10. 4. 2. 10.
චුන්ද සුත්තං
එවං මෙ සුතං, එකං සමයං භගවා පාවායං{4} විහරති චුන්දස්ස කම්මාර පුත්තස්ස අම්බවනෙ. අථ ඛො චුන්දො කම්මාරපුත්තො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො චුන්දං කම්මාරපුත්තං භගවා එතදවොච: කස්ස නො ත්වං චුන්ද සොචෙය්යානි රොචෙය්යාසීති{5}?
බ්රාහ්මණා භන්තෙ පච්ඡාභූමකා කමණ්ඩලුකා සෙවාලමාලිකා අග්ගිපරිචාරකා{6} උදකොරොහකා සොචෙය්යානි පඤ්ඤාපෙන්ති. තෙසාහං සොචෙය්යානි රොචෙමීති.
යථා කථං පන චුන්ද, බ්රාහ්මණා පච්ඡාභූමකා කමණ්ඩලුකා සෙවාලමාලිකා අග්ගිපරිචාරිකා උදකොරොහකා සොචෙය්යානි පඤ්ඤාපෙන්තීති?
ඉධ භන්තෙ බ්රාහ්මණා පච්ඡා භූමකා කමණ්ඩලුකා සෙවාලමාලිකා අග්ගිපරිචාරිකා උදකොරොහකා තෙ සාවකෙ{7} එවං සමාදපෙන්ති: “එහි ත්වං අම්භො පුරිස, කාලස්සෙව{8} උට්ඨහන්තොව{9} සයනම්හා පඨවිං ආමසෙය්යාසි, නො චෙ පඨවිං ආමසෙය්යාසි අල්ලානි ගොමයානි ආමසෙය්යාසි, නො චෙ අල්ලානි ගොමයානි ආමසෙය්යාසි හරිතානි තිණානි ආමසෙය්යාසි.
නො චෙ හරිතානි තිණානි ආමසෙය්යාසි අග්ගිං පරිචරෙය්යාසි, නො චෙ අග්ගිං පරිචරෙය්යාසි පඤ්ජලිකො ආදිච්චං නමස්සෙය්යාසි, නො චෙ පඤ්ජලිකො ආදිච්චං නමස්සෙය්යාසි සායතතියකං උදකං ඔරොහෙය්යාසීති. එවං ඛො භන්තෙ බ්රාහ්මණා පච්ඡාභූමකා කමණ්ඩලුකා සෙවාලමාලිකා අග්ගිපරිචාරකා උදකොරොහකා සොචෙය්යානි පඤ්ඤාපෙන්ති. තෙසාහං සොචෙය්යානි රොචෙමීති.
අඤ්ඤථා ඛො චුන්ද බ්රාහ්මණා පච්ඡාභූමකා කමණ්ඩලුකා සෙවාලමාලිකා අග්ගිපරිචාරකා උදකොරොහකා සොචෙය්යානි පඤ්ඤාපෙන්ති. අඤ්ඤථා ච පන අරියස්ස විනයෙ සොචෙය්යං හොතීති.
යථා කථං පන භන්තෙ අරියස්ස විනයෙ සොචෙය්යං හොති? සාධු මෙ භන්තෙ භගවා තථා ධම්මං දෙසෙතු යථා අරියස්ස විනයෙ සොචෙය්යං හොතීති.
තෙන හි චුන්ද සුණාහි, සාධුකං මනසිකරොහි, භාසිස්සාමීති. එවං භන්තෙති ඛො චුන්දො කම්මාරපුත්තො භගවතො පච්චස්සොසී. භගවා එතදවොච:
තිවිධං ඛො චුන්ද කායෙන අසොචෙය්යං හොති, චතුබ්බිධං වාචාය අසොචෙය්යං හොති, තිවිධං මනසා අසොචෙය්යං හොති.
කථඤ්ච චුන්ද තිවිධං කායෙන අසොචෙය්යං හොති:
1. ඉධ චුන්ද එකච්චො පාණාතිපාතී හොති ලුද්දො ලොහිතපාණී හතපහටෙ{1} නිවිට්ඨො අදයාපන්නො සබ්බපාණ භූතෙසු.
