අරියෙන භික්ඛවෙ, සීලෙන අසමන්නාගතො ඉමස්මා ධම්මවිනයා පපතිතො’ති වුච්චති.
අරියෙන භික්ඛවෙ, සමාධිනා අසමන්නාගතො ඉමස්මා ධම්මවිනයා පපතිතො’ති වුච්චති.
අරියාය භික්ඛවෙ, පඤ්ඤාය අසමන්නාගතො ඉමස්මා ධම්මවිනයා පපතිතො’ති වුච්චති.
අරියාය භික්ඛවෙ, විමුත්තියා අසමන්නාගතො ඉමස්මා ධම්මවිනයා පපතිතො’ති වුච්චති.
ඉමෙහි ඛො භික්ඛවෙ, චතූහි ධම්මෙහි අසමන්නාගතො ඉමස්මා ධම්මවිනයා පපතිතො’ති වුච්චති.
චතූහි භික්ඛවෙ, ධම්මෙහි සමන්නාගතො ඉමස්මා ධම්මවිනයා අප්පපතිතො’ති{1} වුච්චති. කතමෙහි චතූහි?
අරියෙන භික්ඛවෙ, සීලෙන සමන්නාගතො ඉමස්මා ධම්මවිනයා අප්පපතිතො’ති වුච්චති.
අරියෙන භික්ඛවෙ, සමාධිනා සමන්නාගතො ඉමස්මා ධම්මවිනයා අප්පපතිතො’ති වුච්චති.
අරියාය භික්ඛවෙ, පඤ්ඤාය සමන්නාගතො ඉමස්මා ධම්මවිනයා අප්පපතිතො’ති වුච්චති.
අරියාය භික්ඛවෙ, විමුත්තියා සමන්නාගතො ඉමස්මා ධම්මවිනයා අප්පපතිතො’ති වුච්චති.
ඉමෙහි ඛො භික්ඛවෙ, චතූහි ධම්මෙහි සමන්නාගතො ඉමස්මා ධම්මවිනයා අප්පපතිතො’ති වුච්චතීති.
3. චුතා පතන්ති පතිතා ගිද්ධා ච පුනරාගතා, කතං කිච්චං{1} රතං රම්මං සුඛෙනාන්වාගතං සුඛං’ති.
4. 1. 1. 3.
[පඨමඛතසුත්තං]
3. චතූහි භික්ඛවෙ, ධම්මෙහි සමන්නාගතො බාලො අව්යත්තො අසප්පුරිසො ඛතං උපහතං අත්තානං පරිහරති, සාවජ්ජො ච හොති සානුවජ්ජො විඤ්ඤූනං, බහුං ච අපුඤ්ඤං පසවති. කතමෙහි චතූහි?
අනනුවිච්ච අපරියොගාහෙත්වා අවණ්ණාරහස්ස වණ්ණං භාසති.
අනනුවිච්ච අපරියොගාහෙත්වා වණ්ණාරහස්ස අවණ්ණං භාසති.
අනනුවිච්ච අපරියොගාහෙත්වා අප්පසාදනීයෙ ඨානෙ පසාදං උපදංසෙති.
අනනුවිච්ච අපරියොගාහෙත්වා පසාදනීයෙ ඨානෙ අප්පසාදං උපදංසෙති.
ඉමෙහි ඛො භික්ඛවෙ, චතූහි ධම්මෙහි සමන්නාගතො බාලො අව්යත්තො අසප්පුරිසො ඛතං උපහතං අත්තානං පරිහරති. සාවජ්ජො ච හොති සානුවජ්ජො ච විඤ්ඤූනං. බහුං ච අපුඤ්ඤං පසවතීති.
චතූහි භික්ඛවෙ, ධම්මෙහි සමන්නාගතො පණ්ඩිතො වියත්තො සප්පුරිසො අක්ඛතං අනුපහතං අත්තානං පරිහරති. අනවජ්ජො ච හොති අනනුවජ්ජො විඤ්ඤූනං, බහුං ච පුඤ්ඤං පසවති. කතමෙහි චතූහි?
අනුවිච්ච පරියොගාහෙත්වා අවණ්ණාරහස්ස අවණ්ණං භාසති.
අනුවිච්ච පරියොගාහෙත්වා වණ්ණාරහස්ස වණ්ණං භාසති.
අනුවිච්ච පරියොගාහෙත්වා අප්පසාදනීයෙ ඨානෙ අප්පසාදං උපදංසෙති.
