ඉමෙ ඛො භික්ඛවෙ පඤ්ච ආදීනවා ආයතකෙන ගීතස්සරෙන ධම්මං භණන්තස්සාති.
5. 5. 1. 10.
[මුට්ඨස්සති සුත්තං]
[සාවත්ථිනිදානං]
10. පඤ්චිමෙ භික්ඛවෙ ආදීනවා මුට්ඨස්සතිස්ස අසම්පජානස්ස නිද්දං ඔක්කමතො. කතමෙ පඤ්ච:
දුක්ඛං සුපති, දුක්ඛං පටිබුජ්ඣති, පාපකං සුපිනං පස්සති, දෙවතා න රක්ඛන්ති, අසුචි මුච්චති.
ඉමෙ ඛො භික්ඛවෙ පඤ්ච ආදීනවා මුට්ඨස්සතිස්ස අසම්පජානස්ස නිද්දං ඔක්කමතො.
පඤ්චිමෙ භික්ඛවෙ ආනිසංසා උපට්ඨිතසතිස්ස{1} සම්පජානස්ස නිද්දං ඔක්කමතො. කතමෙ පඤ්ච:
සුඛං සුපති, සුඛං පටිබුජ්ඣති, න පාපකං සුපිනං පස්සති, දෙවතා රක්ඛන්ති, අසුචි න මුච්චති.
ඉමෙ ඛො භික්ඛවෙ පඤ්ච ආනිසංසා උපට්ඨිතසතිස්ස{1} සම්පජානස්ස නිද්දං ඔක්කමතොති.
කිම්බිලවග්ගො පඨමො.
තස්සුද්දානං:
කිම්බිලො{2} ධම්මසවණං{3} ආජානීයො{4} බලං ඛිලං විනිබන්ධං යාගු කට්ඨං ගීතං මුට්ඨස්සතිනා චාති.
2. අක්කොසකවග්ගො
5. 5. 2. 1.
[අක්කොසකසුත්තං]
[සාවත්ථිනිදානං]
11. යො සො භික්ඛවෙ භික්ඛු අක්කොසකපරිභාසකො අරියූපවාදී සබ්රහ්මචාරීනං, තස්ස පඤ්ච ආදීනවා පාටිකඞ්ඛා. කතමෙ පඤ්ච:
පාරාජිකො වා හොති ඡින්නපරිපන්ථො, අඤ්ඤතරං වා සඞ්කිලිට්ඨං ආපත්තිං ආපජ්ජති, බාළ්හං වා රොගාතඞ්කං ඵුසති, සම්මූළ්හො කාලං කරොති, කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති.
යො සො භික්ඛවෙ භික්ඛු අක්කොසකපරිභාසකො අරියූපවාදී සබ්රහ්මචාරීනං, තස්ස ඉමෙ පඤ්ච ආදීනවා පාටිකඞ්ඛාති.
5. 5. 2. 2.
[භණ්ඩනකාරක සුත්තං]
[සාවත්ථිනිදානං]
12. යො සො භික්ඛවෙ භික්ඛු භණ්ඩනකාරකො කලහකාරකො විවාදකාරකො භස්සකාරකො සඞ්ඝෙ අධිකරණකාරකො, තස්ස පඤ්ච ආදීනවා පාටිකඞ්ඛා. කතමෙ පඤ්ච:
අනධිගතං නාධිගච්ඡති, අධිගතං{1} පරිහායති, පාපකො කිත්තිසද්දො අබ්භුග්ගච්ඡති, සම්මූළ්හො කාලං කරොති, කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති.
යො සො භික්ඛවෙ භික්ඛු භණ්ඩනකාරකො කලහකාරකො විවාදකාරකො භස්සකාරකො සඞ්ඝෙ අධිකරණකාරකො, තස්ස ඉමෙ පඤ්ච ආදීනවා පාටිකඞ්ඛාති.
5. 5. 2. 3.
[සීල සුත්තං]
[සාවත්ථිනිදානං]
13. පඤ්චිමෙ භික්ඛවෙ ආදීනවා දුස්සීලස්ස සීලවිපත්තියා. කතමෙ පඤ්ච:
ඉධ භික්ඛවෙ දුස්සීලො සීලවිපන්නො පමාදාධිකරණං මහතිං භොගජානිං නිගච්ඡති, අයං භික්ඛවෙ පඨමො ආදීනවො දුස්සීලස්ස සීලවිපත්තියා.
පුන චපරං භික්ඛවෙ දුස්සීලස්ස සීලවිපන්නස්ස පාපකො කිත්තිසද්දො අබ්භුග්ගච්ඡති. අයං භික්ඛවෙ දුතියො ආදීනවො දුස්සීලස්ස සීලවිපත්තියා.
