අථ ඛො භගවා ආයස්මන්තං අනුරුද්ධං ඉමිනා ඔවාදෙන ඔවදිත්වා සෙය්යථාපි නාම බලවා පුරිසො සම්මිඤ්ජිතං වා බාහං පසාරෙය්ය පසාරිතං වා බාහං සම්මිඤ්ජෙය්ය, එවමෙව චෙතීසු පාචීනවංසදායෙ අන්තරහිතො භග්ගෙසු සුංසුමාරගිරෙ භෙසකලාවනෙ මිගදායෙ පාතුරහොසි. නිසීදි භගවා පඤ්ඤත්තෙ ආසනෙ. නිසජ්ජ ඛො භගවා භික්ඛු ආමන්තෙසි: අට්ඨ ඛො භික්ඛවෙ, මහාපුරිසවිතක්කෙ දෙසිස්සාමි, තං සුණාථ සාධුකං මනසි කරොථ භාසිස්සාමීති. එවම්භන්තෙති ඛො තෙ භික්ඛු භගවතො පච්චස්සොසුං භගවා එතදවොච:
කතමෙ ච භික්ඛවෙ, අට්ඨ මහා පුරිසවිතක්කා:
අප්පිච්ඡස්සායං භික්ඛවෙ, ධම්මො නායං ධම්මො මහිච්ඡස්ස; සන්තුට්ඨස්සායං භික්ඛවෙ ධම්මො නායං ධම්මො අසන්තුට්ඨස්ස; පවිවිත්තස්සායං භික්ඛවෙ, ධම්මො නායං ධම්මො සඞ්ගණිකාරාමස්ස. ආරද්ධවිරියස්සායං භික්ඛවෙ, ධම්මො නායං ධම්මො කුසීතස්ස, උපට්ඨිතසතිස්සායං භික්ඛවෙ, ධම්මො නායං ධම්මො මුට්ඨස්සතිස්ස. සමාහිතස්සායං භික්ඛවෙ, ධම්මො නායං ධම්මො අසමාහිතස්ස. පඤ්ඤවතො අයං භික්ඛවෙ, ධම්මො නායං ධම්මො දුප්පඤ්ඤස්ස, නිප්පපඤ්චාරාමස්සායං භික්ඛවෙ, ධම්මො නිප්පපඤ්චරතිනො නායං ධම්මො පපඤ්චාරාමස්ස පපඤ්චරතිනො.
1. අප්පිච්ඡස්සායං භික්ඛවෙ, ධම්මො නායං ධම්මො මහිච්ඡස්සා’ති ඉති ඛො පනෙතං වුත්තං කිඤ්චෙතං පටිච්ච වුත්තං: ඉධ භික්ඛවෙ භික්ඛු අප්පිච්ඡො සමානො අප්පිච්ඡොති මං ජානෙය්යුන්ති න ඉච්ඡති, සන්තුට්ඨො සමානො සන්තුට්ඨොති මං ජානෙය්යුන්ති න ඉච්ඡති, පවිවිත්තො සමානො පවිවිත්තොති මං ජානෙය්යුන්ති න ඉච්ඡති, ආරද්ධවිරියො සමානො ආරද්ධවිරියොති මං ජානෙය්යුන්ති න ඉච්ඡති, උපට්ඨිතසති සමානො උපට්ඨිතසතීති මං ජානෙය්යුන්ති න ඉච්ඡති, සමාහිතො සමානො සමාහිතොති මං ජානෙය්යුන්ති න ඉච්ඡති, පඤ්ඤවා සමානො පඤ්ඤවාති මං ජානෙය්යුන්ති න ඉච්ඡති, නිප්පපඤ්චාරාමො සමානො නිප්පපඤ්ඤාරාමොති මං ජානෙය්යුන්ති න ඉච්ඡති. ‘අප්පිච්ඡස්සායං ධම්මො නායං ධම්මො මහිච්ඡස්සා’ ති ඉති යං තං වුත්තං ඉදමෙතං පටිච්ච වුත්තං.
2. ‘සන්තුට්ඨස්සායං භික්ඛවෙ, ධම්මො, නායං ධම්මො අසන්තුට්ඨස්සා’ ති ඉති ඛො පනෙතං වුත්තං කිඤ්චෙතං පටිච්ච වුත්තං: ඉධ භික්ඛවෙ, භික්ඛු සන්තුට්ඨො හොති ඉතරීතරචීවරපිණ්ඩපාතසෙනාසනගිලානපච්චයභෙසජ්ජපරික්ඛාරෙන, ‘සන්තුට්ඨස්සායං භික්ඛවෙ, ධම්මො නායං ධම්මො අසට්ඨන්තුස්සා’ ති ඉති යං තං වුත්තං ඉදමෙතං පටිච්ච වුත්තං.
3. ‘පවිවිත්තස්සායං භික්ඛවෙ, ධම්මො, නායං ධම්මො සඞ්ගණිකාරාමස්සා’ ති ඉති ඛො පනෙතං වුත්තං කිඤ්චෙතං පටිච්ච වුත්තං: ඉධ භික්ඛවෙ, භික්ඛුනො පවිවිත්තස්ස විහරතො භවන්ති උපසඞ්කමිතාරො භික්ඛු භික්ඛුනියො, උපාසකා උපාසිකායො රාජානො රාජමහාමත්තා තිත්ථියා තිත්ථියසාවකා. තත්ර භික්ඛු විවෙකනින්නෙන චිත්තෙන විවෙකපොණෙන විවෙකපබ්භාරෙන වවකට්ඨෙන නෙක්ඛම්මාභිරතෙන අඤ්ඤදත්ථු උය්යොජනිකපටිසංයුත්තංයෙව කථං කත්තා හොති. ‘පවිවිත්තස්සායං භික්ඛවෙ, ධම්මො නායං ධම්මො සඞ්ගණිකාරාමස්සා’ති ඉති යං තං වුත්තං ඉදමෙතං පටිච්ච වුත්තං.
