8. 1. 3. 3.
හත්ථකාළවක සුත්තං
එකං සමයං භගවා ආළවියං විහරති අග්ගාළවෙ චෙතියෙ. තත්ර ඛො භගවා භික්ඛු ආමන්තෙසි: -පෙ-
සත්තහි භික්ඛවෙ, අච්ඡරියෙහි අබ්භුතෙහි ධම්මෙහි සමන්නාගතං හත්ථකං ආළවකං ධාරෙථ. කතමෙහි සත්තහි:
සද්ධො භික්ඛවෙ, හත්ථකො ආළවකො, සීලවා භික්ඛවෙ, හත්ථකො ආළවකො, හිරිමා භික්ඛවෙ, හත්ථකො ආළවකො, ඔත්තප්පී භික්ඛවෙ, හත්ථකො ආළවකො. බහුස්සුතො භික්ඛවෙ, හත්ථකො ආළවකො. චාගවා භික්ඛවෙ, හත්ථකො ආළවකො. පඤ්ඤවා භික්ඛවෙ, හත්ථකො ආළවකො. ඉමෙහි ඛො භික්ඛවෙ, සත්තහි අච්ඡරියෙහි අබ්භුතෙහි ධම්මෙහි සමන්නාගතං හත්ථකං ආළවකං ධාරෙථාති, ඉදමවොච භගවා. ඉදං වත්වා සුගතො උට්ඨායාසනා විහාරං පාවිසි.
අථ ඛො අඤ්ඤතරො භික්ඛු පුබ්බන්හසමයං නිවාසෙත්වා පත්තචීවරමාදාය යෙන හත්ථකස්ස ආළවකස්ස නිවෙසනං තෙනුපසඞ්කමි. උපසඞ්කමිත්වා පඤ්ඤත්තෙ ආසනෙ නිසීදි. අථ ඛො හත්ථකො ආළවකො යෙන සො භික්ඛු තෙනුපසඞ්කමි. උපසඞ්කමිත්වා තං භික්ඛුං අභිවාදෙත්වා එකමන්තං නිසීදි, එකමන්තං නිසින්නං ඛො හත්ථකං ආළවකං සො භික්ඛු එතදවොච: සත්තහි ඛො ත්වං ආවුසො, අච්ඡරියෙහි අබ්භුතෙහි ධම්මෙහි සමන්නාගතො භගවතා ව්යාකතො. කතමෙහි සත්තහි:
සද්ධො භික්ඛවෙ, හත්ථකො ආළවකො, සීලවා භික්ඛවෙ -පෙ- හිරිමා -පෙ- ඔත්තප්පී -පෙ- බහුස්සුතො -පෙ- චාගවා -පෙ- පඤ්ඤවා භික්ඛවෙ හත්ථකො ආළවකොති. ඉමෙහි ඛො ත්වං ආවුසො, සත්තහි අච්ඡරියෙහි අබ්භුතෙහි ධම්මෙහි සමන්නාගතො භගවතා ව්යාකතොති.
කච්චිත්ථ භන්තෙ, න කොචි ගිහී අහොසි ඔදාතවසනොති?
න ඛොත්ථ{1} ආවුසො, කොචි ගිහී අහොසි ඔදාතවසනොති.
සාධු භන්තෙ, යදෙත්ථ න කොචි ගිහී අහොසි ඔදාතවසනොති.
අථ ඛො සො භික්ඛු හත්ථකස්ස ආළවකස්ස නිවෙසනෙ පිණ්ඩපාතං ගහෙත්වා උට්ඨායාසනා පක්කාමි. අථ ඛො සො භික්ඛු පච්ඡාභත්තං පිණ්ඩපාතපටික්කන්තො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො සො භික්ඛු භගවන්තං එතදවොච: ඉධාහං භන්තෙ, පුබ්බන්හසමයං නිවාසෙත්වා පත්තචීවරමාදාය යෙන හත්ථකස්ස ආළවකස්ස නිවෙසනං තෙනුපසඞ්කමිං, උපසඞ්කමිත්වා පඤ්ඤත්තෙ ආසනෙ නිසීදිං. අථ ඛො භන්තෙ හත්ථකො ආළවකො යෙනාහං තෙනුපසඞ්කමි. උපසඞ්කමිත්වා මං අභිවාදෙත්වා එකමන්තං නිසීදි: එකමන්තං නිසින්නං ඛො අහං භන්තෙ, හත්ථකං ආළවකං එතදවොචං.
සත්තහි ඛො ත්වං ආවුසො, අච්ඡරියෙහි අබ්භුතෙහි ධම්මෙහි සමන්නාගතො භගවතා ව්යාකතො. කතමෙ සත්තහි: සද්ධො භික්ඛවෙ, හත්ථකො ආළවකො, සීලවා භික්ඛවෙ -පෙ- හිරිමා -පෙ- ඔත්තප්පී -පෙ- බහුස්සුතො -පෙ- චාගවා -පෙ- පඤ්ඤවා භික්ඛවෙ, හත්ථකො ආළවකොති. ඉමෙහි ඛො ත්වං ආවුසො, සත්තහි අච්ඡරියෙහි අබ්භුතෙහි ධම්මෙහි සමන්නාගතො භගවතා ව්යාකතොති.
එවං වුත්තෙ භන්තෙ, හත්ථකො ආළවකො මං එතදවොච: කච්චිත්ථ භන්තෙ, න කොචි ගිහී අහොසි ඔදාතවසනොති. න ඛොත්ථ ආවුසො, කොචි ගිහී අහොසි ඔදාත වසනොති. සාධු භන්තෙ, යදෙත්ථ න කොචි ගිහී අහොසි ඔදාතවසනොති.
