9. පුන චපරං සාරිපුත්ත ඉධෙකච්චො පුග්ගලො සීලෙසු පරිපූරකාරී හොති සමාධිස්මිං මත්තසොකාරී පඤ්ඤාය මත්තසොකාරී. සො තිණ්ණං සංයොජනානං පරික්ඛයා සත්තක්ඛත්තුපරමො හොති, සත්තක්ඛත්තුපරමං දෙවෙ ච මානුසෙ ච සන්ධාවිත්වා සංසරිත්වා දුක්ඛස්සන්තං කරොති. අයං සාරිපුත්ත නවමො පුග්ගලො සොපාදිසෙසො කාලං කුරුමානො පරිමුත්තො නිරයා, පරිමුත්තො තිරච්ඡානයොනියා, පරිමුත්තො පෙත්තිවිසයා, පරිමුත්තො අපායදුග්ගතිවිනිපාතා.
කෙ ච සාරිපුත්ත අඤ්ඤතිත්ථියා පරිබ්බාජකා බාලා අබ්යත්තා, කෙ ච සොපාදිසෙසං වා සොපාදිසෙසොති ජානිස්සන්ති. අනුපාදිසෙසං වා අනුපාදිසෙසොති ජානිස්සන්ති.
ඉමෙ ඛො සාරිපුත්ත නව පුග්ගලා සොපාදිසෙසා කාලං කුරුමානා පරිමුත්තා නිරයා, පරිමුත්තා තිරච්ඡානයොනියා, පරිමුත්තා පෙත්තිවිසයා, පරිමුත්තා අපායදුග්ගතිවිනිපාතා. න තාවායං සාරිපුත්ත ධම්මපරියායො පටිභාසි භික්ඛූනං භික්ඛුනීනං උපාසකානං උපාසිකානං. තං කිස්ස හෙතු: මායිමං ධම්මපරියායං සුත්වා පමාදං ආහරිංසූති, අපි ච මයා සාරිපුත්ත ධම්මපරියායො පඤ්හාධිප්පායෙන භාසිතොති.
9. 1. 2. 3.
මහාකොට්ඨිත සුත්තං
[සාවත්ථිනිදානං]
අථ ඛො ආයස්මා මහාකොට්ඨිතො{1} යෙනායස්මා සාරිපුත්තො තෙනුපසඞ්කමි, උපසඞ්කමිත්වා ආයස්මතා සාරිපුත්තෙන සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නො ඛො ආයස්මා මහාකොට්ඨිතො ආයස්මන්තං සාරිපුත්තං එතදවොච:
කින්නුඛො ආවුසො සාරිපුත්ත යං කම්මං දිට්ඨධම්මවෙදනීයං තං මෙ කම්මං සම්පරායවෙදනීයං හොතූති, එතස්ස අත්ථාය භගවති බ්රහ්මචරියං වුස්සතීති? නො හිදං ආවුසො.
කිම්පනාවුසො සාරිපුත්ත යං කම්මං සම්පරායවෙදනීයං, තම්මෙ කම්මං දිට්ඨධම්මවෙදනීයං හොතූති එතස්ස අත්ථාය භගවති බ්රහ්මචරියං වුස්සතීති? නො හිදං ආවුසො.
කින්නුඛො ආවුසො සාරිපුත්ත යං කම්මං සුඛවෙදනියං, තං මෙ කම්මං සුඛවෙදනියං{2} හොතූති එතස්ස අත්ථාය භගවති බ්රහ්මචරියං වුස්සතීති? නො හිදං ආවුසො.
කින්නු ඛො ආවුසො සාරිපුත්ත යං කම්මං දුක්ඛවෙදනීයං, තං මෙ කම්මං සුඛවෙදනීයං හොතූති එතස්ස අත්ථාය භගවති බ්රහ්මචරියං වුස්සතීති? නො හිදං ආවුසො.
කින්නුඛො කින්නු ඛො ආවුසො සාරිපුත්ත යං කම්මං පරිපක්කවෙදනියං, තං මෙ කම්මං අපරිපක්කවෙදනීයං හොතූති එතස්ස අත්ථාය භගවති බ්රහ්මචරියං වුස්සතීති? නො හිදං ආවුසො.