අනුවිච්ච පරියොගාහෙත්වා පසාදනීයෙ ඨානෙ පසාදං උපදංසෙති.
ඉමෙහි ඛො භික්ඛවෙ, චතූහි ධම්මෙහි සමන්නාගතො පණ්ඩිතො වියත්තො සප්පුරිසො අක්ඛතං අනුපහතං අත්තානං පරිහරති. අනවජ්ජො ච හොති අනනුවජ්ජො විඤ්ඤූනං. බහුං ච පුඤ්ඤං පසවතීති.
4. යො නින්දියං පසංසති තං වා නින්දති යො පසංසියො, විචිනාති මුඛෙන සො කලිං කලිනා තෙන සුඛං න වින්දති.
5. අප්පමත්තො අයං කලි යො අක්ඛෙසු ධනපරාජයො, සබ්බස්සාපි සහාපි අත්තනා අයමෙව මහන්තතරො කලි යො සුගතෙසු මනං පදොසයෙ.
6. සතං සහස්සානං නිරබ්බුදානං ඡත්තිංසතිං{2} පඤ්ච ච අබ්බුදානි, යමරියගරහී{3} නිරයං උපෙති වාචං මනඤ්ච පණිධාය පාපකන්ති.
4. 1. 1. 4.
[දුතියඛතසුත්තං]
4. චතූසු භික්ඛවෙ, මිච්ඡා පටිපජ්ජමානො බාලො අව්යත්තො අසප්පුරිසො ඛතං උපහතං අත්තානං පරිහරති. සාවජ්ජො ච හොති සානුවජ්ජො විඤ්ඤූනං. බහුං ච අපුඤ්ඤං පසවති. කතමෙසු චතූසු?
මාතරි භික්ඛවෙ, මිච්ඡා පටිපජ්ජමානො බාලො අව්යත්තො අසප්පුරිසො ඛතං උපහතං අත්තානං පරිහරති. සාවජ්ජො ච හොති සානුවජ්ජො විඤ්ඤූනං. බහුඤ්ච අපුඤ්ඤං පසවති.
පිතරි භික්ඛවෙ, මිච්ඡා පටිපජ්ජමානො -පෙ- තථාගතෙ භික්ඛවෙ, මිච්ඡා පටිපජ්ජමානො -පෙ- තථාගතසාවකෙ භික්ඛවෙ, මිච්ඡා පටිපජ්ජමානො බාලො අව්යත්තො අසප්පුරිසො ඛතං උපහතං අත්තානං පරිහරති සාවජ්ජො ච හොති සානුවජ්ජො විඤ්ඤූනං. බහුං ච අපුඤ්ඤං පසවති.
ඉමෙසු ඛො භික්ඛවෙ, චතූසු මිච්ඡා පටිපජ්ජමානො බාලො අව්යත්තො අසප්පුරිසො ඛතං උපහතං අත්තානං පරිහරති. සාවජ්ජො ච හොති සානුවජ්ජො විඤ්ඤූනං. බහුං ච අපුඤ්ඤං පසවතීති.
චතූසු භික්ඛවෙ, සම්මා පටිපජ්ජමානො පණ්ඩිතො වියත්තො සප්පුරිසො අක්ඛතං අනුපහතං අත්තානං පරිහරති. අනවජ්ජො ච හොති අනනුවජ්ජො විඤ්ඤූනං. බහුං ච පුඤ්ඤං පසවති. කතමෙසු චතූසු?
මාතරි භික්ඛවෙ, සම්මා පටිපජ්ජමානො පණ්ඩිතො වියත්තො සප්පුරිසො අක්ඛතං අනුපහතං අත්තානං පරිහරති. අනවජ්ජො ච හොති අනනුවජ්ජො විඤ්ඤූනං. බහුං ච පුඤ්ඤං පසවති.
පිතරි භික්ඛවෙ, සම්මා පටිපජ්ජමානො -පෙ- තථාගතෙ භික්ඛවෙ, සම්මා පටිපජ්ජමානො -පෙ- තථාගතසාවකෙ භික්ඛවෙ, සම්මා පටිපජ්ජමානො පණ්ඩිතො වියත්තො සප්පුරිසො අක්ඛතං අනුපහතං අත්තානං පරිහරති. අනවජ්ජො ච හොති අනනුවජ්ජො විඤ්ඤූනං. බහුඤ්ච පුඤ්ඤං පසවති.
