අථ ඛො තා දෙවතා න ඛො අය්යො අනුරුද්ධො සාදීයතීති තත්ථෙවන්තරධායිංසු.
අථ ඛො ආයස්මා අනුරුද්ධො සායන්හසමයං පතිසල්ලානා වුට්ඨිතො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා අනුරුද්ධො භගවන්තං එතදවොච:
ඉධාහං භන්තෙ, දිවාවිහාරගතො හොමි පතිසල්ලීනො. අථ ඛො භන්තෙ, සම්බහුලා මනාපකායිකා දෙවතා යෙනාහං තෙනුපසඞ්කමිංසු. උපසඞ්කමිත්වා මං අභිවාදෙත්වා එකමන්තං අට්ඨංසු, එකමන්තං ඨිතා ඛො භන්තෙ, තා දෙවතා මං එතදවොචුං:
මයං භන්තෙ අනුරුද්ධ, මනාපකායිකා නාම දෙවතා, තීසු ඨානෙසු ඉස්සරියං කාරෙම, වසං වත්තෙම, මයං භන්තෙ අනුරුද්ධ යාදිසකං වණ්ණං ආකඞ්ඛාම, තාදිසකං වණ්ණං ඨානසො පටිලභාම, යාදිසකං සරං ආකඞ්ඛාම, තාදිසකං සරං ඨානසො පටිලභාම, යාදිසකං සරං ආකඞ්ඛාම, තාදිසකං සරං ඨානසො පටිලභාම, යාදිසකං සුඛං ආකඞ්ඛාම, තාදිසකං සුඛං ඨානසො පටිලභාම, මයං භන්තෙ අනුරුද්ධ, මනාපකායිකා නාම දෙවතා ඉමෙසු තීසු ඨානෙසු ඉස්සරියං කාරෙම, වසං වත්තෙමාති.
තස්ස මය්හං භන්තෙ එතදහොසි: අහො වතිමා දෙවතා සබ්බාව නීලා අස්සු නීලවණ්ණා නීලවත්ථා නීලාලඞ්කාරාති. අථ ඛො භන්තෙ තා දෙවතා මම චිත්තමඤ්ඤාය සබ්බාව නීලා අහෙසුං නීලවණ්ණා නීලවත්ථා නීලාලඞ්කාරා. තස්ස මයිහං භන්තෙ එතදහොසි: අහො වතිමා දෙවතා සබ්බාව පීතා අස්සු -පෙ- සබ්බාව ලොහිතකා අස්සු -පෙ- සබ්බාව ඔදාතා අස්සු ඔදාතවණ්ණා ඔදාතවත්ථා ඔදාතාලඞ්කාරාති. අථ ඛො භන්තෙ තා දෙවතා මම චිත්තමඤ්ඤාය සබ්බාව ඔදාතා අහෙසුං ඔදාතවණ්ණා ඔදාතවත්ථා ඔදාතාලඞ්කාරා.
අථ ඛො භන්තෙ තා දෙවතා එකා ච ගායි, එකා ච නච්චි, එකා ච අච්ඡරිකං වාදෙසි{1}. සෙය්යථාපි නාම පඤ්චඞ්ගිකස්ස තුරියස්ස සුවිනීතස්ස සුප්පටිපතාළිතස්ස කුසලෙහි සුසමන්නාගතස්ස සද්දො හොති වග්ගු ච රජනීයො ච කමනීයො ච පෙමනීයො ච මදනීයො ච, එවමෙව තාසං දෙවතානං අලඞ්කාරානං සද්දො හොති වග්ගු ච රජනීයො ච කමනීයො ච පෙමනීයො ච මදනීයො ච අථඛ්වාහං භන්තෙ. ඉන්ද්රියානි ඔක්ඛිපිං. අථ ඛො භන්තෙ තා දෙවතා න ඛො අය්යො අනුරුද්ධො සාදියතීති තත්ථෙවන්තරධායිංසු,
කති හි නු ඛො භන්තෙ, ධම්මෙහි සමන්නාගතො මාතුගාමො කායස්ස භෙදා පරම්මරණා මනාපකායිකානං දෙවානං සහව්යතං උපපජ්ජතීති.