කිම්පන ආවුසො සාරිපුත්ත යං කම්මං අපරිපක්කවෙදනියං, තං මෙ කම්මං පරිපක්කවෙදනීයං හොතූති එතස්ස අත්ථාය භගවති බ්රහ්මචරියං වුස්සතීති? නො හිදං ආවුසො.
කින්නු ඛො ආවුසො සාරිපුත්ත යං කම්මං බහුවෙදනියං, තං මෙ කම්මං අප්පවෙදනියං හොතූති එතස්ස අත්ථාය භගවති බ්රහ්මචරියං වුස්සතීති? නො හිදං ආවුසො.
කිම්පනාවුසො සාරිපුත්ත, යං කම්මං අප්ප වෙදනියං තං මෙ කම්මං බහුවෙදනියං හොතූති එතස්ස අත්ථාය භගවති බ්රහ්මචරියං වුස්සතීති? නො හිදං ආවුසො.
කින්නුඛො ආවුසො සාරිපුත්ත, යං කම්මං වෙදනියං තං මෙ කම්මං අවෙදනියං හොතූති එතස්ස අත්ථාය භගවති බ්රහ්මචරියං වුස්සතීති? නො හිදං ආවුසො.
කිම්පනාවුසො ආවුසො සාරිපුත්ත, යං කම්මං අවෙදනියං තං මෙ කම්මං වෙදනියං හොතූති එතස්ස අත්ථාය භගවති බ්රහ්මචරියං වුස්සතීති? නො හිදං ආවුසො.
කින්නුඛො ආවුසො සාරිපුත්ත, යං කම්මං දිට්ඨධම්මවෙදනීයං තං මෙ කම්මං සම්පරායවෙදනියං හොතූති එතස්ස අත්ථාය භගවති බ්රහ්මචරියං වුස්සතීති ඉති පුට්ඨො සමානො නො හිදං ආවුසොති වදෙසි.
කින්නු ඛො ආවුසො සාරිපුත්ත, යං කම්මං සම්පරාය වෙදනියං තං මෙ කම්මං දිට්ඨධම්මවෙදනීයං හොතූති එතස්ස අත්ථාය භගවති බ්රහ්මචරියං වුස්සතීති ඉති පුට්ඨො සමානො නො හිදං ආවුසොති වදෙසි.
කින්නුඛො ආවුසො සාරිපුත්ත, යං කම්මං සුඛවෙදනීයං තං මෙ කම්මං සුඛවෙදනීයං{1} හොතූති එතස්ස අත්ථාය භගවති බ්රහ්මචරියං වුස්සතීති ඉති පුට්ඨො සමානො නො හිදං ආවුසොති වදෙසි.
කින්නුඛො ආවුසො සාරිපුත්ත, යං කම්මං දුක්ඛවෙදනියං තං මෙ කම්මං සුඛවෙදනියං හොතූති එතස්ස අත්ථාය භගවති බ්රහ්මචරියං වුස්සතීති ඉති පුට්ඨො සමානො නො හිදං ආවුසොති වදෙසි.
කින්නුඛො ආවුසො සාරිපුත්ත, යං කම්මං පරිපක්කවෙදනියං තං මෙ කම්මං අපරිපක්කවෙදනියං හොතූති එතස්ස අත්ථාය භගවති බ්රහ්මචරියං වුස්සතීති ඉති පුට්ඨො සමානො නො හිදං ආවුසොති වදෙසි.
කින්නු ඛො ආවුසො සාරිපුත්ත, යං කම්මං අපරිපක්කවෙදනියං තං මෙ කම්මං පරිපක්කවෙදනියං හොතූති එතස්ස අත්ථාය භගවති බ්රහ්මචරියං වුස්සතීති ඉති පුට්ඨො සමානො නො හිදං ආවුසොති වදෙසි.