4. ‘ආරද්ධවිරියස්සායං භික්ඛවෙ, ධම්මො නායං ධම්මො කුසීතස්සා’ති ඉති ඛො පනෙතං වුත්තං කිඤ්චෙතං පටිච්ච වුත්තං: ඉධ භික්ඛවෙ, භික්ඛු ආරද්ධවිරියො විහරති අකුසලානං ධම්මානං පහානාය කුසලානං ධම්මානං උපසම්පදාය ථාමවා දළ්හපරක්කමො අනික්ඛිත්තධුරො කුසලෙසු ධම්මෙසු ‘ආරද්ධවිරියස්සායං භික්ඛවෙ, ධම්මො නායං ධම්මො කුසීතස්සා’ති ඉති යං වුත්තං, ඉදමෙතං පටිච්ච වුත්තං.
5. ‘උපට්ඨිතසතිස්සායං භික්ඛවෙ, ධම්මො නායං ධම්මො මුට්ඨස්සතිස්සා’ති ඉති ඛො පනෙතං වුත්තං, කිඤ්චෙතං පටිච්ච වුත්තං: ඉධ භික්ඛවෙ, භික්ඛු සතිමා හොති පරමෙන සතිනෙපක්කෙන සමන්නාගතො චිරකතම්පි චිරභාසිතම්පි සරිතා අනුස්සරිතා. ‘උපට්ඨිතසතිස්සායං භික්ඛවෙ, ධම්මො නායං ධම්මො මුට්ඨස්සතිස්සා’ති ඉති යන්තං වුත්තං, ඉදමෙතං පටිච්ච වුත්තං.
6. ‘සමාහිතස්සායං භික්ඛවෙ, ධම්මො නායං ධම්මො අසමාහිතස්සා’ ති ඉති ඛො පනෙතං වුත්තං, කිඤ්චෙතං පටිච්ච වුත්තං: ඉධ භික්ඛවෙ, භික්ඛු විවිච්චෙව කාමෙහි -පෙ- චතුත්ථං ඣානං උපසම්පජ්ජ විහරති. ‘සමාහිතස්සායං භික්ඛවෙ, ධම්මො නායං ධම්මො අසමාහිතස්සා’ ති ඉති යන්තං වුත්තං, ඉදමෙතං පටිච්ච වුත්තං.
7. ‘පඤ්ඤවතො අයං භික්ඛවෙ, ධම්මො නායං ධම්මො දුප්පඤ්ඤස්සා’ති ඉති ඛො පනෙතං වුත්තං, කිඤ්චෙතං පටිච්ච වුත්තං: ඉධ භික්ඛවෙ, භික්ඛු පඤ්ඤවා හොති උදයත්ථගාමිනියා පඤ්ඤාය සමන්නාගතො අරියාය නිබ්බෙධිකාය සම්මාදුක්ඛක්ඛයගාමිනියා. ‘පඤ්ඤවතො අයං භික්ඛවෙ, ධම්මො නායං ධම්මො දුප්පඤ්ඤස්සා’ ති ඉති යං තං වුත්තං ඉදමෙතං පටිච්ච වුත්තං.
8. ‘නිප්පපඤ්චාරාමස්සායං භික්ඛවෙ, ධම්මො නිප්පපඤ්චරතිනො නායං ධම්මො පපඤ්චාරාමස්ස පපඤ්චරතිනො’ ති ඉති ඛො පනෙතං වුත්තං, කිඤ්චෙතං පටිච්ච වුත්තං: ඉධ භික්ඛවෙ භික්ඛුනො පපඤ්චනිරොධෙ චිත්තං පක්ඛන්දති පසීදති, සන්තිට්ඨති, විමුච්චති, ‘නිප්පපඤ්චාරාමස්සායං භික්ඛවෙ, ධම්මො නිප්පපඤ්චරතිනො නායං ධම්මො පපඤ්චාරාමස්ස පපඤ්චරතිනො’ති ඉති ඛො පනෙතං වුත්තං, ඉදමෙතං පටිච්ච වුත්තන්ති.
අථ ඛො ආයස්මා අනුරුද්ධො ආයතිකම්පි වස්සාවාසං තත්ථෙව චෙතීසු පාචීනවංසදායෙ විහාසි. අථ ඛො ආයස්මා අනුරුද්ධො එකො වූපකට්ඨො අප්පමත්තො ආතාපී පහිතත්තො විහරන්තො න චිරස්සෙව යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති, තදනුත්තරං බ්රහ්මචරිය පරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහාසි. ඛීණා ජාති වුසිතං බ්රහ්මචරියං කතං කරණීයං නාපරං ඉත්තත්ථායාති අබ්භඤ්ඤාසි.