අට්ඨහි ඛො අනුරුද්ධ, ධම්මෙහි සමන්නාගතො මාතුගාමො කායස්ස භෙදා පරම්මරණා මනාපකායිකානං දෙවානං සහව්යතං උපපජ්ජති. කතමෙහි අට්ඨහි:
1. ඉධ අනුරුද්ධ, මාතුගාමො යස්ස මාතාපිතරො භත්තුනො දෙන්ති, අත්ථකාමා හිතෙසිනො අනුකම්පකා අනුකම්පං උපාදාය, තස්ස හොති පුබ්බුට්ඨායිනී පච්ඡානිපාතිනී කිඞ්කාරපටිස්සාවිනී මනාපචාරිනී පියවාදිනී.
2. යෙ තෙ භත්තුගරුනො හොන්ති, මාතාති වා පිතාති වා සමණබ්රාහ්මණාති වා තෙ සක්කරොති ගරුකරොති මානෙති පූජෙති අබ්භාගතෙ ච ආසනොදකෙන පටිපූජෙති.
3. යෙ තෙ භත්තු අබ්භන්තරකම්මන්තා උණ්ණාති වා කප්පාසාති වා තත්ථ දක්ඛා හොති අනලසා තත්රූපායාය වීමංසාය සමන්නාගතා අලඞ්කාතුං අලං සංවිධාතුං.
4. යො සො භත්තු අබ්භන්තරො අන්තො ජනො දාසාති වා පෙස්සාති වා කම්මකරාති වා තෙසං කතඤ්ච කතතො ජානාති, අකතඤ්ච අකතතො ජානාති, ගිලානකානඤ්ච බලාබලං ජානාති, ඛාදනීයං භොජනීයඤ්චස්ස පච්චංසෙන{1} සංවිභජති.
5. යං භත්තු ආහරති ධනං වා ධඤ්ඤං වා ජාතරූපං වා තං ආරක්ඛෙන ගුත්තියා සම්පාදෙති තත්ථ ච හොති අධුත්තී අථෙනී අසොණ්ඩී අවිනාසිකා.
6. උපාසිකා ඛො පන හොති බුද්ධං සරණං ගතා, ධම්මං සරණං ගතා, සඞ්ඝං සරණං ගතා.
7. සීලවතී ඛො පන හොති පාණාතිපාතා පටිවිරතා, අදින්නාදානා පටිවිරතා කාමෙසු මිච්ඡාචාරා පටිවිරතා මුසාවාදා පටිවිරතා සුරාමෙරය මජ්ජපමාදට්ඨානා පටිවිරතා.
8. චාගවතී ඛො පන හොති විගතමලමච්ඡෙරෙන චෙතසා අගාරං අජ්ඣාවසති මුත්තචාගා පයතපාණී වොස්සග්ගරතා යාචයොගා දානසංවිභාගරතා. ඉමෙහි ඛො අනුරුද්ධ, අට්ඨහි ධම්මෙහි සමන්නාගතො මාතුගාමො කායස්ස භෙදා පරම්මරණා මනාපකායිකානං දෙවානං සහව්යතං උපපජ්ජති.
1. යො නං භරති සබ්බදා නිච්චං ආතාපී උස්සුකො, තං සබ්බකාමදං{2} පොසං භත්තාරං නාතිමඤ්ඤති.
2. න චාපි සොත්ථි භත්තාරං ඉස්සාවාදෙන රොසයෙ, භත්තු ච ගරුනො සබ්බෙ පතිපූජෙති පණ්ඩිතා.
3. උට්ඨායිකා{3} අනලසා සඞ්ගහීතපරිජ්ජනා, භත්තු මනාපං චරති සම්භතං අනුරක්ඛති.
4. යා එවං වත්තතී නාරී භත්තු ඡන්දවසානුගා, මනාපා නාම තෙ දෙවා{4} යත්ථ සා උපපජ්ජතීති.
8. 1. 5. 7.