2. අදින්නාදායී හොති යං තං පරස්ස පරචිත්තූපකරණං ගාමගතං වා අරඤ්ඤගතං වං, තං අදින්නං ථෙය්යසඞ්ඛාතං ආදාතා හොති,
3. කාමෙසු මිච්ඡාචාරී හොති යා තා මාතුරක්ඛිතා පිතුරක්ඛිතා මාතාපිතුරක්ඛිතා භාතුරක්ඛිතා භගිනිරක්ඛිතා ඤාතිරක්ඛිතා ධම්මරක්ඛිතා සස්සාමිකා සපරිදණ්ඩා අන්තමසො මාලාගුලපරික්ඛිත්තාපි. තථාරූපාසු චාරිත්තං ආපජ්ජිතා හොති,
එවං ඛො චුන්ද කායෙන අසොචෙය්යං හොති.
කථඤ්ච චුන්ද චතුබ්බිධං වාචාය අසොචෙය්යං හොති:
4. ඉධ චුන්ද එකච්චො මුසාවාදී හොති සභාගතො{1} වා පරිසගතො{2} වා ඤාතිමජ්ඣ ගතො වා පූගමජ්ඣගතො වා රාජකුලමජ්ඣගතො වා අභිනීතො සක්ඛිපුට්ඨො “එහම්භො පුරිස යං ජානාසි තං වදෙහී’ති’. සො අජානං වා ආහ ‘ජානාමී’ති, ජානං වා ආහ ‘න ජානාමී’ ති අපස්සං වා ආහ ‘පස්සාමී’ති. {*} පස්සං වා ආහ ‘න පස්සාමී’ති. ඉති අත්තහෙතු වා පරහෙතු වා ආමිසකිඤ්චික්ඛහෙතු වා සම්පජානමුසා භාසිතා හොති.
5. පිසුනාවාචො හොති ඉතො සුත්වා අමුත්ර අක්ඛාතා ඉමෙසං භෙදාය, අමුත්ර වා සුත්වා ඉමෙසං අක්ඛාතා අමූසං භෙදාය. ඉති සමග්ගානං වා භෙත්තා භින්නානං වා අනුප්පදාතා වග්ගාරාමො වග්ගරතො වග්ගනන්දී වග්ගකරණිං වාචං භාසිතා හොති.
6. ඵරුසවාචො හොති යා සා වාචා අණ්ඩකා කක්කසා පරකටුකා පරාභිසජ්ජනී කොධසාමන්තා අසමාධිසංවත්තනිකා, තථාරූපිං වාචං භාසිතා හොති.
7. සම්ඵප්පලාපී හොති අකාලවාදී අභූතවාදී අනත්ථවාදී අධම්මවාදී අවිනයවාදී අනිධානවතිං වාචං භාසිතා හොති අකාලෙන අනපදෙසං අපරියන්තවතිං අනත්ථසංහිතං.
එවං ඛො චුන්ද චතුබ්බිධං වාචාය අසොචෙය්යං හොති.
කථඤ්ච චුන්ද තිවිධං මනසා අසොචෙය්යං හොති:
8. ඉධ චුන්ද එකච්චො අභිජ්ඣාලූ හොති යං තං පරස්ස පරවිත්තූපකරණං තං අභිජ්ඣිතා හොති, “අහො වත යං පරස්ස තං මම අස්සාති.{3}
9. ව්යාපන්නචිත්තො හොති පදුට්ඨමනසඞ්කප්පො “ඉමෙ සත්තා හඤ්ඤන්තු වා බජ්ඣන්තු වා උච්ඡිජ්ජන්තු වා විනස්සන්තු වා මා වා අහෙසුං ඉති වා”ති.{4}
10. මිච්ඡාදිට්ඨිකො හොති විපරීතදස්සනො, “නත්ථි දින්නං නත්ථි යිට්ඨං නත්ථි හුතං නත්ථි සුකටදුක්කටානං කම්මානං ඵලං විපාකො නත්ථි අයං ලොකො නත්ථි පරොලොකො නත්ථි මාතා නත්ථි පිතා නත්ථි සත්තා ඔපපාතිකා නත්ථි ලොකෙ සමණබ්රාහ්මණා සම්මග්ගතා සම්මාපටිපන්නා යෙ ඉමඤ්ච ලොකං පරඤ්ච ලොකං සයං අභිඤ්ඤා සච්ඡිකත්වා පවෙදෙන්තී”ති.
