‘ඛෙමප්පත්තො ඛෙමප්පත්තො’ති ආවුසො වුච්චති -පෙ-
9. 2. 1. 3.
අමත සුත්තං
[කොසම්බිනිදානං]
‘අමතං අමත’න්ති ආවුසො වුච්චති -පෙ-
9. 2. 1. 4.
අමතප්පත්ත සුත්තං
[කොසම්බිනිදානං]
‘අමතප්පත්තො අමතප්පත්තො’ති ආවුසො වුච්චති -පෙ-
9. 2. 1. 5.
අභය සුත්තං
[කොසම්බිනිදානං]
‘අභයං අභය’න්ති ආවුසො වුච්චති -පෙ-
9. 2. 1. 6.
අභයප්පත්ත සුත්තං
[කොසම්බිනිදානං]
‘අභයප්පත්තො අභයප්පත්තො’ති ආවුසො වුච්චති -පෙ-
9. 2. 1. 7.
පස්සද්ධි සුත්තං
[කොසම්බිනිදානං]
‘පස්සද්ධි පස්සද්ධී’ති ආවුසො වුච්චති -පෙ-
9. 2. 1. 8.
අනුපුබ්බපස්සද්ධි සුත්තං
[කොසම්බිනිදානං]
‘අනුපුබ්බපස්සද්ධි අනුපුබ්බපස්සද්ධී’ති ආවුසො වුච්චති -පෙ-
9. 2. 1. 9.
නිරොධ සුත්තං
[කොසම්බිනිදානං]
‘නිරොධො නිරොධො’ති ආවුසො වුච්චති -පෙ-
9. 2. 1. 10.
අනුපුබ්බ නිරොධ සුත්තං
[කොසම්බිනිදානං]
අනුපුබ්බනිරොධො අනුපුබ්බනිරොධොති ආවුසො වුච්චති. කිත්තාවතා නු ඛො ආවුසො අනුපුබ්බනිරොධො වුත්තො භගවතාති.
ඉධාවුසො භික්ඛු විවිච්චෙව කාමෙහි -පෙ- පඨමං ඣානං උපසම්පජ්ජ විහරති. එත්තාවතා පි ඛො ආවුසො අනුපුබ්බනිරොධො වුත්තො භගවතා පරියායෙන -පෙ-
පුන චපරං ආවුසො භික්ඛු සබ්බසො නෙවසඤ්ඤානාසඤ්ඤායතනං සමතික්කම්ම සඤ්ඤාවෙදයිතනිරොධං උපසම්පජ්ජ විහරති. පඤ්ඤාය චස්ස දිස්වා ආසවා පරික්ඛීණා හොන්ති එත්තාවතාපි ඛො ආවුසො අනුපුබ්බනිරොධො වුත්තො භගවතා නිප්පරියායෙනාති.
9. 2. 1. 11.
අරහත්තා භබ්බාභබ්බධම්ම සුත්තං
[සාවත්ථිනිදානං]
නව භික්ඛවෙ ධම්මෙ අප්පහාය අභබ්බො අරහත්තං සච්ඡිකාතුං කතමෙ නම:
රාගං, දොසං, මොහං, කොධං, උපනාහං, මක්ඛං, පලාසං, ඉස්සං, මච්ඡරියං. ඉමෙ ඛො භික්ඛවෙ නව ධම්මෙ අප්පහාය අභබ්බො අරහත්තං සච්ඡිකාතුං.
නව භික්ඛවෙ ධම්මෙ පහාය භබ්බො අරහත්තං සච්ඡිකාතුං කතමෙ නව:
රාගං, දොසං, මොහං, කොධං, උපනාහං, මක්ඛං, පලාසං, ඉස්සං මච්ඡරියං. ඉමෙ ඛො භික්ඛවෙ නව ධම්මෙ පහාය භබ්බො අරහත්තං සච්ඡිකාතුන්ති.
ඛෙමවග්ගො පඨමො.{1}
තස්සුද්දානං:
ඛෙමා ද්වෙ අමතා ද්වෙ ච ද්වෙ භයා පස්සද්ධියා දුවෙ, නිරොධො අනුපුබ්බො චෙව - භබ්බාභබ්බෙනෙකාදසාති.{*}
2. සතිපට්ඨානවග්ගො
9. 2. 2. 1.