පුන චපරං භික්ඛවෙ දුස්සීලො සීලවිපන්නො යඤ්ඤදෙව පරිසං උපසඞ්කමති: යදි ඛත්තියපරිසං යදි බ්රාහ්මණපරිසං යදි ගහපතිපරිසං යදි සමණපරිසං, අවිසාරදො උපසඞ්කමති. මඞ්කුභූතො. අයං භික්ඛවෙ තතියො ආදීනවො දුස්සීලස්ස සීලවිපත්තියා.
පුන චපරං භික්ඛවෙ දුස්සීලො සීලවිපන්නො සම්මූළ්හො කාලං කරොති. අයං භික්ඛවෙ චතුත්ථො ආදීනවො දුස්සීලස්ස සීල විපත්තියා.
පුන චපරං භික්ඛවෙ දුස්සීලො සීලවිපන්නො කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති අයං භික්ඛවෙ පඤ්චමො ආදීනවො දුස්සීලස්ස සීලවිපත්තියා.
ඉමෙ ඛො භික්ඛවෙ පඤ්ච ආදීනවා දුස්සීලස්ස සීලවිප්පත්තියා.
පඤ්චිමෙ භික්ඛවෙ ආනිසංසා සීලවතො සීලසම්පදාය. කතමෙ පඤ්ච:
ඉධ භික්ඛවෙ සීලවා සීලසම්පන්නො අප්පමාදාධිකරණං මහන්තං භොගක්ඛන්ධං අධිගච්ඡති. අයං භික්ඛවෙ පඨමො ආනිසංසො සීලවතො සීලසම්පදාය.
පුන චපරං භික්ඛවෙ සීලවතො සීලසම්පන්නස්ස කල්යාණො කිත්තිසද්දො අබ්භුග්ගච්ඡති. අයං භික්ඛවෙ දුතියො ආනිසංසො සීලවතො සීලසම්පදාය.
පුන චපරං භික්ඛවෙ සීලවා සීලසම්පන්නො යඤ්ඤදෙව පරිසං උපසඞ්කමති යදි ඛත්තියපරිසං යදි බ්රාහ්මණපරිසං යදි ගහපතිපරිසං යදි සමණපරිසං, විසාරදො උපසඞ්කමති, අමඞ්කුභූතො අයං භික්ඛවෙ තතියො ආනිසංසො සීලවතො සීලසම්පදාය.
පුන චපරං භික්ඛවෙ සීලවා සීලසම්පන්නො අසම්මූළ්හො කාලං කරොති. අයං භික්ඛවෙ චතුත්ථො ආනිසංසො සීලවතො සීලසම්පදාය.
පුන චපරං භික්ඛවෙ සීලවා සීලසම්පන්නො කායස්ස භෙදා පරම්මරණා සුගතිං සග්ගං ලොකං උපපජ්ජති. අයං භික්ඛවෙ පඤ්චමො ආනිසංසො සීලවතො සීලසම්පදාය.
ඉමෙ ඛො භික්ඛවෙ පඤ්ච ආනිසංසා සීලවතො සිලසම්පදායාති.
5. 5. 2. 4.
[බහුභාණී සුත්තං]
[සාවත්ථිනිදානං]
14. පඤ්චිමෙ භික්ඛවෙ ආදීනවා බහුභාණියස්මිං පුග්ගලෙ. කතමෙ පඤ්ච.
මුසා භණති, පිසුනං භණති, ඵරුසං භණති, සම්ඵප්පලාපං භණති, කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති.
ඉමෙ ඛො භික්ඛවෙ පඤ්ච ආදීනවා බහුභාණිස්මිං පුග්ගලෙ.
පඤ්චිමෙ භික්ඛවෙ ආනිසංසා මන්තභාණිස්මිං පුග්ගලෙ. කතමෙ පඤ්ච:
න මුසා භණති, න පිසුනං භණති, න ඵරුසං භණති, න සම්ඵප්පලාපං භණති. කායස්ස භෙදා පරම්මරණා සුගතිං සග්ගං ලොකං උපපජ්ජති. ඉමෙ ඛො භික්ඛවෙ පඤ්ච ආනිසංසා මන්තභාණිස්මිං පුග්ගලෙති.
5. 5. 2. 5.
[පඨම අක්ඛන්තිසුත්තං]
[සාවත්ථිනිදානං]
15. පඤ්චිමෙ භික්ඛවෙ ආදීනවා අක්ඛන්තියා. කතමෙ පඤ්ච:
බහුනො ජනස්ස අප්පියො හොති අමනාපො, වෙරබහුලො ච හොති, වජ්ජබහුලො ච, සම්මූළ්හො කාලං කරොති, කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති.
ඉමෙ ඛො භික්ඛවෙ පඤ්ච ආදීනවා අක්ඛන්තියා.
පඤ්චිමෙ භික්ඛවෙ ආනිසංසා ඛන්තියා. කතමෙ පඤ්ච:
බහුනො ජනස්ස පියො හොති මනාපො, න වෙරබහුලො හොති, න වජ්ජබහුලො, අසම්මූළ්හො කාලං කරොති, කායස්ස භෙදා පරම්මරණා සුගතිං සග්ගං ලොකං උප්පජ්ජති.