විසාඛමනාපකායික සුත්තං
එකං සමයං භගවා සාවත්ථියං විහරති පුබ්බාරාමෙ මිගාරමාතුපාසාදෙ . අථ ඛො විසාඛා මිගාරමාතා -පෙ- එකමන්තං නිසින්නං ඛො විසාඛං මිගාරමාතරං භගවා එතදවොච:
අට්ඨහි ඛො විසාඛෙ, ධම්මෙහි සමන්නාගතො මාතුගාමො කායස්ස භෙදා පරම්මරණා මනාපකායිකානං දෙවානං සහව්යතං උපපජ්ජති. කතමෙහි අට්ඨහි:
ඉධ විසාඛෙ, මාතුගාමො යස්ස මාතාපිතරො භත්තුනො දෙන්ති, අත්ථකාමා හිතෙසිනො අනුකම්පකා අනුකම්පං උපාදාය, තස්ස හොති පුබ්බුට්ඨායිනී පච්ඡානිපාතිනී කිඞ්කාරපටිස්සාවිනී මනාපචාරිනී පියවාදිනී -පෙ- චාගවතී ඛො පන හොති විගතමලමච්ඡෙරෙන චෙතසා අගාරං අජ්ඣාවසති මුත්තචාගා පයතපාණී වොස්සග්ගරතා යාචයොගා දානසංවිභාගරතා. ඉමෙහි ඛො විසාඛෙ, අට්ඨහි ධම්මෙහි සමන්නාගතො මාතුගාමො කායස්ස භෙදා පරම්මරණා මනාපකායිකානං දෙවානං සහව්යතං උපපජ්ජති.
1. යො නං භරති සබ්බදා නිච්චං ආතාපී උස්සුකො, තං සබ්බකාමදං පොසං භත්තාරං නාතිමඤ්ඤති.
2. න චාපි සොත්ථි භත්තාරං ඉස්සාවාදෙන රොසයෙ, භත්තු ච ගරුනො සබ්බෙ පතිපූජෙති පණ්ඩිතා.
3. උට්ඨායිකා අනලසා සඞ්ගහීතපරිජ්ජනා, භත්තු මනාපං චරති සම්භතං අනුරක්ඛති.
4. යා එවං වත්තතී නාරී භත්තු ඡන්දවසානුගා, මනාපා නාම තෙ දෙවා යත්ථ සා උපපජ්ජතීති.
8. 1. 5. 8.
නකුලමාතුමනාපකායික සුත්තං
එකං සමයං භගවා භග්ගෙසු විහරති සුංසුමාරගිරෙ{1} භෙසකලාවනෙ මිගදායෙ. අථ ඛො නකුලමාතා ගහපතානී යෙන භගවා තෙනුපසඞ්කමි, උපසඞ්කමිත්වා -පෙ- එකමන්තං නිසින්නං ඛො නකුලමාතරං ගහපතානිං භගවා එතදවොච:
අට්ඨහි ඛො නකුලමාතෙ, ධම්මෙහි සමන්නාගතො මාතුගාමො කායස්ස භෙදා පරම්මරණා මනාපකායිකානං දෙවානං සහව්යතං උපපජ්ජති. කතමෙහි අට්ඨහි:
1. ඉධ නකුලමාතෙ, මාතුගාමො යස්ස මාතාපිතරො භත්තුනො දෙන්ති, අත්ථකාමා හිතෙසිනො අනුකම්පකා අනුකම්පං උපාදාය. තස්ස හොති පුබ්බුට්ඨායිනී පච්ඡානිපාතිනී කිඞ්කාරපටිස්සාවිනී මනාපචාරිනී පියවාදිනී.
2. යෙ තෙ භත්තු ගරුනො හොන්ති, මාතාති වා පිතාති වා සමණබ්රාහ්මණාති වා තෙ සක්කරොති ගරුකරොති මානෙති පූජෙති අබ්භාගතෙ ච ආසනොදකෙන පටිපූජෙති.
3. යෙ තෙ භත්තු අබ්භන්තරා කම්මන්තා උණ්ණාති වා කප්පාසාති වා තත්ථ දක්ඛා හොති අනලසා තත්රූපායාය වීමංසාය සමන්නාගතා අලඞ්කාතුං අලං සංවිධාතුං.
4. යො සො භත්තු අබ්භන්තරො අන්තො ජනො දාසාති වා පෙස්සාති වා කම්මකරාති වා තෙසං කතඤ්ච කතතො ජානාති, අකතඤ්ච අකතතො ජානාති, ගිලානකානඤ්ච බලාබලං ජානාති, ඛාදනීයං භොජනීයඤ්චස්ස පච්චංසෙන සංවිභජති.