එවං ඛො චුන්ද තිවිධං මනසා අසොචෙය්යං හොතීති.
ඉමෙ ඛො චුන්ද දස අකුසලකම්මපථා. ඉමෙහි ඛො චුන්ද දසහි අකුසලෙහි කම්මපථෙහි සමන්නාගතො කාලස්සෙව වුට්ඨහන්තොව සයනම්හා පඨවිඤ්චෙපි ආමසති අසුචියෙව හොති. නො චෙපි පඨවිං ආමසති අසුචියෙව හොති, අල්ලානි චෙපි ගොමයානි ආමසති අසුචියෙව හොති, නො චෙපි අල්ලානි ගොමයානි ආමසති අසුචියෙව හොති, හරිතානි චෙපි තිණානි ආමසති අසුචියෙව හොති, නො චෙපි හරිතානි තිණානි ආමසති අසුචියෙව හොති, අග්ගිඤ්චෙපි පරිචරති අසුචියෙව හොති, නො චෙපි අග්ගිං පරිචරති අසුචියෙව හොති, පඤ්ජලිකො චෙපි ආදිච්චං නමස්සති අසුචියෙව හොති, නො චෙපි පඤ්ජලිකො ආදිච්චං නමස්සති අසුචියෙව හොති, සායතතියකඤ්චෙපි උදකං ඔරොහති අසුචියෙව හොති, නො චෙපි සායතතියකං උදකං ඔරොහති අසුචියෙව හොති.
තං කිස්ස හෙතු?
ඉමෙ චුන්ද දස අකුසලකම්මපථා අසුචියෙව{1} හොන්ති, අසුචිකරණා ච. ඉමෙසං පන චුන්ද දසන්නං අකුසලානං කම්මපථානං සමන්නාගමනහෙතු නිරයො පඤ්ඤායති, තිරච්ඡානයොනි පඤ්ඤායති, පෙත්තිවිසයො පඤ්ඤායති, යා වා පන අඤ්ඤාපි{2} කාචි දුග්ගතියො{3}.
තිවිධං ඛො චුන්ද කායෙන සොචෙය්යං හොති, චතුබ්බිධං වාචාය සොචෙය්යං හොති, තිවිධං මනසා සොචෙය්යං හොති.
කථං චුන්ද තිවිධං කායෙන සොචෙය්යං හොති:
1. ඉධ චුන්ද එකච්චො පාණාතිපාතං පහාය පාණාතිපාතා පටිවිරතො හොති, නිහිතදණ්ඩො නිහිතසත්ථො ලජ්ජී දයාපන්නො සබ්බපාණභූතහිතානුකම්පී විහරති.
2. අදින්නාදානං පහාය අදින්නාදානා පටිවිරතො හොති, යං තං පරස්ස පරචිත්තූපකරණං ගාමගතං වා අරඤ්ඤගතං වා, න තං අදින්නං ථෙය්යසඞ්ඛාතං ආදාතා හොති.
3. කාමෙසු මිච්ඡාචාරං පහාය කාමෙසු මිච්ඡාචාරා පටිවිරතො හොති. යා තා මාතුරක්ඛිතා පිතුරක්ඛිතා මාතාපිතුරක්ඛිතා භාතුරක්ඛිතා භගිනිරක්ඛිතා ඤාතිරක්ඛිතා{4} ධම්මරක්ඛිතා සස්සාමිකා සපරිදණ්ඩා අන්තමසො මාලාගුලපරික්ඛිත්තාපි, තථාරූපාසු න චාරිත්තං ආපජ්ජිතා හොති.
එවං ඛො චුන්ද තිවිධං කායෙන සොචෙය්යං හොති.
කථඤ්ච චුන්ද චතුබ්බිධං වාචාය සොචෙය්යං හොති:
4. ඉධ චුන්ද එකච්චො මුසාවාදං පහාය මුසාවාදා පටිවිරතො හොති, සභාගතො වා පරිසගතො වා ඤාතිමජ්ඣගතො වා පූගමජ්ඣගතො වා රාජකුලමජ්ඣගතො වා අභිනීතො සක්ඛිපුට්ඨො, “එහම්භො පුරිස යං ජානාසි, තං වදෙහී”ති සො අජානං වා ආහ ‘න ජානාමී’ති, ‘ජානං වා ආහ ජානාමී’ති, අපස්සං වා ආහ ‘න පස්සාමී’ති, පස්සං වා ආහ ‘පස්සාමී’ති. ඉති අත්තහෙතු වා පරහෙතු වා ආමිසකිඤ්චික්ඛහෙතු වා න සම්පජානමුසා භාසිතා හොති.