ඉමෙසු ඛො භික්ඛවෙ, චතූසු සම්මා පටිපජ්ජමානො පණ්ඩිතො වියත්තො සප්පුරිසො අක්ඛතං අනුපහතං අත්තානං පරිහරති. අනවජ්ජො ච හොති අනනුවජ්ජො විඤ්ඤූනං. බහුඤ්ච පුඤ්ඤං පසවතීති.
7. මාතරි පිතරි චාපි යො මිච්ඡා පටිපජ්ජති. තථාගතෙ ච සම්බුද්ධෙ අථ වා තස්ස සාවකෙ, බහුඤ්ච සො පසවති අපුඤ්ඤං තාදිසො නරො.
8. තාය අධම්මචරියාය මාතාපිතූසු පණ්ඩිතා. ඉධෙව නං ගරහන්ති පෙච්චාපායඤ්ච ගච්ඡති.
9. මාතරි පිතරි චාපි යො සම්මා පටිපජ්ජති. තථාගතෙ ච සම්බුද්ධෙ අථ වා තස්ස සාවකෙ, බහුඤ්ච සො පසවති පුඤ්ඤම්පි තාදිසො නරො.
10. තාය ධම්මචරියාය මාතාපිතූසු පණ්ඩිතා, ඉධෙව නං පසංසන්ති පෙච්ච සග්ගෙ ච මොදතීති.
4. 1. 1. 5.
[අනුසොතසුත්තං]
5. චත්තාරො’මෙ භික්ඛවෙ, පුග්ගලා සන්තො සංවිජ්ජමානා ලොකස්මිං. කතමෙ චත්තාරො?
අනුසොතගාමී පුග්ගලො, පටිසොතගාමී පුග්ගලො, ඨිතත්තො පුග්ගලො, තිණ්ණො පාරගතො ථලෙ තිට්ඨති බ්රාහ්මණො.
කතමො ච භික්ඛවෙ, අනුසොතගාමී පුග්ගලො? ඉධ භික්ඛවෙ, එකච්චො පුග්ගලො කාමෙ ච පටිසෙවති, පාපඤ්ච කම්මං කරොති. අයං වුච්චති භික්ඛවෙ, අනුසොතගාමී පුග්ගලො.
කතමො ච භික්ඛවෙ, පටිසොතගාමී පුග්ගලො? ඉධ භික්ඛවෙ, එකච්චො පුග්ගලො කාමෙ න පටිසෙවති, පාපඤ්ච කම්මං න කරොති, සහාපි දුක්ඛෙන සහාපි දොමනස්සෙන අස්සුමුඛො’පි රුදමානො පරිපුණ්ණං පරිසුද්ධං බ්රහ්මචරියං චරති. අයං වුච්චති භික්ඛවෙ, පටිසොතගාමී පුග්ගලො.
කතමො ච භික්ඛවෙ, ඨිතත්තො පුග්ගලො? ඉධ භික්ඛවෙ, එකච්චො පුග්ගලො පඤ්චන්නං ඔරම්භාගියානං සඤ්ඤොජනානං පරික්ඛයා ඔපපාතිකො හොති, තත්ථ පරිනිබ්බායී අනාවත්තිධම්මො තස්මා ලොකා. අයං වුච්චති භික්ඛවෙ, ඨිතත්තො පුග්ගලො.
කතමො ච භික්ඛවෙ, පුග්ගලො තිණ්ණො පාරගතො ථලෙ තිට්ඨති බ්රාහ්මණො? ඉධ භික්ඛවෙ, එකච්චො පුග්ගලො ආසවානං ඛයා අනාසවං චෙතොවිමුත්තිං පඤ්ඤාවිමුත්තිං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරති. අයං වුච්චති භික්ඛවෙ, පුග්ගලො තිණ්ණො පාරගතො ථලෙ තිට්ඨති බ්රාහ්මණො.
ඉමෙ ඛො භික්ඛවෙ, චත්තාරො පුග්ගලා සන්තො සංවිජ්ජමානා ලොකස්මින්ති.
11. යෙ කෙචි කාමෙසු අසඤ්ඤතා ජනා අවීතරාගා ඉධ කාමභොගිනො, පුනප්පුනං ජාතිජරූපගාහිනො තණ්හාධිපන්නා අනුසොතගාමිනො.
12. තස්මා හි ධීරො ඉධුපට්ඨිතස්සතී කාමෙ ච පාපෙ ච අසෙවමානො, සහාපි දුක්ඛෙන ජහෙය්ය කාමෙ පටිසොතගාමීති තමාහු පුග්ගලං.