සාධු සාධු භික්ඛු, අප්පිච්ඡො සො භික්ඛු කුලපුත්තො සන්තෙයෙව අත්තනි කුසලෙ ධම්මෙ න ඉච්ඡති පරෙහි ඤායමානෙ, තෙන හි ත්වං භික්ඛු, ඉමිනාපි අට්ඨමෙන අච්ඡරියෙන අබ්භුතෙන ධම්මෙන සමන්නාගතං හත්ථකං ආළවකං ධාරෙහි යදිදං අප්පිච්ඡතායාති.
8. 1. 3. 4.
හත්ථකාළවක සඞ්ගහවත්ථු සුත්තං
එකං සමයං භගවා ආළවියං විහරති අග්ගාළවෙ චෙතියෙ. අථ ඛො හත්ථකො ආළවකො පඤ්චමත්තෙහි උපාසකසතෙහි පරිවුතො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නං ඛො හත්ථකං ආළවකං භගවා එතදවොච:
මහතී ඛො ත්යායං හත්ථක, පරිසා, කථං පන ත්වං හත්ථක, ඉමං මහතිං පරිසං සඞ්ගණ්හාහීති? යානිමානි භන්තෙ, භගවතා දෙසිතානි චත්තාරි සඞ්ගහවත්ථූනි තෙනාහං ඉමං පරිසං සඞ්ගණ්හාමි. අහං භන්තෙ, යං ජානාමි, ‘අයං දානෙන සඞ්ගහෙතබ්බො’ ති, තං දානෙන සඞ්ගණ්හාමි. යං ජානාමි ‘අයං පෙය්යවජ්ජෙන සඞ්ගහෙතබ්බො’ති තං පෙය්යවජ්ජෙන සඞ්ගණ්හාමි, යං ජානාමි ‘අයං අත්ථචරියාය සඞ්ගහෙතබ්බො’ති තං අත්ථචරියාය සඞ්ගණ්හාමි, යං ජානාමි ‘අයං සමානත්තතාය සඞ්ගහෙතබ්බො’ති තං සමානත්තතාය සඞ්ගණ්හාමි, සංවිජ්ජන්ති ඛො පන මෙ භන්තෙ, කුලෙ භොගා. දළිද්දස්ස ඛො නො තථා සොතබ්බං මඤ්ඤන්තීති,
සාධු සාධු හත්ථක, යොනි ඛො ත්යායං හත්ථක, මහතිං පරිසං සඞ්ගහෙතුං, යෙ හි කෙචි හත්ථක, අතීතමද්ධානං පරිසං සඞ්ගහෙසුං, සබ්බෙ තෙ ඉමෙහෙව චතුහි සඞ්ගහවත්ථූහි මහතිං පරිසං සඞ්ගහෙසුං. යෙපි හි කෙචි හත්ථක, අනාගතමද්ධානං මහතිං පරිසං සඞ්ගහෙස්සන්ති සබ්බෙ තෙ ඉමෙහෙව චතුහි සඞ්ගහවත්ථූහි මහතිං පරිසං සඞ්ගහිස්සන්ති.
යෙපි හි කෙචි හත්ථක, එතරහි මහතිං පරිසං සඞ්ගණ්හන්නි සබ්බෙ තෙ ඉමෙහෙව චතුහි සඞ්ගහවත්ථූහි මහතිං පරිසං සඞ්ගණ්හන්තීති. අථ ඛො හත්ථකො ආළවකො භගවතා ධම්මියා කථාය සන්දස්සිතො සමාදපිතො සමුත්තෙජිතො සම්පහංසිතො උට්ඨායාසනා භගවන්තං අභිවාදෙත්වා පදක්ඛිණං කත්වා පක්කාමි.
අථ ඛො භගවා අචිරපක්කන්තෙ හත්ථකෙ ආළවකෙ භික්ඛු ආමන්තෙසි: අට්ඨහි භික්ඛවෙ, අච්ඡරියෙහි අබ්භුතෙහි ධම්මෙහි සමන්නාගතං හත්ථකං ආළවකං ධාරෙථ, කතමෙහි අට්ඨහි:
සද්ධො භික්ඛවෙ, හත්ථකො ආළවකො. සීලවා භික්ඛවෙ, හත්ථකො ආළවකො. හිරිමා භික්ඛවෙ, හත්ථකො ආළවකො. ඔත්තප්පී භික්ඛවෙ, හත්ථකො ආළවකො. බහුස්සුතො භික්ඛවෙ, හත්ථකො ආළවකො. චාගවා භික්ඛවෙ, හත්ථකො ආළවකො. පඤ්ඤවා භික්ඛවෙ, හත්ථකො ආළවකො. අප්පිච්ඡෙ භික්ඛවෙ, හත්ථකො ආළවකො. ඉමෙහි ඛො භික්ඛවෙ, අට්ඨහි අච්ඡරියෙහි අබ්භුතෙහි ධම්මෙහි සමන්නාගතං හත්ථකං ආළවකං ධාරෙථාති.
8. 1. 3. 5.
මහානාම සුත්තං
එකං සමයං භගවා සක්කෙසු විහරති කපිලවත්ථුස්මිං නිග්රොධාරාමෙ, අථ ඛො මහානාමො සක්කො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො මහානාමො සක්කො භගවන්තං එතදවොච:
කිත්තාවතා නු ඛො භන්තෙ, උපාසකො හොතීති:
යතො ඛො මහානාම, බුද්ධං සරණං ගතො හොති, ධම්මං සරණං ගතො හොති, සඞ්ඝං සරණං ගතො හොති, එත්තාවතා ඛො මහානාම, උපාසකො හොතීති.