කින්නුඛො ආවුසො සාරිපුත්ත, යං කම්මං බහුවෙදනියං තං මෙ කම්මං අප්පවෙදනියං හොතූති එතස්ස අත්ථාය භගවති බ්රහ්මචරියං වුස්සතීති ඉති පුට්ඨො සමානො නො හිදං ආවුසොති වදෙසි.
කින්නුඛො ආවුසො සාරිපුත්ත, යං කම්මං අප්පවෙදනියං තං මෙ කම්මං බහුවෙදනියං හොතූති එතස්ස අත්ථාය භගවති බ්රහ්මචරියං වුස්සතීති ඉති පුට්ඨො සමානො නො හිදං ආවුසොති වදෙසි.
කින්නු ඛො ආවුසො සාරිපුත්ත, යං කම්මං වෙදනීයං තං මෙ කම්මං අවෙදනීයං හොතූති එතස්ස අත්ථාය භගවති බ්රහ්මචරියං වුස්සතීති ඉති පුට්ඨො සමානො නොහිදං ආවුසොති වදෙසි.
කින්නු ඛො ආවුසො සාරිපුත්ත, යං කම්මං අවෙදනියං තං මෙ කම්මං වෙදනියං හොතූති එතස්ස අත්ථාය භගවති බ්රහ්මචරියං වුස්සතීති ඉති පුට්ඨො සමානො නො හිදං ආවුසොති වදෙසි. අථ කිමත්ථං චරහාවුසො, භගවති බ්රහ්මචරියං වුස්සතීති?
යං ඛ්වස්සාවුසො,{1} අඤ්ඤාතං අදිට්ඨං අප්පත්තං අසච්ඡිකතං අනභිසමෙතං, තස්ස ඤාණාය දස්සනාය පත්තියා සච්ඡිකිරියාය අභිසමාය භගවති බ්රහ්මචරියං වුස්සතීති.
කිම්පනස්සාවුසො, අඤ්ඤාතං අදිට්ඨං අප්පත්තං අසච්ඡිකතං අනභිසමෙතං යස්ස ඤාණාය දස්සනාය පත්තියා සච්ඡිකිරියාය අභිසමාය භගවති බ්රහ්මචරියං වුස්සතීති?
ඉදං දුක්ඛන්ති ඛ්වස්ස ආවුසො අඤ්ඤාතං අදිට්ඨං අප්පත්තං අසච්ඡිකතං අනභිසමෙතං. තස්ස ඤාණාය දස්සනාය පත්තියා සච්ඡිකිරියාය අභිසමාය භගවති බ්රහ්මචරියං වුස්සතීති. අයං දුක්ඛසමුදයොති ඛ්වස්ස ආවුසො -පෙ- අයං දුක්ඛනිරොධොති ඛ්වස්ස ආවුසො -පෙ- අයං දුක්ඛනිරොධගාමිනීපටිපදාති ඛ්වස්ස ආවුසො. අඤ්ඤාතං අදිට්ඨං අප්පත්තං අසච්ඡිකතං අනභිසමෙතං. තස්ස ඤාණාය දස්සනාය පත්තියා සච්ඡිකිරියාය අභිසමාය භගවති බ්රහ්මචරියං වුස්සතීති, ඉදං ඛ්වස්ස ආවුසො අඤ්ඤාතං අදිට්ඨං අප්පත්තං අසච්ඡිකතං අනභිසමෙතං. තස්ස ඤාණාය දස්සනාය පත්තියා සච්ඡිකිරියාය අභිසමාය භගවති බ්රහ්මචරියං වුස්සතීති.
9. 1. 2. 4.
සමිද්ධි සුත්තං
[සාවත්ථිනිදානං]
අථ ඛො ආයස්මා සමිද්ධි යෙනායස්මා සාරිපුත්තො තෙනුපසඞ්කමි. උපසඞ්කමිත්වා ආයස්මන්තං සාරිපුත්තං අභිවාදෙත්වා එකමන්තං නිසීදි. එකමන්තං නිසින්නං ඛො ආයස්මන්තං සමිද්ධිං ආයස්මා සාරිපුත්තො එතදවොච:
‘කිමාරම්මණා සමිද්ධි, පුරිසස්ස සඞ්කප්පවිතක්කා උප්පජ්ජන්තීති? නාමරූපාරම්මණා භන්තෙති.