13. යො වෙ කිලෙසානි පහාය පඤ්ච පරිපුණ්ණසෙඛො අපරිහානධම්මො, චෙතොවසිප්පත්තො සමාහිතින්ද්රියො ස වෙ ඨිතත්තො’ති නරො පවුච්චති.
14. පරොපරා යස්ස සමෙච්ච ධම්මා විධූපිතා අත්ථගතා න සන්ති, ස වෙදගූ වුසිතබ්රහ්මචරියො ලොකන්තගූ පාරගතො’ති වුච්චතීති.
4. 1. 1. 6.
[අප්පස්සුතසුත්තං]
6. චත්තාරො’මෙ භික්ඛවෙ, පුග්ගලා සන්තො සංවිජ්ජමානා ලොකස්මිං. කතමෙ චත්තාරො?
අප්පස්සුතො සුතෙන අනුපපන්නො, අප්පස්සුතො සුතෙන උපපන්නො, බහුස්සුතො සුතෙන අනුපපන්නො, බහුස්සුතො සුතෙන උපපන්නො.
කථඤ්ච භික්ඛවෙ, පුග්ගලො අප්පස්සුතො හොති සුතෙන අනුපපන්නො? ඉධ භික්ඛවෙ, එකච්චස්ස පුග්ගලස්ස අප්පකං සුතං හොති සුත්තං ගෙය්යං වෙය්යාකරණං ගාථා{1} උදානං ඉතිවුත්තකං ජාතකං අබ්භුතධම්මං වෙදල්ලං. සො තස්ස අප්පකස්ස සුතස්ස න අත්ථමඤ්ඤාය න ධම්මමඤ්ඤාය න ධම්මානුධම්මපටිපන්නො හොති. එවං ඛො භික්ඛවෙ, පුග්ගලො අප්පස්සුතො හොති සුතෙන අනුපපන්නො.
කථඤ්ච භික්ඛවෙ, පුග්ගලො අප්පස්සුතො හොති සුතෙන උපපන්නො? ඉධ භික්ඛවෙ, එකච්චස්ස පුග්ගලස්ස අප්පකං සුතං හොති සුත්තං ගෙය්යං වෙය්යාකරණං ගාථා උදානං ඉතිවුත්තකං ජාතකං අබ්භුතධම්මං වෙදල්ලං. සො තස්ස අප්පකස්ස සුතස්ස අත්ථමඤ්ඤාය ධම්මමඤ්ඤාය ධම්මානුධම්මපටිපන්නො හොති. එවං ඛො භික්ඛවෙ, පුග්ගලො අප්පස්සුතො හොති, සුතෙන උපපන්නො.
කථඤ්ච භික්ඛවෙ, පුග්ගලො බහුස්සුතො හොති සුතෙන අනුපපන්නො? ඉධ භික්ඛවෙ, එකච්චස්ස පුග්ගලස්ස බහුං{2} සුතං හොති සුත්තං ගෙය්යං වෙය්යාකරණං ගාථා උදානං ඉතිවුත්තකං ජාතකං අබ්භුතධම්මං වෙදල්ලං. සො තස්ස බහුකස්ස සුතස්ස න අත්ථමඤ්ඤාය න ධම්මමඤ්ඤාය න ධම්මානුධම්මපටිපන්නො හොති. එවං ඛො භික්ඛවෙ, පුග්ගලො බහුස්සුතො හොති සුතෙන අනුපපන්නො.
කථඤ්ච භික්ඛවෙ, පුග්ගලො බහුස්සුතො හොති සුතෙන උපපන්නො? ඉධ භික්ඛවෙ, එකච්චස්ස පුග්ගලස්ස බහුං සුතං හොති සුත්තං ගෙය්යං වෙය්යාකරණං ගාථා උදානං ඉතිවුත්තකං ජාතකං අබ්භුතධම්මං වෙදල්ලං. සො තස්ස බහුකස්ස සුතස්ස අත්ථමඤ්ඤාය ධම්මමඤ්ඤාය ධම්මානුධම්මපටිපන්නො හොති. එවං ඛො භික්ඛවෙ, පුග්ගලො බහුස්සුතො හොති සුතෙන උපපන්නො.
ඉමෙ ඛො භික්ඛවෙ, චත්තාරො පුග්ගලා සන්තො සංවිජ්ජමානා ලොකස්මින්ති.
15. අප්පස්සුතො’පි චෙ හොති සීලෙසු අසමාහිතො, උභයෙන නං ගරහන්ති සීලතො ච සුතෙන ච.