5. පිසුනා වාචං පහාය පිසුනාය වාචාය පටිවිරතො හොති. න ඉතො සුත්වා අමුත්ර අක්ඛාතා ඉමෙසං භෙදාය. න අමුත්ර වා සුත්වා ඉමෙසං අක්ඛාතා අමූසං භෙදාය. ඉති භින්නානං වා සන්ධාතා සහිතානං වා අනුප්පදාතා සමග්ගාරාමො සමග්ගරතො සමග්ගනන්දී සමග්ගකරණං වාචං භාසිතා හොති.
6. ඵරුසං වාචං පහාය ඵරුසාය වාචාය පටිවිරතො හොති යා සා වාචා නෙලා කණ්ණසුඛා පෙමණීයා හදයඞ්ගමා පොරී බහුජනකන්තා බහුජනමනාපා, තථාරූපිං වාචං භාසිතා හොති.
7. සම්ඵප්පලාපං පහාය සම්ඵප්පලාපා පටිවිරතො හොති, කාලවාදී භූතවාදී අත්ථවාදී ධම්මවාදී විනයවාදී නිධානවතිං වාචං භාසිතා හොති කාලෙන සාපදෙසං පරියන්තවතිං අත්ථසංහිතං.
එවං ඛො චුන්ද චතුබ්බිධං වාචාය සොචෙය්යං හොති.
කථඤ්ච චුන්ද තිවිධං මනසා සොචෙය්යං හොති:
8. ඉධ චුන්ද එකච්චො අනභිජ්ඣාලූ හොති, යං තං පරස්ස පරචිත්තූපකරණං, තං නාභිජ්ඣිතා හොති{1} අහො වත යං පරස්ස තං මම අස්සාති.
9. අව්යාපන්නචිත්තො හොති අප්පදුට්ඨමනසංකප්පො, “ඉමෙ සත්තා අවෙරා අව්යාපජ්ජා අනීඝා සුඛී අත්තානං පරිහරන්තු”ති{2}.
10. සම්මාදිට්ඨිකො හොති අවිපරීතදස්සනො, “අත්ථි දින්නං, අත්ථි යිට්ඨං, අත්ථි හුතං, අත්ථි සුකටදුක්කටානං කම්මානං ඵලං විපාකො, අත්ථි අයං ලොකා අත්ථි පරො ලොකො, අත්ථි මාතා, අත්ථි පිතා, අත්ථි සත්තා ඔපපාතිකා, අත්ථි ලොකෙ සමණබ්රාහ්මණා සම්මග්ගතා සම්මාපටිපන්නා, යෙ ඉමං ච ලොකං පරඤ්ච ලොකං සයං අභිඤ්ඤා සච්ඡිකත්වා පවෙදෙන්තී”ති.
එවං ඛො චුන්ද තිවිධං මනසා සොචෙය්යං හොති.
ඉමෙ ඛො චුන්ද දස කුසලකම්මපථා.
ඉමෙහි ඛො දසහි කුසලකම්මපථෙහි සමන්නාගතො කාලස්සෙව උට්ඨහන්තොව සයනම්හා පඨවිං චෙපි ආමසති, සුචියෙව හොති. නො චෙපි පඨවිං ආමසති, සුචියෙව හොති. අල්ලානි චෙපි ගොමයානි ආමසති සුචියෙව හොති. නො චෙපි අල්ලානි ගොමයානි ආමසති, සුචියෙව හොති. හරිතානි චෙපි තිණානි ආමසති, සුචියෙව හොති නො චෙපි හරිතානි තිණානි ආමසති, සුචියෙව හොති අග්ගිඤ්චෙපි පරිචරති, සුචියෙව හොති. නො චෙපි අග්ගිං පරිචරති, සුචියෙව හොති පඤ්ජලිකො චෙපි ආදිච්චං නමස්සති, සුචියෙව හොති. නො චෙපි පඤ්ජලිකො ආදිච්චං නමස්සති, සුචියෙව හොති. සායතතියකඤ්චෙපි උදකං ඔරොහති, සුචියෙව හොති. නො චෙපි සායතතියකං උදකං ඔරොහති, සුචියෙව හොති.