5. යං භත්තා ආහරති ධනං වා ධඤ්ඤං වා රජතං වා ජාතරූපං වා තං ආරක්ඛෙන ගුත්තියා සම්පාදෙති, තත්ථ ච හොති අධුත්තී අථෙනී අසොණ්ඩී අවිනාසිකා.
6. උපාසිකා ඛො පන හොති බුද්ධං සරණං ගතා, ධම්මං සරණං ගතා, සඞ්ඝං සරණං ගතා.
7. සීලවතී ඛො පන හොති පාණාතිපාතා පටිවිරතා -පෙ- සුරාමෙරය මජ්ජපමාදට්ඨානා පටිවිරතා -පෙ-
8. චාගවතී ඛො පන හොති විගතමලමච්ඡෙරෙන චෙතසා අගාරං අජ්ඣාවසති මුත්තචාගා පයතපාණිනී{1} වොස්සග්ගරතා යාචයොගා දානසංවිභාගරතා.
ඉමෙහි ඛො නකුලමාතෙ, අට්ඨහි ධම්මෙහි සමන්නාගතො මාතුගාමො කායස්ස භෙදා පරම්මරණා මනාපකායිකානං දෙවානං සහව්යතං උපපජ්ජතීති.
1. යො නං භරති සබ්බදා නිච්චං ආතාපී උස්සුකො, තං සබ්බකාමදං පොසං භත්තාරං නාතිමඤ්ඤති.
2. න චාපි සොත්ථි භත්තාරං ඉස්සාවාදෙන රොසයෙ, භත්තු ච ගරුනො සබ්බෙ පතිපූජෙති පණ්ඩිතා.
3. උට්ඨායිකා අනලසා සඞ්ගහීතපරිජ්ජනා, භත්තු මනාපං චරති සම්භතං අනුරක්ඛති.
4. යා එවං වත්තතී නාරී භත්තු ඡන්දවසානුගා, මනාපා නාම තෙ දෙවා යත්ථ සා උපපජ්ජතීති.
8. 1. 5. 9.
පඨමලොකවිජය සුත්තං
එකං සමයං භගවා සාවත්ථියං විහරති පුබ්බාරාමෙ මිගාරමාතුපාසාදෙ. අථ ඛො විසාඛා මිගාරමාතා යෙන භගවා තෙනුපසඞ්කමි -පෙ- එකමන්තං නිසින්නං ඛො විසාඛං මිගාරමාතරං භගවා එතදවොච:
චතුහි ඛො විසාඛෙ, ධම්මෙහි සමන්නාගතො මාතුගාමො ඉධලොකවිජයාය පටිපන්නො හොති, අයංසා ලොකො ආරද්ධො හොති. කතමෙහි චතුහි: ඉධ විසාඛෙ, මාතුගාමො සුසංවිහිතකම්මන්තො හොති සඞ්ඝහිතපරිජනා, භත්තු මනාපං චරති, සම්භතං අනුරක්ඛති.
1. කතඤ්ච විසාඛෙ, මාතුගාමො සුසංවිහිතකම්මන්තො හොති: ඉධ විසාඛෙ, මාතුගාමො යෙ තෙ භත්තු අබ්භන්තරා කම්මන්තා උණ්ණාති වා කප්පාසාති වා, තත්ථ දක්ඛා හොති අනලසා, තත්රූපායාය වීමංසාය සමන්නාගතා අලං කාතුං අලං සංවිධාතුං. එවං ඛො විසාඛෙ, මාතුගාමො සුසංවිහිතකම්මන්තො හොති.
2. කථඤ්ච විසාඛෙ මාතුගාමො සඞ්ගහිතපරිජනො හොති, ඉධ විසාඛෙ මාතුගාමො යො සො භත්තු අබ්භන්තරො අන්තොජනො දාසාති වා පෙස්සාති වා කම්මකරාති වා, තෙසං කතඤ්ච කතතො ජානාති. අකතඤ්ච අකතතො ජානාති, ගිලානකානඤ්ච බලාබලං ජානාති, ඛාදනීයභොජනීයඤ්චස්ස පච්චංසෙන සංවිභජති. එවං ඛො විසාඛෙ,මාතුගාමො සඞ්ගහිතපරිජනො හොති.