ඉමෙ ඛො භික්ඛවෙ පඤ්ච ආනිසංසා ඛන්තියාති.
5. 5. 2. 6.
[දුතිය අක්ඛන්තිසුත්තං]
[සාවත්ථිනිදානං]
16. පඤ්චිමෙ භික්ඛවෙ ආදීනවා අක්ඛන්තියා. කතමෙ පඤ්ච:
බහුනො ජනස්ස අප්පියො හොති අමනාපො, ලුද්දො ච හොති, විප්පටිසාරී ච, සම්මූළ්හො කාලං කරොති, කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති.
ඉමෙ ඛො භික්ඛවෙ පඤ්ච ආදීනවා අක්ඛන්තියා.
පඤ්චිමෙ භික්ඛවෙ ආනිසංසා ඛන්තියා. කතමෙ පඤ්ච.
බහුනො ජනස්ස පියො හොති මනාපො, අලුද්දො ච හොති, අවිප්පටිසාරී ච, අසම්මූළ්හො කාලං කරොති, කායස්ස භෙදා පරම්මරණා සුගතිං සග්ගං ලොකං උපපජ්ජති.
ඉමෙ ඛො භික්ඛවෙ පඤ්ච ආනිසංසා ඛන්තියාති.
5. 5. 2. 7.
[පඨමඅපාසාදික සුත්තං]
[සාවත්ථිනිදානං]
17. පඤ්චිමෙ භික්ඛවෙ ආදීනවා අපාසාදිකෙ. කතමෙ පඤ්ච:
අත්තාපි අත්තානං උපවදති, අනුවිච්ච විඤ්ඤූ ගරහන්ති, පාපකො කිත්තිසද්දො අබ්භුග්ගච්ඡති, සම්මූළ්හො කාලං කරොති, කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති.
ඉමෙ ඛො භික්ඛවෙ පඤ්ච ආදීනවා අපාසාදිකෙ.
පඤ්චිමෙ භික්ඛවෙ පඤ්ච ආදීනවා පාසාදිකෙ කතමෙ පඤ්ච:
අත්තාපි අත්තානං න උපවදති, අනුවිච්ච විඤ්ඤූ පසංසන්ති, කල්යාණො කිත්තිසද්දො අබ්භුග්ගච්ඡති, අසම්මූළ්හො කාලං කරොති, කායස්ස භෙදා පරම්මරණා සුගතිං සග්ගං ලොකං උපපජ්ජති.
ඉමෙ ඛො භික්ඛවෙ පඤ්ච ආනිසංසා පාසාදිකෙති.
5. 5. 2. 8.
[දුතියඅපාසාදිකසුත්තං]
[සාවත්ථිනිදානං]
18. පඤ්චිමෙ භික්ඛවෙ ආදීනවා අපාසාදිකෙ. කතමෙ පඤ්ච:
අප්පසන්නා නප්පසීදන්ති, පසන්නානඤ්ච එකච්චානං අඤ්ඤථත්තං හොති, සත්ථුසාසනං අකතං හොති, පච්ඡිමා ජනතා දිට්ඨානුගතිං ආපජ්ජති, චිත්තමස්ස නප්පසීදති.
ඉමෙ ඛො භික්ඛවෙ පඤ්ච ආදීනවා අපාසාදිකෙ.
පඤ්චිමෙ භික්ඛවෙ ආනිසංසා පාසාදිකෙ. කතමෙ පඤ්ච:
අප්පසන්නා පසීදන්ති, පසන්නානඤ්ච භිය්යො භාවො හොති, සත්ථු සාසනං කතං හොති, පච්ඡිමා ජනතා දිට්ඨානුගතිං ආපජ්ජති, චිත්තමස්ස පසීදති.
ඉමෙ ඛො භික්ඛවෙ පඤ්ච ආනිසංසා පාසාදිකෙති.
5. 5. 2. 9.
[අග්ගිසුත්තං]
[සාවත්ථිනිදානං]
19. පඤ්චිමෙ භික්ඛවෙ ආදීනවා අග්ගිස්මිං. කතමෙ පඤ්ච:
අචක්ඛුස්සො, දුබ්බණ්ණකරණො, දුබ්බලකරණො, සඞ්ගණිකාපවද්ධනො, තිරච්ඡානකථාපවත්තනිකො.{1}
ඉමෙ භික්ඛවෙ පඤ්ච: ආදීනවා අග්ගිස්මින්ති.
5. 5. 2. 10.
[මධුරාසුත්තං]
[සාවත්ථිනිදානං]
20. පඤ්චිමෙ භික්ඛවෙ ආදීනවා මධුරායං. කතමෙ පඤ්ච:
විසමා, බහුරජා, චණ්ඩසුනඛා, වාළයක්ඛා, දුල්ලභපිණ්ඩා.
ඉමෙ ඛො භික්ඛවෙ පඤ්ච ආදීනවා මධුරායන්ති.
අක්කොසකවග්ගො දුතියො.