තෙ පන සමිද්ධි, ක්ව නානත්තං ගච්ඡන්තීති? ධාතුසු භන්තෙති.
තෙ පන සමිද්ධි, කිං සමුදයාති? ඵස්සසමුදයා භන්තෙති.
තෙ පන සමිද්ධි, කිං සමොසරණාති? වෙදනා සමොසරණා භන්තෙති.
තෙ පන සමිද්ධි, කිං පමුඛාති? සමාධිපමුඛා භන්තෙති.
තෙ පන සමිද්ධි, කිං ආධිපතෙය්යාති? සතාධිපතෙය්යා භන්තෙති.
තෙ පන සමිද්ධි, කිමුත්තරාති? පඤ්ඤුත්තරා භන්තෙති.
තෙ පන සමිද්ධි, කිං සාරාති? විමුත්තිසාරා භන්තෙති.
තෙ පන සමිද්ධි කිං ඔගධාති? අමතොගධා භන්තෙති.
කිමාරම්මණා සමිද්ධි, පුරිසස්ස සඞ්කප්පවිතක්කා උප්පජ්ජන්තීති? ඉති පුට්ඨො සමානො නාමරූපාරම්මණා භන්තෙති වදෙසි.
තෙ පන සමිද්ධි, ක්ව නානත්තං ගච්ඡන්තීති. ඉති පුට්ඨො සමානො ධාතුසු භන්තෙති වදෙසි.
තෙ පන සමිද්ධි, කිංසමුදයාති ඉති පුට්ඨො සමානො ඵස්සසමුදයා භන්තෙති වදෙසි.
තෙ පන සමිද්ධි, කිංසමොසරණාති ඉති පුට්ඨො සමානො වෙදනා සමොසරණා භන්තෙති වදෙසි.
තෙ පන සමිද්ධි, කිංපමුඛාති ඉති පුට්ඨො සමානො සමාධිපමුඛා භන්තෙති වදෙසි.
තෙ පන සමිද්ධි, කිංආධිපතෙය්යාති ඉති පුට්ඨො සමානො සතාධිපතෙය්යා භන්තෙති වදෙසි.
තෙ පන සමිද්ධි, කිංඋත්තරාති ඉති පුට්ඨො සමානො පඤ්ඤුත්තරා භන්තෙති වදෙසි.
තෙ පන සමිද්ධි, කිංසාරාති ඉති පුට්ඨො සමානො විමුත්තිසාරා භන්තෙති වදෙසි.
තෙ පන සමිද්ධි, කිංඔගධාති ඉති පුට්ඨො සමානො අමතොගධා භන්තෙති වදෙසි.
සාධු සාධු සමිද්ධි, සාධු ඛො ත්වං සමිද්ධි, පඤ්හං පුට්ඨො විස්සජ්ජෙසි තෙන ච මා මඤ්ඤීති.
9. 1. 2. 5.
ගණ්ඩොපම සුත්තං
[සාවත්ථිනිදානං]
සෙය්යථාපි භික්ඛවෙ, ගණ්ඩො අනෙකවස්සගණිකො තස්සස්සු නව වණමුඛානි නව අභෙදනමුඛානි, තතො යං කිඤ්චි පග්ඝරෙය්ය අසුචිඤ්ඤෙව පග්ඝරෙය්ය, දුග්ගන්ධඤ්චෙව පග්ඝරෙය්ය, ජෙගුච්ඡියඤ්ඤෙව පග්ඝරෙය්ය. යං කිඤ්චි පසවෙය්ය අසුචිඤ්ඤෙව පසවෙය්ය, දුග්ගන්ධඤ්ඤෙව පසවෙය්ය, ජෙගුච්ඡියඤ්ඤෙව පසවෙය්ය.