3. කතඤ්ච විසාඛෙ, මාතුගාමො භත්තු මනාපං චරති, ඉධ විසාඛෙ, මාතුගාමො යං භත්තු අමනාපසඞ්ඛාතං, තං ජීවිතහෙතුපි න අජ්ඣාචරති. එවං ඛො විසාඛෙ, මාතුගාමො භත්තු මනාපං චරති.
4. කථඤ්ච විසාඛෙ මාතුගාමො සම්භතං අනුරක්ඛති, ඉධ විසාඛෙ, මාතුගාමො යං භත්තා ආහරති, ධනං වා ධඤ්ඤං වා රජතං වා ජාතරූපං වා, තං ආරක්ඛෙන ගුත්තියා සම්පාදෙති. තත්ථ ච හොති අධුත්තී අථෙනී අසොණ්ඩී අවිනාසිකා, එවං ඛො විසාඛෙ, මාතුගාමො සම්භතං අනුරක්ඛති. ඉමෙහි ඛො විසාඛෙ, චතුහි ධම්මෙහි සමන්නාගතො මාතුගාමො ඉධ ලොකවිජයාය පටිපන්නො හොති, අයංසා ලොකො{1} ආරද්ධො හොති.
චතුහි ඛො විසාඛෙ, ධම්මෙහි සමන්නාගතො මාතුගාමො පරලොකවිජයාය පටිපන්නො හොති, පරස්සාලොකො ආරද්ධො හොති. කතමෙහි චතුහි: ඉධ විසාඛෙ, මාතුගාමො සද්ධා සම්පන්නො හොති සීලසම්පන්නො හොති, චාගසම්පන්නො හොති, පඤ්ඤාසම්පන්නො හොති.
5. කථඤ්ච විසාඛෙ මාතුගාමො සද්ධාසම්පන්නො හොති, ඉධ විසාඛෙ, මාතුගාමො සද්ධො හොති, සද්දහති තථාගතස්ස බොධිං ඉතිපි සො භගවා අරහං සම්මාසම්බුද්ධො විජ්ජාචරණසම්පන්නො සුගතො ලොකවිදූ අනුත්තරො පුරිසදම්මසාරථී සත්ථා දෙවමනුස්සානං බුද්ධො භගවාති. එවං ඛො විසාඛෙ, මාතුගාමො සද්ධාසම්පන්නො හොති.
6. කථඤ්ච විසාඛෙ, මාතුගාමො සීලසම්පන්නො හොති: ඉධ විසාඛෙ මාතුගාමො පාණාතිපාතා පටිවිරතො හොති -පෙ- සුරාමෙරය මජ්ජපමාදට්ඨානා පටිවිරතො හොති. එවං ඛො විසාඛෙ, මාතුගාමො සීල සම්පන්නො හොති.
7. කථඤ්ච විසාඛෙ, මාතුගාමො චාගසම්පන්නො හොති: ඉධ විසාඛෙ මාතුගාමො විගතමලමච්ඡෙරෙන චෙතසා අගාරං අජ්ඣාවසතී මුත්තාචාගා පයතපාණී{1} වොස්සග්ගරතා යාචයොගා දානසංවිභාගරතා. එවං ඛො විසාඛෙ, මාතුගාමො චාගසම්පන්නො හොති.
8. කථඤ්ච විසාඛෙ, මාතුගාමො පඤ්ඤාසම්පන්නො හොති: ඉධ විසාඛෙ, මාතුගාමො පඤ්ඤවා හොති -පෙ- එවං ඛො විසාඛෙ, මාතුගාමො පඤ්ඤාසම්පන්නො හොති. ඉමෙහි ඛො විසාඛෙ, චතුහි ධම්මෙහි සමන්නාගතො මාතුගාමො පරලොකවිජයාය පටිපන්නො හොති, පරස්සා ලොකො{2} ආරද්ධො හොතීති.
1. සුසංවිහිතකම්මන්තා සඞ්ගහීතපරිජ්ජනා භත්තු මනාපං චරති සම්භතං අනුරක්ඛති.
