10. සුනක්ඛත්තං සුමඞ්ගලං සුප්පභාතං සුවුට්ඨිතං,{3} සුඛණො සුමුහුත්තො ච සුයිට්ඨං බ්රහ්මචාරිසු.
11. පදක්ඛිණං කායකම්මං වාචාකම්මං පදක්ඛිණං, පදක්ඛිණං මනොකම්මං පණිධියො{4} පදක්ඛිණා, පදක්ඛිණානි කත්වාන ලභතත්ථෙ{5} පදක්ඛිණෙ.
12. තෙ අත්ථලද්ධා සුඛිතා විරූළ්හා බුද්ධසාසනෙ, අරොගා සුඛිතා හොථ සහ සබ්බෙහි ඤාතිභීති.
මඞ්ගලවග්ගො පඤ්චමො.{*}
ඛුද්දක පණ්ණාසකො සමත්තො තතියො.
[6. පටිපදාවග්ගො]
3. 6. 1.
[සාවත්ථිනිදානං]
1. තිස්සො ඉමා භික්ඛවෙ, පටිපදා.
කතමා තිස්සො?
ආගාළ්හා පටිපදා, නිජ්ඣාමා පටිපදා, මජ්ඣිමා පටිපදා.
කතමා ච භික්ඛවෙ, ආගාළ්හා පටිපදා?
ඉධ භික්ඛවෙ, එකච්චො එවංවාදී හොති එවංදිට්ඨි : නත්ථි කාමෙසු දොසොති. සො කාමෙසු පාතව්යතං ආපජ්ජති. අයං වුච්චති භික්ඛවෙ, ආගාළ්හා පටිපදා.
කතමා ච භික්ඛවෙ, නිජ්ඣාමා පටිපදා?
ඉධ භික්ඛවෙ, එකච්චො අචෙලකො හොති මුත්තාචාරො, හත්ථාපලෙඛනො න එහිභදන්තිකො, න තිට්ඨභදන්තිකො. න අභිහටං, න උද්දිස්සකටං, න නිමන්තනං සාදියති. සො න කුම්භිමුඛා පතිගණ්හාති, න කළොපිමුඛා{1} පතිගණ්හාති, න එළකමන්තරං, න දණ්ඩමන්තරං, න මුසලමන්තරං, න ද්වින්නං භුඤ්ජමානානං, න ගබ්භිනියා, න පායමානාය, න පුරිසන්තරගතාය, න සඞ්කිත්තීසු, න යත්ථ සා උපට්ඨිතො හොති, න යත්ථ මක්ඛිකා සණ්ඩසණ්ඩචාරිනී, න මච්ඡං, න මංසං, න සුරං, න මෙරයං, න ථුසොදකං පිවති. සො එකාගාරිකො වා හොති එකාලොපිකො වා.{2} ද්වාගාරිකො වා හොති ද්වාලොපිකො වා{2}. සත්තාගාරිකො වා හොති සත්තාලොපිකො වා. එකිස්සාපි දත්තියා යාපෙති, ද්වීහිපි දත්තීහි යාපෙති. තීහිපි දත්තීහි යාපෙති. සත්තහිපි දත්තීහි යාපෙති. එකාහිකම්පි ආහාරං ආහාරෙති, ද්වාහිකම්පි ආහාරං ආහාරෙති. සත්තාහිකම්පි ආහාරං ආහාරෙති. ඉති එවරූපං අද්ධමාසිකම්පි පරියායභත්තභොජනානුයොගමනුයුත්තො විහරති. සො සාකභක්ඛොපි හොති, සාමාකභක්ඛොපි හොති, නීවාරභක්ඛොපි හොති, දද්දුලභක්ඛොපි හොති, හටභක්ඛොපි හොති, කණ්හභක්ඛොපි හොති, ආචාමභක්ඛොපි හොති, පිඤ්ඤාකභක්ඛොපි හොති, තිණභක්ඛොපි හොති, ගොමයභක්ඛොපි හොති, වනමූලඵලාහාරො යාපෙති පවත්තඵලභොජී.