අඤ්ඤතරො ච පනායස්මා අනුරුද්ධො අරහතං අහොසි. අථ ඛො ආයස්මා අනුරුද්ධො අරහත්තප්පත්තො තායං වෙලායං ඉමා ගාථායො අභාසි.
1. මම සඞ්කප්පමඤ්ඤාය සත්ථා ලොකෙ අනුත්තරො, මනොමයෙන කායෙන ඉද්ධියා උපසඞ්කමි.
2. යථා මෙ අහු සඞ්කප්පො තතො උත්තරි දෙසයී, නිප්පපඤ්චරතො බුද්ධො නිප්පපඤ්චං අදෙසයි.
3. තස්සාහං ධම්මමඤ්ඤාය විහාසිං සාසනෙ රතො, තිස්සො විජ්ජා අනුප්පත්තො කතං බුද්ධස්ස සාසනං.
ගහපතිවග්ගො තතියො.
තස්සුද්දානං:
ද්වෙ උග්ගා ද්වෙ ච හත්ථකා මහානාමෙන ජීවකො, ද්වෙ බලා අක්ඛණා වුත්තා අනුරුද්ධෙන තෙ දසාති.
4. දානවග්ගො
8. 1. 4. 1.
දාන සුත්තං
[සාවත්ථිනිදානං]
අට්ඨිමානි භික්ඛවෙ දානානි. කතමානි අට්ඨ:
ආසජ්ජ දානං දෙති, භයා දානං දෙති, අදාසි මෙති දානං දෙති, දස්සති මෙති දානං දෙති, සාහු දානන්ති දානං දෙති, අහං පචාමි ඉමෙ න පචන්ති න අරහාමි පචන්තො අපචන්තානං දානං අදාතුන්ති දානං දෙති, ඉමං මෙ දානං දදතො කල්යාණො කිත්තිසද්දො අබ්භුග්ගච්ඡතීති දානං දෙති. චිත්තාලඞ්කාරචිත්තපරික්ඛාරත්ථං දානං දෙති, ඉමානි ඛො භික්ඛවෙ අට්ඨ දානානීති.
8. 1. 4. 2.
දුතියදාන සුත්තං
[සාවත්ථිනිදානං]
සද්ධා හිරියං කුසලඤ්ච දානං ධම්මා එතෙ සප්පුරිසානුයාතා, එතං හි මග්ගං දිවියං වදන්තී එතෙහි ගච්ඡති දෙවලොකන්ති.
8. 1. 4. 3.
දානවත්ථු සුත්තං
[සාවත්ථිනිදානං]
අට්ඨිමානි භික්ඛවෙ, දානවත්ථූනි, කතමානි අට්ඨ:
ඡන්දා දානං දෙති, දොසා දානං දෙති, මොහා දානං දෙති, ගරහා දානං දෙති,{1} දින්නපුබ්බං කතපුබ්බං පිතුපිතාමහෙගි නාරහාමි පොරාණං{2} කුලවංසං හාපෙතුන්ති දානං දෙති, ඉමාහං දානං දත්වා කායස්ස භෙදා පරම්මරණා සුගතිං සග්ගං ලොකං උප්පජ්ජිස්සාමීති දානං දෙති, ඉමං මෙ දානං දදතො චිත්තං පසීදති අත්තමනතං සොමනස්සං උපජායතීති දානං දෙති, චිත්තාලඞ්කාරචිත්තපරික්ඛාරත්ථං දානං දෙති. ඉමානි ඛො භික්ඛවෙ අට්ඨ දානවත්ථුනීති.
8. 1. 4. 4.
ඛෙත්තූපම සුත්තං
[සාවත්ථිනිදානං]
අට්ඨඞ්ගසමන්නාගතෙ භික්ඛවෙ, ඛෙත්තෙ බීජං වුත්තං න මහප්ඵලං හොති. න මහස්සාදං න ඵාතියෙය්යාති. කථං අට්ඨඞ්ගසමන්නාගතෙ:
ඉධ භික්ඛවෙ, ඛෙත්තං උන්නාමනින්නාමී ච හොති පාසාණසක්ඛරිල්ලඤ්ච හොති. ඌසරඤ්ච හොති. න ච ගම්භීරසීතං හොති. න ආයසම්පන්නං හොති, න අපායසම්පන්නං හොති, න මාතිකාසම්පන්නං හොති, න මරියාදාසම්පන්නං හොති, එවං අට්ඨඞ්ගසමන්නාගතෙ භික්ඛවෙ ඛෙත්තෙ බීජං වුත්තං න මහප්ඵලං හොති. න මහස්සාදං. න ඵාතියෙය්යාති.
එවමෙව ඛො භික්ඛවෙ අට්ඨඞ්ගසමන්නාගතෙසු සමණබ්රාහ්මණෙසු දානං දින්නං න මහප්ඵලං හොති, න මහානිසංසං න මහාජුතිකං න මහාවිප්ඵාරං. කථං අට්ඨඞ්ගසමන්නාගතෙසු:
ඉධ භික්ඛවෙ, සමණබ්රාහ්මණා මිච්ඡාදිට්ඨිකා හොන්ති මිච්ඡාසඞ්කප්පා මිච්ඡාවාචා මිච්ඡාකම්මන්තා මිච්ඡාආජීවා මිච්ඡාවායාමා මිච්ඡාසතිනො මිච්ඡාසමාධිනො. එවං අට්ඨඞ්ගසමන්නාගතෙසු භික්ඛවෙ සමණබ්රාහ්මණෙසු දානං දින්නං න මහප්ඵලං හොති. න මහානිසංසං න මහාජුතිකං න මහාවිප්ඵාරං.