2. සද්ධා සීලෙන සම්පන්නා වදඤ්ඤූ වීතමච්ඡරා, නිච්චං මග්ගං විසොධෙති සොත්ථානං සම්පරායිකං
3. ඉච්චෙතෙ අට්ඨ ධම්මා ච යස්සා විජ්ජන්ති නාරියා, තම්පි සීලවතිං ආහු ධම්මට්ඨං සච්චවාදිනිං.
4. සොළසාකාරසම්පන්නා අට්ඨඞ්ගසුසමාගතා, සා තාදිසී සීලවතී උපාසිකා උපපජ්ජති දෙවලොකං මනාපං
8. 1. 5. 10.
දුතියලොකවිජය සුත්තං
[සාවත්ථිනිදානං]
චතුහි භික්ඛවෙ, ධම්මෙහි සමන්නාගතො මාතුගාමො ඉධ ලොකවිජයාය පටිපන්නො හොති, අයංසා ලොකො ආරද්ධො හොති. කතමෙහි චතුහි:
ඉධ භික්ඛවෙ මාතුගාමො සුසංවිහිතකම්මන්තො හොති සඞ්ගහීතපරිජනො, භත්තු මනාපං චරති, සම්භතං අනුරක්ඛති.
1. කතඤ්ච භික්ඛවෙ, මාතුගාමො සුසංවිහිතකම්මන්තො හොති: ඉධ භික්ඛවෙ, මාතුගාමො යෙ තෙ භත්තු අබ්භන්තරා කම්මන්තා -පෙ- එවං ඛො භික්ඛවෙ, මාතුගාමො සුසංවිහිතකම්මන්තො හොති.
2. කථඤ්ච භික්ඛවෙ, මාතුගාමො සඞ්ගහීතපරිජනො හොති, ඉධ භික්ඛවෙ මාතුගාමො යො සො භත්තු අබ්භන්තරො අන්තොජනො -පෙ- එවං ඛො භික්ඛවෙ, මාතුගාමො සඞ්ගහීතපරිජනො හොති.
3. කතඤ්ච භික්ඛවෙ, මාතුගාමො භත්තු මනාපං චරති, ඉධ භික්ඛවෙ, මාතුගාමො යං භත්තු අමනාප සඞ්ඛාතං, තං ජීවිතහෙතුපි න අජ්ඣාචරති. එවං ඛො භික්ඛවෙ, මාතුගාමො භත්තු මනාපං චරති.
4. කථඤ්ච භික්ඛවෙ, මාතුගාමො සම්භතං අනුරක්ඛති, ඉධභික්ඛවෙ මාතුගාමො යං භත්තා ආහරති -පෙ- එවං ඛො භික්ඛවෙ, මාතුගාමො සම්භතං අනුරක්ඛති. ඉමෙහි ඛො භික්ඛවෙ, චතුහි ධම්මෙහි සමන්නාගතො මාතුගාමො ඉධ ලොකවිජයායපටිපන්නා හොති, අයංසා ලොකො ආරද්ධො හොති.
චතුහි භික්ඛවෙ, ධම්මෙහි සමන්නාගතො මාතුගාමො පරලොකවිජයාය පටිපන්නො හොති. පරස්සාලොකො ආරද්ධො හොති. කතමෙහි චතුහි:
ඉධ භික්ඛවෙ, මාතුගාමො සද්ධාසම්පන්නො හොති, සීලසම්පන්නො හොති, චාගසම්පන්නො හොති, පඤ්ඤාසම්පන්නො හොති.
5. කථඤ්ච භික්ඛවෙ මාතුගාමො සද්ධාසම්පන්නො හොති, ඉධ භික්ඛවෙ, මාතුගාමො සද්ධො හොති -පෙ- එවං ඛො භික්ඛවෙ මාතුගාමො සද්ධාසම්පන්නො හොති.
6. කථඤ්ච භික්ඛවෙ, මාතුගාමො සීලසම්පන්නො හොති: ඉධ භික්ඛවෙ මාතුගාමො පාණාතිපාතා පටිවිරතා හොති -පෙ- සුරාමෙරය මජ්ජපමාදට්ඨානා පටිවිරතො හොති -පෙ- එවං ඛො භික්ඛවෙ, මාතුගාමො සීලසම්පන්නො හොති.