’ගණ්ඩො’ති ඛො භික්ඛවෙ, ඉමස්සෙව චාතුම්මහාභූතිකස්ස කායස්ස අධිවචනං මාතාපෙත්තිකසම්භවස්ස ඔදනකුම්මාසූපචයස්ස අනිච්චුච්ඡාදනපරිමද්දන භෙදන විද්ධංසනධම්මස්ස. තස්ස නව වණමුඛානි, නව අභෙදනමුඛානි, තතො යං කිඤ්චි පග්ඝරති අසුචිඤ්ඤෙව පග්ඝරති, දුග්ගන්ධඤ්ඤෙව පග්ඝරති, ජෙගුච්ඡියඤ්ඤෙව පග්ඝරති. යං කිඤ්චි පසවති අසුචිඤ්ඤෙව පසවති, දුග්ගන්ධඤ්ඤෙව පසවති, ජෙගුච්ඡියඤ්ඤෙව පසවති. තස්මාතිහ භික්ඛවෙ ඉමස්මිං කායෙ නිබ්බින්දථාති.
9. 1. 2. 6.
සඤ්ඤා සුත්තං
[සාවත්ථිනිදානං]
නව ඉමා භික්ඛවෙ, සඤ්ඤා භාවිතා බහුලීකතා මහප්ඵලා හොන්ති මහානිංසා අමතොගධා අමතපරියොසානා. කතමා නව?
අසුභසඤ්ඤා, මරණසඤ්ඤා, ආහාරෙ පටික්කූලසඤ්ඤා, සබ්බලොකෙ අනභිරතසඤ්ඤා, අනිච්චසඤ්ඤා, අනිච්චෙ දුක්ඛසඤ්ඤා, දුක්ඛෙ අනත්තසඤ්ඤා, පහානසඤ්ඤා, විරාග සඤ්ඤා. ඉමා ඛො භික්ඛවෙ, නව සඤ්ඤා භාවිතා බහුලීකතා මහප්ඵලා හොන්ති මහානිසංසා අමතොගධා අමතපරියොසානාති.
9. 1. 2. 7.
කුලොපගමන සුත්තං
[සාවත්ථිනිදානං]
නවහි භික්ඛවෙ, අඞ්ගෙහි සමන්නාගතං කුලං අනුපගන්ත්වා වා නාලං උපගන්තුං, උපගන්ත්වා වා නාලං උපනිසීදිතුං{1} කතමෙහි නවහි:
න මනාපෙන පච්චුට්ඨෙන්ති, න මනාපෙන අභිවාදෙන්ති, න මනාපෙන ආසනං දෙන්ති, සන්තමස්ස පරිගූහන්ති, බහුකම්පි ථොකං දෙන්ති, පණීතම්පි ලූඛං දෙන්ති, අසක්කච්චං දෙන්ති නො සක්කච්චං, න උපනිසීදන්ති ධම්මසවණාය, භාසිතස්ස න රසීයන්ති. ඉමෙහි ඛො භික්ඛවෙ, නවහඞ්ගෙහි සමන්නාගතං කුලං අනුපගන්ත්වා වා නාලං උපගන්තුං, උපගන්ත්වා වා නාලං උපනිසීදිතුං.
නවහි භික්ඛවෙ, අඞ්ගෙහි සමන්නාගතං කුලං අනුපගන්ත්වා වා අලං උපගන්තුං, උපගන්ත්වා වා අලං උපනිසීදිතුං. කතමෙහි නවහි:
මනාපෙන පච්චුට්ඨෙන්ති, මනාපෙන අභිවාදෙන්ති, මනාපෙන ආසනං දෙන්ති, සන්තමස්ස න පරිගූහන්ති, බහුකම්පි බහුකං දෙන්ති, පණීතම්පි පණීතං දෙන්ති, සක්කච්චං දෙන්ති නො අසක්කච්චං, උපනිසීදන්නි ධම්මසවණාය, භාසිතස්ස රසීයන්ති.
ඉමෙහි ඛො භික්ඛවෙ, නවහඞ්ගෙහි සමන්නාගතං කුලං අනුපගන්ත්වා වා අලං උපගන්තුං, උපගන්ත්වා වා අලං උපනිසීදිතුන්ති.