16. අප්පස්සුතොපි චෙ හොති සීලෙසු සුසමාහිතො, සීලතො නං පසංසන්ති තස්ස සම්පජ්ජතෙ සුතං.
17. බහුස්සුතොපි චෙ හොති සීලෙසු අසමාහිතො, සීලතො නං ගරහන්ති නාස්ස සම්පජ්ජතෙ සුතං.
18. බහුස්සුතොපි චෙ හොති සීලෙසු සුසමාහිතො උභයෙන නං පසංසන්ති සීලතො ච සුතෙන ච.
19. බහුස්සුතං ධම්මධරං සප්පඤ්ඤං බුද්ධසාවකං, නෙක්ඛං ජම්බොනදස්සෙව කො තං නින්දිතුමරහති, දෙවාපි නං පසංසන්ති බ්රහ්මුනාපි පසංසිතො’ති.
4. 1. 1. 7.
[සොභෙන්තිසුත්තං]
7. චත්තාරො’මෙ භික්ඛවෙ, වියත්තා විනීතා විසාරදා බහුස්සුතා ධම්මධරා ධම්මානුධම්මපටිපන්නා සඞ්ඝං සොභෙන්ති. කතමෙ චත්තාරො?
භික්ඛු භික්ඛවෙ, වියත්තො විනීතො විසාරදො බහුස්සුතො ධම්මධරො ධම්මානුධම්මපටිපන්නො සඞ්ඝං සොභෙති.
භික්ඛුනී භික්ඛවෙ, වියත්තා විනීතා විසාරදා බහුස්සුතා ධම්මධරා ධම්මානුධම්මපටිපන්නා සඞ්ඝං සොභෙති.
උපාසකො භික්ඛවෙ, වියත්තො විනීතො විසාරදො බහුස්සුතො ධම්මධරො ධම්මානුධම්මපටිපන්නො සඞ්ඝං සොභෙති.
උපාසිකා භික්ඛවෙ, වියත්තා විනීතා විසාරදා බහුස්සුතා ධම්මධරා ධම්මානුධම්මපටිපන්නා සඞ්ඝං සොභෙති.
ඉමෙ ඛො භික්ඛවෙ, චත්තාරො වියත්තා විනීතා විසාරදා බහුස්සුතා ධම්මධරා ධම්මානුධම්මපටිපන්නා සඞ්ඝං සොභෙන්තීති.
20. යො හොති වියත්තො ච විසාරදො ච බහුස්සුතො ධම්මධරො ච හොති, ධම්මස්ස හොති අනුධම්මචාරී ස තාදිසො වුච්චති සඞ්ඝසොභනො.
21. භික්ඛු ච සීලසම්පන්නො භික්ඛුනී ච බහුස්සුතා, උපාසකො ච යො සද්ධො යා ච සද්ධා උපාසිකා, එතෙ ඛො සඞ්ඝං සොභෙන්ති එතෙ හි සඞ්ඝසොභනාති.
4. 1. 1. 8.
[වෙසාරජ්ජසුත්තං]
8. චත්තාරිමානි භික්ඛවෙ, තථාගතස්ස වෙසාරජ්ජානි, යෙහි වෙසාරජ්ජෙහි සමන්නාගතො තථාගතො ආසභං ඨානං පටිජානාති, පරිසාසු සීහනාදං නදති, බ්රහ්මචක්කං පවත්තෙති. කතමානි චත්තාරි?
“සම්මාසම්බුද්ධස්ස තෙ පටිජානතො ඉමෙ ධම්මා අනභිසම්බුද්ධාති” තත්ර වත මං සමණො වා බ්රාහ්මණො වා දෙවො වා මාරො වා බ්රහ්මා වා කොචි වා ලොකස්මිං සහධම්මෙන පටිචොදෙස්සතීති නිමිත්තමෙතං භික්ඛවෙ, න සමනුපස්සාමි . එතම්පහං භික්ඛවෙ, නිමිත්තං අසමනුපස්සන්තො ඛෙමප්පත්තො අභයප්පත්තො වෙසාරජ්ජප්පත්තො විහරාමි.
“ඛීණාසවස්ස තෙ පටිජානතො ඉමෙ ආසවා අපරික්ඛීණාති” තත්ර වත මං සමණො වා බ්රාහ්මණො වා දෙවො වා මාරො වා බ්රහ්මා වා කොචි වා ලොකස්මිං සහධම්මෙන පටිචොදෙස්සතීති නිමිත්තමෙතං භික්ඛවෙ, න සමනුපස්සාමි. එතම්පහං භික්ඛවෙ, නිමිත්තං අසමනුපස්සන්තො ඛෙමප්පත්තො අභයප්පත්තො වෙසාරජ්ජප්පත්තො විහරාමි.