තං කිස්ස හෙතු.
ඉමෙ චුන්ද දස කුසලකම්මපථා සුචියෙව හොන්ති, සුචිකරණා ච ඉමෙසඤ්ච පන චුන්ද දසන්නං කුසලානං කම්මපථානං සමන්නාගමනහෙතු දෙවා පඤ්ඤායන්ති, මනුස්සා පඤ්ඤායන්ති, යා වා පනඤ්ඤාපි කාචි සුගතියොති.
එවං වුත්තෙ චුන්දො කම්මාරපුත්තො භගවන්තං එතදවොච:
අභික්කන්තං භන්තෙ අභික්කන්තං භන්තෙ -පෙ- උපාසකං මං භන්තෙ භගවා ධාරෙතු අජ්ජතග්ගෙ පාණුපෙතං සරණං ගතන්ති.
10. 4. 2. 11.
ජාණුස්සොණී සුත්තං
අථ ඛො ජාණුස්සොණී බ්රාහ්මණො යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි, එකමන්තං නිසින්නො ඛො ජාණුස්සොණී බ්රාහ්මණො භගවන්තං එතදවොච:
මයමස්සු භො ගොතම බ්රාහ්මණා නාම දානානි දෙම සද්ධානි කරොම: “ඉදං දානං පෙතානං ඤාතිසාලොහිතානං උපකප්පතු, ඉදං දානං පෙතා ඤාතිසාලොහිතා පරිභුඤ්ජන්තු’ති. කච්චි තං භො ගොතම දානං පෙතානං ඤාතිසාලොහිතානං උපකප්පති? කච්චි තෙ පෙතා ඤාතිසාලොහිතා තං දානං පරිභුඤ්ජන්ති ති?
ඨානෙ ඛො බ්රාහ්මණ උපකප්පති, නො අට්ඨානෙති.
කතමඤ්ච{1} භො ගොතම ඨානං? කතමං අට්ඨානන්ති?
ඉධ බ්රාහ්මණ එකච්චො පාණාතිපාතී හොති, අදින්නාදායී හොති කාමෙසු මිච්ඡාචාරී හොති, මුසාවාදී හොති, පිසුනවාචො හොති, ඵරුසවාචො හොති, සම්ඵප්පලාපී හොති, අභිජ්ඣාලූ හොති, ව්යාපන්නචිත්තො හොති, මිච්ඡාදිට්ඨිකො හොති, සො කායස්ස භෙදා පරං මරණා නිරයං උපපජ්ජති. යො නෙරයිකානං සත්තානං ආහාරො තෙන සො තත්ථ යාපෙති, තෙන සො තත්ථ තිට්ඨති. ඉදම්පි ඛො බ්රාහ්මණ අට්ඨානං යත්ථ ඨිතස්ස තං දානං න උපකප්පති.
ඉධ පන බ්රාහ්මණ එකච්චො පාණාතිපාතී හොති -පෙ- මිච්ඡාදිට්ඨිකො හොති. සො කායස්ස භෙදා පරම්මරණා තිරච්ඡානයොනිං උපපජ්ජති. යො තිරච්ඡානයොනිකානං සත්තානං ආහාරො තෙන සො තත්ථ යාපෙති, තෙන සො තත්ථ තිට්ඨති. ඉදම්පි ඛො බ්රාහ්මණ අට්ඨානං, යත්ථ ඨිතස්ස තං දානං න උපකප්පති.
ඉධ පන බ්රාහ්මණ එකච්චො පාණාතිපාතා පටිවිරතො හොති, අදින්නාදානා පටිවිරතො හොති, කාමෙසු මිච්ඡාචාරා පටිවිරතො හොති, මුසාවාදා පටිවිරතො හොති, පිසුනාය වාචාය පටිවිරතො හොති, ඵරුසාය වාචාය පටිවිරතො හොති, සම්ඵප්පලාපා පටිවිරතො හොති, අනභිජ්ඣාලූ හොති, අව්යාපන්නචිත්තො හොති, සම්මාදිට්ඨිකො හොති. සො කායස්ස භෙදා පරම්මරණා මනුස්සානං සහව්යතං උපපජ්ජති. යො මනුස්සානං ආහාරො තෙන සො තත්ථ යාපෙති, තෙන සො තත්ථ තිට්ඨති. ඉදම්පි ඛො බ්රාහ්මණ අට්ඨානං, යත්ථ ඨිතස්ස තං දානං න උපකප්පති.