9. 1. 2. 8.
නවඞ්ගුපොසථ සුත්තං
[සාවත්ථිනිදානං]
නවහඞ්ගෙහි සමන්නාගතො{1} භික්ඛවෙ උපොසථො උපවුත්ථො මහප්ඵලො හොති මහානිසංසො මහාජුතිකො මහාවිප්ඵාරො. කථං උපවුත්ථො ච භික්ඛවෙ, නවහඞ්ගෙහි සමන්නාගතො උපොසථො මහප්ඵලො හොති මහානිසංසො මහාජුතිකො මහාවිප්ඵාරො:
1. ඉධ භික්ඛවෙ, අරියසාවකො ඉති පටිසඤ්චික්ඛති “යාවජීවං අරහන්තො පාණාතිපාතං පහාය පාණාතිපාතා පටිවිරතා නිහිතදණ්ඩා නිහිතසත්ථා ලජ්ජී දයාපන්නා සබ්බපාණභූතහිතානුකම්පී{2} විහරන්ති. අහම්පජ්ජ ඉමඤ්ච රත්තිං ඉමඤ්ච දිවසං පාණාතිපාතං පහාය පාණාතිපාතා පටිවිරතො නිහිතදණ්ඩො නිහිතසත්ථො ලජ්ජී දයාපන්නො සබ්බපාණභූතහිතානුකම්පී විහරාමි. ඉමානාපඞ්ගෙන අරහතං අනුකරොමි. උපොසථො ච මෙ උපවුත්ථො භවිස්සතී”ති. ඉමිනා පඨමෙනඞ්ගෙන සමන්නාගතො හොති.
2. “යාවජීවං අරහන්තො අදින්නාදානං පහාය අදින්නාදානා පටිවිරතා දින්නාදායී දින්නපාටිකඞ්ඛී අථෙනෙන සුචිභූතෙන අත්තනා විහරන්තී. අහම්පජ්ජ ඉමඤ්ච රත්තිං ඉමඤ්ච දිවසං අදින්නාදානං පහාය -පෙ- උපොසථො ච මෙ උපවුත්ථො භවිස්සතී”ති. ඉමිනා දුතියෙනඞ්ගෙන සමන්නාගතො හොති.
3. “යාවජීවං අරහන්තො අබ්රහ්මචරියං පහාය බ්රහ්මචාරී ආරාචාරී විරතා මෙථුනා ගාමධම්මා. අහම්පජ්ජ -පෙ- උපොසථො ච මෙ උපවුත්ථො භවිස්සතී”ති. ඉමිනා තතියෙනඞ්ගෙන සමන්නාගතො හොති.
4. “යාවජීවං අරහන්තො මුසාවාදං පහාය මුසාවාදා පටිවිරතා සච්චවාදී සච්චසන්ධා ථෙතා පච්චයිකා අවිසංවාදකා ලොකස්ස, අහම්පජ්ජ -පෙ- උපවුත්ථො භවිස්සතී”ති. ඉමිනා චතුත්ථෙනඞ්ගෙන සමන්නාගතො හොති.
5. “යාවජීවං අරහන්තො සුරාමෙරය මජ්ජපමාදට්ඨානං පහාය සුරාමෙරය මජ්ජපමාදට්ඨානා පටිවිරතා. අහම්පජ්ජ -පෙ- උපවුත්ථො භවිස්සතී”ති. ඉමිනා පඤ්චමෙනඞ්ගෙන සමන්නාගතො හොති.
6. “යාවජීවං අරහන්තො එකභත්තිකා රත්තුපරතා විරතා විකාලභොජනා. අහම්පජ්ජ -පෙ- උපවුත්ථො භවිස්සතීති. ඉමිනා ඡට්ඨෙනඞ්ගෙන සමන්නාගතො හොති.