සික්ඛාදුබ්බල්ය සතිපට්ඨාන සුත්තං
[සාවත්ථිනිදානං]
පඤ්චිමානි භික්ඛවෙ සික්ඛාදුබ්බල්යානි. කතමානි පඤ්ච: පාණාතිපාතො, අදින්නාදානං, කාමෙසු මිච්ඡාචාරො, මුසාවාදො, සුරාමෙරයමජ්ජපමාදට්ඨානං. ඉමානි ඛො භික්ඛවෙ පඤ්ච සික්ඛා දුබ්බල්යානි. ඉමෙසං ඛො භික්ඛවෙ පඤ්චන්නං සික්ඛාදුබ්බල්යානං පහානාය චත්තාරො සතිපට්ඨානා භාවෙතබ්බා. කතමෙ චත්තාරො:
ඉධ භික්ඛවෙ භික්ඛු කායෙ කායානුපස්සී විහරති ආතාපී සම්පජානො සතිමා විනෙය්ය ලොකෙ අභිජ්ඣාදොමනස්සං. වෙදනාසු වෙදනානුපස්සී විහරති -පෙ- චිත්තෙ චිත්තානුපස්සී විහරති -පෙ- ධම්මෙසු ධම්මානුපස්සී විහරති ආතාපී සම්පජානො සතිමා විනෙය්ය ලොකෙ අභිජ්ඣාදොමනස්සං. ඉමෙසං ඛො භික්ඛවෙ පඤ්චන්නං සික්ඛාදුබ්බල්යානං පහානාය ඉමෙ චත්තාරො සතිපට්ඨානා භාවෙතබ්බාති.
9. 2. 2. 2.
නීවරණ සතිපට්ඨාන සුත්තං
[සාවත්ථිනිදානං]
පඤ්චිමානි භික්ඛවෙ නීවරණානි. කතමානි පඤ්ච:
කාමච්ඡන්දනීවරණං, ව්යාපාදනීවරණං, ථීනමිද්ධනීවරණං, උද්ධච්චකුක්කුච්චනීවරණං, විචිකිච්ඡානීවරණං. ඉමානි ඛො භික්ඛවෙ පඤ්ච නීවරණානි.
ඉමෙසං ඛො භික්ඛවෙ පඤ්චන්නං නීවරණානං පහානාය -පෙ- ඉමෙ චත්තාරො සතිපට්ඨානා භාවෙතබ්බාති.
9. 2. 2. 3.
කාමගුණ සතිපට්ඨාන සුත්තං
[සාවත්ථිනිදානං]
පඤ්චිමෙ භික්ඛවෙ කාමගුණා. කතමෙ පඤ්ච:
චක්ඛුවිඤ්ඤෙය්යා රූපා ඉට්ඨා කන්තා මනාපා පියරූපා කාමූපසංහිතා රජනීයා, සොතවිඤ්ඤෙය්යා සද්දා -පෙ- ඝානවිඤ්ඤෙය්යා ගන්ධා -පෙ- ජිව්හාවිඤ්ඤෙය්යා රසා -පෙ- කායවිඤ්ඤෙය්යා ඵොට්ඨබ්බා ඉට්ඨා කන්තා මනාපා පියරූපා කාමූපසංහිතා රජනීයා. ඉමෙ ඛො භික්ඛවෙ පඤ්චකාමගුණා.
ඉමෙසං ඛො භික්ඛවෙ පඤ්චන්නං කාමගුණානං පහානාය -පෙ- ඉමෙ චත්තාරො සතිපට්ඨානා භාවෙතබ්බාති.
9. 2. 2. 4.
උපාදානක්ඛන්ධ සතිපට්ඨාන සුත්තං
[සාවත්ථිනිදානං]
පඤ්චිමෙ භික්ඛවෙ උපාදානක්ඛන්ධා. කතමෙ පඤ්ච:
රූපූපාදානක්ඛන්ධො, වෙදනූපාදානක්ඛන්ධො, සඤ්ඤූපාදානක්ඛන්ධො, සඞ්ඛාරූපාදානක්ඛන්ධො, විඤ්ඤාණුපාදානක්ඛන්ධො. ඉමෙ ඛො භික්ඛවෙ, පඤ්චුපාදානක්ඛන්ධා.
ඉමෙසං ඛො භික්ඛවෙ පඤ්චන්නං උපාදානක්ඛන්ධානං පහානාය -පෙ- ඉමෙ චත්තාරො සතිපට්ඨානා භාවෙතබ්බාති.
9. 2. 2. 5.
ඔරම්භාගිය සතිපට්ඨාන සුත්තං
[සාවත්ථිනිදානං]
පඤ්චිමානි භික්ඛවෙ ඔරම්භාගියානි සඤ්ඤොජනානි. කතමානි පඤ්ච:
සක්කායදිට්ඨි, විචිකිච්ඡා, සීලබ්බතපරාමාසො, කාමච්ඡන්දො, බ්යාපාදො. ඉමානි ඛො භික්ඛවෙ පඤ්චොරම්භාගියානි සඤ්ඤොජනානි.