“යෙ ඛො පන තෙ අන්තරායිකා ධම්මා වුත්තා. තෙ පටිසෙවතො නාලං අන්තරායායාති” තත්ර වත මං සමණො වා බ්රාහ්මණො වා දෙවො වා මාරො වා බ්රහ්මා වා කොචි වා ලොකස්මිං සහධම්මෙන පටිචොදෙස්සතීති නිමිත්තමෙතං භික්ඛවෙ, න සමනුපස්සාමි. එතම්පහං භික්ඛවෙ, නිමිත්තං අසමනුපස්සන්තො ඛෙමප්පත්තො අභයප්පත්තො වෙසාරජ්ජප්පත්තො විහරාමි.
“යස්ස ඛො පන තෙ අත්ථාය ධම්මො දෙසිතො සො න නිය්යාති තක්කරස්ස සම්මා දුක්ඛක්ඛයායාති” තත්ර වත මං සමණො වා බ්රාහ්මණො වා දෙවො වා මාරො වා බ්රහ්මා වා කොචි වා ලොකස්මිං සහධම්මෙන පටිචොදෙස්සතීති නිමිත්තමෙතං භික්ඛවෙ, න සමනුපස්සාමි. එතම්පහං භික්ඛවෙ, නිමිත්තං අසමනුපස්සන්තො ඛෙමප්පත්තො අභයප්පත්තො වෙසාරජ්ජප්පත්තො විහරාමි.
ඉමානි ඛො භික්ඛවෙ, චත්තාරි තථාගතස්ස වෙසාරජ්ජානි යෙහි වෙසාරජ්ජෙහි සමන්නාගතො තථාගතො ආසභං ඨානං පටිජානාති, පරිසාසු සීහනාදං නදති, බ්රහ්මචක්කං පවත්තෙතීති.
22. යෙ කෙචි’මෙ වාදපථා පුථුස්සිතා යන්නිස්සිතා සමණබ්රාහ්මණා ච, තථාගතං පත්වා න තෙ භවන්ති විසාරදං වාදපථාතිවත්තිනං.{1}
23. යො ධම්මචක්කං අභිභුය්ය කෙවලී{2} පවත්තයී සබ්බභූතානුකම්පී, තං තාදිසං දෙවමනුස්සසෙට්ඨං සත්තා නමස්සන්ති භවස්ස පාරගුන්ති.
4. 1. 1. 9.
[තණ්හාසුත්තං]
9. චත්තාරො’මෙ භික්ඛවෙ, තණ්හුප්පාදා යත්ථ භික්ඛුනො තණ්හා උප්පජ්ජමානා උප්පජ්ජති. කතමෙ චත්තාරො?
චීවරහෙතු වා භික්ඛවෙ, භික්ඛුනො තණ්හා උප්පජ්ජමානා උප්පජ්ජති. පිණ්ඩපාතහෙතු වා භික්ඛවෙ, භික්ඛුනො තණ්හා උප්පජ්ජමානා උප්පජ්ජති. සෙනාසනහෙතු වා භික්ඛවෙ, භික්ඛුනො තණ්හා උප්පජ්ජමානා උප්පජ්ජති. ඉතිභවාභවහෙතු වා භික්ඛවෙ, භික්ඛුනො තණ්හා උප්පජ්ජමානා උප්පජ්ජති.
ඉමෙ ඛො භික්ඛවෙ, චත්තාරො තණ්හුප්පාදා යත්ර භික්ඛුනො තණ්හා උප්පජ්ජමානා උප්පජ්ජතීති.
24. තණ්හාදුතියො පුරිසො දීඝමද්ධාන සංසරං, ඉත්ථභාවඤ්ඤථාභාවං සංසාරං නාතිවත්තති.
25. එවමාදීනවං ඤත්වා තණ්හං දුක්ඛස්ස සම්භවං, වීතතණ්හො අනාදානො සතො භික්ඛු පරිබ්බජෙ’ති.
4. 1. 1. 10.
[යොගසුත්තං]
10. චත්තාරො’මෙ භික්ඛවෙ, යොගා. කතමෙ චත්තාරො? කාමයොගො භවයොගො දිට්ඨියොගො අවිජ්ජායොගො.