7. “යාවජීවං අරහන්තො නච්චගීතවාදිතවිසූකදස්සනමාලාගන්ධවිලෙපනධාරණමණ්ඩනවිභූසනට්ඨානා පටිවිරතා. අහම්පජ්ජ -පෙ- උපවුත්ථො භවිස්සතී ති. ඉමිනා සත්තමෙනඞ්ගෙන සමන්නාගතො හොති.
8. “යාවජීවං අරහන්තො උච්චාසයනමහාසයනං පහාය උච්චාසයනමහාසයනා පටිවිරතා නීචසෙය්යං කප්පෙන්ති මඤ්චකෙ වා තිණසන්ථාරකෙ වා අහම්පජ්ජ -පෙ- උපවුත්ථො භවිස්සතී”ති. ඉමිනා අට්ඨමෙනඞ්ගෙන සමන්නාගතො හොති.
9. ඉධ භික්ඛවෙ, අරියසාවකො මෙත්තාසහගතෙන චෙතසා එකං දිසං ඵරිත්වා විහරති තථා දුතියං -පෙ- තථා තතියං -පෙ- තථා චතුත්ථිං -පෙ- ඉති උද්ධමධො තිරියං සබ්බධි සබ්බත්තතාය සබ්බාවන්තං ලොකං මෙත්තාසහගතෙන චෙතසා විපුලෙන මහග්ගතෙන අප්පමාණෙන අවෙරෙන අබ්යාපජ්ඣෙන ඵරිත්වා විහරති. ඉමිනා නවමෙනඞ්ගෙන සමන්නාගතො හොති.
එවං උපවුත්ථො ඛො භික්ඛවෙ, නවහඞ්ගෙහි සමන්නාගතො උපොසථො මහප්ඵලො හොති මහානිසංසො මහාජුතිකො මහාවිප්ඵාරොති.
9. 1. 2. 9.
දෙවතා සුත්තං
[සාවත්ථිනිදානං]
ඉමං{1} භික්ඛවෙ, රත්තිං සම්බහුලා දෙවතා අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙනාහං තෙනුපසඞ්කමිංසු. උපසඞ්කමිත්වා මං අභිවාදෙත්වා එකමන්තං අට්ඨංසු. එකමන්තං ඨිතා ඛො භික්ඛවෙ, තා දෙවතා මං එතදවොචුං:
උපසඞ්කමිංසු නො භන්තෙ, පුබ්බෙ මනුස්සභූතානං පබ්බජිතා අගාරානි, තා මයං{2} භන්තෙ, පච්චුට්ඨිම්හ, නො ච ඛො අභිවාදිම්හ, තා මයං භන්තෙ, අපරිපුණ්ණකම්මන්තා විප්පටිසාරිනියො පච්ඡානුතාපිනියො{3} හීනං කායං උපපන්නා”ති.
අපරාපි මං භික්ඛවෙ, සම්බහුලා දෙවතා උපසඞ්කමිත්වා එතදවොචුං “උපසඞ්කමිංසු නො භන්තෙ පුබ්බෙ මනුස්සභූතානං පබ්බජිතා අගාරානි තා{2} මයං භන්තෙ පච්චුට්ඨිම්හ, අභිවාදිම්හ{4} නො ච ඛො{5} ආසනං අදම්හ, තා මයං භන්තෙ, අපරිපුණ්ණකම්මන්තා විප්පටිසාරිනියො පච්ඡානුතාපිනියො හීනං කායං උපපන්නා”ති.