අට්ඨඞ්ගසමන්නාගතෙ භික්ඛවෙ, ඛෙත්තෙ බීජං වුත්තං මහප්ඵලං හොති මහස්සාදං ඵාතියෙය්යාති. කථං අට්ඨඞ්ගසමන්නාගතෙ:
ඉධ භික්ඛවෙ, ඛෙත්තං අනුන්නාමනින්නාමී ච හොති, අපාසාණසක්ඛරිල්ලඤ්ච හොති, අනුසරඤ්ච හොති. ගම්භීරසීතං හොති, ආයසම්පන්නං හොති, අපායසම්පන්නං හොති, මාතිකාසම්පන්නං හොති, මරියාදාසම්පන්නං හොති, එවං අට්ඨඞ්ගසමන්නාගතෙ භික්ඛවෙ, ඛෙත්තෙ බීජං වුත්තං මහප්ඵලං හොති, මහස්සාදං ඵාතියෙය්යාති.
එවමෙව ඛො භික්ඛවෙ, අට්ඨඞ්ගසමන්නාගතෙසු සමණබ්රාහ්මණෙසු දානං දින්නං මහප්ඵලං හොති මහානිසංසං මහාජුතිකං මහාවිප්ඵාරං. කථං අට්ඨඞ්ගසමන්නාගතෙසු: ඉධ භික්ඛවෙ, සමණබ්රාහ්මණා සම්මාදිට්ඨිකා හොන්ති සම්මාසඞ්කප්පා සම්මාවාචා සම්මාකම්මන්තා සම්මාආජීවා සම්මාවායාමා සම්මාසතිනො සම්මාසමාධිනො. එවං අට්ඨඞ්ගසමන්නාගතෙසු භික්ඛවෙ, සමණබ්රාහ්මණෙසු දානං දින්නං මහප්ඵලං හොති මහානිසංසං මහාජුතිකං මහාවිප්ඵාරන්ති.
1. යථාපි ඛෙත්තෙ සම්පන්නෙ - පවුත්තා බීජසම්පදා, දෙවෙ සම්පාදයන්තම්හි - හොති ධඤ්ඤස්ස සම්පදා
2. අනීති සම්පදා හොති - විරූළ්හී භවති සම්පදා, වෙපුල්ලසම්පදා හොති - ඵලං වෙ හොති සම්පදා.
3. එවං සම්පන්නසීලෙසු - දින්නා භොජනසම්පදා, සම්පදානං උපනෙති - සම්පන්නං හිස්ස තං කතං
4. තස්මා සම්පදමාකඞ්ඛී - සම්පන්නත්ථුධ පුග්ගලො, සම්පන්නපඤ්ඤෙ සෙවෙථ - එවං ඉජ්ඣන්ති සම්පදා.
5. විජ්ජාචරණසම්පන්නො - ලද්ධා චිත්තස්ස සම්පදං, කරොති කම්මසම්පදං - ලභති ච{1} අත්ථසම්පදං.
6. ලොකං ඤත්වා යථාභූතං - පප්පුය්ය දිට්ඨිසම්පදං, වග්ගසම්පදමාගම්ම - යාති සම්පන්නමානසො.
7. ඔධුනිත්වා මලං සබ්බං - පත්වා නිබ්බාන සම්පදං, මුච්චති සබ්බදුක්ඛෙහි - සා හොති සබ්බසම්පදා.
8. 1. 4. 5.
දානූපපත්ති සුත්තං
[සාවත්ථිනිදානං]
අට්ඨිමා භික්ඛවෙ දානූපපත්තියො කතමා අට්ඨ:
1. ඉධ භික්ඛවෙ එකච්චො දානං දෙති සමණස්ස වා බ්රාහ්මණස්ස වා අන්නං පානං වත්ථං යානං මාලාගන්ධවිලෙපනං සෙය්යාවසථපදීපෙය්යං, සො යං දෙති. තං පච්චාසිංසති. සො පස්සති ඛත්තියමහාසාලෙ වා බ්රාහ්මණමහාසාලෙ වා ගහපතිමහාසාලෙ වා පඤ්චහි කාමගුණෙහි සමප්පිතෙ සමඞ්ගීභූතෙ පරිචාරයමානෙ. තස්ස එවං හොති: අහො වතාහං කායස්ස භෙදා පරම්මරණා ඛත්තියමහාසාලානං වා බ්රාහ්මණමහාසාලානං වා ගහපතිමහාසාලානං වා සහව්යතං උපපජ්ජෙය්යන්ති. සො තං චිත්තං දහති. තං චිත්තං අධිට්ඨාති, තං චිත්තං භාවෙති. තස්ස තං චිත්තං හීනෙ විමුත්තං උත්තරිං අභාවිතං තත්රූපපත්තියා සංවත්තති. කායස්ස භෙදා පරම්මරණා ඛත්තියමහාසාලානං වා බ්රාහ්මණමහාසාලානං වා ගහපතිමහාසාලානං වා සහව්යතං උපපජ්ජති. තඤ්ච ඛො සීලවතො වදාමි, නො දුස්සීලස්ස. ඉජ්ඣති භික්ඛවෙ. සීලවතො චෙතොපණිධි විසුද්ධත්තා.