ඉධ පන බ්රාහ්මණ එකච්චො පාණාතිපාතා පටිවිරතො හොති -පෙ- සම්මාදිට්ඨිකො හොති. සො කායස්ස භෙදා පරම්මරණා දෙවානං සහව්යතං උපපජ්ජති. යො දෙවානං ආහාරො තෙන සො තත්ථ යාපෙති, තෙන සො තත්ථ තිට්ඨති. ඉදම්පි ඛො බ්රාහ්මණ අට්ඨානං, යත්ථ ඨිතස්ස{1} තං දානං න උපකප්පති.
ඉධ පන බ්රාහ්මණ එකච්චො පාණාතිපාතී හොති -පෙ- මිච්ඡාදිට්ඨිකො හොති. සො කායස්ස භෙදා පරං මරණා පෙත්ති විසයං උපපජ්ජති. යො පෙත්තිවෙසයිකානං සත්තානං ආහාරො, තෙන සො තත්ථ යාපෙති. තෙන සො තත්ථ තිට්ඨති. යං වා පනස්ස අනුප්පවෙච්ඡන්ති{2} මිත්තා වා අමච්චා වා ඤාති වා සාලොහිතා වා, තෙන සො තත්ථ යාපෙති. තෙන සො තත්ථ තිට්ඨති. ඉදං ඛො බ්රාහ්මණ ඨානං, යත්ථ ඨිතස්ස තං දානං උපකප්පතී ති.
සචෙ පන භො ගොතම සො පෙතො ඤාතිසාලොහිතො තං ඨානං අනුප්පන්නො හොති, කො තං දානං පරිභුඤ්ජතීති?
අඤ්ඤෙපිස්ස බ්රාහ්මණ පෙතා ඤාති සාලොහිතා තං ඨානං අනුප්පත්තා හොන්ති. තෙ තං දානං පරිභුඤ්ජන්තී ති.
සචෙ පන භො ගොතම සො චෙව පෙතො ඤාතිසාලොහිතො තං ඨානං අනුපපන්නො හොති, අඤ්ඤෙපිස්ස පෙතා ඤාතිසාලොහිතා තං ඨානං අනුපපන්නා හොන්තී. කො තං දානං පරිභුඤ්ජතී ති?
අට්ඨානං ඛො එතං බ්රාහ්මණ, අනවකාසො යං තං ඨානං විචිත්තං අස්ස ඉමිනා දීඝෙන අද්ධුනා යදිදං පෙතෙහි ඤාති සාලොහිතෙහි. අපි ච බ්රාහ්මණ දායකොපි අනිප්ඵලො හොති.
අට්ඨානෙපි භවං ගොතමො පරිකප්පං වදතීති? අට්ඨානෙපි ඛො අහං බ්රාහ්මණ පරිකප්පං වදාමි
ඉධ බ්රාහ්මණ එකච්චො පාණාතිපාතී හොති. අදින්නාදායී හොති, කාමෙසු මිච්ඡාචාරී හොති, මුසාවාදී හොති, පිසුනාවාචො හොති, ඵරුසවාචො හොති, සම්ඵප්පලාපී හොති, අභිජ්ඣාලූ හොති, ව්යාපන්නචිත්තො හොති, මිච්ඡාදිට්ඨිකො හොති, සො දාතා හොති, සමණස්ස වා බ්රාහ්මණස්ස වා අන්නං පානං වත්ථං යානං මාලාගන්ධවිලෙපනං, සෙය්යාවසථපදීපෙය්යං. සො කායස්ස භෙදා පරං මරණා හත්ථීනං සහව්යතං උපපජ්ජති. සො තත්ථ ලාභී හොති අන්නස්ස පානස්ස මාලා නානාලඞ්කාරස්ස.