කිත්තාවතා පන භන්තෙ, උපාසකො සීලවා හොතීති:
යතො ඛො මහානාම, උපාසකො පාණාතිපාතා පටිවිරතො හොති, අදින්නාදානා පටිවිරතො හොති, කාමෙසු මිච්ඡාචාරා පටිවිරතො හොති, මුසාවාදා පටිවිරතො හොති, සුරාමෙරයමජ්ජපමාදට්ඨානා පටිවිරතො හොති. එත්තාවතා ඛො මහානාම, උපාසකො සීලවා හොතීති.
කිත්තාවතා පන භන්තෙ, උපාසකො අත්තහිතාය පටිපන්නො හොති නො පරහිතායාති:
යතො ඛො මහානාම, උපාසකො අත්තනා සද්ධාසම්පන්නො හොති නො පරං සද්ධාසම්පදාය සමාදපෙති. අත්තනා සීලසම්පන්නො හොති නො පරං සීලසම්පදාය සමාදපෙති. අත්තනා චාගසම්පන්නො හොති නො පරං චාගසම්පදාය සමාදපෙති. අත්තනා භික්ඛූනං දස්සනකාමො හොති නො පරං භික්ඛූනං දස්සනෙ සමාදපෙති. අත්තනා සද්ධම්මං සොතුකාමො හොති නො පරං සද්ධම්මසවණෙ සමාදපෙති. අත්තනා සුතානං ධම්මානං ධාරණජාතිකො හොති නො පරං ධම්මධාරණාය සමාදපෙති. අත්තනා{1} ධතානං ධම්මානං අත්ථූපපරික්ඛී හොති නො පරං අත්ථූපපරික්ඛාය සමාදපෙති. අත්තනා අත්ථමඤ්ඤාය ධම්මමඤ්ඤාය ධම්මානුධම්මපටිපන්නො හොති, නො පරං ධම්මානුධම්මපටිපත්තියා සමාදපෙති. එත්තාවතා ඛො මහානාම උපාසකො අත්තහිතාය පටිපන්නො හොති නො පරහිතායාති.
කිත්තාවතා පන භන්තෙ, උපාසකො අත්තහිතාය ච පටිපන්නො හොති, පරහිතාය චාති:
යතො ඛො මහානාම උපාසකො අත්තනා ච සද්ධාසම්පන්නො හොති පරඤ්ච සද්ධාසම්පදාය සමාදපෙති. අත්තනා ච සීලසම්පන්නො හොති, පරඤ්ච සීලසම්පදාය සමාදපෙති. අත්තනා ච චාගසම්පන්නො හොති, පරඤ්ච චාගසම්පදාය සමාදපෙති, අත්තනා ච භික්ඛූනං දස්සනකාමො හොති, පරඤ්ච භික්ඛූනං දස්සනෙ සමාදපෙති. අත්තනා ච සද්ධම්මං සොතුකාමො හොති, පරඤ්ච සද්ධම්මසවණෙ සමාදපෙති. අත්තනා ච සුතානං ධම්මානං ධාරණජාතිකො හොති, පරඤ්ච ධම්මධාරණාය සමාදපෙති. අත්තනා ච ධතානං ධම්මානං අත්ථූපපරික්ඛී හොති පරඤ්ච අත්ථූපපරික්ඛාය සමාදපෙති. අත්තනා ච අත්ථමඤ්ඤාය ධම්මමඤ්ඤාය ධම්මානුධම්මපටිපන්නො හොති, පරඤ්ච ධම්මානුධම්මපටිපත්තියා සමාදපෙති. එත්තාවතා ඛො මහානාම, උපාසකො අත්තහිතාය ච පටිපන්නො හොති පරහිතාය චාති.
8. 1. 3. 6.
ජීවක සුත්තං
එකං සමයං භගවා රාජගහෙ විහරති ජීවකම්බවනෙ. අථ ඛො ජීවකො කොමාරභච්චො යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි, එකමන්තං නිසින්නො ඛො ජීවකො කොමාරභච්චො භගවන්තං එතදවොච:
කිත්තාවතා නු ඛො භන්තෙ උපාසකො හොතීති:
යතො ඛො ජීවක, බුද්ධං සරණං ගතො හොති, ධම්මං සරණං ගතො හොති, සඞ්ඝං සරණං ගතො හොති, එත්තාවතා ඛො ජීවක, උපාසකො හොතීති.
කිත්තාවතා පන භන්තෙ, උපාසකො සීලවා හොතීති:
යතො ඛො ජීවක, උපාසකො පාණාතිපාතා පටිවිරතො හොති, -පෙ- සුරාමෙරයමජ්ජපමාදට්ඨානා පටිවිරතො හොති. එත්තාවතා ඛො ජීවක, උපාසකො සීලවා හොතීති.
කිත්තාවතා පන භන්තෙ, උපාසකො අත්තහිතාය පටිපන්නො හොති නො පරහිතායාති:
යතො ඛො ජීවක, උපාසකො අත්තනා සද්ධාසම්පන්නො හොති, නො පරං සද්ධාසම්පදාය සමාදපෙති -පෙ- අත්තනා අත්ථමඤ්ඤාය ධම්මමඤ්ඤාය ධම්මානුධම්මපටිපන්නො හොති, නො පරං ධම්මානුධම්මපටිපත්තියා සමාදපෙති. එත්තාවතා ඛො ජීවක උපාසකො අත්තහිතාය පටිපන්නො හොති නො පරහිතායාති.