අපරාපි මං භික්ඛවෙ, සම්බහුලා දෙවතා උපසඞ්කමිත්වා එතදවොචුං “උපසඞ්කමිංසු නො භන්තෙ, පුබ්බෙ මනුස්සභූතානං පබ්බජිතා අගාරානි, තා මයං භන්තෙ පච්චුට්ඨිම්හ, අභිවාදිම්හ ආසනඤ්ච අදම්හ{6} නො ච ඛො යථාසත්ති යථාබලං සංවිභජිම්හ -පෙ- යථාසත්ති යථාබලං සංවිභජිම්හ. නො ච ඛො උපනිසීදිම්හ ධම්මසවණාය -පෙ- උපනිසීදිම්හ{7} ධම්මසවණාය නො ච ඛො ඔහිතසොතො ධම්මං සුණිම්හ -පෙ- ඔහිතසොතො{8} ධම්මං සුණිම්හ, නො ච සුත්වා ධම්මං ධාරයිම්හ -පෙ- සුත්වා{9} ධම්මං ධාරයිම්හ, නො ච ධතානං{10} ධම්මානං අත්ථං උපපරික්ඛිම්හ -පෙ- ධතානං{11} ධම්මානං අත්ථං උපපරික්ඛිම්හ, නො ච ඛො අත්ථමඤ්ඤාය ධම්මමඤ්ඤාය ධම්මානුධම්මං පටිපජ්ජිම්හ. තා මයං භන්තෙ අපරිපුණ්ණකම්මන්තා විප්පටිසාරිනියො පච්ඡානුතාපිනියො හීනං කායං උපපන්නා”ති.
අපරාපි මං භික්ඛවෙ, සම්බහුලා දෙවතා උපසඞ්කමිත්වා එතදවොචුං:
“උපසඞ්කමිංසු නො භන්තෙ, පුබ්බෙ මනුස්සභූතානං පබ්බජිතා අගාරානි. තා මයං භන්තෙ, පච්චුට්ඨිම්හ, අභිවාදිම්හ, ආසනං අදම්හ, යථාසත්ති යථාබලං සංවිභජිම්හ, උපනිසීදිම්හ ධම්මසවණාය, ඔහිතසොතා ච ධම්මං සුණිම්හ, සුත්වා ච ධම්මං ධාරයිම්හ, ධතානඤ්ච ධම්මානං අත්ථං උපපරික්ඛිම්හ. අත්ථමඤ්ඤාය ධම්මමඤ්ඤාය ධම්මානුධම්මං පටිපජ්ජිම්හ. තා මයං භන්තෙ, පරිපුණ්ණකම්මන්තා අවිප්පටිසාරිනියො අපච්ඡානුතාපිනියො පණීතං කායං උපපන්නා”ති.
එතානි භික්ඛවෙ, රුක්ඛමූලානි එතානි සුඤ්ඤාගාරානි ඣායථ භික්ඛවෙ, මා පමාදත්ථ, මා පච්ඡා විප්පටිසාරිනො අහුවත්ථ, සෙය්යථාපි තා පුරිමිකා දෙවතාති.
9. 1. 2. 10.
වෙලාම සුත්තං
එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ, අථ ඛො අනාථපිණ්ඩිකො ගහපති යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නං ඛො අනාථපිණ්ඩිකං ගහපතිං භගවා එතදවොච:
අපි නු තෙ ගහපති, කුලෙ දානං දීයතීති? දීයති මෙ භන්තෙ, කුලෙ දානං, තඤ්ච ඛො ලූඛං කණාකං බිලඞ්ගදුතියන්ති.
ලූඛඤ්චෙපි{1} ගහපති, දානං දෙති පණීතං වා, තඤ්ච අසක්කච්චං දෙති, අචිත්තීකත්වා{2} දෙති, අසහත්ථා දෙති, අපවිද්ධං{3} දෙති, අනාගමනදිට්ඨිකො දෙති. යත්ථ යත්ථ තස්ස තස්ස දානස්ස විපාකො නිබ්බත්තති, න උළාරාය භත්තභොගාය චිත්තං නමති, න උළාරාය වත්ථභොගාය චිත්තං නමති, න උළාරාය යානභොගාය චිත්තං නමති,න උළාරෙසු පඤ්චසු කාමගුණෙසු භොගාය චිත්තං නමති. යෙපිස්ස තෙ හොන්ති පුත්තාති වා දාරාති වා දාසාති වා පෙස්සාති වා කම්මකරාති වා, තෙපි න සුස්සූසන්ති, න සොතං ඔදාහන්ති, න අඤ්ඤා චිත්තං උපට්ඨපෙන්ති. තං කිස්සහෙතු: එවං හෙතං{4} ගහපති, හොති අසක්කච්චකතානං{5} කම්මානං විපාකො.