යං ඛො බ්රාහ්මණ ඉධ පාණාතිපාතී, අදින්නාදායී, කාමෙසු මිච්ඡාචාරී, මුසාවාදී, පිසුනවාචො, ඵරුසවාචො, සම්ඵප්පලාපී, අභිජ්ඣාලූ, ව්යාපන්නචිත්තො, මිච්ඡාදිට්ඨිකො, තෙන සො කායස්ස භෙදා පරම්මරණා හත්ථීනං සහව්යතං උපපජ්ජති. යං ච ඛො සො දාතා හොති සමණස්ස වා බ්රාහ්මණස්ස වා අන්නං පානං වත්ථං යානං මාලාගන්ධවිලෙපනං, සෙය්යාවසථපදීපෙය්යං, තෙන සො තත්ථ ලාභී හොති අන්නස්ස පානස්ස මාලා නානාලංකාරස්ස.
ඉධ බ්රාහ්මණ එකච්චො පාණාතිපාතී හොති. අදින්නාදායී හොති, කාමෙසු මිච්ඡාචාරී හොති, මුසාවාදී හොති, පිසුනාවාචො හොති, ඵරුසවාචො හොති, සම්ඵප්පලාපී හොති, අභිජ්ඣාලූ හොති, ව්යාපන්නචිත්තො හොති, මිච්ඡාදිට්ඨිකො හොති. සො දාතා හොති, සමණස්ස වා බ්රාහ්මණස්ස වා අන්නං පානං වත්ථං යානං මාලාගන්ධවිලෙපනං, සෙය්යාවසථපදීපෙය්යං. සො කායස්ස භෙදා පරං මරණා අස්සානං සහව්යතං උපපජ්ජති -පෙ- ගුන්නං සහව්යතං උපපජ්ජති -පෙ- කුක්කුරානං සහව්යතං උපපජ්ජති -පෙ- සො තත්ථ ලාභී හොති අන්නස්ස පානස්ස මාලා නානාලඞ්කාරස්ස.
යං ඛො බ්රාහ්මණ ඉධ පාණාතිපාතී -පෙ- මිච්ඡාදිට්ඨිකො, සො තෙන කායස්ස භෙදා පරම්මරණා කුක්කුරානං සහව්යතං උපපජ්ජති. යඤ්ච ඛො සො දාතා හොති සමණස්ස වා බ්රාහ්මණස්ස වා අන්නං පානං වත්ථං යානං මාලාගන්ධවිලෙපනං, සෙය්යාවසථපදීපෙය්යං, තෙන සො තත්ථ ලාභී හොති අන්නස්ස පානස්ස මාලා නානාලඞ්කාරස්ස.
ඉධ පන බ්රාහ්මණ එකච්චො පාණාතිපාතා පටිවිරතො හොති, අදින්නාදානා පටිවිරතො හොති, කාමෙසු මිච්ඡාචාරා පටිවිරතො හොති, මුසාවාදා පටිවිරතො හොති, පිසුනාවාචා පටිවිරතො හොති, ඵරුසාය වාචාය පටිවිරතො හොති, සම්ඵප්පලාපා පටිවිරතො හොති, අනභිජ්ඣාලූ හොති, අව්යාපන්නචිත්තො හොති, සම්මාදිට්ඨිකො හොති. සො දාතා හොති සමණස්ස වා බ්රාහ්මණස්ස වා අන්නං පානං වත්ථං යානං මාලාගන්ධවිලෙපනං සෙය්යාවසථපදීපෙය්යං. සො කායස්ස භෙදා පරං මරණා මනුස්සානං සහව්යතං උපපජ්ජති. සො තත්ථ ලාභී හොති මානුසකානං පඤ්චන්නං කාමගුණානං.
යං ඛො බ්රාහ්මණ ඉධ පාණාතිපාතා පටිවිරතො හොති -පෙ- සම්මාදිට්ඨිකො, තෙන සො කායස්ස භෙදා පරම්මරණා මනුස්සානං සහව්යතං උපපජ්ජති, යඤ්ච ඛො සො දාතා හොති සමණස්ස වා බ්රාහ්මණස්ස වා අන්නං පානං වත්ථං යානං මාලාගන්ධවිලෙපනං සෙය්යාවසථපදීපෙය්යං, තෙන සො තත්ථ ලාභී හොති මානුසකානං පඤ්චන්නං කාමගුණානං.