සො සාණානිපි ධාරෙති, මසාණානිපි ධාරෙති, ඡවදුස්සානිපි ධාරෙති, පංසුකූලානිපි ධාරෙති, තිරීටානිපි ධාරෙති, අජිනානිපි ධාරෙති, අජිනක්ඛිපම්පි ධාරෙති, කුසචීරම්පි ධාරෙති, වාකචීරම්පි ධාරෙති, ඵලකචීරම්පි ධාරෙති, කෙසකම්බලම්පි ධාරෙති, වාලකම්බලම්පි ධාරෙති, උලූකපක්ඛම්පි ධාරෙති, කෙසමස්සුලොචකොපි හොති කෙසමස්සුලොචනානුයොගමනුයුත්තො, උබ්භට්ඨකොපි හොති ආසනපටික්ඛිත්තො, උක්කුටිකොපි හොති උක්කුටිකප්පධානානුයොගමනුයුත්තො, කණ්ටකාපස්සයිකොපි හොති කණ්ටකාපස්සයෙ සෙය්යං කප්පෙති, සායතතියකම්පි උදකොරොහනානුයොගමනුයුත්තො විහරති.
ඉති එවරූපං අනෙකවිහිතං කායස්ස ආතාපනපරිතාපනානුයොගමනුයුත්තො විහරති. අයං වුච්චති භික්ඛවෙ, නිජ්ඣාමා පටිපදා.
කතමා ච භික්ඛවෙ, මජ්ඣිමා පටිපදා?
ඉධ භික්ඛවෙ, භික්ඛු කායෙ කායානුපස්සී විහරති : ආතාපී සම්පජානො සතිමා විනෙය්ය ලොකෙ අභිජ්ඣාදොමනස්සං. වෙදනාසු -පෙ- චිත්තෙ -පෙ- ධම්මෙසු ධම්මානුපස්සී විහරති ආතාපී සම්පජානො සතිමා විනෙය්ය ලොකෙ අභිජ්ඣාදොමනස්සං. අයං වුච්චති භික්ඛවෙ, මජ්ඣිමා පටිපදා.
ඉමා ඛො භික්ඛවෙ, තිස්සො පටිපදාති.
3. 6. 2.
තිස්සො ඉමා භික්ඛවෙ, පටිපදා.
කතමා තිස්සො?
ආගාළ්හා පටිපදා, නිජ්ඣාමා පටිපදා, මජ්ඣිමා පටිපදා.
කතමා ච භික්ඛවෙ, ආගාළ්හා පටිපදා? (යථා පුබ්බෙ තථා ඤාතබ්බං.) -පෙ- අයං වුච්චති භික්ඛවෙ, ආගාළ්හා පටිපදා.
කතමා ච භික්ඛවෙ, නිජ්ඣාමා පටිපදා? (යථා පුබ්බෙ තථා ඤාතබ්බං.) -පෙ- අයං වුච්චති භික්ඛවෙ, නිජ්ඣාමා පටිපදා.
කතමා ච භික්ඛවෙ, මජ්ඣිමා පටිපදා?
ඉධ භික්ඛවෙ, භික්ඛු අනුප්පන්නානං පාපකානං අකුසලානං ධම්මානං අනුප්පාදාය ඡන්දං ජනෙති වායමති විරියං ආරභති චිත්තං පග්ගණ්හාති පදහති. උප්පන්නානං පාපකානං අකුසලානං ධම්මානං පහාණාය -පෙ- අනුප්පන්නානං කුසලානං ධම්මානං උප්පාදාය -පෙ- උප්පන්නානං කුසලානං ධම්මානං ඨිතියා අසම්මොසාය භිය්යොභාවාය වෙපුල්ලාය භාවනාපාරිපූරියා ඡන්දං ජනෙති වායමති විරියං ආරභති චිත්තං පග්ගණ්හාති පදහති. -පෙ-
3. 6. 3.
[තිස්සො ඉමා භික්ඛවෙ, පටිපදා -පෙ-]
ඡන්දසමාධිපධානසඞ්ඛාරසමන්නාගතං ඉද්ධිපාදං භාවෙති. විරියසමාධි -පෙ- චිත්තසමාධි -පෙ- වීමංසාසමාධිපධානසඞ්ඛාරසමන්නාගතං ඉද්ධිපාදං භාවෙති -පෙ-
3. 6. 4.
[තිස්සො ඉමා භික්ඛවෙ, පටිපදා -පෙ-]
සද්ධින්ද්රියං භාවෙති, විරියින්ද්රියං භාවෙති, සතින්ද්රියං භාවෙති, සමාධින්ද්රියං භාවෙති, පඤ්ඤින්ද්රියං භාවෙති -පෙ-
3. 6. 5.