කිත්තාවතා පන භන්තෙ, උපාසකො අත්තහිතාය ච පටිපන්නො හොති, පරහිතාය චාති:
යතො ඛො ජීවක, උපාසකො අත්තනා ච සද්ධාසම්පන්නො හොති, පරඤ්ච සද්ධාසම්පදාය සමාදපෙති. අත්තනා ච සීලසම්පන්නො හොති, පරඤ්ච සීලසම්පදාය සමාදපෙති. අත්තනා ච චාගසම්පන්නො හොති, පරඤ්ච චාගසම්පදාය සමාදපෙති, අත්තනා ච භික්ඛූනං දස්සනකාමො හොති, පරඤ්ච භික්ඛූනං දස්සනෙ සමාදපෙති. අත්තනා ච සද්ධම්මං සොතුකාමො හොති, පරඤ්ච සද්ධම්මසවණෙ සමාදපෙති. අත්තනා ච සුතානං ධම්මානං ධාරණජාතිකො හොති, පරඤ්ච ධම්මධාරණාය සමාදපෙති. අත්තනා ච ධතානං ධම්මානං අත්ථූපපරික්ඛී හොති, පරඤ්ච අත්ථූපපරික්ඛාය සමාදපෙති. අත්තනා ච අත්ථමඤ්ඤාය ධම්මමඤ්ඤාය ධම්මානුධම්මපටිපන්නො හොති, පරඤ්ච ධම්මානුධම්මපටිපත්තියා සමාදපෙති. එත්තාවතා ඛො ජීවක, උපාසකො අත්තහිතාය ච පටිපන්නො හොති පරහිතාය චාති.
8. 1. 3. 7.
බල සුත්තං
[සාවත්ථිනිදානං]
අට්ඨිමානි භික්ඛවෙ, බලානි, කතමානි අට්ඨ: රුණ්ණබලා භික්ඛවෙ දාරකා, කොධබලො මාතුගාමො, ආවුධබලා චොරා, ඉස්සරියබලා රාජානො, උජ්ඣත්තිබලා බාලා, නිජ්ඣත්තිබලා{1} පණ්ඩිතා, පටිසඞ්ඛානබලා බහුස්සුතා, ඛන්තිබලා සමණබ්රාහ්මණා, ඉමානි ඛො භික්ඛවෙ, අට්ඨබලානීති.
8. 1. 3. 8.
ඛීණාසවබල සුත්තං
[සාවත්ථිනිදානං]
අථ ඛො ආයස්මා සාරිපුත්තො යෙන භගවා තෙනුපසඞ්කමි උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නං ඛො ආයස්මන්තං සාරිපුත්තං භගවා එතදවොච:
කති නුඛො සාරිපුත්ත, ඛීණාසවස්ස භික්ඛුනො බලානි, යෙහි බලෙහි සමන්නාගතො ඛීණාසවො භික්ඛු ආසවානං ඛයං පටිජානාති ඛීණා මෙ ආසවාති?
අට්ඨ භන්තෙ, ඛීණාසවස්ස භික්ඛුනො බලානි යෙහි බලෙහි සමන්නාගතො ඛීණාසවො ආසවානං ඛයං පටිජානාති ඛීණා මෙ ආසවාති. කතමානි අට්ඨ:
1. ඉධ භන්තෙ, ඛීණාසවස්ස භික්ඛුනො අනිච්චතො සබ්බෙ සඞ්ඛාරා යථාභූතං සම්මප්පඤ්ඤාය සුදිට්ඨා හොන්ති, යම්පි භන්තෙ ඛීණාසවස්ස භික්ඛුනො අනිච්චතො සබ්බෙ සඞ්ඛාරා යථාභූතං සම්මප්පඤ්ඤාය සුදිට්ඨා හොන්ති, ඉදම්පි භන්තෙ, ඛීණාසවස්ස භික්ඛුනො බලං හොති, යං බලං ආගම්ම ඛීණාසවො භික්ඛු ආසවානං ඛයං පටිජානාති ඛීණා මෙ ආසවාති.
2. පුන චපරං භන්තෙ, ඛීණාසවස්ස භික්ඛුනො අඞ්ගාරකාසූපමා කාමා යථාභූතං සම්මප්පඤ්ඤාය සුදිට්ඨා හොන්ති, යම්පි භන්තෙ, ඛීණාසවස්ස භික්ඛුනො අඞ්ගාරකාසූපමා කාමා යථාභූතං සම්මප්පඤ්ඤාය සුදිට්ඨා හොන්ති, ඉදම්පි භන්තෙ, ඛීණාසවස්ස භික්ඛුනො බලං හොති, යං බලං ආගම්ම ඛීණාසවො භික්ඛු ආසවානං ඛයං පටිජානාති ඛීණා මෙ ආසවාති.
3. පුන චපරං භන්තෙ, ඛීණාසවස්ස භික්ඛුනො විවෙකනින්නං චිත්තං හොති විවෙකපොණං විවෙකපබ්භාරං වවකට්ඨං{1} නෙක්ඛම්මාභිරතං ව්යන්තීභූතං සබ්බසො ආසවට්ඨානීයෙහි ධම්මෙහි, යම්පි භන්තෙ, ඛීණාසවස්ස භික්ඛුනො විවෙකනින්නං චිත්තං හොති විවෙකපොණං විවෙකපබ්භාරං වවකට්ඨං නෙක්ඛම්මාභිරතං ව්යන්තීභූතං සබ්බසො ආසවට්ඨානීයෙහි ධම්මෙහි, ඉදම්පි භන්තෙ, ඛීණාසවස්ස භික්ඛුනො බලං හොති, යං බලං ආගම්ම ඛීණාසවො භික්ඛු ආසවානං ඛයං පටිජානාති ඛීණා මෙ ආසවාති.