ඉධ පන බ්රාහ්මණ එකච්චො පාණාතිපාතා පටිවිරතො හොති -පෙ- සම්මාදිට්ඨිකො හොති, සො දාතා හොති සමණස්ස වා බ්රාහ්මණස්ස වා අන්නං පානං වත්ථං යානං මාලාගන්ධවිලෙපනං සෙය්යාවසථපදීපෙය්යං. සො කායස්ස භෙදා පරං මරණා දෙවානං සහව්යතං උපපජ්ජති. සො තත්ථ ලාභී හොති දිබ්බානං පඤ්චන්නං කාමගුණානං.
යං ඛො බ්රාහ්මණ ඉධ පාණාතිපාතා පටිවිරතො හොති -පෙ- සම්මාදිට්ඨිකො. තෙන සො කායස්ස භෙදා පරං මරණා දෙවානං සහව්යතං උපපජ්ජති. යඤ්ච ඛො සො දාතා හොති සමණස්ස වා බ්රාහ්මණස්ස වා අන්නං පානං වත්ථං යානං මාලාගන්ධවිලෙපනං සෙය්යාවසථපදීපෙය්යං, තෙන සො තත්ථ ලාභී හොති දිබ්බානං පඤ්චන්නං කාමගුණානං. අපි ච බ්රාහ්මණ, දායකො පි අනිප්ඵලො ති.
අච්ඡරියං භො ගොතම, අබ්භුතං භො ගොතම, යාවඤ්චිදං භො ගොතම අලමෙව දානානි දාතුං, අලං සද්ධානි කාතුං, යත්රහි නාම දායකො පි අනිප්ඵලො හොති.
එව මෙතං බ්රාහ්මණ, එවමෙතං බ්රාහ්මණ,{1} දායකොපි හි බ්රාහ්මණ අනිප්ඵලො{2} හොති.
අභික්කන්තං භො ගොතම -පෙ- උපාසකං මං භවං ගොතමො ධාරෙතු අජ්ජතග්ගෙ පාණුපෙතං සරණං ගතන්ති.
ජාණුස්සොණීවග්ගො දුතියො.
3. සාධුවග්ගො
10. 4. 3. 1.
සාධු සුත්තං
සාධුඤ්ච වො භික්ඛවෙ දෙසිස්සාමි, අසාධුඤ්ච, තං සුණාථ, සාධුකං මනසිකරොථ, භාසිස්සාමී’ති. එවං භන්තෙති ඛො තෙ භික්ඛු භගවතො පච්චස්සොසුං. භගවා එතදවොච:
කතමඤ්ච භික්ඛවෙ අසාධු{1}:
පාණාතිපාතො, අදින්නාදානං, කාමෙසු මිච්ඡාචාරො, මුසාවාදො, පිසුණාවාචා, ඵරුසාවාචා, සම්ඵප්පලාපො, අභිජ්ඣා, ව්යාපාදො, මිච්ඡාදිට්ඨි. ඉදං වුච්චති භික්ඛවෙ අසාධු{2}.
කතමඤ්ච භික්ඛවෙ සාධු{3}:
පාණාතිපාතා වෙරමණී, අදින්නාදානා වෙරමණී, කාමෙසු මිච්ඡාචාරා වෙරමණී, මුසාවාදා වෙරමණී, පිසුණාය වාචාය වෙරමණී, ඵරුසාය වාචාය වෙරමණී, සම්ඵප්පලාපා වෙරමණී, අනභිජ්ඣා, අව්යාපාදො, සම්මාදිට්ඨි.
ඉදං වුච්චති භික්ඛවෙ සාධූතී.
10. 4. 3. 2.
අරියධම්ම සුත්තං
අරියධම්මඤ්ච වො භික්ඛවෙ දෙසිස්සාමි, අනරියධම්මඤ්ච තං සුණාථ -පෙ-
කතමො ච භික්ඛවෙ අනරියො ධම්මො:
පාණාතිපාතො -පෙ- මිච්ඡාදිට්ඨි. අයං වුච්චති භික්ඛවෙ අනරියො ධම්මො.
කතමො ච භික්ඛවෙ අරියො ධම්මො:
පාණාතිපාතා වෙරමණී -පෙ- සම්මාදිට්ඨි.
අයං වුච්චති භික්ඛවෙ අරියො ධම්මොති.
10. 4. 3. 3.
කුසල සුත්තං