2. ඉධ පන භික්ඛවෙ, එකච්චො දානං දෙති, සමණස්ස වා බ්රාහ්මණස්ස වා අන්නං පානං වත්ථං යානං මාලාගන්ධවිලෙපනං සෙය්යාවසථපදීපෙය්යං, සො යං දෙති තං පච්චාසිංසති, තස්ස සුතං හොති: චාතුම්මහාරාජිකා දෙවා දීඝායුකා වණ්ණවන්තො සුඛබහුලාති. තස්ස එවං හොති: අහොවතාහං කායස්ස භෙදා පරම්මරණා චාතුම්මහාරාජිකානං දෙවානං සහව්යතං උපපජ්ජෙය්යන්ති. සො තං චිත්තං දහති. තං චිත්තං අධිට්ඨාති. තං චිත්තං භාවෙති. තස්ස තං චිත්තං හීනෙ විමුත්තං උත්තරිං අභාවිතං තත්රූපපත්තියා සංවත්තති, කායස්ස භෙදා පරම්මරණා චාතුම්මහාරාජිකානං දෙවානං සහව්යතං උපපජ්ජති. තඤ්ච ඛො සීලවතො වදාමි, නො දුස්සීලස්ස, ඉජ්ඣති භික්ඛවෙ සීලවතො චෙතොපණිධි විසුද්ධත්තා.
3-7 ඉධ පන භික්ඛවෙ, එකච්චො දානං දෙති, සමණස්ස වා බ්රාහ්මණස්ස වා අන්නං පානං වත්ථං යානං මාලාගන්ධවිලෙපනං සෙය්යාවසථපදීපෙය්යං. සො යං දෙති තං පච්චාසිංසති. තස්ස සුතං හොති: තාවතිංසා දෙවා -පෙ- යාමා දෙවා -පෙ- තුසිතා දෙවා - නිම්මාණරතී දෙවා - පරනිම්මිතවසවත්තී දෙවා - දීඝායුකා වණ්ණවන්තො සුඛබහුලාති. තස්ස එවං හොති: අහොවතාහං කායස්ස භෙදා පරම්මරණා පරනිම්මිතවසවත්තීනං දෙවානං සහව්යතං උපපජ්ජෙය්යන්ති. සො තං චිත්තං දහති. තං චිත්තං අධිට්ඨාති. තං චිත්තං භාවෙති. තස්ස තං චිත්තං හීනෙ විමුත්තං උත්තරිං අභාවිතං තත්රූපපත්තියා සංවත්තති. කායස්ස භෙදා පරම්මරණා පරනිම්මිතවසවත්තීනං දෙවානං සහව්යතං උපපජ්ජති. තඤ්ච ඛො සීලවතො වදාමි නො දුස්සීලස්ස, ඉජ්ඣති භික්ඛවෙ සීලවතො චෙතොපණිධි විසුද්ධත්තා.
8. ඉධ පන භික්ඛවෙ, එකච්චො දානං දෙති. සමණස්ස වා බ්රාහ්මණස්ස වා අන්නං පානං වත්ථං යානං මාලාගන්ධවිලෙපනං සෙය්යාවසථපදීපෙය්යං. සො යං දෙති තං පච්චාසිංසති. තස්ස සුතං හොති: බ්රහ්මකායිකා දෙවා දීඝායුකා වණ්ණවන්තො සුඛබහුලාති. තස්ස එවං හොති: අහොවතාහං කායස්ස භෙදා පරම්මරණා බ්රහ්මකායිකානං දෙවානං සහව්යතං උපපජ්ජෙය්යන්ති. සො තං චිත්තං දහති. තං චිත්තං අධිට්ඨාති. තං චිත්තං භාවෙති. තස්ස තං චිත්තං හීනෙ විමුත්තං උත්තරිං අභාවිතං තත්රූපපත්තියා සංවත්තති. කායස්ස භෙදා පරම්මරණා බ්රහ්මකායිකානං දෙවානං සහව්යතං උපපජ්ජති. තඤ්ච ඛො සීලවතො වදාමි, නො දුස්සීලස්ස, වීතරාගස්ස නො සරාගස්ස. ඉජ්ඣති භික්ඛවෙ සීලවතො චෙතොපණිධි වීතරාගත්තා. ඉමා ඛො භික්ඛවෙ, අට්ඨදානූපපත්තියොති.
8. 1. 4. 6.
පුඤ්ඤකිරියවත්ථු සුත්තං
[සාවත්ථිනිදානං]
තීණිමානි භික්ඛවෙ, පුඤ්ඤකිරියවත්ථූනි, කතමානි තීණි.
දානමයං පුඤ්ඤකිරියවත්ථු{1}, සීලමයං පුඤ්ඤකිරියවත්ථු, භාවනාමයං පුඤ්ඤකිරියවත්ථු.
1. ඉධ භික්ඛවෙ, එකච්චස්ස දානමයං පුඤ්ඤකිරියවත්ථු පරිත්තං කතං හොති, සීලමයං පුඤ්ඤකිරියවත්ථු පරිත්තං කතං හොති භාවනාමයං පුඤ්ඤකිරියවත්ථු නාභිසම්භොති. සො කායස්ස භෙදා පරම්මරණා මනුස්සදොභග්ගං{1} උපපජ්ජති.
