරණා භොගා.
ඉමෙ ඛො භික්ඛවෙ පඤ්ච ආදීනවා භොගෙසු.
පඤ්චිමෙ භික්ඛවෙ ආනිසංසා භොගෙසු. කතමෙ පඤ්ච:
භොගෙ නිස්සාය අත්තානං සුඛෙති පීණෙති සම්මා සුඛං පරිහරති, මාතාපිතරො සුඛෙති පීණෙති සම්මා සුඛං පරිහරති, පුත්තදාරදාසකම්මකරපොරිසෙ සුඛෙති පීණෙති සම්මා සුඛං පරිහරති, මිත්තාමච්චෙ සුඛෙති පීණෙති සම්මා සුඛං පරිහරති, සමණබ්රාහ්මණෙසු උද්ධග්ගිකං දක්ඛිණං පතිට්ඨාපෙති සොවග්ගිකං සුඛවිපාකං සග්ගසංවත්තනිකං.
ඉමෙ ඛො භික්ඛවෙ පඤ්ච ආනිසංසා භොගෙසූ’ති.
5. 5. 3. 8.
[උස්සූරභත්තසුත්තං]
[සාවත්ථිනිදානං]
28. පඤ්චිමෙ භික්ඛවෙ ආදීනවා උස්සූරභත්තෙ කුලෙ. කතමෙ පඤ්ච:
යෙ තෙ අතිථී පාහුනා තෙ න කාලෙන පටිපූජෙන්ති, යා තා බලිපටිග්ගාහිකා{1} දෙවතා තා න කාලෙන පටිපූජෙන්ති, යෙ තෙ සමණබ්රාහ්මණා එකභත්තිකා රත්තූපරතා විරතා විකාලභොජනා තෙ න කාලෙන පටිපූජෙන්ති, දාසකම්මකරපොරිසා විමුඛා කම්මං කරොන්ති, තාවතකං යෙව අසමයෙන භුත්තං අනොජවන්තං හොති.
ඉමෙ ඛො භික්ඛවෙ පඤ්ච ආදීනවා උස්සූරභත්තෙ කුලෙ.
පඤ්චිමෙ භික්ඛවෙ ආනිසංසා සමයභත්තෙ කුලෙ. කතමෙ පඤ්ච:
යෙ තෙ අතිථී පාහුනා තෙ කාලෙන පටිපූජෙන්ති, යා තා බලිපටිග්ගාහිකා{1} දෙවතා තා කාලෙන පටිපූජෙන්ති, යෙ තෙ සමණබ්රාහ්මණා එකභත්තිකා රත්තූපරතා විරතා විකාලභොජනා තෙ කාලෙන පටිපූජෙන්ති, දාසකම්මකරපොරිසා අවිමුඛා කම්මං කරොන්ති, තාවතකං යෙ ව සමයෙන භුත්තං ඔජවන්තං හොති.
ඉමෙ ඛො භික්ඛවෙ පඤ්ච ආනිසංසා සමයභත්තෙ කුලෙති.
5. 5. 3. 9.
[පඨමකණ්හසප්පසුත්තං]
[සාවත්ථිනිදානං]
29. පඤ්චිමෙ භික්ඛවෙ ආදීනවා කණ්හසප්පෙ. කතමෙ පඤ්ච:
අසුචි, දුග්ගන්ධො, සභීරු, සප්පටිභයො, මිත්තදුභී{2} ඉමෙ ඛො භික්ඛවෙ පඤ්ච ආදීනවා කණ්හසප්පෙ.
එවමෙව ඛො භික්ඛවෙ පඤ්චිමෙ ආදීනවා මාතුගාමෙ. කතමෙ පඤ්ච:
අසුචි දුග්ගන්ධො, සභීරු, සප්පටිභයො, මිත්තදුභී.{2} ඉමෙ ඛො භික්ඛවෙ පඤ්ච ආදීනවා මාතුගාමෙති.
5. 5. 3. 10.
[දුතියකණ්හසප්පසුත්තං]
[සාවත්ථිනිදානං]
30. පඤ්චිමෙ භික්ඛවෙ ආදීනවා කණ්හසප්පෙ. කතමෙ පඤ්ච:
කොධනො, උපනාහී, ඝොරවිසො, දුජීව්හො, මිත්තදුභී{1}.
ඉමෙ ඛො භික්ඛවෙ පඤ්ච ආදීනවා කණ්හසප්පෙ.
එවමෙව ඛො භික්ඛවෙ පඤ්ච ආදීනවා මාතුගාමෙ. කතමෙ පඤ්ච:
කොධනො, උපනාහී, ඝොරවිසො, දුජීව්හො, මිත්තදුභී.
තත්රිදං{2} භික්ඛවෙ මාතුගාමස්ස ඝොරවිසතා:{3} යෙභුය්යෙන භික්ඛවෙ මාතුගාමො තිබ්බරාගො. තත්රිදං භික්ඛවෙ මාතුගාමස්ස දුජීව්හතා: යෙභුය්යෙන භික්ඛවෙ මාතුගාමො පිසුනාවාචො. තත්රිදං භික්ඛවෙ මාතුගාමස්ස මිත්තදුභිතා: යෙභුය්යෙන භික්ඛවෙ මාතුගාමො අතිචාරිනී.
ඉමෙ ඛො භික්ඛවෙ පඤ්ච ආදීනවා මාතුගාමෙති.
දීඝචාරිකවග්ගො තතියො.
තස්සුද්දානං:
දීඝචාරිකං ද්වෙ වුත්තා අතිනිවාසමච්ඡරෙ, ද්වෙ ච කුලූපගා භොගා භත්තං සප්පාපරෙ දුවෙති.
4. ආවාසිකවග්ගො.
5. 5. 4. 1.
[අභාවනීය සුත්තං]
[සාවත්ථිනිදානං]
31. පඤ්චහි භික්ඛවෙ ධම්මෙහි සමන්නාගතො ආවාසිකො භික්ඛු අභාවනීයො හොති. කතමෙහි පඤ්චහි:
න ආකප්පසම්පන්නො හොති න වත්තසම්පන්නො, න බහුස්සුතො හොති න සුතධරො, න පටිසල්ලෙඛිතා හොති න පටිසල්ලාණාරාමො,{*} න කල්යාණවාචො හොති න කල්යාණවාක්කරණො, දුප්පඤ්ඤො හොති ජළො එලමූගො.
ඉමෙහි ඛො භික්ඛවෙ පඤ්චහි ධම්මෙහි සමන්නාගතො ආවාසිකො භික්ඛු අභාවනීයො හොති.
පඤ්චහි භික්ඛවෙ ධම්මෙහි සමන්නාගතො ආවාසිකො භික්ඛු භාවනීයො හොති. කතමෙහි පඤ්චහි:
ආකප්ප සම්පන්නො හොති වත්තසම්පන්නො, බහුස්සුතො හොති සුතධරො, පටිසල්ලෙඛිතා හොති පටිසල්ලාණාරාමො, කල්යාණවාචො හොති කල්යාණවාක්කරණො, පඤ්ඤවා හොති අජළො අනෙළමූගො.
ඉමෙහි ඛො භික්ඛවෙ පඤ්චහි ධම්මෙහි සමන්නාගතො ආවාසිකො භික්ඛු භාවනීයො හොතීති.
5. 5. 4. 2.