[තිස්සො ඉමා භික්ඛවෙ, පටිපදා -පෙ-]
සද්ධාබලං භාවෙති, විරියබලං භාවෙති, සතිබලං භාවෙති, සමාධිබලං භාවෙති, පඤ්ඤාබලං භාවෙති -පෙ-
3. 6. 6.
[තිස්සො ඉමා භික්ඛවෙ, පටිපදා -පෙ-]
සතිසම්බොජ්ඣඞ්ගං භාවෙති, ධම්මවිචයසම්බොජ්ඣඞ්ගං භාවෙති, විරියසම්බොජ්ඣඞ්ගං භාවෙති, පීතිසම්බොජ්ඣඞ්ගං භාවෙති, පස්සද්ධිසම්බොජ්ඣඞ්ගං භාවෙති, සමාධිසම්බොජ්ඣඞ්ගං භාවෙති, උපෙක්ඛාසම්බොජ්ඣඞ්ගං භාවෙති -පෙ-
3. 6. 7.
[තිස්සො ඉමා භික්ඛවෙ, පටිපදා -පෙ-]
සම්මාදිට්ඨිං භාවෙති, සම්මාසඞ්කප්පං භාවෙති, සම්මාවාචං භාවෙති, සම්මාකම්මන්තං භාවෙති, සම්මාආජීවං භාවෙති, සම්මාවායාමං භාවෙති, සම්මාසතිං භාවෙති, සම්මාසමාධිං භාවෙති. අයං වුච්චති භික්ඛවෙ, මජ්ඣිමා පටිපදා.
ඉමා ඛො භික්ඛවෙ, තිස්සො පටිපදාති.
[පටිපදා] වග්ගො ඡට්ඨො.{*}
[7. කම්මපථ පෙය්යාලං]
3. 7. 1.
තීහි භික්ඛවෙ, ධම්මෙහි සමන්නාගතො යථාභතං නික්ඛිත්තො එවං නිරයෙ.
කතමෙහි තීහි?
අත්තනා ච පාණාතිපාතී හොති, පරඤ්ච පාණාතිපාතෙ සමාදපෙති, පාණාතිපාතෙ ච සමනුඤ්ඤො හොති.
ඉමෙහි ඛො භික්ඛවෙ, තීහි ධම්මෙහි සමන්නාගතො යථාභතං නික්ඛිත්තො එවං නිරයෙ.
3. 7. 2.
තීහි භික්ඛවෙ, ධම්මෙහි සමන්නාගතො යථාභතං නික්ඛිත්තො එවං සග්ගෙ.
කතමෙහි තීහි?
අත්තනා ච පාණාතිපාතා පටිවිරතො හොති, පරඤ්ච පාණාතිපාතා වෙරමණියා සමාදපෙති, පාණාතිපාතා වෙරමණියා ච සමනුඤ්ඤො හොති -පෙ- එවං සග්ගෙ.
3. 7. 3.
[තීහි භික්ඛවෙ, ධම්මෙහි -පෙ-]
අත්තනා ච අදින්නාදායී හොති, පරඤ්ච අදින්නාදානෙ සමාදපෙති, අදින්නාදානෙ ච සමනුඤ්ඤො හොති -පෙ- එවං නිරයෙ.
3. 7. 4.
[තීහි භික්ඛවෙ, ධම්මෙහි -පෙ-]
අත්තනා ච අදින්නාදානා පටිවිරතො හොති, පරඤ්ච අදින්නාදානා වෙරමණියා සමාදපෙති, අදින්නාදානා වෙරමණියා ච සමනුඤ්ඤො හොති -පෙ- එවං සග්ගෙ.
3. 7. 5.
[තීහි භික්ඛවෙ, ධම්මෙහි -පෙ-]
අත්තනා ච කාමෙසු මිච්ඡාචාරී හොති, පරඤ්ච කාමෙසු මිච්ඡාචාරෙ සමාදපෙති, කාමෙසු මිච්ඡාචාරෙ සමනුඤ්ඤො හොති -පෙ- එවං නිරයෙ.
3. 7. 6.
[තීහි භික්ඛවෙ, ධම්මෙහි -පෙ-]
අත්තනා ච කාමෙසු මිච්ඡාචාරා පටිවිරතො හොති, පරඤ්ච කාමෙසු මිච්ඡාචාරා වෙරමණියා සමාදපෙති, කාමෙසු මිච්ඡාචාරා වෙරමණියා ච සමනුඤ්ඤො හොති -පෙ- එවං සග්ගෙ.