7. කථඤ්ච භික්ඛවෙ, මාතුගාමො චාගසම්පන්නො හොති: ඉධ භික්ඛවෙ, මාතුගාමො විගතමලමච්ඡෙරෙන චෙතසා අගාරං අජ්ඣාවසති -පෙ- එවං ඛො භික්ඛවෙ, මාතුගාමො චාගසම්පන්නො හොති.
8. කථඤ්ච භික්ඛවෙ, මාතුගාමො පඤ්ඤාසම්පන්නො හොති: ඉධ භික්ඛවෙ, මාතුගාමො පඤ්ඤවා හොති -පෙ- එවං ඛො භික්ඛවෙ, මාතුගාමො පඤ්ඤාසම්පන්නො හොති.
ඉමෙහි ඛො භික්ඛවෙ, චතුහි ධම්මෙහි සමන්නාගතො මාතුගාමො පරලොකවිජයාය පටිපන්නො හොති. පරස්ස ලොකො ආරද්ධො හොතීති.
1. සුසංවිහිතකම්මන්තා සඞ්ගහීතපරිජ්ජනා භත්තු මනාපං චරති සම්භතං අනුරක්ඛති.
2. සද්ධා සීලෙන සම්පන්නා වදඤ්ඤූ වීතමච්ඡරා, නිච්චං මග්ගං විසොධෙති සොත්ථානං සම්පරායිකං
3. ඉච්චෙතෙ අට්ඨ ධම්මා ච යස්සා විජ්ජන්ති නාරියා, තම්පි සීලවතිං ආහු ධම්මට්ඨං සච්චාවාදිනිං.
4. සොළසාකාරසම්පන්නා අට්ඨඞ්ගසුසමාගතා, සා තාදිසී සීලවතී උපාසිකා උපපජ්ජති දෙවලොකං මනාපං
උපොසථවග්ගො පඤ්චමො.
තත්රුද්දානං:
සඞ්ඛිත්තෙ විත්ථතෙ විසාඛෙ වාසෙට්ඨො බොජ්ඣාය පඤ්චමං අනුරුද්ධ පුන විසාඛෙ නකුලා ඉධ ලොකිකා{1} ද්වෙති.
පඨමො පණ්ණාසකො.{*}
2. දුතියො පණ්ණාසකො
6. ගොතමීවග්ගො
8. 2. 6. 1.
ගොතමී සුත්තං
එකං සමයං භගවා සක්කෙසු විහරති කපිලවත්ථුස්මිං නිග්රොධාරාමෙ. අථ ඛො මහාපජාපතී ගොතමී යෙන භගවා තෙනුපසඞ්කමි, උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො මහාපජාපතී ගොතමී භගවන්තං එතදවොච:
සාධු භන්තෙ, ලභෙය්ය මාතුගාමො තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජන්ති.
අලං ගොතමී, මා තෙ රුච්චි මාතුගාමස්ස තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජාති.
දුතියම්පි ඛො මහාපජාපතී ගොතමී භගවන්තං එතදවොච: සාධු භන්තෙ, ලභෙය්ය මාතුගාමො තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජන්ති.
අලං ගොතමි, මා තෙ රුච්චි, මාතුගාමස්ස තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජාති.
තතියම්පි ඛො මහාපජාපතී ගොතමී භගවන්තං එතදවොච: සාධු භන්තෙ, ලභෙය්ය මාතුගාමො තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජන්ති.
අලං ගොතමි, මා තෙ රුච්චි, මාතුගාමස්ස තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජාති.
අථ ඛො මහාපජාපතී ගොතමී න භගවා අනුජානාති මාතුගාමස්ස තථාගතප්පවෙදිතෙ ධම්මවිනයෙ අගාරස්මා අනගාරියං පබ්බජ්ජන්ති දුක්ඛී දුම්මනා අස්සුමුඛී රුදමානා භගවන්තං අභිවාදෙත්වා පදක්ඛිණං කත්වා පක්කාමි.
අථ ඛො භගවා කපිලවත්ථුස්මිං යථාභිරන්තං විහරිත්වා යෙන වෙසාලී තෙන චාරිකං පක්කාමි. අනුපුබ්බෙන චාරිකං චරමානො යෙන වෙසාලී තදවසරි. තත්ර සුදං භගවා වෙසාලියං විහරති මහාවනෙ කූටාගාරසාලායං.