ඉමෙසං ඛො භික්ඛවෙ පඤ්චන්නං ඔරම්භාගියානං සඤ්ඤොජනානං පහානාය -පෙ- ඉමෙ චත්තාරො සතිපට්ඨානා භාවෙතබ්බාති.
9. 2. 2. 6.
ගති සතිපට්ඨාන සුත්තං
[සාවත්ථිනිදානං]
පඤ්චිමා භික්ඛවෙ ගතියො. කතමෙ පඤ්ච:
නිරයො, තිරච්ඡානයොනි, පෙත්තිවිසයො, මනුස්සා, දෙවා. ඉමා ඛො භික්ඛවෙ පඤ්ච ගතියො.
ඉමාසං ඛො භික්ඛවෙ පඤ්චන්නං ගතීනං පහානාය -පෙ- ඉමෙ චත්තාරො සතිපට්ඨානා භාවෙතබ්බාති.
9. 2. 2. 7.
මච්ඡරිය සතිපට්ඨාන සුත්තං
[සාවත්ථිනිදානං]
පඤ්චිමානි භික්ඛවෙ මච්ඡරියානි. කතමානි පඤ්ච:
ආවාසමච්ඡරියං, කුලමච්ඡරියං, ලාභමච්ඡරියං, වණ්ණමච්ඡරියං, ධම්මමච්ඡරියං. ඉමානි ඛො භික්ඛවෙ පඤ්ච මච්ඡරියානි.
ඉමෙසං ඛො භික්ඛවෙ, පඤ්චන්නං මච්ඡරියානං පහානාය -පෙ- ඉමෙ චත්තාරො සතිපට්ඨානා භාවෙතබ්බාති.
9. 2. 2. 8.
උද්ධම්භාගිය සතිපට්ඨාන සුත්තං
[සාවත්ථිනිදානං]
පඤ්චිමානි භික්ඛවෙ, උද්ධම්භාගියානි සඤ්ඤොජනානි, කතමානි පඤ්ච:
රූපරාගො, අරූපරාගො, මානො, උද්ධච්චං, අවිජ්ජා. ඉමානි ඛො භික්ඛවෙ පඤ්චුද්ධම්භාගියානි සඤ්ඤොජනාති.
ඉමෙසං ඛො භික්ඛවෙ පඤ්චන්නං උද්ධම්භාගියානං සඤ්ඤොජනානං පහානාය -පෙ- ඉමෙ චත්තාරො සතිපට්ඨානා භාවෙතබ්බාති.
9. 2. 2. 9.
චෙතොඛිල සතිපට්ඨාන සුත්තං
[සාවත්ථිනිදානං]
පඤ්චිමෙ භික්ඛවෙ චෙතොඛිලා. කතමෙ පඤ්ච:
ඉධ භික්ඛවෙ, භික්ඛු සත්ථරි කඞ්ඛති විචිකිච්ඡති නාධිමුච්චති න සම්පසීදති. යො සො භික්ඛවෙ භික්ඛු සත්ථරි කඞ්ඛති, විචිකිච්ඡති, නාධිමුච්චති, න සම්පසීදති, තස්ස චිත්තං න නමති ආතප්පාය අනුයොගාය සාතච්චාය පධානාය, යස්ස චිත්තං න නමති ආතප්පාය අනුයොගාය සාතච්චාය පධානාය, අයං පඨමො චෙතොඛිලො.
පුන චපරං භික්ඛවෙ භික්ඛු ධම්මෙ කඞ්ඛති -පෙ- සඞ්ඝෙ කඞ්ඛති -පෙ- සික්ඛාය කඞ්ඛති -පෙ- සබ්රහ්මචාරිසු කුපිතො හොති අනත්තමනො ආහතචිත්තො ඛිල ජාතො. යො සො භික්ඛවෙ භික්ඛු සබ්රහ්මචාරිසු කුපිතො හොති අනත්තමනො ආහතචිත්තො ඛිල ජාතො, තස්ස චිත්තං න නමති ආතප්පාය අනුයොගාය, සාතච්චාය පධානාය. යස්ස චිත්තං න නමති ආතප්පාය අනුයොගාය සාතච්චාය පධානාය, අයං පඤ්චමො චෙතොඛිලො. ඉමෙ ඛො භික්ඛවෙ පඤ්ච චෙතොඛිලා.
ඉමෙසං ඛො භික්ඛවෙ පඤ්චන්නං චෙතොඛිලානං පහානාය -පෙ- ඉමෙ චත්තාරො සතිපට්ඨානා භාවෙතබ්බාති.