4. පුන චපරං භන්තෙ, ඛීණාසවස්ස භික්ඛුනො චත්තාරො සතිපට්ඨානා භාවිතා හොන්ති සුභාවිතා. යම්පි භන්තෙ, ඛීණාසවස්ස භික්ඛුනො චත්තාරො සතිපට්ඨානා භාවිතා හොන්ති සුභාවිතා, ඉදම්පි භන්තෙ, ඛීණාසවස්ස භික්ඛුනො බලං හොති යං බලං ආගම්ම ඛීණාසවො භික්ඛු ආසවානං ඛයං පටිජානාති, ඛීණා මෙ ආසවාති.
5-8 පුන චපරං භන්තෙ, ඛීණාසවස්ස භික්ඛුනො චත්තාරො ඉද්ධිපාදා භාවිතා හොන්ති සුභාවිතා -පෙ- පඤ්චින්ද්රියානි භාවිතානි හොන්ති සුභාවිතානි -පෙ- සත්තබොජ්ඣඞ්ගා භාවිතා හොන්ති සුභාවිතා -පෙ- අරියො අට්ඨඞ්ගිකො මග්ගො භාවිතො හොති සුභාවිතො, යම්පි භන්තෙ ඛීණාසවස්ස භික්ඛුනො අරියො අට්ඨඞ්ගිකො මග්ගො භාවිතො හොති සුභාවිතො, ඉදම්පි භන්තෙ, ඛීණාසවස්ස භික්ඛුනො බලං හොති, යං බලං ආගම්ම ඛීණාසවො භික්ඛු ආසවානං ඛයං පටිජානාති ඛීණා මෙ ආසවාති.
ඉමානි ඛො භන්තෙ, අට්ඨ ඛීණාසවස්ස භික්ඛුනො බලානි, යෙහි බලෙහි සමන්නාගතො ඛීණාසවො භික්ඛු ආසවානං ඛයං පටිජානාති ඛීණා මෙ ආසවාති.
8. 1. 3. 9.
අක්ඛණ සුත්තං
[සාවත්ථිනිදානං]
ඛණකිච්චො ලොකො ඛණකිච්චො ලොකොති භික්ඛවෙ, අස්සුතවා පුථුජ්ජනො භාසති, නො ච ඛො සො ජානාති ඛණං වා අක්ඛණං වා. අට්ඨිමෙ භික්ඛවෙ, අක්ඛණා අසමයා බ්රහ්මචරියවාසාය. කතමෙ අට්ඨ.
1. ඉධ භික්ඛවෙ, තථාගතො ච ලොකෙ උප්පන්නො හොති අරහං සම්මා සම්බුද්ධො විජ්ජාචරණසම්පන්නො සුගතො ලොකවිදූ අනුත්තරො පුරිසදම්මසාරථී සත්ථා දෙවමනුස්සානං බුද්ධො භගවා. ධම්මො ච දෙසීයති ඔපසමිකො පරිනිබ්බායිකො සම්බොධගාමී සුගතප්පවෙදිතො, අයං ච පුග්ගලො නිරයං උපපන්නො හොති. අයං භික්ඛවෙ, පඨමො අක්ඛණො අසමයො බ්රහ්මචරියවාසාය.
2. පුන චපරං භික්ඛවෙ, තථාගතො ච ලොකෙ උප්පන්නො හොති -පෙ- සත්ථා දෙවමනුස්සානං බුද්ධො භගවා. ධම්මො ච දෙසීයති -පෙ- සුගතප්පවෙදිතො, අයඤ්ච පුග්ගලො තිරච්ඡානයොනිං උපපන්නො හොති. අයං භික්ඛවෙ, දුතියො අක්ඛණො අසමයො බ්රහ්මචරියවාසාය.
3. පුන චපරං භික්ඛවෙ, තථාගතො ච ලොකෙ උප්පන්නො හොති -පෙ- ධම්මො ච දෙසීයති -පෙ- අයඤ්ච පුග්ගලො පෙත්තිවිසයං උපපන්නො හොති. අයං භික්ඛවෙ, තතියො අක්ඛණො අසමයො බ්රහ්මචරියවාසාය.
4. පුන චපරං භික්ඛවෙ, තථාගතො ච ලොකෙ උප්පන්නො හොති -පෙ- ධම්මො ච දෙසීයති -පෙ- අයඤ්ච පුග්ගලො අඤ්ඤතරං දීඝායුකං දෙවනිකායං උපපන්නො හොති. අයං භික්ඛවෙ චතුත්ථො අක්ඛණො අසමයො බ්රහ්මචරියවාසාය.
5. පුන චපරං භික්ඛවෙ, තථාගතො ච ලොකෙ උප්පන්නො හොති -පෙ- ධම්මො ච දෙසීයති -පෙ- අයඤ්ච පුග්ගලො පච්චන්තිමෙසු ජනපදෙසු පච්චාජාතො හොති අවිඤ්ඤාතාරෙසු මිලක්ඛෙසු. යත්ථ නත්ථි ගති භික්ඛූනං භික්ඛුනීනං උපාසකානං උපාසිකානං. අයං භික්ඛවෙ පඤ්චමො අක්ඛණො අසමයො බ්රහ්මචරියවාසාය.