3. 7. 7.
[තීහි භික්ඛවෙ, ධම්මෙහි -පෙ-]
අත්තනා ච මුසාවාදී හොති, පරඤ්ච මුසාවාදෙ සමාදපෙති, මුසාවාදෙ ච සමනුඤ්ඤො හොති -පෙ- එවං නිරයෙ.
3. 7. 8.
[තීහි භික්ඛවෙ, ධම්මෙහි -පෙ-]
අත්තනා ච මුසාවාදා පටිවිරතො හොති, පරඤ්ච මුසාවාදා වෙරමණියා සමාදපෙති, මුසාවාදා වෙරමණියා ච සමනුඤ්ඤො හොති -පෙ- එවං සග්ගෙ.
3. 7. 9.
[තීහි භික්ඛවෙ, ධම්මෙහි -පෙ-]
අත්තනා ච පිසුනාවාචො හොති, පරඤ්ච පිසුනාය වාචාය සමාදපෙති, පිසුනාය වාචාය ච සමනුඤ්ඤො හොති -පෙ- එවං නිරයෙ.
3. 7. 10.
[තීහි භික්ඛවෙ, ධම්මෙහි -පෙ-]
අත්තනා ච පිසුනාය වාචාය පටිවිරතො හොති, පරඤ්ච පිසුනාය වාචාය වෙරමණියා සමාදපෙති, පිසුනාය වාචාය වෙරමණියා ච සමනුඤ්ඤො හොති -පෙ- එවං සග්ගෙ.
3. 7. 11.
[තීහි භික්ඛවෙ, ධම්මෙහි -පෙ-]
අත්තනා ච ඵරුසාවාචො හොති, පරඤ්ච ඵරුසාය වාචාය සමාදපෙති, ඵරුසාය වාචාය ච සමනුඤ්ඤො හොති -පෙ- එවං නිරයෙ.
3. 7. 12.
[තීහි භික්ඛවෙ, ධම්මෙහි -පෙ-]
අත්තනා ච ඵරුසාය වාචාය පටිවිරතො හොති, පරඤ්ච ඵරුසාය වාචාය වෙරමණියා සමාදපෙති, ඵරුසාය වාචාය වෙරමණියා ච සමනුඤ්ඤො හොති -පෙ- එවං සග්ගෙ.
3. 7. 13.
[තීහි භික්ඛවෙ, ධම්මෙහි -පෙ-]
අත්තනා ච සම්ඵප්පලාපී හොති, පරඤ්ච සම්ඵප්පලාපෙ සමාදපෙති, සම්ඵප්පලාපෙ ච සමනුඤ්ඤො හොති -පෙ- එවං නිරයෙ.
3. 7. 14.
[තීහි භික්ඛවෙ, ධම්මෙහි -පෙ-]
අත්තනා ච සම්ඵප්පලාපා පටිවිරතො හොති, පරඤ්ච සම්ඵප්පලාපා වෙරමණියා සමාදපෙති, සම්ඵප්පලාපා වෙරමණියා ච සමනුඤ්ඤො හොති -පෙ- එවං සග්ගෙ.
3. 7. 15.
[තීහි භික්ඛවෙ, ධම්මෙහි -පෙ-]
අත්තනා ච අභිජ්ඣාලු හොති, පරඤ්ච අභිජ්ඣාය සමාදපෙති, අභිජ්ඣාය ච සමනුඤ්ඤො හොති -පෙ- එවං නිරයෙ.
3. 7. 16.
[තීහි භික්ඛවෙ, ධම්මෙහි -පෙ-]
අත්තනා ච අනභිජ්ඣාලු හොති, පරඤ්ච අනභිජ්ඣාය සමාදපෙති, අනභිජ්ඣාය ච සමනුඤ්ඤො හොති -පෙ- එවං සග්ගෙ.
3. 7. 17.
[තීහි භික්ඛවෙ, ධම්මෙහි -පෙ-]
අත්තනා ච ව්යාපන්නචිත්තො හොති, පරඤ්ච ව්යාපාදෙ සමාදපෙති, ව්යාපාදෙ ච සමනුඤ්ඤො හොති -පෙ- එවං නිරයෙ.