2. ඉධ පන භික්ඛවෙ, එකච්චස්ස දානමයං පුඤ්ඤකිරියවත්ථු මත්තසො කතං හොති, සීලමයං පුඤ්ඤකිරියවත්ථු මත්තසො කතං හොති, භාවනාමයං පුඤ්ඤකිරියවත්ථු නාභිසම්භොති. සො කායස්ස භෙදා පරම්මරණා මනුස්සසොභග්ගං{2} උපපජ්ජති.
3. ඉධ පන භික්ඛවෙ, එකච්චස්ස දානමයං පුඤ්ඤකිරියවත්ථු අධිමත්තං කතං හොති, සීලමයං පුඤ්ඤකිරියවත්ථු අධිමත්තං කතං හොති, භාවනාමයං පුඤ්ඤකිරියවත්ථු නාභිසම්භොති. සො කායස්ස භෙදා පරම්මරණා චාතුම්මහාරාජිකානං දෙවානං සහව්යතං උපපජ්ජති. තත්ර භික්ඛවෙ, චත්තාරො මහාරාජානො දානමයං පුඤ්ඤකිරියවත්ථුං අතිරෙකං කරිත්වා{3} සීලමයං පුඤ්ඤකිරියවත්ථුං අතිරෙකං කරිත්වා{3} චාතුම්මහාරාජිකෙ දෙවෙ දසහි ඨානෙහි අධිගණ්හන්ති දිබ්බෙන ආයුනා, දිබ්බෙන වණ්ණෙන, දිබ්බෙන සුඛෙන, දිබ්බෙන යසෙන, දිබ්බෙන ආධිපතෙය්යෙන, දිබ්බෙහි රූපෙහි, දිබ්බෙහි සද්දෙහි, දිබ්බෙහි ගන්ධෙහි, දිබ්බෙහි රසෙහි, දිබ්බෙහි ඵොට්ඨබ්බෙහි.
4. ඉධ පන භික්ඛවෙ, එකච්චස්ස දානමයං පුඤ්ඤකිරියවත්ථු අධිමත්තං කතං හොති, සීලමයං පුඤ්ඤකිරියවත්ථු අධිමත්තං කතං හොති, භාවනාමයං පුඤ්ඤකිරියවත්ථු නාභිසම්භොති. සො කායස්ස භෙදා පරම්මරණා තාවතිංසානං දෙවානං සහව්යතං උපපජ්ජති. තත්ර භික්ඛවෙ, සක්කො දෙවානමින්දො දානමයං පුඤ්ඤකිරියවත්ථුං අතිරෙකං කරිත්වා, සීලමයං පුඤ්ඤකිරියවත්ථුං අතිරෙකං කරිත්වා තාවතිංසෙ දෙවෙ දසහි ඨානෙහි අධිගණ්හාති දිබ්බෙන ආයුනා -පෙ- දිබ්බෙහි ඵොට්ඨබ්බෙහි.
5. ඉධ පන භික්ඛවෙ, එකච්චස්ස දානමයං පුඤ්ඤකිරියවත්ථු අධිමත්තං කතං හොති, සීලමයං පුඤ්ඤකිරියවත්ථු අධිමත්තං කතං හොති, භාවනාමයං පුඤ්ඤකිරියවත්ථු නාභිසම්භොති. සො කායස්ස භෙදා පරම්මරණා යාමානං දෙවානං සහව්යතං උපපජ්ජති. තත්ර භික්ඛවෙ, සුයාමො දෙවපුත්තො දානමයං පුඤ්ඤකිරියවත්ථුං අතිරෙකං කරිත්වා, සීලමයං පුඤ්ඤකිරියවත්ථුං අතිරෙකං කරිත්වා, යාමෙ දෙවෙ දසහි ඨානෙහි අධිගණ්හාති. දිබ්බෙන ආයුනා -පෙ- දිබ්බෙහි ඵොට්ඨබ්බෙහි.
6. ඉධ පන භික්ඛවෙ, එකච්චස්ස දානමයං පුඤ්ඤකිරියවත්ථු අධිමත්තං කතං හොති, සීලමයං පුඤ්ඤකිරියවත්ථු අධිමත්තං කතං හොති, භාවනාමයං පුඤ්ඤකිරියවත්ථු නාභිසම්භොති. සො කායස්ස භෙදා පරම්මරණා තුසිතානං දෙවානං සහව්යතං උපපජ්ජති. තත්ර භික්ඛවෙ සන්තුසිතො දෙවපුත්තො දානමයං පුඤ්ඤකිරියවත්ථුං අතිරෙකං කරිත්වා, සීලමයං පුඤ්ඤකිරියවත්ථුං අතිරෙකං කරිත්වා තුසිතෙ දෙවෙ දසහි ඨානෙහි අධිගණ්හාති. දිබ්බෙන ආයුනා -පෙ- දිබ්බෙහි ඵොට්ඨබ්බෙහි.
7. ඉධ පන භික්ඛවෙ, එකච්චස්ස දානමයං පුඤ්ඤකිරියවත්ථු අධිමත්තං කතං හොති, සීලමයං පුඤ්ඤකිරියවත්ථු අධිමත්තං කතං හොති, භාවනාමයං පුඤ්ඤකිරියවත්ථු නාභිසම්භොති. සො කායස්ස භෙදා පරම්මරණා නිම්මාණරතීනං දෙවානං සහව්යතං උපපජ්ජති. තත්ර භික්ඛවෙ, සුනිම්මිතො දෙවපුත්තො දානමයං පුඤ්ඤකිරියවත්ථුං අතිරෙකං කරිත්වා, සීලමයං පුඤ්ඤකිරියවත්ථුං අතිරෙකං කරිත්වා, නිම්මාණරතී දෙවෙ දසහි ඨානෙහි අධිගණ්හාති. දිබ්බෙන ආයුනා -පෙ- දිබ්බෙහි ඵොට්ඨබ්බෙහි.