6. පුන චපරං භික්ඛවෙ තථාගතො ච ලොකෙ උප්පන්නො හොති -පෙ- ධම්මො ච දෙසීයති -පෙ- අයංඤ්ච පුග්ගලො මජ්ඣිමෙසු ජනපදෙසු පච්චාජාතො හොති මිච්ඡාදිට්ඨිකො විපරීතදස්සනො නත්ථි දින්නං නත්ථි යිට්ඨං නත්ථි හුතං නත්ථි සුකටදුක්කටානං කම්මානං ඵලං විපාකො, නත්ථි අයං ලොකො නත්ථි පරො ලොකො නත්ථි මාතා නත්ථි පිතා නත්ථි සත්තා ඔපපාතිකා නත්ථි ලොකෙ සමණබ්රාහ්මණා සම්මග්ගතා සම්මාපටිපන්නා යෙ ඉමඤ්ච ලොකං පරඤ්ච ලොකං සයං අභිඤ්ඤා සච්ඡිකත්වා පවෙදෙන්තීති. අයං භික්ඛවෙ ඡට්ඨො අක්ඛණො අසමයො බ්රහ්මචරියවාසාය.
7. පුන චපරං භික්ඛවෙ, තථාගතො ච ලොකෙ උප්පන්නො හොති -පෙ- ධම්මො ච දෙසීයති -පෙ- අයංඤ්ච පුග්ගලො මජ්ඣිමෙසු ජනපදෙසු පච්චාජාතො හොති. සො ච හොති දුප්පඤ්ඤො ජළො එලමූගො. න පටිබලො සුභාසිත දුබ්භාසිතස්ස අත්ථමඤ්ඤාතුං. අයං භික්ඛවෙ සත්තමො අක්ඛණො අසමයො බ්රහ්මචරියවාසාය.
8. පුන චපරං භික්ඛවෙ, තථාගතො ච ලොකෙ අනුප්පන්නො හොති අරහං සම්මා සම්බුද්ධො -පෙ- සත්ථා දෙවමනුස්සානං බුද්ධො භගවා. ධම්මො ච න දෙසීයති ඔපසමිකො පරිනිබ්බායිකො සම්බොධගාමී සුගතප්පවෙදිතො, අයංඤ්ච පුග්ගලො මජ්ඣිමෙසු ජනපදෙසු පච්චාජාතො හොති. සො ච හොති පඤ්ඤවා අජළො අනෙළමූගො පටිබලො සුභාසිත දුබ්භාසිතස්ස අත්ථමඤ්ඤාතුං. අයං භික්ඛවෙ, අට්ඨමො අක්ඛණො අසමයො බ්රහ්මචරියවාසාය. ඉමෙ ඛො භික්ඛවෙ, අට්ඨ අක්ඛණා අසමයා බ්රහ්මචරියවාසාය.
එකොව භික්ඛවෙ, ඛණො ච සමයො ච බ්රහ්මචරියවාසාය. කතමො එකො: ඉධ භික්ඛවෙ, තථාගතො ච ලොකෙ උප්පන්නො හොති, අරහං සම්මාසම්බුද්ධො විජ්ජාචරණසම්පන්නො සුගතො ලොකවිදූ අනුත්තරො පුරිසදම්මසාරථී සත්ථා දෙවමනුස්සානං බුද්ධො භගවා. ධම්මො ච දෙසීයති ඔපසමිකො පරිනිබ්බායිකො සම්බොධගාමී සුගතප්පවෙදිතො. අයඤ්ච පුග්ගලො මජ්ඣිමෙසු ජනපදෙසු පච්චාජාතො හොති. සො ච හොති පඤ්ඤවා අජළො අනෙළමූගො පටිබලො සුභාසිත දුබ්භාසිතස්ස අත්ථමඤ්ඤාතුං. අයං භික්ඛවෙ, එකොව ඛණො ච සමයො ච බ්රහ්මචරියවාසායාති.
1. මනුස්සලාභං ලද්ධාන සද්ධම්මෙ සුප්පවෙදිතෙ, යෙ ඛණං නාධිගච්ඡන්ති අතිනාමෙන්ති තෙ ඛණං.
2. බහූ හි අක්ඛණා වුත්තා මග්ගස්ස අන්තරායිකා, කදාචි කරහචි ලොකෙ උප්පජ්ජන්ති තථාගතා.
3. තස්සිදං සම්මුඛීභූතං යං ලොකස්මිං සුදුල්ලභං, මනුස්සපටිලාභො ච සද්ධම්මස්ස ච දෙසනා අලං වායමිතුං තත්ථ අත්ථකාමෙන ජන්තුනා.
4. කථං විජඤ්ඤා සද්ධම්මං ඛණො වෙ මා උපච්චගා ඛණාතීතා හි සොචන්ති නිරයම්හි සමප්පිතා.
5. ඉධ චෙව නං විරාධෙති සද්ධම්මස්ස නියාමතං, වාණිජොව අතීතත්ථො චිරත්තං අනුතපෙස්සති.
6. අවිජ්ජානිවුතො පොසො සද්ධම්මං අපරාධිකො, ජාතිමරණසංසාරං චිරං පච්චනුභොස්සති.
7. යෙ ච ලද්ධා මනුස්සත්තං සද්ධම්මෙ සුප්පවෙදිතෙ, අකංසු තත්ථ වචනං කරිස්සන්ති කරොන්ති වා.
8. ඛණං පච්චවිදුං ලොකෙ බ්රහ්මචරියං අනුත්තරං, යෙ මග්ගං පටිපජ්ජිංසු තථාගතප්පවෙදිතං.
9. යෙ සංවරා චක්ඛුමතා දෙසිතාදිච්චබන්ධුනා, තෙසු ගුත්තො සදා සතො විහරෙ අනවස්සුතො.
10. සබ්බෙ අනුසයෙ ඡෙත්වා මාරධෙය්ය සරානුගෙ, තෙ වෙ පාරගතා ලොකෙ යෙ පත්තා ආසවක්ඛයන්ති.
8. 1. 3. 10.
අනුරුද්ධ සුත්තං
එකං සමයං භගවා භග්ගෙසු විහරති සුංසුමාරගිරෙ භෙසකලාවනෙ මිගදායෙ. තෙන ඛො පන සමයෙන ආයස්මා අනුරුද්ධෙ චෙතීසු විහරති පාචීනවංසදායෙ. අථ ඛො ආයස්මතො අනුරුද්ධස්ස රහොගතස්ස පතිසල්ලීනස්ස එවං චෙතසො පරිවිතක්කො උදපාදි:
අප්පිච්ඡස්සායං ධම්මො නායං ධම්මො මහිච්ඡස්ස, සන්තුට්ඨස්සායං ධම්මො නායං ධම්මො අසන්තුට්ඨස්ස, පවිවිත්තස්සායං ධම්මො නායං ධම්මො සඞ්ගණිකාරාමස්ස. ආරද්ධ විරියස්සායං ධම්මො නායං ධම්මො කුසීතස්ස, උපට්ඨිතසතිස්සායං ධම්මො නායං ධම්මො මුට්ඨස්සතිස්ස, සමාහිතස්සායං ධම්මො නායං ධම්මො අසමාහිතස්ස, පඤ්ඤාවතො අයං ධම්මො, නායං ධම්මො දුප්පඤ්ඤස්සාති.
අථ ඛො භගවා ආයස්මතො අනුරුද්ධස්ස චෙතසා චෙතොපරිවිතක්කමඤ්ඤාය සෙය්යථාපි නාම බලවා පුරිසො සම්මිඤ්ජිතං වා බාහං පසාරෙය්ය, පසාරිතං වා බාහං සම්මිඤ්ජෙය්ය එවමෙව භග්ගෙසු සුංසුමාරගිරෙ භෙසකලාවනෙ මිගදායෙ අන්තරහිතො චෙතීසු පාචීනවංසදායෙ ආයස්මතො අනුරුද්ධස්ස සම්මුඛෙ පාතුරහොසි.
නිසීදි භගවා පඤ්ඤත්තෙ ආසනෙ, ආයස්මාපි ඛො අනුරුද්ධො භගවන්තං අභිවාදෙත්වා එකමන්තං නිසීදි. එකමන්තං නිසින්නං ඛො ආයස්මන්තං අනුරුද්ධං භගවා එතදවොච: සාධු සාධු අනුරුද්ධ, සාධු ඛො ත්වං අනුරුද්ධ, යං තං මහාපුරිසවිතක්කං විතක්කෙසි: අප්පිච්ඡස්සායං ධම්මො නායං ධම්මො මහිච්ඡස්ස, සන්තුට්ඨස්සායං ධම්මො නායං ධම්මො අසන්තුට්ඨස්ස, පවිවිත්තස්සායං ධම්මො නායං ධම්මො සඞ්ගණිකාරාමස්ස, ආරද්ධවිරියස්සායං ධම්මො නායං ධම්මො කුසීතස්ස, උපට්ඨිතසතිස්සායං ධම්මො නායං ධම්මො මුට්ඨස්සතිස්ස, සමාහිතස්සායං ධම්මො නායං ධම්මො අසමාහිතස්ස, පඤ්ඤවතො අයං ධම්මො නායං ධම්මො දුප්පඤ්ඤස්සාති.
තෙන හි ත්වං අනුරුද්ධ, ඉමම්පි අට්ඨමං මහාපුරිසවිතක්කං විතක්කෙහි: නිප්පපඤ්චාරාමස්සායං ධම්මො නිප්පපඤ්චරතිනො නායං ධම්මො පපඤ්චාරාමස්ස පපඤ්චරතිනොති.
යතො ඛො ත්වං අනුරුද්ධ, ඉමෙ අට්ඨමහාපුරිසවිතක්කෙ විතක්කෙස්සසි, තතො ත්වං අනුරුද්ධ, යාවදෙව ආකඞ්ඛිස්සසි විවිච්චෙව කාමෙහි විවිච්ච අකුසලෙහි ධම්මෙහි සවිතක්කං සවිචාරං විවෙකජං පීතිසුඛං පඨමං ඣානං උපසම්පජ්ජ විහරිස්සසි.
යතො ඛො ත්වං අනුරුද්ධ, ඉමෙ අට්ඨමහාපුරිසවිතක්කෙ විතක්කෙස්සසි තතො ත්වං අනුරුද්ධ, යාවදෙව ආකඞ්ඛිස්සසි විතක්කවිචාරානං වූපසමා අජ්ඣත්තං සම්පසාදනං චෙතසො එකොදිභාවං අවිතක්කං අවිචාරං සමාධිජං පීතිසුඛං දුතියං ඣානං උපසම්පජ්ජ විහරිස්සසි.
යතො ඛො ත්වං අනුරුද්ධ, ඉමෙ අට්ඨමහාපුරිසවිතක්කෙ විතක්කෙස්සසි තතො ත්වං අනුරුද්ධ, යාවදෙව ආකඞ්ඛිස්සසි, පීතියා ච විරාගා උපෙක්ඛකො ච විහරිස්සසි, සතො ච සම්පජානො සුඛඤ්ච කායෙන පටිසංවෙදිස්සසි, යං තං අරියා ආචික්ඛන්ති උපෙක්ඛකො සතිමා සුඛවිහාරීති තතියං ඣානං උපසම්පජ්ජ විහරිස්සසි.