8. ඉධ පන භික්ඛවෙ, එකච්චස්ස දානමයං පුඤ්ඤකිරියවත්ථු අධිමත්තං කතං හොති, සීලමයං පුඤ්ඤකිරියවත්ථු අධිමත්තං කතං හොති, භාවනාමයං පුඤ්ඤකිරියවත්ථු නාභිසම්භොති. සො කායස්ස භෙදා පරම්මරණා පරනිම්මිත වසවත්තීනං දෙවානං සහව්යතං උපපජ්ජති. තත්ර භික්ඛවෙ, වසවත්තී දෙවපුත්තො දානමයං පුඤ්ඤකිරියවත්ථුං අතිරෙකං කරිත්වා, සීලමයං පුඤ්ඤකිරියවත්ථුං අතිරෙකං කරිත්වා, පරනිම්මිතවසවත්තී දෙවෙ දසහි ඨානෙහි අධිගණ්හාති දිබ්බෙන ආයුනා, දිබ්බෙන වණ්ණෙන, දිබ්බෙන සුඛෙන, දිබ්බෙන යසෙන, දිබ්බෙන ආධිපතෙය්යෙන, දිබ්බෙහි රූපෙහි, දිබ්බෙහි සද්දෙහි, දිබ්බෙහි ගන්ධෙහි,දිබ්බෙහි රසෙහි, දිබ්බෙහි ඵොට්ඨබ්බෙහි.
ඉමානි ඛො භික්ඛවෙ, තීණි පුඤ්ඤකිරියවත්ථුනීති.
8. 1. 4. 7.
සප්පුරිසදාන සුත්තං
[සාවත්ථිනිදානං]
අට්ඨිමානි භික්ඛවෙ, සප්පුරිසදානානි, කතමානි අට්ඨ:
සුචිං දෙති, පණීතං දෙතී, කාලෙන දෙති, කප්පියං දෙති, විචෙය්ය දෙති, අභිණ්හං දෙති, දදං චිත්තං පසාදෙති. දත්වා අත්තමනො හොති, ඉමානි ඛො භික්ඛවෙ, අට්ඨ සප්පුරිසදානානීති.
1. සුචිං පණීතං කාලෙන කප්පියං පානභොජනං, අභිණ්හං දදාති දානං සුඛෙත්තෙසු{1} බ්රහ්මචාරිසු.
2. න ච{2} විප්පටිසාරිස්ස චජිත්වා ආමිසං බහුං, එවං දින්නානි දානානි වණ්ණයන්ති විපස්සිනො.
3. එවං යජිත්වා මෙධාවී සද්ධො මුත්තෙන චෙතසා, අබ්යාපජ්ඣං සුඛං ලොකං පණ්ඩිතො උපපජ්ජතීති.
8. 1. 4. 8.
සප්පුරිස සුත්තං
[සාවත්ථිනිදානං]
සප්පුරිසො භික්ඛවෙ, කුලෙ ජායමානො බහුනො ජනස්ස අත්ථාය හිතාය සුඛාය හොති මාතාපිතුන්නං අත්ථාය හිතාය සුඛාය හොති. පුත්තදාරස්ස අත්ථාය හිතාය සුඛාය හොති, දාසකම්මකරපොරිසස්ස අත්ථාය හිතාය සුඛාය හොති. මිත්තාමච්චානං අත්ථාය හිතාය සුඛාය හොති. පුබ්බපෙතානං අත්ථාය හිතාය සුඛාය හොති, රඤ්ඤො අත්ථාය හිතාය සුඛාය හොති දෙවතානං අත්ථාය හිතාය සුඛාය හොති, සමණබ්රාහ්මණානං අත්ථාය හිතාය සුඛාය හොති.
සෙය්යථාපි භික්ඛවෙ, මහාමෙඝො සබ්බසස්සානුසම්පාදෙන්තො බහුනො ජනස්ස අත්ථාය හිතාය සුඛාය හොති. එවමෙව ඛො භික්ඛවෙ, සප්පුරිසො කුලෙ ජායමානො බහුනො ජනස්ස අත්ථාය හිතාය සුඛාය හොති. මාතාපිතුන්නං අත්ථාය හිතාය සුඛාය හොති. පුත්තදාරස්ස අත්ථාය හිතාය සුඛාය හොති. දාසකම්මකරපොරිස්ස අත්ථාය හිතාය සුඛාය හොති. මිත්තාමච්චානං අත්ථාය හිතාය සුඛාය හොති, පුබ්බපෙත්තානං අත්ථාය හිතාය සුඛාය හොති, රඤ්ඤො අත්ථාය හිතාය සුඛාය හොති. දෙවතානං අත්ථාය හිතාය සුඛාය හොති. සමණබ්රාහ්මණානං අත්ථාය හිතාය සුඛාය හොති.
1. බහුන්නං{1} වත අත්ථාය සප්පඤ්ඤො ඝරමාවසං, මාතරං පිතරං පුබ්බෙ රත්තින්දිවමතන්දිතො.
2. පූජෙති සහධම්මෙන පුබ්බෙ කතමනුස්සරං, අනාගාරෙ පබ්බජිතෙ අපචෙ{2} බ්රහ්මචාරයො{3}
3. නිවිට්ඨසද්ධො පූජෙති ඤත්වා ධම්මෙධපෙසලෙ,{4} රඤ්ඤො හිතො දෙවහිතො ඤාතීනං සඛිනං හිතො.
4. සබ්බෙසං සො හිතො{5} හොති සද්ධම්මෙ සුප්පතිට්ඨිතො, විනෙය්ය මච්ඡෙරමලං සලොකං භජතෙ සිවන්ති.
8. 1. 4. 9.
පුඤ්ඤාභිසන්ද සුත්තං
[සාවත්ථිනිදානං]
අට්ඨිමෙ භික්ඛවෙ, පුඤ්ඤාභිසන්දා කුසලාභිසන්දා සුඛස්සාහාරා සොවග්ගිකා සුඛවිපාකා සග්ගසංවත්තනිකා ඉට්ඨාය කන්තාය මනාපාය හිතාය සුඛාය සංවත්තන්ති. කතමෙ අට්ඨ:
1. ඉධ භික්ඛවෙ, අරියසාවකො බුද්ධං සරණං ගතො හොති. අයං භික්ඛවෙ, පඨමො පුඤ්ඤාභිසන්දො කුසලාභිසන්දො සුඛස්සාහාරො සොවග්ගිකො සුඛවිපාකො සග්ගසංවත්තනිකො ඉට්ඨාය කන්තාය මනාපාය හිතාය සුඛාය සංවත්තති.
2. පුන චපරං භික්ඛවෙ, අරියසාවකො ධම්මං සරණං ගතො හොති. අයං භික්ඛවෙ, දුතියො පුඤ්ඤාභිසන්දො -පෙ- සංවත්තති.
3. පුන චපරං භික්ඛවෙ, අරියසාවකො සංඝං සරණං ගතො හොති. අයං භික්ඛවෙ, තතියො පුඤ්ඤාභිසන්දො කුසලාභිසන්දො සුඛස්සාහාරො සොවග්ගිකො සුඛවිපාකො සග්ගසංවත්තනිකො ඉට්ඨාය කන්තාය මනාපාය හිතාය සුඛාය සංවත්තති.
4. පඤ්චිමානි භික්ඛවෙ, දානානි මහාදානානි අග්ගඤ්ඤානි රත්තඤ්ඤානි වංසඤ්ඤානි පොරාණානි අසඞ්කිණ්ණානි අසඞ්කිණ්ණපුබ්බානි න සඞ්කීයන්ති න සඞ්කීයිස්සන්ති අප්පතිකුට්ඨානි සමණෙහි බ්රාහ්මණෙහි විඤ්ඤූහි. කතමානි පඤ්ච:
ඉධ භික්ඛවෙ, අරියසාවකො පාණාතිපාතං පහාය පාණාතිපාතා පටිවිරතො හොති. පාණාතිපාතා පටිවිරතො භික්ඛවෙ, අරියසාවකො අපරිමාණානං සත්තානං අභයං දෙති. අවෙරං දෙති. අබ්යාපජ්ඣං දෙති. අපරිමාණානං සත්තානං අභයං දත්වා අවෙරං දත්වා අබ්යාපජ්ඣං දත්වා අපරිමාණස්ස අභයස්ස අවෙරස්ස අබ්යාපජ්ඣස්ස භාගී හොති. ඉමං භික්ඛවෙ, පඨමං දානං මහාදානං, අග්ගඤ්ඤං රත්තඤ්ඤං වංසඤ්ඤං පොරාණං අසඞ්කිණ්ණං අසඞ්කිණ්ණපුබ්බං න සඞ්කීයති න සඞ්කීයිස්සති අප්පතිකුට්ඨං සමණෙහි බ්රාහ්මණෙහි විඤ්ඤූහි. අයං භික්ඛවෙ චතුත්ථො පුඤ්ඤාභිසාන්දො කුසලාභිසන්දො සුඛස්සාහාරො සොවග්ගිකො සුඛවිපාකො සග්ගසංවත්තනිකො ඉට්ඨාය කන්තාය මනාපාය හිතාය සුඛාය සංවත්තති.
5-8 පුන චපරං භික්ඛවෙ, අරියසාවකො අදින්නාදානං පහාය අදින්නාදානා පටිවිරතො හොති -පෙ- කාමෙසු මිච්ඡාචාරං පහාය කාමෙසු මිච්ඡාචාරා පටිවිරතො හොති -පෙ- මුසාවාදං පහාය මුසාවාදා පටිවිරතො හොති -පෙ- සුරාමෙරයමජ්ජපමාදට්ඨානං පහාය සුරාමෙරයමජ්ජපමාදට්ඨානා පටිවිරතො හොති. සුරාමෙරයමජ්ජපමාදට්ඨානා පටිවිරතො භික්ඛවෙ, අරියසාවකො අපරිමාණානං සත්තානං අභයං දෙති. අවෙරං දෙති. අබ්යාපජ්ඣං දෙති. අපරිමාණානං සත්තානං අභයං දත්වා අවෙරං දත්වා අබ්යාපජ්ඣං දත්වා අපරිමාණස්ස අභයස්ස අවෙරස්ස අබ්යාපජ්ඣස්ස භාගී හොති.