යතො ඛො ත්වං අනුරුද්ධ, ඉමෙ අට්ඨ මහාපුරිසවිතක්කෙ විතක්කෙස්සසි, තතො ත්වං අනුරුද්ධ, යාවදෙව ආකඞ්ඛිස්සසි, සුඛස්ස ච පහානා දුක්ඛස්ස ච පහානා පුබ්බෙව සොමනස්සදොමනස්සානං අත්ථඞ්ගමා අදුක්ඛමසුඛං උපෙක්ඛාසතිපාරිසුද්ධිං චතුත්ථං ඣානං උපසම්පජ්ජ විහරිස්සසි.
යතො ඛො ත්වං අනුරුද්ධ, ඉමෙ ච අට්ඨමහාපුරිසවිතක්කෙ විතක්කෙස්සසි, ඉමෙසඤ්ච චතුන්නං ඣානානං ආභිචෙතසිකානං දිට්ඨධම්මසුඛවිහාරානං නිකාමලාභී භවිස්සසි, අකිච්ඡලාභී, අකසිරලාභී, තතො තුය්හං අනුරුද්ධ, සෙය්යථාපි නාම ගහපතිස්ස වා ගහපතිපුත්තස්ස වා නානාරත්තානං දුස්සානං දුස්සකරණ්ඩකො පූරො, එවමෙව තෙ පංසුකූලං චීවරානං ඛායිස්සති, සන්තුට්ඨස්ස විහරතො, රතියා අපරිතස්සාය, ඵාසුවිහාරාය, ඔක්කමනාය නිබ්බානස්ස.
යතො ඛො ත්වං අනුරුද්ධ, ඉමෙ ච අට්ඨමහාපුරිසවිතක්කෙ විතක්කෙස්සසි, ඉමෙසඤ්ච චතුන්නං ඣානානං ආභිචෙතසිකානං දිට්ඨධම්මසුඛවිහාරානං නිකාමලාභී භවිස්සසි, අකිච්ඡලාභී අකසිරලාභී, තතො තුය්හං අනුරුද්ධ, සෙය්යථාපි නාම ගහපතිස්ස වා ගහපතිපුත්තස්ස වා සාලීනං ඔදනො විගතකාළකො අනෙකසූපො අනෙකව්යඤ්ජනො, එවමෙව තෙ පිණ්ඩියාලොපං භොජනානං ඛායිස්සති සන්තුට්ඨස්ස විහරතො රතියා අපරිතස්සාය ඵාසුවිහාරාය ඔක්කමනාය නිබ්බානස්ස.
යතො ඛො ත්වං අනුරුද්ධ, ඉමෙ ච අට්ඨමහාපුරිසවිතක්කෙ විතක්කෙස්සසි, ඉමෙසඤ්ච චතුන්නං ඣානානං ආභිචෙතසිකානං දිට්ඨධම්මසුඛවිහාරානං නිකාමලාභී භවිස්සසි, අකිච්ඡලාභී අකසිරලාභී, තතො තුය්හං අනුරුද්ධ, සෙය්යථාපි නාම ගහපතිස්ස වා ගහපතිපුත්තස්ස වා කූටාගාරං උල්ලිත්තාවලිත්තං නිවාතං ඵුස්සිතග්ගළං{1} පිහිතවාතපානං, එවමෙව තෙ රුක්ඛමූලං සෙනාසනානං ඛායිස්සති සන්තුට්ඨස්ස විහරතො රතියා අපරිතස්සාය ඵාසුවිහාරාය ඔක්කමනාය නිබ්බානස්ස.
යතො ඛො ත්වං අනුරුද්ධ, ඉමෙ ච අට්ඨමහාපුරිසවිතක්කෙ විතක්කෙස්සසි, ඉමෙසං ච චතුන්නං ඣානානං ආභිචෙතසිකානං දිට්ඨධම්මසුඛවිහාරානං නිකාමලාභී භවිස්සසි, අකිච්ඡලාභී අකසිරලාභී, තතො තුය්හං අනුරුද්ධ, සෙය්යථාපි නාම ගහපතිස්ස වා ගහපතිපුත්තස්ස වා පල්ලඞ්කො ගොණකත්ථතො පටිකත්ථතො පටලිකත්ථතො කාදලිමිගපවරපච්චත්ථරණො සඋත්තරච්ඡදො උභතො ලොහිතකූපධානො, එවමෙව තෙ තිණසන්ථාරකො සයනාසනානං ඛායිස්සති සන්තුට්ඨස්ස විහරතො රතියා අපරිතස්සාය ඵාසුවිහාරාය ඔක්කමනාය නිබ්බානස්ස.
යතො ඛො ත්වං අනුරුද්ධ, ඉමෙ ච අට්ඨ මහාපුරිසවිතක්කෙ විතක්කෙස්සසි, ඉමෙසඤ්ච චතුන්නං ඣානානං ආභිචෙතසිකානං දිට්ඨධම්මසුඛවිහාරානං නිකාමලාභී භවිස්සසි අකිච්ඡලාභී අකසිරලාභී, තතො තුය්හං අනුරුද්ධ, සෙය්යථාපි නාම ගහපතිස්ස වා ගහපතිපුත්තස්ස වා නානා භෙසජ්ජානි, සෙය්යථීදං: සප්පිනවනීතං තෙලං මධු ඵාණිතං. එවමෙව තෙ පූතිමුත්තං භෙසජ්ජානං ඛායිස්සති සන්තුට්ඨස්ස විහරතො රතියා අපරිතස්සාය ඵාසුවිහාරාය ඔක්කමනාය නිබ්බානස්ස.
තෙන හි ත්වං අනුරුද්ධ, ආයතිකම්පි වස්සාවාසං ඉධෙව චෙතීසු පාචීනවංසදායෙ විහරෙය්යාසීති. එවං භන්තෙති ඛො ආයස්මා අනුරුද්ධො භගවතො පච්චස්සොසි.